December

Yesu ngɔ huɛ bɔmi nɛ ngɛ e kɛ e kaseli ɔmɛ a kpɛti ɔ kɛ to huɛ bɔmi nɛ ngɛ to hyɛlɔ kɛ e jijɔhi a kpɛti ɔ he. (Yoh. 10:14) Nɔ́ he tomi nɔ́ nɛ ɔ sa wawɛɛ. Jijɔhi le a nɔ hyɛlɔ, nɛ a buɔ e gbi tue. Nyumu ko to enɛ ɔ he hɛ nɛ e de ke: “Wa suɔ nɛ wa sa jijɔ komɛ foni kɛ pee video, enɛ ɔ he ɔ, wa suɔ nɛ a ba wa kasa nya. Se a bɛ wa kasa nya ejakaa a li wa gbi. To hyɛlɔ wayoo ko ba nɛ e tsɛ mɛ kɛkɛ nɛ a nyɛɛ e se.” Jamɛ a nyumu ɔ níhi a si kpami ɔ kaiɔ wɔ munyu nɛ Yesu tu kɛ kɔ e jijɔ ɔmɛ nɛ ji e kaseli ɔmɛ a he ɔ. E de ke: “A maa nu ye gbi.” Se Yesu ngɛ hiɔwe. Lɛɛ kɛ wa maa pee kɛ nu e gbi ha kɛɛ? Wa ma nyɛ maa nu e gbi ke waa kɛ e tsɔɔmi ɔmɛ tsu ní ngɛ wa si himi mi.​—Mat. 7:24, 25. w21.12 16 ¶1-2

Bɔfo Paulo wa Kristofo ɔmɛ yi mi wawɛɛ, se pee se ɔ, e kplɛɛ nɔ kaa nɔ́ nɛ e pee ɔ hí. Jehanɛ hu ɔ, e pee klaalo kaa e ma tsake e subai kɛ e ní peepee. (1 Tim. 1:12-16) Ngɛ Yehowa yemi kɛ buami nya a, Paulo ba pee asafo mi nɔkɔtɔma nɛ ngɛ suɔmi, nɛ e mi mi sãa lɛ nɛ e baa e he si. Se e kɛ e juɛmi mɛ lɔ ɔmɛ a nɔ. Mohu ɔ, e ná hemi kɛ yemi kaa Yehowa maa ngɔ e tɔmi ɔ kɛ ke lɛ. (Rom. 7:21-25) E hyɛ we blɔ kaa e maa pee e ní kaa nɔ ko nɛ e ye mluku, mohu ɔ, e bɔ mɔde nɛ e je Kristofohi a suhi nɛ e ngɛ ɔ kpo. E ba e he si nɛ e ngɔ e hɛ kɛ fɔ Yehowa nɔ kaa e maa ye bua lɛ kɛ gbe e ní tsumi ɔ nya. (1 Kor. 9:27; Filip. 4:13) A hlɛ nihi kaa asafo mi nikɔtɔmahi akɛnɛ a ye mluku ɔ he je. Yehowa hyɛɔ blɔ kaa a maa kplɛɛ a tɔmihi a nɔ nɛ a je Kristofohi a suhi kpo. (Efe. 4:23, 24) E sa nɛ asafo mi nɔkɔtɔma fɛɛ asafo mi nɔkɔtɔma nɛ e da Mawu Munyu ɔ nɔ kɛ kpa e mi nɛ e hyɛ, nɛ e pee tsakemihi nɛ e he maa hia kaa e pee ɔ. Ke e pee jã a, Yehowa maa ye bua lɛ nɛ e bua maa jɔ, nɛ e maa ye manye.​—Yak. 1:25. w22.03 29-30 ¶13-15

Ke wa yɔse kaa wa kojo wa nyɛmi Kristofo no ko ɔ, mɛni wa ma nyɛ maa pee? E sa nɛ wa kai kaa e he hia nɛ waa suɔ wa nyɛmimɛ ɔmɛ. (Yak. 2:8) Jehanɛ hu ɔ, e sa nɛ waa sɔle kɛ je wa tsui mi kɛ ha Yehowa nɛ wa kpa lɛ pɛɛ nɛ e ye bua wɔ konɛ wa kpa nihi kojomi. Wa ma nyɛ ma tsu wa sɔlemi ɔmɛ a he ní kɛ gu be nɛ wa ma ná nɛ waa kɛ nɔ nɛ wa kojo lɛ ɔ maa sɛɛ ní ɔ nɔ. Waa kɛ lɛ ma nyɛ maa ya fiɛɛmi aloo waa fɔ lɛ nine kɛ ha ní yemi. Ke wa le wa nyɛmi ɔ saminya a, lɔ ɔ maa ye bua wɔ konɛ waa kase Yehowa kɛ Yesu a nɔ hyɛmi nɔ́ ɔ konɛ waa ngɔ wa juɛmi kɛ ma su kpakpahi nɛ wa nyɛmi ɔ ngɛ ɔ nɔ. Ke wa pee jã a, lɔ ɔ tsɔɔ kaa wa ngɛ fami nɛ to hyɛlɔ kpakpa a kɛ ha wɔ kaa waa jɔɔ nihi kojomi ɔ nɔ yee. Kaa bɔ nɛ jijɔhi nuɔ a nɔ hyɛlɔ gbi ɔ, jã kɛ̃ nɛ e sa kaa Yesu se nyɛɛli ɔmɛ hu nɛ a bu e gbi tue. Ke wa piɛɛ “to kuu nyafii” ɔ he jio, wa piɛɛ “jijɔ kpa” amɛ a he jio, nyɛ ha nɛ waa bu to hyɛlɔ kpakpa a gbi tue.​—Luka 12:32; Yoh. 10:11, 14, 16. w21.12 19 ¶11; 21 ¶17-18

Benɛ Rehoboam ba pee Israel matsɛ ɔ, e we bi ɔmɛ ba bi lɛ nɔ́ ko. A de lɛ kaa e gbɔ tlomi nɛ e tsɛ Solomo kɛ tloo mɛ ɔ nɔ. Rehoboam pee nɔ́ ko nɛ níle ngɛ mi. E bi Israel nikɔtɔma amɛ ga womi nɛ a de lɛ kaa ke e pee nɔ́ nɛ ma mi bi ɔmɛ ngɛ lɛ bie ɔ, a ma fĩ e se be fɛɛ be. (1 Ma. 12:3-7) Se Rehoboam bua jɔɛ jamɛ a ga womi ɔ he, lɔ ɔ he ɔ, e ya bi e juami bimɛ ga womi. A wo lɛ ga kaa e ngɔ tlomi ɔ eko kɛ piɛɛ he ha ma mi bi ɔmɛ. (1 Ma. 12:9-11) Rehoboam nyɛ ko sɔle konɛ e bi Yehowa juɛmi ngɛ sane ɔ he se e pee we jã. Mohu ɔ, e kɛ nihewi ɔmɛ a ga womi ɔ tsu ní. Nɔ́ nɛ je mi kɛ ba a ye Rehoboam kɛ Israel bi ɔmɛ tsuo awi. Ngɛ wɔ hu wa blɔ fa mi ɔ, eko ɔ, pi be fɛɛ be nɛ wa nine suɔ ga womi nɛ wa ngɛ hlae ɔ nɔ. Se kɛ̃ ɔ, ke a kɛ ga womi ɔ da Mawu Munyu ɔ nɔ ɔ, e sa nɛ waa kplɛɛ nɔ. w22.02 9 ¶6

Nɔ nɛ e wa ngɛ jeha mi nɛ e baa e he si nɛ e peeɔ e he humi ɔ maa ngɔ e juɛmi kɛ ma níhi nɛ nihewi kɛ yihewi le peemi momo ɔ nɔ se pi níhi nɛ kpaako a maa kase ɔ. E maa na mɛ kaa e nyɛmimɛ nɛ e kɛ mɛ ngɛ ní tsue, se pi nihi nɛ e kɛ mɛ ngɛ koli sie. Nyɛmimɛ nɛ a wa ngɛ jeha mi ɔ naa nihewi kɛ yihewi kaa a ji nike níhi nɛ je Yehowa ngɔ, nɛ a hɛ sa níhi nɛ nihewi kɛ yihewi peeɔ ɔ. Benɛ nyɛmimɛ nɛ a wa ngɛ jeha mi ɔ a he wami ngɛ si bae ɔ, a bua jɔɔ kaa nihewi kɛ yihewi suɔ nɛ a tsu níhi nɛ a he hia a he ní ngɛ Yehowa sɔmɔmi mi, nɛ a peeɔ jã hulɔ. Naomi nɛ a tu e he munyu ngɛ Baiblo ɔ mi ɔ ji nɔ ko nɛ wa ngɛ jeha mi nɛ e pee nɔ hyɛmi nɔ́ kpakpa kɛ ha wɔ. E kplɛɛ yemi kɛ buami nɛ yiheyo ko kɛ ha lɛ ɔ nɔ. Benɛ Naomi binyumu gbo ɔ, e wo e nganyɛ Rut he wami kaa e kpale kɛ ho e weku li a ngɔ ya. Se Rut ji Naomi he, mohu ɔ, e kɛ Naomi kpale kɛ ho Betlehem ya. Naomi kplɛɛ yemi kɛ buami nɛ Rut kɛ ha lɛ ɔ nɔ. (Rut 1:7, 8, 18) Enɛ ɔ pee jɔɔmi kɛ ha mɛ tsuo! (Rut 4:13-16) Nihi nɛ a wa ngɛ jeha mi nɛ a baa a he si ɔ maa kase Naomi nɔ hyɛmi nɔ́ ɔ. w21.09 10-11 ¶9-11

Wa hiɔwe Tsɛ ɔ le nɔ́ nɛ wa ti nɔ fɛɛ nɔ ma nyɛ maa pee. Eko ɔ, o ma nyɛ maa pee babauu pe nihi fuu nɛ o le mɛ nɛ́ o suɔ mɛ ɔ. Aloo eko ɔ, akɛnɛ o wa ngɛ jeha mi, o be nɔmlɔ tso mi he wami kpakpa, aloo weku blɔ nya ní tsumi hyɛ ngɛ o kuɛ nɔ he je ɔ, o be nyɛe maa pee babauu kaa bɔ nɛ ni kpahi peeɔ ɔ. O kɔni mi nɛ ko jɔ̃. (Gal. 6:4) Yehowa hɛ be o ní tsumi ɔ nɔ jee. Ke o kɛ o nyɛmi tsuo lɛ ngɛ tsue, nɛ o hɛɛ juɛmi nɛ da ngɛ nɔ́ nɛ o ngɛ tsue ɔ he ɔ, e bua maa jɔ o ní tsumi ɔ he. Yehowa le o tsui mi susumihi po. E suɔ nɛ o bua nɛ jɔ nɔ́ nɛ o nyɛɔ peeɔ kɛ haa lɛ ɔ he. Wa le kaa Yehowa yeɔ bua e sɔmɔli ke a kɛ nyagbahi ngɛ kpee, enɛ ɔ nɛ wa le ɔ haa nɛ wa tue mi jɔɔ wɔ. (Yes. 41:9, 10) Atsinyɛ jemi ko be he kaa wa ngɛ yi mi tomi kpakpahi fuu a he je nɛ́ e sa nɛ wa bua nɛ jɔ kaa wa ngɛ wa Tsɛ nɛ ngɛ suɔmi, nɛ́ e bɔ níhi tsuo ɔ jae. Lɛ nɛ e sa nɛ a “ngɔ hɛ mi nyami kɛ bumi” kɛ ha!​—Kpoj. 4:11. w22.03 24 ¶16; 25 ¶18

Wa suɔ nɛ waa kase Yesu nɔ hyɛmi nɔ́ ɔ. Se ke wa nyɛ we nɛ waa kase Yesu nɔ hyɛmi nɔ́ ɔ pɛpɛɛpɛ ɔ, e sɛ nɛ wa kɔni mi nɛ jɔ̃. (Yak. 3:2) Ke nɔ ko ngɛ ní tɛnimi kasee ɔ, e be nyɛe ma tɛni ní saminya kaa bɔ nɛ e tsɔɔlɔ peeɔ ɔ. Se ke e tɛni nɔ́ ko nɛ tɔ̃tɔ̃mi ko ngɛ he nɛ e bɔ mɔde kaa e maa kase bɔ nɛ e tsɔɔlɔ ɔ tɛniɔ ní ɔ, bɔɔbɔɔbɔɔ ɔ, e maa ya e hɛ mi ngɛ ní tɛnimi mi. Jã kɛ̃ nɛ ke waa kɛ níhi nɛ wa kase ngɛ wa dɛ he ní kasemi mi ɔ tsu ní, nɛ wa bɔ mɔde kaa wa maa pee tsakemihi nɛ a he maa hia nɛ waa pee ɔ, wa ma nyɛ maa kase Yesu nɔ hyɛmi nɔ́ ɔ saminya. (La 119:59) Wa ngɛ je nɛ nihi fuu foɔ mɛ pɛ a nɔ mi ɔ mi. Se Yehowa we bi je ekpa kulaa. He kɛ afɔle sami su nɛ Yesu je kpo ɔ, ná wa nɔ he wami nɛ wa fia wa pɛɛ si kaa wa maa kase e nɔ hyɛmi nɔ́ ɔ. (1 Pet. 2:21) Ke wa bɔ mɔde nɛ wa kase he kɛ afɔle sami su nɛ Yesu je kpo ɔ, wa bua maa jɔ ejakaa wa le kaa Yehowa bua jɔ wa he. w22.02 24 ¶16; 25 ¶18

Mwɔnɛ ɔ, Yehowa  guɔ e Munyu nɛ ji Baiblo ɔ nɔ kɛ haa e we bi blɔ tsɔɔmi. Ke wa he be kɛ pue wa yi mi tɛ ngɛ níhi nɛ Yehowa ngɛ wɔ tsɔɔe ɔ a he ɔ, lɔ ɔ maa ye bua wɔ nɛ waa kɛ e blɔ tsɔɔmi ma tsu ní, nɛ wa ma nyɛ ma tsu fiɛɛmi ní tsumi ɔ kɛ pi si. (1 Tim. 4:15, 16) Yehowa guɔ “tsɔlɔ anɔkualetsɛ kɛ ní lelɔ ɔ” hu nɔ kɛ tsɔɔ wɔ blɔ. (Mat. 24:45) Be komɛ ɔ, tsɔlɔ anɔkualetsɛ kɛ ní lelɔ ɔ ma nyɛ ma ha wɔ blɔ tsɔɔmi ko nɛ wa be sisi nue saminya. Kaa nɔ hyɛmi nɔ́ ɔ, a ma nyɛ ma ha wɔ blɔ tsɔɔmi pɔtɛɛ komɛ kɛ kɔ adebɔ mi oslaahi a he, se eko ɔ, wa ma susu kaa jamɛ a adebɔ mi oslaa a be nyɛe maa ba ngɛ he nɛ wa ngɛ ɔ. Ke wa susu kaa nile be blɔ tsɔɔmi nɛ a kɛ ha wɔ ɔ mi ɔ, mɛni e sa nɛ waa pee? Mo susu Baiblo mi sane kpahi nɛ wa kane hyɛ ɔ a he. Be komɛ ɔ, Mawu we bi nine suɔ blɔ tsɔɔmi komɛ a nɔ nɛ́ ngɛ adesa susumi nya a, nile be mi, se jamɛ a blɔ tsɔɔmi ɔmɛ nyɛɔ heɔ a yi wami.​—Many. 7:7; 8:10. w22.03 18-19 ¶15-16

Yesu kɛ nɔ mi mami tu munyu nɛ ngɛ wa mwɔnɛ ɔ ngmami ɔ mi ɔ. Yesu le kaa e hwɔɔ se si himi daa si ngɛ Yehowa nɔ, nɛ e ngɛ nɔ mi mami kaa e Tsɛ ɔ ma kai lɛ. Mɛni wa ma nyɛ maa kase ngɛ Yesu munyu ɔmɛ a mi? Moo ya nɔ nɛ o ye Yehowa anɔkuale ke o wami ya je oslaa mi po. Se loko o ma nyɛ maa pee jã a, e sa nɛ o ‘ngɔ o hɛ ngɔ fɔ Yehowa nɔ kulaa.’ (Abɛ 3:5) Mo susu nyɛminyumu ko nɛ a tsɛɛ lɛ ke Joshua nɛ e ye jeha 15 ɔ nɔ hyɛmi nɔ́ ɔ he nɛ o hyɛ. E nu gbenɔ hiɔ ko. E kua hiɔ tsami blɔ nya tomi nɛ kɛ Mawu mlaa kɔ we. Benɛ e piɛ bɔɔ nɛ e ma gbo ɔ, e de e yayo ke: “Yayo, i ngɛ Yehowa dɛ mi. . . . Ma nyɛ ma de kɛ nɔ mi mami ke: I le kaa Yehowa ma tle mi si kɛ ba wami mi kokooko. E le ye tsui mi sanehi tsuo, nɛ i suɔ lɛ wawɛɛ.” E sa nɛ wa ti nɔ fɛɛ nɔ nɛ bi e he ke, ‘Ke i kɛ ye hemi kɛ yemi ɔ he ka kpe nɛ ye wami ma nyɛ maa ngmɛɛ mi po ɔ, anɛ ma nyɛ ma ngɔ ye wami kɛ wo Yehowa dɛ, nɛ ma ná nɔ mi mami kaa e ma kai mi lo?’ w21.04 12-13 ¶15-16

Yehowa we bi náa he wami womi kɛ guɔ fiɛɛmi ní tsumi ɔ nɔ. Ke wa fiɛɛ kɛ ha ni kpahi ɔ, wa bua jɔɔ, a bu tue jio, a bui tue jio. Eko ɔ, ni komɛ ma susu kaa a si fɔfɔɛ ɔ he je ɔ, a nyɛ we nɛ a pee babauu ngɛ sɔmɔmi ní tsumi ɔ mi. Ke jã ji bɔ nɛ o nuɔ he ɔ, lɛɛ mo kai kaa Yehowa bua jɔɔ ke o pee nɔ́ nɛ o ma nyɛ ngɛ o si fɔfɔɛ ɔ mi. Yehowa le kaa wa ti ni komɛ ngɛ nɛ wa suɔ nɛ waa fiɛɛ, se wa tlɔ we mi. E ma nyɛ maa ye bua wɔ nɛ waa fiɛɛ kɛ ha nihi nɛ a hyɛɛ wa nɔ loo dɔkitahi kɛ nɛɛsihi. Ke wa ngɔ nɔ́ nɛ wa peeɔ amlɔ nɛ ɔ kɛ to nɔ́ nɛ wa pee be ko nɛ be ɔ he ɔ, e ma nyɛ ma jɔ̃ wa kɔni mi. Ke wa yɔse bɔ nɛ Yehowa ngɛ wɔ yee buae ha amlɔ nɛ ɔ, e ma ha nɛ wa ná he wami kɛ da wa nyagba amɛ a nya nɛ wa ná bua jɔmi. Wa li anɔkuale wuhi nɛ wa du ɔ a kpɛti nɔ́ nɛ maa puɛ, nɛ e maa wa.​—Fiɛlɔ 11:6. w21.05 24-25 ¶14-17

Yehowa ha nɛ Matsɛ David ná ní, e he biɛ, nɛ e ye e he nyɛli fuu a nɔ kunimi. Se hɛkɔ ha nɛ Matsɛ David hɛ je níhi nɛ Yehowa pee ha lɛ ɔ nɔ. David tsɔɔ kaa ke e ke e maa kane níhi nɛ Yehowa kɛ dloo lɛ ɔ, e “be nyɛe; ejakaa a he hiɛ tsɔ.” (La 40:5) Se be ko ɔ, David hɛ je níhi nɛ Yehowa pee ha lɛ ɔ nɔ. E ngɛ mi kaa David ngɛ yihi fuu mohu lɛɛ, se e ha nɛ akɔnɔ yaya sɛ e mi nɛ e ná nɔ ko yo he suɔmi ngɛ e tsui mi. Yo nɛ ɔ ji Batsheba, nɛ e huno ɔ ji Uria nɛ ji Hit no ɔ. David kɛ Batsheba ná bɔmi nɛ e ngɔ hɔ. Nɔ́ nɛ David pee ɔ hí, se nɔ́ nɛ e kpale pee kɛ nyɛɛ se ɔ puɛ sane ɔ kulaa. E to ga konɛ a gbe Uria! (2 Sam. 11:2-15) Mɛni nɛ David ngɛ susue? Anɛ e susu kaa Yehowa be nae lo? E ngɛ mi kaa David kɛ be kɛkɛɛ sɔmɔ Yehowa mohu lɛɛ, se hɛkɔ ha nɛ e pee nɔ́ nɛ dɛ nɛ e na mi nɔ́. Bua jɔmi sane ji kaa David kplɛɛ e tɔmi ɔ nɔ nɛ e tsake e tsui. E bua jɔ wawɛɛ kaa Yehowa kɛ e tɔmi ɔ ke lɛ!​—2 Sam. 12:7-13. w21.06 17 ¶10

Eko ɔ, wa susuɔ kaa wa be nyɛe nɛ waa kɛ nɔ ko nɛ kase Baiblo ɔ. Eko ɔ, wa susu kaa wa hia nile fuu loo ní tsɔɔmi he ga lemi fuu loko waa kɛ nɔ ko ma nyɛ maa kase Baiblo ɔ. Ke jã nɛ o nuɔ he ɔ, lɛɛ mo susu níhi etɛ nɛ ma ha nɛ o ná nɔ mi mami kaa o ma nyɛ nɛ o kɛ nɔ ko nɛ je Baiblo mi ní kasemi sisi ɔ a he nɛ o hyɛ. Kekleekle ɔ, Yehowa naa mo kaa o he su nɛ o ma nyɛ maa tsɔɔ ni kpahi ní. Enyɔne, Yesu nɛ “a ngɔ he blɔhi tsuo nɛ ngɛ hiɔwe kɛ zugba a nɔ ɔ kɛ ha” lɛ ɔ lɛ fã mo kaa o tsɔɔ nihi ní. (Mat. 28:18) Etɛne, ha nɛ ni kpahi nɛ a ye bua mo. Níhi nɛ Yesu Tsɛ ɔ tsɔɔ lɛ ɔ nɛ ye bua lɛ. Mo hu ni kpahi ma nyɛ maa ye bua mo. (Yoh. 8:28; 12:49) Jehanɛ hu ɔ, o ma nyɛ ma bi o fiɛɛmi yami kuu nɔ hyɛlɔ ɔ, blɔ gbalɔ ko nɛ e nane pi si, loo fiɛɛlɔ ko nɛ e ngɛ níhi a si kpami nɛ e ye bua mo kɛ je Baiblo mi ní kasemi sisi nɛ e ye bua mo nɛ o tsa nɔ. Blɔ kake nɛ o ma nyɛ maa gu nɔ kɛ pee tsɔɔlɔ kpakpa ji kaa o maa piɛɛ fiɛɛli nɛ ɔmɛ a he ke a kɛ nɔ ko ngɛ Baiblo ɔ kasee. w21.07 6 ¶12

Je yaya nɛ ɔ nyagbe su haa, lɔ ɔ he ɔ, amlɔ nɛ ɔ ji be nɛ e sa nɛ wa ná hɛ kɛ nɔ fɔmi nɛ mi wa ngɛ blɔ nɔ nɛ Yehowa guɔ kɛ peeɔ níhi ɔ mi pe be ko nɛ be ɔ. Mɛni he je? Ngɛ amanehlu ngua a mi ɔ, a ma nyɛ ma ha wɔ blɔ tsɔɔmi ko, nɛ eko ɔ, wa ma susu kaa e kɛ ní tsumi maa ye loo sisi numi be he. Ngɛ anɔkuale mi ɔ, wa le kaa Yehowa kɛ wɔ be munyu tue tɛ̃ɛ. E maa gu nihi nɛ e hla mɛ kaa a nyɛɛ níhi a hɛ mi ɔ a nɔ kɛ ha wɔ blɔ tsɔɔmi. Tsa pi jamɛ a be ɔ mi nɛ e sa nɛ wa juɛmi nɛ pee wɔ enyɔɔnyɔ ngɛ blɔ tsɔɔmihi a he nɛ wa bi ke, ‘Anɛ blɔ tsɔɔmi nɛ ɔ je Yehowa ngɔ niinɛ, aloo nihi nɛ a ngɛ hɛ mi nyɛɛe ɔ mɛ nitsɛmɛ a blɔ tsɔɔmi nɛ a kɛ ngɛ wɔ hae?’ Anɛ o ma he Yehowa kɛ e we asafo ɔ maa ye ngɛ jamɛ a be ɔ mi lo? Bɔ nɛ o peeɔ o ní ngɛ teokrase blɔ tsɔɔmihi a he ha amlɔ nɛ ɔ lɛ maa tsɔɔ heto nɛ o ma ha. Ke o heɔ blɔ tsɔɔmi nɛ a kɛ haa mo mwɔnɛ ɔ yeɔ nɛ o kɛ tsuɔ ní ɔ, eko ɔ, jã nɛ o maa pee o ní ngɛ amanehlu ngua a mi. w22.02 6 ¶15

Yehowa ye bua Gideon kɛ nyumuhi 300, nɛ a ye kunimi ngua ko, nɛ enɛ ɔ ko nyɛ ko ha nɛ Gideon kɛ e nyumu ɔmɛ ko fĩa wawɛɛ. Nyumuhi nɛ a je Efraim wɛtso ɔ mi ɔ kɛ Gideon ya kpe konɛ a kɛ lɛ ya pɛ, se pi ayekoo nɛ a yaa ha lɛ. A pee jã akɛnɛ e ha we nɛ a piɛɛ e he kɛ ya ta a he je. (Many. 8:1) Gideon ha mɛ nɔ hyɛmi nɔ́ pɔtɛɛ ko nɛ tsɔɔ bɔ nɛ Yehowa jɔɔ mɛ ha. Nɔ́ nɛ e de ɔ ha nɛ a “mi mi fumi ɔ nya ba si.” (Many. 8:3) Gideon ba e he si konɛ tue mi jɔmi nɛ hi Mawu we bi a kpɛti. Efraim bi ɔmɛ a sane ɔ ha nɛ wa na kaa e sa nɛ waa ngɔ wa juɛmi kɛ ma Yehowa biɛ ɔ hɛ mi nyami nɛ wa maa wo ɔ nɔ, se pi wɔ nitsɛmɛ. Wekuyihi kɛ asafo mi nikɔtɔmahi ma nyɛ maa kase nɔ́ ko ngɛ Gideon he. Ke nɔ ko mi mi fu ngɛ nɔ́ ko nɛ wa pee ɔ he ɔ, e sa nɛ waa bɔ mɔde nɛ waa na nɔ́ he je nɛ nɔ ɔ mi mi fu ɔ. Jehanɛ hu ɔ, wa ma nyɛ ma je nɔ ɔ yi ngɛ nɔ́ ko nɛ e pee lɛ saminya a he. Se e biɔ he si bami ngɛ wa blɔ fa mi. Tue mi jɔmi nɛ maa hi waa kɛ wa nyɛmimɛ wa kpɛti ɔ he hia pe nɛ wa maa tsɔɔ kaa wa sane da. w21.07 16-17 ¶10-12

Yehowa wo wa hɛ mi nyami kɛ gu e subai nɔ nɛ e bɔ wɔ ngɛ ɔ nɔ. Akɛnɛ Mawu bɔ wɔ ngɛ e subai nɔ he je ɔ, wa ma nyɛ ma je e su kpakpa amɛ fuu kpo. Su nɛ ɔmɛ ekomɛ ji, suɔmi, mi mi sami, anɔkuale yemi kɛ dami ní peepee. (La 86:15; 145:17) Ke wa jeɔ su nɛ ɔmɛ kpo ɔ, e woɔ Yehowa hɛ mi nyami, nɛ e tsɔɔ kaa wa hɛ sa níhi nɛ e pee kɛ ha wɔ ɔ. (1 Pet. 1:14-16) Ke wa peeɔ níhi nɛ sa wa hiɔwe Tsɛ ɔ hɛ mi ɔ, wa bua jɔɔ, nɛ wa tsui nɔɔ wa mi. Jehanɛ hu ɔ, akɛnɛ wa jeɔ Yehowa su ɔmɛ kpo he je ɔ, wa ma nyɛ maa pee níhi nɛ e suɔ kaa e weku mi bimɛ nɛ a pee ɔ. Yehowa ha wɔ we nɛ se be. Yehowa sɛ hlami dla zugba a kɛ ha adesahi loko e bɔ kekleekle nyumu ɔ. (Hiob 38:4-6; Yer. 10:12) Akɛnɛ Yehowa susuɔ nɔ he nɛ e haa nɔ nɔ́ he je ɔ, e bɔ ní kpakpahi fuu ngɛ zugba a nɔ nɛ ma ha nɛ adesahi a bua nɛ jɔ. (La 104:14, 15, 24) E suu be nɛ Yehowa hyɛɛ níhi nɛ e bɔ ɔ, nɛ ‘a mwɔɔ e hɛ.’​—1 Mose 1:10, 12, 31. w21.08 3 ¶5-6

Wɔ tsuo wa blɔ nya ní tsumi ji kaa wa maa fiɛɛ nɛ waa pee nihi kaseli. (Mat. 28:19, 20; Rom. 10:14) Anɛ o suɔ nɛ o he nɛ be ngɛ ní tsumi nɛ he hia pe kulaa nɛ ɔ mi lo? Moo kase Ní Tsɔɔmi womiyo ɔ nɛ o kɛ pee oti kaa o kɛ nɔ́ nɛ o ngɛ kasee ɔ ma tsu ní ngɛ o si himi mi. O hɛ ko je nɔ kaa otihi nɛ a he hia nɛ o ma nyɛ kɛ ma o hɛ mi ji kaa o ma ná suhi nɛ maa ye bua mo nɛ o sa Yehowa hɛ mi. (Kol. 3:12; 2 Pet. 1:5-8) Ngɛ anɔkuale mi ɔ, wɔ tsuo wa ná nɛ wa pee babauu ha Yehowa pe bɔ nɛ wa ngɛ pee amlɔ nɛ ɔ. Ngɛ Mawu je ehe ɔ mi ɔ, waa kɛ wa nyɛmi tsuo ma sɔmɔ Yehowa. Se loko jamɛ a be ɔ maa su ɔ, ke wa bɔ mɔde nɛ wa pee nɔ́ fɛɛ nɔ́ nɛ wa ma nyɛ amlɔ nɛ ɔ, wa bua maa jɔ wawɛɛ nɛ wa be haoe tsɔ. Se nɔ́ nɛ pe kulaa a, e maa wo wa “bua jɔmi Mawu,” nɛ ji Yehowa a hɛ mi nyami. (1 Tim. 1:11) Enɛ ɔ he ɔ, nyɛ ha nɛ wa bua nɛ jɔ he blɔhi nɛ wa ngɛ amlɔ nɛ ɔ a he! w21.08 25 ¶18-20

Ke a kɛ anɔkuale ɔ tsɔse mo kɛ je o jokuɛwi a si tɔɔ ɔ, lɛɛ wa ma nyɛ ma de ke o kase Yehowa he ní kɛ je o jokuɛwi a si. O kase kaa Yehowa ji Bɔlɔ, e ngɛ su kpakpahi fuu, nɛ e ngɛ yi mi tomi kpakpa kɛ ha adesahi. (1 Mose 1:1; Níts. 17:24-27) Nihi fuu he we yi kaa Mawu ngɛ, aloo lɛ nɛ e bɔ níhi tsuo. Mohu ɔ, a he ye kaa ní tsɔwitsɔwihi nɛ wami ngɛ a mi ɔ ba ngɛ a dɛ he, nɛ a tsake kɛ pee níhi nɛ a ngɛ hwanyaa. Nihi nɛ a hɛɛ susumi nɛ ɔ a kpɛti nihi fuu ji nihi nɛ a ya sukuu kɛ ya tsitsaa. Eko ɔ, a ma de ke je mi si kpali ha nɛ a na kaa Baiblo ɔ mi munyu ɔmɛ ji lakpa, nɛ nihi nɛ a ngɛ hemi kɛ yemi kaa Bɔlɔ ko ngɛ ɔ ji nihi nɛ a yɛ sukuu, a li ní loo nihi nɛ a sisi mɛ. Wa ngɛ Yehowa sɔmɔe be kɛkɛɛ jio, kpaako wa bɔni lɛ sɔmɔmi jio, e sa nɛ wɔ tsuo waa ya nɔ nɛ wa ha nɛ wa hemi kɛ yemi ɔ mi nɛ wa. Ke wa pee jã a, lɔ ɔ be hae nɛ “je mi nile kɛ yaka sisimi” nɛ je adesahi nɛ a teɔ si kɛ woɔ Mawu Munyu ɔ a ngɔ ɔ nɛ sisi wɔ.​—Kol. 2:8. w21.08 14 ¶1-3

Habel, Noa, Abraham, kɛ Hiob pee níhi nɛ tsɔɔ kaa a buɔ Yehowa, nɛ a suɔ lɛ. A bu Mawu tue, a ná e mi hemi kɛ yemi nɛ a sã afɔle ha lɛ. A pee nɔ́ fɛɛ nɔ́ nɛ a ma nyɛ kɛ wo Yehowa hɛ mi nyami, nɛ Yehowa kplɛɛ a jami ɔ nɔ. Pee se ɔ, Yehowa gu Mose nɔ kɛ ha Israel bi ɔmɛ mlaa. Mlaa nɛ ɔ tsɔɔ blɔhi nɛ Yehowa suɔ nɛ e we bi nɛ a gu nɔ kɛ ja lɛ. Kɛ je benɛ Yesu gbo nɛ a tle lɛ si ɔ, Yehowa hyɛ we blɔ kaa waa da mlaahi nɛ ngɛ Mose Mlaa mi ɔ nɔ kɛ ja lɛ. (Rom. 10:4) E he ba hia nɛ Kristofohi nɛ a kɛ mlaa ehe nɛ ji “Kristo mlaa” a nɛ tsu ní. (Gal. 6:2) “Mlaa” nɛ ɔ nɛ a maa ye nɔ ɔ tsɔɔ we kaa e sa nɛ a le níhi nɛ e sa nɛ a pee kɛ níhi nɛ e sɛ nɛ a pee ɔ tsuo. Mohu ɔ, e biɔ nɛ a kase Yesu nɔ hyɛmi nɔ́ ɔ nɛ́ a kɛ níhi nɛ e tsɔɔ ɔ nɛ tsu ní. Mwɔnɛ ɔ, Kristofohi peeɔ nɔ́ fɛɛ nɔ́ nɛ a ma nyɛ konɛ a kase Kristo nɔ hyɛmi nɔ́ ɔ, bɔ nɛ pee nɛ a sa Yehowa hɛ mi nɛ́ a ‘he mi nɛ jɔ mɛ.’​—Mat. 11:29. w22.03 20-21 ¶4-5

Yehowa buɔ e bimɛ tue. E bu sɔlemihi nɛ Yesu sɔle benɛ e ngɛ zugba a nɔ ɔ tue. E bu Yesu sɔlemi tue benɛ e sɔle ngɛ níhi nɛ a he hia a he ɔ. Eko ji benɛ e maa hla bɔfohi 12 ɔ. (Luka 6:12, 13) Jehanɛ hu ɔ, benɛ Yesu hao wawɛɛ nɛ e sɔle ɔ, Yehowa bu lɛ tue. Benɛ e piɛ bɔɔ nɛ Yuda maa tsɔɔ Yesu se blɔ ɔ, Yesu sɔle kɛ ha e Tsɛ ɔ ngɛ kahi nɛ e be kɛe nɛ e kɛ maa kpe ɔ a he. Pi nɛ Yehowa bu Yesu tue pɛ kɛkɛ, e tsɔ bɔfo ko nɛ e ba wo e Bi nɛ e suɔ lɛ ɔ he wami. (Luka 22:41-44) Mwɔnɛ ɔ, Yehowa yaa nɔ nɛ e buɔ e sɔmɔli a sɔlemi tue, nɛ e haa mɛ heto nɛ sa ngɛ be nɛ sa mi. (La 116:1, 2) Mo susu bɔ nɛ nyɛmiyo ko nɛ ngɛ India a na bɔ nɛ Yehowa ha e sɔlemi heto ha a he nɛ o hyɛ. E pee yeyeeye wawɛɛ, nɛ e je e tsui mi nɛ e sɔle ha Yehowa ngɛ sane ɔ he. E de ke: “A pee May 2019 JW Brɔɔdkastin ɔ nɛ tsɔɔ bɔ nɛ wa ma plɛ kɛ da yeyeeye peemi kɛ haomi nya ha a kɛ ha mi. E ji ye sɔlemi heto nɛ a ha.” w21.09 21-22 ¶6-7

Hyɛ bɔ nɛ e he maa wa ha Kristofo nɛ ɔmɛ nɛ a hi si blema kaa a maa je nɔ́ fɛɛ nɔ́ nɛ a ngɛ ɔ he nɛ a ya je si himi ɔ sisi ekohu! E sa nɛ a ná hemi kɛ yemi, nɛ a ngɔ a hɛ kɛ fɔ Yehowa nɔ kaa e ma ha mɛ a hiami níhi. Se nɔ́ ko ngɛ nɛ ma nyɛ maa ye bua mɛ. Bɔfo Paulo wo Hebri bi ɔmɛ ga ko jeha enuɔ se loko Roma bi ɔmɛ ba bɔle Yerusalem ma a kɛ kpe. E de mɛ ke: “Nyɛ ko ha nɛ sika suɔmi nɛ hi nyɛ si himi mi, be mi nɛ níhi nɛ nyɛ ngɛ amlɔ nɛ ɔ hiɛ kɛ ha nyɛ ɔ. Ejakaa e de ke: ‘I be mo sie gblegbleegble, nɛ i be mo kuae gblegbleegble hulɔ.’ Bɔ nɛ pee nɛ wa nɔ gbagba nɛ te, nɛ wa de ke: ‘Yehowa ji ye yemi kɛ bualɔ; i be gbeye yee. Mɛni adesa ma nyɛ maa pee mi?’” (Heb. 13:5, 6) E ngɛ heii kaa nihi nɛ a kɛ ga womi nɛ Paulo kɛ ha kaa a bua nɛ jɔ níhi nɛ a ngɛ ɔ he ɔ tsu ní ɔ ná si himi ɔ gbɔjɔɔ ngɛ a we ehe ɔmɛ a mi. A ná nɔ mi mami kaa Yehowa ma ha mɛ a hiami níhi. w22.01 4 ¶7, 9

Ke a ke nɔ ko naa nɔ mɔbɔ ɔ, eko ɔ, wa maa na nɔ ɔ kaa e mi mi jɔ, e tsui mi jɔ, e mi mi sãa lɛ ngɛ nihi a he, nɛ e peeɔ nɔ kpakpa. Jehanɛ hu ɔ, Samaria no mɔbɔ nalɔ ɔ nɛ Yesu tu e he munyu ɔ hu ma nyɛ maa ba wa juɛmi mi. Nyumu ɔ nɛ je ma kpa nɔ ɔ “na” Yuda no ɔ nɛ juli kongo lɛ ɔ “mɔbɔ.” Yuda no ɔ nɛ a kongo lɛ ɔ “ní pee [Samaria no ɔ] mɔbɔ,” nɛ e to blɔ nya konɛ a hyɛ e nɔ. (Luka 10:29-37) Nɔ́ he tomi nɔ́ nɛ ɔ haa nɛ wa naa Mawu su ko nɛ sa kadimi nɛ ji mɔbɔ nami. Yehowa naa wɔ mɔbɔ ejakaa e suɔ wɔ, nɛ e naa wɔ mɔbɔ ngɛ blɔ slɔɔtohi a nɔ daa ligbi. Blɔ kpa ko hu ngɛ nɛ nɔ ko ma nyɛ maa gu nɔ kɛ na nɔ mɔbɔ. Eko ɔ, nɔ nɛ e naa nɔ mɔbɔ ɔ maa mwɔ e yi mi kpɔ kaa e be nɔ ko nɛ e tɔ̃ nɛ e sa nɛ a gbla e tue ɔ tue gblae. Yehowa hu guu blɔ nɛ ɔ nɔ kɛ naa wɔ mɔbɔ. La polɔ ɔ de ke, “E gbla we wa tue bɔ nɛ sa wɔ.” (La 103:10) Be komɛ hu ɔ, Yehowa gblaa nɔ ko nɛ e pee yayami nɛ hɛdɔ ngɛ he ɔ tue wawɛɛ. w21.10 8 ¶1-2

Yehowa jeɔ suɔmi nɛ se pui kpo kɛ tsɔɔ nihi nɛ huɛ bɔmi kpakpa ngɛ e kɛ mɛ a kpɛti, nɛ ji e sɔmɔli ɔ pɛ. Munyuhi nɛ Matsɛ David kɛ gbalɔ Daniel tu ɔ maa enɛ ɔ nɔ mi. David de ke: “Yaa nɔ nɛ o je o suɔmi nɛ se pui ɔ kpo kɛ tsɔɔ nihi nɛ a le mo ɔ.” “Se Yehowa suɔmi nɛ se pui ɔ ngɛ kɛ je neneene kɛ yaa neneene kɛ ha nihi nɛ a yeɔ lɛ gbeye ɔ.” Daniel hu de ke: “O Yehowa, mo ji Mawu nɛ o yeɔ anɔkuale, o jeɔ suɔmi nɛ se pui kpo kɛ tsɔɔ nihi nɛ suɔ mo nɛ a yeɔ o mlaa amɛ a nɔ ɔ.” (La 36:10; 103:17, NW; Dan. 9:4, NW) Kaa bɔ nɛ ngmami ɔmɛ tsɔɔ ɔ, Yehowa jeɔ suɔmi nɛ se pui kpo kɛ tsɔɔ e sɔmɔli akɛnɛ a le lɛ, a yeɔ lɛ gbeye, a suɔ lɛ, nɛ a yeɔ e mlaa amɛ a nɔ ɔ he je. Yehowa jeɔ suɔmi nɛ se pui kpo kɛ tsɔɔ e sɔmɔli anɔkualetsɛmɛ pɛ. Loko wa ma bɔni Yehowa sɔmɔmi ɔ, Yehowa suɔ wɔ kaa bɔ nɛ e suɔ adesahi tsuo ɔ. (La 104:14) Se akɛnɛ wa ba ngɛ lɛ sɔmɔe he je ɔ, wa náa e suɔmi nɛ se pui ɔ he se. w21.11 4 ¶8-9

Ke a ngɛ wa nɔ nyɛe kaa mɛni po, wa pee klaalo kaa waa kɛ Yesu munyu nɛ ɔ ma tsu ní. Mwɔnɛ ɔ, nihi fuu suɔ nɛ a bu osɔfohi nɛ a he biɛ ɔ tue. A suɔ osɔfo nɛ ɔmɛ wawɛɛ, nɛ a jaa mɛ po. Nihi fuu yaa a sɔlemi ɔmɛ, a heɔ a womi ɔmɛ, nɛ a ngɔɔ sika fuu kɛ fĩɔ a se. Ni komɛ heɔ nɔ́ fɛɛ nɔ́ nɛ osɔfo ɔmɛ deɔ ɔ yeɔ. Nihi nɛ a yaa sɔlemi nɛ ɔmɛ ɔ, ke a na a we osɔfo ɔmɛ ɔ a bua jɔɔ wawɛɛ kaa nɔ́ nɛ a na Yesu po! Se nihi nɛ a sɔmɔɔ Mawu ngɛ blɔ nɛ da nɔ ɔ be osɔfohi. E ngɛ mi kaa wa buɔ nihi nɛ a ngɛ hɛ mi nyɛɛe ɔ mohu lɛɛ, se wa kplɛɛɔ Yesu tsɔɔmi ɔmɛ a nɔ. Yesu de ke: “Nyɛ tsuo ɔ, nyɛmimɛ ji nyɛ.” (Mat. 23:8-10) Wa ja we adesahi, osɔfohi jio, ma nɔ yeli jio. Nɛ wa fĩ we a ní peepee ɔmɛ loo níhi nɛ a kɛ ma a hɛ mi ɔ se. Waa kɛ wa he wui ma kudɔmi sanehi a mi nɛ waa kɛ je ɔ bɔɛ. Enɛ ɔ he ɔ, ngɛ nɔ́ fɛɛ nɔ́ mi ɔ, wa je ekpa ngɛ jamihi tsuo nɛ a tsɛɛ a he ke Kristofohi ɔ a he.​—Yoh. 18:36. w21.10 20 ¶6-7

E sa nɛ Kristofo no fɛɛ Kristofo no nɛ e hyɛ nɛ hi konɛ nɔ ko loo nɔ́ ko he nɛ ko hia lɛ pe huɛ bɔmi nɛ ngɛ e kɛ Mawu a kpɛti ɔ. Akɛnɛ wa ji Yehowa Odasefohi he je ɔ, wa mwɔ wa yi mi kpɔ kaa wa be nɔ́ ko pee nɛ maa gbe Mawu biɛ klɔuklɔu ɔ he guɛ. (3 Mose 19:12; Yes. 57:15) Israel bi ɔmɛ ye Mawu mlaa amɛ a nɔ kɛ tsɔɔ kaa a kplɛɛ Yehowa nɔ kaa lɛ ji a Mawu. Baiblo ɔ de ngɛ 3 Mose 18:4 ɔ ke: ‘Nyɛɛ pee ye suɔmi nya ní, nɛ nyɛɛ ye ye mlaa amɛ a nɔ. Imi ji Yehowa, nyɛ Mawu ɔ nɛ.’ Yi 19 ɔ tu “mlaa amɛ” nɛ a kɛ ha Israel bi ɔmɛ ɔ ekomɛ a he munyu. Kaa nɔ hyɛmi nɔ́ ɔ, kuku 5-8, 21, 22 ɔ tu lohwehi nɛ a kɛ sãa afɔle ɔ he munyu. E sa nɛ a sã afɔle nɛ ɔmɛ ngɛ blɔ kpakpa nɔ konɛ a ko ‘ble Yehowa nɔ́ klɔuklɔu ɔ.’ Ke wa kane kuku nɛ ɔmɛ ɔ, e maa wo wɔ he wami konɛ waa pee níhi nɛ maa sa Yehowa hɛ mi nɛ waa ngɔ yi jemi afɔle kɛ ha lɛ kaa bɔ nɛ Hebri Bi 13:15 ɔ woɔ wɔ he wami kaa waa pee ɔ. w21.12 5-6 ¶14-15

Nihewi kɛ yihewi nɛ a sɛ gba si himi mi mwɔnɛ ɔ ma nyɛ ma ná nihi nɛ a ngɔ a hɛ kɛ fɔ Yehowa nɔ ɔ a níhi a si kpamihi a he se. A kpɛti nihi fuu ngɔ jehahi babauu kɛ tsu be tsuo sɔmɔmi ní tsumi ɔ. Ke o ngɛ otihi nɛ o kɛ maa ma o hɛ mi ngɛ Yehowa sɔmɔmi mi ɔ he susue ɔ, mo de mɛ nɛ a wo mo ga. Lɔ ɔ ji nɔ́ ko nɛ o ma nyɛ maa pee kɛ tsɔɔ kaa o ngɔ o hɛ kɛ fɔ Yehowa nɔ. (Abɛ 22:17, 19) Mo kai kaa, gba si himi ji nike ní nɛ je Yehowa ngɔ. (Mat. 19:5, 6) E suɔ nɛ nihi nɛ a sɛ gba si himi mi ɔ a bua nɛ jɔ nike ní nɛ ɔ he. Nihewi kɛ yihewi nɛ nyɛ sɛ gba si himi mi, anɛ nyɛ ngɛ nɔ́ nɛ nyɛɛ kɛ nyɛ wami maa pee ɔ he susue lo? Anɛ nyɛ ngɛ nɔ́ fɛɛ nɔ́ nɛ nyɛ ma nyɛ ɔ pee kɛ tsɔɔ kaa nyɛ bua jɔ nike ní nɛ Yehowa kɛ ha nyɛ ɔ he lo? Nyɛɛ kɛ Yehowa nɛ sɛɛ ní ngɛ sɔlemi mi. Nyɛ hla Baiblo sisi tomi mlaahi nɛ maa ye bua nyɛ ngɛ nyɛ si fɔfɔɛ ɔ mi. Nɛ nyɛɛ nyɛɛ blɔ tsɔɔmihi nɛ Yehowa kɛ ha nyɛ ɔ se. Ke nyɛ ngɔ Yehowa sɔmɔmi kɛ pee oti ngɛ nyɛ gba si himi ɔ mi ɔ, lɛɛ nyɛ ma nyɛ ma ná nɔ mi mami kaa nyɛ bua maa jɔ ngɛ si himi mi! w21.11 19 ¶16, 18

Yakobo ná juɛmi nɛ da ngɛ lɛ nitsɛ e he. Yakobo susuu we kaa e nɔ kuɔ pe e nyɛmimɛ Kristofohi kpa amɛ akɛnɛ e nyɛminyumu ji Yesu loo akɛnɛ e ná sɔmɔmi he blɔ komɛ ɔ he je. E tsɛ Kristofohi kpa amɛ ke: “Ye nyɛmimɛ nɛ i suɔ.” (Yak. 1:16, 19; 2:5) E ha we nɛ ni kpahi nɛ a nu he kaa lɛɛ e ye mluku. Nɔ́ nɛ wa ma nyɛ maa kase ngɛ mi: Mo kai kaa wɔ tsuo wa ji yayami peeli. E sɛ nɛ wa susu kaa wa nɔ kuɔ pe wa Baiblo kaseli ɔmɛ ngɛ blɔ ko nɔ. Mɛni he je? Ke wa ha nɛ wa Baiblo kaseli ɔmɛ nu he kaa wɔɔ lɛɛ wa tɔ̃ we ɔ, e ma nyɛ ma jɔ̃ a kɔni mi. E ma nyɛ ma ha nɛ a susu kaa a be nyɛe maa bu Mawu nɛ e ye mluku ɔ tue. Se ke wa ha nɛ a le kaa pi be fɛɛ be nɛ e ngɛ gbɔjɔɔ kaa waa kɛ Baiblo sisi tomi mlaahi ma tsu ní, nɛ wa tsɔɔ mɛ bɔ nɛ Yehowa ye bua wɔ ha kɛ da nyagba ko nya a, e maa ye bua wa Baiblo kaseli ɔmɛ nɛ a maa na kaa mɛ hu a ma nyɛ ma sɔmɔ Yehowa. w22.01 11-12 ¶13-14

Ke wa yaa nɔ nɛ wa susuɔ níhi a he kaa Yesu ɔ, wa maa ya nɔ maa pee wa ní kaa lɛ, nɛ lɔ ɔ ma ha nɛ waa wo su ehe ɔ. (Heb. 1:3) Eko ɔ, wa ma susu kaa ‘Yesu ye mluku, lɔ ɔ he ɔ, wa be nyɛe maa pee kaa lɛ tutuutu!’ Ke o nuɔ he jã a, mo kai níhi nɛ nyɛɛ se nɛ ɔmɛ: Kekleekle ɔ, a bɔ mo konɛ o pee o ní kaa Yehowa kɛ Yesu. Lɔ ɔ he ɔ, ke o bɔ mɔde kaa o maa kase mɛ ɔ, o be nyɛe maa pee kaa mɛ tutuutu mohu lɛɛ, se kɛ̃ ɔ, o ma nyɛ maa ye manye. (1 Mose 1:26) Nɔ́ nɛ ji enyɔ ɔ, Mawu mumi klɔuklɔu ɔ ngɛ he wami pe nɔ́ fɛɛ nɔ́ ngɛ je ɔ mi. Mawu mumi ɔ ma nyɛ maa ye bua mo nɛ o maa pee níhi nɛ jinɛ mo nitsɛ o be nyɛe maa pee ngɛ o dɛ he. Nɔ́ nɛ ji etɛ ɔ, Yehowa hyɛ we blɔ kaa amlɔ nɛ ɔ, wa ma je mumi ɔ yiblii ɔ kpo saminya kaa nihi nɛ a ye mluku. Ngɛ anɔkuale mi ɔ, wa Tsɛ nɛ ngɛ suɔmi ɔ ma tsɔse nihi nɛ a ngɛ hɛ nɔ kami kaa a maa hi zugba a nɔ ɔ jeha 1,000 konɛ a ye mluku. (Kpoj. 20:1-3) Amlɔ nɛ ɔ, nɔ́ nɛ Yehowa ngɛ hlae ngɛ wa dɛ ji kaa waa pee wa blɔ fa mi nɔ́ nɛ waa ngɔ wa hɛ kɛ fɔ e nɔ konɛ e ye bua wɔ. w22.03 9 ¶5-6

Pi sɔlemi pɛ nɛ wa ma nyɛ maa gu nɔ kɛ ha nɛ huɛ bɔmi nɛ ngɛ waa kɛ Yehowa wa kpɛti ɔ mi nɛ wa. Mawu Munyu ɔ nɛ wa maa kase kɛ asafo mi kpe nɛ wa maa ya a hu ma nyɛ maa ye bua wɔ nɛ waa hɛ kɛ su Mawu he. Anɛ nɔ́ ko ngɛ nɛ wa ma nyɛ maa pee konɛ wa ná be nɛ waa kɛ kaseɔ ní kɛ be nɛ waa kɛ yaa asafo mi kpe ɔ he se lo? Mo bi o he ke, ‘Ke i ngɛ asafo mi kpe sisi loo i ngɛ ní kasee ɔ, mɛni nɛ gblaa ye juɛmi?’ Anɛ nihi tsɛɔ mi ngɛ fon nɔ aloo a maneɔ mi sɛ gbi ngɛ ye fon aloo kɔmpuita klama kpa ko nɔ lo? Ke o ngɛ ní kasee loo o ngɛ asafo mi kpe sisi nɛ o yɔse kaa o juɛmi ngɛ si kpae ɔ, mo bi Yehowa nɛ e ye bua mo konɛ o juɛmi nɛ hi nɔ́ nɛ o ngɛ kasee ɔ nɔ. E he ma nyɛ maa wa kaa o ma kpa o nyagba amɛ a he susumi nɛ o kɛ o juɛmi nɛ ma Mawu Munyu ɔ nɔ, se e sa nɛ o pee jã hulɔ. Moo sɔle kɛ bi tue mi jɔmi nɛ maa bu o tsui kɛ o “juɛmi” he.​—Filip. 4:6, 7. w22.01 29-30 ¶12-14

Matsɛ Uzia kua ga womi. E ya Yehowa we ɔ he nɛ osɔfo ɔmɛ pɛ nɛ a ngɛ he blɔ kaa a yaa a, nɛ e ka kaa e maa sã tsopa kɛ e he via ngɛ lejɛ ɔ. Yehowa osɔfo ɔmɛ de lɛ ke: ‘Uzia, o be he blɔ nɛ o sãa tsopa kɛ e he via kɛ haa Yehowa. Osɔfo ɔmɛ pɛ ji ni nɛmɛ nɛ a hla ngɔ to nɛ a tsu nɔ́ nɛ ɔ.’ Kɛ Uzia pee e ní ha kɛɛ? Kaa e ba e he si nɛ e kplɛɛ ga womi nɔ, nɛ e je sɔlemi we ɔ oya nɔuu ɔ, eko ɔ, Yehowa ko ngɔ e tɔmi ɔ kɛ ko ke lɛ. Mohu ɔ, Uzia “mi mi fu.” Mɛni he je nɛ e kua ga womi ɔ? E susu kaa akɛnɛ matsɛ ji lɛ he je ɔ, e ngɛ he blɔ nɛ e peeɔ nɔ́ fɛɛ nɔ́ nɛ e suɔ. Se Yehowa lɛɛ e nɛ lɛ jã. He nɔ womi ha nɛ kpiti pue Uzia. “He womi nɔ hiɔ nɛ ɔ ngɛ matsɛ Uzia he hluu kɛ ya si e gbenɔ ligbi.” (2 Kron. 26:16-21) Uzia sane ɔ ha nɛ wa na kaa wa ti nɔ fɛɛ nɔ ko nɛ ma kua Baiblo ga womi ɔ, Yehowa bua be e he jɔe. w22.02 9 ¶7

Ke “su momo ɔ” ngɛ nɔ ko kudɔe ɔ, behi fuu ɔ, nɔ ɔ susuɔ ní yayahi a he, nɛ e peeɔ ní yayahi. (Kol. 3:9) Eko ɔ, e foɔ lɛ pɛ e nɔ́ mi, e mi mi fuɔ mla, e je we hɛ sa kpo, nɛ e woɔ e he nɔ. Eko ɔ, e bua jɔ bɔmi nami he fonihi kɛ videohi a hyɛmi he, nɛ e hyɛɔ videohi nɛ awi yemi ní peepeehi ngɛ mi. Atsinyɛ jemi ko be he kaa e ngɛ su kpakpa komɛ, nɛ e ma nyɛ ma pia e he ngɛ níhi nɛ e peeɔ aloo e deɔ nɛ a dɛ ɔ he. Se e be kã nɛ e kɛ ma tsake e susumi kɛ e ní peepee. (Gal. 5:19-21; 2 Tim. 3:2-5) Akɛnɛ wɔ tsuo wa yi mluku he je ɔ, wa be nyɛe ma je susumi kɛ he numi yayahi tsuo kɛ je wa tsui kɛ wa juɛmi mi. Be komɛ ɔ wa ma de nɔ́ ko loo wa maa pee nɔ́ ko nɛ pee se ɔ wa ma pia wa he. (Yer. 17:9; Yak. 3:2) Se ke wa je su momo ɔ kɛ fɔ he ɔ, suhi kɛ ní peepeehi nɛ dɛ ɔ be wa nɔ he wami náe hu. E haa nɛ wa ba peeɔ nihi nɛ a je ekpa.​—Yes. 55:7. w22.03 3 ¶4-5

Asafo mi nikɔtɔmahi, nyɛ yɔse su kpakpahi nɛ nyɛmimɛ nyumuhi kɛ yihi ngɛ ɔ. Wa ti nɔ ko be nɛ e ye mluku, se wa ti nɔ fɛɛ nɔ ngɛ su kpakpa nɛ sa kadimi. Ngɛ anɔkuale mi ɔ, be komɛ ɔ, e he maa hia nɛ asafo mi nikɔtɔmahi nɛ a wo a nyɛmimɛ nyumuhi kɛ yihi ga. Se kaa bɔ nɛ bɔfo Paulo pee ɔ, e sɛ nɛ asafo mi nikɔtɔmahi nɛ a ngɔ a juɛmi kɛ ma a nyɛmi ko ní peepee loo munyuhi nɛ e tuɔ nɛ woɔ a mi mi la a nɔ. Mohu ɔ, e sa nɛ a bɔ mɔde nɛ a ngɔ a juɛmi kɛ ma suɔmi nɛ a nyɛmi ɔ ngɛ kɛ ha Yehowa, bɔ nɛ e ngɛ si fĩe ngɛ Mawu sɔmɔmi mi ha, kɛ su kpakpahi nɛ nɔ ɔ ngɛ ɔ nɔ. Asafo mi nikɔtɔmahi nɛ a kɛ a juɛmi maa su kpakpahi nɛ a nyɛmimɛ nyumuhi kɛ yihi ngɛ ɔ nɔ ɔ yeɔ bua nyɛmimɛ ɔmɛ nɛ a nuɔ he kaa asafo ɔ tsuo suɔ mɛ. Nyɛ kai kaa Yehowa hyɛ we blɔ kaa nyɛɛ pee nyɛ ní kaa nihi nɛ a ye mluku; nɔ́ nɛ e ngɛ hlae nɛ nyɛɛ pee ji kaa nyɛ maa ye anɔkuale. (1 Kor. 4:2) O ma nyɛ ma ná nɔ mi mami kaa Mawu bua jɔ níhi nɛ o peeɔ ngɛ e sɔmɔmi mi ɔ he. Yehowa hɛ be “nyɛ ní tsumi kɛ suɔmi nɛ nyɛ je kpo ngɛ e biɛ ɔ he kɛ gu sɔmɔmi nɛ nyɛ ngɛ ni klɔuklɔu ɔmɛ sɔmɔe nɛ nyɛ ya nɔ nɛ nyɛ ngɛ mɛ sɔmɔe ɔ nɔ [jee].”​—Heb. 6:10. w22.03 31 ¶19, 21