June

Si himi ɔ mi wa ha yalɔyo ɔ, nɛ eko ɔ, e gboɔ dengme loko e nine suɔ e hiami níhi a nɔ. Se kɛ̃ ɔ, e ya sika tsumi daka a eko he nɛ e ngɔ sika nyafii enyɔ kɛ ya wo mi. Eko ɔ, benɛ e ngɔ sika a kɛ wo mi po ɔ, e pɛ́ nɛ nɔ ko maa nu. Yesu le sika nɛ yo ɔ kɛ wo mi​—lepta enyɔ. Enɛ ɔ ji sika nɛ a yeɔ ngɛ jamɛ a be ɔ mi ɔ mi nyafii pe kulaa. Sika nɛ ɔ be nyɛe ma he otoklii kake po, nɛ ji lohwe pɛlitsɛmɛ nɛ a he jua wɛ kulaa ngɛ jamɛ a be ɔ mi ɔ a kpɛti kake. Yesu bua jɔ yalɔyo nɛ ɔ he wawɛɛ. Enɛ ɔ he ɔ, e tsɛ e kaseli ɔmɛ nɛ e gbla a juɛmi kɛ ya yalɔyo ɔ nɔ nɛ e de ke: “Yalɔyo ohiatsɛ nɛ ɔ ngɔ babauu kɛ wo mi pe ni kpa amɛ tsuo.” E ya nɔ nɛ e tsɔɔ nya ke: “Mɛ tsuo [titli sikatsɛmɛ ɔmɛ] ɔ, nɔ́ nɛ a ná nɛ be nɔ ɔ nɛ a kɛ ba wo mi, se yalɔyo ɔ lɛɛ, e we ohia a mi nɛ e je nɛ e ngɔ nɔ́ nɛ e ngɛ ɔ tsuo, nɛ ji nɔ́ nɛ e kɛ maa hyɛ e he ɔ tsuo kɛ ba wo mi.” (Maak. 12:43, 44) Jamɛ a ligbi ɔ, yalɔyo anɔkualetsɛ nɛ ɔ ngɔ sika tsuo nɛ e ngɛ ɔ kɛ ya wo daka a mi. Nɔ́ nɛ e pee ɔ tsɔɔ kaa e ngɔ e hɛ kɛ fɔ Yehowa nɔ kaa e maa hyɛ e nɔ.​—La 26:3. w21.04 6 ¶17-18

Benɛ Yesu ngɛ zugba a nɔ ɔ, e ya nɔ nɛ e fiɛɛ, nɛ e ná hɛ kɛ nɔ fɔmi kaa nihi maa bu lɛ tue. E suɔ nɛ e kaseli ɔmɛ hu nɛ a pee jã. (Yoh. 4:35, 36) Benɛ Yesu kɛ e kaseli ɔmɛ ngɛ ɔ, a kɛ kã fiɛɛ wawɛɛ. (Luka 10:1, 5-11, 17) Se benɛ a nu Yesu nɛ a gbe lɛ ɔ, e kaseli ɔmɛ ngmɛɛ fiɛɛmi ní tsumi ɔ he kɛ fɔ si bɔɔ. (Yoh. 16:32) Benɛ a tle Yesu si ɔ, e wo mɛ he wami kaa a ngɔ fiɛɛmi ní tsumi ɔ kɛ pee oti ngɛ a si himi mi. Nɛ benɛ e ho hiɔwe ya a, e kaseli ɔmɛ kɛ kã fiɛɛ wawɛɛ nɛ a he nyɛli ɔmɛ tu munyu nɛ je kpo ngɛ wa mwɔnɛ ɔ ngmami ɔ mi ɔ. Yesu nyɛɛ fiɛɛmi ní tsumi ɔ nɛ Kristofohi nɛ a hi si ngɛ kaseli ɔmɛ a be ɔ mi ɔ tsu ɔ hɛ mi, nɛ Yehowa hu jɔɔ a mɔde bɔmi ɔ nɔ. Kaa nɔ hyɛmi nɔ́ ɔ, ngɛ Pentekoste ligbi ɔ nɔ ngɛ jeha 33 ɔ mi ɔ, a baptisi nihi maa pee 3,000. (Níts. 2:41) Nɛ kɛ je jamɛ a ligbi ɔ kɛ ma a, kaseli ɔmɛ a yibɔ ngɛ hɛ mi yae wawɛɛ. (Níts. 6:7) Yesu hu gba kɛ fɔ si kaa ngɛ nyagbe ligbi ɔmɛ a mi ɔ, nihi babauu maa kplɛɛ sane kpakpa a nɔ.​—Yoh. 14:12; Níts. 1:8. w21.05 14 ¶1-2

Anɛ o kai kekleekle be nɛ o yɔse kaa o na anɔkuale ɔ lo? O susu kaa nɔ fɛɛ nɔ bua maa jɔ Baiblo tsɔɔmihi nɛ o kase nɛ o he ye ɔ a he. O ngɛ nɔ mi mami kaa sɛ gbi nɛ ngɛ Baiblo ɔ mi ɔ ma nyɛ ma ha nɛ a ná si himi kpakpa amlɔ nɛ ɔ, nɛ a ná hwɔɔ se he hɛ nɔ kami kpakpa. (La 119:105) Enɛ ɔ he ɔ, o kɛ bua jɔmi fiɛɛ anɔkuale ɔ nɛ o kase ɔ kɛ ha o huɛmɛ kɛ o weku li. Se mɛni ba? Ngɛ anɔkuale mi ɔ, e pee mo nyakpɛ kaa a kua níhi nɛ o de mɛ ɔ. E sɛ nɛ e pee wɔ nyakpɛ ke nihi kua sɛ gbi nɛ wa fiɛɛɔ kɛ haa mɛ ɔ. Benɛ Yesu ngɛ zugba a nɔ ɔ, nihi fuu kua lɛ, e ngɛ mi kaa e pee nyakpɛ níhi nɛ tsɔɔ kaa Mawu fĩ e se. Kaa nɔ hyɛmi nɔ́ ɔ, e tle Lazaro si, nɛ enɛ ɔ ji nyakpɛ nɔ́ ko nɛ nihi nɛ a teɔ si kɛ woɔ lɛ ɔ be nyɛe maa je he atsinyɛ. Se kɛ̃ ɔ, Yuda jami hɛ mi nyɛɛli ɔmɛ kplɛɛ we nɔ kaa Yesu ji Mesia a. A suɔ nɛ a gbe Yesu kɛ Lazaro po!​—Yoh. 11:47, 48, 53; 12:9-11. w21.05 2 ¶1-2

Bɔɔ mɔde nɛ o ya asafo mi kpehi be fɛɛ be. Ke o ya asafo mi kpe ɔ, ní peemi nɛ yaa nɔ ngɛ lejɛ ɔ maa wo mo he wami, nɛ o maa le o nyɛmimɛ Kristofohi hulɔ. O kɛ nihi nɛ a ngɛ asafo ɔ mi nɛ o ma nyɛ maa kase ní kɛ je a ngɔ ɔ nɛ bɔ, a wa jio, a wɛ jio, loo a je ma kpa nɔ jio. Baiblo ɔ kaiɔ wɔ kaa “nimeli ngɛ nile.” (Hiob 12:12) Nihi nɛ a wa ngɛ jeha mi hu ma nyɛ maa kase ní kɛ je nihewi kɛ yihewi anɔkualetsɛmɛ a ngɔ. Yonatan wa kulaa pe David, se lɔ ɔ tsi we huɛ bɔmi nɛ ya nɔ ngɛ a kpɛti ɔ nya. (1 Sam. 18:1) David kɛ Yonatan ye bua a sibi nɛ a nyɛ nɛ a sɔmɔ Yehowa ngɛ si fɔfɔɛhi nɛ a mi wa po mi. (1 Sam. 23:16-18) Nyɛmiyo ko nɛ a tsɛɛ lɛ ke Irina nɛ lɛ pɛ ji Odasefo no ngɛ e weku ɔ mi ɔ de ke: “Nihi nɛ a ngɛ asafo ɔ mi ɔ ma nyɛ ma ba pee wa fɔli loo wa nyɛmimɛ. Yehowa ma nyɛ maa gu a nɔ kɛ tsu wa hiami níhi a he ní.” O huɛmɛ suɔ nɛ a wo mo he wami nɛ a ye bua mo, se kɛ̃ ɔ, e he maa hia nɛ o de mɛ nɔ́ nɛ a ma nyɛ maa pee kɛ ye bua. w21.06 10-11 ¶9-11

Yesu ngɔ nɔ́ he tomi nɔ́ nɛ kɔɔ matsɛ ko kɛ e nyɔguɛ he ɔ kɛ tsu ní. Matsɛ ɔ kɛ hiɔ ngua nɛ nyɔguɛ ɔ be nyɛe maa wo ɔ ke lɛ. Pee se ɔ, jamɛ a nyɔguɛ ɔ ngɔɛ hiɔ bɔɔ ko nɛ e nyɛmi nyɔguɛ ko ye lɛ ɔ kɛ ke lɛ. Nyagbenyagbe ɔ, matsɛ ɔ wo nyɔguɛ ɔ nɛ e nɛ nɔ mɔbɔ ɔ tsu. Nyɔguɛ ɔ ní peepee ɔ yi lɛ pɛ awi, e ye ni kpahi awi hulɔ. Kekleekle ɔ, e yi mi wami ɔ ye e nyɛmi nyɔguɛ ɔ awi, “e ha nɛ a wo lɛ tsu kɛ yaa si be nɛ e maa wo hiɔ nɛ e hɛɛ lɛ ɔ.” Enyɔne ɔ, nɔ́ nɛ e pee ɔ gba nyɔguɛ kpa amɛ a nya wawɛɛ, ejakaa benɛ “e nyɛmimɛ nyɔguɛ ɔmɛ na nɔ́ nɛ ya nɔ ɔ, a hao wawɛɛ.” (Mat. 18:30, 31) Jã kɛ̃ nɛ wa ní peepee hu saa ni kpahi a he wawɛɛ. Ke nɔ ko tɔ̃ wa nɔ nɛ waa kɛ ki lɛ ɔ, mɛni ma nyɛ maa ba? Kekleekle ɔ, wa yeɔ lɛ awi ejakaa waa kɛ e tɔmi ɔ ki lɛ, jehanɛ hu ɔ, wa kuaa lɛ, nɛ wa je we suɔmi kpo kɛ tsɔɔ lɛ. Enyɔne ɔ, wa haa nɛ nyɛmimɛ nɛ a ngɛ asafo ɔ mi ɔ peeɔ basaa ke a na kaa tue mi jɔmi be waa kɛ wa nyɛmi ɔ wa kpɛti. w21.06 22 ¶11-12

Mawu bɔ adesahi ngɛ e subai nɔ, se Satan suɔ nɛ e ha nɛ a pee yi wu tso ní. Ngɛ Noa be ɔ mi ɔ, benɛ Mawu na kaa “nimli a yi mi wa” a, “e dɔ lɛ nɛ e pia e he kaa e bɔ nɔmlɔ nɛ e kɛ lɛ wo je ɔ mi.” (1 Mose 6:5, 6, 11) Kɛ je jamɛ a be ɔ mi kɛ ma a nɛ ɔ, anɛ níhi tsake lo? Dɛbi kulaa! Ke nihi kɛ a he wo ajuama bɔmi ní peepee slɔɔto ɔmɛ a mi ɔ, Satan bua jɔɔ wawɛɛ. Ní peepee nɛ ɔmɛ ekomɛ ji, nyumu kɛ yo nɛ a sɛ we gba si himi mi nɛ a náa bɔmi, kɛ nyumu kɛ nyumu loo yo kɛ yo a bɔmi nami! (Efe. 4:18, 19) Satan bua jɔɔ wawɛɛ ke e na nɛ nihi nɛ a sɔmɔɔ Yehowa a kɛ a he wo ní peepee nɛ ɔmɛ a mi. Ngɛ Satan nɔ yemi sisi ɔ, pi he blɔhi nɛ adesahi ngɛ ɔ pɛ nɛ a kɛ “yeɔ a nyɛmimɛ awi” . A nyɛ we nɛ a hyɛ zugba a kɛ lohwehi nɛ Yehowa tu kɛ wo a dɛ ɔ a nɔ saminya hulɔ. (Fiɛlɔ 8:9; 1 Mose 1:28) Mɛni nɛ je mi kɛ ba? Je mi si kpali komɛ tsɔɔ kaa níhi nɛ adesahi peeɔ ɔ ma nyɛ ma ha nɛ lohwehi kɛ tso slɔɔtohi ayɔ kake ma gbo ngɛ jeha bɔɔ ko mi. w21.07 12 ¶13-14

Mawu sɔmɔli komɛ a he nile yaa nɔ nɛ e buɔ mɛ fɔ ngɛ yayami komɛ nɛ a pee kɛ be ɔ a he. Loloolo ɔ, a susuɔ kaa Yehowa kɛ yayamihi nɛ a pee be ko nɛ be nɛ a pia a he nɛ a pee tsakemi ngɛ he ɔ be mɛ kee. Ke o nuɔ he jã a, lɛɛ lemi nɛ o maa le kaa Mawu suɔ nɛ e je suɔmi nɛ se pui kpo kɛ tsɔɔ mo ɔ maa ye bua mo nɛ o kɛ he nile kpakpa ma nyɛ ma sɔmɔ Yehowa kɛ bua jɔmi. Ejakaa “e Bi Yesu muɔ ɔ tsuɔ wa he kɛ jeɔ yayamihi tsuo a he.” (1 Yoh. 1:7) Ke tɔmi ko nɛ o tɔ̃ be ko nɛ be ɔ jɔ̃ɔ o kɔni mi ɔ, mo kai kaa Yehowa pee klaalo kaa e kɛ nihi nɛ a tsake a tsui ɔ a tɔmi maa ke mɛ. Mo kadi tsakpa nɛ ngɛ suɔmi nɛ se pui nɛ Yehowa jeɔ kpo kɛ tɔmi nɛ e kɛ keɔ nɛ David nɛ ji la polɔ ɔ tu he munyu ɔ a kpɛti. E de ke: “Bɔ nɛ blɔ nɛ ngɛ hiɔwe kɛ zugba a kpɛti ɔ hí kalemi ɔ, jã kɛ̃ nɛ suɔmi nɛ se pui nɛ e ngɛ kɛ ha nihi nɛ a yeɔ lɛ gbeye ɔ hu hí kalemi. Kaa bɔ nɛ puje he kɛ pusinɔ he a kpɛti kɛ ɔ, jã kɛ̃ nɛ e ha nɛ waa kɛ wa tɔmi ɔmɛ a kpɛti kɛ.”​—La 103:11, 12, NW. w21.11 5-6 ¶12-13

E sa nɛ huno nɛ e ji Kristofo no ɔ nɛ bu e yo. (1 Pet. 3:7) Kaa nɔ hyɛmi nɔ́ ɔ, e sa nɛ hunomɛ nɛ a na a yihi kaa nihi nɛ a he hia. E sɛ nɛ a hyɛ blɔ kaa a maa pee ní komɛ nɛ a be nyɛe. E sɛ nɛ a kɛ mɛ nɛ to yi kpahi hu a he. Kɛ yo ko maa nu he ha kɛɛ ke e huno kɛ lɛ toɔ yi kpahi a he? Nyɛmiyo ko nɛ a tsɛɛ lɛ ke Rosa nɛ e huno ɔ pi Odasefo no ɔ tsɔɔ kaa e huno ɔ kɛ lɛ toɔ ni kpahi a he. Munyu yayahi nɛ e tu ngɛ e he ɔ ha nɛ Rosa bua jɔɛ, nɛ e nu he kaa nihi sume lɛ. E de ke, “Be fɛɛ be ɔ, e sa nɛ ma kai ye he kaa Yehowa suɔ mi.” Enɛ ɔ tsɔɔ kaa e sa nɛ hunomɛ nɛ a ji Kristofohi ɔ nɛ a ná bu nɛ mi kuɔ kɛ ha a yihi. Jã peemi ma ha nɛ huɛ bɔmi nɛ ngɛ huno ko kɛ e yo a kpɛti, kɛ huɛ bɔmi nɛ ngɛ e kɛ Yehowa a kpɛti ɔ mi maa wa. Huno nɛ e buɔ e yo ɔ jeɔ e yo ɔ yi, e deɔ e yo ɔ kaa e suɔ lɛ, nɛ e he jua wa kɛ ha lɛ. w21.07 22 ¶7-8

Ke a mane mo nɔ́ ko nɛ he hia saminya, se e ba sui ngɛ be nya a, anɛ o kɔni mi jɔ̃ɔ lo? Se ke o ba le kaa yi mi tomi kpakpa ko he je nɛ nɔ́ ɔ ba sui mla a, anɛ o maa to o tsui si, nɛ o maa suɔ nɛ o mlɛ lo? Abɛ 13:11 ɔ tsɔɔ yi mi tomi he je nɛ e sa nɛ waa to wa tsui si. Lejɛ ɔ de ke: “Ní nɛ a náa esɔesɔ ɔ, e taa mla. Nɔ nɛ buaa nɔ́ nya bɔɔbɔɔbɔɔ ɔ, e náa babauu.” Anɛ o na sisi tomi mlaa a lo? Nile ngɛ mi kaa wa maa to wa tsui si kɛ pee níhi bɔɔbɔɔbɔɔ. Abɛ 4:18 ɔ tsɔɔ kaa “blɔ nɛ dali nyɛɛɔ nɔ ɔ ngɛ kaa mɔtu pu la nɛ ngɛ kpɛe hluu kɛ yaa si piani.” Kuku nɛ ɔ tsɔɔ heii kaa Yehowa yeɔ bua e we bi nɛ a nuɔ e yi mi tomihi a sisi bɔɔbɔɔbɔɔ. Kuku nɛ ɔ hu yeɔ bua wɔ nɛ wa naa bɔ nɛ Kristofo no ko peeɔ tsakemi ngɛ e si himi mi nɛ e hɛɛ kɛ suɔ Yehowa he ha. Wa be nyɛe maa ya wa hɛ mi ngɛ mumi mi si kake. E heɔ be. w21.08 8 ¶1, 3-4

Akɛnɛ nyagbe ɔ su si ta he je ɔ, ní tsumi fuu ngɛ nɛ wa ma tsu. (Mat. 24:14; Luka 10:2; 1 Pet. 5:2) Wɔ tsuo wa suɔ nɛ waa kɛ wa nyɛmi tsuo nɛ sɔmɔ Yehowa. Nyɛmimɛ fuu ngɛ a sɔmɔmi ní tsumi ɔ mi blie. Ni komɛ suɔ nɛ a sɔmɔ kaa daa blɔ gbali. Ni komɛ hu suɔ nɛ a sɔmɔ ngɛ Betel loo a kɛ a he nɛ wo teokrase tsu mami ní tsumi ɔ mi. Nyɛmimɛ nyumuhi fuu ngɛ a he mɔde bɔe konɛ a nyɛ nɛ a sɔmɔ kaa asafo mi sɔmɔli loo asafo mi nikɔtɔmahi. (1 Tim. 3:1, 8) Ke Yehowa na kaa e sɔmɔli ngɛ mɔde bɔe kaa a maa je a tsui mi kɛ sɔmɔ lɛ ɔ, e bua jɔɔ wawɛɛ! (La 110:3) Se anɛ o kɔni mi jɔ̃ akɛnɛ o nine sui mumi mi oti ko nɛ o kɛ ma o hɛ mi ɔ nɔ ɔ he je lo? Ke jã a, lɛɛ moo sɔle kɛ ha Yehowa nɛ o de lɛ bɔ nɛ o ngɛ he nue ha. (La 37:5-7) Jehanɛ hu ɔ, mo bi nyɛmimɛ nyumuhi nɛ a nane pi si ɔ nɛ a tsɔɔ mo níhi nɛ o ma nyɛ maa pee konɛ o ya o hɛ mi ngɛ Mawu jami mi. Ke a tsɔɔ mo ɔ, bɔɔ mɔde nɛ o kɛ a ga womi ɔ nɛ tsu ní. Ke o pee jã a, o ma nyɛ maa su otihi nɛ o kɛ ma o hɛ mi ɔ a he. w21.08 20 ¶1; 21 ¶4

Gbalɔyo Ana ye jeha 84 mohu lɛɛ, se e “nane pui ngɛ sɔlemi we ɔ.” Yehowa jɔɔ lɛ wawɛɛ akɛnɛ e nane pui ngɛ sɔlemi we ɔ he je, nɛ e ha nɛ e na bimwɔyo Yesu. (Luka 2:36-38) Mwɔnɛ ɔ hu ɔ, nyɛmimɛ anɔkualetsɛmɛ fuu nɛ a wa ngɛ jeha mi ɔ peeɔ nɔ hyɛmi ní kpakpa kɛ haa nihewi kɛ yihewi. Ke wa bi mɛ níhi a si kpamihi nɛ a ná ngɛ Yehowa sɔmɔmi mi ɔ he sanehi, nɛ wa bu mɛ tue saminya a, wa ma ná he se wawɛɛ. Nyɛmimɛ nyumuhi kɛ yihi nɛ a wa ngɛ jeha mi ɔ a he hia Yehowa kɛ e we asafo ɔ. A na bɔ nɛ Yehowa jɔɔ mɛ nitsɛmɛ kɛ e we asafo ɔ ha ngɛ blɔ slɔɔtohi a nɔ. A kase ní komɛ nɛ a he hia kɛ je níhi nɛ a pee we mɛ saminya be ko nɛ be ɔ mi. E sa nɛ waa na mɛ kaa “juɛmi nyu hɛngmɛ,” nɛ waa kase ní kɛ je a níhi a si kpami ɔmɛ a mi. (Abɛ 18:4, NW) Ke o ná be kɛ le mɛ ɔ, a maa wo o hemi kɛ yemi ɔ mi he wami. w21.09 3 ¶4; 4 ¶7-8; 5 ¶11, 13

Yehowa we bi ma nyɛ maa ngɔ níhi nɛ Yesaya kale lɛ kaa “je ma amɛ a nyɔ nyu” ɔ kɛ tsu ní. (Yes. 60:5, 16, NW) Nyɛmihi nɛ nyumuhi kɛ yihi nɛ a ngɛ anɔkuale ɔ mi bae ɔ ngɛ ɔ ha nɛ wa nyɛ nɛ wa fiɛɛ ngɛ mahi 240 a mi, nɛ wa pee womihi ngɛ gbihi 1,000 kɛ se mi. Ngɛ nyagbe be nɛ ɔ mi ɔ, je ma amɛ a mimiɛɛmi ɔ ngɛ nihi a nɔ nyɛe konɛ a mwɔ yi mi kpɔ. Anɛ a maa mwɔ yi mi kpɔ kaa a ma fĩ Mawu Matsɛ Yemi ɔ se loo a ma fĩ je nɛ ɔ mi nɔ yeli ɔmɛ a se? Enɛ ɔ ji yi mi kpɔ ko nɛ e sa nɛ nɔ fɛɛ nɔ nɛ mwɔ. E ngɛ mi kaa Yehowa we bi yeɔ mlaa nɛ nɔ yeli ɔmɛ wo ngɛ ma nɛ a ngɛ mi ɔ nɔ mohu lɛɛ, se a kɛ a he wui ma kudɔmi sanehi a mi. (Rom. 13:1-7) A le kaa Mawu Matsɛ Yemi ɔ pɛ nɛ ma nyɛ ma tsu adesahi a nyagbahi a he ní. Nɔ Yemi nɛ ɔ, pi je nɛ ɔ mi nɔ́.​—Yoh. 18:36, 37. w21.09 17-18 ¶13-14

Ke nɔ ko nɛ o suɔ lɛ ɔ kpa Yehowa jami ɔ, e he hia wawɛɛ kaa o maa ya nɔ maa pee níhi nɛ ma ha nɛ o kɛ o weku mi bimɛ kpahi nyɛ hemi kɛ yemi ɔ mi nɛ wa. Mɛni blɔ nɔ o maa gu kɛ pee jã? Mo ha nɛ Yehowa nɛ wo mo he wami kɛ gu Mawu Munyu ɔ nɛ o maa kane nɛ o ma pue o yi mi tɛ ngɛ he kɛ asafo mi kpehi nɛ o maa ya a nɔ. Joanna nɛ e papaa kɛ e nyɛmiyo kpa Yehowa sɔmɔmi ɔ de ke: “Ke i kane ni komɛ nɛ Baiblo ɔ tu a he munyu kaa Abigail, Ester, Hiob, Yosef, kɛ Yesu a he ní ɔ, ye tsui nɔɔ ye mi wawɛɛ. A nɔ hyɛmi ní ɔmɛ haa nɛ i náa susumi nɛ da, nɛ dɔdɔɛ ɔ nya baa si.” Ke o ngɛ haoe ɔ, yaa nɔ nɛ o sɔle ha Yehowa. Mo bi wa Mawu nɛ ngɛ suɔmi ɔ nɛ e ye bua mo nɛ o na si fɔfɔɛ ɔ kaa bɔ nɛ e naa lɛ ɔ, nɛ e ‘tsɔɔ mo blɔ nɛ o nyɛɛ nɔ nɛ e tsɔɔ mo ní.’ (La 32:6-8) Ngɛ anɔkuale mi ɔ, e be gbɔjɔɔ kaa o ma de Yehowa bɔ nɛ o ngɛ he nue ha tutuutu. Se e le bɔ nɛ o ngɛ he nue ha tutuutu ngɛ o tsui mi. E suɔ nɛ o de lɛ níhi nɛ ngɛ o tsui mi tsuo.​—2 Mose 34:6; La 62:7. w21.09 28 ¶9-10

Benɛ a ye He Tsɔmi ɔ ngɛ jeha 32 ɔ se ɔ, bɔfo Petro, Yakobo kɛ Yohane na nina ko nɛ sa kadimi. E ma nyɛ maa ba kaa nɔ́ nɛ ɔ ya nɔ ngɛ Hermon Yoku ɔ nɔ. E ji yoku nɛ ya hiɔwe wawɛɛ nitsɛ. A na kaa Yesu tsake ngɛ a hɛ mi. “E hɛ mi kpɛ kaa pu, nɛ tade nɛ e wo ngɛ e tade ɔ nɔ ɔ hu kpɛ kaa la.” (Mat. 17:1-4) Bɔfo ɔmɛ nu nɛ Mawu de ke: “Ye Bi nɛ i suɔ lɛ, nɛ ye bua jɔ e he ji nɛ ɔ nɛ. Nyɛɛ bu lɛ tue.” Bɔ nɛ bɔfo etɛ ɔmɛ pee a ní ha kɛ je jamɛ a ligbi ɔ kɛ yaa a tsɔɔ kaa a bu Yesu tue. Wa suɔ nɛ waa kase a nɔ hyɛmi nɔ́ ɔ. Wa bua jɔ kaa Yehowa jeɔ suɔmi mi nɛ e kɛ blɔ tsɔɔmi haa wɔ kɛ guɔ Yesu Kristo nɛ lɛ ji “asafo ɔ yi ɔ” nɔ! (Efe. 5:23) Kaa bɔ nɛ bɔfo Petro, Yakobo, kɛ Yohane pee ɔ, nyɛ ha nɛ waa fia wa pɛɛ si kaa wa maa “bu lɛ tue.” Ke wa pee jã a, wa ma ná jɔɔmi fuu amlɔ nɛ ɔ nɛ wa ma ná bua jɔmi kɛ ya neneene. w21.12 22 ¶1; 27 ¶19

Kristofo no ko nɛ e ngɛ Korinto asafo ɔ mi ɔ ngɛ e tsɛ yo ngɔe. Bɔfo Paulo kɛ blɔ tsɔɔmi ha Korinto asafo ɔ kaa a fiee lɛ ngɛ asafo ɔ mi. Nyumu ɔ ní peepee ɔ ngɛ nyɛmimɛ kpahi nɛ a ngɛ asafo ɔ mi ɔ a nɔ he wami náe. A kpɛti ni komɛ po susu kaa tsa pi tɔmi nɛ hɛdɔ ngɛ he ji lɔ ɔ! (1 Kor. 5:1, 2, 13) Be komɛ a se ɔ, Paulo ba le kaa yayami peelɔ nɛ ɔ tsake e tsui nitsɛnitsɛ! Paulo de asafo mi nikɔtɔma amɛ ke: “Nyɛɛ je mi mi himi mi nɛ nyɛɛ ngɔ kɛ pa lɛ . . . nɛ́ nyɛɛ wo e bua.” Mo kadi nɔ́ he je nɛ Paulo de jã a. E de ke: “Konɛ aywilɛho yemi sɔuu nɛ ko ba gbe lɛ.” Paulo mi mi sã lɛ ngɛ nyumu ɔ nɛ e tsake e tsui ɔ he. Paulo sume nɛ e na kaa nyumu ɔ hao wawɛɛ tsɔ, nɛ e kɔni mi jɔ̃ akɛnɛ e pee yayami ɔ he je. Ke e ba lɛ jã a, eko ɔ, lɔ ɔ be hae nɛ e bi nɛ a ngɔ e yayami kɛ ke lɛ. (2 Kor. 2:5-8, 11) Asafo mi nikɔtɔma amɛ jeɔ mɔbɔ nami kpo kɛ tsɔɔ kaa a ngɛ Yehowa kasee. Ke e he ba hia nɛ a tsɔse yayami peelɔ ko wawɛɛ ɔ, a peeɔ jã, se ke e he ba hia nɛ a na lɛ mɔbɔ hu a peeɔ jã. Ke asafo mi nikɔtɔma amɛ kɛ tsɔsemi ko ha we yayami peelɔ ko kulaa a, lɛɛ e tsɔɔ kaa a je we mɔbɔ nami kpo, mohu ɔ, a ngɛ yayami peemi nɔ kplɛɛe ngɛ asafo ɔ mi. w21.10 11-12 ¶12-15

Wa ma nyɛ maa ngɔ bɔ nɛ nɔ́ dɔɔ nɔ ha a kɛ to bɔ nɛ pa yeɔ nɔ ha a he. Pa komɛ ngɛ nɛ a kle, nɛ ekomɛ hu klee we. Kaa nɔ hyɛmi nɔ́ ɔ, ke o ngɛ ní hooe ɔ, ha ma nyɛ maa po o nine nguɛ. E ma nyɛ maa ye mo wawɛɛ, se ligbi kake loo enyɔ se ɔ, eko ɔ, o be kaie kaa o he ko plaa. Jã kɛ̃ nɛ nihi peeɔ ní tsɔwitsɔwi komɛ kɛ siɔ wɔ. Kaa nɔ hyɛmi nɔ́ ɔ, wa huɛ ko ma nyɛ ma de wɔ nɔ́ ko loo e maa pee nɔ́ ko nɛ e maa dɔ wɔ. Se wa ma nyɛ maa ngɔ kɛ ke lɛ loo waa ngmɛɛ he. Ke wa plaa wawɛɛ ɔ, lɛɛ e he maa hia nɛ a kpɛ pa a nɛ a fi nɔ. Ke wa ya nɔ nɛ wa ngɛ pa a he tae kpamisa a, wa maa hɔle mi, nɛ e maa ye wɔ nɛ e be gboe. Aywilɛho sane ji kaa nɔ ko ma nyɛ maa pee nɔ́ ko kaa jã ke nɔ ko pee lɛ nɔ́ ko nɛ e dɔ lɛ wawɛɛ. Eko ɔ, e maa ya nɔ maa hi dɔdɔɛ ɔ kɛ abofu ɔ he susue. Se nihi nɛ a kɛ abofu woɔ a mi ɔ yeɔ mɛ nitsɛmɛ a he awi. E maa hi kaa waa kɛ ga womi nɛ ngɛ mwɔnɛ ɔ ngmami ɔ mi ɔ ma tsu ní. w21.12 12 ¶15

Ngɔɔ lɛ kaa asafo mi nɔkɔtɔma ko ngɛ bɔ nɛ e nyɛmi Kristofo no ko dlaa e he ha a he susue. Asafo mi nɔkɔtɔma a ma nyɛ ma bi e he ke, ‘Anɛ ngɛ Ngmami ɔ nya a, e sa nɛ ma tu e he dlami ɔ he munyu lo?’ Akɛnɛ asafo mi nɔkɔtɔma a sume nɛ e da e susumi nɔ kɛ wo nɔ ɔ ga he je ɔ, e ma nyɛ ma bi asafo mi nɔkɔtɔma kpa loo fiɛɛlɔ ko nɛ e nane pi si ɔ juɛmi ngɛ sane ɔ he. A ma nyɛ ma bla kɛ susu ga womi nɛ Paulo kɛ ha ngɛ he dlami he ɔ he. (1 Tim. 2:9, 10) Paulo tu sisi tomi mlaa komɛ nɛ tsɔɔ kaa e sa nɛ Kristofo no nɛ wo tade nɛ sa nɛ e kɛ juɛmi nɛ mi tsɔ nɛ dla e he bɔ nɛ sa he munyu. Se Paulo wui mlaa ngɛ tade nɛ e sa nɛ Kristofo no ko nɛ wo aloo e ko wo ɔ he. E le kaa Kristofohi ma nyɛ maa wo tade nɛ a suɔ, ke lɔ ɔ ti si kɛ wui nɔ́ nɛ Baiblo ɔ de ngɛ he dlami he ɔ. Lɔ ɔ, e sa nɛ asafo mi nikɔtɔmahi nɛ a hyɛ kaa bɔ nɛ nɔ ɔ dlaa e he ha a sa, nɛ e kɛ juɛmi nɛ mi tsɔ nɛ peeɔ jã lo. E sa nɛ wa kai kaa Kristofohi enyɔ nɛ a nane pi si ma nyɛ maa mwɔ yi mi kpɔ ekpaekpa ngɛ nɔ́ kake he, se lɔ ɔ tsɔɔ we kaa nɔ kake nɔ́ da nɛ nɔ kake nɔ́ dɛ. E sɛ nɛ waa bɔ mɔde kaa wa maa nyɛ nyɛmimɛ ɔmɛ a nɔ nɛ a pee nɔ́ nɛ wɔɔ wa susu kaa e da. w22.02 16 ¶9-10

Wa ngɛ yi mi tomi kpakpahi a he je nɛ e sa nɛ wa je suɔmi nɛ se pui kpo kɛ tsɔɔ wa nyɛmimɛ. Mɛni ji yi mi tomi nɛ ɔmɛ ekomɛ? Mo kadi bɔ nɛ Baiblo mi abɛ nɛ ɔmɛ ma nyɛ maa ye bua wɔ ha nɛ wa ná sane bimi nɛ ɔ heto: “Koo ngmɛɛ suɔmi nɛ se pui kɛ anɔkuale yemi he. . . . Kɛkɛ ɔ, o ma ná hɛ mi nyami kɛ nɔ́ se kɔmi nitsɛnitsɛ ngɛ Mawu kɛ adesa hɛ mi.” “Nɔ nɛ jeɔ suɔmi nɛ se pui kpo ɔ, lɛ nitsɛ e náa he se.” “Nɔ fɛɛ nɔ nɛ diɔ dami kɛ suɔmi nɛ se pui se ɔ . . . ma ná wami.” (Abɛ 3:3, 4; 11:17, sisi ningma; 21:21, NW) Abɛ nɛ ɔmɛ wo yi mi tomi etɛ a he je nɛ e sa nɛ wa je suɔmi nɛ se pui kpo ɔ a ta. Kekleekle ɔ, suɔmi nɛ se pui kpo nɛ wa jeɔ ɔ haa nɛ wa he jua waa ngɛ Yehowa hɛ mi. Enyɔne, ke wa je suɔmi nɛ se pui kpo ɔ, wɔ nitsɛmɛ wa náa he se. Kaa nɔ hyɛmi nɔ́ ɔ, huɛ bɔmi kpakpa hii waa kɛ ni kpahi wa kpɛti. Etɛne ɔ, ke wa je suɔmi nɛ se pui kpo ɔ, e ma ha nɛ wa ná jɔɔmihi hwɔɔ se, kɛ neneene wami hulɔ. Ngɛ anɔkuale mi ɔ, wa ngɛ yi mi tomi kpakpahi a he je nɛ e sa nɛ waa bu Yehowa kaimi nɛ nyɛɛ se ɔ tue: “Nyɛ je suɔmi nɛ se pui kɛ mɔbɔ nami kpo kɛ tsɔɔ nyɛ sibi.” w21.11 8 ¶1-2

Ke ka ko nɛ o kɛ kpe be ko nɛ be loo ka ko nɛ o kɛ ngɛ kpee amlɔ nɛ ɔ ha nɛ o na kaa o hemi kɛ yemi mi wɛ kpakpa ko ɔ, o kɔni mi nɛ ko jɔ̃. Moo na lɛ kaa e ji he blɔ nɛ o ná nɛ o kɛ maa wo o hemi kɛ yemi ɔ mi he wami. Moo sɔle wawɛɛ, titli ke o kɛ haomi nɛ mi wa ngɛ kpee. Mo kai kaa Yehowa ma nyɛ maa gu weku li kɛ huɛmɛ a nɔ kɛ ha mo o hiami níhi. Ke o ha nɛ Yehowa ye bua mo nɛ o nyɛ da kahi nɛ o kɛ ngɛ kpee amlɔ nɛ ɔ a nya a, o ma ná nɔ mi mami kaa e maa ye bua mo nɛ o fĩ si ngɛ ka fɛɛ ka nɛ eko ɔ, o kɛ maa kpe hwɔɔ se ɔ a mi. Yesu tsɔɔ e kaseli ɔmɛ hehi nɛ a hia hemi kɛ yemi fuu ngɛ, se e ji he atsinyɛ kaa Yehowa maa ye bua mɛ nɛ a da kahi nɛ a kɛ maa kpe hwɔɔ se ɔ a nya. (Yoh. 14:1; 16:33) E ngɛ nɔ mi mami kaa hemi kɛ yemi nɛ mi wa maa ye bua asafo kuu ngua ko konɛ a nyɛ nɛ a gblee amanehlu ngua a nɛ e be kɛe nɛ e maa ba a mi slɔkee. (Kpoj. 7:9, 14) O maa piɛɛ asafo kuu ngua nɛ ɔ he ke o pee nɔ́ fɛɛ nɔ́ nɛ o ma nyɛ amlɔ nɛ ɔ kɛ wo o hemi kɛ yemi ɔ mi he wami!​—Heb. 10:39. w21.11 25 ¶18-19

Wa hyɛ we blɔ kaa Yehowa maa gu nyakpɛ blɔ nɔ kɛ po wa he piɛ. Se wa le kaa nɔ fɛɛ nɔ nɛ e ngɔɔ e hɛ kɛ fɔɔ Yehowa nɔ ɔ, ke e gbo po ɔ, e ma ná neneene wami. Hwɔɔ se ɔ, a maa ka hemi kɛ yemi nɛ wa ngɛ kaa Yehowa maa po wa he piɛ ɔ. Ke Gog nɛ je Magog nɛ ji je ma amɛ nɛ a maa pee kake ɔ ba tua Mawu we bi ɔ, e maa pee kaa nɔ́ nɛ wa wami ya je oslaa mi. E sa nɛ wa ná nɔ mi mami kaa Yehowa ma nyɛ ma kpɔ̃ wɔ, nɛ e ma kpɔ̃ wɔ hulɔ. Je ma amɛ maa na wɔ kaa jijɔhi nɛ a be nɔ ko nɛ maa po a he piɛ. (Eze. 38:10-12) A tsɔse we wɔ kɛ ha ta hwumi, nɛ wa be ta hwumi nɔ́ ko hu hɛɛe. Je ma amɛ maa na wɔ kaa e be yee kulaa kaa a maa ye wa nɔ kunimi. A li kaa Yehowa bɔfohi pee klaalo kaa a maa po wa he piɛ. Se wɔɔ lɛɛ wa le enɛ ɔ, ejakaa wa ngɛ hemi kɛ yemi. Je ma amɛ be hemi kɛ yemi ngɛ Mawu mi. E maa pee mɛ nyakpɛ ke hiɔwe tabo ɔ ba hwu ha wɔ!​—Kpoj. 19:11, 14, 15. w22.01 6 ¶12-13

Wa nyɛmimɛ nyumuhi kɛ yihi tsuo a he hia Yehowa, nɛ e sa nɛ a he nɛ hia wɔ hulɔ. E sa nɛ waa je wa tsui mi kɛ pee nɔ́ fɛɛ nɔ́ nɛ wa ma nyɛ kɛ po a he piɛ, nɛ waa pee níhi nɛ tsɔɔ kaa wa susuɔ a he. Ke wa pee nɔ́ ko nɛ hao wa nyɛmi ko ɔ, e sɛ nɛ waa pee kaa nɔ́ nɛ nɔ́ ko yɛ nɔ, nɛ wa susu kaa wa nyɛmi ɔ maa ngmɛɛ sane ɔ he, nɛ e kɛ maa ke wɔ. Mɛni he je nɛ eko ɔ, nɔ ko maa nu he kaa a tɔ̃ e nɔ ɔ? Ejakaa e slo he nɛ wa ti nɔ fɛɛ nɔ wa ngɛ, nɛ nyɛmimɛ komɛ hu naa a he kaa a he hia we. Ni komɛ ba anɔkuale ɔ mi kɛ we, lɔ ɔ he ɔ, a kase we bɔ nɛ e sa nɛ a kɛ nihi a tɔmi nɛ ke mɛ ha a lolo. Bɔ fɛɛ bɔ nɛ e ji ɔ, e sa nɛ waa bɔ mɔde nɛ waa pee nɔ́ nɛ da. Jehanɛ hu ɔ, ke nɔ ko nuɔ he kaa nihi pɔɔ e nɔ tɔ̃ mi ɔ, e sa nɛ e yɔse kaa e ji e gbɔjɔmi nɛ e sa nɛ e tsu he ní. Ke e pee jã a, e ma ná bua jɔmi, nɛ huɛ bɔmi kpakpa maa hi e kɛ ni kpahi a kpɛti. w21.06 21 ¶7

Yesu le bɔ nɛ wa nuɔ he ha. Wa bua jɔ kaa ke wa hao aloo wa kɔni mi jɔ̃ ɔ, wa ngɛ huɛ ko nɛ e le bɔ nɛ wa nuɔ he ha, akɛnɛ e kɛ si fɔfɔɛhi nɛ waa kɛ ngɛ kpee ɔ eko kpe hyɛ ɔ he je. Jamɛ a huɛ ɔ ji Yesu. Ke nɔ ko gbɔjɔ nɛ e hia yemi kɛ buami ɔ, Yesu le bɔ nɛ e ngɛ ha. E le wa gbɔjɔmi, nɛ e ma ha wɔ yemi kɛ buami nɛ wa hia “ngɛ be nɛ sa mi.” (Heb. 4:15, 16) Yesu kplɛɛ yemi kɛ buami nɛ bɔfo ɔ kɛ ha lɛ ngɛ Getsemane abɔɔ ɔ mi ɔ nɔ. E sa nɛ wɔ hu waa kplɛɛ yemi kɛ buami nɛ Yehowa kɛ haa wɔ ɔ nɔ. E ma nyɛ maa gu wa womi ɔmɛ, video ɔmɛ, magbɛ nɔ munyu ko aloo slaami nɛ asafo mi nikɔtɔma amɛ loo nyɛmi ko nɛ e nane pi si ma ba slaa wɔ ɔ nɔ kɛ ye bua wɔ. (Luka 22:39-44) Yehowa ma ha mo “Mawu tue mi jɔmi ɔ,” nɛ e maa wo mo he wami. Ke wa sɔle ɔ, wa ma ná “Mawu tue mi jɔmi ɔ nɛ pã níhi a sisi numi tsuo ɔ.”​—Filip. 4:6, 7. w22.01 18-19 ¶17-19

Yehowa peeɔ nɔ́ nɛ da be fɛɛ be. Se nyagba a ji eko ɔ, wa be hemi kɛ yemi ngɛ nihi nɛ e hla kaa a nyɛɛ níhi a hɛ mi ngɛ asafo ɔ mi ɔ a mi. Eko ɔ, wa ma bi ke, anɛ nihi nɛ a ngɛ blɔ nya ngɛ Yehowa asafo ɔ mi ɔ ngɔɔ Yehowa blɔ tsɔɔmi kɛ tsuɔ ní aloo mɛ nitsɛmɛ a blɔ tsɔɔmi nɛ a kɛ tsuɔ ní? Ngɛ anɔkuale mi ɔ, wa be nyɛe ma de ke wa he Yehowa ye ke wa he we nihi nɛ e hla mɛ kaa a nyɛɛ asafo ɔ hɛ mi ɔ yi, ejakaa Yehowa nitsɛ he mɛ ye. Mwɔnɛ ɔ, Yehowa kɛ “tsɔlɔ anɔkualetsɛ kɛ ní lelɔ ɔ” tsuɔ ní kɛ nyɛɛɔ e blɔ nya tomi ɔ fã nɛ ngɛ zugba a nɔ ɔ hɛ mi. (Mat. 24:45) Kaa bɔ nɛ blɔ tsɔɔmi ajla toli nɛ a hi si ngɛ kaseli ɔmɛ a be ɔ mi ɔ pee ɔ, tsɔlɔ anɔkualetsɛ kɛ ní lelɔ ɔ nyɛɛɔ Mawu we bi nɛ a ngɛ je kɛ wɛ ɔ hɛ mi nɛ a kɛ blɔ tsɔɔmihi haa asafo mi nikɔtɔma amɛ. Asafo mi nikɔtɔma amɛ hu ngɔɔ blɔ tsɔɔmi nɛ ɔmɛ kɛ tsuɔ ni ngɛ a we asafo ɔmɛ a mi. Ke waa kɛ blɔ tsɔɔmi nɛ Yehowa asafo ɔ kɛ asafo mi nikɔtɔma amɛ kɛ haa wɔ ɔ tsuɔ ní ɔ, lɔ ɔ tsɔɔ kaa wa ngɛ hemi kɛ yemi ngɛ blɔ nɔ nɛ Yehowa guɔ kɛ peeɔ níhi ɔ mi. w22.02 4 ¶7-8

E ji he blɔ ngua nɛ wa ná kaa wa ji Yehowa Odasefohi! Ke wa nyɛ nɛ wa ye bua nɔ ko nɛ e ngɛ “su kpakpa nɛ ma ha nɛ [e] ná neneene wami” nɛ e ba he ye ɔ, wa bua jɔɔ wawɛɛ. (Níts. 13:48) Ke e ba jã a, wa nuɔ he kaa bɔ nɛ Yesu nu he ɔ. E “bua jɔ wawɛɛ ngɛ mumi klɔuklɔu ɔ mi” benɛ e kaseli ɔmɛ ba de lɛ níhi a si kpami kpakpahi nɛ a ná ngɛ fiɛɛmi mi ɔ. (Luka 10:1, 17, 21) Bɔfo Paulo wo Timoteo he wami ke: “Be fɛɛ be ɔ, hyɛ mo nitsɛ o he nɔ kɛ o ní tsɔɔmi ɔ hu nɔ saminya.” E tsa nɔ ke: “Ke o peeɔ jã a, o ma he mo nitsɛ kɛ nihi nɛ a buɔ mo tue ɔmɛ a yi wami.” (1 Tim. 4:16) Enɛ ɔ tsɔɔ kaa wa fiɛɛmi ní tsumi ɔ heɔ nɔ yi wami. Wa ji Mawu Matsɛ Yemi ɔ sisi bimɛ, enɛ ɔ he ɔ, wa hyɛɛ wa he nɔ saminya be fɛɛ be. Wa bɔɔ mɔde kaa wa maa ba wa je mi saminya konɛ e wo Yehowa hɛ mi nyami nɛ e kɛ sane kpakpa a nɛ wa fiɛɛɔ nɛ kɔ. (Filip. 1:27) Wa tsɔɔ kaa wa ‘hyɛɛ wa ní tsɔɔmi nɔ saminya’ kɛ gu wa he nɛ wa dlaa loko wa fiɛɛɔ, kɛ Yehowa nɛ wa biɔ lɛ kaa e ye bua wɔ loko waa ye nɔ ko odase ɔ nɔ. w21.10 24 ¶1-2

Nɔ nɛ wo “su ehe ɔ” kaseɔ Yehowa. Ke nɔ ko woɔ Mawu mumi ɔ yiblii ɔ, nɛ e haa nɛ mumi klɔuklɔu ɔ kudɔɔ e susumi, e he numi kɛ e ní peepee ɔ, e tsɔɔ kaa nɔ ɔ wo su ehe ɔ. Kaa nɔ hyɛmi nɔ́ ɔ, e suɔ Yehowa kɛ e we bi. (Mat. 22:36-39) Ke e kɛ nyagbahi ngɛ kpee po ɔ, e yaa nɔ nɛ e náa bua jɔmi. (Yak. 1:2-4) E dii tue mi jɔmi se. (Mat. 5:9) E toɔ e tsui si nɛ e kɛ nihi hiɔ si ngɛ mi mi jɔmi mi. (Kol. 3:13) E suɔ nɔ́ nɛ da, nɛ e peeɔ nɔ́ nɛ da hulɔ. (Luka 6:35) E kɛ e ní peepee tsɔɔ kaa e ngɛ hemi kɛ yemi nɛ mi wa ngɛ e hiɔwe Tsɛ ɔ mi. (Yak. 2:18) E yaa nɔ nɛ e peeɔ kpoo ke e mi mi fu, nɛ e yeɔ e he nɔ ke e kɛ kahi kpe. (1 Kor. 9:25, 27; Tito 3:2) Loko wa maa wo su ehe ɔ, e sa nɛ wa je suhi nɛ a wo ta ngɛ Galatia Bi 5:22, 23 ɔ kɛ su kpahi nɛ a wo ta ngɛ Baiblo womi kpahi a mi ɔ kpo. w22.03 8-9 ¶3-4

Bɔfo Paulo fiɛɛ ngɛ wehi a mi, se pi lɔ ɔ pɛ, e fiɛɛ ngɛ he fɛɛ he, kɛ be fɛɛ be nɛ e ma ná he blɔ. Asafo mi nikɔtɔmahi ma nyɛ maa kase Paulo nɔ hyɛmi nɔ́ nɛ ɔ. (Efe. 6:14, 15) Kaa bɔ nɛ Paulo pee ɔ, asafo mi nikɔtɔmahi ma nyɛ ma tsɔse asafo mi sɔmɔli kɛ ni kpahi ke a kɛ mɛ ngɛ fiɛɛmi mi. (1 Pet. 5:1, 2) Se e sɛ nɛ asafo mi nikɔtɔmahi nɛ a ngɔ a be tsuo kɛ tsu asafo ɔ ní tsumihi nɛ e ba lɛ kaa a be be náe kɛ ya fiɛɛmi po. (Mat. 28:19, 20) Bɔ nɛ pee nɛ a ná be kɛ tsu níhi nɛ a he hia a he ní ɔ, be komɛ ɔ, e sɛ nɛ a ngɔ blɔ nya ní tsumihi fuu kɛ pue a kuɛ nɔ. Ke a susu he saminya nɛ a sɔle ngɛ he ɔ, eko ɔ, a maa na kaa ke a kplɛɛ ní tsumi ko nɔ ɔ, a be be náe kɛ tsu ní kpahi nɛ a he hia wawɛɛ ɔ a he ní. Ní nɛ ɔmɛ ekomɛ ji weku Mawu jami nɛ a maa pee daa otsi, fiɛɛmi ní tsumi ɔ nɛ a ma tsu lɛ saminya, loo a bimɛ nɛ a ma tsɔse mɛ konɛ a nyɛ nɛ a fiɛɛ. A ma nyɛ ma ná nɔ mi mami kaa Yehowa nu mɛ sisi, nɛ e le kaa a suɔ nɛ a tsu asafo ɔ ní tsumihi kɛ blɔ nya ní tsumi kpahi a he ní. w22.03 27 ¶4, 7; 28 ¶8

Anɛ o kai kaa o ye gbeye bɔɔ benɛ o ngɛ hlae nɛ o ba pee Yehowa Odasefo no ɔ lo? Eko ɔ, o susu kaa o be nyɛe nɛ o fiɛɛ ngɛ wehi a mi. Aloo eko ɔ, o ye gbeye kaa o weku li loo o huɛmɛ maa te si kɛ wo mo. Ke jã a, lɛɛ o ma nyɛ maa nu o Baiblo kaselɔ ɔ sisi ke lɛ hu e ngɛ he nue jã. Yesu tsɔɔ kaa ni komɛ ma nyɛ maa nu he jã. Se kɛ̃ ɔ, e wo e kaseli ɔmɛ he wami kaa a ko ha nɛ gbeye yemi nɛ ha nɛ a kpa Yehowa sɔmɔmi. (Mat. 10:16, 17, 27) Mo tsɔse o Baiblo kaselɔ ɔ bɔɔbɔɔbɔɔ konɛ e jaje e hemi kɛ yemi ɔ kɛ tsɔɔ ni kpahi. Eko ɔ, Yesu kaseli ɔmɛ ye gbeye benɛ e tsɔ mɛ kaa a ya fiɛɛ ɔ. Se Yesu ye bua mɛ nɛ e de mɛ he nɛ a ya fiɛɛ ngɛ kɛ sɛ gbi nɛ a ya fiɛɛ. (Mat. 10:5-7) Mɛni blɔ nɔ o maa gu kɛ kase Yesu nɔ hyɛmi nɔ́ ɔ? Moo ye bua o Baiblo kaselɔ ɔ nɛ e na he nɛ e ma nyɛ maa fiɛɛ ngɛ. Kaa nɔ hyɛmi nɔ́ ɔ, mo bi lɛ kaa e le nɔ ko nɛ e maa suɔ nɛ e le Baiblo mi anɔkuale pɔtɛɛ ko lo. Moo ye bua lɛ kɛ dla e he, nɛ o tsɔɔ lɛ blɔ kpiti nɔ nɛ e ma nyɛ maa gu kɛ tsɔɔ nɔ ɔ anɔkuale ɔ. w21.06 6 ¶15-16

“Ngɛ hɛngmɛfia kake mi ɔ, tsu momohi kɛ tsuapohi bɔni hulemi.” “Nɔ fɛɛ nɔ ngɛ gbeye yee . . . Nihi fuu de ke e ye maa pee hɛngmɛfia enyɔ. Se ngɛ ye blɔ fa mi lɛɛ, e se kɛ wawɛɛ.” Munyu nɛ ɔ ji munyuhi nɛ ni komɛ nɛ a yi ná wami benɛ zugba mimiɛɛ ngɛ Nepal ngɛ jeha 2015 ɔ mi ɔ tu. Amlɔ nɛ ɔ, waa kɛ si fɔfɔɛ ko nɛ ngɛ je mahi tsuo mimiɛɛe ɔ ngɛ kpee. Yehowa ngɛ je ma amɛ tsuo mimiɛɛe. Gbalɔ Hagai de ke: ‘Nɔ́ nɛ Yehowa tabohiatsɛ ɔ ngɛ dee ji nɛ ɔ nɛ. E be kɛe kulaa nɛ ma mimiɛ hiɔwe kɛ zugba.’ (Hag. 2:6) Je ma amɛ a mimiɛɛmi nɛ Hagai tu he munyu ɔ be kaa zugba mimiɛɛmi nɛ puɛɔ ní pɛ ɔ, mohu ɔ, e maa ngɔ nɔ́ nitsɛ hu kɛ ba. Yehowa de ke: ‘Ma mimiɛɛ je ma amɛ tsuo, nɛ a maa muɔɔ a juetli babauu ɔ kɛ ba hiɛ ɔ, nɛ Mawu we ɔ ma hyi tɔtɔɔtɔ kɛ níhi nɛ a he jua wa.’ w21.09 14 ¶1-3

Ke o suɔ nɛ o kɛ nɔ ko nɛ pee huɛ ɔ, e sa nɛ o kɛ lɛ nɛ pɔ ní sɛɛmi nɛ o de lɛ bɔ nɛ o nuɔ he ha ngɛ níhi a he. Ke wa suɔ nɛ waa kɛ Yehowa nɛ pee huɛ ɔ, e sa nɛ wɔ hu waa pee jã. Ke wa de lɛ bɔ nɛ wa nuɔ he ha, wa susumihi, kɛ wa nyagbahi ngɛ sɔlemi mi ɔ, lɔ ɔ tsɔɔ kaa wa he lɛ ye, nɛ wa le kaa e suɔ wɔ. (La 94:17-19; 1 Yoh. 5:14, 15) O kɛ huɛmɛ anɔkualetsɛmɛ nɛ bɔ; a ji nike ní nɛ je Yehowa ngɔ. (Yak. 1:17) Wa hiɔwe Tsɛ ɔ ha wɔ mumi mi weku nɛ ji wa nyɛmimɛ nyumuhi kɛ yihi nɛ a jeɔ suɔmi kpo kɛ tsɔɔ wɔ “be tsuaa be,” kɛ tsɔɔ kaa e susuɔ wa he. (Abɛ 17:17) Ngɛ sɛ womi nɛ bɔfo Paulo ngma kɛ ya ha Kolose bi ɔmɛ ɔ mi ɔ, e kale Kristofohi nɛ a ye bua lɛ ɔ kaa a ji nihi nɛ e “náa bua womi kɛ jeɔ a ngɔ wawɛɛ nitsɛ.” (Kol. 4:10, 11) Kristo po hia yemi kɛ buami benɛ e ngɛ zugba a nɔ ɔ, nɛ e bua jɔ yemi kɛ buami nɛ e huɛmɛ anɔkualetsɛmɛ kɛ bɔfohi kɛ ha lɛ ɔ he. (Luka 22:43) Ke o kɛ huɛmɛ nɛ a nane pi si ɔ susu o nyagbahi a he ɔ, lɔ ɔ tsɔɔ we kaa o gbɔjɔ, mohu ɔ, e ma nyɛ maa po o he piɛ. w21.04 24-25 ¶14-16

Ke o nyɛmi Kristofo no pee nɔ́ ko nɛ gba o nya a, mɛni e sa nɛ o pee? Pee nɔ́ fɛɛ nɔ́ nɛ o ma nyɛ kɛ baa tue mi jɔmi yi. Moo je o tsui mi nɛ o sɔle ha Yehowa. Bi Yehowa nɛ e ye bua nɔ nɛ e tɔ̃ o nɔ ɔ, nɛ́ e ye bua mo nɛ o na su kpakpahi nɛ lɛ Yehowa a, e naa ngɛ nɔ ɔ he ɔ. (Luka 6:28) Ke o be nyɛe maa ngmɛɛ nɔ́ nɛ nɔ ɔ pee ɔ he ɔ, lɛɛ hla blɔ nɔ nɛ o maa gu nɛ o kɛ lɛ nɛ ya tu munyu. E maa hi wawɛɛ kaa be fɛɛ be ɔ, wa maa nu he kaa pi nɛ wa nyɛmi ɔ je blɔ kaa e ma tɔ̃ wa nɔ. (Mat. 5:23, 24) Ke o kɛ lɛ ngɛ munyu tue ɔ, ngɔɔ lɛ kaa pi yi mi tomi yaya he je nɛ e pee jã. Nɛ ke e sume nɛ nyɛ dla nyɛ kpɛti ɔ hu nɛɛ? ‘Yaa nɔ nɛ o ná e he tsui,’ nɛ o kɔni mi ko jɔ̃ ngɛ o nyɛmi ɔ he. (Kol. 3:13) Nɔ́ nɛ pe kulaa a, koo ngɔ nɔ ɔ he abofu kɛ wo o mi, e ma nyɛ ma puɛ huɛ bɔmi nɛ ngɛ o kɛ Yehowa nyɛ kpɛti ɔ. Ko ha nɛ nɔ́ ko nɛ tɔ̃tɔ̃ o nane. Ke o pee jã a, lɔ ɔ tsɔɔ kaa o suɔ Yehowa pe nɔ́ fɛɛ nɔ́.​—La 119:165. w21.06 23 ¶15