March

“Jijɔ ɔmɛ” nɛ Yesu tu a he munyu ngɛ nɔ́ he tomi nɔ́ nɛ ngɛ Mateo 25:31-36 daa si kɛ ha dali nɛ a ngɛ nyagbe ligbi nɛ ɔmɛ a mi nɛ a ngɛ hɛ nɔ kami kaa a maa hi zugba a nɔ ɔ, nɛ ji jijɔ kpa amɛ nɛ a ngɛ wami mi mwɔnɛ ɔ. A kɛ anɔkuale yemi fĩɔ Kristo nyɛmimɛ nɛ a pɔ mɛ nu ɔ a se. A kɛ a he woɔ fiɛɛmi kɛ kaselɔ peemi ní tsumi ɔ mi ngɛ je kɛ wɛ. (Mat. 24:14; 28:19, 20) Daa jeha a, ke e piɛ otsi bɔɔ loko Kaimi ɔ maa su ɔ, jijɔ kpa amɛ fĩɔ Kristo nyɛmimɛ ɔmɛ a se kɛ guɔ a he nɛ a kɛ woɔ fiɛɛmi ní tsumi ɔ mi wawɛɛ ngɛ je kɛ wɛ ɔ nɔ. A peeɔ jã kɛ fɔɔ tsui kpakpatsɛmɛ nine konɛ a ba Kaimi ɔ. Jehanɛ hu ɔ, a toɔ blɔ nya konɛ a nyɛ nɛ a ye Kaimi ɔ ngɛ asafohi tsuo a mi ngɛ je kɛ wɛ. Jijɔ kpa amɛ ngɛ he bua jɔmi kaa a ma fĩ Kristo nyɛmimɛ ɔmɛ a se ngɛ blɔ nɛ ɔmɛ a nɔ. Jijɔ kpa amɛ le kaa Yesu naa níhi nɛ a peeɔ kɛ fĩɔ e nyɛmimɛ nɛ a pɔ mɛ nu ɔ a se ɔ kaa lɛ nɛ a ngɛ pee kɛ ngɛ hae.​—Mat. 25:37-40. w22.01 22 ¶11-12

Ke wa kase Yesu su ɔmɛ kɛ bɔ nɛ e kɛ nihi hi si ha a, lɔ ɔ tsɔɔ kaa wa ngɛ Yehowa kasee. Kaa nɔ hyɛmi nɔ́ ɔ, e na kpititsɛ ko mɔbɔ, e mi mi sã lɛ wawɛɛ ngɛ yo ko nɛ e be he wami wawɛɛ ɔ he, nɛ e mi mi sã lɛ ngɛ ni kpahi nɛ a suɔli gbo ɔ hu a he. (Maak. 1:40, 41; 5:25-34; Yoh. 11:33-35) Ke wa bɔ mɔde nɛ wa kase Yehowa a, lɔ ɔ ma ha nɛ waa hɛ kɛ su e he wawɛɛ. Yesu nane mami he ɔmɛ a se nɛ wa maa nyɛɛ ɔ maa ye bua wɔ nɛ je yaya nɛ ɔ ko gbla wa juɛmi. Nyɔ mi nɛ e nɔ jena Yesu ma gbo ɔ, e nyɛ nɛ e de ke: “I ye je ɔ nɔ kunimi.” (Yoh. 16:33) E ngɛ tsɔɔe kaa e ha we nɛ je ɔ susumi, níhi nɛ je ɔ susu kaa a he hia, kɛ je ɔ ní peepee ɔ nɛ ná e nɔ he wami. Yesu ha we nɛ nɔ́ ko nɛ je e juɛmi kɛ je nɔ́ he je nɛ e ba zugba a nɔ, nɛ ji kaa e ba wo Yehowa biɛ ɔ nguɔ ɔ nɔ. Wɔ hu nɛɛ? Níhi fuu ngɛ je nɛ ɔ mi nɛ ma nyɛ maa gbla wa juɛmi. Se kaa bɔ nɛ Yesu pee ɔ, ke wa ngɔ wa juɛmi kɛ ma Yehowa suɔmi nya ní peemi nɔ ɔ, wɔ hu wa maa “ye je ɔ nɔ kunimi.”​—1 Yoh. 5:5. w21.04 3-4 ¶7-8

Bɔfo Paulo le si nɛ Yesu wo kaa, “nɔ fɛɛ nɔ nɛ e heɔ lɛ [Yesu] yeɔ ɔ, . . . e [ma] ná neneene wami” ɔ. (Yoh. 3:16; Rom. 6:23) Ngɛ anɔkuale mi ɔ, Paulo ngɛ hemi kɛ yemi ngɛ kpɔmi nɔ́ ɔ mi. E ngɛ nɔ mi mami kaa Yehowa pee klaalo kaa e kɛ nihi nɛ a pee yayami nɛ hɛdɔ ngɛ he po a tɔmihi maa ke mɛ ke a tsake a tsui. (La 86:5) Paulo he ye kaa Mawu suɔ lɛ saminya ejakaa e le kaa Mawu tsɔ Yesu nɛ e ba gbo kɛ ha lɛ. Kadi bua womi munyuhi nɛ ngɛ Galatia Bi 2:20 ɔ nyagbe ɔ. Paulo de ke: “Mawu Bi ɔ . . . suɔ mi nɛ e ngɔ e he kɛ ha ngɛ ye he.” Paulo nui he kaa e ji yayami peelɔ, lɔ ɔ he ɔ, Mawu be nyɛe maa suɔ lɛ. Paulo de we ke, ‘I le nɔ́ he je nɛ Yehowa suɔ ye nyɛmimɛ ɔmɛ, se imi lɛɛ e be nyɛe maa suɔ mi ɔ.’ E kai Roma bi ɔmɛ ke: “Be mi nɛ loloolo ɔ wa ji yayami peeli ɔ, Kristo gbo kɛ ha wɔ.” (Rom. 5:8) Nɔ́ ko nɔ́ ko be nyɛe maa tsi suɔmi nɛ Mawu ngɛ kɛ ha wɔ ɔ nya kɔkɔɔkɔ! Paulo le bɔ nɛ Mawu suɔmi ɔ ngɛ he wami ha. Paulo le bɔ nɛ Yehowa to e tsui si kɛ ha Israel ma a ha. w21.04 22 ¶8-10

Ke o kɛ o Baiblo kaselɔ ngɛ Baiblo ɔ kasee ɔ, moo ye bua lɛ nɛ e suɔ Yehowa. Ngɛ mɛni blɔ nɔ? Mo hla blɔhi a nɔ nɛ o maa gu kɛ ye bua o Baiblo kaselɔ ɔ konɛ e kase Yehowa su ɔmɛ a he ní fuu. Moo ye bua o Baiblo kaselɔ ɔ nɛ e na Yehowa kaa bua jɔmi Mawu nɛ́ e suɔ nɛ e ye bua nihi nɛ a suɔ lɛ ɔ. (1 Tim. 1:11; Heb. 11:6) Moo ye bua o Baiblo kaselɔ ɔ nɛ e na kaa ke e kɛ níhi nɛ e ngɛ kasee ɔ tsu ní ɔ, e ma ná he se. Nɛ o tsɔɔ lɛ nya kaa se nami nɛ ɔmɛ ji nɔ́ nɛ tsɔɔ kaa Yehowa suɔ lɛ ɔ nɛ. (Yes. 48:17, 18) Ke suɔmi nɛ o Baiblo kaselɔ ɔ ngɛ kɛ ha Yehowa a mi ngɛ wae ɔ, lɔ ɔ maa wo lɛ he wami konɛ e pee tsakemihi nɛ a he hia a ngɛ e si himi mi. E sa nɛ Baiblo kaselɔ ɔ nɛ e ngɔ ní komɛ kɛ sã afɔle ngɛ e si himi mi loko e ma nyɛ maa ya e hɛ mi kɛ su baptisimi he. Eko ɔ, e ma bi nɛ Baiblo kaseli komɛ nɛ a ngɔ he lo nya níhi kɛ sã afɔle. Eko ɔ, e ma bi nɛ a kpɛti nihi fuu kɛ a huɛmɛ nɛ a sɔmɔ we Yehowa a nɛ kpa bɔmi. Eko ɔ, Baiblo kaseli ɔmɛ a kpɛti ni komɛ a weku li ma kua mɛ akɛnɛ a sume Yehowa Odasefohi ɔ he je. Yesu wo si kaa nihi nɛ a maa nyɛɛ e se ɔ a nine be si nyɛe kɔkɔɔkɔ, mohu ɔ, Yehowa maa jɔɔ mɛ kɛ mumi mi weku.​—Maak. 10:29, 30. w21.06 4 ¶8-9

Bɔfo Paulo ngɔ kaselɔ peemi ní tsumi ɔ kɛ to ngmɔ peemi he, nɛ e tsɔɔ kaa e biɔ babauu pe ní dumi pɛ. E de Korinto bi ɔmɛ ke: “I du, Apolo pue nɔ nyu . . . Nyɛ ji Mawu ngmɔ nɛ́ a ngɛ mi ní tsue.” (1 Kor. 3:6-9) Wa ji nihi nɛ a ngɛ ní tsue ngɛ “Mawu ngmɔ” mi. Enɛ ɔ he ɔ, wa duɔ wu ɔ ke wa fiɛɛ, nɛ wa pueɔ nɔ nyu ke wa tsɔɔ nihi ní. Se ngɛ jamɛ a be ɔ mi nɔuu ɔ, wa yɔseɔ kaa Mawu lɛ haa nɛ wu ɔ waa. E ji he blɔ ngua nɛ wa ná kaa wa maa fiɛɛ nɛ waa tsɔɔ nihi anɔkuale ɔ! Ní tsumi nɛ ɔ haa nɛ wa bua jɔɔ nitsɛ. Bɔfo Paulo nɛ e ye bua nihi fuu ngɛ Tɛsalonika nɛ a ba pee kaseli ɔ tsɔɔ bɔ nɛ e nu he ha, nɛ e de ke: “Mɛni ji wa hɛ kɛ nɔ fɔmi aloo wa bua jɔmi aloo wa fĩami jlasi ngɛ wa Nyɔmtsɛ Yesu hɛ mi ngɛ e bami ɔ mi ɔ? Ngɛ anɔkuale mi ɔ, anɛ pi nyɛ lo? Niinɛ, nyɛ ji wa hɛ mi nyami kɛ bua jɔmi.”​—1 Tɛs. 2:19, 20; Níts. 17:1-4. w21.07 3 ¶5; 7 ¶17

Yehowa gbla wa ti nɔ fɛɛ nɔ kɛ ba e ngɔ. (Yoh. 6:44) Mo susu nɔ́ nɛ lɔ ɔ tsɔɔ he nɛ o hyɛ. Be mi nɛ Yehowa ngɛ nimli ayɔ akpehi abɔ nɛ a ngɛ je ɔ mi ɔ he susue ɔ, e na nɔ́ ko nɛ sa kadimi ngɛ o he. E na kaa o yeɔ lɛ anɔkuale nɛ o ma nyɛ maa suɔ lɛ. (1 Kron. 28:9) Yehowa le mo, e nuɔ mo sisi nɛ e suɔ mo. Enɛ ɔ ji he wami womi munyu! Yehowa susuɔ o he wawɛɛ, nɛ e susuɔ o nyɛmimɛ Kristofohi tsuo hu a he. Kaa nɔ hyɛmi nɔ́ ɔ, Yesu ngɔ Yehowa kɛ to to nɔ hyɛlɔ he. Ke to kake laa ngɛ to 100 a kpɛti ɔ, mɛni to nɔ hyɛlɔ maa pee? E ma ‘si 99 ɔ ngɛ yoku ɔmɛ a nɔ nɛ e sɛ mi konɛ e ya hla nɔ́ nɛ laa a.’ Ke e na to ɔ nɛ e laa a, e mi mi be to ɔ fue, mohu ɔ, e bua maa jɔ. Oti ɔ ji, Yehowa to ɔmɛ tsuo a he hia lɛ. Yesu de ke: “Ye Tsɛ nɛ ngɛ hiɔwe ɔ sume kaa ni nyafii nɛ ɔmɛ a kpɛti nɔ kake hɛ mi nɛ kpata.”​—Mat. 18:12-14. w21.06 20 ¶1-2

Ke wa susu suɔmi nɛ Mawu jeɔ kpo kɛ tsɔɔ wɔ daa a he ɔ, suɔmi nɛ wa ngɛ kɛ ha Yehowa a mi maa wa, nɛ huɛ bɔmi nɛ ngɛ waa kɛ lɛ wa kpɛti ɔ hu mi maa wa. (Rom. 8:38, 39) E woɔ wɔ he wami konɛ waa kase Yesu nɔ hyɛmi nɔ́ ɔ. (1 Pet. 2:21) Ke e piɛ ligbi bɔɔ nɛ a maa ye Kaimi ɔ, wa kaneɔ Baiblo mi sanehi nɛ kɔɔ nyagbe otsi nɛ Yesu hi zugba a nɔ, e gbenɔ ɔ, kɛ si nɛ a tle lɛ ɔ he, nɛ wa susuɔ he hulɔ. Nɛ ngɛ gbɔkuɛ nɛ a maa ye Kaimi ɔ nɔ ɔ, munyu nɛ a tuɔ ngɛ Kaimi ɔ sisi ɔ haa nɛ wa kaiɔ suɔmi nɛ Yesu je kpo kɛ ha wɔ ɔ. (Efe. 5:2; 1 Yoh. 3:16) Ke wa kane bɔ nɛ Yesu ngɔ e he kɛ sã afɔle ɔ he ní, nɛ wa susu he ɔ, lɔ ɔ ma ha nɛ wa “maa ya nɔ maa nyɛɛ kaa bɔ nɛ jamɛ a nɔ ɔ nyɛɛ ɔ.” (1 Yoh. 2:6) Wa yaa nɔ nɛ wa fiaa wa pɛɛ si kaa wa maa hi Mawu suɔmi ɔ mi. (Jud 20, 21) Ke wa bɔɔ mɔde nɛ wa buɔ Mawu tue, wa tsɔɔ e biɛ ɔ he, nɛ wa haa nɛ e tsui nɔɔ e mi ɔ, lɔ ɔ tsɔɔ kaa wa ngɛ Mawu suɔmi ɔ mi. (Abɛ 27:11; Mat. 6:9; 1 Yoh. 5:3) Kaimi ɔ nɛ wa yaa a haa nɛ waa kɛ wa ní peepee tsɔɔ kaa wa ngɛ Yehowa dee ke, ‘I suɔ nɛ ma hi o suɔmi ɔ mi kɛ ya neneene!’ w22.01 23 ¶17; 25 ¶18-19

Yehowa ha wɔ he blɔ nɛ wa kɛ hla nɔ́ nɛ wa suɔ. Wɔ nitsɛmɛ wa ma nyɛ maa hla nɔ́ nɛ wa suɔ nɛ waa pee ngɛ wa si himi mi. Wa Mawu nɛ suɔ wɔ ɔ bua jɔɔ ke wa hla kaa wa ma sɔmɔ lɛ. (La 84:11; Abɛ 27:11) Wa ma nyɛ maa ngɔ he blɔ nɛ wa ngɛ kaa wa maa hla nɔ́ nɛ wa suɔ ɔ kɛ tsu ní saminya ngɛ blɔ slɔɔtohi a nɔ. Ke wa hla kaa waa kɛ ni kpahi a hiami níhi maa ye kekleekle blɔ he ɔ, lɔ ɔ tsɔɔ kaa wa ngɛ Yesu kasee. Ligbi ko benɛ pɔ tɔ Yesu kɛ e bɔfo ɔmɛ a he wawɛɛ ɔ, a hia blɔ kɛ ya he ko nɛ ngɛ dii konɛ a ya jɔɔ a he bɔɔ. Se a nyɛ we nɛ a pee jã. Mɛni he je? Ejakaa asafo kuu babauu ko na mɛ, nɛ a ngɛ hlae nɛ Yesu nɛ tsɔɔ mɛ ní. Yesu muklii mi fu we, mohu ɔ, e mi mi sã lɛ ngɛ ni ɔmɛ a he. Enɛ ɔ he ɔ, mɛni e pee? “E bɔni mɛ níhi fuu tsɔɔmi.” (Maak. 6:30-34) Ke wa kase Yesu kɛ gu wa be kɛ wa he wami nɛ waa kɛ yeɔ bua ni kpahi ɔ nɔ ɔ, wa woɔ wa hiɔwe Tsɛ ɔ hɛ mi nyami.​—Mat. 5:14-16. w21.08 3 ¶7-8

Yehowa sume nɛ nɔ́ fɛɛ nɔ́ nɛ sɔ, e sume nɛ adesahi hu nɛ a sɔ. Wa le enɛ ɔ, ejakaa Yehowa bɔ lohwe slɔɔtohi, tso slɔɔtohi kɛ adesahi nɛ a je ekpa. Wa ti nɔ fɛɛ nɔ je ekpa. Enɛ ɔ he ɔ, Yehowa kɛ mo tui ni kpahi a he. E hyɛɛ o tsui mi, nɛ e naa nɔmlɔ tutuutu nɛ o ji. (1 Sam. 16:7) E le o nyɛmihi, o gbɔjɔmihi kɛ bɔ nɛ a tsɔse mo ha. E hyɛ we blɔ kaa o pee nɔ́ ko nɛ o be nyɛe maa pee. E sa nɛ waa na wa he kaa bɔ nɛ Yehowa naa wɔ ɔ. Ke wa pee jã a, wa ma ná “juɛmi nɛ mi tsɔ,” nɛ wa be susue kaa wa nɔ kuɔ, loo wa ba si tsɔ. (Rom. 12:3) Wa ma nyɛ maa kase ni kpahi a nɔ hyɛmi nɔ́ kpakpa a. Kaa nɔ hyɛmi nɔ́ ɔ, eko ɔ, wa le nyɛminyumu ko loo nyɛmiyo ko nɛ e bɔɔ mɔde ngɛ fiɛɛmi mi. (Heb. 13:7) Wa ma nyɛ maa kase ní kɛ je e ngɔ, nɛ waa le blɔ nɔ nɛ wa maa gu kɛ ya wa hɛ mi ngɛ fiɛɛmi ní tsumi ɔ mi. (Filip. 3:17) Se slɔɔto ngɛ nɔ ko nɔ hyɛmi nɔ́ kpakpa nɛ wa maa kase, kɛ wa he nɛ waa kɛ maa to nɔ ko he ɔ a kpɛti. w21.07 20 ¶1-2

O ma nyɛ maa fia o hemi kɛ yemi ngɛ Bɔlɔ ɔ mi ɔ kɛ ma si kɛ gu lohwehi, tsohi kɛ dodoehi nɛ o ma kpa mɛ si ɔ nɔ. (La 19:1) Ke o ya nɔ nɛ o kase ní nɛ ɔmɛ a he ní ɔ, hemi kɛ yemi nɛ o ngɛ kaa Yehowa ji Bɔlɔ ɔ mi maa wa. Ke o ngɛ adebɔ níhi a he ní kasee ɔ, mo kadi níhi nɛ o ma nyɛ maa kase ngɛ wa Bɔlɔ ɔ he. (Rom. 1:20) Kaa nɔ hyɛmi nɔ́ ɔ, pu ɔ kpɛɔ ha wɔ nɛ e yeɔ bua wɔ nɛ wa he dɔɔ la, nɛ e yeɔ bua adebɔ ní kpahi nɛ wami ngɛ a mi nɛ a ngɛ zugba a nɔ ɔ hulɔ. Se he wami komɛ nɛ jeɔ pu ɔ mi ɔ ma nyɛ maa ye adebɔ níhi awi. Enɛ ɔ he ɔ, e he hia nɛ a po adesahi a he piɛ. Nɛ niinɛ hu ɔ, a ngɛ wa he piɛ poe! Ngɛ mɛni blɔ nɔ? Nɔ́ ko nɛ a tsɛɛ ke ozone layer bɔle zugba a kɛ kpe, nɛ e poɔ wa he piɛ konɛ he wami yaya nɛ jeɔ pu ɔ mi ɔ ko ye wɔ awi. Ke he wami yaya nɛ jeɔ pu ɔ mi ɔ he ngɛ wae ɔ, ozone layer nɛ́ poɔ zugba a he piɛ ɔ hu hiɛɛ. Kɛ ba si hiɛ ɔ, anɛ o he we yi kaa nɔ ko lɛ to ní nɛ ɔmɛ a he blɔ nya, nɛ e ji Bɔlɔ nɛ ngɛ suɔmi kɛ nile lo? w21.08 17 ¶9-10

Ke a baptisi nɔ ko se po ɔ, e sa nɛ waa ya nɔ nɛ waa suɔ lɛ, nɛ waa bu lɛ. (1 Yoh. 4:20) Mɛni blɔ nɔ wa maa gu kɛ pee enɛ ɔ? Nɔ́ kake nɛ wa maa pee ji kaa wa ma he wa nyɛmi ɔ ye, nɛ wa ná nɔ mi mami ngɛ e mi kaa e hɛɛ juɛmi nɛ da. Kaa nɔ hyɛmi nɔ́ ɔ, ke wa li nɔ́ he je nɛ e pee nɔ́ ko po ɔ, wa be susue kaa e hɛɛ juɛmi nɛ dɛ, loo e ngɛ e nɔ́ mi foe. Mohu ɔ, wa ma je bu kpo kɛ ha wa nyɛmi ɔ, nɛ waa na lɛ kaa e nɔ kuɔ pe wɔ. (Rom. 12:10; Filip. 2:3) Ngɛ anɔkuale mi ɔ, e sa nɛ waa na nihi tsuo mɔbɔ nɛ wa mi mi nɛ jɔ kɛ ha mɛ. Ke wa suɔ nɛ waa piɛɛ nihi nɛ a ma tsɛ Yehowa ke a Tsɛ ɔ he kɛ ya neneene ɔ, lɛɛ e sa nɛ waa kɛ Mawu Munyu ɔ nɛ tsu ní ngɛ wa si himi mi. Kaa nɔ hyɛmi nɔ́ ɔ, Yesu tsɔɔ kaa e sa nɛ waa na nihi tsuo nɛ wa he nyɛli po piɛɛ he ɔ mɔbɔ, nɛ wa mi mi nɛ jɔ kɛ ha mɛ. (Luka 6:32-36) Se eko ɔ, wa ma yɔse kaa enɛ ɔ peemi he waa be komɛ. Ke jã a, lɛɛ e sa nɛ waa kase bɔ nɛ Yesu susuɔ níhi a he kɛ bɔ nɛ e peeɔ e ní ha a. Ke wa pee nɔ́ fɛɛ nɔ́ nɛ wa ma nyɛ kɛ bu Yehowa tue, nɛ wa kase Yesu ɔ, wa tsɔɔ wa hiɔwe Tsɛ ɔ kaa wa suɔ nɛ waa piɛɛ e weku ɔ he kɛ ya neneene. w21.08 6 ¶14-15

Ngɔɔ o hɛ kɛ fɔ Yehowa nɔ. Yehowa wo si kaa ke wa ngɔ wa hɛ kɛ fɔ e nɔ nɛ waa kɛ wa nyɛmi tsuo sɔmɔ lɛ ɔ, e maa jɔɔ wɔ. Baiblo ɔ tu ni komɛ nɛ a ngɔ a he kɛ wo Yehowa sɔmɔmi mi vii ɔ a he munyu. Ngɛ nihi fuu a blɔ fa mi ɔ, benɛ a pee níhi nɛ tsɔɔ kaa a ngɔ a hɛ kɛ fɔ Yehowa nɔ ɔ se loko e jɔɔ mɛ. Kaa nɔ hyɛmi nɔ́ ɔ, benɛ Abraham si e we “pohu e li he nɛ e yaa a” se loko Yehowa jɔɔ lɛ. (Heb. 11:8) Benɛ Yakob kɛ bɔfo ko nɔ kunɔ ɔ se loko Yehowa jɔɔ lɛ ngɛ blɔ klɛdɛɛ nɔ. (1 Mose 32:24-30) Benɛ osɔfo ɔmɛ kɛ a nane ma Yordan Pa a mi ɔ se loko Israel bi ɔmɛ nyɛ nɛ a po pa a kɛ ya Si Womi Zugba a nɔ. (Yosh. 3:14-16) Jehanɛ hu ɔ, o ma nyɛ ma ná Yehowa sɔmɔli nɛ a ngɛ mwɔnɛ ɔ nɛ a ngɔ a hɛ kɛ fɔ e nɔ nɛ a bli a sɔmɔmi ní tsumi ɔ mi ɔ a nɔ hyɛmi ní ɔmɛ a he se. w21.08 29-30 ¶12-14

Nyɛmimɛ nyumuhi kɛ yihi nɛ nyɛ wa ngɛ jeha mi, nyɛ nɔ hyɛmi ní ɔmɛ ha nɛ wa na kaa se nami ngɛ he kaa wa maa kase Baiblo sisi tomi mlaahi nɛ wa kɛ tsu ní ngɛ wa si himi mi. Nyɛ le bɔ nɛ níhi ya nɔ ha blema, nɛ nyɛ na hu kaa e he hia nɛ nyɛɛ kplɛɛ tsakemihi nɛ a peeɔ ɔ nɔ. Nyɛ nihi nɛ nyɛ wa ngɛ jeha mi nɛ a baptisi nyɛ lingmi nɛ ɔ hu ma nyɛ maa ye bua ni kpahi ngɛ blɔ slɔɔtohi a nɔ. Nihewi kɛ yihewi maa suɔ nɛ nyɛ de mɛ nyɛ níhi a si kpamihi kɛ ní komɛ nɛ nyɛ kase ngɛ nyɛ si himi mi. Ke nyɛ “ya nɔ nɛ nyɛ ha” nɔ nɔ́ kɛ gu níhi nɛ nyɛ kase ngɛ nyɛ si himi mi nɛ nyɛɛ kɛ ma tsɔse ni kpahi ɔ nɔ ɔ, Yehowa maa jɔɔ nyɛ wawɛɛ. (Luka 6:38) Ke nyɛ nihi nɛ nyɛ wa ngɛ jeha mi ɔ hɛ kɛ su nihewi kɛ yihewi a he ɔ, nyɛ ma nyɛ maa ye bua nyɛ sibi. (Rom. 1:12) Nyɛ ti nɔ fɛɛ nɔ ngɛ nɔ́ ko nɛ he jua wa nɛ e nyɛmi be. Nihi nɛ a wa ngɛ jeha mi ɔ ná nile kɛ níhi a si kpami ngɛ si himi mi. Nihewi kɛ yihewi hu ngɛ he wami. Ke nyɛmimɛ nɛ a wa ngɛ jeha mi ɔ kɛ nihewi kɛ yihewi pee kake kɛ tsu ní kaa huɛmɛ ɔ, e woɔ wa hiɔwe Tsɛ nɛ ngɛ suɔmi ɔ hɛ mi nyami, nɛ asafo ɔ hu náa jɔɔmi babauu. w21.09 8 ¶3; 13 ¶17-18

Mɛni he je nɛ blɔ nɔ nɛ a gu kɛ gbe Yesu ɔ ha nɛ Yuda bi fuu a nane tɔ̃tɔ̃ ɔ? A susu kaa Yesu nɛ a gbe lɛ ngɛ sɛumi tso nɔ ɔ ha nɛ e pee kaa nɔ́ nɛ e ji yayami peelɔ kɛ ojo fialɔ, enɛ ɔ he ɔ, a he we yi kaa lɛ ji Mesia a. (5 Mose 21:22, 23) Yuda bi nɛ a nane tɔ̃tɔ̃ ɔ yɔse we kaa Yesu yi fɔ, se e nya nɛ a po nɛ a wa lɛ yi mi ngɛ blɔ nɛ dɛ nɔ. Kojoli nɛ a ye Yesu sane ɔ yi dami sane. Kojoli nɛ a ngɛ Yuda bi a kojomi he ngua a kɛ oya yemi bua a he nya nɛ a kojo Yesu. A kɛ nɔ kojomi he blɔ tsɔɔmi ɔmɛ tsu we ní. (Luka 22:54; Yoh. 18:24) Kojoli ɔmɛ yi dami sane benɛ a nu munyuhi nɛ a po kɛ fɔ Yesu nɔ ɔ. A bɔ mɔde kaa a ma hla “lakpa odase ko . . . kɛ si Yesu konɛ a gbe lɛ.” (Mat. 26:59; Maak. 14:55-64) Nɛ benɛ a tle Yesu si ɔ, kojoli nɛ ɔmɛ nɛ a yi anɔkuale ɔ ha Roma ta buli ɔmɛ “sika hiɔ fuu” konɛ a gbɛ lakpa munyu kɛ fia kɛ tsɔɔ nɔ́ he je nɛ Yesu be yɔkɔ ɔ mi ɔ.​—Mat. 28:11-15. w21.05 11 ¶12-13

Yehowa ma nyɛ ma kpata Satan je ɔ hɛ mi be fɛɛ be nɛ e suɔ. Se e pee we jã, mohu ɔ, e to e tsui si, nɛ e tsui si tomi ɔ ba pee jɔɔmi kɛ ha wɔ! Adam kɛ Hawa a bimɛ nɛ a fɔ ngɛ je nɛ ɔ mi ɔ tsuo ba pee nihi nɛ a yi mluku. Se loloolo ɔ, Yehowa suɔ mɛ, nɛ e susuɔ a he, nɛ e wo si kaa e ma kpata je yaya nɛ ɔ hɛ mi. (1 Yoh. 4:19) E to be nɛ e kɛ maa po nɔ́ nami tsuo se. Anɛ e sɛ nɛ suɔmi nɛ Yehowa ngɛ kɛ ha wɔ ɔ nɛ wo wɔ he wami nɛ wɔ hu wa fĩ si kɛ ya si jamɛ a be ɔ lo? Yehowa pee si fimi he nɔ hyɛmi nɔ́ nɛ pe kulaa. Yesu hu kase e Tsɛ ɔ si fimi ɔ. Benɛ Yesu ngɛ zugba a nɔ ɔ, nihi jɛ lɛ, a pee lɛ nisɛ ní, nɛ a gbe lɛ ngɛ sɛumi tso nɔ ngɛ wa he. Se Yesu fĩ si ngɛ si fɔfɔɛ nɛ ɔmɛ a mi. (Heb. 12:2, 3) E ngɛ heii kaa Yehowa si fimi ɔ lɛ wo Yesu he wami nɛ e nyɛ nɛ e fĩ si ɔ nɛ. Yehowa si fimi ɔ ma nyɛ maa wo wɔ he wami hulɔ. w21.07 12-13 ¶15-17

Daa ligbi ɔ, wa hiɔwe Tsɛ ɔ naa wɔ mɔbɔ nɛ e kɛ wa tɔmi keɔ wɔ. (La 103:10-14) Yesu se nyɛɛli ɔmɛ yi mluku, enɛ ɔ he ɔ, e na mɛ mɔbɔ nɛ e kɛ a tɔmihi ke mɛ. E pee klaalo po kaa e maa ngɔ e wami kɛ sã afɔle konɛ a nyɛ nɛ a ngɔ wa he yayamihi kɛ ke wɔ. (1 Yoh. 2:1, 2) Ke waa kɛ wa nyɛmimɛ a tɔmihi ‘pa mɛ faa’ a, lɔ ɔ haa nɛ suɔmi nɛ ngɛ wa mumi mi weku ɔ mi ɔ mi waa. (Efe. 4:32) Ngɛ anɔkuale mi ɔ, e be gbɔjɔɔ kaa waa kɛ wa nyɛmimɛ a tɔmihi maa ke mɛ, enɛ ɔ he ɔ, e biɔ nɛ waa bɔ mɔde wawɛɛ. Nyɛmiyo ko tsɔɔ kaa munyu ko nɛ yi ji “Nyɛɛ Kɛ Nyɛ Sibi A Tɔmi Nɛ Pa Mɛ” nɛ e kane ngɛ Hwɔɔmi Mɔ ko mi ɔ ye bua lɛ. E de ke: “Hwɔɔmi Mɔ ɔ tsɔɔ kaa tɔmi nɛ waa kɛ maa ke ɔ tsɔɔ we kaa wa bua jɔ nɔ́ yaya nɛ a pee wɔ ɔ he loo e gba we wa nya tsɔ. Se mohu, ke wa ngɔ tɔmi kɛ ke ɔ, e tsɔɔ kaa wa ngmɛɛ abofu ɔ he, nɛ wa suɔ nɛ waa ya nɔ nɛ waa di tue mi jɔmi se.” Ke waa kɛ wa nyɛmimɛ a tɔmihi ke mɛ ɔ, lɔ ɔ tsɔɔ kaa wa suɔ mɛ nɛ wa ngɛ Yehowa nɛ ji wa hiɔwe Tsɛ ɔ kasee. w21.09 23-24 ¶15-16

Yesu suɔ anɔkuale nɛ kɔɔ Mawu kɛ e yi mi tomihi a he ɔ. Bɔ nɛ Yesu ba e je mi ha a tsɔɔ kaa e le anɔkuale ɔ, nɛ e ha nɛ ni kpahi hu le. (Yoh. 18:37) Yesu se nyɛɛli anɔkualetsɛmɛ hu suɔ anɔkuale ɔ wawɛɛ. (Yoh. 4:23) Ngɛ anɔkuale mi ɔ, bɔfo Petro tsɛ Kristofohi a hemi kɛ yemi ɔ kaa “anɔkuale blɔ ɔ.” (2 Pet. 2:2) Akɛnɛ Kristofohi nɛ a hi si ngɛ kaseli ɔmɛ a be ɔ mi ɔ suɔ anɔkuale ɔ he je ɔ, a kua tsɔɔmihi, kusumihi kɛ adesahi a susumihi nɛ kɛ anɔkuale ɔ kpa we gbi ɔ. (Kol. 2:8) Mwɔnɛ ɔ hu ɔ, anɔkuale Kristofohi bɔɔ mɔde nɛ a ‘nyɛɛɔ ngɛ anɔkuale ɔ nya’ kɛ gu a hemi kɛ yemi kɛ a ní peepee nɛ a kɛ daa Mawu Munyu ɔ nɔ ɔ nɔ. (3 Yoh. 3, 4) Mwɔnɛ ɔ, Mawu we bi de we ke a nu nɔ́ fɛɛ nɔ́ nɛ ngɛ Baiblo ɔ mi ɔ sisi saminya. Bɔ nɛ a tsɔɔ Baiblo tsɔɔmi komɛ a sisi ha, kɛ bɔ nɛ a to ní komɛ a he blɔ nya ha ngɛ asafo ɔ mi be komɛ ɔ dɛ. Ke a na kaa e he hia nɛ a pee tsakemi ko ɔ, a peeɔ jã. w21.10 21-22 ¶11-12

Kaa bɔ nɛ a fiaa gbogbohi kɛ woɔ mahi a he blema nɛ e poɔ ma bi ɔmɛ a he piɛ ɔ, jã kɛ̃ nɛ Yehowa suɔmi nɛ se pui ɔ bɔleɔ wɔ, nɛ e poɔ wa he piɛ ngɛ níhi nɛ ma nyɛ maa ka wa anɔkuale yemi ɔ a he. Jehanɛ hu ɔ, Yehowa suɔmi nɛ se pui ɔ haa nɛ e gblaa wɔ kɛ baa e ngɔ. (Yer. 31:3) La polɔ David tsɔɔ bɔ nɛ Mawu poɔ e we bi a he piɛ ha ngɛ blɔ kpa nɔ. E de ke: “Mawu ji ye wesa he nɛ ngɛ slɔkee, Mawu ɔ nɛ jeɔ suɔmi nɛ se pui kpo kɛ tsɔɔ mi ɔ.” E de ngɛ Yehowa he hu ke: “Lɛ ji ye suɔmi nɛ se pui kɛ ye he piɛ pomi he, ye wesa he nɛ he wa kɛ ye kpɔlɔ, ye tsɛ̃i kɛ Nɔ nɛ i saa we ngɛ e ngɔ.” (La 59:17; 144:2, NW) Mɛni he je nɛ David ngɔ Yehowa suɔmi nɛ se pui ɔ kɛ to wesa he kɛ he piɛ pomi nɔ́ he ɔ? Ke wa sɔmɔɔ Yehowa ngɛ anɔkuale mi ɔ, he fɛɛ he nɛ wa ngɛ ɔ, e ma ha wɔ he piɛ pomi níhi nɛ wa hia a konɛ wa kɛ baa huɛ bɔmi kpakpa nɛ ngɛ waa kɛ lɛ wa kpɛti ɔ yi. w21.11 6 ¶14-15

Benɛ Yesu kɛ e kaseli ɔmɛ kɛ kɔɔhiɔ ngua ko ya kpe ngɛ wo ɔ nɔ ɔ, Yesu ngɔ jamɛ a si fɔfɔɛ ɔ kɛ ye bua e kaseli ɔmɛ konɛ a na hehi nɛ a hia hemi kɛ yemi fuu ngɛ. (Mat. 8:23-26) Benɛ kɔɔhiɔ ngua a ngɛ fiae ɔ, Yesu lɛɛ e hwɔɔ mahe fuaa. E kaseli ɔmɛ ye gbeye, nɛ a tsɛ̃ɛ lɛ kaa e he a yi wami. A Nyɔmtsɛ ɔ bi mɛ ke: “Mɛni he je nɛ nyɛ ngɛ gbeye yee kikɛ nɛ ɔ? Nyɛ hemi kɛ yemi pi pɛ.” Anɛ o kɛ “kɔɔhiɔ ngua ko” ngɛ kpee ngɛ o si himi mi lo? Eko ɔ, adebɔ mi oslaa ha nɛ o ngɛ nɔ́ nae, aloo eko ɔ, hiɔ ko nɛ nya wa nɛ ngɛ kaa kɔɔhiɔ ngua ha nɛ o kɔni mi jɔ̃ nɛ o li nɔ́ nɛ o maa pee. Eko ɔ, o maa pee yeyeeye be komɛ, se ko ha nɛ yeyeeye peemi nɛ ɔ nɛ tsi o nya ngɛ o hɛ nɛ o kɛ maa fɔ Yehowa nɔ ɔ he. Moo hɛ kɛ su Yehowa he kɛ gu sɔlemi nɔ. Moo wo o hemi kɛ yemi ɔ mi he wami kɛ gu o yi mi tɛ nɛ o ma pue ngɛ bɔ nɛ Yehowa ye bua mo ha be ko nɛ be ɔ nɔ. (La 77:11) O ma nyɛ ma ná nɔ mi mami kaa Yehowa be mo kuae gblegbleegble. w21.11 22 ¶7, 10

Eko ɔ, nɔ ko ma susu kaa be abɔ nɛ ke nɔ ko nɔ́ fɔɔ si nɛ e ya wo we ɔ, lɛɛ e ngɛ mlaa nɛ ɔ nɔ yee. Se e ma nyɛ maa ba kaa e ngɛ jue ngɛ blɔ kpahi a nɔ. Kaa nɔ hyɛmi nɔ́ ɔ, ke jua yelɔ ko kɛ sɛnihi loo susumi níhi nɛ a dɛ juaa ní ɔ, e ngɛ jue. 3 Mose 19: 13 ɔ de ke: “Koo fia o nyɛmi ojo.” Lɔ ɔ ke nɔ ko yi anɔkuale ngɛ e ní tsumi mi ɔ, e ngɛ jue. Kita kpaanyɔne ɔ tsɔɔ kaa jumi hí. Se ní kpahi nɛ ngɛ Mose Womi Nɛ Ji Etɛ ɔ mi ɔ ye bua wɔ nɛ wa na bɔ nɛ waa kɛ sisi tomi mlaa nɛ ngɛ mlaa nɛ ɔ mi ɔ ma tsu ní ha, nɛ ji bɔ nɛ a maa ye anɔkuale ngɛ nɔ́ fɛɛ nɔ́ nɛ a peeɔ ɔ mi ha. E hi kaa wa ma susu bɔ nɛ Yehowa naa jumi ha kɛ bɔ nɛ e naa anɔkuale nɛ a yí ɔ ha a he. Wa ma nyɛ ma bi wa he ke: ‘Ke i susu 3 Mose 19:11-13 ɔ he ɔ, anɛ i naa kaa e sa nɛ ma pee tsakemi ngɛ ye si himi mi, titli ɔ, ngɛ ye ní tsumi mi lo?’ w21.12 9-10 ¶6-8

Ke o ngɛ sɔlee ɔ, mo kpa Yehowa pɛɛ ngɛ tɔmi komɛ nɛ o tɔ̃ ngɛ ligbi ɔ mi ɔ a he. Se ke o tɔ̃ tɔmi ko nɛ hɛdɔ ngɛ he ɔ, e he maa hia nɛ o de nikɔtɔma amɛ nɛ a ye bua mo. A maa bu mo tue, nɛ a maa je suɔmi mi nɛ a kɛ yemi kɛ buami nɛ ngɛ Mawu Munyu ɔ mi ɔ ma ha mo. A kɛ mo maa sɔle, nɛ a ma bi Yehowa kaa e ya nɔ nɛ e da Yesu kpɔmi afɔle sami ɔ nɔ kɛ “tsa” mo ngɛ mumi mi. (Yak. 5:14-16) Jehanɛ hu ɔ, e maa hi kaa o ma pue o yi mi tɛ ngɛ kpɔmi nɔ́ ɔ he. Eko ɔ, o maa hao wawɛɛ ke o susu bɔ nɛ Mawu Bi ɔ na nɔ́ ha a he. Se ke o pue o yi mi tɛ ngɛ kpɔmi nɔ́ ɔ he ɔ, suɔmi nɛ o ngɛ kɛ ha Yesu kɛ e Tsɛ ɔ mi maa wa wawɛɛ. Ke wa yaa Yesu Gbenɔ Kaimi ɔ daa jeha nɛ waa kɛ kã fɔɔ ni kpahi hu nine ɔ, lɔ ɔ ma ha nɛ wa hɛ nɛ sa kpɔmi nɔ́ ɔ wawɛɛ. Yehowa ha wɔ he blɔ nɛ se be kaa waa tsɔɔ ni kpahi e Bi ɔ he ní! w21.04 18-19 ¶13-16

Mo susu nɔ́ nɛ Yesu pee benɛ nihi babauu kɛ lɛ ya kpe ngɛ Yoku ko nɔ ɔ he nɛ o hyɛ. Yesu sɔle nyɔ ɔ mi tsuo, nɛ eko ɔ, pɔ tɔ e he. Se benɛ e na ni ɔmɛ ɔ, e ngɔ e juɛmi kɛ ma nihi nɛ a be he wami kɛ ohiatsɛmɛ nɛ a ngɛ a kpɛti ɔ a nɔ. E tsa ni ɔmɛ nɛ e tu munyu ko nɛ nihi le wawɛɛ ɔ kɛ tsɔɔ ni ɔmɛ. Lɔ ɔ ji Yoku ɔ Nɔ Fiɛɛmi ɔ nɛ. (Luka 6:12-20) Yesu ná be kɛ ha ni kpahi. Mo susu bɔ nɛ Yesu nu he ha benɛ a po e huɛ nɛ ji Yohane Nɔ Baptisilɔ ɔ yi ɔ he nɛ o hyɛ. Baiblo ɔ de ke: “Benɛ Yesu nu [Yohane gbenɔ ɔ he ɔ], e sɛ lɛ mi, nɛ e je lejɛ ɔ kɛ ho he ko banee ya konɛ lɛ nɔ kake too nɛ e ya hi lejɛ ɔ.” (Mat. 14:10-13) Se benɛ e ya su he ko nɛ ngɛ banee ɔ, nimli asafo ɔ ngɛ lejɛ ɔ momo. (Maak. 6:31-33) E yɔse kaa a hia yemi kɛ buami kɛ je Mawu ngɔ, lɔ ɔ he ɔ, oya nɔuu nɛ e tsu a hiami níhi a he ní kɛ ha mɛ.​—Luka 9:10, 11. w22.02 21 ¶4, 6

Mɛni nɛ e sa nɛ waa pee ke wa yɔse kaa wa tɔ̃ wa nyɛmi Kristofo no ko nɔ? E sa nɛ waa je wa tsui mi nɛ waa sɔle ha Yehowa ngɛ he. Wa ma nyɛ ma bi lɛ ke e ye bua wɔ nɛ wa dla waa kɛ wa nyɛmi ɔ wa kpɛti. Jehanɛ hu ɔ, e sa nɛ wa he be kɛ susu bɔ nɛ wa peeɔ wa ní ha a he. Wa ma nyɛ ma bi wa he sane komɛ kaa: ‘Anɛ i suɔ nɛ ma kplɛɛ ye tɔmi nɔ, nɛ ma je he si bami mi kɛ kpa pɛɛ nɛ tue mi jɔmi nɛ hi si lo? Kɛ Yehowa kɛ Yesu maa nu he ha kɛɛ ke i bɔ mɔde kaa ma dla i kɛ ye nyɛmimɛ wa kpɛti?’ Heto nɛ wa ma ha a ma nyɛ maa wo wɔ he wami nɛ waa bu Yesu tue nɛ waa hɛ kɛ su wa nyɛmi Kristofo no nɛ wa tɔ̃ e nɔ ɔ he nɛ wa dla waa kɛ lɛ wa kpɛti. Ke wa ya wa nyɛmi ko ngɔ kaa wa suɔ nɛ wa dla waa kɛ lɛ wa kpɛti ɔ, e sa nɛ waa ba wa he si. (Efe. 4:2, 3) E sa nɛ waa hɛ kɛ su wa nyɛmi ɔ he kɛ yi mi tomi ɔ kaa wa maa ye bua konɛ tue mi jɔmi nɛ hi waa kɛ lɛ wa kpɛti ekohu. Mo kai kaa tue mi jɔmi nɛ maa hi o kɛ o nyɛmi ɔ nyɛ kpɛti ɔ he hia pe nɛ a maa le nɔ nɛ e nɔ́ da kɛ nɔ nɛ e nɔ́ dɛ.​—1 Kor. 6:7. w21.12 26 ¶13-16

Yesu hao ejakaa e le kaa Yuda bi ɔmɛ a kpɛti nihi fuu be Matsɛ Yemi sɛ gbi ɔ nɔ kplɛɛe, nɛ kɛ gu lɔ ɔ nɔ ɔ, a ma kpata Yerusalem ma a hɛ mi. Ke e ba jã a, Yuda no nɛ e yi ma ná wami ɔ ma ya je nyɔguɛ tso mi. (Luka 21:20-24) Aywilɛho sane ji kaa Yuda bi ɔmɛ a kpɛti nihi fuu kua Yesu kaa bɔ nɛ e de kɛ fɔ si ɔ. Kɛ nihi fuu peeɔ a ní ngɛ Matsɛ Yemi sɛ gbi ɔ he ha kɛɛ ngɛ he nɛ o ngɛ ɔ? Ke nihi bɔɔ ko pɛ nɛ a buɔ anɔkuale ɔ nɛ o fiɛɛɔ tue ɔ, lɛɛ mɛni o ma nyɛ maa kase ngɛ ya nɛ Yesu fo ɔ mi? Yehowa susuɔ nihi a he. Ya nɛ Yesu fo ɔ kaiɔ wɔ bɔ nɛ Yehowa susuɔ nihi a he ha. “E sume nɛ a kpata nɔ ko nɔ ko hɛ mi, mohu ɔ, e suɔ kaa nihi tsuo nɛ a tsake a tsui.” (2 Pet. 3:9) Mwɔnɛ ɔ hu ɔ, wa bɔɔ mɔde kaa wa maa fiɛɛ sane kpakpa a kɛ tsɔɔ nihi be fɛɛ be kɛ tsɔɔ kaa wa suɔ mɛ.​—Mat. 22:39. w22.01 16 ¶10-12

Ke o pue o yi mi tɛ ngɛ níhi nɛ Yehowa pee kɛ ha e we bi kɛ níhi nɛ e pee kɛ ha mo ɔ he ɔ, o hemi kɛ yemi mi maa wa wawɛɛ. Nɔ́ nɛ he hia pe kulaa ji kaa, suɔmi nɛ o ngɛ kɛ ha Yehowa a mi maa wa. Suɔmi ji su ko nɛ maa wo mo he wami nɛ o bu Yehowa tue, o ngɔ níhi kɛ sa afɔle konɛ o nyɛ nɛ o sa e hɛ mi, nɛ o fĩ si ngɛ kahi a mi. (Mat. 22:37-39; 1 Kor. 13:4, 7; 1 Yoh. 5:3) Nɔ́ ko nɔ́ ko be nɛ he jua wa pe huɛ bɔmi kpakpa nɛ maa hi o kɛ Yehowa nyɛ kpɛti ɔ! (La 63:1-7) Mo kai kaa sɔlemi, ní kasemi kɛ yi mi tɛ puemi ji wa jami ɔ fã. Mo hla he ko nɛ ngɛ dii nɛ ngmlaa be nɛ o kɛ Yehowa nɛ sɛɛ ní kaa bɔ nɛ Yesu pee ɔ. Ko ha nɛ níhi nɛ a he hia we nɛ gbla o juɛmi. Mo bi Yehowa nɛ e ye bua mo nɛ o nyɛ nɛ o ngɔ o juɛmi kɛ ma Mawu jami mi níhi nɛ o peeɔ ɔ a nɔ. Ke o kɛ o be tsu ní saminya amlɔ nɛ ɔ, Yehowa maa jɔɔ mo, nɛ o maa hi si kɛ ya neneene ngɛ Mawu je ehe ɔ mi.​—Maak. 4:24. w22.01 31 ¶18-20

Wa susumihi náa wa ní peepeehi a nɔ he wami. Enɛ ɔ he je nɛ Yesu de wɔ ke, wa ko susu níhi nɛ ma ha nɛ waa pee yayami nɛ hɛdɔ ngɛ a he ɔ he ɔ nɛ. (Mat. 5:21, 22, 28, 29) Ngɛ anɔkuale mi ɔ, wa suɔ nɛ waa sa wa hiɔwe Tsɛ ɔ hɛ mi. Lɔ ɔ he ɔ, e he hia wawɛɛ kaa wa ma kua susumi yayamihi nɛ baa wa juɛmi mi ɔ oya nɔuu! Yesu de ke: “Nɔ́ fɛɛ nɔ́ nɛ jeɔ nɔ nya mi kɛ baa a, nɔ tsui mi nɛ e je ɔ.” (Mat. 15:18) Wa munyu tutui tsɔɔ níhi nɛ ngɛ wa tsui mi. Lɔ ɔ he ɔ, mo bi o he ke: ‘Anɛ ma tu anɔkuale ke lɔ ɔ maa ngɔ nyagba kɛ ba po lo? Ke i ji nɔ ko nɛ i sɛ gba si himi mi ɔ, anɛ i hyɛɛ saminya konɛ i kɛ yo aloo nyumu kpa ko he numi nɛ ko fiɛ lo? Anɛ i kuaa munyuhi nɛ sɛ tumi kulaa lo? Ke nɔ ko wo ye mi mi la a, anɛ i toɔ ye tsui si nɛ i kɛ lɛ tuɔ munyu lo?’ Ke o susu sane bimi nɛ ɔmɛ a he saminya a, e maa ye bua mo wawɛɛ. Lɔ ɔ he ɔ, ke wa ngɛ hlae nɛ wa je su momo ɔ, e sa nɛ wa kpa nɔ jɛmi munyuhi, lakpa munyuhi kɛ munyu kpahi nɛ sɛ tsuo tumi. w22.03 5 ¶12-14

Nihi nɛ a biɔ ga womi ma nyɛ maa mwɔ yi mi kpɔ nɛ da pe nihi nɛ a bi we ga womi nɛ a mlɛɔ kaa nɔ ko nɛ ba wo mɛ ga. Lɔ ɔ he ɔ, bɔɔ mɔde nɛ o bi ga womi. Mɛni be nɛ wa ma nyɛ ma bi wa nyɛmi Kristofo no ko ga womi? Mo susu si fɔfɔɛ nɛ ɔmɛ a he nɛ o hyɛ. (1) Nyɛmiyo ko de fiɛɛlɔ ko nɛ e he be kaa e piɛɛ e he nɛ a kɛ nɔ ko nɛ ya kase Baiblo ɔ nɛ pee se ɔ, e bi lɛ blɔ nɔ nɛ e ma nyɛ maa gu konɛ e ya hɛ mi ngɛ ní tsɔɔmi mi. (2) Nyɛmiyo ko nɛ e sɛ we gba si himi mi suɔ nɛ e he tade komɛ, lɔ ɔ he ɔ, e bi nyɛmiyo ko nɛ e nane pi si ngɛ asafo ɔ mi ɔ e juɛmi ngɛ tadehi nɛ e sa kaa e he ɔ he. (3) Nyɛminyumu ko ná he blɔ kaa e maa tu e kekleekle magbɛ nɔ munyu. E bi nyɛminyumu ko nɛ e le magbɛ nɔ munyu tumi saminya kaa e bu e munyu ɔ tue konɛ e tsɔɔ lɛ nɔ́ nɛ e sa nɛ e pee konɛ e ya e hɛ mi. Nyɛminyumu nɛ e tuɔ magbɛ nɔ munyu jehahi babauu po ma nyɛ ma bi nyɛmimɛ nyumuhi nɛ a le magbɛ nɔ munyu tumi saminya a ga womi, nɛ e kɛ ga womi ɔ nɛ tsu ní.​—Abɛ 19:20. w22.02 13 ¶15-17

Yehowa jeɔ suɔmi kpo kɛ tsɔɔ wɔ kaa bɔ nɛ e je suɔmi kpo kɛ tsɔɔ e Bi ɔ ngɛ zugba a nɔ ɔ. (Yoh. 5:20) Yehowa ye bua Yesu nɛ e hemi kɛ yemi mi wa, e wo lɛ he wami benɛ e hao ɔ, nɛ e ha lɛ he lo nya hiami níhi hulɔ. Yehowa de e Bi ɔ kaa e suɔ lɛ, nɛ e kplɛɛ e nɔ. (Mat. 3:16, 17) Yesu le kaa e hiɔwe Tsɛ ɔ ngɛ e kasa nya be fɛɛ be, nɛ e maa ye bua lɛ. Enɛ ɔ he ɔ, e nui he kaa e piɛ lɛ pɛ. Kaa bɔ nɛ Yehowa je suɔmi kpo kɛ tsɔɔ Yesu ɔ, wɔ hu e je suɔmi kpo kɛ tsɔɔ wɔ ngɛ blɔ slɔɔtohi a nɔ. Mo susu he nɛ o hyɛ: Yehowa ha nɛ wa hɛ kɛ su e he nɛ e ha wɔ nyɛmimɛ nyumuhi kɛ yihi nɛ a suɔ wɔ nɛ a haa nɛ wa bua jɔɔ nɛ a yeɔ bua wɔ ke wa hao nɛ wa pee yeyeeye. (Yoh. 6:44) Jehanɛ hu ɔ, Yehowa ha wɔ nɔ́ fɛɛ nɔ́ nɛ wa hia konɛ wa hemi kɛ yemi mi nɛ wa. Nɛ e haa wɔ wa hiami níhi daa ligbi. (Mat. 6:31, 32) Ke wa susu suɔmi nɛ Yehowa ngɛ kɛ ha wɔ ɔ he ɔ, e haa nɛ suɔmi nɛ wa ngɛ kɛ ha lɛ ɔ mi waa. w21.09 22 ¶8-9

Loko o kɛ Yehowa Odasefohi maa je Baiblo ɔ kasemi sisi ɔ, kɛ o baa o je mi ha kɛɛ? Wa kpɛti nihi fuu be suɔe kaa wa ma susu lɔ ɔ he. Jamɛ a be ɔ mi ɔ, eko ɔ, je ɔ susumi ngɛ nɔ́ nɛ da kɛ nɔ́ nɛ dɛ he ɔ ji nɔ́ nɛ kudɔɔ wa susumi. Ke jã a, lɛɛ jinɛ wa “be hɛ kɛ nɔ fɔmi ko, nɛ [wa] be Mawu ko ngɛ je ɔ mi.” (Efe. 2:12) Se benɛ o ba ngɛ Baiblo ɔ kasee ɔ, o ba na kaa o ngɛ Tsɛ ngɛ hiɔwe nɛ e suɔ o sane wawɛɛ nitsɛ. O kase kaa ke o suɔ nɛ o sa e hɛ mi nɛ́ o ba piɛɛ e weku ɔ he ɔ, e sa nɛ o pee tsakemi komɛ nɛ a he hia ngɛ o je mi bami kɛ o susumi mi. E sa nɛ o pee níhi nɛ Yehowa suɔ, nɛ o kpa níhi nɛ Yehowa sume ɔ peemi. (Efe. 5:3-5) Akɛnɛ Yehowa ji wa Bɔlɔ kɛ wa hiɔwe Tsɛ he je ɔ, e ngɛ he blɔ nɛ e tsɔɔ nihi nɛ a ngɛ e weku ɔ mi ɔ bɔ nɛ e sa nɛ a ba a je mi ha. E ngɛ blɔ hyɛe kaa loko a maa Baptisi wɔ ɔ, e sa nɛ wa “je su momo ɔ kɛ e ní peepee ɔmɛ ngɛ” wa he. w22.03 2 ¶1-3

Jijɔ kpa amɛ a bua jɔɔ ke a ya Kaimi ɔ, nɛ a susuɔ hɛ nɔ kami nɛ a ngɛ ɔ he. A hyɛɔ blɔ kaa a maa bu munyu nɛ a maa tu ngɛ Kaimi ɔ sisi ɔ tue. Jamɛ a munyu ɔ kɔɔ nɔ́ nɛ Kristo kɛ nimli 144,000 nɛ a maa piɛɛ e he kɛ ye matsɛ ɔ maa pee ha adesahi nɛ a yeɔ anɔkuale ngɛ Jeha Akpe Nɔ Yemi ɔ mi ɔ he titli. Matsɛ Yesu Kristo maa nyɛɛ nihi nɛ a maa ye nɔ ngɛ hiɔwe ɔ a hɛ mi kɛ pee zugba a paradeiso, nɛ a maa ye bua adesahi nɛ a buɔ Yehowa tue ɔ nɛ́ a ye mluku. Nimli ayɔhi abɔ nɛ a yaa Kaimi ɔ nɛ a ji jijɔ kpa amɛ ɔ ma nyɛ maa po he foni kaa hwɔɔ se ɔ, Baiblo gbami komɛ kaa Yesaya 35:5, 6; 65:21-23; kɛ Kpo Jemi 21:3, 4 ɔ maa ba mi. Ke a pee jã a, hyɛ bɔ nɛ a bua maa jɔ ha! Ke a po he foni kaa a kɛ a suɔli maa hi je ehe ɔ mi ɔ, lɔ ɔ ma ha nɛ hwɔɔ se he hɛ nɔ kami nɛ a ngɛ ɔ mi maa wa, nɛ a maa ya nɔ ma sɔmɔ Yehowa kaa bɔ nɛ a fia a pɛɛ si kaa a maa pee ɔ.​—Mat. 24:13; Gal. 6:9. w22.01 21 ¶5-7

Mɛni ji kpɔmi nɔ́ ɔ? E ji hiɔ nɛ Yesu wo konɛ e kɛ he nɔ́ nɛ Adam laa a. (1 Kor. 15:22) Mɛni he je nɛ wa hia kpɔmi nɔ́ ɔ? Akɛnɛ Yehowa yeɔ dami sane he je ɔ, ngɛ e Mlaa a nya a, e sa nɛ a ngɔ wami kɛ to wami nane mi. (2 Mose 21:23, 24) Adam ye mluku loko e pee yayami, enɛ ɔ he ɔ, e sa nɛ Yesu hu nɛ ngɔ e nɔmlɔ tso nɛ ye mluku ɔ kɛ sã afɔle. (Rom. 5:17) Jã nɛ e pee ɔ ha nɛ e ba pee “Tsɛ Nɛ Ngɛ Kɛ Yaa Neneene” kɛ ha nihi tsuo nɛ ma ná kpɔmi nɔ́ ɔ mi hemi kɛ yemi ɔ. (Yes. 9:6; Rom. 3:23, 24) Yesu pee klaalo kaa e maa ngɔ e wami kɛ sã afɔle akɛnɛ e suɔ e hiɔwe Tsɛ ɔ kɛ adesahi he je. (Yoh. 14:31; 15:13.) Suɔmi nɛ e ngɛ ɔ wo lɛ he wami nɛ e fia e pɛɛ si kaa e maa ye anɔkuale kɛ ya si nyagbe nɛ e kɛ pee e Tsɛ ɔ suɔmi nya ní. Yesu ye anɔkuale kɛ ya si gbenɔ mi. Jã nɛ e pee ɔ ma ha nɛ Yehowa yi mi tomi kɛ ha zugba a kɛ adesahi ɔ maa ba mi. w21.04 14 ¶2-3