July

Nɔ fieemi blɔ nya tomi ɔ piɛɛ blɔ nyahi nɛ Yehowa to ngɛ e we asafo ɔ mi ɔ he. E ji nɔ́ nɛ ma nyɛ maa ye bua nɔ nɛ a fiee lɛ ɔ kɛ nihi nɛ a ngɛ asafo ɔ mi ɔ tsuo. Eko ɔ, nyɛmimɛ komɛ ma de ke yi mi kpɔ nɛ a mwɔ nɛ a kɛ fiee nɔ ɔ kɛ je asafo ɔ mi ɔ dɛ. Se mo kai kaa behi fuu ɔ, nihi kaa jã a sume nɛ a de nɔ́ yaya ko ngɛ nɔ nɛ a fiee lɛ ɔ he. E kpiti pomi pɛ ji kaa wa li sane ɔ mi fitsofitso. Enɛ ɔ he ɔ, mo ná nɔ mi mami kaa asafo mi nikɔtɔmahi nɛ a tsu sane ɔ he ní ɔ ngɔ Baiblo sisi tomi mlaahi kɛ tsu ní nɛ a kojo ‘ha Yehowa.’ (2 Kron. 19:6) Ke a fiee o suɔlɔ ko ngɛ asafo ɔ mi nɛ o fĩ yi mi kpɔ nɛ asafo mi nikɔtɔma amɛ mwɔ ɔ se ɔ, eko ɔ, e maa ye bua nɔ ɔ nɛ e kpale kɛ ba Yehowa ngɔ. Elizabeth de ke: “E he wa ha wɔ kaa wa maa ye wa he nɔ nɛ wa be wa binyumu ɔ nɛ wa suɔ lɛ ɔ tsɛe. Benɛ e kpale kɛ ba Yehowa ngɔ ɔ, e tsɔɔ kaa e da kaa a fiee lɛ ngɛ asafo ɔ mi. Pee se ɔ, e tsɔɔ kaa e kase níhi fuu kɛ je nɔ́ nɛ ya nɔ ɔ mi.” w21.09 28-29 ¶11-12

Mo susu yalɔyo ɔ he nɛ o hyɛ. E ná nɛ e pee babauu kɛ ha Yehowa. Se kɛ̃ ɔ, e pee nɔ́ nɛ e ma nyɛ; e ngɔ nɔ́ fɛɛ nɔ́ nɛ e ngɛ ɔ kɛ ha Yehowa. Yesu le kaa yalɔyo ɔ yemi kɛ buami ɔ he jua wa kɛ ha e Tsɛ ɔ. Nɔ́ nɛ wa ma nyɛ maa kase ngɛ sane ɔ mi ji nɛ ɔ nɛ: Yehowa bua jɔɔ ke waa kɛ wa tsui tsuo kɛ wa susuma tsuo sɔmɔ lɛ. (Mat. 22:37; Kol. 3:23) Yehowa bua jɔɔ ke e na kaa wa peeɔ nɔ́ fɛɛ nɔ́ nɛ wa ma nyɛ ngɛ e sɔmɔmi mi! Sisi tomi mlaa nɛ ɔ kɔɔ be abɔ kɛ wa nyɛmi tsuo nɛ waa kɛ ma sɔmɔ Yehowa a he, nɛ fiɛɛmi ní tsumi kɛ asafo mi kpehi nɛ wa maa ya a hu piɛɛ he. Mɛni blɔ nɔ nɛ o kɛ nɔ́ nɛ o kase ngɛ yalɔyo ɔ sane ɔ mi ɔ ma nyɛ ma tsu ní? Bɔɔ mɔde nɛ o susu nihi pɔtɛɛ nɛ eko ɔ, e he maa hia nɛ a ye bua mɛ nɛ a ná nɔ mi mami kaa Yehowa bua jɔ a mɔde bɔmi ɔ he ɔ he. Eko ɔ, nyɛmiyo ko nɛ e wa ngɛ jeha mi nɛ e susu kaa e he be se nami akɛnɛ e be nɔmlɔ tso mi he wami kpakpa, nɛ e nyɛ we nɛ e pee babauu ngɛ fiɛɛmi ní tsumi ɔ mi ɔ he je. w21.04 6 ¶17, 19-20

Yehowa le be nɛ sa nɛ e kɛ ma kpata je yaya nɛ ɔ hɛ mi. Yehowa tsui si tomi ɔ ha nɛ nihi ba le lɛ. Nɛ amlɔ nɛ ɔ, nihi ayɔhi abɔ nɛ a ji asafo kuu ngua a ba ngɛ lɛ sɔmɔe. Mɛ tsuo a bua jɔ kaa Yehowa ngɛ si fĩe kɛ ba si mwɔnɛ ɔ, nɛ lɔ ɔ ha nɛ a ba fɔ mɛ, nɛ a ba ná suɔmi kɛ ha lɛ, nɛ a jɔɔ a he nɔ kɛ ha lɛ. Ke nihi ayɔhi abɔ fĩ si kɛ ya si nyagbe ɔ, e ma ha waa na kaa Yehowa mwɔ yi mi kpɔ nɛ da kaa e fĩ si nɛ e to e tsui si! E ngɛ mi kaa Satan ní peepee ngɔ tsui yemi kɛ nɔ́ nami kɛ ba mohu lɛɛ, se loloolo ɔ, Yehowa ji “bua jɔmi Mawu.” (1 Tim. 1:11) Wɔ hu wa ma nyɛ ma ná bua jɔmi be mi nɛ wa to wa tsui si kɛ ngɛ mlɛe nɛ Yehowa nɛ tsɔ e biɛ ɔ he, e wo e biɛ ɔ nguɔ, nɛ e po yi wu tso ní peepee kɛ nɔ́ namihi tsuo a se ɔ. Nyɛ ha nɛ wɔ tsuo waa fia wa pɛɛ si kaa wa ma fĩ si, nɛ wa ha nɛ lemi nɛ wa le kaa wa hiɔwe Tsɛ ɔ hu ngɛ si fĩe ɔ nɛ wo wɔ he wami. w21.07 13 ¶18-19

Nihi nɛ a hi si ngɛ kaseli ɔmɛ a be ɔ mi ɔ ná we hemi kɛ yemi ngɛ Yesu mi. A naa lɛ kaa e ji kapitɛ ohiatsɛ bi ko kɛkɛ. Nɛ e je Nazarɛt, nɛ ji ma ko nɛ eko ɔ, a susu kaa e he hia we tsɔ ɔ mi. Nataniɛl nɛ pee se ɔ e ba pee Yesu kaselɔ ɔ po bi ke: “Anɛ nɔ́ kpakpa ko ma nyɛ maa je Nazarɛt kɛ ba lo?” Eko ɔ, e kai gbami nɛ ngɛ Mika 5:2 ɔ nɛ tsɔɔ kaa a ma fɔ Mesia a ngɛ Betlehem, se pi Nazaret ɔ. Gbalɔ Yesaya gba kɛ fɔ si kaa Yesu he nyɛli ɔmɛ be a he nya gbae kaa a maa le Mesia a “he sane fitsofitso.” (Yes. 53:8, NW) Kaa nimli nɛ ɔmɛ he be kɛ susu gbami nɛ ɔmɛ a he saminya a, jinɛ a ko le kaa a fɔ Yesu ngɛ Betlehem, nɛ e je Matsɛ David weku ɔ mi. (Luka 2:4-7) Enɛ ɔ he ɔ, he nɛ a fɔ Yesu ngɛ ɔ kɛ gbami nɛ ngɛ Mika 5:2 ɔ kɔ. Lɛɛ, mɛni ji nyagba a mɔ? Nimli nɛ ɔmɛ kɛ oya yemi kojo Yesu, nɛ a hla we anɔkualehi tsuo nɛ ngɛ sane ɔ mi ɔ, enɛ ɔ he ɔ, a kua Yesu. w21.05 2-3 ¶4-6

Baiblo ɔ tu nihi nɛ a kplɛɛ ga womi nɔ nɛ Yehowa jɔɔ mɛ a he munyu. Mo susu Hiob he nɛ o hyɛ. E ngɛ mi kaa e yi mluku mohu lɛɛ se e suɔ Mawu nɛ e suɔ nɛ e sa e hɛ mi. Benɛ e kɛ si fɔfɔɛ nɛ mi wa ngɛ kpee ɔ, e de ní komɛ nɛ dɛ. Nɛ́ e pee ja a, Elihu kɛ Yehowa tsuo wo lɛ ga ngɛ he. Kɛ Hiob pee e ni ha kɛɛ? E de ke: “I tu nihi nɛ i nui sisi a he munyu. Nɔ nɛ i pee ɔ dɔ mi. Lɔ ɔ he ɔ, i kɛ tabo zu kɛ la zu to okadi kaa i pia ye he niinɛ” (Hiob 42:3-6, 12-17) E ngɛ mi ka Hiob wa pe Elihu mohu lɛɛ se e kplɛɛ ga nɛ Elihu wo lɛ ɔ nɔ. Enɛ ɔ tsɔɔ kaa Hiob baa e he si. (Hiob 32:6, 7) Ke wɔ hu wa nu he kaa e sɛ nɛ a ko wo wɔ ga ko aloo wa wa pe nɔ nɛ wo wɔ ga a po ɔ, he si bami ma nyɛ maa ye bua wɔ nɛ waa kɛ ga womi ɔ ma tsu ní. E sa nɛ wɔ tsuo waa ya nɔ nɛ waa wo mumi ɔ yiblii ɔ nɛ waa pee sane kpakpa fiɛɛli kɛ tsɔɔli nɛ a he be. w22.02 11 ¶8; 12 ¶12

E sa nɛ wa ti nɔ fɛɛ nɔ nɛ ngɛ asafo ɔ mi ɔ nɛ bɔ mɔde konɛ e ha nɛ tue mi jɔmi nɛ hi asafo ɔ mi, nɛ e je suɔmi kpo kɛ tsɔɔ nɔ fɛɛ nɔ konɛ nɔ ko ko nu he kaa e piɛ lɛ pɛ. Níhi nɛ wa peeɔ kɛ níhi nɛ wa deɔ ɔ ma nyɛ maa wo nihi he wami wawɛɛ! Mɛni o ma nyɛ maa pee kɛ ye bua nyɛmimɛ nɛ a weku li be asafo ɔ mi ɔ konɛ a nu he kaa a piɛɛ asafo ɔ he? Bɔɔ mɔde nɛ o kɛ ni hehi nɛ bɔ huɛ. Wa ma nyɛ maa je enɛ ɔ peemi sisi kɛ gu wa tsui mi nɛ wa maa je kɛ nya ni hehi nɛ a ba asafo ɔ mi ɔ a he ɔ nɔ. (Rom. 15:7) Se kɛ̃ ɔ, tsa pi ngami pɛ nɛ o ma nga mɛ ɔ nɛ he hia. Wa suɔ nɛ waa kɛ mɛ nɛ bɔ huɛ gbagbanii. Lɔ ɔ he ɔ, mo je mi mi jɔmi kpo kɛ tsɔɔ ni he ɔmɛ nɛ o kɛ o ní peepee nɛ tsɔɔ kaa o susuɔ a he. Moo bɔ mɔde nɛ o nu nyagbahi nɛ a ngɛ mi gblee ɔ sisi, se ko bi mɛ sanehi nɛ ma ha nɛ zo nɛ gbe mɛ. Eko ɔ, e he maa wa ha a kpɛti ni komɛ kaa a ma de mo bɔ nɛ a ngɛ he nue ha, lɔ ɔ he ɔ, moo hyɛ nɛ hi nɛ o ko nyɛ a nɔ kaa doo ɔ a tu munyu. Moo gu ga blɔ nɔ kɛ bi mɛ sane nɛ ma ha nɛ a de mo bɔ nɛ a ngɛ he nue ha, nɛ ke a ngɛ mo dee ɔ, moo to o tsui si nɛ o bu mɛ tue. Kaa nɔ hyɛmi nɔ́ ɔ, o ma nyɛ ma bi mɛ blɔ nɔ nɛ a gu kɛ ba na anɔkuale ɔ. w21.06 11 ¶13-14

Wa bua jɔ he blɔ nɛ wa ná kaa wa pee kake kɛ ngɛ Yehowa sɔmɔe kaa “to kuu kake” ngɛ “to nɔ hyɛlɔ kake” ɔ sisi ɔ he! Womi nɛ ji Organized to Do Jehovah’s Will, ba fa 165 ɔ de ke: “Akɛnɛ o bua jɔ kake peemi nɛ ngɛ Yehowa we bi a kpɛti ɔ he he je ɔ, e sa nɛ o pee o blɔ fa mi nɔ́ kɛ baa yi.” Enɛ ɔ tsɔɔ kaa e sa nɛ “waa bɔ mɔde nɛ waa na wa nyɛmimɛ nyumuhi kɛ yihi kaa bɔ nɛ Yehowa naa mɛ ɔ.” Yehowa naa wɔ tsuo kaa “nimli tsɔwi” nɛ a he jua wa. Jã ji bɔ nɛ o naa o nyɛmimɛ ɔmɛ lo? Yehowa naa nɔ́ fɛɛ nɔ́ nɛ wa peeɔ kɛ yeɔ bua mɛ ɔ, nɛ e bua jɔ he. (Mat. 10:42) Wa suɔ wa nyɛmimɛ Kristofohi. Enɛ ɔ he ɔ, “nyɛ ha nɛ waa fia wa pɛɛ si kaa wa be nane tɔ̃tɔ̃mi nɔ́ ko aloo blɔ tsimi nɔ́ ko ngɔe kɛ fɔ nyɛmi ko hɛ mi.” (Rom. 14:13) E sa nɛ waa bu wa nyɛmimɛ nyumuhi kɛ yihi kaa a nɔ kuɔ pe wɔ, nɛ waa je wa tsui mi nɛ waa ngɔ a tɔmihi kɛ ke mɛ. E sɛ nɛ wa ha nɛ nɔ́ ko nɔ́ ko nɛ tɔ̃tɔ̃ wa nane, mohu ɔ, “nyɛ ha nɛ waa di níhi nɛ ngɔɔ tue mi jɔmi kɛ baa, kɛ níhi nɛ waa kɛ maa fia wa sibi kɛ ma si ɔmɛ a se.”​—Rom. 14:19. w21.06 24 ¶16-17

Ke wa bɔɔ mɔde nɛ wa kaseɔ Baiblo ɔ, nɛ waa kɛ ga womihi nɛ ngɛ mi kɛ blɔ tsɔɔmihi nɛ Yehowa asafo ɔ kɛ haa wɔ ɔ tsuɔ ní ɔ, bɔɔbɔɔbɔɔ ɔ, wa ma ba ná Kristo su ɔmɛ, nɛ wa ma ba ná Mawu he nile wawɛɛ. Yesu ngɔ nɔ́ he tomi nɔ́ ko kɛ tsɔɔ bɔ nɛ Matsɛ Yemi sɛ gbi ɔ nɛ wa fiɛɛɔ ɔ ngɛ kaa wu nyafii nɛ waa bɔɔbɔɔbɔɔ ngɛ tsui kpakpatsɛmɛ a tsui mi ha a mi. E de ke: “Wu ɔmɛ puɛɔ nɛ a waa​—bɔ nɛ e plɛɔ nɛ e baa lɛ jã a lɛɛ [ní dulɔ ɔ] li. Zugba a nitsɛ wo yiblii bɔɔbɔɔbɔɔ, kekleekle ɔ, tso ɔ, lɔ ɔ se ɔ, e yi ɔ, nɛ nyagbe ɔ, ngma a nitsɛnitsɛ ngɛ tso ɔ yi mi.” (Maak. 4:27, 28) Yesu ngɛ tsɔɔe kaa, kaa bɔ nɛ tso waa bɔɔbɔɔbɔɔ ɔ, jã nɔuu kɛ̃ nɛ ke nɔ ko nu Matsɛ Yemi ɔ sɛ gbi ɔ, e waa bɔɔbɔɔbɔɔ ngɛ mumi mi. Kaa nɔ hyɛmi nɔ́ ɔ, ke wa Baiblo kaseli ngɛ hɛɛe kɛ ngɛ Yehowa he sue ɔ, wa naa kaa e kɛ we kɛkɛ a bɔni tsakemihi peemi ngɛ a si himi mi. (Efe. 4:22-24) Se e sa nɛ wa kai kaa Yehowa ji nɔ nɛ ha nɛ jamɛ a wu nyafii ɔ ngɛ wae ɔ nɛ. w21.08 8-9 ¶4-5

Baiblo ɔ tsɔɔ nɔ́ nɛ ma nyɛ maa ye bua wɔ nɛ wa ná bua jɔmi. Nɔ nɛ ngɔɔ e juɛmi kɛ maa ‘nɔ́ nɛ e ngɛ ɔ’ nɔ ɔ bua jɔɔ si fɔfɔɛ mi nɛ e ngɛ, kɛ ní kpahi nɛ e ngɛ ɔ a he. Se nɔ nɛ daa nɛ ɔ, e suɔ nɛ e ná nɔ́ kpa a nyɛɛɔ níhi nɛ e nine be nyɛe maa su a nɔ gblee ɔ a se. Mɛni wa kaseɔ ngɛ ngmami nɛ ɔ mi? Loko wa ma ná bua jɔmi ɔ, jã wa ngɔ wa juɛmi kɛ ma níhi nɛ wa ngɛ amlɔ nɛ ɔ nɔ, se pi níhi nɛ wa nine be nyɛe maa su a nɔ. Se anɛ e ji anɔkuale kaa nɔ ko bua ma nyɛ maa jɔ níhi nɛ e ngɛ momo ɔ a he lo? Nihi fuu susu kaa jã be hie peemi ejakaa adesahi suɔ nɛ a kase ní hehi daa ligbi. Se ngɛ anɔkuale mi ɔ, jã maa hi peemi. Wa bua ma nyɛ maa jɔ ‘níhi nɛ wa ngɛ ɔ’ a he. Ngɛ mɛni blɔ nɔ? Mo susu Yesu nɔ́ he tomi nɔ́ nɛ kɔɔ talɛnt ɔ nɛ ngɛ Mateo 25:14-30 ɔ he nɛ o hyɛ. Nɛ o maa na blɔ nɔ nɛ o maa gu kɛ ná bua jɔmi nɛ o bua nɛ jɔ wawɛɛ ngɛ si fɔfɔɛ nɛ o ngɛ mi amlɔ nɛ ɔ he. w21.08 21 ¶5-6

Yehowa susuɔ nihi nɛ a “kɔni mi jɔ̃, kɛ nihi nɛ a be hɛ nɔ kami ɔ” a he wawɛɛ. Asafo mi nikɔtɔma ma nyɛ maa wo nyɛmimɛ nyumuhi kɛ yihi nɛ ɔmɛ he wami, se pi mɛ pɛ, wɔ tsuo wa ma nyɛ maa pee jã. Blɔ kake nɛ wa ma nyɛ maa gu nɔ kɛ pee jã ji kaa wa ma ha nɛ a na kaa wa suɔ a sane. Yehowa suɔ nɛ wa ha nɛ a na bɔ nɛ e suɔ mɛ ha. (Abɛ 19:17) Wa ma nyɛ maa ye bua wa nyɛmimɛ nyumuhi kɛ yihi ke ji kaa wa baa wa he si, nɛ wa peeɔ wa he humi. Wa sume nɛ waa gbla ni kpahi a juɛmi kɛ ba wa nɔ nɛ lɔ ɔ nɛ ba ha nɛ a hɛ nɛ kɔ̃ wa nɔ. Mohu ɔ, wa suɔ nɛ waa kɛ nyɛmihi nɛ wa ngɛ kɛ wa nile ɔ nɛ wo wa sibi he wami. (1 Pet. 4:10, 11) Wa ma nyɛ maa kase bɔ nɛ waa kɛ nihi maa hi si ha ngɛ bɔ nɛ Yesu kɛ e kaseli ɔmɛ hi si ha a mi. Lɛ ji nɔmlɔ ngua pe kulaa nɛ hi si ngɛ je ɔ mi. Se kɛ̃ ɔ, ‘e he jɔ, nɛ e baa e he si kɛ jeɔ e tsui mi.’ (Mat. 11:28-30) Ke e ngɛ ní tsɔɔe ɔ, e ngɔɔ munyuhi kɛ nɔ́ he tomi níhi nɛ a sisi numi yi kɛ tsuɔ ní, nɛ lɔ ɔ taa nihi nɛ a baa a he si ɔ a tsui he.​—Luka 10:21. w21.07 23 ¶11-12

Moo sɛ hlami nɛ o kɛ nyɛmimɛ nɛ a wa ngɛ jeha mi ɔ nɛ sɛɛ ní. Eko ɔ, a hɛngmɛ be nɔ́ hyɛe kpakpa ko, a nyɛɛmi maa hi blɛuu, nɛ a munyu tumi hu he be wae, se kɛ̃ ɔ, a suɔ nɛ a pee babauu, nɛ a ngɛ “biɛ kpakpa” ngɛ Yehowa hɛ mi. (Fiɛlɔ 7:1) Mo kai nɔ́ he je nɛ a he jua wa ha Yehowa a. Yaa nɔ nɛ o je bu kpo kɛ ha mɛ. Moo pee kaa Elisha. E mwɔ e yi mi kpɔ kaa e be Eliya he jee benɛ e piɛ bɔɔ nɛ a mi ma gba a. Elisha de si etɛ ke: “I be o he jee.” (2 Ma. 2:2, 4, 6) Wa ma nyɛ maa tsɔɔ kaa wa bua jɔ nyɛmimɛ nɛ a wa ngɛ jeha mi ɔ a he ke wa je mi mi jɔmi mi kɛ bi mɛ sanehi. (Abɛ 1:5; 20:5; 1 Tim. 5:1, 2) Mo bi mɛ sane komɛ kaa kikɛ: “Benɛ o ji niheyo aloo yiheyo ɔ, mɛni ha nɛ o ná nɔ mi mami kaa o na anɔkuale ɔ?” “Mɛni blɔ nɔ nɛ níhi a si kpamihi nɛ o ná a ha nɛ o hɛ kɛ su Yehowa he?” “Mɛni lɛ ye bua mo nɛ o ngɛ bua jɔmi ngɛ Yehowa sɔmɔmi mi.” (1 Tim. 6:6-8) Lɔ ɔ se ɔ, moo bu mɛ tue benɛ a ngɛ mo a níhi a si kpamihi dee ɔ. w21.09 5 ¶14; 7 ¶15

Ke o pee nɔ́ fɛɛ nɔ́ nɛ o ma nyɛ kɛ ye fami nɛ ji kaa waa fiɛɛ nɛ waa pee nihi kaseli ɔ nɔ ɔ, o ngɛ tsɔɔe kaa o suɔ Mawu. (1 Yoh. 5:3) Mo susu he nɛ o hyɛ: Suɔmi nɛ o ngɛ kɛ ha Yehowa a lɛ ha nɛ o fiɛɛɔ kɛ haa nihi ngɛ wehi a mi ɔ nɛ. Anɛ jã peemi ngɛ gbɔjɔɔ lo? Eko ɔ, e be gbɔjɔɔ. Kekleekle be nɛ o fiɛɛ ha nɔ ko ngɛ e we mi ɔ, anɛ o tsui po lo? Atsinyɛ jemi ko be he kaa o tsui po! Se o le kaa ní tsumi nɛ ɔ nɛ Yesu suɔ nɛ o tsu, nɛ o ye jamɛ a fami ɔ nɔ. Nɛ eko ɔ, nɛ be pue mi nɛ ɔ, e he wɛ ha mo kaa o kɛ o he maa wo fiɛɛmi ní tsumi ɔ mi. Nɛ Baiblo mi ní kasemi peemi hu nɛɛ? Anɛ lɔ ɔ hu haa nɛ o tsui poɔ lo? Eko ɔ. Se ke o sɔle kɛ bi Yehowa kaa e ye bua mo nɛ o ye o gbeye yemi ɔ nɔ, nɛ́ e ha nɛ o ná kã nɛ o kɛ pee Baiblo mi ní kasemi ɔ, Yehowa ma nyɛ maa ye bua mo konɛ o nyɛ nɛ o pee nihi kaseli. w21.07 3 ¶7

Blema a, nyɔmtsɛmɛ ngɔɔ níhi kɛ kadiɔ a nyɔguɛhi konɛ a kɛ to a he so. Jã nɔuu kɛ̃ nɛ nɔ yeli ɔmɛ maa hyɛ blɔ kaa nihi nɛ a ngɛ mwɔnɛ ɔ tsuo maa ngɔ a ní peepee kɛ tsɔɔ nɔ nɛ a fĩ e se. A maa suɔ nɛ nihi nɛ a ngɔ a susumi kɛ a ní peepee kɛ tsɔɔ kaa a fĩ ma kudɔmi kuu ko se. Anɛ wa maa kplɛɛ nɛ a kadi wɔ nɛ wa fĩ je nɛ ɔ nɔ yeli ɔmɛ a se lo? Nihi nɛ a be hae nɛ a kadi mɛ ɔ kɛ si fɔfɔɛhi nɛ a mi wa maa kpe, nɛ e maa pee oslaa kɛ ha mɛ hulɔ. Kpo Jemi womi ɔ de ke: “Nɔ ko be nyɛe ma he nɔ́ ko aloo e jua ní, ja nɔ nɛ kadimi ɔ . . . ngɛ e he.” (Kpoj. 13:17) Se Mawu we bi le nɔ́ nɛ Mawu maa pee nihi nɛ a kadi mɛ ɔ, kaa bɔ nɛ a tsɔɔ ngɛ Kpo Jemi 14:9, 10. Akɛnɛ Mawu we bi be hae nɛ a kadi mɛ he je ɔ, e maa pee kaa nɔ́ nɛ a ngma ngɛ a kɔni he ke, ‘Yehowa nɔ́’ ji mi. (Yes. 44:5) Amlɔ nɛ ɔ ji be nɛ e sa nɛ waa ya nɔ nɛ waa ye Yehowa anɔkuale wawɛɛ. Ke wa pee jã a, Yehowa bua maa jɔ, nɛ e maa kplɛɛ wa nɔ kaa e níhi! w21.09 18 ¶15-16

Bɔ nɛ pee nɛ waa ye manye ngɛ fiɛɛmi ní tsumi ɔ mi ɔ, e sa nɛ wa ha nɛ ni kpahi nɛ a ye bua wɔ. Bɔfo Paulo tsɔɔ Timoteo bɔ nɛ e fiɛɛ nɛ e tsɔɔ ní ha, nɛ e wo lɛ he wami kaa lɛ hu e ye bua ni kpahi jã nɔuu. (1 Kor. 4:17) Kaa bɔ nɛ Timoteo pee ɔ, wɔ hu wa ma nyɛ maa kase ní kɛ je nihi nɛ a ngɛ níhi a si kpami ngɛ asafo ɔ mi ɔ a ngɔ. Jehanɛ hu ɔ, e sa nɛ waa sɔle kɛ bi Yehowa yemi kɛ buami. Be fɛɛ be nɛ o maa ya fiɛɛmi ɔ, mo bi Yehowa ga womi. Wa be nyɛe maa ye manye kɔkɔɔkɔ ke Yehowa kɛ e mumi klɔuklɔu ɔ yi bua wɔ. (La 127:1; Luka 11:13) Ke o ngɛ sɔlee kɛ ngɛ Yehowa hae ɔ, moo tu ní pɔtɛɛ komɛ a he munyu. Kaa nɔ hyɛmi nɔ́ ɔ, mo bi lɛ nɛ e tsɔɔ mo blɔ kɛ ya nihi nɛ a ngɛ su kpakpa nɛ a suɔ nɛ a bu tue ɔ a ngɔ. E sa nɛ wa he be kɛ pee dɛ he ní kasemi hulɔ. Mawu Munyu ɔ de ke: “Nyɛ nitsɛmɛ nyɛ ná Mawu suɔmi nya ní nɛ e ye mluku, nɛ e hi, nɛ e sa e hɛ mi ɔ nɔ mi mami.” (Rom. 12:2) Ke wa yaa nɔ nɛ wa kaseɔ Mawu he anɔkuale ɔ, lɔ ɔ ma ha nɛ waa kɛ nɔ́ mi mami maa tu e he munyu kɛ tsɔɔ ni kpahi, nɛ a maa na kaa wa he nɔ́ nɛ wa ngɛ mɛ dee ɔ ye. w21.05 18 ¶14-16

Eko ɔ, o kɛ nɔ ko ngɛ Baiblo ɔ kasee nɛ o bɔɔ mɔde kaa o maa pee tsɔɔlɔ kpakpa nɛ o sɔleɔ ha lɛ. Se e kɛ nɔ́ nɛ e ngɛ kasee ɔ tsu we ní nɛ e he ba hia nɛ o kɛ lɛ nɛ kpa ní ɔ kasemi. Aloo mo nitsɛ o kɛ nɔ ko kase we ní nɛ e ya e hɛ mi kɛ su baptisimi he. Anɛ e sa nɛ enɛ ɔ nɛ ha nɛ o he nile nɛ bu mo fɔ nɛ o susu kaa Yehowa jɔɔ we o fiɛɛmi ní tsumi ɔ nɔ lo? Mo kadi nɔ́ nɛ Yehowa daa nɔ kɛ tsɔɔ kaa wa fiɛɛmi ní tsumi ɔ ye manye. Yehowa naa bɔ nɛ waa bɔɔ mɔde ha a nɛ e hyɛɛ konɛ wa kɔni mi nɛ ko jɔ̃. Ke nihi bui sɛ gbi ɔ tue, se wa yaa nɔ nɛ waa kɛ kã kɛ suɔmi tsuɔ fiɛɛmi ní tsumi ɔ, Yehowa naa wɔ kaa wa ye manye. Paulo de ke: “Mawu ɔ, pi nɔ nɛ e dɛ ji lɛ nɛ e hɛ maa je nyɛ ní tsumi kɛ suɔmi nɛ nyɛ je kpo ngɛ e biɛ ɔ he kɛ gu sɔmɔmi nɛ nyɛ ngɛ ni klɔuklɔu ɔmɛ sɔmɔe nɛ nyɛ ya nɔ nɛ nyɛ ngɛ mɛ sɔmɔe ɔ nɔ.” (Heb. 6:10) Yehowa kaiɔ mɔde nɛ wa bɔɔ kɛ suɔmi nɛ wa jeɔ kpo ɔ ke Baiblo kaselɔ ko yɛ e hɛ mi po. Enɛ ɔ he ɔ, o ma nyɛ maa ngɔ nɔ́ nɛ Paulo de ngɛ mwɔnɛ ɔ ngmami ɔ mi ɔ kɛ tsu ní. w21.10 25 ¶4-6

Bɔ nɛ Yesu kɛ e kaseli ɔmɛ hi si ha a tsɔɔ kaa e ngɛ suɔmi, nɛ e mi mi jɔ. E le kaa e slo a kpɛti nɔ fɛɛ nɔ si fɔfɔɛ kɛ e nyɛmi. Enɛ ɔ he ɔ, mɛ tsuo a be nyɛe ma tsu blɔ nya ní tsumi kake; aloo a be nyɛe ma tsu fiɛɛmi ní tsumi ɔ fiee. Se e bua jɔ kaa a ti nɔ fɛɛ nɔ pee nɔ́ nɛ e ma nyɛ. Yesu nɔ́ he tomi nɔ́ nɛ kɔɔ talɛnt ɔ he ɔ haa nɛ wa leɔ enɛ ɔ. Ngɛ jamɛ a nɔ́ he tomi nɔ́ ɔ mi ɔ, nyɔmtsɛ ɔ ha nyɔguɛ ɔmɛ ní tsumi ngɛ “a ti nɔ tsuaa nɔ nyɛmi nya.” Ngɛ nyɔguɛ enyɔ ɔmɛ nɛ a kɛ a sika a tsu ní saminya a blɔ fa mi ɔ, nɔ kake ná sika fuu pe nɔ kake. Se a nyɔmtsɛ ɔ ngɔ munyu kake kɛ je mɛ ni enyɔ ɔmɛ tsuo a yi: “O bɔ mɔde, nyɔguɛ kpakpa nɛ e yeɔ anɔkuale!” (Mat. 25:14-23) Yesu jeɔ suɔmi kɛ mi mi jɔmi kpo kɛ tsɔɔ wɔ be fɛɛ be. E le kaa e slo wa ti nɔ fɛɛ nɔ nyɛmi kɛ e si fɔfɔɛ, nɛ e bua jɔɔ ke wa pee nɔ́ fɛɛ nɔ́ nɛ wa ma nyɛ ngɛ Yehowa sɔmɔmi mi. E sa nɛ waa kɛ ni kpahi nɛ hi si kaa bɔ nɛ Yesu pee ɔ. w21.07 23 ¶12-14

Tsa pi be fɛɛ be nɛ Matsɛ David jeɔ mɔbɔ nami kpo. Kaa nɔ hyɛmi nɔ́ ɔ, be ko benɛ Nabal nɛ e peeɔ e ní basabasa a tu munyu kɛ si David nɛ e kua e kɛ e nyumu ɔmɛ niye ní hami ɔ, David muklii mi fu nɛ e mwɔ e yi mi kpɔ kaa e maa gbe Nabal kɛ nyumuhi tsuo nɛ a ngɛ e we ɔ mi ɔ. Se Nabal yo Abigail nɛ e mi mi jɔ nɛ e toɔ e tsui si ɔ he sɔ nɛ e kɛ niye ní ba ha David. Enɛ ɔ he ɔ, David gbi Nabal kɛ nyumuhi nɛ a ngɛ e we ɔ mi ɔ. (1 Sam. 25:9-22, 32-35) Mo kadi kaa benɛ David mi mi fu ɔ, e bu Nabal kɛ nyumuhi tsuo nɛ a ngɛ e we ɔ mi ɔ gbenɔ fɔ. Pee se ɔ, e bu nyumu nɛ Natan tu e he munyu ngɛ e nɔ́ he tomi nɔ́ ɔ mi ɔ hu gbenɔ fɔ. Se wa le David kaa nɔ ko nɛ e mi mi jɔ. Lɛɛ mɛni he je mɔ nɛ e kojo julɔ ɔ nɛ e nɛ lɛ mɔbɔ ɔ? Mo susu si fɔfɔɛ mi nɛ David ngɛ jamɛ a be ɔ he nɛ o hyɛ. Jamɛ a be ɔ, David he nile ngɛ lɛ fɔ bue. Ke nɔ ko kojoɔ ni kpahi nɛ mɔbɔ nami ko be mi ɔ, e tsɔɔ kaa huɛ bɔmi nɛ ngɛ e kɛ Yehowa a kpɛti ɔ ngɛ puɛe. w21.10 12 ¶17-18; 13 ¶20

Mwɔnɛ ɔ ngmami ɔ ha nɛ wa na kaa Yehowa ji nɔ nɛ pee nɔ hyɛmi nɔ́ nɛ pe kulaa ngɛ klɔuklɔu peemi blɔ fa mi nɛ wa ma nyɛ maa kase lɛ. E sa nɛ waa pee klɔuklɔu ngɛ wa je mi bami tsuo mi. Akɛnɛ wa yi mluku he je ɔ, eko ɔ, wa ma susu kaa wa be nyɛe maa pee jã. Bɔfo Petro nitsɛ tɔ̃ tɔmihi fuu, se e nɔ hyɛmi nɔ́ ɔ ha nɛ wa na kaa wa ma nyɛ maa pee klɔuklɔu. Ke a ke nɔ ko ngɛ klɔuklɔu ɔ, nihi fuu susu kaa e ji nɔ ko nɛ e muɛ, nɛ e woɔ sɔlemi nɛ e yaa a tadehi, nɛ e kɛ nihi fiɛ we. Se tsa pi jã nɛ nihi nɛ a ngɛ klɔuklɔu ɔ peeɔ a ní. Baiblo ɔ kale Yehowa nɛ e ngɛ klɔuklɔu ɔ kaa e ji “bua jɔmi Mawu.” (1 Tim. 1:11) Nihi nɛ a sɔmɔɔ lɛ ɔ ngɛ ‘bua jɔmi.’ (La 144:15) Yesu tu munyu kɛ si nihi nɛ a woɔ tadehi nɛ ngɛ slɔɔto nɛ a peeɔ ní kpakpahi bɔ nɛ pee nɛ nihi nɛ a na mɛ ɔ. (Mat. 6:1; Maak. 12:38) Nɔ́ nɛ Baiblo ɔ de ɔ ha nɛ anɔkuale Kristofohi le nɔ́ nɛ klɔuklɔu peemi tsɔɔ. Wa le kaa Mawu suɔ wɔ, nɛ e be wɔ dee ke waa pee nɔ́ ko nɛ wa be nyɛe maa pee. w21.12 2 ¶1, 3

Mawu ha wɔ nike níhi fuu. Nike ní nɛ ɔmɛ a kpɛti kake nɛ he jua wa wawɛɛ ji nyɛmi nɛ wa ngɛ nɛ waa kɛ ma ja lɛ ɔ. Wa tsɔɔ Yehowa kaa wa suɔ lɛ kɛ gu e ‘kita amɛ a nɔ nɛ wa yeɔ’ ɔ nɔ. (1 Yoh. 5:3) Wa Tsɛ ɔ gu e Bi Yesu nɔ kɛ fã wɔ kaa waa pee nihi kaseli nɛ a ha nɛ a baptisi mɛ. (Mat. 28:19) Jehanɛ hu ɔ, e fã wɔ kaa waa suɔ wa sibi. (Yoh. 13:35) Yehowa maa ngɔ nihi nɛ a buɔ lɛ tue ɔ kɛ piɛɛ e weku mi bimɛ nɛ a ngɛ je kɛ wɛ ɔ a he. (La 15:1, 2) Moo suɔ ni kpahi. Suɔmi ji Yehowa su nɛ he hia pe kulaa. (1 Yoh. 4:8) Yehowa je suɔmi kpo kɛ tsɔɔ wɔ blema lokoo loko wa ba le lɛ po. (1 Yoh. 4:9, 10) Ke wa suɔ nihi ɔ, lɔ ɔ tsɔɔ kaa wa ngɛ lɛ kasee. (Efe. 5:1) Blɔ kake nɛ hi wawɛɛ nɛ wa ma nyɛ maa gu nɔ kɛ tsɔɔ kaa wa suɔ nihi ji kaa wa maa ye bua mɛ nɛ a ba kase Yehowa he ní amlɔ nɛ ɔ nɛ be ngɛ ɔ. (Mat. 9:36-38) Ke wa pee jã a, lɔ ɔ tsɔɔ kaa wa ha mɛ he blɔ kaa mɛ hu a ma nyɛ ma ba pee Mawu weku ɔ mi bimɛ. w21.08 5-6 ¶13-14

Akɛnɛ Yesu suɔ Yehowa wawɛɛ he je ɔ, e ngɔ níhi kɛ sã afɔle kɛ ha e Tsɛ ɔ nɛ e ngɔ e wami kɛ sã afɔle ngɛ wa he. (Yoh. 14:31) Benɛ Yesu ngɛ zugba a nɔ ɔ, e tsɔɔ kaa e suɔ nimli kɛ gu bɔ nɛ e ba e je mi ha a nɔ. Daa ligbi ɔ, e mi mi sãa lɛ ngɛ nihi a he nɛ e jeɔ suɔmi kpo kɛ tsɔɔ mɛ, nɛ ke nihi te si kɛ wo lɛ po ɔ, e jeɔ su nɛ ɔmɛ kpo. Blɔ nɛ hi nɛ e gu nɔ kɛ je suɔmi kpo kɛ tsɔɔ nihi ji kaa e tsɔɔ mɛ Mawu Matsɛ Yemi ɔ he ní. (Luka 4:43, 44) Jehanɛ hu ɔ, Yesu ngɔ níhi kɛ sã afɔle kɛ tsɔɔ kaa e suɔ Mawu kɛ nimli. E pee jã kɛ gu e he nɛ e kɛ ha nɛ e ba gbo ngɛ yayami peeli a dɛ mi ɔ nɔ. Enɛ ɔ bli blɔ kɛ ha wɔ tsuo konɛ wa ná neneene wami. Wa jɔɔ wa he nɔ kɛ ha Yehowa nɛ wa ha nɛ a baptisi wɔ ejakaa wa suɔ wa hiɔwe Tsɛ ɔ. Lɔ ɔ he ɔ, kaa bɔ nɛ Yesu pee ɔ, e sa nɛ waa tsɔɔ kaa wa suɔ Yehowa kɛ gu bɔ nɛ waa kɛ nihi hiɔ si ha a nɔ. Bɔfo Yohane ngma ke: “Nɔ nɛ e sume e nyɛmi nɛ e naa lɛ ɔ, e be nyɛe maa suɔ Mawu, nɔ nɛ e nɛ lɛ ɔ.”​—1 Yoh. 4:20. w22.03 10 ¶8-9

E ngɛ mi kaa wa bua jɔ sɔlemi kɛ Baiblo kasemi he, se pi be fɛɛ be nɛ jã peemi ngɛ gbɔjɔɔ. Wa be deka kulaa, nɛ enɛ ɔ ha nɛ e he wa kaa wa ma ná be kɛ tsu Yehowa sɔmɔmi mi níhi a he ní. Wa ní tsumi, wa weku blɔ nya ní tsumi kɛ ní kpahi nɛ a he hia nɛ e sa nɛ waa pee ɔ ma nyɛ maa ngɔ wa be ɔ tsuo nɛ wa ma nyɛ maa nu he kaa wa be deka nɛ waa kɛ maa sɔle, waa kɛ maa kase ní loo wa pue wa yi mi tɛ. Nɔ́ kpa ko ngɛ nɛ lɔ ɔ hu ma nyɛ maa ngɔ wa be. Ní komɛ ngɛ nɛ tɔmi be he kaa wa maa pee, se ke wa hyɛ we nɛ hi ɔ jamɛ a ní ɔmɛ ma nyɛ maa ngɔ wa be ɔ tsuo nɛ wa be deka náe kɛ pee níhi nɛ ma ha nɛ waa hɛ kɛ su Yehowa he. Kaa nɔ hyɛmi nɔ́ ɔ, mo susu hɛja jemi he nɛ o hyɛ. E hi kaa wa ma ná be kɛ je wa hɛja be komɛ. Eko ɔ, tɔmi ko be hɛja jemi nɛ wa hla a he, se ke waa kɛ be fuu je wa hɛja a, e be hae nɛ wa ná be fuu kɛ tsu Yehowa sɔmɔmi mi níhi a he ní. E sa nɛ wa kai kaa pi hɛja jemi ji nɔ́ nɛ he hia pe kulaa ngɛ si himi mi.​—Abɛ 25:27; 1 Tim. 4:8. w22.01 26 ¶2-3

Benɛ Yehowa de Israel bi ɔmɛ kaa a suɔ a nyɛmi nɔmlɔ ɔ, e de we ke a suɔ nihi nɛ a kɛ mɛ hɛɛ he womi nɔ su kake aloo a kɛ mɛ je ma kake mi ɔ pɛ. E de mɛ hu ke a suɔ nibwɔhi nɛ a ngɛ a kpɛti ɔ. Jamɛ a munyu ɔ je kpo heii ngɛ 3 Mose 19:33, 34. Yehowa suɔ nɛ a bu nubwɔ kaa a “ma a mi” no, nɛ a ‘suɔ lɛ’ kaa bɔ nɛ a suɔ mɛ nitsɛmɛ a he ɔ. Kaa nɔ hyɛmi nɔ́ ɔ, Yehowa de Israel bi ɔmɛ kaa a ha nɛ nibwɔhi kɛ ohiatsɛmɛ nɛ a kukuɔ ní ngɛ a ngmɔ ɔmɛ a mi. (3 Mose 19:9, 10) Mwɔnɛ ɔ, e sa nɛ Kristofohi nɛ a ngɔ sisi tomi mlaa nɛ kɔɔ nibwɔhi nɛ a maa suɔ mɛ ɔ he ɔ kɛ tsu ní. (Luka 10:30-37) Ngɛ mɛni blɔ nɔ? Nihi ayɔhi abɔ hia kɛ je a ma mi kɛ ya ma kpahi a nɔ, nɛ eko ɔ, a ti ni komɛ ngɛ he nɛ o ngɛ ɔ. E sa nɛ wa je bumi kpo kɛ tsɔɔ nyumuhi, yihi kɛ jokuɛwi nɛ a ngɛ si fɔfɔɛ kaa jã mi ɔ. w21.12 12 ¶16

Ke waa kɛ Yehowa blɔ tsɔɔmi tsu ní amlɔ nɛ ɔ nɛ waa kɛ wa hɛ fɔ e nɔ ɔ, e ma ha nɛ wa ná nɔ mi mami kaa Yehowa ma nyɛ ma kpɔ̃ wɔ hwɔɔ se. Ja wa ná hemi kɛ yemi ngɛ Yehowa mi loko wa ma nyɛ ma bi blɔ ngɛ wa nitsumitsɛmɛ a ngɔ konɛ wa nyɛ nɛ waa ya kpɔ mi kpehi kɛ kpokpa nɔ kpehi, aloo wa bi blɔ ngɛ ní tsumi mi konɛ wa ná be kɛ ya asafo mi kpehi tsuo kɛ fiɛɛmi. Se ngɔɔ lɛ kaa wa nitsumitsɛ ɔ kplɛɛ we wa ní bimi ɔ nɔ nɛ wa ní tsumi je wa dɛ. Anɛ wa ngɛ hemi kɛ yemi kaa Yehowa be wɔ kuae gblegbleegble, nɛ e ma ha wɔ nihi nɛ wa hia a be fɛɛ be lo? (Heb. 13:5) Nihi nɛ a ngɛ be tsuo sɔmɔmi ní tsumi ɔ mi ɔ a kpɛti nihi fuu ma nyɛ maa ye odase kaa Yehowa ye bua mɛ benɛ a hia lɛ wawɛɛ ɔ. Yehowa ji anɔkualetsɛ. Ke Yehowa piɛɛ wa he ɔ, e sɛ nɛ waa ye nɔ́ nɛ maa ba hwɔɔ se gbeye. Wa Mawu ɔ be wɔ kuae kɔkɔɔkɔ ke wa ya nɔ nɛ waa kɛ e Matsɛ Yemi ɔ ye kekle blɔ he ngɛ wa si himi mi. w22.01 7 ¶16-17

Mɛni si fɔfɔɛhi a mi nɛ hemi kɛ yemi nɛ wa ngɛ ngɛ asafo mi nikɔtɔma amɛ a mi ɔ ma nyɛ maa pee ka kɛ ha wɔ? Ngɔɔ lɛ kaa nɔ ko nɛ a fiee lɛ kɛ je asafo ɔ mi ɔ ji wa huɛ nɛ nyu bi ngɛ waa kɛ lɛ wa kpɛti. Eko ɔ, wa ma susu kaa asafo mi nikɔtɔma amɛ hla we anɔkuale nɛ ngɛ sane ɔ mi ɔ tsuo. Aloo eko ɔ wa ma bi ke, anɛ bɔ nɛ a ye sane ɔ ha a maa sa Yehowa hɛ mi lo? Mɛni ma nyɛ maa ye bua wɔ konɛ wa nyɛ nɛ waa ya nɔ nɛ waa pee wa ní ngɛ blɔ nɛ da nɔ ke asafo mi nikɔtɔma amɛ mwɔ yi mi kpɔ ko? E sa nɛ wa kai kaa nɔ fieemi ji Yehowa blɔ nya tomi. E yeɔ bua asafo ɔ, nɛ e ma nyɛ maa ye bua yayami peelɔ ɔ hulɔ. Ke yayami peelɔ nɛ tsakee we e tsui ɔ ya nɔ nɛ e hi asafo ɔ mi ɔ, e ma nyɛ ma ná ni kpahi a nɔ he wami ngɛ blɔ yaya nɔ. (Gal. 5:9) Jehanɛ hu ɔ, eko ɔ, e be lee kaa hɛdɔ ngɛ nɔ́ nɛ e pee ɔ he. Nɛ eko ɔ, e be lee nɔ́ he je nɛ e sa nɛ e tsake e susumi kɛ e ní peepee konɛ Yehowa nɛ kplɛɛ e nɔ ekohu. (Fiɛlɔ 8:11) Wa ma nyɛ ma ná nɔ mi mami kaa asafo mi nikɔtɔma amɛ kɛ hɛdɔ susuɔ ní tsumi nɛ a kɛ wo a dɛ ɔ he wawɛɛ ke a ngɛ he susue kaa a fiee nɔ ko kɛ je asafo ɔ mi loo a ko fiee lɛ. w22.02 5-6 ¶13-14

Ke sisije ɔ nɔ ko sume nɛ e kɛ Baiblo mi ga womi ma tsu ní ɔ, e biɔ nɛ a to tsui si nɛ a je mi mi jɔmi kpo kɛ ha lɛ. Ke asafo mi nɔkɔtɔma ko wo nyɛminyumu loo nyɛmiyo ko ga nɛ e kɛ tsu we ní ɔ, e sɛ nɛ asafo mi nɔkɔtɔma a mi mi nɛ fu. Ke asafo mi nɔkɔtɔma a ngɛ sɔlee ngɛ e dɛ he ɔ, e ma nyɛ ma bi Yehowa konɛ e ye bua nɔ nɛ a ngɛ lɛ ga woe ɔ nɛ e nu yi mi tomi he je nɛ a ngɛ lɛ ga woe ɔ sisi nɛ e kɛ tsu ní. Eko ɔ, nɔ nɛ a wo lɛ ga a maa hia be nɛ e kɛ susu ga womi ɔ he. Ke asafo mi nɔkɔtɔma a to e tsui si nɛ e je mi mi jɔmi mi kɛ tu munyu ɔ, e he be wae ha nɔ nɛ e ngɛ lɛ ga woe ɔ kaa e kɛ ma tsu ní. Ngɛ anɔkuale mi ɔ, be fɛɛ be ɔ, e sa nɛ a kɛ ga womi ɔ nɛ da Mawu Munyu ɔ nɔ. Pi kaa wa suɔ nɛ wa ga womi nɛ nu tso kɛkɛ, se mohu wa suɔ nɛ ga womi ɔ nɛ ha nɛ nihi nɛ a ‘ná bua jɔmi.’​—Abɛ 27:9. w22.02 18 ¶17; 19 ¶19

Ke wa sɔle kaa Yehowa nɛ e ye bua wɔ nɛ wa nyɛ waa da ka ko nya aloo waa ye wa gbɔjɔmi ko nɔ ɔ, eko ɔ, wa maa nu he kaa Yehowa ha we wa sɔlemi ɔ heto ngɛ be nɛ wa ngɛ blɔ hyɛe ɔ mi. Mɛni he je nɛ Yehowa ha we wa sɔlemihi tsuo a heto amlɔ nɔuu ɔ? Ke wa je wa tsui mi kɛ sɔle ha lɛ ɔ, e naa kaa wa ngɛ e mi hemi kɛ yemi. (Heb. 11:6) Ke wa sɔle ha Yehowa kaa e ye bua wɔ nɛ waa pee e suɔmi nya ní ɔ, lɛ hu e suɔ nɛ e na kaa wa ngɛ mɔde bɔe kaa wa ma tsu wa sɔlemi ɔ nya ní. (1 Yoh. 3:22) Enɛ ɔ he ɔ, ke wa sɔle ha Yehowa kaa e ye bua wɔ nɛ waa ye su yaya ko loo wa gbɔjɔmi ko nɔ ɔ, e he maa hia nɛ waa to wa tsui si nɛ waa pee nɔ́ fɛɛ nɔ́ nɛ wa ma nyɛ kɛ pee tsakemi. Yesu ha nɛ wa na kaa tsa pi be fɛɛ be nɛ eko ɔ, Yehowa ma ha wa sɔlemihi a heto amlɔ nɔuu. E wo wɔ he wami ke: “Nyɛɛ ya nɔ nɛ nyɛɛ hi bie, nɛ a ma ha nyɛ; nyɛɛ ya nɔ nɛ nyɛɛ hi hlae, nɛ nyɛ maa na; nyɛɛ ya nɔ nɛ nyɛɛ hi sie, nɛ a ma bli ha nyɛ; ejakaa nɔ fɛɛ nɔ nɛ e biɔ ɔ, e nine suɔ nɔ, nɛ nɔ fɛɛ nɔ nɛ e hlaa a, e naa, nɛ nɔ fɛɛ nɔ nɛ e siɔ ɔ, a ma bli ha lɛ.”​—Mat. 7:7, 8. w21.08 8 ¶1; 10 ¶9-10

Loko o ma nyɛ maa fia o hemi kɛ yemi ngɛ Bɔlɔ ɔ mi ɔ kɛ ma si ɔ, e sa nɛ o ya nɔ nɛ o kase Mawu Munyu ɔ. (Yosh. 1:8) Jehanɛ hu ɔ, mo susu bɔ nɛ Baiblo ɔ mi gbamihi ba mi ha, kɛ bɔ nɛ Baiblo ngmali slɔɔto ɔmɛ kɛ a he kpa gbi ha a he. Jã nɛ o maa pee ɔ ma ha nɛ o ná hemi kɛ yemi nɛ mi wa kaa Bɔlɔ ko nɛ ngɛ suɔmi nɛ le ní ɔ lɛ bɔ wɔ, nɛ lɛ nɛ e kɛ e mumi ɔ ye bua nihi nɛ a ngma Baiblo ɔ. (2 Tim. 3:14; 2 Pet. 1:21) Ke o ngɛ Mawu Munyu ɔ kasee ɔ, mo susu bɔ nɛ e mi ga womi ɔmɛ yeɔ bua nɔ ha a he. Kaa nɔ hyɛmi nɔ́ ɔ, Baiblo ɔ gba kɛ fɔ si blema lokoo kaa sika suɔmi yeɔ nɔ awi, nɛ e ngɔɔ “piimi babauu” kɛ baa. (1 Tim. 6:9, 10; Abɛ 28:20; Mat. 6:24) Enɛ ɔ he ɔ, kɔkɔ bɔmi nɛ Baiblo ɔ kɛ ha ngɛ sika suɔmi he ɔ he hia wawɛɛ! Anɛ Baiblo mi ga womi kpahi hu ngɛ nɛ ye bua mo wawɛɛ lo? Ke wa susu ga womi kpakpahi nɛ Baiblo ɔ kɛ haa wɔ ɔ a he wawɛɛ ɔ, wa maa na kaa wa Bɔlɔ ɔ nɛ ngɛ suɔmi ɔ le nɔ́ nɛ hi kɛ ha wɔ, nɛ be fɛɛ be ɔ, wa ma hla blɔ tsɔɔmi ngɛ e ngɔ. (Yak. 1:5) Jã nɛ wa maa pee ɔ ma ha nɛ wa bua maa jɔ wawɛɛ ngɛ si himi mi.​—Yes. 48:17, 18. w21.08 17-18 ¶12-13

Ke o ngɛ wae ngɛ jeha mi ɔ, mo ná nɔ mi mami kaa Yehowa kaiɔ ní nɛ o tsu be ko nɛ be ɔ. O kɛ kã tsu fiɛɛmi ní tsumi ɔ. O fĩ si ngɛ kahi nɛ ha nɛ o ye aywilɛho wawɛɛ ɔ po a mi. O ye Baiblo mi mlaa amɛ a nɔ, nɛ o fĩ Yehowa dami tɛ popoe ɔmɛ hu a se. O kɛ anɔkuale yemi tsu ní tsumihi nɛ a kɛ wo o dɛ ngɛ Yehowa asafo ɔ mi ɔ a he ní, nɛ o tsɔse ni kpahi. O bɔ mɔde kaa o maa kplɛɛ tsakemihi nɛ Yehowa asafo ɔ pee ɔ nɔ. O fĩ nihi nɛ a ngɔ a he kɛ wo be tsuo sɔmɔmi ní tsumi ɔ mi ɔ a se, nɛ o wo mɛ he wami. Yehowa Mawu suɔ mo wawɛɛ akɛnɛ o yeɔ anɔkuale ɔ he je. Nɛ e wo si kaa ‘nihi nɛ yeɔ lɛ anɔkuale ɔ, e be mɛ kuae’! (La 37:28) E wo si ke: ‘Ma hyɛ nyɛ nɔ kɛ ya su be nɛ nyɛ maa wa nɛ nyɛ maa puɛ mua.’ (Yes. 46:4) Enɛ ɔ he ɔ, ko susu kaa akɛnɛ o wa ngɛ jeha mi he je ɔ, o he hia we ngɛ Yehowa asafo ɔ mi hu. O he jua wa wawɛɛ! w21.09 3 ¶4

Yehowa naa nɔ mɔbɔ ejakaa e juɛmi mi kuɔ pe nɔ fɛɛ nɔ. Baiblo ɔ de ke, “juɛmi ɔ nɛ je hiɔwe ɔ . . . e hyi tɔ kɛ mɔbɔ nami kɛ yiblii kpakpahi.” (Yak. 3:17) Kaa bɔ nɛ tsɛ nɛ ngɛ suɔmi ɔ peeɔ ɔ, Yehowa le kaa ke e na e sɔmɔli mɔbɔ ɔ, a ma ná he se. (Yes. 49:15) E ngɛ mi kaa wa yi mluku mohu lɛɛ, se Yehowa mɔbɔ nami ɔ ha nɛ wa ngɛ hɛ nɔ kami. Akɛnɛ Yehowa juɛmi mi kuɔ wawɛɛ he je ɔ, e naa mɔbɔ be fɛɛ be ke e he ba hia nɛ e pee jã. Se Yehowa le be nɛ e sɛ kaa e na nɔ mɔbɔ. Akɛnɛ Yehowa le ní he je ɔ, ke e he ba hia nɛ e gbla yayami peelɔ ko tue kɛ tsɔɔ kaa e kplɛɛ we nɔ́ nɛ nɔ ɔ pee ɔ nɔ ɔ, e peeɔ jã. Ngɔɔ lɛ kaa Mawu sɔmɔlɔ ko hla kaa e maa ba e je mi ngɛ blɔ yaya nɔ. Mɛni e sa nɛ waa pee? Mumi ɔ wo Paulo he wami nɛ e ngma ke, ‘nyɛɛ kɛ lɛ nɛ kpa bɔmi.’ (1 Kor. 5:11) A fieeɔ yayami peeli nɛ a tsakee we a tsui ɔ kɛ jeɔ asafo ɔ mi. A peeɔ jã konɛ a kɛ po wa nyɛmimɛ anɔkualetsɛmɛ a he piɛ, nɛ a kɛ tsɔɔ kaa Yehowa blɔ ɔmɛ ngɛ klɔuklɔu. w21.10 9-10 ¶7-8

Ke wa ha yemi kɛ buami kɛ fĩ Matsɛ Yemi ní tsumi ɔ se ɔ, lɔ ɔ tsɔɔ kaa wa ngɛ Yehowa jae. Ke Israel bi ɔmɛ yaa Yehowa hɛ mi ɔ, e sɛ nɛ a ya kɛ a dɛ gu. (5 Mose 16:16) E sa nɛ a ngɔ nike ní kɛ ha ngɛ nɔ fɛɛ nɔ nyɛmi nya. Ke a pee jã a, lɔ ɔ tsɔɔ kaa a hɛ sa nɔ́ fɛɛ nɔ́ nɛ Yehowa pee kɛ ha mɛ ɔ. Mɛni wa ma nyɛ maa pee kɛ tsɔɔ kaa wa suɔ Yehowa nɛ wa hɛ sa mumi mi níhi nɛ e kɛ dloo wɔ ɔ? Nɔ́ kake nɛ wa ma nyɛ maa pee ji kaa wa ma ha yemi kɛ buami ngɛ sika blɔ fa mi kɛ ye bua wa we asafo ɔ kɛ je kɛ wɛ ní tsumi ɔ bɔ nɛ wa ma nyɛ. Bɔfo Paulo de ngɛ enɛ ɔ he ke: “Kekleekle ɔ, ke nɔ ko suɔ wawɛɛ nɛ e je nɔ́ nɛ e ngɛ ɔ mi kɛ ha se pi nɔ́ nɛ e be ɔ mi ɔ, lɔ ɔ lɛ saa nɔ hɛ mi saminya.” (2 Kor. 8:4, 12) Yehowa bua jɔ yemi kɛ buami fɛɛ yemi kɛ buami nɛ wa maa je wa tsui mi kɛ ha a he wawɛɛ ke e ji nɔ́ nyafii po.​—Maak. 12:42- 44. w22.03 24 ¶13

Asafo mi nikɔtɔmahi be nyɛe ma tsu nyagbahi tsuo nɛ Yehowa we bi kɛ kpeɔ ɔ he ní loo a je kɛ je. Se Yehowa suɔ nɛ asafo mi nikɔtɔmahi nɛ a pee nɔ́ fɛɛ nɔ́ nɛ a ma nyɛ kɛ wo e we bi he wami nɛ a po a he piɛ. Mɛni nɛ asafo mi nikɔtɔmahi nɛ blɔ nya ní tsumihi fuu ngɛ a kuɛ nɔ momo ɔ ma nyɛ ma nyɛ maa pee konɛ a ná be kɛ ye bua nyɛmimɛ nyumuhi kɛ yihi? Bɔfo Paulo nɔ hyɛmi nɔ́ ɔ ma nyɛ maa ye bua mɛ. Paulo suɔ kaa e maa wo nyɛmimɛ ɔmɛ he wami be fɛɛ be nɛ e je a yi. E maa hi kaa asafo mi nikɔtɔmahi maa kase Paulo nɔ hyɛmi nɔ́ ɔ nɛ a je suɔmi kɛ mi mi jɔmi kpo kɛ tsɔɔ nyɛmimɛ ɔmɛ. (1 Tɛs. 2:7) Paulo ha nɛ nyɛmimɛ ɔmɛ ná nɔ mi mami kaa e suɔ mɛ nɛ Yehowa hu suɔ mɛ. (2 Kor. 2:4; Efe. 2:4, 5) Paulo kɛ nihi nɛ a ngɛ asafo ɔ mi ɔ hi si kaa e huɛmɛ, nɛ e ná be kɛ ha mɛ. Paulo je e tsui mi nɛ e de e nyɛmimɛ ɔmɛ níhi nɛ ngɛ e nya gbae kɛ e gbɔjɔmihi kɛ tsɔɔ kaa e he mɛ ye. (2 Kor. 7:5; 1 Tim. 1:15) Se Paulo kɛ e juɛmi mɛ lɛ nitsɛ e nyagba amɛ a nɔ, mohu ɔ, e suɔ nɛ e ye bua e nyɛmimɛ ɔmɛ. w22.03 28 ¶9-10