May

Bɔ nɛ pee nɛ waa le Yesu saminya a, Yehowa je suɔmi mi nɛ e ha nɛ a ngma Sane Kpakpa eywiɛ ɔmɛ ngɛ Baiblo ɔ mi. Sane Kpakpa womi ɔmɛ deɔ wɔ Yesu si himi kɛ e fiɛɛmi ní tsumi ɔ he sane. E tsɔɔ wɔ níhi nɛ Yesu de, níhi nɛ e pee, kɛ bɔ nɛ e nu he ha. Womi eywiɛ nɛ ɔmɛ yeɔ bua wɔ nɛ wa ‘susuɔ’ nɔ hyɛmi nɔ́ nɛ Yesu pee ɔ he wawɛɛ. Ngɛ blɔ ko nɔ ɔ, a tsɔɔ wɔ Yesu nane mami he ɔmɛ. Lɔ ɔ he ɔ, ke wa kaseɔ Sane Kpakpa womi ɔmɛ saminya a, lɔ ɔ ma ha nɛ waa hi Yesu lee wawɛɛ. Nɛ enɛ ɔ maa ye bua wɔ nɛ wa ma nyɛ maa nyɛɛ e nane mami he ɔmɛ a se haa. Ke wa ma nyɛ ma ná Sane Kpakpa womi ɔmɛ a he se saminya a, pi kanemi pɛ nɛ e sa nɛ waa kane. E sa nɛ wa ná be kɛ kase nɛ wa pue wa yi mi tɛ ngɛ nɔ́ nɛ wa ngɛ kasee ɔ he saminya. (Yosh. 1:8) Moo na si fɔfɔɛ ɔmɛ kaa nɔ́ nitsɛ. Moo ngɔ lɛ kaa o ngɛ níhi nɛ ngɛ nɔ yae ɔ nae, o ngɛ nue, nɛ o ngɛ he nue kaa bɔ nɛ nɔ nɛ o ngɛ e he sane kanee ɔ nu he ɔ. Moo pee níhi a mi hlami ngɛ asafo ɔ womi ɔmɛ a mi. w21.04 4-5 ¶11-13

Jeha lafahi abɔ loko Yesu maa ba zugba a nɔ ɔ, Yehowa ha nɛ a gba kɛ fɔ si kaa a kɛ sika hiɔ 30 maa tsɔɔ Mesia a se blɔ. (Zak. 11:12, 13) Nɔ se blɔ tsɔɔlɔ ɔ maa pee Yesu huɛmɛ nɛ nyu bi ngɛ e kɛ mɛ a kpɛti ɔ a ti nɔ kake. (La 41:9) Gbalɔ Zakaria ngma ke: “Moo fia lɛ nɔ́ konɛ to ɔmɛ nɛ a gbɛ fia.” (Zak. 13:7) Munyu nɛ ɔmɛ be hae nɛ tsui kpakpatsɛmɛ nɛ a kua Yesu, mohu ɔ, e ma ha nɛ a hemi kɛ yemi ɔ mi maa wa benɛ a na nɛ ní nɛ ɔmɛ ngɛ mi bae ɔ. Anɛ wa naa nyagba nɛ ɔ mwɔnɛ ɔ lo? Ee. Ngɛ wa be nɛ ɔ mi ɔ, Yehowa Odasefohi nɛ a le mɛ wawɛɛ ɔ a kpɛti ni komɛ je anɔkuale ɔ mi nɛ a ba pee hemi kɛ yemi kuali, nɛ a bɔɔ mɔde kaa a ma je ni kpahi ngɛ anɔkuale ɔ mi. A gbɛ Yehowa Odasefohi a he lakpa munyuhi kɛ fia ngɛ tiivi, hleedio, Intanɛti ɔ nɔ, kɛ adafi fiami womihi a mi. Munyu nɛ ɔmɛ ekomɛ ji lakpa munyuhi, ekomɛ hu anɔkuale bɔɔ ko ngɛ mi. Munyu nɛ ɔmɛ gbeɔ wa he guɛ. Se tsui kpakpatsɛmɛ ha we nɛ munyu nɛ ɔmɛ nɛ tɔ̃tɔ̃ a nane, ejakaa a le kaa Baiblo ɔ gba kɛ fɔ si kaa ní nɛ ɔmɛ maa ya nɔ.​—Mat. 24:24; 2 Pet. 2:18-22. w21.05 11 ¶12; 12-13 ¶18-19

Baiblo ɔ tsɔɔ heii kaa ke be ngɛ mi puee ɔ anɔkuale nile ɔ yaa hɛ mi. (Kol. 1:9, 10) Yehowa jeɔ anɔkuale ɔ kpo bɔɔbɔɔbɔɔ, nɛ e sa nɛ waa pee klaalo kaa wa maa to wa tsui si konɛ waa nu anɔkuale ɔ sisi bɔɔbɔɔbɔɔ. Ke nihi nɛ a ngɛ hɛ mi nyɛɛe ɔ na kaa e biɔ nɛ a pee tsakemi ngɛ bɔ nɛ wa nu Baiblo tsɔɔmi ko sisi ha a he ɔ, a kɛ oya yemi peeɔ jã. Mwɔnɛ ɔ, jamihi fuu tsakeɔ a tsɔɔmi ɔmɛ akɛnɛ a suɔ nɛ a sa a jami mi bi ɔmɛ loo je ɔ hɛ mi ɔ he je. Se Yehowa Odasefohi lɛɛ a peeɔ tsakemihi akɛnɛ a suɔ nɛ a hɛ kɛ su Mawu he nɛ a sɔmɔ lɛ kaa bɔ nɛ Yesu sɔmɔ lɛ ɔ he je. (Yak. 4:4) Ke wa pee tsakemi ko ɔ, tsa pi je ɔ susumi nɛ tsake ɔ he je, se mohu ɔ, akɛnɛ wa ba nu Baiblo ɔ sisi saminya a he je. Wa suɔ anɔkuale ɔ!​—1 Tɛs. 2:3, 4. w21.10 22 ¶12

Mɛni o ma nyɛ maa pee ke o nuɔ he kaa e piɛ mo pɛ? Moo ngɔ o juɛmi kɛ ma bɔ nɛ Yehowa ngɛ mo ye buae ha a nɔ. (La 55:22) Jã nɛ o maa pee ɔ maa ye bua mo nɛ o be he nue kaa e piɛ mo pɛ. Jehanɛ hu ɔ, mo susu bɔ nɛ Yehowa ngɛ o nyɛmimɛ Kristofohi nɛ a nuɔ he kaa e piɛ mɛ pɛ ɔ ye buae ha a he. (1 Pet. 5:9, 10) Nyɛminyumu ko nɛ a tsɛɛ lɛ ke Hiroshi nɛ lɛ pɛ ji Odasefo no ngɛ e weku ɔ mi ɔ de ke: “Wɔ tsuo wa le kaa waa kɛ wa nyɛmi tsuo ngɛ Yehowa sɔmɔe, nɛ enɛ ɔ woɔ wɔ nihi nɛ wa weku li be asafo ɔ mi ɔ he wami.” Jehanɛ hu ɔ, moo sɔle, moo kane Baiblo ɔ, nɛ o ya asafo mi kpehi be fɛɛ be. E sa nɛ o de Yehowa bɔ nɛ o ngɛ he nue ha tutuutu. E sa nɛ o kane Mawu Munyu ɔ be fɛɛ be, nɛ o pue o yi mi tɛ ngɛ Baiblo mi sane pɔtɛɛ komɛ nɛ tsɔɔ kaa Yehowa suɔ mo ɔ a he. Nyɛmimɛ komɛ kaseɔ ngmamihi nɛ a woɔ nɔ bua wawɛɛ ɔ kɛ woɔ a yi mi. Ngmami nɛ ɔmɛ ekomɛ ji La 27:10 kɛ Yesaya 41:10. Nyɛmimɛ komɛ hu ngɛ nɛ a kɛ níhi nɛ a fiaa nɛ a buɔ tue ɔ tsuɔ ní ke a ngɛ a he dlae kɛ ha asafo mi kpe, loo a ngɛ Baiblo ɔ kanee ngɛ a dɛ he. A tsɔɔ kaa jã nɛ a peeɔ ɔ yeɔ bua mɛ nɛ a nui he kaa e piɛ mɛ pɛ. w21.06 9-10 ¶5-8

Anɛ o suɔlɔ ko gbo nɛ o ngɛ aywilɛho yee lo? Mo ná be kɛ kane nihi nɛ a tle mɛ si kɛ je gbeje nɛ a tu a he munyu ngɛ Baiblo ɔ mi ɔ a he ní nɛ o kɛ wo o hemi kɛ yemi ɔ mi he wami. Anɛ o weku no ko nɛ a fiee lɛ kɛ je asafo ɔ mi ɔ ha nɛ o ngɛ aywilɛho yee lo? Moo kase ní, nɛ o ná nɔ mi mami kaa blɔ nɛ Yehowa guɔ nɔ kɛ tsɔseɔ nɔ ɔ hi be fɛɛ be, nɛ e se be. Moo na nyagba fɛɛ nyagba nɛ o kɛ ngɛ kpee ɔ kaa e ji he blɔ nɛ o kɛ maa fia o hemi kɛ yemi ɔ kɛ ma si. Moo je o tsui mi nɛ o sɔle kɛ ha Yehowa. Ko tsɔ o he banee, mohu ɔ, o kɛ o nyɛmimɛ nyumuhi kɛ yihi nɛ bɔ. (Abɛ 18:1) Moo pee níhi nɛ maa ye bua mo konɛ o nyɛ nɛ o fĩ si, ke e ma bi nɛ o fo ya po. (La 126:5, 6) Moo ya asafo mi kpehi kɛ fiɛɛmi be fɛɛ be nɛ o kane Baiblo ɔ daa ligbi. Moo ngɔ o juɛmi kɛ ma jɔɔmihi nɛ a se be nɛ Yehowa ngɛ kɛ ha mo ɔ nɔ. Ke o na bɔ nɛ Yehowa ngɛ mo ye buae ha a, hemi kɛ yemi nɛ o ngɛ ɔ mi maa hi wae be fɛɛ be. w21.11 23 ¶11; 24 ¶17

Ngɛ mɛni blɔ nɔ nɛ Yesu kaseli ɔmɛ ngɛ kaa “ni nyafii”? Mɛnɔmɛ nɛ je ɔ buu mɛ kaa a he ngɛ se nami? Niatsɛmɛ, nihi nɛ a he biɛ, kɛ nihi nɛ a ngɛ blɔ nyahi. Se Yesu kaseli ɔmɛ lɛɛ a be jã, enɛ ɔ he ɔ, nihi naa mɛ kaa a he hia we, nɛ a ji “ni nyafii.” (1 Kor. 1:26-29) Se pi jã nɛ Yehowa naa mɛ. Mɛni ha nɛ Yesu tu munyu kɛ kɔ “ni nyafii nɛ ɔmɛ” a he ɔ? E kaseli ɔmɛ bi lɛ ke: “Mɛnɔ tutuutu ji nɔmlɔ ngua pe kulaa ngɛ hiɔwe Matsɛ Yemi ɔ mi?” (Mat. 18:1) Yuda bi fuu nɛ a hi si ngɛ jamɛ a be ɔ mi ɔ suɔ nɛ ni kpahi nɛ a bu mɛ kaa a he hia. Womi mi lelɔ ko de ke: “Nɔ́ nɛ he hia mɛ wawɛɛ ji kaa ni kpahi maa bu mɛ, nɛ a he biɛ hulɔ.” Yesu le kaa e sa nɛ e kaseli ɔmɛ nɛ a bɔ a he mɔde nɛ a je koli simi su nɛ he si ngɛ Yuda bi ɔmɛ a mi ɔ kɛ je a tsui mi. w21.06 20 ¶2; 21 ¶6, 8; 22 ¶9

Bɔfo Paulo ji asafo mi nɔkɔtɔma nɛ e peeɔ nɔ hyɛmi nɔ́ kpakpa. Kaa nɔ hyɛmi nɔ́ ɔ, benɛ e nyɛmimɛ nɛ a ngɛ Tɛsalonika a hia ga womi ɔ, e wo mɛ ga. Se benɛ Paulo ngɛ sɛ womihi ngmae kɛ ha mɛ ɔ, e sɛ hlami nɛ e je a yi ngɛ anɔkuale yemi nɛ a kɛ ngɛ ní tsue, ngɛ a suɔmi dengme gbomi ɔ, kɛ a si fimi ɔ he. Jehanɛ hu ɔ, e susu si fɔfɔɛhi nɛ a ngɛ mi ɔ he, nɛ e ha nɛ a le kaa e le nyagbahi nɛ a kɛ ngɛ kpee. E le bɔ nɛ a kɛ anɔkuale yemi ngɛ si fĩe ha hulɔ. (1 Tɛs. 1:3; 2 Tɛs. 1:4) E de mɛ po kaa Kristofohi kpahi naa nɔ hyɛmi nɔ́ kpakpa nɛ a peeɔ ɔ. (1 Tɛs. 1:8, 9) Hyɛ bɔ nɛ a bua maa jɔ ha benɛ a nine su Paulo sɛ womi nɛ e je a yi ngɛ mi ɔ nɔ ɔ! Atsinyɛ jemi ko be he kaa Paulo suɔ e nyɛmimɛ ɔmɛ wawɛɛ. Enɛ ɔ he je ɔ, e kɛ ga womi nɛ nu tso ha Tɛsalonika bi ɔmɛ ngɛ sɛ womi enyɔ nɛ e ngma kɛ ya ha mɛ ɔ tsuo mi.​—1 Tɛs. 4:1, 3-5, 11; 2 Tɛs. 3:11, 12. w22.02 15 ¶6

Satan gu jami hɛ mi nyɛɛli nɛ a yi anɔkuale ɔ a nɔ kɛ tsɔɔ kaa Yehowa yi mi wa, nɛ lɛ nɛ e ha nɛ adesahi ngɛ nɔ́ nae. A ti ni komɛ po deɔ kaa ke jokuɛwi gbo ɔ, Mawu lɛ ngɔ mɛ kɛ ya hiɔwe akɛnɛ e hia bɔfohi fuu ngɛ hiɔwe ɔ he je. Enɛ ɔ gbeɔ Mawu he guɛ wawɛɛ! Se wɔɔ lɛɛ wa le kaa Yehowa ji Tsɛ nɛ ngɛ suɔmi. Ke hiɔ nɛ nya wa nu wɔ, aloo wa suɔlɔ ko gbo ɔ, wa pia we Mawu kɔkɔɔkɔ. Wa ngɛ hemi kɛ yemi kaa e maa po hiɔ se, nɛ e ma tle wa suɔli nɛ a gbo ɔ si kɛ ba wami mi hwɔɔ se. Wa ma nyɛ ma de nihi nɛ a suɔ nɛ a bu wɔ tue ɔ kaa Yehowa ji Mawu nɛ ngɛ suɔmi. Enɛ ɔ ma ha nɛ Yehowa ma ná heto kpakpa kɛ ha nɔ nɛ ngɛ lɛ ahlua bɔe ɔ. (Abɛ 27:11) Yehowa ji Mawu nɛ e mi mi sãa lɛ. Ke yi mi wami, hiɔ aloo mluku nɛ wa yi ɔ ha nɛ wa ngɛ nɔ́ nae ɔ, e dɔɔ lɛ wawɛɛ. (La 22:23, 24) Yehowa le bɔ nɛ wa ngɛ nɔ́ nae ha; e suɔ nɛ e po wa nɔ́ nami ɔ se, nɛ e maa po se hulɔ.​—Kɛ to 2 Mose 3:7, 8; Yes. 63:9 ɔ he. w21.07 9-10 ¶9-10

E be kɛe nɛ adesahi nɛ a buɔ Yehowa tue ɔ ma ná he blɔ nɛ pe kulaa, nɛ ji kaa a maa suɔ Yehowa, nɛ a ma sɔmɔ lɛ kɛ ya neneene! Yesu ma dla nyagbahi tsuo nɛ Adam kɛ Hawa kɛ ba akɛnɛ a mwɔ a yi mi kpɔ kaa a maa je Mawu weku ɔ mi ɔ he je. Yehowa ma tle nimli ayɔhi abɔ si kɛ ba wami mi, nɛ e ma ha mɛ he blɔ nɛ a hi si kɛ ya neneene ngɛ Paradeiso ɔ mi, nɛ a ma ná nɔmlɔ tso mi he wami kpakpa. (Luka 23:42, 43) Ke adesahi nɛ a sɔmɔɔ Yehowa a ye mluku ɔ, mɛ tsuo a ma ná “hɛ mi nyami kɛ bumi” nɛ Baiblo ɔ tu he munyu ɔ. Ke o piɛɛ “asafo kuu ngua” a he ɔ, o ngɛ hɛ kɛ nɔ fɔmi kpakpa. (Kpoj. 7:9) Mawu suɔ mo, nɛ e suɔ nɛ o piɛɛ e weku ɔ he. Enɛ ɔ he ɔ, moo pee nɔ́ fɛɛ nɔ́ nɛ o ma nyɛ konɛ o sa e hɛ mi. Mo ha nɛ Mawu si womi ɔmɛ nɛ hi o juɛmi kɛ o tsui mi daa ligbi. O bua nɛ jɔ he blɔ nɛ o ná kaa o ngɛ wa hiɔwe Tsɛ nɛ e suɔ wɔ ɔ jae, nɛ o hɛ nɛ sa hɛ kɛ nɔ fɔmi nɛ o ngɛ kaa o ma je e yi kɛ ya neneene ɔ! w21.08 7 ¶18-19

Gbalɔ Yeremia fiɛɛ jeha 40 kɛ se, se a bui lɛ tue nɛ a te si kɛ wo lɛ. Akɛnɛ a ngɛ lɛ “ahlua bɔe, nɛ a ngɛ [e] he fɛu yee” he je ɔ, e kɔni mi jɔ̃ nɛ e ma e juɛmi nya si kaa e ma kpa fiɛɛmi. (Yer. 20:8, 9) Se Yeremia kpa we! Mɛni ye bua lɛ nɛ e ya nɔ nɛ e kɛ bua jɔmi tsu fiɛɛmi ní tsumi ɔ? E kɛ e hɛ ma níhi enyɔ nɛ a he hia nɔ. Kekleekle ɔ, Mawu sɛ gbi ɔ nɛ Yeremia fiɛɛ ɔ, ma ha nɛ ni ɔmɛ a nine nɛ su “ní kpakpahi nɛ [a] ngɛ blɔ hyɛe” hwɔɔ se ɔ nɔ. (Yer. 29:11) Enyɔne ɔ, Yehowa hla Yeremia kaa e fiɛɛ nɛ e ngɔ e sɛ gbi ɔ kɛ ha e we bi. (Yer. 15:16) Wɔ hu wa fiɛɛɔ sɛ gbi nɛ haa nɔ hɛ kɛ nɔ fɔmi ɔ, nɛ Yehowa biɛ ɔ hu ngɛ wa nɔ kaa e we Odasefohi. Ke wa ngɔ ní nɛ ɔmɛ nɛ a he hia a kɛ ma wa hɛ mi ɔ, wa bua maa jɔ ngɛ bɔ fɛɛ bɔ nɛ nihi maa pee a ní ha a he. Enɛ ɔ he ɔ, ko ha nɛ o kɔni mi nɛ jɔ̃ ke o Baiblo kaselɔ yɛ e hɛ mi mlamlaamla kaa bɔ nɛ o ngɛ hlae ɔ. Kaselɔ peemi ní tsumi ɔ biɔ tsui si tomi.​—Yak. 5:7, 8. w21.10 27 ¶12-13

Wa ngɛ Yehowa sɔmɔe be kɛkɛɛ jio, kpaako wa bɔni lɛ sɔmɔmi jio, e sa nɛ waa ya nɔ nɛ waa fia hemi kɛ yemi nɛ wa ngɛ ngɛ e mi ɔ kɛ ma si, nɛ waa hɛɛ mi. Mɛni he je? Ejakaa ke wa hyɛ we nɛ hi ɔ, wa hemi kɛ yemi ɔ mi ma nyɛ ma gbɔjɔ. Kaa bɔ nɛ wa le ɔ, hemi kɛ yemi ji níhi nɛ a ngɛ nitsɛnitsɛ nɛ a nɛ ɔmɛ a he odase nɛ ngɛ heii. Wa hɛ ma nyɛ maa je níhi nɛ wa nɛ kɛ wa hɛngmɛ ɔ a nɔ mla. Enɛ ɔ he ɔ, Paulo kale hemi kɛ yemi nɛ a be ɔ kaa “yayami ɔ nɛ e fĩɔ wɔ ngɛ blɔ nɛ e yi kulaa nɔ.” Ke jã a, lɛɛ mɛni wa ma nyɛ maa pee konɛ hemi kɛ yemi nɛ wa ngɛ ngɛ Mawu mi ɔ mi nɛ ya nɔ nɛ e wa? (2 Tɛs. 1:3) Kekleekle ɔ, moo pɔ Yehowa pɛɛ kpami nɛ e ha mo e mumi klɔuklɔu ɔ. Mɛni he je? Ejakaa hemi kɛ yemi ji mumi ɔ yiblii ɔ fã ko. (Gal. 5:22, 23) Ke Mawu kɛ e mumi klɔuklɔu ɔ yi bua wɔ ɔ, wa be nyɛe ma ná hemi kɛ yemi ngɛ wa Bɔlɔ ɔ mi, nɛ wa ha nɛ e mi nɛ wa. Ke wa yaa nɔ nɛ wa biɔ Yehowa e mumi klɔuklɔu ɔ, e ma ha wɔ. (Luka 11:13) Wa ma nyɛ maa sɔle kikɛ: “Ha wɔ hemi kɛ yemi fuu.” (Luka 17:5) Jehanɛ hu ɔ, moo kase Mawu Munyu ɔ be fɛɛ be.​—La 1:2, 3. w21.08 18-19 ¶16-18

Yehowa kɛ nyɛmimɛ nɛ a wa ngɛ jeha mi ɔ ma nyɛ ma tsu ní ngɛ blɔhi fuu a nɔ. Eko ɔ, a be he wami kaa sa a, se a ná níhi a si kpamihi fuu ngɛ jehahi nɛ be ɔ a mi. Yehowa kɛ nihi nɛ a wa ngɛ jeha mi ɔ tsu ní ngɛ blɔ slɔɔtohi a nɔ. Kaa nɔ hyɛmi nɔ́ ɔ, Baiblo ɔ tsɔɔ bɔ nɛ Yehowa sɔmɔli anɔkualetsɛmɛ komɛ sɔmɔ Yehowa ha kɛ ya si a bwɔmi mi tɔɔ. Kaa nɔ hyɛmi nɔ́ ɔ, Mose ye maa pee jeha 80 benɛ Yehowa kɛ lɛ bɔni ní tsumi kaa e gbalɔ kɛ Israel ma a nane mi dalɔ. Benɛ gbalɔ Daniel ye maa pee jeha 90 kɛ se ɔ, Yehowa ya nɔ nɛ e kɛ lɛ tsu ní kaa e munyu tulɔ. Benɛ Yehowa ha nɛ bɔfo Yohane ngma Kpo Jemi womi ɔ, e ma nyɛ maa ba kaa e ye jeha 90 kɛ se. Simeon nɛ e ji “dalɔ . . . nɛ e yeɔ Mawu gbeye” ɔ he munyu bɔɔ pɛ nɛ ngɛ Baiblo ɔ mi, se Yehowa le lɛ, nɛ e ha nɛ e na bimwɔyo Yesu, nɛ e ha nɛ e gba kɛ kɔ Yesu kɛ e yayo a he.​—Luka 2:22, 25-35. w21.09 3-4 ¶5-7

E sa nɛ fɔli nɛ a hyɛ nɛ hi nɛ a ko ngɔ jokuɛ ko kɛ to jokuɛ kpa ko he, aloo a hyɛ blɔ kaa jokuɛ ko maa pee níhi nɛ e be nyɛe maa pee. Ke fɔli peeɔ jã a, a bimɛ ɔmɛ a kɔni mi ma jɔ̃. (Efe. 6:4) Nyɛmiyo ko nɛ a tsɛɛ lɛ ke Sachiko ɔ de ke: “Ye yayo hyɛɛ blɔ kaa ma po ye sukuu ka amɛ tsuo, se jã be hie peemi. E ngɛ mi kaa jeha babauu ji nɛ ɔ nɛ i gbe sukuu nya mohu lɛɛ, se be komɛ ɔ, i nuɔ he kaa eko ɔ, Yehowa bua jɔɛ ye nyɛmi tsuo nɛ i kɛ ngɛ lɛ sɔmɔe ɔ he.” Matsɛ David de ke e nyɛɛ we “ní nguanguahi” loo níhi nɛ ngɛ nyakpɛ tsɔ ɔ a se. Akɛnɛ e baa e he si he je ɔ, e bua jɔ níhi nɛ e ngɛ ɔ he, nɛ e ‘peeɔ kpoo.’ (La 131:2) Mɛni fɔli ma nyɛ maa kase ngɛ David munyu nɛ ɔ mi? Loko fɔli ma nyɛ maa ba a he si ɔ, e sɛ nɛ a susu kaa e sa nɛ a pee ní nguanguahi. Nɛ jã kɛ̃ nɛ e sɛ nɛ a hla níhi fuu ngɛ a bimɛ a dɛ hulɔ. Loko fɔli ma nyɛ maa ye bua a bimɛ ɔ, e biɔ nɛ a le a nyɛmihi kɛ a gbɔjɔmihi, konɛ a ye bua mɛ nɛ a ngɔ otihi nɛ sa kɛ ma a hɛ mi. w21.07 21-22 ¶5-6

Yehowa ha wa ti nɔ fɛɛ nɔ he blɔ nɛ e kɛ hla nɔ́ nɛ e suɔ. Enɛ ɔ tsɔɔ kaa wa ma nyɛ maa hla kaa wa maa bu Yehowa tue loo wa be lɛ tue bue. Jokuɛ komɛ ngɛ nɛ a fɔli pee we nɔ hyɛmi nɔ́ kpakpa kɛ ha mɛ, se a hla kaa a ma sɔmɔ Yehowa, nɛ a yaa nɔ nɛ a yeɔ lɛ anɔkuale. Se jokuɛ komɛ hu ngɛ nɛ a fɔli tsɔɔ mɛ Yehowa he ní kɛ je a jokuɛwi a si tɔɔ konɛ a ná suɔmi kɛ ha lɛ, se pee se ɔ, a kpa lɛ sɔmɔmi. Enɛ ɔ he ɔ, e he hia nɛ wa ti nɔ fɛɛ nɔ nɛ mwɔ e yi mi kpɔ kaa e ma sɔmɔ Yehowa. (Yosh. 24:15) Nyɛ fɔli nɛ nyɛ ngɛ aywilɛho yee akɛnɛ nyɛ bi ko kpa Yehowa sɔmɔmi, nyɛ ko susu kaa nyɛ lɛ nyɛ ha nɛ e ba lɛ jã! Be komɛ ɔ, fɔlɔ ko kpaa Yehowa sɔmɔmi nɛ e siɔ e weku ɔ. (La 27:10) Enɛ ɔ ma nyɛ maa hao jokuɛwi nɛ a ngɛ mɔde bɔe kaa a maa kase a fɔli a nɔ hyɛmi nɔ́ ɔ. Nihewi kɛ yihewi, ke a fiee nyɛ fɔlɔ ko kɛ je asafo ɔ mi ɔ, nyɛ ná nɛ nyɛɛ le kaa Yehowa le bɔ nɛ nɔ́ nɛ ɔ ngɛ nyɛ dɔe ha. E suɔ nyɛ, nɛ e bua jɔ kaa nyɛ ngɛ lɛ sɔmɔe ngɛ anɔkuale mi. Nyɛ kai hu kaa tsa pi nyɛ nɛ nyɛ ha nɛ nyɛ fɔli ɔmɛ kpa Yehowa sɔmɔmi. w21.09 27 ¶5-7

Wa ma nyɛ maa ngɔ Kristofo no nɛ a fiee lɛ ngɛ asafo ɔ mi ɔ kɛ to jijɔ nɛ e ngɛ hiɔ ko nue nɛ e ma nyɛ ma sã jijɔ kpahi ɔ he. Akɛnɛ huɛ bɔmi nɛ ngɛ e kɛ Yehowa a kpɛti ɔ puɛ he je ɔ, e ba pee kaa nɔ ko nɛ e be he wami. (Yak. 5:14) Kaa bɔ nɛ ke hiɔ nɛ sãa nɔ ngɛ nɔ ko he nɛ e ma nyɛ kɛ sã ni kpahi ɔ, jã nɔuu kɛ̃ nɛ ke huɛ bɔmi nɛ ngɛ nɔ ko kɛ Yehowa a kpɛti ɔ puɛ ɔ, e ma nyɛ ma ná ni kpahi a nɔ he wami. Enɛ ɔ he ɔ, ngɛ si fɔfɔɛ komɛ a mi ɔ, e he maa hia nɛ a je nɔ nɛ e be he wami ngɛ mumi mi ɔ ngɛ nyɛmimɛ nɛ a ngɛ asafo ɔ mi ɔ a kpɛti. Tsɔsemi nɛ ɔ tsɔɔ kaa Yehowa suɔ nyɛmimɛ nɛ a ngɛ asafo ɔ mi ɔ, nɛ eko ɔ, e ma nyɛ maa ye bua yayami peelɔ ɔ nɛ e na kaa nɔ́ nɛ e pee ɔ hí, nɛ e tsake e tsui. Ke a fiee nɔ ko ngɛ asafo ɔ mi po ɔ, e ma nyɛ maa ba asafo mi kpehi konɛ e ná Baiblo tsɔɔmihi nɛ ma nyɛ ma ha nɛ e hemi kɛ yemi ɔ mi nɛ wa ekohu. Jehanɛ hu ɔ, e ma nyɛ ma ba ngɔ wa womi ɔmɛ nɛ e kase, nɛ e ma nyɛ maa hyɛ JW Brɔɔdkastin ɔ ngɛ e dɛ he. Ke asafo mi nikɔtɔma amɛ na kaa e ngɛ tsakemihi pee ɔ, a ma nyɛ maa wo lɛ ga be komɛ nɛ a kɛ blɔ tsɔɔmi ma ha lɛ konɛ e nyɛ nɛ e dla e kɛ Yehowa a kpɛti huɛ bɔmi ɔ. Enɛ ɔ maa ye bua konɛ a nyɛ nɛ a ngɔ lɛ ngɛ asafo ɔ mi ekohu. w21.10 10 ¶9, 11

Mwɔnɛ ɔ, wa nyɛɛɔ blɔ nɛ Kristofohi nɛ a hi si ngɛ kaseli ɔmɛ a be ɔ mi ɔ gu nɔ kɛ ja Mawu ɔ se. Mwɔnɛ ɔ, a to asafo ɔ he blɔ nya kaa bɔ nɛ a pee ngɛ kaseli ɔmɛ a be ɔ mi ɔ. Kaa nɔ hyɛmi nɔ́ ɔ, wa ngɛ kpɔ mi nɔ hyɛli, asafo mi nikɔtɔmahi kɛ asafo mi sɔmɔli kaa bɔ nɛ e ji ngɛ jamɛ a be ɔ mi ɔ. (Filip. 1:1; Tito 1:5) Kaa bɔ nɛ Kristofohi nɛ a hi si ngɛ kaseli ɔmɛ a be ɔ mi ɔ pee ɔ, wɔ hu wa buɔ Yehowa mlaa nɛ kɔɔ bɔmi nami kɛ gba si himi he ɔ, wa buɔ muɔ kaa e ngɛ klɔuklɔu, nɛ wa poɔ asafo ɔ he piɛ kɛ jeɔ nihi nɛ a sume kaa a kɛ Mawu mlaahi ma tsu ní ɔ a he. (Níts. 15:28, 29; 1 Kor. 5:11-13; 6:9, 10; Heb. 13:4) Baiblo ɔ de heii kaa “hemi kɛ yemi kake” nɛ Mawu kplɛɛ nɔ. (Efe. 4:4-6) E ji he blɔ nɛ wa ná kaa wa ji Yehowa we bi, nɛ wa le anɔkuale nɛ kɔɔ Yehowa kɛ e yi mi tomihi a he! Nyɛ ha nɛ waa ya nɔ nɛ wa ná nɔ mi mami nɛ mi wa ngɛ anɔkuale ɔ mi, nɛ waa pɛtɛ he kpɛii. w21.10 22-23 ¶15-17

Matsɛ Yehoshafat kɛ nyagba ko nɛ nya wa kpe. Amon bi, Moab bi kɛ nyumuhi nɛ a je Seir yoku ɔmɛ a nɔ ɔ wo e kɛ e weku ɔ kɛ e ma mi bi ɔmɛ a he gbeye. (2 Kron. 20:1, 2) Mɛni Yehoshafat pee? E bi Yehowa nɛ e ye bua lɛ nɛ e wo lɛ he wami. A ngma sɔlemi nɛ Yehoshafat je he si bami mi kɛ sɔle ɔ ngɛ 2 Kronika 20:5-12 ɔ. Enɛ ɔ ha nɛ wa na bɔ nɛ e he Yehowa, nɛ ji e hiɔwe Tsɛ ɔ ye wawɛɛ ha. Yehowa gu Levi no ko nɛ a tsɛɛ lɛ ke Yahaziel ɔ nɔ kɛ de Yehoshafat munyuhi nɛ ngɛ mwɔnɛ ɔ ngmami ɔ mi ɔ. Hɛ kɛ nɔ fɔmi nɛ mi wa nɛ Yehoshafat ngɛ ngɛ Yehowa mi ɔ ha nɛ e pee kaa bɔ nɛ a de lɛ ɔ pɛpɛɛpɛ. Benɛ e kɛ e ma mi bi ɔmɛ je kpo konɛ a kɛ a he nyɛli ɔmɛ ya kpe ɔ, nihi nɛ e ha nɛ a nyɛɛ ta a hɛ mi ɔ pi ta buli nɛ a he be, mohu ɔ, a ji lali nɛ a hɛɛ we ta hwumi níhi. Yehowa ha we nɛ Yehoshafat nine nɛ nyɛ si; e kpata e he nyɛli ɔmɛ a hɛ mi.​—2 Kron. 20:18-23. w21.11 15-16 ¶6-7

Ke waa kɛ kahi ngɛ kpee ɔ, wa ngɛ nɔ mi mami kaa Yehowa maa ye bua wɔ nɛ waa hɛɛ wa anɔkuale yemi ɔ mi. (2 Kor. 4:7-9) Wa ma nyɛ ma ná nɔ mi mami kaa Yehowa maa ya nɔ ma je suɔmi nɛ se pui kpo kɛ tsɔɔ wɔ, ejakaa la polɔ ɔ de ke: ‘Nihi nɛ yeɔ Yehowa gbeye; nihi nɛ ngɔɔ a hɛ ngɔ fɔɔ e nɔ kaa e je suɔmi nɛ se pui kpo kɛ tsɔɔ mɛ ɔ, Yehowa buu a he.’ (La 33:18-22) Loko wa ma ba sɔmɔ Yehowa a, wa nine su suɔmi nɛ e je kpo kɛ tsɔɔ adesahi tsuo ɔ nɔ. Se akɛnɛ wa ba ngɛ lɛ sɔmɔe amlɔ nɛ ɔ he je ɔ, wa náa e suɔmi nɛ se pui ɔ he se. Yehowa suɔmi nɛ se pui ɔ haa nɛ e ngɔɔ e nine nɛ he wa a kɛ poɔ wa he piɛ. E ma ha nɛ waa hi e kasa nya be fɛɛ be, nɛ yi mi nɛ e to ngɛ wa he ɔ maa ba mi. E suɔ nɛ waa pee e huɛmɛ kɛ ya neneene! (La 46:1, 2, 7) Enɛ ɔ he ɔ, ka fɛɛ ka nɛ waa kɛ maa kpe ɔ, Yehowa ma ha wɔ he wami nɛ wa hia a konɛ waa ya nɔ nɛ waa ye lɛ anɔkuale. w21.11 7 ¶17-18

Wa kpɛti nihi fuu le nihi nɛ a mi mi fu nihi nɛ a kɛ mɛ tsuɔ ní, nihi nɛ a kɛ mɛ yaa sukuu loo a weku li be babauu loo jehahi po! Mo kai kaa Yosef nyɛminyumu ɔmɛ a mi mi fu lɛ, nɛ nyagbenyagbe ɔ, nɔ́ nɛ a pee lɛ ɔ tsɔɔ kaa a nyɛ lɛ wawɛɛ. (1 Mose 37:2-8, 25-28) Se Yosef pee we mɛ nɔ́ ko kɛ to mɛ nane mi! Benɛ e ba ná he blɔ ngua nɛ e ko nyɛ ko pee mɛ nɔ́ ko kɛ to nane mi po ɔ, e na mɛ mɔbɔ. Yosef kɛ sane ɔ wui e mi, mohu ɔ, e pee kaa bɔ nɛ 3 Mose 19:18 ɔ wo wɔ ga kaa waa pee ɔ. (1 Mose 50:19-21) Yosef yi lɛ nitsɛ e he lue, mohu ɔ, e ngɔ e nyɛmimɛ ɔmɛ a tɔmi kɛ ke mɛ. E sa nɛ Kristofohi nɛ a suɔ nɛ a sa Mawu hɛ mi ɔ nɛ a kase lɛ. Yesu tsɔɔ kaa waa ngɔ wa nyɛmimɛ a tɔmi kɛ ke mɛ. (Mat. 6:9, 12) Bɔfo Paulo hu wo e nyɛmimɛ Kristofo ɔmɛ ga nɛ e de ke: “Nihi nɛ i suɔ, nyɛ ko ye nyɛ nitsɛmɛ nyɛ he lue.”​—Rom. 12:19. w21.12 11 ¶13-14

Yesu ya Getsemane abɔɔ ɔ mi gbɔkuɛ ko ngɛ Nisan 14, jeha 33 ɔ mi. E sɔle ngɛ lejɛ ɔ nɛ e de Yehowa nɔ́ fɛɛ nɔ́ nɛ ngɛ e tsui mi. (Luka 22:39-44) Jamɛ a be ɔ mi nɛ Yesu ngɔ ‘ngmlaa kpami nɛ nya wa, kɛ vo nyu, kɛ pɛɛ kpami kɛ sɔle.’ (Heb. 5:7) Nyɔ mi nɛ e nɔ jena nɛ Yesu ma gbo ɔ, mɛni nɛ e sɔle kɛ bi? E sɔle kɛ bi Yehowa nɛ e ha lɛ he wami konɛ e nyɛ nɛ e hɛɛ e we anɔkuale yemi ɔ mi, nɛ́ e pee Yehowa suɔmi nya ní. Yehowa bu sɔlemi nɛ e Bi ɔ je e tsui mi kɛ sɔle ɔ tue, nɛ e tsɔ bɔfo ko nɛ e ya wo lɛ he wami. Yesu le bɔ nɛ e he hia ha kaa e maa hɛɛ e we anɔkuale yemi ɔ mi konɛ a wo e Tsɛ ɔ biɛ ɔ nguɔ. Yehowa bu sɔlemi nɛ Yesu je e tsui mi kɛ sɔle ɔ tue. Mɛni he je? Ejakaa nɔ́ titli he je nɛ Yesu sɔle ji kaa, e maa hɛɛ e we anɔkuale yemi ɔ mi, nɛ́ e wo e Tsɛ ɔ biɛ ɔ nguɔ. Ke nɔ́ titli he je nɛ wa sɔleɔ ji kaa wa maa ye Yehowa anɔkuale ɔ, lɛɛ e ma ha wa sɔlemi ɔ heto nɛ e maa ye bua wɔ.​—La 145:18. w22.01 18 ¶15-17

Nihi fuu kuaa wɔ akɛnɛ waa kɛ wa he wui ma kudɔmi sanehi a mi ɔ he je. A hyɛɛ blɔ kaa waa kɛ wa he maa wo sɔ fɔmi mi. Se ngɛ anɔkuale mi ɔ, ke wa hla adesa ko kaa e ye wa nɔ ɔ, lɔ ɔ tsɔɔ kaa wa kua Yehowa. (1 Sam. 8:4-7) Eko ɔ, nihi fuu susu kaa e sa nɛ waa ma sukuuhi, hiɔ tsami hehi, nɛ́ waa pee ní kpa komɛ kɛ ye bua ma a. Akɛnɛ waa kɛ fiɛɛmi ní tsumi ɔ pee oti ngɛ wa si himi mi se pi ní nɛ ɔmɛ he je ɔ, nihi fuu kua wa sɛ gbi ɔ. Mɛni wa ma nyɛ maa pee konɛ wa nane ko tɔ̃tɔ̃? (Mat. 7:21-23) E sa nɛ ní tsumi nɛ Yesu fã wɔ kaa wa tsu ɔ nɛ pee oti ngɛ wa si himi mi. E sɛ nɛ wa ha nɛ ma kudɔmi sanehi kɛ ní kpahi nɛ je wa juɛmi ngɛ ní tsumi nɛ ɔ nɔ. Wa suɔ nihi, nɛ wa susuɔ a he hulɔ, se blɔ nɛ hi pe kulaa nɛ wa maa gu nɔ kɛ ye bua mɛ ji kaa wa maa tsɔɔ mɛ Mawu Matsɛ Yemi ɔ he ní, nɛ́ waa ye bua mɛ nɛ a ha nɛ huɛ bɔmi kpakpa nɛ hi a kɛ Yehowa a kpɛti. w21.05 7 ¶19-20

Mwɔnɛ ɔ, e ngɛ mi kaa nɔ yeli fuu tsɔɔ kaa a ngɛ Mawu jae mohu lɛɛ, se a sume nɛ a ngmɛɛ he blɔ loo blɔ nya nɛ a ngɛ ɔ he. Kaa bɔ nɛ nɔ yeli nɛ a hi si ngɛ Yesu be ɔ mi ɔ pee ɔ, mwɔnɛ ɔ hu ɔ, nɔ yeli teɔ si kɛ woɔ nɔ nɛ Yehowa pɔ lɛ nu ɔ kɛ gu e we bi anɔkualetsɛmɛ nɛ a tuaa mɛ ɔ nɔ. (Níts. 4:25-28) Kɛ Yehowa peeɔ e ní ha kɛɛ? La 2:10-12 ɔ ha heto ke: ‘Lɔ ɔ he ɔ, nyɛ matsɛmɛ, nyɛɛ kase ní; nyɛ, zugba a nɔ yeli, nyɛɛ bu ga womi tue. Nyɛ sɔmɔ Yehowa kɛ gbeye yemi. Nyɛ he nɛ do blibliibli, nɛ nyɛ kpla si ngɛ e hɛ mi. Ke pi jã a, e mi mi ma fu nyɛ si kake too, nɛ nyɛ hɛ mi ma kpata. Nihi tsuo nɛ ba saa we ngɛ Yehowa ngɔ ɔ ma na bua jɔmi.’ Akɛnɛ Yehowa mi mi jɔ he je ɔ, e ha nihi nɛ a teɔ si kɛ woɔ lɛ ɔ be nɛ a kɛ mwɔ yi mi kpɔ nɛ da. Loloolo ɔ, a ma nyɛ maa pee tsakemi nɛ a kplɛɛ Yehowa Nɔ Yemi ɔ nɔ. Se be nɛ piɛ nɛ a kɛ maa pee jã a pi hu. (Yes. 61:2) Amlɔ nɛ ɔ ji be nɛ e sa kaa nihi kɛ oya yemi nɛ kase anɔkuale ɔ nɛ a mwɔ a yi mi kpɔ kaa a ma sɔmɔ Yehowa. w21.09 15-16 ¶8-9

Paulo ngɛ tsɔɔe kaa wa bua nɛ jɔ níhi nɛ wa ngɛ ɔ a he. (Filip. 4:12) Nɔ́ nɛ he hia wɔ wawɛɛ ji huɛ bɔmi nɛ ngɛ waa kɛ Mawu ɔ wa kpɛti, se pi he lo nya níhi nɛ wa ngɛ ɔ. (Hab. 3:17, 18) Mo susu nɔ́ nɛ Mose de Israel bi ɔmɛ benɛ a nyɛɛ nga kplanaa a nɔ jeha 40 ɔ se ɔ he nɛ o hyɛ. E de mɛ ke: ‘Yehowa, nyɛ Mawu ɔ jɔɔ nyɛ ngɛ nɔ́ tsuaa nɔ́ mi . . . Jeha nyingmi eywiɛ sɔuu ji nɛ ɔ nɛ Yehowa, nyɛ Mawu ɔ hyɛ nyɛ nɔ, nɛ nɔ́ ko nɔ́ ko hia we nyɛ.’ (5 Mose 2:7) Ngɛ jeha 40 ɔ tsuo mi ɔ, Yehowa ha Israel bi ɔmɛ mana kaa niye ní. Tadehi nɛ a wo benɛ a je Egipt ɔ nɔuu nɛ ngɛ a he se e gba we. (5 Mose 8:3, 4) Yehowa bua maa jɔ ke wa bua jɔ níhi nɛ wa ngɛ ɔ a he. E suɔ nɛ wa hɛ nɛ sa ní nyafinyafi nɛ e peeɔ kɛ haa wɔ ɔ, nɛ waa le kaa a ji nike ní nɛ je e ngɔ. w22.01 5 ¶10-11

Hunomɛ, nyɛ blɔ nya ní tsumi ji kaa nyɛ maa hyɛ nyɛ weku ɔ nɔ, enɛ ɔ he ɔ, nyɛ bɔɔ mɔde wawɛɛ kɛ poɔ nyɛ weku ɔ he piɛ nɛ nyɛ yeɔ bua mɛ. Ke nyɛɛ kɛ nyagba ko kpe ɔ, eko ɔ, nyɛ ma susu kaa nyɛ nitsɛmɛ nyɛ ngɛ he wami nɛ nyɛɛ kɛ maa da nya. Se koo ngɔ o hɛ kɛ fɔ mo nitsɛ o nɔ, mohu ɔ, moo sɔle ha Yehowa ngɛ o dɛ he. Jehanɛ hu ɔ, o kɛ o yo ɔ nɛ bla kɛ sɔle. Hla blɔ tsɔɔmi kɛ je Yehowa ngɔ kɛ gu Baiblo ɔ kɛ asafo womihi nɛ o maa kase ɔ nɔ, nɛ́ o kɛ blɔ tsɔɔmi ɔmɛ nɛ tsu ní. Ke o da Baiblo ɔ nɔ kɛ mwɔ o yi mi kpɔ ɔ, eko ɔ, ni komɛ kɛ mo be gbi kpae. Eko ɔ, a ma de mo kaa sika kɛ níhi nɛ sika ma nyɛ ma he ɔ lɛ maa po o weku ɔ he piɛ. Se mo kai Matsɛ Yehoshafat nɔ hyɛmi nɔ́ ɔ. (2 Kron. 20:1-30) E ngɔ e hɛ kɛ fɔ Yehowa nɔ, nɛ e kɛ e ní peepee tsɔɔ jã. Yehowa kua we nyumu anɔkualetsɛ nɛ ɔ, nɛ e be mo hu kuae.​—La 37:28; Heb. 13:5. w21.11 15 ¶6; 16 ¶8

Mawu bɔ wɔ nɛ wa nyɛ nɛ wa je e su ɔmɛ kpo, enɛ ɔ he ɔ, wa suɔ nɛ a ye dami sane ha nɔ fɛɛ nɔ. (1 Mose 1:26) Se akɛnɛ wa yi mluku he je ɔ, ke wa susu kaa wa le anɔkuale ɔ tsuo ngɛ sane ko mi po ɔ, wa ma nyɛ maa kojo nihi ngɛ blɔ nɛ dɛ nɔ. Mo kai Yona nɔ hyɛmi nɔ́ ɔ. E bua jɔɛ bɔ nɛ Yehowa na Nineve bi ɔmɛ mɔbɔ ha a he. (Yona 3:10–4:1) Se mɛni je nɔ́ nɛ Yehowa pee ɔ mi kɛ ba? A he Nineve bi nɛ a hiɛ pe 120,000 nɛ a tsake a tsui ɔ a yi wami! Nyagbe ɔ, wa na kaa Yona lɛ kojo nihi ngɛ blɔ nɛ dɛ nɔ, se pi Yehowa. E he hia we nɛ Yehowa nɛ tsɔɔ adesahi nɔ́ he je nɛ e mwɔɔ yi mi kpɔ komɛ. E ji anɔkuale kaa blema a, Yehowa ngmɛ blɔ nɛ e sɔmɔli komɛ tsɔɔ a juɛmi ngɛ yi mi kpɔ ko nɛ e mwɔ loo e ma mwɔmi ɔ he. (1 Mose 18:25; Yona 4:2, 3) Ngɛ be kakaaka komɛ a mi ɔ, e tsɔɔ nɔ́ he je nɛ e mwɔ yi mi kpɔ ko. (Yona 4:10, 11) Se lɔ ɔ tsɔɔ we kaa e sa nɛ Yehowa nɛ e bi wɔ blɔ loko e mwɔ yi mi kpɔ ko loo ke e mwɔ yi mi kpɔ ɔ ta a, e tsɔɔ wɔ níhi a nya.​—Yes. 40:13, 14; 55:9. w22.02 3-4 ¶5-6

Ke wa “bu ni kpahi kaa a nɔ kuɔ pe” wɔ ɔ, wa maa na wa he kaa “nɔ nyafii pe kulaa.” (Filip. 2:3) Ke wa buu ni kpahi kaa a nɔ kuɔ pe wɔ ɔ, e he maa wa kaa wa maa tɔ̃tɔ̃ ni kpahi a nane. Wa nyɛmimɛ ɔmɛ tsuo a nɔ kuɔ pe wɔ ngɛ blɔ komɛ a nɔ. Ke wa ngɔ wa juɛmi kɛ ma a mɔde bɔmihi a nɔ ɔ, e be yee ha wɔ kaa wa maa na. E sa nɛ wa hɛ nɛ hi ga womi nɛ bɔfo Paulo kɛ ha Korinto bi ɔmɛ ɔ nɔ. E de mɛ ke: “Mɛnɔ pee mo slɔɔto ngɛ ni kpahi a he? Ngɛ anɔkuale mi ɔ, mɛni o ngɛ nɛ pi nɛ o nine su nɔ? Ke niinɛ nɛ o nine su nɔ ɔ, lɛɛ mɛni he je nɛ o fĩaa kaa nɔ́ nɛ pi nɛ o nine su nɔ ɔ?” (1 Kor. 4:7) E sa nɛ waa hyɛ nɛ hi ngɛ níhi nɛ maa gbla nihi a juɛmi kɛ ba wa nɔ, loo e ma ha nɛ wa susu kaa wa nɔ kuɔ pe ni kpahi ɔ a he. Ke nyɛminyumu ko le magbɛ nɔ munyu tumi saminya, loo nyɛmiyo ko le bɔ nɛ a jeɔ Baiblo mi kasemi sisi ha saminya a, e sa nɛ e ngɔ yi je mi ɔ kɛ ha Yehowa. w21.06 22 ¶9-10

E he wa ha Odasefohi fuu kaa a maa na nihi ngɛ a wehi a mi. Fiɛɛli komɛ fiɛɛɔ ngɛ hehi nɛ a fia gbogbo kɛ wo wehi a he loo hehi nɛ buli ngɛ we ɔmɛ a nya. Behi fuu ɔ, buli nɛ a ngɛ we ɔmɛ a nya a kplɛɛ we nɛ nihi sɛɛ we ɔ mi ke a ha we mɛ he blɔ kaa a ba we ɔ mi. Fiɛɛli komɛ hu ya náa nihi bɔɔ pɛ ngɛ we mi, loo a ya fiɛɛɔ ngɛ hehi nɛ nihi a he pi ngɛ kpakpa ko. Eko ɔ, fiɛɛli nɛ ɔmɛ nyɛɛɔ be gagaa loko a naa we kake, nɛ be komɛ po ɔ, a nɛ nɔ ko ngɛ we ɔ mi. Ke waa kɛ nyagba nɛ ɔmɛ eko ngɛ kpee ɔ, e sɛ nɛ wa kɔni mi nɛ jɔ̃! Moo ya nihi a ngɔ ngɛ be kpa mi. Ke wa ya nihi a ngɔ ngɛ be nɛ wa susu kaa wa nine maa su a nɔ ɔ mi ɔ, eko ɔ, wa maa na mɛ ngɛ we mi. Ke wa ma de ɔ, be pɔtɛɛ ko ngɛ nɛ nɔ fɛɛ nɔ kɛ yaa we mi! Nyɛmimɛ fuu yaa fiɛɛmi piani loo gbɔkuɛ, ejakaa a nine suɔ nihi fuu a nɔ jamɛ a be ɔ. Jehanɛ hu ɔ, jamɛ a be ɔ ji be nɛ nihi fuu kɛ jɔɔ a he nɛ a buɔ munyu ɔ tue. w21.05 15 ¶5, 7

Anɛ wa naa nyagba nɛ ɔ mwɔnɛ ɔ lo? Ee. Nihi fuu a mi mi fuɔ Yehowa Odasefohi akɛnɛ a piɛɛ we a he kɛ ye gbijlɔhi nɛ dɛ Baiblo ɔ nɔ ɔ he je. Gbijlɔ nɛ ɔmɛ ekomɛ ji fɔmi ligbi yemi, kɛ Bloonya yemi. Ni komɛ hu a mi mi fuɔ Yehowa Odasefohi akɛnɛ a kɛ a he wui ma gbijlɔ yemihi aloo ya peemi he kusumi komɛ nɛ kɛ Mawu Munyu ɔ kpa we gbi ɔ a mi ɔ he je. Eko ɔ, nihi nɛ a nane tɔ̃tɔ̃ nɛ ɔ he ye kaa Mawu kplɛɛ a jami ɔ nɔ. Se a be nyɛe maa sa Mawu hɛ mi ke a kplɛɛ je ɔ kusumihi nɛ kɛ Baiblo ɔ kpa we gbi ɔ a nɔ. (Maak. 7:8, 9) Mɛni wa ma nyɛ maa pee konɛ wa nane nɛ ko tɔ̃tɔ̃? E sa nɛ wa ná suɔmi nɛ mi wa kɛ ha Yehowa mlaa amɛ kɛ e sisi tomi mlaa amɛ. (La 119:97, 113, 163-165) Ke wa suɔ Yehowa a, wa ma kua kusumihi tsuo nɛ sɛ e hɛ mi ɔ. Wa be hae nɛ nɔ́ ko nɛ puɛ suɔmi nɛ wa ngɛ kɛ ha lɛ ɔ. w21.05 6 ¶15-16

Mɛni blɔ nɔ wa ma nyɛ maa gu konɛ waa kɛ bɔfo Paulo ga womi nɛ ɔ nɛ tsu ní? E sa nɛ waa ya nɔ nɛ waa kase Baiblo ɔ be fɛɛ be, waa sɔle be fɛɛ be, nɛ waa ya nɔ nɛ wa tsu ní tsumi nɛ Yehowa kɛ wo wa dɛ ɔ. Ke wa pee jã a, lɔ ɔ ma ha nɛ wa hemi kɛ yemi ɔ mi maa wa. (2 Tim. 4:4) Ke wa hemi kɛ yemi ɔ mi wa a, wa be haoe ke wa nu wa he sane yaya ko. (Yes. 28:16) Suɔmi nɛ wa ngɛ kɛ ha Yehowa, e Munyu ɔ, kɛ wa nyɛmimɛ ɔmɛ ɔ maa ye bua wɔ konɛ nihi nɛ a je anɔkuale ɔ mi ɔ a ní peepee ko tɔ̃tɔ̃ wa nane. Benɛ Yesu ngɛ zugba a nɔ ɔ, nihi fuu a nane tɔ̃tɔ̃ nɛ a kua lɛ. Se ni komɛ hu he Yesu ye. Nihi nɛ a he lɛ ye ɔ a kpɛti ni komɛ ji Sanhedri ɔ mi nɔ ko kɛ “osɔfohi babauu.” (Níts. 6:7; Mat. 27:57-60; Maak. 15:43) Mwɔnɛ ɔ hu ɔ, nihi ayɔhi abɔ ha we nɛ a nane nɛ tɔ̃tɔ̃. Mɛni he je? Ejakaa a le anɔkualehi nɛ ngɛ Ngmami ɔ mi ɔ, nɛ a kplɛɛ nɔ. Mawu Munyu ɔ de ke: “Nihi nɛ suɔ o mlaa amɛ ɔ, a naa he jɔmi nitsɛnitsɛ, nɛ nɔ́ ko nɔ́ ko be hae nɛ a maa tla blɔ.”​—La 119:165. w21.05 13 ¶20-21

Bɔfo Paulo yɔse kaa Yehowa nɛ wo lɛ he wami nɛ e nyɛ tsu e sɔmɔmi ní tsumi ɔ, se pi lɛ nitsɛ e he wami. Yehowa gu e mumi klɔuklɔu ɔ nɔ kɛ wo Paulo he wami nɛ e nyɛ tsu e sɔmɔmi ní tsumi ɔ kɛ pi si ngɛ yi mi wami nɛ e kɛ kpe, tsu nɛ a wo lɛ, kɛ nyagba kpahi nɛ e kɛ kpe ɔ tsuo se. Niheyo Timoteo nɛ e ji Paulo huɛ ɔ hu ngɔ e hɛ kɛ fɔ Mawu he wami ɔ nɔ konɛ e nyɛ nɛ tsu e sɔmɔmi ní tsumi ɔ. Timoteo piɛɛ Paulo he kɛ tsu ma se sane kpakpa fiɛɛmi ní tsumi ɔ. Jehanɛ hu ɔ, Paulo tsɔ lɛ nɛ e ya slaa asafo komɛ nɛ e wo mɛ he wami. (1 Kor. 4:17) Eko ɔ, Timoteo susu kaa e he sui kɛ ha ní tsumi nɛ ɔ. E ma nyɛ maa ba kaa lɔ ɔ he je nɛ Paulo wo lɛ he wami ke: “Ko ha nɛ nɔ ko nɛ e gbe niheyo nɛ o ji ɔ he guɛ kɔkɔɔkɔ” ɔ nɛ. (1 Tim. 4:12) Jehanɛ hu ɔ, ngɛ be nɛ ɔmɛ tsuo a mi ɔ, Timoteo nitsɛ hu ngɛ he lo mi mio ko, lɔ ɔ ji hiɔ nɛ ‘pɔɔ lɛ numi kpitikpiti’ ɔ nɛ. (1 Tim. 5:23) Se Timoteo le kaa Yehowa ma nyɛ maa gu e mumi klɔuklɔu ɔ nɔ kɛ ha lɛ he wami nɛ e hia a konɛ e ya nɔ nɛ e fiɛɛ sane kpakpa a nɛ e sɔmɔ e nyɛmimɛ.​—2 Tim. 1:7. w21.05 21 ¶6-7

Sisi tomi mlaa nɛ ngɛ Yakobo 1:19 ɔ kɔɔ nihi nɛ a woɔ ni kpahi ga a he. Yakobo ngma ke: “Nɔ fɛɛ nɔ he nɛ e sɔ kɛ bu munyu tue, e he nɛ e ko sɔ kɛ tu munyu, e mi mi nɛ ko fu mla.” Eko ɔ, asafo mi nɔkɔtɔma ko ma susu kaa e le si fɔfɔɛ nɛ nɔ ɔ ngɛ mi ɔ he nɔ́ fɛɛ nɔ́, se anɛ e le si fɔfɔɛ ɔ he nɔ́ fɛɛ nɔ́ niinɛ lo? Abɛ 18:13 ɔ de ke: “Ke a ngɛ mo munyu tue ɔ, bu tue loko o ha heto. Ke o pee we jã a, a ma tsɛ mo kuasia, nɛ o hɛ mi ma pue si.” E hi kaa o ma bi nɔ ɔ nɛ lɛ nitsɛ e de mo e si fɔfɔɛ ɔ he sane. Enɛ ɔ biɔ nɛ o bu tue saminya loko o tu munyu. Asafo mi nɔkɔtɔma a ma nyɛ ma bi sane ko kaa: “Mɛni nɛ ngɛ nɔ yae ngɛ o si himi mi? Mɛni ma nyɛ ma pee kɛ ye bua mo?” Ke asafo mi nikɔtɔmahi he be kɛ le si fɔfɔɛ nɛ nyɛmimɛ ɔmɛ ngɛ mi ɔ, a ma nyɛ maa ye bua nyɛmimɛ nyumuhi kɛ yihi nɛ a wo mɛ ga. Ga womi nɛ nu tso biɔ babauu pe ngmami bɔɔ ko nɛ o maa kane loo ga womi kake loo enyɔ ko nɛ o kɛ ma ha. E sa nɛ wa nyɛmimɛ nyumuhi kɛ yihi nɛ a nu he kaa wa susuɔ a he, wa nuɔ mɛ sisi, nɛ wa suɔ nɛ waa ye bua mɛ. w22.02 17 ¶14-15