April

Yesu je suɔmi agbo kpo kɛ tsɔɔ wɔ nɛ e ngɔ e wami kɛ sã afɔle ngɛ wa he je. (Yoh. 15:13) Nɔ́ ko be nɛ wa ma nyɛ maa pee kɛ to Yehowa kɛ Yesu nane mi ngɛ suɔmi nɛ a je kpo kɛ tsɔɔ wɔ ɔ he. Se daa ligbi ɔ, wa ma nyɛ maa ngɔ wa ní peepee kɛ tsɔɔ kaa wa bua jɔ nɔ́ nɛ a pee ha wɔ ɔ he. (Kol. 3:15) Nihi nɛ a pɔ mɛ nu ɔ naa kpɔmi nɔ́ ɔ kaa nɔ́ ko nɛ he jua wa ejakaa e haa nɛ a náa nɔ mi mami ngɛ a hɛ nɔ kami nɛ se be ɔ mi. (Mat. 20:28) Akɛnɛ a ngɛ hemi kɛ yemi ngɛ Kristo afɔle sami ɔ mi he je ɔ, Yehowa bu mɛ kaa dali, nɛ e ngɔ mɛ kɛ pee e bimɛ. (Rom. 5:1; 8:15-17, 23) Jijɔ kpa amɛ hu a bua jɔ kpɔmi nɔ́ ɔ he. Akɛnɛ a ngɛ hemi kɛ yemi ngɛ Kristo afɔle sami ɔ mi he je ɔ, a he tsɔ ngɛ Mawu hɛ mi nɛ a ngɛ hɛ nɔ kami hu kaa a maa je “amanehlu ngua a mi.” (Kpoj. 7:13-15) Nihi nɛ a pɔ mɛ nu ɔ kɛ jijɔ kpa amɛ tsuo a bua jɔ kpɔmi nɔ́ ɔ he. A tsɔɔ kaa a bua jɔ kpɔmi nɔ́ ɔ he kɛ gu Kaimi ɔ nɛ a yaa daa jeha a nɔ. w22.01 23 ¶14-15

Yesu hao ngɛ yi mi tomi he je nɛ a yaa gbe lɛ ɔ he. A po e nya kaa e ji musu bɔlɔ, nɛ tsɔɔ kaa e be bu kɛ ha Mawu loo Mawu biɛ ɔ. (Mat. 26:64-66) Enɛ ɔ hao Yesu wawɛɛ, nɛ e ná nɛ e Tsɛ ɔ ngmɛ́ blɔ nɛ e gbo hɛ mi si puemi gbenɔ nɛ ɔ. (Mat. 26:38, 39, 42) E sa nɛ a sɛu Yesu ngɛ sɛumi tso nɔ konɛ a kɛ je gbiɛmi ko ngɛ Yuda bi ɔmɛ a nɔ. (Gal. 3:10) A wo si kaa a maa ye Mawu Mlaa a nɔ, se a pee we jã. Enɛ ɔ he ɔ, a ngɔ gbiɛmi kɛ ba a nɔ. Jehanɛ hu ɔ, a ji yayami peeli akɛnɛ a ji Adam sisi bimɛ ɔ he je. (Rom. 5:12) Mawu Mlaa a tsɔɔ kaa ke nɔ ko pee yayami ko nɛ sa gbenɔ ɔ, e sa nɛ a gbe lɛ, nɛ́ lɔ ɔ se ɔ, a ngɔ e nɔmlɔ tso ɔ kɛ bɛle si ngɛ tso nɔ. (5 Mose 21:22, 23; 27:26) Enɛ ɔ he ɔ, sɛumi nɛ a sɛu Yesu ngɛ sɛumi tso nɔ ɔ ma nyɛ ma ha nɛ Yuda bi nɛ a kua Yesu ɔ nɛ a ye a he. w21.04 16 ¶5-6

Mo susu nɔ́ nɛ ya nɔ ligbi nɛ a maa gbe Yesu ɔ he nɛ o hyɛ. Roma ta buli kongo lɛ basabasa. (Mat. 26:52-54; Yoh. 18:3; 19:1) Kpã nɛ a kɛ fiaa lɛ ɔ ha nɛ e plaa wawɛɛ. Pee se ɔ, a ngɔ tso nɛ mi jiɔ kɛ fɔ e se nɛ pee pa a nɔ. Yesu bɔ mɔde kaa e maa tloo tso ɔ kɛ ya he nɛ a yaa sɛu lɛ ngɛ ɔ, se be bɔɔ se ɔ, Roma ta buli ɔmɛ fã nyumu ko kaa e ye bua lɛ. (Mat. 27:32) Benɛ Yesu ya su he nɛ a maa gbe lɛ ngɛ ɔ, ta buli ɔmɛ ka e ninehi kɛ e nanehi kɛ wo tso ɔ he. Benɛ ta buli ɔmɛ ngɛ tso ɔ nɔ woe kɛ da si ɔ, e pa amɛ a mi hɔle wawɛɛ. E huɛ ɔmɛ ye aywilɛho, nɛ e yayo fo ya wawɛɛ, se nɔ yeli nɛ a ngɛ Yuda a lɛɛ a ngɛ e he fɛu yee. (Luka 23:32-38; Yoh. 19:25) Yesu na nɔ́ wawɛɛ ngmlɛfiahi fuu. E tsui kɛ e fakafaka ye lɛ wawɛɛ, nɛ e he wa ha lɛ kaa e maa wo mumi. Yesu le kaa e ye anɔkuale kɛ pi si, nɛ benɛ e piɛ bɔɔ nɛ e ma gbo ɔ, e sɔle e nyagbe sɔlemi kɛ ha Yehowa. Kɛkɛ nɛ e ma e yi si, nɛ e ngɔ e wami kɛ ha Yehowa. (Maak. 15:37; Luka 23:46; Yoh. 10:18; 19:30) Ngɛ anɔkuale mi ɔ, Yesu na nɔ́ wawɛɛ loko e gbo jamɛ a hɛ mi si puemi gbenɔ ɔ! w21.04 16 ¶4

Yesu kɛ e kaseli anɔkualetsɛmɛ 11 ɔ tu somi enyɔ he munyu. Lɔ ɔmɛ ji somi ehe ɔ, kɛ Matsɛ Yemi ɔ he somi ɔ. (Luka 22:20, 28-30) Somi enyɔ nɛ ɔmɛ bli blɔ kɛ ha bɔfo nɛ ɔmɛ kɛ nihi bɔɔ ko nɛ́ a sɔmɔ kaa matsɛmɛ kɛ osɔfohi ngɛ hiɔwe. (Kpoj. 5:10; 14:1) Nihi nɛ a pɔ mɛ nu ɔ a kpɛti nihi nɛ piɛ ngɛ zugba a nɔ nɛ a ngɛ somi enyɔ nɛ ɔmɛ a mi ɔ pɛ nɛ a ngɛ he blɔ nɛ a yeɔ abolo ɔ eko nɛ a nuɔ wai eko ngɛ Kaimi ɔ sisi. Yehowa ha mɛ hɛ nɔ kami nɛ se be konɛ a kɛ Yesu Kristo nɛ a tle lɛ si ɔ kɛ nimli 144,000 ɔ a kpɛti nihi nɛ a ngɛ hiɔwe momo ɔ nɛ a hi si ngɛ Yehowa Mawu hɛ mi. Jehanɛ hu ɔ, Yehowa ha mɛ nɔmlɔ tso nɛ e be gboe, nɛ e be puɛe! (1 Kor. 15:51-53; 1 Yoh. 3:2) Nihi nɛ a pɔ mɛ nu ɔ le kaa e sa nɛ a ye anɔkuale kɛ ya si gbenɔ mi.​—2 Tim. 4:7, 8. w22.01 21 ¶4-5

A sɛu ojo fiali enyɔ kɛ piɛɛ Yesu he. (Luka 23:40, 41) A kpɛti nɔ kake plɛ kɛ hyɛ Yesu nɛ e de lɛ ke: “Ke o sɛ o Matsɛ Yemi ɔ mi ɔ, mo kai mi.” (Luka 23:42) Akɛnɛ Yesu le kaa e Tsɛ ɔ naa nɔ mɔbɔ he je ɔ, e de ojo fialɔ nɛ ngɛ gboe ɔ níhi nɛ ha lɛ hɛ nɔ kami. (La 103:8; Heb. 1:3) Yehowa suɔ nɛ e ngɔ wa he yayamihi kɛ ke wɔ nɛ e na wɔ mɔbɔ. Se loko e maa pee jã a, ja wa pia wa he ngɛ wa he yayami ɔmɛ a he, nɛ wa ná hemi kɛ yemi kaa e ma nyɛ maa ngɔ wa he yayamihi kɛ ke wɔ kɛ gu Yesu Kristo kpɔmi afɔle sami ɔ nɔ. (1 Yoh. 1:7) Eko ɔ, e he maa wa ha ni komɛ kaa a ma he ye kaa Yehowa maa ngɔ yayamihi nɛ a pee ɔ kɛ ke mɛ. Ke o nuɔ he jã be komɛ ɔ, lɛɛ mo susu enɛ ɔ he nɛ o hyɛ: Benɛ e piɛ bɔɔ nɛ Yesu ma gbo ɔ, e na yayami peelɔ ko nɛ a bu lɛ gbenɔ fɔ se e ná e mi hemi kɛ yemi ɔ mɔbɔ. Lɛɛ mɛni he je nɛ Yehowa be e sɔmɔli anɔkualetsɛmɛ mɔbɔ nae mɔ!​—La 51:1; 1 Yoh. 2:1, 2. w21.04 9 ¶5-6

Anɔkuale nɛ Yesu ye kɛ ya si nyagbe ɔ ha nɛ ní komɛ pee heii. Kekleekle ɔ, e tsɔɔ kaa Satan ji lakpatsɛ. Yesu kɛ e ní peepee tsɔɔ kaa adesa nɛ ye mluku ma nyɛ maa ye anɔkuale ngɛ kahi tsuo nɛ Satan kɛ maa ba e nɔ ɔ mi. Enyɔne ɔ, Yesu kɛ e wami ha kaa kpɔmi nɔ́. Akɛnɛ Yesu ngɔ e wami kɛ sã afɔle he je ɔ, huɛ bɔmi kpakpa ma nyɛ maa hi adesahi nɛ a yi mluku ɔ kɛ Mawu a kpɛti. Nɛ a ma nyɛ ma ná hɛ kɛ nɔ fɔmi kaa a maa hi si kɛ ya neneene. Etɛne, Yesu kɛ e ní peepee tsɔɔ kaa Yehowa ji nɔ nɛ ngɛ he blɔ kaa e yeɔ je ɔ nɔ, nɛ e tsɔ e Tsɛ ɔ biɛ ɔ he hulɔ. Be fɛɛ be ɔ, nyɛ ha nɛ waa hi si kaa jamɛ a be ɔ pɛ ji wa nyagbe be nɛ waa kɛ maa hɛɛ wa anɔkuale yemi ɔ mi! Kɛkɛ ɔ, ke e ba kaa wa ma gbo po ɔ, waa kɛ nɔ mi mami ma nyɛ ma de ke: “Yehowa, i ye anɔkuale bɔ nɛ ma nyɛ, i ha nɛ Satan pee lakpatsɛ, nɛ i wo o biɛ ɔ kɛ o nɔ yemi ɔ nguɔ!” w21.04 12 ¶13-14

A po Yesu nya nɛ a kojo lɛ ngɛ nɔ́ ko nɛ e pee we he, lɔ ɔ se ɔ, a ye e he fɛu, a plaa lɛ nɛ a ka lɛ ngɛ sɛumi tso nɔ. A ka plɛɛkohi kɛ wo e ninehi kɛ e nanehi tsuo a mi. E ngɛ dengme gboe kɛ ngɛ munyu tue, e ngɛ nɔ́ nae kɛ ngɛ mumu woe. Se e sa nɛ e tu munyu, ejakaa e ngɛ nɔ́ ko nɛ he hia nɛ e ma de. Wa ma nyɛ maa kase ní kpakpahi fuu ngɛ Yesu nyagbe munyu ɔmɛ a mi! A kai wɔ kaa e sa nɛ waa ngɔ nihi a yayamihi kɛ ke mɛ, nɛ wa ná nɔ mi mami kaa Yehowa hu maa ngɔ wa yayamihi kɛ ke wɔ. E ji he blɔ ngua nɛ wa ná kaa wa ngɛ nyɛmimɛ nɛ a pee klaalo kaa a maa ye bua wɔ. Se ke wa hia yemi kɛ buami ɔ, e sa nɛ wa bi mɛ. Wa le kaa Yehowa maa ye bua wɔ kɛ da wa ka amɛ a nya. Wa ba na hu kaa e sa nɛ waa ye anɔkuale daa ligbi, nɛ́ wa ná nɔ mi mami kaa ke wa gbo po ɔ, Yehowa ma tle wɔ si. w21.04 8 ¶1; 13 ¶17

Ke wa nyɛɛ Yesu nane mami he ɔmɛ a se ɔ, wa ma nyɛ maa hi si kɛ ya neneene. Benɛ niheyo niatsɛ ko bi Yesu nɔ́ nɛ e maa pee konɛ e ná neneene wami ɔ, Yesu de lɛ ke: “Ba pee ye se nyɛɛlɔ.” (Mat. 19:16-21) Yesu de Yuda bi komɛ nɛ a he we yi kaa lɛ ji Kristo ɔ ke: “Ye jijɔ ɔmɛ . . . nyɛɛɔ ye se. I haa mɛ neneene wami.” (Yoh. 10:24-29) Ke waa kɛ nɔ́ nɛ Yesu tsɔɔ ɔ tsu ní nɛ wa kase e nɔ hyɛmi nɔ́ ɔ, lɔ ɔ tsɔɔ kaa wa ngɛ e mi hemi kɛ yemi. Ke wa pee jã a, wa maa hi blɔ nɛ kɛ nɔ yaa neneene wami mi ɔ nɔ. (Mat. 7:14) Jã wa ba le Yesu loko wa ma nyɛ maa nyɛɛ e nane mami he ɔmɛ a se haa. Yesu nɛ wa ‘maa hi lɛ lee’ ɔ, pi ligbi kake nɔ́ peemi. E sa nɛ waa ya nɔ nɛ waa kase e he ní fuu nɛ waa le lɛ, nɛ tsɔɔ kaa wa maa le e su ɔmɛ, e susumihi, kɛ mlaahi nɛ e kɛ tsu ní ɔ. Ke wa se kɛ ngɛ anɔkuale ɔ mi po, e sa nɛ waa ya nɔ nɛ waa hi Yehowa kɛ e Bi ɔ lee. w21.04 4 ¶9-10

Eko ɔ, bɔfo Paulo haoɔ wawɛɛ ke e kai níhi nɛ e pee loko e ba pee Kristofo no ɔ. E tsɛ e he ke yayami peelɔ “kpanaku,” nɛ enɛ ɔ be nyakpɛ! (1 Tim. 1:15) Loko e ma ba le anɔkuale ɔ, e wa Kristofohi yi mi ngɛ ma slɔɔtohi a nɔ, e wo a ti ni komɛ tsu, nɛ e fĩ se kaa a gbe a kpɛti ni komɛ. (Níts. 26:10, 11) Atsinyɛ jemi ko be he kaa ke Paulo kɛ Kristofohi nɛ́ kɛ gu e nɔ nɛ a fɔli gbo ɔ kpe ɔ, e maa hao lɛ wawɛɛ. Yayami nɛ Paulo pee ɔ dɔ lɛ wawɛɛ, se e le kaa nɔ́ ko be nɛ e ma nyɛ maa pee kɛ tsake e si fɔfɔɛ ɔ. E kplɛɛ nɔ kaa Kristo gbo kɛ ha lɛ, nɛ e kɛ nɔ mi mami ngma ke: “Mawu dloomi ɔ lɛ ha nɛ i ngɛ kaa bɔ nɛ i ngɛ nɛ ɔ nɛ.” (1 Kor. 15:3, 10) Mɛni wa ma nyɛ maa kase ngɛ mi? E sa nɛ o ná nɔ mi mami kaa Kristo gbo kɛ ha mo, nɛ e bli blɔ kɛ ha mo konɛ huɛ bɔmi kpakpa nɛ hi o kɛ Yehowa nyɛ kpɛti. (Níts. 3:19) Nɔ́ nɛ Mawu ngɔɔ e juɛmi kɛ maa nɔ ji nɔ́ nɛ wa ngɛ pee amlɔ nɛ ɔ, kɛ nɔ́ nɛ wa maa pee hwɔɔ se, se pi yayami nɛ wa pee be ko nɛ be ɔ.​—Yes. 1:18. w21.04 23 ¶11

E ngɛ mi kaa Yuda bi fuu susu kaa e he be hiae nɛ Mesia a nɛ gbo mohu lɛɛ, se mo kadi nɔ́ nɛ Ngmami ɔ de: “E ngɔ e wami ngɔ ha ngɛ yayami peeli babauu a nane mi; nɛ e kpa pɛɛ nɛ a ngɔ a he yayami kɛ pa mɛ.” (Yes. 53:12) Enɛ ɔ he ɔ, Yuda bi ɔmɛ be nɔ́ ko nɛ a maa da nɔ kɛ kua Yesu benɛ a gbe lɛ kaa yayami peelɔ ɔ. Mwɔnɛ ɔ hu ɔ, ke wa le anɔkuale nɛ ngɛ sane ko mi ɔ, lɔ ɔ be hae nɛ wa nane nɛ tɔ̃tɔ̃. Ngɛ Yesu Yoku ɔ Nɔ Fiɛɛmi ɔ mi ɔ, e bɔ e tue buli ɔmɛ kɔkɔ kaa a maa “tu lakpa munyu yayami slɔɔtohi kɛ si” mɛ. (Mat. 5:11) Lakpa munyu nɛ ɔmɛ je Satan ngɔ. E woɔ si temi kɛ woli he wami konɛ a gbɛ nihi nɛ a suɔ anɔkuale ɔ a he lakpa munyuhi kɛ fia. (Kpoj. 12:9, 10) E sa nɛ wa kua lakpa munyuhi nɛ nihi nɛ a teɔ si kɛ woɔ wɔ ɔ tuɔ kɛ siɔ wɔ ɔ. E sɛ nɛ lakpa munyu nɛ ɔmɛ nɛ wo wa he gbeye nɛ wa ko sɔmɔ Mawu loo e ha nɛ wa hemi kɛ yemi mi nɛ gbɔjɔ. w21.05 11 ¶14; 12 ¶16

Moo ye bua o Baiblo kaselɔ ɔ konɛ e ná Yehowa mi hemi kɛ yemi. Yesu ha nɛ e kaseli ɔmɛ ná nɔ mi mami kaa Yehowa maa ye bua mɛ, ejakaa e suɔ mɛ. (Mat. 10:19, 20, 29, 30) Mo kai o Baiblo kaselɔ ɔ kaa Yehowa maa ye bua lɛ hulɔ. O kɛ lɛ nɛ sɔle ngɛ otihi nɛ e kɛ ma e hɛ mi ɔ a he, nɛ lɔ ɔ maa ye bua lɛ nɛ e ngɔ e hɛ kɛ fɔ Yehowa nɔ. Franciszek nɛ e ngɛ Poland ɔ de ke: “Ye Baiblo tsɔɔlɔ ɔ pɔɔ otihi nɛ i kɛ ma ye hɛ mi ɔ a ta womi ngɛ e sɔlemi mi. Benɛ i na bɔ nɛ Yehowa ha ye Baiblo tsɔɔlɔ ɔ sɔlemi ɔmɛ a heto ha a, i bɔni sɔlemi oya nɔuu. Benɛ e he ba hia nɛ ma bi blɔ ngɛ ye ní tsumi ehe ɔ mi nɛ ma bɔni asafo mi kpehi kɛ kpokpa nɔ kpehi yami ɔ, i na kaa Yehowa ye bua mi wawɛɛ.” Yehowa susuɔ wa Baiblo kaseli ɔmɛ a he wawɛɛ. E hɛ saa mɔde nɛ Baiblo tsɔɔli bɔɔ konɛ a ye bua nihi nɛ a hɛ kɛ su e he wawɛɛ ɔ, nɛ e suɔ mɛ ngɛ mɔde nɛ a ngɛ bɔe ɔ he. (Yes. 52:7) Ke o kɛ nɔ ko kase we Baiblo ɔ amlɔ nɛ ɔ po ɔ, o ma nyɛ maa ye bua Baiblo kaseli nɛ a ya a hɛ mi kɛ su baptisimi he kɛ gu fiɛɛli kpahi nɛ o maa piɛɛ a he be mi nɛ a kɛ a Baiblo kaseli ngɛ Baiblo ɔ kasee ɔ. w21.06 7 ¶17-18

Ke wa kaneɔ Mawu Munyu ɔ be fɛɛ be ɔ, lɔ ɔ tsɔɔ kaa wa bua jɔ he blɔ nɛ wa ngɛ kaa wa ngɛ Mawu Munyu ɔ eko ɔ he. E sɛ nɛ waa mlɛ nɛ wa ná be loko waa kane Baiblo ɔ, mohu ɔ, e sa nɛ waa to be kɛ kane nɛ waa kase hulɔ. Ke wa kaseɔ Baiblo ɔ be fɛɛ be ɔ, wa hemi kɛ yemi ɔ mi maa wa wawɛɛ. Wa be kaa je nɛ ɔ mi “juɛmitsɛmɛ kɛ ní leli” ɔmɛ, wɔɔ lɛɛ wa hemi kɛ yemi ɔ daa si ngɛ Mawu Munyu ɔ nɔ. (Mat. 11:25, 26) Akɛnɛ wa kaseɔ Baiblo ɔ he je ɔ, wa le nɔ́ he je nɛ níhi ngɛ puɛe ngɛ zugba a nɔ, nɛ wa le nɔ́ nɛ Yehowa maa pee ngɛ he. Enɛ ɔ he ɔ, nyɛ ha nɛ waa fia wa pɛɛ si kaa wa ma ha nɛ wa hemi kɛ yemi ɔ mi nɛ wa, nɛ waa ye bua nihi fuu nɛ a ba ná wa Bɔlɔ ɔ mi hemi kɛ yemi. (1 Tim. 2:3, 4) Jehanɛ hu ɔ, nyɛ ha nɛ wɔ tsuo waa ya nɔ nɛ waa ngɔ wa juɛmi kɛ ma be nɛ nihi tsuo nɛ a ngɛ zugba a nɔ ɔ maa ngɔ gbi kake kɛ tu munyu nɛ ngɛ Kpo Jemi 4:11 ɔ nɔ. Lejɛ ɔ de ke: “Yehowa wa Mawu, mo ji nɔ nɛ sa kaa o ngɔ hɛ mi nyami, . . . ejakaa mo lɛ o bɔ níhi tsuo.” w21.08 19 ¶18-20

Asafo mi nikɔtɔmahi ji nɔ hyɛli, nɛ e ji a blɔ nya ní tsumi kaa a maa wo nihi ga ke e he ba hia nɛ a pee jã. E sa kaa a bɔ a he mɔde nɛ a wo ni kpahi ga konɛ a nyɛ nɛ a kɛ tsu ní nɛ jamɛ a be ɔ mi nɔuu ɔ, e wo mɛ he wami “konɛ a tsui nɛ nya.” (Abɛ 27:9, NW) Asafo mi nikɔtɔmahi suɔ a nyɛmimɛ nyumuhi kɛ yihi. Be komɛ ɔ, ke a na kaa nyɛmi ko ngɛ nane yaya ko hiae ɔ, a woɔ lɛ ga kɛ tsɔɔ kaa a suɔ lɛ. (Gal. 6:1) Loko asafo mi nɔkɔtɔma ko maa wo nɔ ko ga a, e maa hi kaa e ma susu níhi nɛ Paulo de ngɛ suɔmi he ɔ ekomɛ a he. “Suɔmi toɔ e tsui si, nɛ e mi mi hi . . . E daa níhi tsuo a nya, e heɔ níhi tsuo yeɔ, e ngɔɔ e hɛ kɛ fɔɔ níhi tsuo a nɔ, e fĩɔ si ngɛ níhi tsuo a mi.” (1 Kor. 13:4, 7) Ke asafo mi nɔkɔtɔma ko susu kuku nɛ ɔmɛ a he kɛ ya tsitsaa a, e maa ye bua lɛ nɛ e je suɔmi mi kɛ wo nɔ ɔ ga. Ke nɔ nɛ a ngɛ lɛ ga woe ɔ nu he kaa asafo mi nɔkɔtɔma a susuɔ e he ɔ, e be yee kaa e maa kplɛɛ ga womi ɔ nɔ. w22.02 14 ¶3; 15 ¶5

Yehowa bɔ bɔfo ɔmɛ, kɛ Adam kɛ Hawa kaa nihi nɛ a ye mluku, nɛ́ kpa ko kulaa be a he. Se Satan (nɛ e sisi ji “Nɔ Nɛ E Teɔ Si Kɛ Woɔ Nɔ”) nɛ e ji Mawu bi ɔ sisi Adam kɛ Hawa nɛ a te si kɛ wo Yehowa. Lɔ ɔ se ɔ, bɔfo komɛ kɛ adesa komɛ hu tsɔ atua. (Jud 6) Enɛ ɔ dɔ Yehowa wawɛɛ. Se e fĩ si, nɛ e maa ya nɔ ma fĩ si kɛ ya si be nɛ e ma kpata atua tsɔli tsuo a hɛ mi. Enɛ ɔ ma ha nɛ Yehowa, kɛ e sɔmɔli anɔkualetsɛmɛ nɛ mɛ hu a ngɛ si fĩe ngɛ níhi a blɔ nya tomi yaya nɛ ɔ mi ɔ hu a he maa jɔ mɛ! Satan po Yehowa sɔmɔlɔ anɔkualetsɛ Hiob, kɛ Yehowa sɔmɔli anɔkualetsɛmɛ kpahi a nya kaa ní kpakpahi nɛ a náa ngɛ Yehowa ngɔ ɔ he je nɛ a jaa lɛ. (Hiob 1:8-11; 2:3-5) Abosiami ngɛ nɔ yae nɛ e ngɛ adesahi a nya poe kɛ ba si mwɔnɛ ɔ. (Kpoj. 12:10) Ke suɔmi nɛ wa ngɛ kɛ ha Yehowa a haa nɛ wa yaa nɔ nɛ wa fĩɔ si ngɛ kahi a mi ɔ, lɔ ɔ ma ha nɛ waa ye bua kɛ bu Satan lakpatsɛ. w21.07 9 ¶7-8

Bɔfo Paulo ngɔ nɔ hyɛmi nɔ́ ko kɛ tsɔɔ wɔ bɔ nɛ e he hia nɛ wa pee tsakemi ngɛ wa ní peepee mi ha. E ngma ke wa ka wa su momo ɔ “kɛ wo tso he.” (Rom. 6:6) Ngɛ blɔ ko nɔ ɔ, wa ngɛ hlae nɛ waa nyɛɛ Kristo nɔ hyɛmi nɔ́ ɔ se. E sa nɛ wa kpa je mi bami kɛ ní peepeehi tsuo nɛ Yehowa hiee. E sa nɛ wa pee ní nɛ ɔmɛ konɛ wa ná he nile kpakpa kɛ hɛ kɛ nɔ fɔmi kaa wa maa hi si kɛ ya neneene. (Yoh. 17:3; 1 Pet. 3:21) Yehowa be e sisi tomi mlaa amɛ tsakee kɔkɔɔkɔ konɛ e kɛ ha nɛ wa ná bua jɔmi. Mohu ɔ, wɔ nɛ e sa nɛ wa tsake wa su konɛ e kɛ Yehowa sisi tomi mlaa amɛ nɛ kɔ. (Yes. 1:17, 18; 55:9) Ke a baptisi mo momo po ɔ, yaa nɔ nɛ o hwu kɛ si he lo ɔ akɔnɔhi. Moo sɔle kɛ ha Yehowa nɛ e ye bua mo nɛ o ngɔ o hɛ kɛ fɔ e mumi ɔ nɔ, se pi mo nitsɛ o nɔ. (Gal. 5:22; Filip. 4:6) E sa nɛ waa bɔ mɔde wawɛɛ nɛ wa je su momo ɔ kɛ fɔ he, nɛ wa ko ya ngɔ hu. w22.03 6 ¶15-17

Yehowa wo si kaa ke wa ngɔ e Matsɛ Yemi ɔ kɛ e dami ní ɔmɛ kɛ ye kekle blɔ he ngɛ wa si himi mi ɔ, e ma ha wɔ niye ní, tade kɛ hwɔ he. (Mat. 6:33) Enɛ ɔ he ɔ, nyɛ ko ha nɛ wa susu kaa je nɛ ɔ mi he lo nya níhi ma nyɛ ma ha nɛ waa hi si slɔkee nɛ wa ná bua jɔmi nitsɛnitsɛ. Wa le kaa nɔ́ pɛ nɛ ma ha wɔ tue mi jɔmi nitsɛnitsɛ ji Yehowa suɔmi nya ní nɛ wa maa pee. (Filip. 4:6, 7) Ke wa ngɛ sika nɛ waa kɛ ma nyɛ ma he níhi fuu po ɔ, e sa nɛ waa hyɛ kaa wa ngɛ be kɛ he wami nɛ waa kɛ ní nɛ ɔmɛ ma tsu ní lo. Anɛ he lo nya níhi nɛ wa ngɛ ɔ he hia wɔ wawɛɛ tsɔ ngɛ wa si himi mi lo? Mo kai kaa Mawu ha wɔ ní tsumi ngɛ e weku ɔ mi. E sɛ nɛ wa ha nɛ nɔ́ ko nɛ gbla wa juɛmi kɛ je ní tsumi nɛ ɔ nɔ. Wa sume nɛ waa pee kaa nyumu ɔ nɛ he lo nya níhi a he je ɔ, e kua he blɔ nɛ e ná kaa e ma ba sɔmɔ Yehowa, nɛ e ba pee nihi nɛ Yehowa ngɔ mɛ kɛ pee e bimɛ ɔ a kpɛti nɔ kake ɔ!​—Maak. 10:17-22. w21.08 6 ¶17

Ke o ngɛ Baiblo ɔ kasee ɔ, o ma ba na bɔ nɛ Yehowa ngɛ ha, kɛ e su ɔmɛ. Su nɛ ɔmɛ nɔuu nɛ o kase a he ní benɛ o ngɛ adebɔ níhi a he ní kasee ɔ nɛ. Yehowa su ɔmɛ a he ní nɛ o maa kase ɔ ma ha nɛ o ná nɔ mi mami kaa Yehowa ngɛ nitsɛnitsɛ. (2 Mose 34:6, 7; La 145:8, 9) Ke o ba ngɛ Yehowa lee saminya a, hemi kɛ yemi nɛ o ngɛ ngɛ e mi ɔ mi maa hi wae, suɔmi nɛ o ngɛ kɛ ha lɛ ɔ mi maa hi wae, nɛ huɛ bɔmi nɛ ngɛ o kɛ lɛ nyɛ kpɛti ɔ hu mi maa hi wae wawɛɛ. O kɛ ni kpahi nɛ sɛɛ hemi kɛ yemi nɛ o ngɛ ngɛ Mawu mi ɔ he ní. Se ke nɔ ko nɛ o fiɛɛ ha lɛ ɔ he we yi kaa Mawu ngɛ, nɛ mo hu o li nɔ́ nɛ o ma de ɔ hu nɛɛ? Bɔɔ mɔde nɛ o hyɛ bɔ nɛ wa womi ɔmɛ tsɔɔ ngmamihi nɛ tsɔɔ kaa Mawu ngɛ ɔ mi ha nɛ o kɛ nɔ ɔ nɛ susu he. Jehanɛ hu ɔ, o ma nyɛ ma bi nyɛmi ko nɛ ngɛ níhi a si kpami ɔ nɛ e ye bua mo. Ke o kɛ nɔ ɔ susu he nɛ e kplɛɛ nɔ jio, e kplɛɛ we nɔ jio, moo lɛɛ o ma ná níhi a mi hlami nɛ o pee ɔ he se. O hemi kɛ yemi ɔ mi maa wa wawɛɛ. w21.08 18 ¶14-15

E he hia we nɛ wa kpa níhi tsuo nɛ wa bua jɔ a he ɔ peemi loko waa sa Yehowa hɛ mi. (Fiɛlɔ 5:19, 20) Se ke wa bli we wa sɔmɔmi ní tsumi ɔ mi akɛnɛ wa sume nɛ waa kɛ níhi nɛ wa bua jɔ a he ɔ nɛ sã afɔle he je ɔ, lɛɛ wa maa pee kaa nyumu ɔ nɛ ngɛ Yesu nɔ́ he tomi nɔ́ ɔ mi, nɛ e kua kaa e maa ngmɛɛ si himi nɛ ngɛ gbɔjɔɔ he nɛ e sɔmɔ Mawu ɔ. (Luka 12:16-21) Ke waa kɛ nyagbahi ngɛ kpee ɔ, wa sɔleɔ nɛ wa bɔɔ mɔde kaa wa ma susu níhi a he kɛ ya tsitsaa konɛ wa ná nyagba a he tsaba. (Abɛ 3:21) Yehowa jɔɔ wɔ ngɛ blɔhi fuu a nɔ. Ke wa bɔ mɔde nɛ wa pee nɔ́ fɛɛ nɔ́ nɛ wa ma nyɛ kɛ wo e hɛ mi nyami ɔ, lɔ ɔ tsɔɔ kaa wa bua jɔ ní kpakpahi nɛ e peeɔ kɛ haa wɔ ɔ he. (Heb. 13:15) Wa ma nyɛ maa pee ní slɔɔtoslɔɔtohi ngɛ Yehowa sɔmɔmi mi, nɛ lɔ ɔ ma ha nɛ e jɔɔ wɔ wawɛɛ. Daa ligbi ɔ, nyɛ ha nɛ wa hla blɔhi a nɔ nɛ wa maa gu kɛ ‘sa wa nya nɛ waa hyɛ, nɛ wa maa na kaa Yehowa hi.’ (La 34:8) Ke wa pee jã a, wa maa pee kaa Yesu nɛ e de ke: “Ye niye ní ji kaa ma pee nɔ nɛ e tsɔ mi ɔ suɔmi nya ní nɛ ma gbe e ní tsumi ɔ nya” a.​—Yoh. 4:34. w21.08 30-31 ¶16-19

Satan suɔ nɛ wa wo wa he nɔ. E le kaa ke wa wo wa he nɔ ɔ, wa maa pee kaa lɛ nɛ wa be neneene wami náe. Enɛ ɔ he je nɛ bɔfo Paulo de kaa nɔ ko ma nyɛ maa “pee pupuupu, nɛ e maa nɔ kojomi nɛ a kojo Abosiami ɔ mi” ɔ nɛ. (1 Tim. 3:6, 7) E ma nyɛ maa ba jã ngɛ wa ti nɔ fɛɛ nɔ blɔ fa mi, wa ngɛ anɔkuale ɔ mi be kɛkɛɛ jio, kpaako wa ba anɔkuale ɔ mi jio. Nihi nɛ a woɔ a he nɔ ɔ foɔ mɛ pɛ a nɔ́ mi. Satan suɔ nɛ wa fo wɔ pɛ wa nɔ́ mi, titli ke waa kɛ ka ko ngɛ kpee. E suɔ nɛ waa ngɔ wa juɛmi kɛ ma wɔ nitsɛmɛ wa nɔ pe Yehowa. Kaa nɔ hyɛmi nɔ́ ɔ, anɛ a po sane kɛ fɔ o nɔ lo? Aloo a kɛ mo ye ngɛ blɔ nɛ dɛ nɔ lo? Satan suɔ nɛ o pia Yehowa loo o nyɛmimɛ ɔmɛ ke o kɛ nyagba nɛ ɔmɛ eko kpe. Nɛ e suɔ nɛ o susu kaa blɔ pɛ nɔ nɛ o maa gu kɛ tsu sane ɔ he ní ji kaa o maa pee níhi ngɛ o dɛ he mohu pe nɛ o kɛ blɔ tsɔɔmihi nɛ Yehowa kɛ ha ngɛ e Munyu ɔ mi ɔ ma tsu ní.​—Fiɛlɔ 7:16, 20. w21.06 15 ¶4-5

Yehowa ha gbalɔ Hagai ní tsumi ko nɛ he hia kaa e tsu. Eko ɔ, Hagai piɛɛ nihi nɛ a kpale kɛ je nyɔguɛ tso mi ngɛ Babilon kɛ ba Yerusalem ngɛ jeha 537 L.F.K ɔ mi ɔ a he. Benɛ Israel bi anɔkualetsɛmɛ nɛ ɔmɛ je Babilon kɛ ba Yerusalem ɔ, oya nɔuu nɛ a bɔni Yehowa we ɔ loo sɔlemi we ɔ mami ekohu. (Ezra 3:8, 10) Se e kɛ we nɛ a kɛ si fɔfɔɛ ko nɛ jɔ̃ a kɔni mi ɔ kpe. A kɛ si temi kɛ womi kpe, nɛ enɛ ɔ ha nɛ a kɔni mi jɔ̃ nɛ a kpa sɔlemi we ɔ mami. (Ezra 4:4; Hag. 1:1, 2) Enɛ ɔ he ɔ, ngɛ jeha 520 L.F.K ɔ mi ɔ, Yehowa fã Hagai kaa e wo Israel bi ɔmɛ he wami nɛ a kɛ kã nɛ tsu ní tsumi ɔ kɛ gbe nya. (Ezra 6:14, 15) Yi mi tomi he je nɛ Hagai ngɔ sɛ gbi ɔ kɛ ha ji kaa konɛ e kɛ wo hemi kɛ yemi nɛ Israel bi ɔmɛ ngɛ ngɛ Yehowa mi ɔ mi he wami. Munyu ɔ woɔ nɔ he wami wawɛɛ. Yehowa ngɛ he wami ngɛ bɔfohi babauu nɛ a ngɛ hiɔwe ɔ a nɔ, enɛ ɔ he ɔ, e sa nɛ Yuda bi ɔmɛ nɛ a ngɔ a hɛ kɛ fɔ Yehowa nɔ konɛ a ye manye. w21.09 15 ¶4-5

Mwɔnɛ ɔ, suɔmi kɛ kake peemi ngɛ Yehowa Odasefohi nɛ a ngɛ je kɛ wɛ ɔ a kpɛti. E ngɛ mi kaa wa je ma slɔɔtohi kɛ wɛtso munomunohi a mi mohu lɛɛ, se wa ngɛ kaa weku, enɛ ɔ ha nɛ wa je ekpa ngɛ jami kpa amɛ a he. Wa naa odase nɛ tsɔɔ kaa wa ngɛ suɔmi nitsɛnitsɛ ɔ ngɛ asafo mi kpehi, kpɔ mi kpehi kɛ kpokpa nɔ kpehi nɛ wa yaa a sisi. Odase nɛ ɔ woɔ wa hemi kɛ yemi ɔ mi he wami, nɛ e haa nɛ wa naa kaa blɔ nɔ nɛ wa guɔ kɛ jaa Yehowa a ji blɔ nɛ e kplɛɛ nɔ. (Yoh. 13:34) Ngmami ɔ woɔ wɔ he wami kaa waa ‘suɔ wa sibi wawɛɛ nitsɛ.’ (1 Pet. 4:8) Blɔ kake nɛ wa guɔ nɔ kɛ peeɔ jã ji kaa waa kɛ wa sibi a tɔmihi keɔ mɛ, nɛ wa daa wa sibi a gbɔjɔmihi a nya. Jehanɛ hu ɔ, wa hlaa blɔhi a nɔ nɛ wa maa gu kɛ ke wa nyɛmimɛ nɛ waa kɛ mɛ ngɛ asafo ɔ mi ɔ ní faa, nɛ waa pee mɛ nubwɔ ke nɔ ko pee wɔ nɔdɔ nɔ́ ko po. (Kol. 3:12-14) Ke wa jeɔ suɔmi nɛ ɔ kpo ɔ, lɔ ɔ tsɔɔ kaa wa ji anɔkuale Kristofohi. w21.10 22 ¶13-14

Ke a fiee yayami peelɔ ko nɛ e tsakee we e tsui ngɛ asafo ɔ mi ɔ, anɛ e ma nyɛ maa ye bua lɛ nɛ e tsake e tsui lo? Ee. Nihi fuu nɛ a pee yayami nɛ hɛdɔ ngɛ he nɛ asafo mi nikɔtɔma amɛ mwɔ yi mi kpɔ nɛ a fiee mɛ kɛ je asafo ɔ mi ɔ a hɛ ba a he nɔ, a pee tsakemihi nɛ a kpale kɛ ba Yehowa ngɔ ekohu. (Heb. 12:5, 6) Mo susu nɔ́ he tomi nɔ́ nɛ ɔ he nɛ o hyɛ. To nɔ hyɛlɔ ko yɔse kaa e jijɔ kake be he wami wawɛɛ. E le hu kaa loko e ma nyɛ maa ye bua jijɔ ɔ nɛ e ná tsami ɔ, ja e je lɛ ngɛ jijɔ kpa amɛ a kpɛti. Se jijɔhi suɔ nɛ a hi kuuhi a mi, a suɔ nɛ a piɛɛ jijɔ kpahi a he. Ke e piɛ a kpɛti nɔ kake pɛ ɔ, e ma nyɛ maa hao. Se akɛnɛ to nɔ hyɛlɔ ɔ suɔ nɛ jijɔ ɔ nɛ be he wami ɔ nɛ ná tsami he je ɔ, e je lɛ ngɛ jijɔ kpa amɛ a kpɛti. Anɛ lɔ ɔ tsɔɔ kaa to nɔ hyɛlɔ ɔ yi mi wa lo? Dɛbi kulaa. E le kaa ke e ngmɛ jijɔ ɔ blɔ nɛ e hi jijɔ kpa amɛ a kpɛti ɔ, hiɔ ɔ ma nyɛ ma sã jijɔ kpa amɛ. Jijɔ ɔ nɛ be he wami nɛ to nɔ hyɛlɔ ɔ je kɛ je jijɔ kpa amɛ a kpɛti ɔ tsɔɔ kaa e ngɛ jijɔ kpa amɛ a he piɛ poe. w21.10 10 ¶9-10

E ji he blɔ ngua nɛ wa ná kaa wa ngɛ nyɛmimɛ nyumuhi kɛ yihi ngɛ je kɛ wɛ nɛ a suɔ wɔ. Wa suɔ nɛ nihi fuu nɛ a ba piɛɛ wa he kɛ sɔmɔ wa Mawu ɔ. Enɛ ɔ he ɔ, e sa nɛ waa hyɛ nɛ hi nɛ wa ko pee nɔ́ ko nɛ ma ha nɛ nihi nɛ a ná juɛmi yaya ngɛ Yehowa we bi a he loo wa hiɔwe Tsɛ ɔ he kɔkɔɔkɔ. Wa bɔɔ mɔde kaa wa maa ba wa je mi saminya konɛ nihi nɛ a ba kase Yehowa he ní nɛ a sɔmɔ lɛ. Be komɛ ɔ, ni komɛ maa tu wa he munyu yaya loo a maa wa wɔ yi mi akɛnɛ wa buɔ wa hiɔwe Tsɛ ɔ tue ɔ he je. Ke wa yeɔ gbeye kaa waa kɛ nihi maa sɛɛ wa hemi kɛ yemi ɔ he ní ɔ, mɛni wa ma nyɛ maa pee? Wa ma nyɛ maa ngɔ wa hɛ kɛ fɔ Yehowa kɛ e Bi ɔ nɔ konɛ a ye bua wɔ. Yesu ha nɛ e kaseli ɔmɛ ná nɔ mi mami kaa e sɛ nɛ a ye gbeye ngɛ nɔ́ nɛ a ma de loo bɔ nɛ a maa tu munyu ha a he. Mɛni he je? Yesu de ke: “Ejakaa a maa tsɔɔ nyɛ nɔ́ nɛ nyɛ ma de ngɛ jamɛ a ngmlɛfia a mi; ejakaa pi nyɛ pɛ nɛ nyɛ ngɛ munyu ɔ tue ɔ, mohu ɔ, nyɛ Tsɛ ɔ mumi ɔ lɛ ngɛ munyu ɔ tue kɛ ngɛ nyɛ nɔ gue.”​—Mat. 10:19, 20. w21.09 24 ¶17-18

Mose ngɔ munyu ko kaa jã kɛ tsu ní. (La 90:1) Jehanɛ hu ɔ, benɛ e piɛ bɔɔ nɛ Mose ma gbo ɔ, e tu munyu ko nɛ taa nɔ tsui he wawɛɛ. E de ke: “Mawu ji we sa he kɛ je blema lokoo, e kɔnihi nɛ a ngɛ kɛ yaa neneene ɔ ngɛ o sisi.” (5 Mose 33:27, NW) Mɛni nɛ munyu nɛ ji “e kɔnihi nɛ a ngɛ kɛ yaa neneene ɔ ngɛ o sisi” ɔ tsɔɔ wɔ ngɛ Yehowa he? Ke wa he ye kaa Yehowa ji wa Wesa he ɔ, wa tsui nɔɔ wa mi. Se be komɛ ɔ, wa kɔni mi ma nyɛ ma jɔ̃ nɛ wa be nyɛe maa pee he nɔ́ ko. Ngɛ behi kaa jã a mi ɔ, mɛni Yehowa maa pee ha wɔ? (La 136:23) E maa ngɔ e nine kɛ wo wa sisi, nɛ e ma wo wa nɔ blɛuu kɛ da si ekohu. (La 28:9; 94:18) Wa le kaa wa ma nyɛ maa ngɔ wa hɛ kɛ fɔ Yehowa nɔ be fɛɛ be. Enɛ ɔ yeɔ bua wɔ ngɛ blɔhi enyɔ a nɔ. Kekleekle ɔ, he fɛɛ he nɛ wa ngɛ ɔ, wa ma nyɛ maa sa we ngɛ Yehowa ngɔ. Enyɔne ɔ, wa hiɔwe Tsɛ nɛ ngɛ suɔmi ɔ susuɔ wa he wawɛɛ nitsɛ. w21.11 6 ¶15-16

Yesu le kaa dami sane nɛ a be yee ɔ maa ka e kaseli ɔmɛ a hemi kɛ yemi. Bɔ nɛ pee nɛ e ye bua mɛ nɛ a nyɛ nɛ a da nya a, e kɛ nɔ́ he tomi nɔ́ nɛ a ngma ngɛ Luka womi ɔ mi ɔ tsu ní. Yesu tu yalɔyo ko nɛ e ya nɔ nɛ e kpa kojolɔ ko nɛ e yi dami sane ɔ pɛɛ kaa e ye dami sane ha lɛ. Yalɔyo ɔ ngɛ nɔ mi mami kaa ke e kɔni mi jɔ̃ we ɔ, kojolɔ ɔ maa ye dami sane ha lɛ. Nyagbenyagbe ɔ, kojolɔ ɔ kplɛɛ e ní bimi ɔ nɔ ha lɛ. Mɛni wa kaseɔ ngɛ mi? Yehowa a pi nɔ nɛ e dɛ ji lɛ. Se Yesu de ke: “Ngɛ anɔkuale mi ɔ, . . . ke a kpaa ngmlaa kɛ tsɛɔ lɛ nyɔ kɛ pia a, anɛ e be dami sane yee ha mɛ lo?” (Luka 18:1-8) Yesu de hu ke: “Ke nɔmlɔ Bi ɔ ba a, ngɛ anɔkuale mi ɔ, anɛ e maa na hemi kɛ yemi nɛ ɔ ngɛ zugba a nɔ lo?” Ke a yi wɔ dami sane ɔ, e sa nɛ waa to wa tsui si nɛ wa fĩ si kɛ tsɔɔ kaa wa ngɛ hemi kɛ yemi kaa yalɔyo ɔ. Ke wa ngɛ hemi kɛ yemi kaa jã a, wa ma nyɛ ma ná nɔ mi mami kaa Yehowa ma tsu wa sane ɔ he ní ha wɔ amlɔ nɛ ɔ loo pee se. Jehanɛ nɛ ɔ, e sa nɛ wa he ye kaa sɔlemi ngɛ he wami. w21.11 23 ¶12; 24 ¶14

Nihewi kɛ Yihewi, anɛ nyɛ nuɔ he kaa Yehowa mlaa amɛ nɛ nyɛɛ kɛ ma tsu ní ɔ be hae nɛ nyɛɛ pee nɔ́ nɛ nyɛ suɔ lo? Jã nɛ Satan ngɛ hlae nɛ nyɛ susu. E suɔ nɛ nyɛɛ ngɔ nyɛ juɛmi kɛ ma nɔ́ nɛ nihi nɛ a ngɛ blɔ nɛ e bli ɔ nɔ ɔ ngɛ pee ɔ nɔ, ejakaa e ngɛ kaa nɔ́ nɛ a ngɛ ngɔɔmi yee ngɛ si himi mi. E ma nyɛ maa gu nɔ́ nɛ o juami bi peeɔ ngɛ sukuu loo nɔ́ nɛ o naa ngɛ Intanɛti ɔ nɔ ɔ nɔ kɛ ha nɛ o susu kaa nɔ́ ko ngɛ mo bɔe ngɛ si himi mi. Satan ngɛ hlae nɛ o susu kaa Yehowa mlaa amɛ nɛ o kɛ ngɛ ní tsue ɔ ha we nɛ o ná bua jɔmi ngɛ si himi mi. Se mo kai kaa Satan sume nɛ nihi nɛ a ngɛ e blɔ ɔ nɔ nyɛɛe ɔ nɛ a na bɔ nɛ a nyagbe maa ba ha. (Mat. 7:13, 14) Se Yehowa lɛɛ e suɔ nɛ o le bɔ nɛ o si himi maa pee kpakpa ha ke o ya nɔ nɛ o nyɛɛ blɔ nɛ e kɛ nɔ yaa wami mi ɔ nɔ.​—La 37:29; Yes. 35:5, 6; 65:21-23. w21.12 23 ¶6-7

Wa le kaa e sa nɛ waa ngɔ tɔmi kɛ ke; lɔ ɔ ji nɔ́ nɛ da nɛ e sa nɛ waa pee. Se pi be fɛɛ be nɛ jã peemi ngɛ gbɔjɔɔ. Eko ɔ, bɔfo Petro hu nu he jã be komɛ. (Mat. 18:21, 22) Mɛni ma nyɛ maa ye bua wɔ? Kekleekle ɔ, mo pue o yi mi tɛ ngɛ si abɔ nɛ Yehowa kɛ o tɔmihi ke mo ɔ he. (Mat. 18:32, 33) Jinɛ e sɛ nɛ e kɛ wa tɔmihi keɔ wɔ, se e kɛ keɔ wɔ faa. (La 103:8-10) Jehanɛ hu ɔ, “e ji wɔ hu wa blɔ nya ní tsumi kaa waa suɔ wa sibi.” Enɛ ɔ he ɔ, pi kaa ke wa suɔ loko waa kɛ tɔmihi maa ke, mohu ɔ, e ji hiɔ nɛ wa hɛɛ wa nyɛmimɛ nyumuhi kɛ yihi. (1 Yoh. 4:11) Enyɔne ɔ, mo pue o yi mi tɛ ngɛ nɔ́ nɛ yaa nɔ ke waa kɛ tɔmi ke ɔ he. Wa yeɔ bua nɔ nɛ tɔ̃ wa nɔ ɔ, wa haa nɛ kake peemi hiɔ asafo ɔ mi, wa baa huɛ bɔmi nɛ ngɛ waa kɛ Yehowa wa kpɛti ɔ yi, nɛ wa jeɔ tlomi ngɛ wa kuɛ nɔ. (2 Kor. 2:7; Kol. 3:14) Nyagbenyagbe ɔ, moo sɔle kɛ ha Yehowa, Nɔ nɛ e deɔ wɔ kaa waa ngɔ tɔmi kɛ ke ɔ. Ko ha nɛ Satan nɛ puɛ huɛ bɔmi nɛ ngɛ o kɛ o nyɛmimɛ nyɛ kpɛti ɔ. (Efe. 4:26, 27) Wa hia Yehowa yemi kɛ buami konɛ tue mi jɔmi nɛ hi asafo ɔ mi. w21.06 22 ¶11; 23 ¶14

David ngɛ fo tue konɛ e kɛ baa e wami yi. Saul nɛ ji Israel matsɛ nɛ ngɛ he wami ɔ fia e pɛɛ si kaa e maa gbe lɛ. David hia niye ní, lɔ ɔ he ɔ, benɛ e su Nob ma a mi ɔ, e bi osɔfo Ahimelek nɛ e ha lɛ abolo enuɔ. (1 Sam. 21:1, 3) Pee se ɔ, e kɛ e we bi ɔmɛ ya laa a he ngɛ tɛ puɔ ko mi. (1 Sam. 22:1) Mɛni he je nɛ David ya je si fɔfɔɛ nɛ ɔ mi ɔ? Saul je David he hunga ejakaa nihi fuu a bua jɔ David he nɛ a je e yi kaa e ye manye ngɛ tahi fuu a mi. Saul le kaa lɛ nitsɛ e tue gbomi nɛ ha nɛ Yehowa kua lɛ kaa Israel matsɛ nɛ e hla David kaa e ba ye matsɛ ngɛ e se ɔ nɛ. (1 Sam. 23:16, 17) Se loloolo ɔ, Saul ji Israel matsɛ nɛ e ngɛ ta buli fuu nɛ nihi fuu hu fĩ e se. Enɛ ɔ he ɔ, e sa nɛ David nɛ tu fo kɛ baa e wami yi. Anɛ Saul susu kaa e ma nyɛ maa tsi Mawu nya konɛ e ko ha nɛ David nɛ ba ye Matsɛ lo? (Yes. 55:11) Baiblo ɔ de we nɔ́ ko ngɛ lɔ ɔ he, se wa le kaa Saul kɛ e he ngɛ oslaa mi woe. Nihi nɛ a teɔ si kɛ woɔ Mawu ɔ nine nyɛɔ si be fɛɛ be! w22.01 2 ¶1-2

Yesu tsu fiɛɛmi ní tsumi ɔ wawɛɛ. E ngɔ he blɔ fɛɛ he blɔ nɛ e ná a kɛ tsɔɔ nihi ní kɛ tsɔɔ kaa e suɔ mɛ. (Luka 19:47, 48) Mɛni wo lɛ he wami nɛ e pee jã? E mi mi sã lɛ ngɛ nihi a he. E suu be nɛ nihi fuu suɔ nɛ a nu Yesu munyu ɔ, nɛ enɛ ɔ ha nɛ e kɛ e kaseli ɔmɛ “nyɛ we nɛ a ye ní tete po.” (Maak. 3:20) Benɛ nyumu ko suɔ nɛ e kɛ Yesu maa sɛɛ ní nyɔ ko mi ɔ, Yesu pee klaalo kaa e maa ye bua lɛ. Yesu ye nihi tsuo nɛ a bu e munyu ɔ tue ɔ odase kɛ pi si. Se nihi nɛ a bu lɛ tue sisije ɔ, a kpɛti nihi fuu ba pee we e kaseli. Mwɔnɛ ɔ, wɔ hu wa suɔ nɛ nɔ fɛɛ nɔ nɛ nu sane kpakpa a. (Níts. 10:42) Bɔ nɛ pee nɛ wa nyɛ nɛ waa su oti nɛ ɔ he ɔ, eko ɔ, e he maa hia nɛ wa tsake blɔ nɔ nɛ wa guɔ kɛ fiɛɛɔ ɔ hɛ mi. E sɛ nɛ waa fiɛɛ ngɛ be nɛ maa hi ha wɔ pɛ mi. E sa nɛ waa pee klaalo kaa wa ma tsake be nɛ waa kɛ fiɛɛɔ, nɛ waa fiɛɛ ngɛ be nɛ wa nine maa su nihi fuu a nɔ ɔ mi. Ke wa pee jã a, wa ma nyɛ ma ná nɔ mi mami kaa Yehowa bua maa jɔ. w22.01 17 ¶13-14

Mwɔnɛ ɔ, e he wa ha nihi fuu kaa a ma ná hemi kɛ yemi ngɛ nihi nɛ a hɛɛ blɔ nya a mi. A naa kaa amlaalo ɔ kɛ ma mlaahi poɔ nihi nɛ a ngɛ sika kɛ nihi nɛ a ngɛ blɔ nya a he piɛ, se a susuu we ohiatsɛmɛ a he. Jehanɛ hu ɔ, jami hɛ mi nyɛɛli komɛ peeɔ níhi nɛ dɛ, enɛ ɔ ha nɛ ni komɛ be hemi kɛ yemi ngɛ Mawu mi. Lɔ ɔ he ɔ, ke waa kɛ nɔ ko ngɛ Baiblo ɔ kasee ɔ, e sa nɛ waa ye bua lɛ nɛ e ná hemi kɛ yemi ngɛ Yehowa kɛ nihi nɛ e hla nɛ a ngɛ hɛ mi nyɛɛe ngɛ asafo ɔ mi ɔ a mi. Ngɛ anɔkuale mi ɔ, pi nihi nɛ waa kɛ mɛ ngɛ Baiblo ɔ kasee ɔ pɛ nɛ e sa nɛ a ná hemi kɛ yemi ngɛ Yehowa kɛ e we asafo ɔ mi. Ke wa ngɛ Yehowa sɔmɔe jeha babauu ji nɛ ɔ po ɔ, e sa nɛ wa ná hemi kɛ yemi kaa blɔ nɔ nɛ Yehowa guɔ kɛ tsuɔ níhi a he ní ɔ hi pe kulaa. Be komɛ ɔ, waa kɛ si fɔfɔɛ komɛ maa kpe nɛ ma nyɛ maa ka hemi kɛ yemi nɛ wa ngɛ ngɛ Yehowa mi ɔ. w22.02 2 ¶1-2