February

Mɛni nɛ mwɔnɛ ɔ ngmami nɛ ɔ tsɔɔ? Kaa bɔ nɛ Yesu tsɔɔ ɔ, e ma bi nɛ e se nyɛɛli ɔmɛ nɛ a suɔ ni kpahi wawɛɛ pe mɛ nitsɛmɛ a he, loo a je suɔmi kpo kɛ tsɔɔ a nyɛmimɛ Kristofohi nɛ́ a pee klaalo kaa a maa ngɔ a wami kɛ ha ngɛ a he ke e he ba hia nɛ a pee jã. Mawu Munyu ɔ ha nɛ wa na kaa suɔmi he hia wawɛɛ. Kaa nɔ hyɛmi nɔ́ ɔ, nihi fuu a bua jɔ ngmami nɛ nyɛɛ se nɛ ɔmɛ a he wawɛɛ: “Mawu ji suɔmi.” (1 Yoh. 4:8) “E sa nɛ o suɔ o nyɛmi kaa bɔ nɛ o suɔ o he ɔ.” (Mat. 22:39) “Suɔmi haa yayami babauu nɔ.” (1 Pet. 4:8) “Suɔmi se pui gblegbleegble.” (1 Kor. 13:8) Ngmami nɛ ɔmɛ kɛ ekpahi tsɔɔ heii kaa e he hia nɛ wa je su nɛ se be nɛ ji suɔmi ɔ kpo. Suɔmi nitsɛnitsɛ je Yehowa ngɔ, nɛ nihi nɛ e mumi ɔ ngɛ a nɔ nɛ e jɔɔ mɛ pɛ lɛ a ma nyɛ maa suɔ a sibi. (1 Yoh. 4:7) Enɛ ɔ he je nɛ Yesu de kaa suɔmi nitsɛnitsɛ ma kadi e se nyɛɛli anɔkualetsɛmɛ ɔ nɛ. Kaa bɔ nɛ Yesu de ɔ, nihi fuu kadiɔ e se nyɛɛli anɔkualetsɛmɛ akɛnɛ suɔmi nitsɛnitsɛ ngɛ a kpɛti ɔ he je. w23.03 27-28 ¶5-8

E sa nɛ o bɔ mɔde nɛ o ngɔ nihi a tɔmi kɛ ke mɛ faa lo? O ma nyɛ maa kane Baiblo ngmamihi nɛ kɔɔ nihi nɛ a kɛ nihi a tɔmi ke mɛ faa kɛ nihi nɛ a kɛ nihi a tɔmi ki mɛ ɔ a he ní, nɛ o pue o yi mi tɛ ngɛ he. Mo susu Yesu nɔ hyɛmi nɔ́ ɔ he nɛ o hyɛ. E je suɔmi mi nɛ e kɛ nihi a tɔmi ke mɛ faa. (Luka 7:47) Jehanɛ hu ɔ, e kɛ e juɛmi mɛ nihi a gbɔjɔmihi a nɔ, mohu ɔ, e kɛ e juɛmi ma níhi nɛ a ma nyɛ maa pee ɔ nɔ. Se Farisi bi ɔmɛ nɛ a hi si ngɛ Yesu be ɔ mi ɔ lɛɛ “a kɛ ni kpahi pee we nɔ́ ko.” (Luka 18:9) Ke o pue o yi mi tɛ ngɛ nɔ hyɛmi ní nɛ ɔmɛ a he ɔ, mo bi o he ke: ‘Mɛni ji su komɛ nɛ i naa ngɛ ni kpahi a he? Suhi nɛ a ngɛ ɔ a kpɛti te nɛɛ nɛ i suɔ nɛ ma ngɔ ye juɛmi kɛ ma nɔ?’ Ke e he wa ha mo kaa o kɛ nɔ ko e tɔmi kaa ke lɛ ɔ, bɔɔ mɔde nɛ o ngma su kpakpahi nɛ e ngɛ ɔ tsuo kɛ fɔ si. Lɔ ɔ se ɔ, mo bi o he ke: ‘Kɛ Yesu naa nɔmlɔ nɛ ɔ ha kɛɛ? Anɛ ke Yesu lɛ nɔ ɔ pee jamɛ a nɔ́ ɔ kɛ si lɛ ɔ, jinɛ e kɛ maa ke nɔ ɔ lo?’ Ke wa pee ní nɛ ɔmɛ ɔ, e ma nyɛ maa ye bua wɔ nɛ wa tsake wa susumi ngɛ nɔ ɔ he. Sisije ɔ, e he ma nyɛ maa wa ha wɔ kaa waa kɛ nɔ ko nɛ e tɔ̃ wa nɔ ɔ tɔmi maa ke lɛ. Se ke wa mia wa hɛ mi ɔ, bɔɔbɔɔbɔɔ ɔ, wa ma nyɛ maa ngɔ nihi a tɔmi kɛ ke mɛ faa pe bɔ nɛ wa peeɔ amlɔ nɛ ɔ. w22.04 23 ¶6

Ngɛ Kpo Jemi womi ɔ mi ɔ, a ngɔ okadihi kɛ kale Mawu he nyɛli, nɛ a tu lohwe awi yeli fuu a he munyu. Kaa nɔ hyɛmi nɔ́ ɔ, a tu “lohwe awi yelɔ ko nɛ e ngɛ kpo jee ngɛ wo ɔ mi kɛ ma” a he munyu. “E ngɛ koli nyɔngma kɛ yi kpaago.” (Kpoj. 13:1) Ngɛ lɔ ɔ se ɔ, a tu “lohwe awi yelɔ kpã ko nɛ e ngɛ kpo jee ngɛ zugba a mi kɛ ma” a he munyu. Lohwe awi yelɔ nɛ ɔ tuɔ munyu kaa drako ɔ, nɛ e haa nɛ “la jeɔ hiɔwe kɛ baa.” (Kpoj. 13:​11-13) Lɔ ɔ se ɔ, lohwe awi yelɔ kpa ko hu je kpo nɛ yo ajuama a hii si ngɛ e nɔ. Lohwe nɛ ɔ ji “lohwe awi yelɔ tsutsuutsu ko.” Lohwe awi yeli etɛ nɛ ɔmɛ daa si kɛ ha nihi nɛ a teɔ si kɛ woɔ Yehowa Mawu kɛ e Matsɛ Yemi ɔ kɛ je blema. Enɛ ɔ he je ɔ, e he hia kaa wa maa le lohwe awi yeli nɛ ɔmɛ a mi tso. (Kpoj. 17:​1, 3) E sa nɛ waa le nɔ́ nɛ lohwe awi yeli ɔmɛ kɛ yo ajuama a daa si kɛ ha. Blɔ nɛ hi pe kulaa nɛ wa ma nyɛ maa gu nɔ kɛ nu sisi ji kaa wa maa ngmɛ blɔ nɛ Baiblo ɔ nitsɛ nɛ tsɔɔ wɔ nya. A tsɔɔ okadihi babauu nɛ a kɛ tsu ní ngɛ Kpo Jemi womi ɔ mi ɔ nya ngɛ Baiblo womi kpahi a mi. w22.05 8-9 ¶3-4

Wa ti ni komɛ wa jeha ngɛ hɛ mi yae, nɛ wa ti ni komɛ hu be he wami, enɛ ɔ he ɔ, wa nyɛ we nɛ waa pee ní komɛ nɛ wa suɔ kaa waa pee ngɛ Yehowa sɔmɔmi mi, nɛ lɔ ɔ haa nɛ wa kɔni mi jɔ̃ɔ. Be komɛ ɔ, ke o kɔni mi jɔ̃ akɛnɛ o nyɛ we ní komɛ peemi ɔ, mo bi o he ke, ‘Mɛni Yehowa ngɛ hlae nɛ ma pee?’ Yehowa suɔ kaa o pee nɔ́ fɛɛ nɔ́ nɛ o ma nyɛ ngɛ si fɔfɔɛ nɛ o ngɛ mi amlɔ nɛ ɔ mi. Mo susu nɔ́ nɛ ɔ he nɛ o hyɛ. Nyɛmiyo ko nɛ e ye jeha 80 ɔ kɔni mi jɔ̃ akɛnɛ e nyɛ we nɛ e pee babauu kaa bɔ nɛ e peeɔ benɛ e ye jeha 40 ɔ. E ngɛ nɔ́ fɛɛ nɔ́ nɛ e ma nyɛ pee, se e susu kaa e mɔde bɔmi ɔ sɛ Yehowa hɛ mi. Se anɛ e mɔde bɔmi ɔ sɛ Yehowa hɛ mi niinɛ lo? Mo susu he nɛ o hyɛ. Ke nyɛmiyo nɛ ɔ kɛ e nyɛmi tsuo sɔmɔ Yehowa benɛ e ye jeha 40 ɔ nɛ e ngɛ jã pee benɛ e ye jeha 80 ɔ, lɛɛ lɔ ɔ tsɔɔ kaa loloolo ɔ, e kɛ e nyɛmi tsuo ngɛ Yehowa sɔmɔe. Ke wa pee nɔ́ fɛɛ nɔ́ nɛ wa ma nyɛ ɔ, Yehowa ma de wɔ ke: “[Wa] bɔ mɔde!” (Kɛ to Mateo 25:​20-23 ɔ he.) Wa bua ma nyɛ maa jɔ ke waa kɛ wa juɛmi ma níhi nɛ wa ma nyɛ maa pee ɔ nɔ mohu pe níhi nɛ wa be nyɛe maa pee ɔ nɔ. w22.04 10 ¶2; 11 ¶4-6

Kpo Jemi yi 21 ɔ ngɔ nimli 144,000 ɔ kɛ to ma ko nɛ ngɛ fɛu nɛ a tsɛɛ lɛ ke “Yerusalɛm Ehe ɔ” he. Ma nɛ ɔ ngɛ sisi tomi tɛhi 12, “nɛ a ngma Jijɔ Bi ɔ bɔfo 12 ɔmɛ a biɛ 12 ɔmɛ ngɛ a nɔ.” (Kpoj. 21:​10-14; Efe. 2:20) Okadi peemi ma nɛ ɔ be kaa ma kpahi nɛ wa le ɔ. Gbɛjegbɛ nɛ ngɛ ma nɛ ɔ mi ɔ, a kɛ sika tsu lɛ pee. E ngɛ agbo 12 nɛ́ a kɛ adiagba pee. A kɛ tɛhi nɛ a he jua wa lɛ pee e gbogbo ɔmɛ kɛ e sisi tomi ɔmɛ, nɛ susumi níhi nɛ a kɛ tsu ní ɔ da saminya. (Kpoj. 21:​15-21) Se kɛ̃ ɔ, Yohane yɔse kaa nɔ́ ko laa! Mo kadi nɔ́ nɛ Yohane de wɔ kɛ nyɛɛ se nɛ ɔ. E de ke: “I nɛ sɔlemi we ko ngɛ ma a mi, ejakaa Yehowa Mawu Ope ɔ, kɛ Jijɔ Bi ɔ ji e sɔlemi we. Nɛ ma ngua a hia we pu ɔ aloo nyɔhiɔ ɔ nɛ e kpɛ ngɛ e nɔ, ejakaa Mawu hɛ mi nyami ɔ ha nɛ ma a mi tsɔ heii, nɛ Jijɔ Bi ɔ ji e kane.” (Kpoj. 21:​22, 23) Nihi nɛ a piɛɛ Yerusalem ehe ɔ he ɔ kɛ Yehowa maa hi si.—Heb. 7:27; Kpoj. 22:​3, 4. w22.05 17-18 ¶14-15

E ngɛ mi kaa Yehowa ji wa Bɔlɔ, Mlaa Wolɔ kɛ Kojolɔ mohu lɛɛ, se e ji wa Tsɛ nɛ ngɛ suɔmi hulɔ. (La 100:3; Yes. 33:22) Ke wa tɔ̃ e nɔ nɛ wa tsake wa tsui niinɛ ɔ, e ma nyɛ maa ngɔ wa yayami ɔ kɛ ke wɔ, nɛ e suɔ nɛ e pee jã hulɔ. (La 86:5) Yehowa gu gbalɔ Yesaya nɔ kɛ wo wɔ he wami ke: “Ke nyɛ he yayami ɔ tsu kaa mɛni po, ma ha e ma hiɛ futaa kaa snoo.” (Yes. 1:18) Akɛnɛ wa yi mluku he je ɔ, wɔ tsuo wa tɔ̃ɔ nihi a nɔ kɛ guɔ wa ní peepee kɛ wa munyu tumi nɔ. (Yak. 3:2) Lɔ ɔ tsɔɔ we kaa huɛ bɔmi kpakpa be nyɛe maa hi waa kɛ nihi nɛ wa tɔ̃ a nɔ ɔ wa kpɛti. Huɛ bɔmi kpakpa ma nyɛ maa hi waa kɛ mɛ wa kpɛti ke waa kɛ tɔmi keɔ. (Abɛ 17:9; 19:11; Mat. 18:​21, 22) Ke nɔ ko pee ní nyafinyafi komɛ nɛ e dɔ wɔ ɔ, Yehowa suɔ nɛ waa ngɔ jamɛ a nɔ ɔ tɔmi kɛ ke lɛ. Wa ngɛ yi mi tomi kpakpa he je nɛ e sa kaa waa pee jã. Wa le kaa be fɛɛ be ɔ, Yehowa ‘ngɔɔ tɔmi kɛ keɔ faa.’—Yes. 55:7. w22.06 8 ¶1-2

E ngɛ mi kaa e sɛ nɛ waa ngɔ wa he kɛ to ni kpahi a he mohu lɛɛ, se wa ma nyɛ maa kase ní kɛ je Yehowa sɔmɔli kpahi a nɔ hyɛmi níhi a mi. Nɔ hyɛmi nɔ́ nɛ pe kulaa nɛ wa ma nyɛ maa kase ní kɛ je mi ji Yesu nɔ hyɛmi nɔ́ ɔ. E ngɛ mi kaa Yesu ye mluku lɛɛ, se wa ma nyɛ maa kase níhi fuu kɛ je e su kpakpa amɛ kɛ níhi nɛ e pee ɔ mi. (1 Pet. 2:21) Ke wa pee nɔ fɛɛ nɔ́ nɛ wa ma nyɛ nɛ wa kase e nɔ hyɛmi nɔ́ ɔ saminya a, wa maa pee Yehowa sɔmɔli kpakpahi. Nyumuhi kɛ yihi anɔkualetsɛmɛ fuu a nɔ hyɛmi níhi ngɛ Mawu Munyu ɔ mi. E ngɛ mi kaa a yi mluku mohu lɛɛ, se wa ma nyɛ maa kase ní kɛ je a nɔ hyɛmi ní ɔmɛ a mi. Mo susu Matsɛ David he nɛ o hyɛ. Yehowa tsɛ lɛ ke “nyumu nɛ ye tsui kplɛɛ e nɔ.” (Níts. 13:22) Se kɛ̃ ɔ, David tɔ̃ tɔmihi nɛ hɛdɔ ngɛ he. Ngɛ lɔ ɔ tsuo se ɔ, e pee nɔ hyɛmi nɔ́ kpakpa nɛ wa ma nyɛ maa kase. Mɛni he je? Ejakaa e de we nɔ́ ko kɛ je e nya. Mohu ɔ, e kplɛɛ ga womi nɛ hɛdɔ ngɛ he ɔ nɔ, nɛ e pia e he wawɛɛ ngɛ nɔ́ nɛ e pee ɔ he. Nɛ lɔ ɔ ha nɛ Yehowa ngɔ e tɔmi ɔ kɛ ke lɛ.—La 51:​3, 4, 10-12. w22.04 13 ¶11-12

Baiblo ɔ ha nɛ wa le kaa gbenɔ ji he nyɛlɔ. (1 Kor. 15:​25, 26) Gbenɔ he susumi pɛ po ma nyɛ ma ha nɛ waa hao, titli ke wɔ loo wa suɔlɔ ko be he wami wawɛɛ. Mɛni he je nɛ wa yeɔ gbenɔ gbeye? Ejakaa Yehowa bɔ wɔ kaa waa hi si kɛ ya neneene. (Fiɛɛ. 3:​11, NW) Se ke wa ná juɛmi nɛ da ngɛ gbenɔ he ɔ, e maa po wa wami he piɛ. E ma nyɛ maa wo wɔ he wami nɛ waa ye niye ní kpakpa, wa gbɔle wa kpɔmi. Jehanɛ hu ɔ, ke e he ba hia nɛ waa na dɔkita aloo wa hla tsopa a, e sa nɛ waa pee jã, bɔ nɛ pee nɛ wa ko ngɔ wa wami kɛ wo oslaa mi. Satan le kaa wa wami he hia wɔ. E tsɔɔ kaa wa maa ngmɛɛ huɛ bɔmi nɛ ngɛ waa kɛ Yehowa wa kpɛti ɔ po he konɛ waa hi wami mi. (Hiob 2:5) Se pi anɔkuale! Akɛnɛ Satan ji “nɔ nɛ e ma nyɛ maa gbe nɔ” he je ɔ, e bɔɔ mɔde kaa e ma ha nɛ waa ye gbenɔ gbeye konɛ waa je Yehowa se.—Heb. 2:​14, 15. w22.06 18 ¶15-16

Ke a tsi wa ní tsumi ɔ nya a, eko ɔ, a ma gba wa mi kɛ wo kuu tsɔwitsɔwihi a mi. Enɛ ɔ he ɔ, e he hia wawɛɛ kaa wa ma ha nɛ tue mi jɔmi nɛ hi waa kɛ wa nyɛmimɛ ɔmɛ wa kpɛti amlɔ nɛ ɔ. Nyɛ ko ngmɛ Satan blɔ nɛ e gba nyɛ mi. Ke pɛ ba waa kɛ nyɛmi ko wa kpɛti ɔ, e sa nɛ wa dla wa kpɛti oya nɔuu, aloo wa ma wa hɛ kɛ fɔ̃ nɔ. (Abɛ 19:11) E sa nɛ waa pee klaalo kaa wa maa ye bua wa nyɛmimɛ ɔmɛ. (Tito 3:14) Yemi kɛ buami nɛ fiɛɛmi yami ku ko kɛ ha nyɛmiyo ko nɛ́ e hia yemi kɛ buami ɔ ná ni kpahi nɛ a ngɛ kuu ɔ mi ɔ a nɔ he wami. Lɔ ɔ ha nɛ a hɛ kɛ su a sibi a he wawɛɛ, nɛ a pee kaa weku. (La 133:1) E ngɛ mi kaa amlaalo ɔ tsi wa ní tsumi ɔ nya ngɛ ma komɛ a nɔ mohu lɛɛ, se wa nyɛmimɛ akpehi abɔ ngɛ Yehowa sɔmɔe ngɛ jamɛ a ma amɛ a nɔ. A wo a kpɛti ni komɛ tsu ngɛ a hemi kɛ yemi ɔ he je. Wa ma nyɛ maa sɔle kɛ ha mɛ kɛ a weku li. Nyɛmimɛ komɛ pee kã kɛ ngɛ nyɛmimɛ nɛ a wo mɛ tsu ɔ ye buae, e ngɛ mi kaa a ma nyɛ maa wo mɛ hu tsu mohu lɛɛ. Wa ma nyɛ maa sɔle kɛ ha nihi nɛ a pee kã kɛ ngɛ nyɛmimɛ nɛ ɔmɛ ye buae ɔ. A woɔ nyɛmimɛ nɛ a wo mɛ tsu ɔ he wami konɛ a ya nɔ nɛ a ngɔ a hɛ kɛ fɔ Yehowa nɔ, a haa mɛ a hiami níhi, nɛ a fãa a he ngɛ kojomi he. (Kol. 4:​3, 18) O hɛ nɛ ko je nɔ kaa o sɔlemi ɔ ma nyɛ maa ye bua nyɛmimɛ nɛ ɔmɛ tsuo!—2 Tɛs. 3:​1, 2; 1 Tim. 2:​1, 2. w22.12 26-27 ¶15-16

Bimɛ kaseɔ fɔli. Ngɛ anɔkuale mi ɔ, fɔlɔ ko be nɛ e ye mluku. (Rom. 3:23) Se e sa nɛ fɔli nɛ a bɔ mɔde wawɛɛ nɛ a pee nɔ hyɛmi nɔ́ kpakpa kɛ ha a bimɛ. Bitsɛ ko de ke: “Kaa bɔ nɛ ke a ngɔ kutsa kɛ wo nyu mi nɛ e miiɔ nyu ɔ, jã kɛ̃ nɛ bimɛ kaseɔ níhi nɛ a naa a. Ke a na kaa waa kɛ nɔ́ nɛ wa ngɛ mɛ tsɔɔe ɔ tsu we ní ɔ, a deɔ wɔ.” Enɛ ɔ he ɔ, ke wa ngɛ hlae nɛ wa bimɛ nɛ a suɔ Yehowa a, e sa nɛ a na kaa suɔmi nɛ wɔ nitsɛmɛ wa ngɛ ha Yehowa a mi wa. Blɔhi fuu ngɛ nɛ fɔli ma nyɛ maa gu nɔ kɛ ye bua a bimɛ nɛ a suɔ Yehowa. Nyɛminyumu ko nɛ a tsɛɛ lɛ Andrew nɛ e ye jeha 17 ɔ de. E de ke: “Ye fɔli ɔmɛ tsɔɔ mi kaa e he hia nɛ ma sɔle daa. Daa gbɔkuɛ ɔ, Papaa kɛ mi sɔleɔ, ke i sɔle ngɛ imi nitsɛ ye dɛ he momo po. . . . Amlɔ nɛ ɔ, e he wɛ ha mi kaa ma sɔle ha Yehowa, nɛ i naa kaa e ji Tsɛ nɛ e ngɛ suɔmi.” Fɔli, nyɛ kai be fɛɛ be kaa ke nyɛ suɔ Yehowa a, lɔ ɔ maa ye bua nyɛ bimɛ konɛ mɛ hu a suɔ Yehowa. w22.05 28 ¶7-8

Loko wa he maa su kɛ ha baptisimi ɔ, kekleekle níhi nɛ e sa kaa waa pee ɔ a kpɛti kake ji kaa e sa nɛ waa je wa tsui mi nɛ wa pia wa he ngɛ wa yayami ɔmɛ a he. (Níts. 2:​37, 38) Ke wa pee jã a, lɔ ɔ ma ha nɛ waa pee tsakemihi nɛ a he hia kaa waa pee ɔ. Anɛ o kua ní peepee komɛ nɛ Yehowa bua jɔɛ he ɔ lo? Ní peepee nɛ ɔmɛ ekomɛ ji je mi bami yaya, taba kɛ ní tsumi, munyuhi nɛ sɛ loo jɛmi munyu tumi. (1 Kor. 6:​9, 10; 2 Kor. 7:1; Efe. 4:29) Mo mia o hɛ mi nɛ o hi tsakemihi pee. Mo de nɔ nɛ e kɛ mo ngɛ Baiblo ɔ kasee ɔ, loo asafo mi nikɔtɔma amɛ nɛ a ye bua mo nɛ a kɛ blɔ tsɔɔmi nɛ ha mo. Ke o ji niheyo loo yiheyo nɛ o kɛ o fɔli ngɛ we mi ɔ, yaa nɔ nɛ o ha nɛ a ye bua mo konɛ o kpa su yaya komɛ nɛ ma nyɛ maa tsi o baptisimi nya a. Jehanɛ hu ɔ, e he hia nɛ waa ngɔ wa he kɛ wo Mawu jami mi ní peepeehi a mi daa. Ní nɛ ɔmɛ ekomɛ ji asafo mi kpehi nɛ wa maa ya, kɛ wa he nɛ waa kɛ maa wo mi. (Heb. 10:​24, 25) Ke o he su kaa o maa piɛɛ asafo ɔ he kɛ ya fiɛɛmi ɔ, lɛɛ moo bɔ mɔde nɛ o pee jã be fɛɛ be. w23.03 10-11 ¶14-16

A wo “sinɔ” ɔ, sinɔ ɔ “nina,” a ta ngɛ 1 Mose 3:​14, 15 ɔ. Sinɔ nitsɛ be nyɛɛ maa nu nɔ́ nɛ Yehowa de ngɛ Eden abɔɔ ɔ mi ɔ sisi. Enɛ ɔ tsɔɔ kaa adebɔ nɔ́ ko nɛ le ní nɛ Yehowa kɛ lɛ tu munyu ɔ nɛ. Mɛnɔ nɛ Yehowa kɛ tu munyu ɔ? Kpo Jemi 12:9 ɔ tsɔɔ nɔ nɛ sinɔ ɔ daa si kɛ ha. Ngmami nɛ ɔ tsɔɔ heii kaa “blema sinɔ ɔ” ji Satan Abosiami. Be komɛ ɔ, Baiblo ɔ ngɔɔ munyu nɛ ji nina kɛ tsuɔ ní kɛ daa si kɛ haa nihi nɛ a kaseɔ nɔ ko ní peepee saminya, nɛ a ma nyɛ ma tsɛ mɛ ke nɔ ɔ bimɛ po. Lɔ ɔ, sinɔ ɔ nina a ji bɔfo yayahi kɛ adesahi nɛ a peeɔ a ní kaa Satan, nɛ a teɔ si kɛ woɔ Yehowa Mawu kɛ e we bi ɔ. Enɛ he ɔ, bɔfohi nɛ a je hiɔwe nɛ a ba zugba a nɔ ngɛ Noa be ɔ mi kɛ adesahi nɛ a peeɔ a ní kaa a tsɛ Abosiami ɔ, ji sinɔ ɔ nina a nɛ.—1 Mose 6:​1, 2; Yoh. 8:44; 1 Yoh. 5:19; Jud 6. w22.07 14-15 ¶4-5

Bɔfo Paulo suɔ e nyɛmimɛ ɔmɛ wawɛɛ nitsɛ. E kɛ si himi nɛ mi wa kpe, enɛ ɔ he ɔ, ke e nyɛmimɛ ɔmɛ kɛ kahi ngɛ kpee ɔ, e nuɔ he kɛ haa mɛ, nɛ e mi mi sãa lɛ ngɛ a he. Be ko ɔ, Paulo sika ta, nɛ e sa nɛ e hla ní tsumi konɛ e na nɔ́ ko nɛ e kɛ hyɛ e kɛ nihi nɛ a piɛɛ e he ɔ. (Níts. 20:34) Ní tsumi nɛ e kase ji bo tsu peemi. Benɛ e ya su Korinto ɔ, nihi nɛ e kɛ mɛ tsu ní kekleekle ji Akuila kɛ Priskila. Mɛ hu a ji bo tsu peeli. Se “he jɔɔmi ligbi fɛɛ he jɔɔmi ligbi ɔ” e fiɛɛ kɛ tsɔɔ Yuda bi kɛ Hela bi. Benɛ Silas kɛ Timoteo ba su ɔ, “munyu ɔ bɔni Paulo be tsuo ngɔmi wawɛɛ.” (Níts. 18:​2-5) Paulo hɛ ji nɔ́ nɛ he hia lɛ wawɛɛ ngɛ e si himi mi ɔ nɔ, nɛ lɔ ɔ ji kaa, e ma sɔmɔ Yehowa. Se Paulo pee nɔ hyɛmi nɔ́ kpakpa, nɛ e tsu ní wawɛɛ ngɛ fiɛɛmi ní tsumi ɔ kɛ lɛ nitsɛ e ní tsumi ɔ mi. E nɛ ɔ he je ɔ, e nyɛ wo e nyɛmimɛ ɔmɛ he wami. E kai mɛ kaa e sɛ nɛ a ha nɛ bɔ nɛ si himi ɔ mi wa ha a, kɛ bɔ nɛ e sa nɛ a tsu ní kɛ hyɛ a weku ɔ nɔ ɔ nɛ je a juɛmi kɛ je “níhi nɛ a he hia wawɛɛ ɔ” nɔ. Ní nɛ ɔmɛ ji níhi tsuo nɛ wa peeɔ ngɛ Yehowa jami mi. w22.08 20 ¶3

Mwɔnɛ ɔ, Mawu suɔ kaa waa fiɛɛ Matsɛ Yemi ɔ he sane kpakpa a ngɛ je ɔ mi tsuo. (1 Tim. 2:​3, 4) Ní tsumi nɛ ɔ ji Yehowa nɔ́, nɛ e hla e Bi nɛ e suɔ lɛ ɔ konɛ e nyɛɛ hɛ mi. Akɛnɛ Yesu lɛ ngɛ ní tsumi nɛ ɔ hɛ mi nyɛɛe he je ɔ, wa ma nyɛ ma ná nɔ mi mami kaa wa ma nyɛ ma tsu ní tsumi nɛ ɔ kɛ pi si kaa bɔ nɛ Yehowa suɔ kaa wa tsu ɔ loko nyagbe ɔ maa ba. (Mat. 24:14) Kɛ wa plɛ kɛ le kɛɛ? Benɛ e piɛ bɔɔ nɛ Yesu maa ho hiɔwe ya a, e kɛ e kaseli anɔkualetsɛmɛ ɔmɛ a ti ni komɛ kpe ngɛ Galilea yoku ɔ nɔ. E de mɛ ke: “A ngɔ he blɔhi tsuo nɛ ngɛ hiɔwe kɛ zugba a nɔ ɔ kɛ ha mi.” Mo kadi nɔ́ nɛ e de kɛ nyɛɛ se nɛ ɔ: “Nyɛɛ ya nɛ nyɛ ya pee nihi nɛ a ngɛ je ma amɛ tsuo a mi ɔ ye kaseli.” (Mat. 28:​18, 19) Ní tsumihi nɛ Yehowa kɛ wo Yesu dɛ ɔ a kpɛti kake ji he blɔ nɛ e ha lɛ kaa e nyɛɛ fiɛɛmi ní tsumi ɔ hɛ mi ɔ. Nɛ Yesu maa ya nɔ nɛ e maa nyɛɛ fiɛɛmi ní tsumi ɔ hɛ mi kɛ ba si wa be nɛ ɔ mi. w22.07 8 ¶1, 3; 9 ¶4

Nihi nɛ a da nɛ a pee ní kpakpahi loko a gbo ɔ, a ma ná “wami he gbogboehi a si tlemi” ejakaa a ngma a biɛ ngɛ wami womi ɔ mi momo. Enɛ ɔ tsɔɔ kaa “ni nɛmɛ nɛ a pee ní kpakpahi” nɛ Yohane 5:29 tu a he munyu ɔ, mɛ nɔuu nɛ Ní Tsumi 24:15 tu a he munyu kaa “nihi nɛ a da” a nɛ. Sisi numi nɛ ɔ kɛ munyu nɛ ngɛ Roma Bi 6:7 ɔ ngɛ tsakpa. Lejɛ ɔ de ke: “Nɔ nɛ e gbo ɔ, a ha nɛ e ye e he ngɛ e yayami he.” Nihi nɛ a da a, benɛ a gbo ɔ, Yehowa ngɔ a he yayami ɔ kɛ ke mɛ, se e kaiɔ anɔkuale tsuo nɛ a ye lɛ be nɛ a ngɛ wami mi ɔ. (Heb. 6:10) Ngɛ anɔkuale mi ɔ, e sa nɛ nihi nɛ a da nɛ a ma tle mɛ si ɔ, a ya nɔ nɛ a ye anɔkuale konɛ a biɛ nɛ tlɔ wami womi ɔ mi. w22.09 18 ¶13, 15

Gbalɔ Daniel pee nɔ hyɛmi nɔ́ kpakpa kɛ ha wɔ. E ji nɔ ko nɛ nihi he lɛ ye. E ngɛ mi kaa a nu lɛ kɛ ho Babilon ya nɛ e ya pee nyɔguɛ mohu lɛɛ, se e kɛ we nɛ e ná biɛ kpakpa kaa e ji nɔ ko nɛ a ma nyɛ ma he lɛ nɛ a ye. Benɛ e tsɔɔ Babilon Matsɛ Nebukadnezar nlami ɔ sisi ɔ, nihi ná e mi hemi kɛ yemi wawɛɛ. (Dan. 4:​20-22, 25) Jeha komɛ a se ɔ, Daniel tsɔɔ sɛ gbi ko nɛ ngɛ nyakpɛ sisi. E ji nina nɛ je kpo ngɛ Babilon matsɛ we ɔ gbogbo ɔ he. Benɛ Daniel tsɔɔ sisi ɔ, nihi kpale ná e mi hemi kɛ yemi wawɛɛ. (Dan. 5:​5, 25-29) Pee se hu ɔ, Darius kɛ e nikɔtɔma amɛ na kaa Daniel ngɛ “mumi ko nɛ sa kadimi.” A na kaa Daniel “yeɔ anɔkuale, nɛ e pee we nɔ́ nɛ dɛ.” (Dan. 6:​3, 4, NW) Enɛ ɔ he ɔ, e he maa hia nɛ wa bi wa ke: ‘Anɛ a le mi kaa i ji nɔ ko nɛ ni kpahi ma nyɛ maa he mi maa ye lo?’ Ke wa ji nihi nɛ ni kpahi ma nyɛ maa he wɔ maa ye ɔ, Yehowa bua jɔɔ wawɛɛ. w22.09 8-9 ¶2-4

Ke waa kɛ mlaahi nɛ Yehowa wo kɛ kɔ nɔ́ nɛ da kɛ nɔ́ nɛ dɛ he ɔ tsu ní ɔ, wa ma ná he se. Mɛni he je nɛ wa de jã a? Mo susu nɔ́ he tomi ní enyɔ nɛ ɔmɛ a he nɛ o hyɛ. Ke nihi nɛ a peeɔ gbɛjegbɛ ngɔ mɛ nitsɛmɛ a juɛmi kɛ susu blɔ ɔ nɛ a ngɛ pee ɔ, nɛ a ngɔɛ blɔ tsɔɔmi nɛ ngɛ ɔ kɛ tsu ní ɔ, enɛ ɔ kɛ nyagba agbo maa ba. Ngɛ hiɔ tsami hu mi ɔ, blɔ tsɔɔmi ngɛ nɛ tsɔɔ bɔ nɛ e sa nɛ a tsa hiɔ ko ha. Ke dɔkitahi kɛ nɛɛsihi kɛ blɔ tsɔɔmi nɛ ɔmɛ tsu we ní ɔ, hiɔtsɛ ɔ ma nyɛ ma gbo. Enɛ ɔ tsɔɔ kaa ke a ngɔ blɔ tsɔɔmi kɛ ha ngɛ bɔ nɛ e sa nɛ wa tsu nɔ́ ko he ní ha a he, nɛ waa kɛ tsu ní ɔ, e maa po wa he piɛ. Jã nɔuu kɛ̃ nɛ mlaahi nɛ Mawu wo kɛ kɔ nɔ́ nɛ da kɛ nɔ́ nɛ dɛ he ɔ poɔ wa he piɛ. Yehowa jɔɔ nihi nɛ a bɔɔ mɔde kaa a kɛ e mlaahi ma tsu ní ɔ. E wo si ke: “Nihi nɛ peeɔ nɔ́ nɛ da a, zugba a maa pee a nɔ́ nɛ a maa hi nɔ daa.” (La 37:29) Moo po he foni nɛ o hyɛ bɔ nɛ kake peemi, tue mi jɔmi kɛ bua jɔmi maa hi adesahi a kpɛti ha ke nɔ fɛɛ nɔ kɛ Yehowa mlaahi tsu ní? Yehowa suɔ nɛ o ná si himi nɛ ɔ eko. E ngɛ heii kaa wa ti nɔ fɛɛ nɔ ngɛ yi mi tomi kpakpahi a he je nɛ e sa nɛ e suɔ níhi nɛ da ngɛ Yehowa hɛ mi! w22.08 27-28 ¶6-8

Ke nɔ́ ko ya nɔ ngɛ asafo ɔ mi nɛ e wo wa mi mi la a, e he ma nyɛ maa wa kaa wa maa ye Yehowa kɛ e we asafo ɔ anɔkuale. Mɛni ma nyɛ maa ye bua wɔ nɛ waa da nyagbahi kaa jã a, a nya? E sa nɛ wa hɛ nɛ hi wa he nɔ, waa pee klaalo, nɛ waa da si kpɛii ngɛ hemi kɛ yemi ɔ mi. Ke wa pee kpoo, nɛ wa susuɔ níhi a he saminya, nɛ wa bɔ mɔde kaa wa maa na níhi kaa bɔ nɛ Yehowa naa níhi ɔ, lɔ ɔ tsɔɔ kaa wa hɛ ngɛ wa he nɔ. Ke wa pee jã a, e be hae nɛ wa he numi ɔ nɛ kudɔ wa susumi. Eko ɔ, o nyɛmi Kristofo no ko loo asafo mi nɔkɔtɔma ko pee mo nɔ́ ko hyɛ nɛ e dɔ mo. Eko ɔ, pi nɛ e je blɔ kaa e maa pee nɔ́ ko nɛ́ e dɔ mo. (Rom. 3:23; Yak. 3:2) Se kɛ̃ ɔ, nɔ́ nɛ e pee ɔ ma nyɛ maa wo o mi mi la. Eko po ɔ, o bi o he ke: ‘Ke ye nyɛmi Kristofo no po pee mi nɔ́ ko kaa jã a, anɛ ma nyɛ ma de ke Mawu asafo ɔ ji nɛ ɔ niinɛ lo?’ Jã ji bɔ nɛ Satan suɔ kaa waa nu he. (2 Kor. 2:11) Ke wa ná susumi kaa jã a, e ma nyɛ ma ha nɛ wa kpa Yehowa sɔmɔmi nɛ́ wa si Yehowa asafo ɔ. E sa nɛ waa hyɛ nɛ hi nɛ wa ko ngɔ abofu kɛ wo wa mi. w22.11 20 ¶1, 3; 21 ¶4

Yehowa ha wɔ hɛ kɛ nɔ fɔmi nɛ se be, nɛ lɔ ɔ ji neneene wami nɛ wa ma ná. Ni komɛ ngɛ hɛ nɔ kami kaa a maa hi si ngɛ hiɔwe kɛ ya neneene kaa mumi mi bɔ níhi nɛ a be gboe. (1 Kor. 15:​50, 53) Se nihi fuu ngɛ hɛ nɔ kami kaa a maa hi si ngɛ zugba a nɔ, nɛ a ma ná nɔmlɔ tso mi he wami kpakpa kɛ bua jɔmi. (Kpoj. 21:​3, 4) Wa ma ná neneene wami ngɛ hiɔwe jio, wa ma ná neneene wami ngɛ zugba a nɔ jio, wa hɛ kɛ nɔ fɔmi ɔ he jua wa ha wɔ. Wa ma nyɛ ma ná nɔ mi mami kaa hɛ kɛ nɔ fɔmi nɛ wa ngɛ ngɛ hwɔɔ se he ɔ maa ba mi, ejakaa e je Yehowa ngɔ. (Rom. 15:13) Wa le níhi nɛ e wo si kaa e maa pee, nɛ wa le kaa e yeɔ e munyu nɔ be fɛɛ be. (4 Mose 23:19) Wa ngɛ nɔ mi mami kaa Yehowa ngɛ suɔmi ɔ kɛ he wami ɔ nɛ e kɛ ma tsu níhi nɛ e de ɔ a he ní. Wa hiɔwe Tsɛ ɔ suɔ wɔ wawɛɛ, nɛ e suɔ nɛ wa ná hemi kɛ yemi ngɛ e mi. Ke hɛ kɛ nɔ fɔmi nɛ wa ngɛ ngɛ Yehowa mi ɔ mi wa a, e maa ye bua wɔ nɛ waa kɛ kã kɛ bua jɔmi ma fĩ si ngɛ ka fɛɛ ka nɛ waa kɛ maa kpe ɔ mi. w22.10 24 ¶1-3

Akɛnɛ ni ɔmɛ kua kaa a maa bu Yesaya tue he je ɔ, e gba kɛ fɔ si kaa Yehowa ma ha nɛ a kɛ haomi maa kpe. (Yes. 30:​5, 17; Yer. 25:​8-11) Nɛ jã pɛpɛɛpɛ nɛ e ba mi. A nuu mɛ kɛ ho nyɔguɛ tso mi ya ngɛ Babilon. Se ni komɛ ngɛ Yuda bi ɔmɛ a kpɛti nɛ a yeɔ anɔkuale. Lɔ ɔ he ɔ, Yesaya de mɛ ke hwɔɔ se ko ɔ, Yehowa ma ha nɛ a kpale kɛ ho Yerusalem ya ekohu. (Yes. 30:​18, 19.) E ba mi jã pɛpɛɛpɛ. Yehowa je mɛ ngɛ nyɔguɛ tso mi kɛ je Babilon. Se jeha babauu be loko Yehowa pee jã. Munyu nɛ ji, ‘Yehowa ngɛ mlɛe kaa e maa na mɛ mɔbɔ’ ɔ tsɔɔ kaa be ma pue mi loko Yehowa ma je Israel bi ɔmɛ kɛ je nyɔguɛ tso mi. Niinɛ, Israel bi ɔmɛ ye jeha 70 ngɛ nyɔguɛ tso mi ngɛ Babilon loko Yehowa ngmɛ blɔ nɛ a ti nihi nɛ piɛ ɔ kpale kɛ ho Yerusalem ya. (Yes. 10:21; Yer. 29:10) Benɛ a ngɛ nyɔguɛ tso mi ngɛ Babilon ɔ, a fo ya ejakaa a bua jɔɛ, se benɛ a kpale kɛ ya Yerusalem ɔ, a ya fomi ɔ plɛ pee bua jɔmi. w22.11 9 ¶4

Mwɔnɛ ɔ, níhi nɛ wa nyɛmimɛ nɛ a ngɛ hehi nɛ a tsi wa ní tsumi ɔ nya ngɛ ɔ kɛ ngɛ kpee ɔ, jamɛ a ní ɔmɛ nɔuu nɛ Yesu bɔfo ɔmɛ kɛ kpe benɛ a ngɛ Yesu he sane kpakpa a fiɛɛe ɔ. Kojoli nɛ a ngɛ Yuda bi a kojomi he ngua a wo mɛ mlaa kaa “a kpa munyu tumi ngɛ Yesu biɛ ɔ mi.” (Níts. 4:​18-20; 5:​27, 28, 40) Se a le kaa nɔ ko nɛ e ngɛ he wami pe mɛ lɛ e ‘fã mɛ kaa a tsɔɔ ni ɔmɛ ní nɛ a ye Kristo ɔ he odase kɛ pi si’ ɔ nɛ. (Níts. 10:42) Enɛ ɔ he ɔ, Petro kɛ Yohane da kaseli ɔmɛ a nane mi nɛ a kɛ kã de ke a maa bu Mawu tue mohu pe jamɛ a kojoli ɔmɛ, nɛ a maa ya nɔ maa tu Yesu he munyu.” (Níts. 5:29) Be nɛ a kongo bɔfo ɔmɛ ngɛ a we anɔkuale yemi ɔ he se ɔ, a je Yuda bi ɔmɛ a kojomi he ngua a, nɛ “a ngɛ nyae kaa ngɛ [Yesu] biɛ ɔ he je ɔ, a bu mɛ kaa a ji nihi nɛ a sa hɛ mi si puemi.”—Níts. 5:​41, 42. w22.10 12-13 ¶2-4

Ngɛ anɔkuale mi ɔ, ke wa bɔni Yehowa he ní kasemi ngɛ Baiblo ɔ mi ɔ, sisije tsɔɔmi ɔmɛ pɛ lɛ wa kaseɔ. Ngɛ sɛ womi nɛ bɔfo Paulo ngma kɛ ya ha Hebri bi ɔmɛ ɔ mi ɔ, e tsɔɔ kaa sisije tsɔɔmi ɔmɛ ji “sisije níhi.” Nɔ́ nɛ e de ɔ tsɔɔ we kaa “sisije tsɔɔmi” ɔmɛ a he hia we. Mohu ɔ, e kɛ to nyɔ nyu nɛ haa bimwɔyo he wami ɔ he. (Heb. 5:12; 6:1) Jehanɛ se hu ɔ, bɔfo Paulo wo Kristofohi tsuo he wami kaa a ya nɔ nɛ a kase anɔkualehi nɛ a mi kuɔ nɛ ngɛ Mawu Munyu ɔ mi ɔ, mohu pe nɛ a maa kase sisije tsɔɔmi ɔmɛ pɛ. Anɛ o bua jɔ he kaa o maa kase Baiblo tsɔɔmihi nɛ a mi kuɔ ɔ lo? Anɛ o suɔ kaa o maa ya o hɛ mi nɛ o kase Yehowa kɛ e yi mi tomihi a he ní lo? E be gbɔjɔɔ ha wa kpɛti nihi fuu kaa wa maa kase ní. Kɛ mo hu o naa ní kasemi ha kɛɛ? Anɛ o kase bɔ nɛ a kaneɔ ní, kɛ bɔ nɛ a kaseɔ ní saminya ha ngɛ sukuu lo? Anɛ o bua jɔɔ ní kasemi he nɛ o náa he se wawɛɛ lo? Aloo o yɔse kaa o bua jɔɛ ní kasemi he lo? Ke jã a, lɛɛ pi mo pɛ, nihi babauu hu nuɔ he jã. Se kɛ̃ ɔ, Yehowa ma nyɛ maa ye bua mo, ejakaa e ye mluku nɛ e ji Tsɔɔlɔ nɛ pe kulaa. w23.03 9-10 ¶8-10

Ke wa he jɔ ɔ, wa ma ha nɛ Mawu Munyu ɔ nɛ tsake wɔ. Ke wa baa wa he si, nɛ wa kane we Baiblo ɔ kɛ hla tɔmihi ngɛ ni kpahi a he ɔ, e ma ha nɛ níhi nɛ wa kaseɔ kɛ kɔɔ mɔbɔ nami, mi mi sami kɛ suɔmi he ɔ ma ná wa nɔ he wami. Bɔ nɛ waa kɛ nihi hiɔ si ha a lɛ maa tsɔɔ kaa wa ha nɛ Baiblo ɔ ngɛ wa nɔ he wami náe loo e ná we wa nɔ he wami. Farisi bi ɔmɛ ha we nɛ Mawu Munyu ɔ nɛ sɛ a tsui mi, enɛ ɔ he ɔ, a ‘buɔ nihi nɛ a yi fɔ ɔ fɔ.’ (Mat. 12:7) Jã kɛ̃ nɛ bɔ nɛ waa kɛ nihi hiɔ si ha a maa tsɔɔ kaa waa kɛ Mawu Munyu ɔ nɛ wa ngɛ kasee ɔ ngɛ ní tsue loo waa kɛ tsu we ní. Kaa nɔ hyɛmi nɔ́ ɔ, anɛ wa pɔɔ su kpakpahi nɛ nihi ngɛ ɔ he munyu tumi aloo waa kɛ oya yemi tuɔ a gbɔjɔmihi a he munyu lo? Anɛ wa naa nihi mɔbɔ nɛ wa pee klaalo kaa ke a tɔ̃ wa nɔ ɔ, waa kɛ maa ke mɛ lo? Aloo wa hlaa tɔmihi ngɛ a he nɛ wa yaa nɔ nɛ wa náa a he abofu lo? Ke wa bi wa he sanehi kaa jã a, e ma ha nɛ wa maa na ke ji nɔ́ nɛ wa ngɛ kanee ɔ ngɛ wa susumi, wa he numi, kɛ wa ní peepee nɔ he wami náe.—1 Tim. 4:​12, 15; Heb. 4:12. w23.02 12 ¶13-14

Mo susu Yosef nɛ e je Arimatia a nɔ hyɛmi nɔ́ ɔ he nɛ o hyɛ. Yuda bi ɔmɛ buu lɛ wawɛɛ. E ji Yuda bi ɔmɛ a kojomi he ngua nɛ ji Sanhedrin ɔ mi no. Se benɛ Yesu ngɛ zugba a nɔ ɔ, Yosef nyɛ we nɛ e pee kã kulaa. Yohane de ngɛ e he ke “e ji Yesu kaselɔ, se Yuda bi ɔmɛ a he gbeye yemi he je ɔ, e ha we nɛ nihi nɛ a le.” (Yoh. 19:38) E ngɛ mi kaa Yosef bua jɔ Matsɛ Yemi ɔ he sɛ gbi ɔ he mohu lɛɛ, se e ha we nɛ ni kpahi nɛ a na kaa e ngɛ hemi kɛ yemi ngɛ Yesu mi. E ma nyɛ maa ba kaa e ngɛ gbeye yee kaa ke nihi le kaa e ji Yesu kaselɔ ɔ, a be lɛ bue hu. Se Baiblo ɔ ha nɛ wa na kaa benɛ Yesu gbo ɔ, Yosef “kɛ kã pue nɔ kɛ ya Pilato ngɔ nɛ e ya kpa lɛ pɛɛ kaa e ngɔ Yesu gbogboe ɔ kɛ ha lɛ.” (Maak. 15:​42, 43) Jehanɛ lɛɛ, Yosef ha nɛ nihi le kaa e ji Yesu kaselɔ. Anɛ mo hu o ye nimli a hɛ mi gbeye nɛ o pee o ní kaa Yosef hyɛ lo? w23.01 30 ¶13-14

Benɛ Salomo ngɛ nɔ yee ɔ, Sheba manyɛ ɔ nu kaa Israel bi ɔmɛ ngɛ tue mi jɔmi, nɛ a ngɛ nɔ́ fɛɛ nɔ́. E hia blɔ kɛ je tsitsaa kɛ ba Yerusalem konɛ lɛ nitsɛ e ba na kɛ e hɛngmɛ. (1 Ma. 10:1) Benɛ e na níhi nɛ ngɛ nɔ yae ngɛ Salomo nɔ yemi ɔ mi ɔ, e tu Munyuhi nɛ a ji wa mwɔnɛ ɔ ngmami ɔ. Bɔ nɛ níhi ya nɔ ha ngɛ Salomo nɔ yemi ɔ mi ɔ ha nɛ wa níhi nɛ Yehowa maa pee ha adesahi ngɛ e Bi Yesu nɔ yemi ɔ sisi. Yesu nɔ kuɔ pe Salomo ngɛ nɔ́ fɛɛ nɔ́ mi. Salomo ji adesa nɛ e yi mluku, nɛ e tɔ̃ tɔmihi nɛ hɛdɔ ngɛ he nɛ lɔ ɔ ngɔ haomihi kɛ ba Mawu we bi a nɔ. Se Yesu lɛɛ, e ji Nɔ Yelɔ nɛ e ye mluku nɛ tɔmi ko be e he. (Luka 1:32; Heb. 4:​14, 15) Kristo pee níhi nɛ tsɔɔ kaa e be yayami pee gblee, aloo e be nɔ́ ko pee nɛ maa ye nimli anɔkualetsɛmɛ nɛ e maa ye a nɔ matsɛ ɔ awi. Lɛ ji Matsɛ nɛ se be nɛ wa ma nyɛ ma ná. w22.12 11 ¶9-10

Mɛni e sa nɛ waa pee ke hiɔ ko nɛ sãa nɔ gbɛ fĩa he nɛ wa ngɛ ɔ? E sa nɛ waa bu blɔ tsɔɔmihi nɛ amlaalo ɔ kɛ ma ha wɔ ɔ tue. Blɔ tsɔɔmi nɛ ɔmɛ ekomɛ ji wa dɛ nɛ wa ma fɔ be fɛɛ be, blɔ nɛ maa hi waa kɛ nihi wa kpɛti, nose mask nɛ wa ma bu, kɛ nihi a kpɛti nɛ wa be yae ke wa be he wami. Ke waa pee ní nɛ ɔmɛ ɔ, e tsɔɔ kaa wa ngɛ bumi kɛ ha wami nɛ ji nike ní nɛ je Mawu ngɔ ɔ. Ke oslaa ko ba a, wa ma nyɛ maa nu lakpa munyuhi ngɛ tiivi loo radio nɔ, loo ngɛ wa huɛmɛ kɛ nihi nɛ waa kɛ mɛ ngɛ kpɔ mi ɔ a ngɔ. Enɛ ɔ he ɔ, e sa nɛ waa bu níhi nɛ da nɛ dɔkitahi kɛ ma nɔ yeli ɔmɛ ma de ɔ tue, mohu pe nɛ wa ma he ‘nɔ́ fɛɛ nɔ́’ nɛ wa maa nu ɔ maa ye. (Abɛ 14:15) Blɔ Tsɔɔmi Ajla Toli ɔmɛ kɛ asafo ɔ ní tsumi kɔni ɔmɛ bɔɔ mɔde kaa a nine maa su munyuhi nɛ a ji anɔkuale nɔ, loko a kɛ blɔ tsɔɔmi nɛ ha wɔ kɛ kɔ asafo mi kpehi yami kɛ fiɛɛmi ní tsumi ɔ he. Ke waa kɛ blɔ tsɔɔmi nɛ ɔmɛ tsu ní ɔ, e maa po wɔ nitsɛmɛ kɛ ni kpahi a he piɛ ke oslaa ko ba. Jehanɛ se hu ɔ, e yeɔ bua nɛ ni kpahi nɛ a ngɛ kpɔ ɔ mi ɔ náa juɛmi nɛ da ngɛ Yehowa Odasefohi a he.—1 Pet. 2:12. w23.02 23 ¶11-12

Benɛ Israel bi ɔmɛ ya su Si Womi Zugba a nɔ ɔ, a to si ngɛ he kpa he kpa. E ko nyɛ ba kaa Israel bi nɛ a to si ngɛ he pɔtɛɛ ko ɔ ma nyɛ ma kpa a nyɛmimɛ Israel bi nɛ a ya to si ngɛ he kpahi ɔ a he susumi. Se Yehowa to blɔ nya kɛ ha Israel bi ɔmɛ konɛ a bua a he nya si abɔ bɔ nɛ pee nɛ a kane e Munyu nɛ a ngma a kɛ ha mɛ, nɛ́ a tsɔɔ mɛ nya. (5 Mose 31:​10-12; Neh. 8:​2, 8, 18) Moo po he foni nɛ o hyɛ bɔ nɛ Israel no anɔkualetsɛ ko nɛ e ba he nya buami nɛ ɔ ngɛ Yerusalem ɔ maa nu he ha ke e na e nyɛmimɛ ayɔhi abɔ nɛ a je he kpahi kɛ ba lejɛ ɔ! Yehowa gu blɔ nɛ ɔ nɔ kɛ ha nɛ kake peemi hi a kpɛti. Pee se ɔ, benɛ a to Kristofohi asafo ɔ sisi ɔ, nyumuhi kɛ yihi nɛ a tuɔ gbi slɔɔtoslɔɔtohi ɔ ba pee Kristofohi. A kpɛti ni komɛ ji nihi nɛ a hɛɛ blɔ nya, nɛ a kpɛti ni komɛ hu ji nimli guhi, a kpɛti ni komɛ ji niatsɛmɛ, nɛ ni komɛ hu ji ohiatsɛmɛ. Se a pee kake kɛ sɔmɔ anɔkuale Mawu ɔ. Loko ni hehi nɛ a ba pee Kristofohi ɔ maa nu Mawu Munyu ɔ sisi ɔ, jã Kristofohi kpahi ye bua mɛ, nɛ a ya a kpe ɔmɛ eko.—Níts. 2:42; 8:​30, 31. w23.02 3 ¶7

Yehowa wo si kaa nihi nɛ a buɔ lɛ tue ɔ ma ná “neneene wami.” Enɛ ɔ ji si womi nɛ se be. (Rom. 6:23) Ke wa pue wa yi mi tɛ ngɛ si nɛ Yehowa wo wɔ ɔ he ɔ, e ngɛ heii kaa suɔmi nɛ wa ngɛ kɛ ha lɛ ɔ mi maa wa. Mo susu he nɛ o hyɛ: Wa hiɔwe Tsɛ ɔ suɔ wɔ saminya, nɛ nɔ́ ko nɔ́ ko be nyɛe ma je wɔ kɛ je e he gblegbleegble. Si nɛ Mawu wo kaa e ma ha wɔ neneene wami ɔ yeɔ bua wɔ nɛ wa daa kahi nɛ waa kɛ kpeɔ amlɔ nɛ ɔ a nya. Ke wa he nyɛli wo wa he gbeye kaa a maa gbe wɔ po ɔ, wa maa ya nɔ ma sɔmɔ Yehowa. Mɛni he je? Ejakaa wa le kaa ke waa kɛ anɔkuale yemi sɔmɔ Yehowa nɛ wa gbo ɔ, e ma tle wɔ si nɛ wa be gboe hu. (Yoh. 5:​28, 29; 1 Kor. 15:​55-58; Heb. 2:15) Wa le kaa Yehowa ma nyɛ ma ha nɛ waa hi si kɛ ya neneene ejakaa E Ngɔ lɛ wami je, nɛ e ngɛ daa. (La 36:9) Ngmami ɔ maa nɔ mi kaa Yehowa ngɛ daa, nɛ e maa hi si kɛ ya daa.—La 90:2; 102:​12, 24, 27. w22.12 2 ¶1-3

Akɛnɛ wa ji Yehowa we bi he je ɔ, ke waa kɛ haomi kpe ɔ, e pee we wɔ nyakpɛ. Mɛni he je? Ejakaa wa le kaa Baiblo ɔ de ke, “e sa nɛ waa gblee amanehlu babauu mi kɛ sɛ Mawu Matsɛ Yemi ɔ mi.” (Níts. 14:22) Jehanɛ hu ɔ, wa le kaa nyagbahi nɛ waa kɛ ngɛ kpee ɔ, ekomɛ a se be poe ngɛ je yaya nɛ ɔ mi. Se ngɛ je ehe ɔ mi ɔ, “gbenɔ be si hie hu, jã kɛ̃ nɛ kɔmɔ yemi aloo ya fomi aloo nɔ́ yeyee ko hu be si hie hu.” (Kpoj. 21:4) E ngɛ mi kaa Yehowa tsi we kahi a nya nɛ a ko ba wa nɔ mohu lɛɛ, se ke waa kɛ kahi ngɛ kpee ɔ, Yehowa yeɔ bua wɔ nɛ wa fĩɔ si. Mo kadi nɔ́ nɛ bɔfo Paulo de Kristofohi nɛ́ a hi si ngɛ Roma a. E sɛ hlami nɛ e tsɔɔ haomi komɛ nɛ e kɛ nyɛmimɛ kpahi kɛ kpe. Lɔ ɔ se ɔ, e ngma ke: “Ngɛ ní nɛ ɔmɛ tsuo a mi ɔ, kɛ gu nɔ nɛ e suɔ wɔ ɔ nɔ ɔ, wa yeɔ kunimi kɛ piɔ si.” (Rom. 8:​36, 37) Enɛ ɔ tsɔɔ kaa ke o kɛ haomi ko ngɛ kpee po ɔ, Yehowa ma nyɛ maa ye bua mo kɛ da nya. w23.01 14 ¶1-2