January

Mɛni ha nɛ Yehowa kɛ Timoteo tsu ní ɔ? Ejakaa Timoteo ná Kristofohi a suhi. (Filip. 2:​19-22) Ngɛ bɔ nɛ bɔfo Paulo kale Timoteo ha a nya a, wa ma nyɛ ma de ke Timoteo baa e he si, e yeɔ anɔkuale, e tsuɔ ní wawɛɛ nɛ e ji nɔ ko nɛ a ma nyɛ maa ngɔ hɛ kɛ fɔ e nɔ. E susuɔ nyɛmimɛ ɔmɛ a he wawɛɛ. Enɛ ɔ he ɔ, Paulo suɔ Timoteo sane nɛ e ngɔ blɔ nya ní tsumi nguahi kɛ wo e dɛ. Jã kɛ̃ nɛ ke wa ná suhi nɛ Yehowa suɔ ɔ, wa he maa ba se nami kɛ ha asafo ɔ, nɛ Yehowa hu maa suɔ wɔ. (La 25:9; 138:6) Moo sɔle nɛ o susu su nɛ e sa nɛ o bɔ he mɔde ɔ he. Moo hla su pɔtɛɛ ko nɛ o suɔ nɛ o maa bɔ he mɔde. Anɛ o ma nyɛ ma ná suɔmi nɛ mi wa kaa o maa ye bua o nyɛmimɛ Kristofohi lo? Anɛ e he hia nɛ o ya nɔ nɛ o di tue mi jɔmi se nɛ o kɛ nihi a tɔmi nɛ ke mɛ lo? Ke o bi o huɛ ko nɛ nyu bi ngɛ o kɛ lɛ nyɛ kpɛti ɔ nɛ e tsɔɔ mo blɔ nɔ nɛ o maa gu konɛ o ya o hɛ mi ɔ, o ma ná he se.—Abɛ 27:6. w22.04 23 ¶4-5

Yehowa suɔ nɛ wa bua nɛ jɔ. Wa le enɛ ɔ ejakaa bua jɔmi piɛɛ mumi ɔ yiblii ɔ he. (Gal. 5:22) Akɛnɛ bua jɔmi babauu ngɛ nɔ́ hami mi pe nɔ́ ngɔmi mi he je ɔ, ke waa kɛ wa nyɛmi tsuo fiɛɛ sane kpakpa a nɛ wa ye bua wa nyɛmimɛ ngɛ blɔ slɔɔtohi a nɔ ɔ, wa bua jɔɔ wawɛɛ. (Níts. 20:35) Kaa bɔ nɛ mwɔnɛ ɔ ngmami ɔ tsɔɔ, bɔfo Paulo wo níhi enyɔ nɛ maa ye bua wɔ konɛ waa ya nɔ nɛ wa ná bua jɔmi ɔ ta. Kekleekle ɔ, e sa nɛ waa kɛ wa nyɛmi tsuo nɛ sɔmɔ Yehowa. Ke waa kɛ wa nyɛmi tsuo ngɛ lɛ sɔmɔe ɔ, lɛɛ e sa nɛ wa ná bua jɔmi. (Mat. 22:​36-38) Enyɔne, e sɛ nɛ waa kɛ wa he nɛ to ni kpahi a he. Nɔ́ fɛɛ nɔ́ nɛ wa nɔmlɔ tso mi he wami ngmɛɔ wɔ blɔ nɛ wa tsuɔ, kɛ nɔ́ nɛ wa nyɛɔ tsuɔ ngɛ tsɔsemi nɛ wa ná loo nyɛmi nɛ wa ngɛ ɔ nya a, e sa nɛ wa bua nɛ jɔ he, nɛ waa na Yehowa si ngɛ he. Ke wa na kaa ni kpahi bɔɔ mɔde ngɛ sɔmɔmi ní tsumi ɔ fã komɛ a mi pe wɔ ɔ, e sa nɛ wa bua nɛ jɔ akɛnɛ a ngɔ dloomi nike ní ɔ kɛ ngɛ Yehowa yi jee he je. w22.04 10 ¶1-2

Lakpa jami ɔmɛ a hɛ mi kpatami ɔ maa ba tlukaa, nɛ lɔ ɔ maa pee je ɔ nyakpɛ. (Kpoj. 18:​8-10) Babilon Ngua a hɛ mi kpatami ɔ maa sa je ɔ tsuo he, nɛ lɔ ɔ ma ha nɛ níhi a mi maa wa. Se Mawu we bi lɛɛ, yi mi tomi enyɔ komɛ a he je ɔ, a bua maa jɔ. Babilon Ngua a, nɛ ji Yehowa Mawu he nyɛlɔ nɛ ngɛ kɛ je blema a be si hie hu, se wɔ lɛɛ, e be kɛe nɛ a ma he wa yi wami ngɛ je yaya nɛ ɔ mi! Daniel gba kɛ fɔ si kaa “anɔkuale nile ɔ maa hiɛ,” nɛ e ba mi jã hulɔ! Amlɔ nɛ ɔ, wa nu gbamihi nɛ kɔɔ be nɛ wa ngɛ mi ɔ he ɔ sisi saminya. (Dan. 12:​4, 9, 10) Gbami nɛ ɔmɛ nɛ a ba mi pɛpɛɛpɛ ɔ ha nɛ wa na bumi nɛ mi kuɔ kɛ ha Yehowa kɛ e Munyu nɛ e je mumi mi ɔ. (Yes. 46:10; 55:11) Lɔ ɔ he ɔ, yaa nɔ nɛ o kase Ngmami ɔ, nɛ o ye bua nihi konɛ a kɛ Yehowa nɛ ná huɛ bɔmi kpakpa. Enɛ ɔ ma ha nɛ o hemi kɛ yemi ɔ mi maa wa. Yehowa maa po nihi tsuo nɛ a ngɔɔ a hɛ kɛ fɔɔ e nɔ kulaa a he piɛ, nɛ e ma ha nɛ a ná ‘tue mi jɔmi daa.’—Yes. 26:3. w22.07 6-7 ¶16-17

Kpo Jemi womi ɔ tsɔɔ kaa a to Mawu hiɔwe Matsɛ Yemi ɔ sisi, nɛ a fiee Satan kɛ je hiɔwe. (Kpoj. 12:​1-9) Enɛ ɔ ha nɛ tue mi jɔmi ba hiɔwe se zugba a nɔ lɛɛ e ngɔ nyagbahi kɛ ba. Mɛni he je? Ejakaa Satan mi mi fu nihi nɛ a kɛ anɔkuale yemi ngɛ Yehowa sɔmɔe ngɛ zugba a nɔ ɔ. (Kpoj. 12:​12, 15, 17) Kɛ wa maa pee kɛ hɛɛ wa anɔkuale yemi ɔ mi ngɛ tuami nɛ Satan ngɛ wɔ tuae ɔ tsuo se ha kɛɛ? (Kpoj. 13:10) Nɔ́ kake nɛ maa ye bua wɔ ji nɛ wa maa le nɔ́ nɛ maa ba hwɔɔ se. Kaa nɔ hyɛmi nɔ́ ɔ, ngɛ Kpo Jemi womi ɔ mi ɔ, bɔfo Yohane tsɔɔ jɔɔmi komɛ nɛ e be kɛe nɛ wa ma ná. Jɔɔmi nɛ ɔmɛ ekomɛ ji kaa a ma kpata Mawu he nyɛli a hɛ mi. Kekleekle kuku nɛ ngɛ Kpo Jemi womi ɔ mi ɔ ha nɛ wa le kaa níhi nɛ wa kaneɔ ngɛ Kpo Jemi womi ɔ mi ɔ ji níhi nɛ a kɛ “okadihi” da si kɛ ha mɛ.—Kpoj. 1:1. w22.05 8 ¶1-3

Yehowa sɔmɔli anɔkualetsɛmɛ ma ye Yehowa anɔkuale, nɛ enɛ ɔ ma ha nɛ nihi nɛ a teɔ si kɛ woɔ Yehowa a mi mi ma fu mɛ wawɛɛ nitsɛ. Enɛ ɔ he ɔ, je mahi nɛ a pee kake ɔ ma tua Mawu we bi ngɛ je ɔ mi tsuo. Baiblo ɔ tsɛ tuami nɛ ɔ ke Gog Nɛ Je Magog ɔ tuami. (Eze. 38:​14, 15) Kɛ Yehowa maa pee e ní ha kɛɛ kɛ a tua e we bi? E de wɔ ke: ‘Ye mi mi ma fu wawɛɛ.’ (Eze. 38:​18, 21-23) Kpo Jemi yi 19 ɔ tsɔɔ nɔ́ nɛ maa nyɛɛ se. Yehowa maa tsɔ e Bi ɔ konɛ e ya po e we bi a he piɛ, nɛ e ye a he nyɛli ɔmɛ a nɔ kunimi. “Hiɔwe tabo ɔmɛ” nɛ ji bɔfohi anɔkualetsɛmɛ kɛ nimli 144,000 ɔ maa piɛɛ Yesu he kɛ hwu kɛ si Gog Nɛ Je Magog ɔ. (Kpoj. 17:14; 19:​11-15) Mɛni maa je ta nɛ ɔ mi kɛ ba? A ma kpata adesahi kɛ kuuhi tsuo nɛ a teɔ si kɛ woɔ Yehowa a hɛ mi pɛsɛpɛsɛ!—Kpoj. 19:​19-21. w22.05 17 ¶9-10

Benɛ Adam kɛ Hawa tɔ̃ ɔ, e kɛ we nɛ Yehowa gba gbami ko nɛ ha nɛ a sisi bimɛ ná hɛ kɛ nɔ fɔmi. A ngma nɔ́ nɛ Yehowa de ɔ ngɛ 1 Mose 3:15 ɔ. “Ma pee o kɛ yo ɔ he nyɛli; o nina kɛ lɛ hu e nina maa pee he nyɛli. A maa fia o yi nɔ́, nɛ mo hu o maa kɔ a nane se ja.” Gbami ɔ je kpo ngɛ Baiblo mi womi nɛ sɛ hlami ɔ mi. Se ngɛ blɔ ko nɔ ɔ, Baiblo mi womi kpa amɛ tsuo kɛ jamɛ a ngmami ɔ ngɛ tsakpa. Ke a bua lɛ́ nya a, a kɛ kpa fiɔ lɛ ɔmɛ kɛ blaa. Munyu nɛ ngɛ 1 Mose 3:15 ɔ ngɛ kaa kpa nɛ fiɔ Baiblo womi ɔmɛ a mi munyu ɔmɛ kɛ blaa nɛ e peeɔ lɛ sɛ gbi kake. Sɛ gbi nɛ ɔ ji, Mawu maa tsɔ Kpɔlɔ ko nɛ e ba kpata Abosiami kɛ nihi nɛ a fĩ e se ɔ tsuo a hɛ mi. Enɛ ɔ maa pee jɔɔmi kɛ ha nihi nɛ a suɔ Yehowa a! Baiblo ɔ nɛ wa maa kase ɔ maa ye bua wɔ nɛ waa na bɔ nɛ gbami ɔ ba mi ha kɛ bɔ nɛ wa ma ná he se ha. w22.07 14 ¶1-3

Mo bi Yehowa nɛ e ha mo nile nɛ o hia konɛ o nyɛ nɛ o ye bua o bimɛ ɔmɛ nɛ a ba suɔ lɛ. (Yak. 1:5) Lɛ ji Nɔ nɛ e ma nyɛ ma ha mo ga womi kpakpa. Mɛni he je? Ha nɛ wa susu yi mi tomi enyɔ he je. Kekleekle ɔ, Yehowa ji nɔ nɛ ngɛ níhi a si kpami nɛ fɔli hia a pe kulaa. (La 36:9) Enyɔne, ga womi nɛ nile ngɛ mi nɛ e kɛ haa wɔ ɔ yeɔ bua wɔ be fɛɛ be. (Yes. 48:17) Yehowa guɔ Baiblo ɔ kɛ e we asafo ɔ nɔ kɛ yeɔ bua fɔli konɛ a tsɔse a bimɛ nɛ a suɔ lɛ. (Mat. 24:45) Kaa nɔ hyɛmi nɔ́ ɔ, o maa na ga womi kpakpahi ngɛ munyu nɛ ji “Help for the Family,” nɛ je kpo jehahi babauu ngɛ Awake! womi tɛtlɛɛ ɔ mi, nɛ́ amlɔ nɛ ɔ, e ngɛ jw.org ɔ nɔ ɔ. Jehanɛ hu ɔ, videohi nɛ a kɛ fɔ jw.org ɔ nɔ nɛ munyu bimihi kɛ dramahi ngɛ mi ɔ ma nyɛ maa ye bua fɔli nɛ a kɛ Yehowa ga womi nɛ tsu ní kɛ tsɔse a bimɛ.—Abɛ 2:​4,5. w22.05 27 ¶4-5

Ngɛ anɔkuale mi ɔ, Yehowa ji nɔ nɛ ngɔɔ tɔmi kɛ keɔ pe kulaa. Kekleekle ɔ, e pee klaalo kaa e maa ngɔ wa yayami ɔmɛ kɛ ke wɔ. Enyɔne, e le wɔ saminya. E le wa he nɔ́ fɛɛ nɔ́, nɛ lɛ pɛ nɛ e le ke ji nɔ ko pia e he kɛ je e tsui mi loo e pee we jã. Etɛne, ke Yehowa ngɔ wa yayami kɛ ke wɔ ɔ, e naa lɛ kaa nɔ́ nɛ wa pee we jamɛ a yayami ɔ kulaa. Enɛ ɔ haa nɛ wa náa he nile kpakpa, nɛ e bua jɔɔ wa he. Ngɛ anɔkuale mi ɔ, akɛnɛ wa yi mluku he je ɔ, wa maa pee yayami ko kɛ̃. Se munyu nɛ ngɛ Insight on the Scriptures, Kpo 2 ba fa 771 ɔ ma nyɛ maa wo wa bua. Lejɛ ɔ de ke: “Akɛnɛ Yehowa naa mɔbɔ nɛ e le e sɔmɔli a gbɔjɔmi he je ɔ, e he hia we nɛ a hao be fɛɛ be ngɛ a yayami ɔmɛ a he ejakaa a yi mluku. (La 103:​8-14; 130:3) Ke Yehowa sɔmɔli mia a hɛ mi nɛ a ye Mawu mlaa amɛ a nɔ ɔ, a ma nyɛ ma ná bua jɔmi. (Flp 4:​4-6; 1Yo 3:​19-22).” w22.06 7 ¶18-19

Wa yeɔ gbeye kaa nɔ yeli ɔmɛ maa te si kɛ wo wɔ, se tsa pi lɔ ɔ pɛ ji klama nɛ Satan kɛ tsuɔ ní. Ni komɛ yeɔ gbeye ngɛ bɔ nɛ a weku li maa pee a ní ha ke a ba pee Yehowa Odasefohi ɔ he. A yeɔ enɛ ɔ gbeye po pe nɛ a maa kongo mɛ. A suɔ a weku li ɔmɛ wawɛɛ nɛ a suɔ nɛ mɛ hu a ba le Yehowa. E dɔɔ mɛ kaa a weku li ɔmɛ tuɔ munyu kɛ siɔ anɔkuale Mawu ɔ kɛ e sɔmɔli. Ngɛ si fɔfɔɛ komɛ a mi ɔ, a weku li nɛ a te si kɛ wo mɛ be ko nɛ be ɔ ba kplɛɛ anɔkuale ɔ nɔ. Nɛ ke wa hemi kɛ yemi ɔ he je ɔ, wa weku li ɔmɛ kɛ wɔ po tako mi hu nɛɛ? Kɛ wa maa pee wa ní ha kɛɛ? Anɔkuale munyu nɛ ngɛ La 27:10 ma nyɛ maa wo wa bua. Ke wa kai bɔ nɛ Yehowa suɔ wɔ ha a, e maa ye bua wɔ nɛ ke waa kɛ si temi kɛ womi kpe ɔ, wa maa nu he kaa wa ngɛ slɔkee. Wa ngɛ nɔ mi mami kaa ke wa fĩ si ɔ, e maa jɔɔ wɔ. Yehowa ma ha wɔ nɔ́ fɛɛ nɔ́ nɛ wa hia ngɛ si himi mi. w22.06 16-17 ¶11-13

Benɛ Yesu ngɛ zugba a nɔ ɔ, nihi deɔ ke e ji dã delɔ, jiklɔɔtsɛ, e kɛ Abosiami he wami lɛ tsuɔ ní, e yi He Jɔɔmi Ligbi ɔ, nɛ e bui Mawu. (Mat. 11:19; 26:65; Luka 11:15; Yoh. 9:16) Se Yesu kɛ abofu ha we mɛ heto. Kaa bɔ nɛ Yesu pee ɔ, e sɛ nɛ waa kɛ abofu nɛ ha nihi heto ke a kɛ wɔ tu abofu munyu. (1 Pet. 2:​22, 23) Ngɛ anɔkuale mi ɔ, e be gbɔjɔɔ kaa wa maa ye wa he nɔ ke nihi kɛ wɔ tu munyu kɛ abofu. (Yak. 3:2) Mɛni ma nyɛ maa ye bua wɔ? Ke o ngɛ fiɛɛmi mi nɛ nɔ ko kɛ mo tui munyu ngɛ mi mi jɔmi mi ɔ, bɔɔ mɔde nɛ o mi mi ko fu. Nyɛminyumu ko nɛ a tsɛɛ lɛ ke Sam ɔ de ke, “I ngɔɔ ye juɛmi kɛ maa bɔ nɛ e he hia nɛ wetsɛ ɔ nɛ le anɔkuale nɛ kɔɔ Mawu he ɔ nɔ, nɛ i naa lɛ kaa e ma nyɛ maa pee tsakemi.” Be komɛ ɔ, wetsɛ ko mi mi ma nyɛ ma fu akɛnɛ be nɛ wa ya e ngɔ ɔ dɛ lɛ ɔ he je. Ke waa kɛ nɔ ko ngɛ munyu tue nɛ e mi mi fu ɔ, wa ma nyɛ maa sɔle kpiti, nɛ wa de Yehowa nɛ e ye bua wɔ nɛ waa to wa tsui si konɛ wa ko tu munyu nɛ sɛ, loo waa pee nɔ́ ko kɛ tsɔɔ kaa wa be bumi kɛ ha nɔ ɔ. w22.04 6 ¶8-9

Blɔ nɛ hi pe kulaa nɛ fɔli ma nyɛ maa gu nɔ kɛ ye bua a bimɛ ji Baiblo ɔ nɛ a kɛ mɛ maa kase. (2 Tim. 3:​14-17) Se Baiblo ɔ tsɔɔ blɔ kpa ko nɔ nɛ jokuɛwi ma nyɛ maa gu nɔ kɛ kase Yehowa he ní. Ngɛ Abɛ womi ɔ mi ɔ, e ngɛ heii kaa tsɛ ko ngɛ e binyumu he wami woe konɛ e hɛ nɛ ko je Yehowa suhi nɛ wa ma nyɛ maa kase ngɛ adebɔ níhi a he ɔ nɔ. (Abɛ 3:​19-21) Fɔli, e ngɛ heii kaa nyɛ bua jɔɔ ke nyɛɛ kɛ nyɛ bimɛ ɔmɛ je kpo. Nyɛɛ ngɔ jamɛ a he blɔ ɔ kɛ ye bua nyɛ bimɛ ɔmɛ konɛ a na bɔ nɛ ‘adebɔ níhi’ ma nyɛ ma ha nɛ a na Yehowa su kpakpa amɛ ha. (Rom. 1:20) Mo kadi bɔ nɛ Yesu kɛ adebɔ níhi tsɔɔ ní ha. Be ko ɔ, e de e kaseli ɔmɛ kaa a hyɛ kuakualabitehi kɛ nga nɔ mɔmɔhi. (Luka 12:​24, 27-30) E tsɔɔ e kaseli ɔmɛ nɔ́ ko nɛ he hia wawɛɛ ngɛ a hiɔwe Tsɛ ɔ he. E ha nɛ a na kaa Yehowa mi mi jɔ nɛ e haa nɔ nɔ́ faa. Enɛ ɔ tsɔɔ kaa Yehowa maa hyɛ e sɔmɔli a nɔ nɛ e ma ha mɛ niye ní kɛ nɔ́ nɛ a maa wo kaa bɔ nɛ e hyɛɔ kuakualabitehi kɛ nga nɔ mɔmɔhi a nɔ ɔ. w23.03 20-21 ¶1-4

Wa naa Yehowa si kaa kɛ gu e Bi ɔ nɔ ɔ, wa nyɛɔ nɛ wa sɔleɔ kɛ haa lɛ. Ke wa bi Yehowa nɔ́ ko ɔ, e guɔ Yesu nɔ kɛ tsuɔ wa ní bimi ɔ he ní. Ke wa sɔle ngɛ Yesu biɛ mi ɔ, Yehowa buɔ tue, nɛ e haa heto nɛ e kɛ wa tɔmi ɔmɛ keɔ wɔ ngɛ Yesu kpɔmi afɔle sami ɔ he je. (Rom. 5:1) Ngmami ɔ kale Yesu kaa e ji ‘osɔfo nɔkɔtɔma pe kulaa nɛ e hii si ngɛ Agboje ɔ matsɛ sɛ ɔ hiɔ nɔ ngɛ hiɔwe.’ (Heb. 8:1) Yesu ji wa ‘yemi kɛ bualɔ ngɛ Tsɛ ɔ ngɔ.’ (1 Yoh. 2:1) Wa naa Yehowa si kaa e ha wɔ Osɔfo Nɔkɔtɔma ko nɛ e mi mi sãa lɛ ngɛ wa he, nɛ́ e nuɔ wa gbɔjɔmi ɔmɛ a sisi, nɛ́ e “kpaa pɛɛ kɛ haa wɔ”! (Rom. 8:34; Heb. 4:15) Ke pi Yesu kpɔmi afɔle sami ɔ he ɔ, jinɛ wa be nyɛe maa sɔle kɛ ha Yehowa. E ngɔ e Bi nɛ e suɔ lɛ ɔ kɛ ha wɔ. Enɛ ɔ he je ɔ, wɔ tsuo wa kplɛɛ nɔ kaa nɔ́ ko be nɛ wa ma nyɛ maa pee kɛ to Yehowa nane mi ngɛ nike ní nɛ se be nɛ ɔ he! w22.07 23 ¶10-12

Ke a ke asimasi ji nɔ ko nɛ o ma nyɛ ma he lɛ maa ye ɔ, e tsɔɔ kaa nɔ ɔ bɔɔ mɔde kaa e maa ye e si womi nɔ nɛ e tuɔ anɔkuale. (La 15:4) Nihi le kaa a ma nyɛ maa ngɔ a hɛ kɛ fɔ e nɔ. Wa suɔ nɛ wa nyɛmimɛ ɔmɛ nɛ a na wɔ jã. Wa be nyɛe maa nyɛ nihi a nɔ kaa a he wɔ nɛ a ye. E sa nɛ waa kɛ wa ní peepee nɛ tsɔɔ kaa a ma nyɛ ma he wɔ nɛ a ye. A deɔ ke, hemi kɛ yemi nɛ nihi ma ná ngɛ o mi ɔ ngɛ kaa sika. E be gbɔjɔɔ kaa o ma ná sika, se e ma nyɛ maa je o dɛ ngɛ be kpiti mi. Yehowa ha nɛ wa ná nɔ mi mami kaa wa ma nyɛ ma he lɛ nɛ waa ye. ‘Nɔ́ tsuaa nɔ́ nɛ e peeɔ ɔ, a ma nyɛ maa fĩa kɛ fɔ nɔ.’ (La 33:4) Nɛ e hyɛɛ blɔ kaa waa kase lɛ. (Efe. 5:1) Wa bua jɔ wawɛɛ kaa Yehowa ha wɔ nyɛmimɛ babauu nɛ a suɔ wɔ nɛ wa ma nyɛ maa he mɛ ye hulɔ! E ji wɔ tsuo wa blɔ nya ní tsumi kaa wa maa pee níhi nɛ ma ha nɛ wa nyɛmimɛ ɔmɛ nɛ a nyɛ nɛ a he wɔ ye. Ke wɔ tsuo wa bɔ mɔde nɛ wa je su komɛ kaa suɔmi, he si bami, nɔ́ se kɔmi, anɔkuale yemi, kɛ he nɔ yemi kpo ɔ, lɔ ɔ ma ha nɛ nɔ fɛɛ nɔ ngɛ asafo ɔ mi ɔ maa he e sibi maa ye. Nyɛ ha nɛ waa ya nɔ nɛ waa tsɔɔ kaa wa ji nihi nɛ ni kpahi ma nyɛ maa he wɔ maa ye. Ke waa pee jã a, e maa tsɔɔ kaa wa ngɛ Yehowa kasee. w22.09 8 ¶1-2; 13 ¶17

E ngɛ mi kaa wa ngɛ nyɛmimɛ nyumuhi kɛ yihi fuu ngɛ wa we asafo ɔmɛ a mi, se be komɛ ɔ, wa ma nyɛ maa nu he kaa e piɛ wɔ pɛ, nɛ wa susu kaa e sa nɛ wa tsu nyagba a he ní ngɛ wa dɛ he. Yehowa sume nɛ waa nu he jã kulaa. Mo susu bɔ nɛ Yehowa kɛ gbalɔ Eliya ye ha a he nɛ o hyɛ. Yehowa wo lɛ he wami kaa e tu munyu. Yehowa bi Eliya si enyɔ ke: “Mɛni o ngɛ pee ngɛ hiɛ ɔ?” (1 Ma. 19: 9, 13) Eliya de Yehowa bɔ nɛ e ngɛ he nue ha, nɛ Yehowa bu lɛ tue. Jehanɛ hu ɔ, Yehowa ha nɛ Eliya le kaa Israel bi kpahi fuu ngɛ nɛ a ngɛ lɛ sɔmɔe. (1 Ma. 19: 11, 12, 18) Ngɛ anɔkuale mi ɔ, Eliya tsui nɔ e mi benɛ e na bɔ nɛ Yehowa ha e sɔlemi ɔ heto ha a. Yehowa ngɔ ní tsumihi nɛ a he hia wawɛɛ kɛ wo Eliya dɛ. Yehowa de lɛ kaa e pɔ Hazael nu kaa Siria matsɛ, e pɔ Yehu hu nu nɛ e ye matsɛ ngɛ Israel, nɛ e pɔ Elisha nu konɛ e sɔmɔ kaa gbalɔ. (1 Ma. 19: 15, 16) Ní tsumi nɛ ɔmɛ nɛ Yehowa kɛ wo Eliya dɛ ɔ ye bua lɛ nɛ e ngɔ e juɛmi kɛ ma ní kpakpahi nɛ maa ye bua lɛ ɔ nɔ. Jehanɛ hu ɔ, Mawu ha nɛ e ná huɛ kpakpa nɛ ji Elisha. w22.08 8 ¶3; 9 ¶5

Anɛ a ma Matsɛ Yemi Asa ha nyɛ, aloo a ba dla nyɛ Matsɛ Yemi Asa a ha nyɛ lo? Ke jã a, lɛɛ atsinyɛ jemi ko be he kaa o kai kekleekle be nɛ nyɛ pee asafo mi kpe ngɛ Matsɛ Yemi Asa nɛ ɔ nɔ benɛ a gbe nya a. E ngɛ heii kaa o na Yehowa si wawɛɛ. Eko ɔ, o bua jɔ hluu kaa benɛ nyɛ ngɛ lae kɛ je asafo mi kpe ɔ sisi ɔ, e piɛ bɔɔ nɛ o ko fo ya. Wa Matsɛ Yemi Asahi nɛ a maa mɛ saminya a woɔ Yehowa hɛ mi nyami. Se tsu mami ní tsumi kpa ko ngɛ nɛ ke waa kɛ wa he womi ɔ, e woɔ Yehowa hɛ mi nyami pe enɛ ɔ po. Ní tsumi nɛ ɔ he hia wawɛɛ pe tsu nitsɛ mami. Lɔ ɔ ji nɛ wa maa fia nihi nɛ a baa Matsɛ Yemi Asa a nɔ ɔ kɛ ma si. Enɛ ɔ ji nɔ́ nɛ bɔfo Paulo ngɛ he susue benɛ e ngma wa mwɔnɛ ɔ ngmami ɔ nɛ. Bɔfo Paulo pee nɔ hyɛmi nɔ́ nɛ sa kadimi kɛ ha wɔ. E ji nɔ ko nɛ e nyɛɔ woɔ e nyɛmimɛ Kristofohi he wami wawɛɛ. E mi mi sãa lɛ ngɛ e nyɛmimɛ ɔmɛ a he. Wa ma nyɛ maa kase lɛ, nɛ waa fia wa nyɛmimɛ ɔmɛ kɛ ma si mwɔnɛ ɔ.—1 Kor. 11:1. w22.08 20 ¶1-2

E sa nɛ Kristofo no nɛ e suɔ kaa e pee nɔ́ nɛ da ngɛ Mawu hɛ mi ɔ nɛ́ e ye anɔkuale ngɛ e jua yemi kɛ e ní tsumi mi. Nɔ nɛ peeɔ nɔ́ nɛ da a suɔ dami sane yemi, nɛ e sume nɔ sisimi. E susuɔ bɔ nɛ Yehowa naa yi mi kpɔhi nɛ e mwɔɔ ha a he. E peeɔ jã bɔ nɛ pee nɛ e “sa [Yehowa] hɛ mi kɛ pi si.” Baiblo ɔ kale Yehowa kaa E Ngɔ Nɛ Dami Ní Peemi Je. Enɛ ɔ he je ɔ, a tsɛɛ lɛ ke, ‘Mawu nɛ yeɔ dami sane.’ (Yer. 50:7) Akɛnɛ Yehowa ji Bɔlɔ he je ɔ, lɛ pɛ lɛ e ngɛ he blɔ nɛ e woɔ mlaa ngɛ nɔ́ nɛ da kɛ nɔ́ nɛ dɛ he. Yehowa le nɔ́ nɛ da kɛ nɔ́ nɛ dɛ pe bɔ nɛ wa le. (Abɛ 14:12; Yes. 55:​8, 9.) Se kɛ̃ ɔ, akɛnɛ a bɔ wɔ ngɛ Mawu subai nɔ he je ɔ, wa ma nyɛ maa pee nɔ́ nɛ da ngɛ e hɛ mi. (1 Mose 1:27) Nɛ wa suɔ kaa wa maa pee jã. Suɔmi nɛ wa ngɛ kɛ ha wa Tsɛ ɔ woɔ wɔ he wami nɛ wa peeɔ nɔ́ fɛɛ nɔ́ nɛ wa ma nyɛ kɛ kaseɔ lɛ.—Efe. 5:1. w22.08 27 ¶5-6

Ke wa hao loo wa kɔni mi jɔ̃ ɔ, eko ɔ, wa ma susu kaa e he hia nɛ waa pee he nɔ́ ko konɛ wa haomi ɔ nya nɛ ba si. Tɔmi ko be he kaa wa maa pee jã, se e sa nɛ waa hyɛ saminya nɛ wa ko pee nɔ́ ko nɛ Yehowa sume. (Efe. 5:​10-12, 15,16) Ngɛ sɛ womi nɛ bɔfo Paulo ngma kɛ ya ha Kristofohi nɛ a hi Filipi ɔ mi ɔ, e wo mɛ he wami kaa a susu ‘nɔ́ fɛɛ nɔ́ nɛ da, nɔ́ fɛɛ nɔ́ nɛ he tsɔ, nɔ́ fɛɛ nɔ́ nɛ a suɔ, kɛ nɔ́ fɛɛ nɔ́ nɛ ji je mi bami nɛ sa’ a he. (Filip. 4:8) E ngɛ mi kaa pi hɛja jemi he munyu pɔtɛɛ nɛ Paulo ngɛ tue mohu lɛɛ, se e sa kaa nɔ́ nɛ e de ɔ nɛ ye bua wɔ konɛ waa hla hɛja jemi nɛ sa. Moo ka enɛ ɔ nɛ o hyɛ: Ngɛ ngmami nɛ ɔ mi ɔ, he fɛɛ he nɛ o maa na kaa a ngma munyu nɛ ji “nɔ́ fɛɛ nɔ́” ngɛ ɔ, ngɔɔ “lahi,” “sinihi,” “womihi,” kɛ “video nɔ fiɛmihi” kɛ da nane mi. Ke o pee jã a, lɔ ɔ maa ye bua mo nɛ o maa na níhi nɛ Mawu bua jɔ he kɛ níhi nɛ e bua jɔɛ he. Wa suɔ nɛ waa ba wa je mi ngɛ Yehowa sisi tomi mlaahi nɛ da a nya.—La 119:​1-3. w22.10 9 ¶11-12

Loko “nihi nɛ a dɛ” ɔ ma gbo ɔ, a kpɛti ni komɛ pee yi wu tso ní, kɛ níhi nɛ sɛ. Enɛ ɔ he je ɔ, e he maa hia kaa a tsɔse mɛ nɛ a ba a je mi ngɛ Yehowa blɔ tsɔɔmi nɛ da a nya. Bɔ nɛ pee nɛ nɔ́ nɛ ɔ nɛ ya nɔ ɔ, Mawu Matsɛ Yemi ɔ maa to blɔ nya konɛ a tsɔɔ nihi ní ngɛ je ɔ mi tsuo. Mɛnɔmɛ nɛ a maa tsɔɔ nihi nɛ a dɛ ɔ ní ɔ? Mɛ ji asafo kuu ngua a, kɛ nihi nɛ a da nɛ a ma tle mɛ si ɔ nɛ. Bɔ nɛ pee nɛ a ngma nihi nɛ a dɛ ɔ a biɛ ngɛ wami womi ɔ mi ɔ, e he maa hia nɛ a ha nɛ huɛ bɔmi kpakpa nɛ hi a kɛ Yehowa a kpɛti nɛ a jɔɔ a he nɔ ha lɛ. Yesu Kristo kɛ nihi nɛ a pɔ mɛ nu ɔ maa hyɛ bɔ nɛ nihi nɛ a dɛ ɔ maa pee a ní ha ngɛ nɔ́ nɛ a ngɛ mɛ tsɔɔe ɔ he. (Kpoj. 20:4) Nɔ fɛɛ nɔ nɛ ma kua ke e kɛ nɔ́ nɛ a ngɛ lɛ tsɔɔe ɔ be ní tsue ɔ, a ma kpata e hɛ mi—ke e ye jeha 100 po. (Yes. 65:20) Akɛnɛ Yehowa kɛ Yesu le níhi nɛ ngɛ wa tsui mi he je ɔ, a maa hyɛ kaa nɔ ko nɔ ko be nɔ́ ko pee kɛ puɛ nɔ́ ko ngɛ je ehe ɔ mi.—Yes. 11:9; 60:18; 65:25. w22.09 17 ¶11-12

Ngɛ kuku nɛ ɔ mi ɔ, “blɔ nyahi nɛ a nɔ kuɔ” ɔ daa si kɛ ha adesa nɔ yeli nɛ a ngɛ he wami ngɛ ni kpahi a nɔ. E sa nɛ Kristofohi nɛ a ba a he si kɛ ha nɔ yeli nɛ ɔmɛ. Nɔ yeli nɛ ɔmɛ haa nɛ níhi yaa nɔ saminya, a hyɛɛ konɛ nihi nɛ a ye mlaa nɔ, nɛ be komɛ po ɔ, a poɔ Yehowa we bi a he piɛ. (Kpoj. 12:16) Enɛ ɔ he ɔ, e sa nɛ waa wo tó nɛ waa kɛ bu nɛ sa nɛ ha mɛ. (Rom. 13:7) Se nɔ yeli nɛ ɔmɛ ngɛ he blɔ ejakaa Yehowa ngmɛ mɛ blɔ kaa a hi si. Yesu ha nɛ oti nɛ ɔ pee heii benɛ Roma Amlaalo Pontio Pilato ngɛ lɛ munyu bie ɔ. Benɛ Pilato de ke e ngɛ he wami nɛ e ma nyɛ ma ha nɛ a gbe Yesu loo a ngmɛɛ e he ɔ, Yesu de lɛ ke: “Kaa pi hiɔwe nɛ a je nɛ a ha mo he wami ɔ, jinɛ o be he wami ko kulaa ngɛ ye nɔ.” (Yoh. 19:11) Kaa bɔ nɛ e ji ngɛ Pilato blɔ fa mi ɔ, huzu ngɛ he blɔhi nɛ adesa nɔ yeli tsuo ngɛ ɔ he. w22.10 14 ¶6

Yehowa ha nɛ Matsɛ David ngma bɔ nɛ si himi maa hi ha hwɔɔ se ke matsɛ nɛ e le ní nɛ e yeɔ anɔkuale ba bɔni nɔ yemi. (La 37:​10, 11, 29) Ke waa kɛ nihi ngɛ Paradeiso nɛ maa ba a he ní sɛɛe ɔ, wa pɔɔ La 37:11 ɔ kanemi. E hi kaa wa peeɔ jã, ejakaa Yesu tsɛ jamɛ a ngmami ɔ se ngɛ e Yoku ɔ Nɔ Fiɛɛmi ɔ mi, nɛ e tsɔɔ kaa e maa ba mi hwɔɔ se. (Mat. 5:5) Se David munyu ɔ hu tsɔɔ bɔ nɛ si himi ɔ maa hi ha ngɛ Matsɛ Salomo be ɔ mi. Benɛ Salomo ngɛ Israel nɔ yee ɔ, Mawu we bi hi si ngɛ tue mi jɔmi mi ngɛ “zugba kpakpa nɛ baa ní saminya” a nɔ, nɛ a ngɛ nɔ́ fɛɛ nɔ́. Mawu de mɛ ke: ‘Ke nyɛ bu ye gbi tue ɔ, ma ha nyɛ tue mi maa jɔ nyɛ ngɛ nyɛ zugba a nɔ. Nyɛ maa hwɔ mahe fuaa, nɛ nyɛ be nɔ ko gbeye yee.’ (3 Mose 20:24; 26:​3, 6) Si womi nɛ ɔmɛ ba mi benɛ Salomo ngɛ Israel ma a nɔ yee ɔ. (1 Kron. 22:9; 29:​26-28) Munyu nɛ ngɛ La 37:​10, 11, 29 ɔ, ba mi ngɛ blema be ɔ mi, nɛ e maa ba mi hwɔɔ se hulɔ. w22.12 10 ¶8

Akɛnɛ waa ji Kristofohi he je ɔ, e sa nɛ waa kɛ blɔ tsɔɔmi nɛ tsu ní. Baiblo ɔ tsɔɔ wɔ nɔ́ nɛ ke wa pee ɔ, wa maa ye manyɛ. E de ke: “E sa kaa o toɔ ga saminya loko o yaa ta. Ke o ngɛ ga woli babauu ɔ, o yeɔ kunimi.” (Abɛ 24:6) Kɛ ngmami nɛ ɔ maa ye bua wɔ ha kɛɛ konɛ wa ba pee fiɛɛli kɛ ní tsɔɔli nɛ a he be. Wa bɔɔ mɔde kaa waa kɛ blɔ tsɔɔmihi nɛ a kɛ haa wɔ ɔ ma tsu ní pe nɛ wa maa fiɛɛ, aloo wa maa tsɔɔ ní bɔ nɛ wa suɔ. A kɛ blɔ tsɔɔmihi nɛ nile ngɛ mi haa wɔ ngɛ wa we asafo mi kpe ɔmɛ a sisi. Ke wa ya asafo mi kpehi ɔ, tsɔɔli nɛ a he be yeɔ bua wɔ nɛ a tsɔɔ wɔ bɔ nɛ wa maa tsɔɔ ni kpahi Baiblo ɔ ha. Jehanɛ hu ɔ, Yehowa asafo ɔ haa wɔ videohi kɛ womihi nɛ maa ye bua nihi konɛ a nu Baiblo ɔ sisi saminya. Wa bua jɔ ga womi nɛ ngɛ Mawu Munyu ɔ mi ɔ he wawɛɛ nitsɛ! Ke pi ga womi nɛ ɔmɛ a he ɔ, jinɛ kɛ wa ko pee kɛɛ?—Abɛ 3:​13-17. w22.10 23 ¶18-19

Ke wa ye niye ní ɔ, wa nɔmlɔ tso ɔ náa he wami. Jã kɛ̃ nɛ ke wa kase Mawu Munyu ɔ nɛ wa pue wa yi mi tɛ ngɛ he ɔ, wa hemi kɛ yemi mi waa. Yehowa suɔ kaa waa nu e munyu ɔ sisi saminya. Wa ma nyɛ maa pee jã kɛ gu sɔlemi, ní kanemi kɛ yi mi tɛ puemi nɔ. Kekleekle ɔ, e sa nɛ waa sɔle kɛ dla wa tsui. Lɔ ɔ se ɔ, e sa nɛ waa kane Baiblo ɔ. Nɛ nyagbe ɔ, waa to wa tsui si kɛ pue wa yi mi tɛ, nɛ wa susu nɔ́ nɛ wa kane ɔ he saminya. Ke wa pee jã a, mɛni maa je mi kɛ ba? Ke wa yaa nɔ nɛ wa pueɔ wa yi mi tɛ ɔ, wa maa nu Mawu Munyu ɔ sisi saminya, nɛ e maa wo wa hemi kɛ yemi mi he wami. Mɛni he je nɛ e he hia kaa waa kane Baiblo ɔ, nɛ́ wa pue wa yi mi tɛ ngɛ he? Ke wa pee jã a, e ma ha nɛ wa ná he wami nɛ wa hia konɛ wa kɛ fiɛɛ Matsɛ Yemi sɛ gbi ɔ mwɔnɛ ɔ. E maa ye bua wɔ nɛ waa fiɛɛ kojomi sɛ gbi ɔ nɛ nya wa a hwɔɔ se hulɔ. Jehanɛ hu ɔ, ke wa pueɔ wa yi mi tɛ ngɛ Yehowa su ɔmɛ a he ɔ, huɛ bɔmi nɛ ngɛ waa kɛ lɛ wa kpɛti ɔ mi maa hi wae. w22.11 6-7 ¶16-17

Yesu tsɔɔ kaa nɔ́ nɛ ma ha nɛ nihi tsuo nɛ a le e se nyɛɛli anɔkualetsɛmɛ ɔmɛ ɔ ji suɔmi nɛ ngɛ a kpɛti ɔ. Ngɛ anɔkuale mi ɔ, suɔmi nɛ ngɛ Yehowa we bi a kpɛti ɔ sa kadimi wawɛɛ. Se kɛ̃ ɔ, Yehowa Odasefohi yi mluku. (1 Yoh. 1:8) Enɛ ɔ he ɔ, ke wa ngɛ nihi nɛ a ngɛ asafo ɔ mi lee ɔ, wa ma nyɛ maa hi a gbɔjɔmi komɛ nae. (Rom. 3:23) Aywilɛho sane ji kaa nihi fuu ha nɛ ni kpahi a gbɔjɔmi tɔ̃tɔ̃ a nane. Mɛni blɔ nɔ Yesu gu kɛ je suɔmi kpo kɛ tsɔɔ e bɔfo ɔmɛ? Mwɔnɛ ɔ, mɛni blɔ nɔ wa ma nyɛ maa gu kɛ kase e nɔ hyɛmi nɔ́ ɔ?’ Ngɛ anɔkuale mi ɔ, Odasefo ɔmɛ hu bɔɔ mɔde kaa a ma susu sane bimi nɛ ɔmɛ a he. Jã nɛ wa maa pee ɔ, maa ye bua wɔ nɛ wa je suɔmi nɛ mi kuɔ kpo kɛ tsɔɔ wa sibi, titli, ke wa le a gbɔjɔmihi po.—Efe. 5:2. w23.03 26-27 ¶2-4

Akɛnɛ je nɛ ɔ nyagbe ɔ su si ta he je ɔ, wa le kaa waa kɛ nyagbahi ma nyɛ maa kpe ngɛ asafo ɔ mi. Nyagba nɛ ɔmɛ ma nyɛ ma ha nɛ e he maa wa ha wɔ kaa wa maa ye Yehowa anɔkuale. Enɛ ɔ he ɔ, e sa nɛ wa hɛ nɛ hi wa he nɔ. Ke o nyɛmi Kristofo no ko pee mo nɔ́ ko nɛ e dɔ mo ɔ, koo ngɔ dɔdɔɛ ɔ kɛ wo o mi. Ke a tsɔse mo ɔ, koo ngɔ o juɛmi kɛ ma zo nɛ maa gbe mo ɔ nɔ. Moo kplɛɛ tsɔsemi ɔ nɔ, nɛ o pee tsakemihi nɛ he hia kaa o pee ɔ. Ke Yehowa asafo ɔ pee tsakemi ko nɛ e sa o he ɔ, moo je o tsui mi nɛ o kplɛɛ tsakemi ɔ nɔ, nɛ o kɛ tsu ní. Ke o kɛ si himi ko kpe nɛ́ ma nyɛ ma ha nɛ e he maa wa ha mo kaa o maa ya nɔ maa ye Yehowa anɔkuale ɔ, ngɔɔ o hɛ kɛ fɔ Yehowa kɛ e we asafo ɔ nɔ. moo pee kpoo, nɛ o susu níhi a he saminya, nɛ o na níhi kaa bɔ nɛ Yehowa naa níhi ɔ. Moo sɔle kɛ bi Yehowa yemi kɛ buami. Ko je o he ngɛ nyɛmimɛ ɔmɛ a he. Ke o pee jã a, Satan be nyɛɛe ma je mo kɛ je Yehowa kɛ e we asafo ɔ he gblegbleegble.—Yak. 4:7. w22.11 24-25 ¶14-16

Asafo mi nikɔtɔma amɛ yeɔ bua nyɛmimɛ ɔmɛ nɛ a dlaa a he kɛ toɔ loko oslaa ko maa ba. A tsɔɔ asafo ɔ tsuo blɔ nɔ nɛ a maa gu konɛ a kɛ po a he piɛ kɛ blɔ nɔ nɛ a maa gu kɛ nu asafo mi nikɔtɔma amɛ he. Mɛni ji nɔ́ nɛ mo nitsɛ o ma nyɛ maa pee? Ke oslaa ko ba ngɛ he nɛ o ngɛ ɔ, mo bi asafo mi nikɔtɔma amɛ konɛ a tsɔɔ mo nɔ́ nɛ o ma nyɛ maa pee kɛ ye bua. Eko ɔ, o ma nyɛ ma ha nɛ nihi nɛ oslaa a ha nɛ a je a wehi a mi, loo nihi nɛ a ngɛ ye buae ɔ nɛ a ba to o we ɔ mi be bɔɔ. O ma nyɛ ma ha nyɛmimɛ nɛ oslaa a ba a nɔ ɔ niye ní loo ní kpahi nɛ hia mɛ. Ke he nɛ oslaa a ba ngɛ ɔ kɛ ɔ, loloolo ɔ, o ma nyɛ maa ye bua. Mɛni blɔ nɔ o maa gu kɛ pee jã? Moo sɔle ha nihi nɛ oslaa a ba a nɔ ɔ. (2 Kor. 1:​8-11) O ma nyɛ ma ha yemi kɛ buami kɛ fĩ je kɛ wɛ ní tsumi ɔ se konɛ a kɛ tsu oslaa a he ní. (2 Kor. 8:​2-5) Ke o ma nyɛ maa hia blɔ kɛ ya he nɛ oslaa a ba ngɛ ɔ, mo bi nikɔtɔma amɛ nɔ́ nɛ o ma nyɛ maa pee kɛ ye bua. Ke a fɔ̃ mo nine kaa o ya ye bua a, a ma ha mo tsɔsemi nɛ maa ye bua mo konɛ a kɛ mo nɛ tsu ní ngɛ he nɛ o he maa hia ngɛ, kɛ be nɛ o he maa hia. w22.12 24 ¶8; 25 ¶11-12

A ngma munyu nɛ ɔ kɛ ya ha nyumuhi kɛ yihi nɛ a ji Kristofohi nɛ a ngɛ Korinto ɔ. Jinɛ be ko nɛ be ɔ, a kpɛti ni komɛ ji gba puɛli, ni kpahi hu ngɔ a he kɛ wo nyumu kɛ nyumu loo yo kɛ yo a bɔmi nami mi, nɛ ni komɛ hu ji dã deli. (1 Kor. 6:​9-11) Anɛ o susu kaa benɛ a baptisi mɛ se po ɔ, a ná we akɔnɔ yaya ko hu lo? Pi jã kulaa nɛ e ji. E ngɛ mi kaa nyɛmimɛ nɛ ɔmɛ tsuo ji Kristofohi nɛ a pɔ mɛ nu mohu lɛɛ, se ngɛ anɔkuale mi ɔ, a ji adesahi nɛ a yi mluku. E ngɛ heii kaa a ná akɔnɔ yayahi be komɛ. Enɛ ɔ he ɔ, e sɛ nɛ wa kɔni mi nɛ jɔ̃ ngɛ si fɔfɔɛ kaa jã a mi. Mɛni he je? Ejakaa ke akɔnɔ yaya ko ngɛ wɔ haoe po ɔ, wa le kaa nɔ ko hu kɛ jamɛ a ka a kpe nɛ e nyɛ nɛ e ye nɔ. Ngɛ anɔkuale mi ɔ, o ma nyɛ ma ha nɛ o ‘he nɛ wa ngɛ hemi kɛ yemi ɔ mi be fɛɛ be, ejakaa o le kaa kikɛmɛ amanehlu nɛ ɔmɛ nɔuu nɛ nyɛmimɛ a kuu ɔ tsuo ngɛ nae.’—1 Pet. 5:9. w23.01 12 ¶15

Yesu de Yehowa konɛ e bu e kaseli ɔmɛ a he. (Yoh. 17:11) Mɛni he je nɛ enɛ ɔ haa nɛ wa peeɔ kã a? Ejakaa Yehowa he wa kulaa pe wa he nyɛli ɔmɛ. (1 Yoh. 4:4) E naa nɔ́ fɛɛ nɔ́. Ngɛ anɔkuale mi ɔ, wa ngɛ nɔ mi mami kaa ke wa ngɔ wa hɛ kɛ fɔ Yehowa nɔ ɔ, wa be gbeye yee nɛ wa maa pee kã. Anɛ be komɛ ɔ, o yeɔ gbeye kaa o ma ha nɛ nihi nɛ o kɛ mɛ yaa sukuu loo nihi nɛ o kɛ mɛ tsuɔ ní ɔ nɛ a le kaa Yehowa Odasefo no ji mo? Anɛ o ngɛ o nane si gblae kaa o ma ha nɛ a baptisi mo aloo o maa je fiɛɛmi yami sisi, ejakaa o ngɛ gbeye yee kaa eko ɔ, nihi maa tu munyu kɛ si mo lo? Ko ha nɛ susumi nɛ ɔmɛ nɛ a tsi o nya nɛ o ko pee nɔ́ nɛ o le kaa e da. Moo je o tsui mi nɛ o sɔle ha Yehowa. Mo de lɛ nɛ e wo mo he wami konɛ o pee e suɔmi nya ní. Ke o na bɔ nɛ Yehowa ngɛ o sɔlemi ɔmɛ a heto hae ha a, e maa wo mo he wami wawɛɛ nɛ o maa pee kã.—Yes. 41:​10, 13. w23.01 29 ¶12; 30 ¶14

Yesu bi Farisi bi ɔmɛ ke: ‘Anɛ nyɛ kane we Ngmami ɔ lo?’ E pee jã konɛ e kɛ je susumi nɛ dɛ nɛ a ná ngɛ Ngmami ɔmɛ a he ɔ kpo. (Mat. 12:​1-7) Jamɛ a be ɔ mi ɔ, Farisi bi ɔmɛ tsɔɔ kaa Yesu kaseli ɔmɛ yi He Jɔɔmi Ligbi ɔ he mlaa a nɔ. Yesu tsɛ ngmami enyɔ komɛ a se kɛ ha mɛ heto. E tsɛ ngmami ko se ngɛ Hosea womi ɔ mi konɛ e kɛ ha nɛ a na kaa a nui nɔ́ he je nɛ a wo He Jɔɔmi Ligbi ɔ he mlaa a sisi, nɛ e ha nɛ a na kaa a nɛ nɔ mɔbɔ. Mɛni he je nɛ a kɛ nɔ́ nɛ a kaneɔ ngɛ Mawu Munyu ɔ mi ɔ tsu we ní ɔ? Ejakaa a kaneɔ Mawu Munyu ɔ konɛ a kɛ hla tɔmihi ngɛ ni kpahi a he, nɛ a kɛ wo a he nɔ hulɔ. Su nɛ ɔ ha we nɛ a nu nɔ́ nɛ a kaneɔ ɔ sisi. (Mat. 23:23; Yoh. 5:​39, 40) Jehanɛ hu ɔ, mo susu Mateo 19:​4-6 he nɛ o hyɛ. Ngɛ lejɛ ɔ, Yesu kpale bi Farisi bi ɔmɛ sane nɛ ɔ nɔuu ke: ‘Anɛ nyɛ kane we Ngmami ɔ lo?’ E ngɛ mi kaa a kane adebɔ he sane ngɛ Baiblo ɔ mi mohu lɛɛ, se a ma a hɛ kɛ fɔ nɔ́ nɛ e tsɔɔ ngɛ bɔ nɛ Mawu naa gba si himi ha a he ɔ nɔ. Nɔ́ nɛ wa kaseɔ ngɛ Yesu munyu nɛ ɔ mi ji kaa e sa nɛ wa ná juɛmi nɛ da ke wa ngɛ Baiblo ɔ kanee. E sɛ nɛ waa pee kaa Farisi bi ɔmɛ, mohu ɔ, e sa nɛ waa ba wa he si nɛ waa pee klaalo kaa wa maa kase ní kpahi. w23.02 12 ¶12-13

Yehowa wo Israel bi ɔmɛ Mlaahi nɛ maa po a he piɛ konɛ a ko pee níhi nɛ maa ye mɛ awi be mi nɛ a ngɛ a wehi a mi loo be mi nɛ a ngɛ ní tsue. (2 Mose 21:​28, 29; 5 Mose 22:8) Ke nɔ ko ji blɔ nɛ e gbe nɔ po ɔ, e ngɔɔ haomi ngua kɛ baa e nɔ. (5 Mose 19:​4, 5) Mlaa a po tsɔɔ kaa ke nɔ ko ye bi nɛ e ngɛ e nyɛ mi mi awi be mi nɛ e ji blɔ po ɔ, e sa nɛ a gbla e tue. (2 Mose 21:​22, 23) Ngmami ɔ ha nɛ e pee heii kaa Yehowa suɔ nɛ wa yɔse níhi nɛ ma nyɛ maa ye wɔ awi ɔ. Ke wa pee we níhi nɛ maa ye wɔ awi ngɛ wa wehi a mi kɛ wa ní tsumi hehi ɔ, lɔ ɔ tsɔɔ kaa wa hɛ sa nike ní nɛ ji wami nɛ Mawu kɛ ha wɔ ɔ. Wa sakeɔ ní komɛ nɛ ma nyɛ maa plaa nɔ, tsopahi nɛ gbeɔ nɔ, kɛ tsopa kpahi kɛ fɔɔ he, nɛ wa hyɛɔ saminya konɛ jokuɛwi kɛ ni kpahi a nine nɛ ko su nɔ. Jã nɔuu kɛ̃ nɛ e sa nɛ waa hyɛ saminya ke wa slɛ la loo wa su la, waa kɛ nyu ma la nɔ, loo waa kɛ dadehi loo klamahi ngɛ ní tsue. E sa nɛ wa hɛ nɛ hi ní nɛ ɔmɛ a he. Ke wa hɛɛ lɔle ɔ, e sɛ nɛ wa ha nɛ wa fon nɛ gbla wa juɛmi. Jehanɛ hu ke wa nu tsopa ko nɛ deɔ nɔ, loo wa nu dã, loo mahe ngɛ wa hɛ mi ɔ, e sɛ nɛ waa hɛɛ lɔle. w23.02 21-22 ¶7-9

Yehowa ji Tsɔɔlɔ nɛ e mi mi jɔ, e toɔ e tsui si, nɛ e nuɔ nɔ́ sisi. Yehowa ngɔɔ e juɛmi kɛ maa su kpakpahi nɛ nihi nɛ e tsɔɔ mɛ ní ɔ ngɛ ɔ nɔ. (La 130:3) E hyɛ we blɔ kaa waa pee níhi nɛ wa be nyɛe maa pee. Mo kai kaa kalegbɔ ɔ nɛ e bɔ ɔ ngɛ nyakpɛ. (La 139:14) Wa Bɔlɔ ɔ suɔ nɛ wa bua nɛ jɔ ní kasemi he, nɛ waa ya nɔ nɛ waa kase e he ní kɛ ya neneene. Enɛ ɔ he ɔ, nile ngɛ mi kaa wa ma ha nɛ Baiblo ɔ mi anɔkuale ɔ nɛ “jlo” wɔ. (1 Pet. 2:2) Ngɔɔ otihi nɛ o ma nyɛ maa su he ɔ kɛ ma o hɛ mi, nɛ o bɔ mɔde nɛ o kase Baiblo ɔ be fɛɛ be. (Yosh. 1:8) Yehowa maa ye bua mo nɛ o bua maa jɔ ní kanemi kɛ ní kasemi he wawɛɛ. Nile pɛ nɛ́ o ma ná a pi. Nɔ́ he je nɛ o suɔ nɛ o ná nile ji kaa o suɔ nɛ o kase Yehowa he ní babauu konɛ o suɔ lɛ, nɛ o ná e mi hemi kɛ yemi. (1 Kor. 8:​1-3) Ke o ngɛ Yehowa he ní kasee ɔ, yaa nɔ nɛ o bi lɛ nɛ e ha mo hemi kɛ yemi fuu. (Luka 17:5) Yehowa jeɔ suɔmi mi nɛ e haa sɔlemihi kaa jã a heto. w23.03 10 ¶11, 13

Yesu sume nɛ e kaseli ɔmɛ nɛ a hi si gu be mi nɛ a ngɛ mlɛe nɛ nyagbe ɔ nɛ ba a. Enɛ ɔ he ɔ, e ha mɛ ní tsumi nɛ a tsu. E fã mɛ ke a fiɛɛ sane kpakpa a “ngɛ Yerusalɛm, kɛ Yudea tsuo, kɛ Samaria, kɛ [ya] su zugba a nɔ hehi nɛ a kɛ wawɛɛ ɔ.” (Níts. 1:​6-8) Ní tsumi nɛ ɔ kle wawɛɛ! Enɛ ɔ he ɔ, a he nɛ a kɛ ha kɛ tsu ní tsumi nɛ ɔ ha nɛ a kɛ a be tsu ní saminya. Bɔ nɛ pee nɛ waa hyɛ wa he nɔ saminya a, e ma bi nɛ waa hyɛ bɔ nɛ waa kɛ wa be tsuɔ ní ha. “Níhi nɛ wa hyɛ we blɔ” ma nyɛ maa ba wa ti nɔ fɛɛ nɔ ko nɔ. (Fiɛɛ. 9:​11, NW) Wa ma nyɛ ma gbo be mi nɛ wa hyɛ we blɔ. Wa ma nyɛ maa ngɔ wa be kɛ tsu ní saminya kɛ gu Yehowa suɔmi nya ní nɛ wa maa pee, nɛ wa ma ha nɛ huɛ bɔmi nɛ ngɛ waa kɛ lɛ wa kpɛti ɔ mi maa wa a nɔ. (Yoh. 14:21) Enɛ ɔ he ɔ, e sa nɛ waa ‘da si kpɛii, waa du si, nɛ be fɛɛ be ɔ, wa tsu babauu ngɛ Nyɔmtsɛ ɔ ní tsumi ɔ mi.’ (1 Kor. 15:58) Ke wa pee jã a, wa gbo jio, jeɔ lɛ ba nyagbe jio, wa be wa he piae kɔkɔɔkɔ kaa wa nyɛ we nɛ wa tsu babauu ha Yehowa.—Mat. 24:13; Rom. 14:8. w23.02 18 ¶12-14