March

Bɔfo Petro wo e nyɛmimɛ ɔmɛ he wami kaa a ngɔ dloomi nike ní nɛ a ngɛ ɔ kɛ wo a nyɛmimɛ he wami. E ngma ke: “Nike ní abɔ nɛ nɔ fɛɛ nɔ nine su nɔ ɔ, nyɛɛ ngɔ kɛ hi nyɛ sibi sɔmɔe kaa Mawu dloomi ɔ nɛ a je lɛ kpo . . . ɔ he we nɔ hyɛli kpakpahi.” (1 Pet. 4:10) E sa nɛ waa kɛ wa nyɛmi loo dloomi nike ní nɛ wa ngɛ ɔ nɛ tsu ní saminya, nɛ wa ko hao kaa eko ɔ, e ma ha nɛ ni kpahi a hɛ nɛ kɔ wa nɔ loo a kɔni mi ma jɔ̃. Se e sa nɛ waa hyɛ nɛ hi nɛ wa ko ngɔ kɛ fĩa. (1 Kor. 4:6) Nyɛ ha nɛ wa kai kaa nyɛmi fɛɛ nyɛmi nɛ wa ngɛ ɔ ji nike ní nɛ je Mawu ngɔ. E sa nɛ waa ngɔ kɛ fia asafo ɔ kɛ ma si, se pi nɛ waa kɛ maa tsɔɔ kaa wa he hia pe ni kpahi. (Filip. 2:3) Ke wa ngɔ wa he wami kɛ wa nyɛmi kɛ pee Mawu suɔmi nya ní ɔ, wa ma ná nɔ́ ko nɛ wa maa da nɔ kɛ nya. Wa bua maa jɔ akɛnɛ waa kɛ nyɛmi nɛ wa ngɛ ɔ ngɛ Yehowa yi jee ɔ he je, se pi kaa wa ngɛ mɔde bɔe pe ni kpahi loo waa kɛ maa tsɔɔ kaa wa nɔ kuɔ pe ni kpahi. w22.04 11-12 ¶7-9

Yesu suɔ Ngmami Klɔuklɔu ɔ. Munyu nɛ ngɛ La 40:8 ɔ tsɔɔ bɔ nɛ Yesu nu he ha ngɛ Mawu Munyu ɔ he. Lejɛ ɔ de ke: “I suɔ kaa ma pee o suɔmi nya ní; o mlaa a, a ngma ngɛ ye tsui mi.” Akɛnɛ Yesu suɔ Ngmami ɔ he je ɔ, e ná bua jɔmi, nɛ e ye manye ngɛ Yehowa sɔmɔmi mi. Ke wa kaneɔ Mawu Munyu ɔ nɛ waa kɛ tsuɔ ní ɔ, wɔ hu wa bua maa jɔ nɛ wa maa ye manye. (La 1:​1-3) Kaa bɔ nɛ Yesu munyu ɔmɛ kɛ e nɔ hyɛmi nɔ́ ɔ tsɔɔ ɔ, nyɛ ha nɛ waa ya wa hɛ mi ngɛ wa Baiblo kanemi ɔ mi. Ke wa sɔleɔ, wa toɔ wa tsui si, wa biɔ wa he sanehi, nɛ wa kadiɔ oti komɛ kɛ fɔɔ si ke wa ngɛ Baiblo ɔ kanee ɔ, e maa ye bua wɔ konɛ waa nu sisi saminya. Ke wa susu nɔ́ nɛ wa ngɛ kanee ɔ he saminya, nɛ wa hlaa níhi a mi ngɛ wa womi ɔmɛ a mi ɔ, lɔ ɔ maa ye bua wɔ konɛ wa kɔ nɔ́ se. Jehanɛ hu ɔ, ke wa bɔɔ mɔde kaa waa kɛ juɛmi nɛ da maa kane Mawu Munyu ɔ, e maa ye bua wɔ konɛ waa kɛ nɔ́ nɛ wa ngɛ kanee ɔ nɛ tsu ní. Ke wa bɔ mɔde nɛ wa pee ní nɛ ɔmɛ ɔ, wa ma ná Baiblo ɔ nɛ wa kaneɔ ɔ he se, nɛ wa maa hɛ kɛ su Yehowa he wawɛɛ.—La 119:17; Yak. 4:8. w23.02 13 ¶15-16

Moo ngɔ oti pɔtɛɛ ko kɛ ma o hɛ mi nɛ o pee níhi nɛ ma ha nɛ o su oti ɔ he. Kɛ o maa pee lɛ kɛɛ? Ngɔɔ lɛ kaa o suɔ nɛ o ya o hɛ mi ngɛ ní tsɔɔmi mi. O ma nyɛ maa kase womiyo nɛ ji Yaa O Hɛ Mi Ngɛ Ní Kanemi Kɛ Ní Tsɔɔmi Mi ɔ saminya. Ke a ha mo ní peemi ngɛ otsi kpɛti kpe ɔ sisi ɔ, o ma nyɛ ma bi nyɛminyumu ko nɛ e nane pi si nɛ e bu o ní peemi ɔ tue nɛ e wo mo ga ngɛ he loko o ya pee ngɛ Matsɛ Yemi Asa a nɔ. Mo dla o he mla kɛ ha o ní peemi ɔ konɛ o mɔde bɔmi ɔ nɛ je kpo nɛ nihi nɛ a na mo kaa nɔ ko nɛ a ma nyɛ maa ngɔ a hɛ kɛ fɔ o nɔ. (2 Kor. 8:22) Mɛni o ma nyɛ maa pee ke oti nɛ o kɛ ma o hɛ mi ɔ ji nɔ́ ko nɛ e he wa ha mo kaa o maa pee? O kɔni mi nɛ ko jɔ̃! Anɛ Timoteo ba pee nɔ ko nɛ e le munyu tumi saminya aloo nɔ ko nɛ e le ní tsɔɔmi saminya? Baiblo ɔ de we nɔ́ ko kaa jã. Se atsinyɛ jemi ko be he kaa Timoteo nyɛ nɛ e tsu ní tsumihi nɛ a kɛ wo e dɛ ɔ he ní saminya ejakaa e kɛ Paulo ga womi ɔ tsu ní.—2 Tim. 3:10. w22.04 24-25 ¶8-11

Mɛni nɛ lohwe awi yelɔ nɛ ngɛ yi kpaago ɔ daa si kɛ ha? Wa yɔse kaa lohwe awi yelɔ nɛ ɔ ngɛ kaa ngatsɛ. E nanewɛɛ ngɛ kaa osisiblisi nanewɛɛ, nɛ e nya ngɛ kaa jata nya, nɛ e ngɛ koli nyɔngma. A tu lohwe awi yeli eywiɛ a he munyu ngɛ Daniel yi 7 ɔ mi. E slo bɔ nɛ lohwe nɛ ɔmɛ eko fɛɛ eko ngɛ ha. Se lohwe awi yelɔ nɛ a tu e he munyu ngɛ Kpo Jemi womi ɔ mi ɔ ngɛ suhi nɛ lohwe awi yeli nɛ a tu a he munyu ngɛ Daniel womi ɔ mi ɔ ngɛ ɔ tsuo eko. Lohwe awi yelɔ nɛ ɔ dɛ si kɛ ha nɔ yemi kake aloo nɔ yemi ko nɛ ngɛ he wami wawɛɛ ngɛ je ɔ mi tsuo. A tsɔɔ kaa e ngɛ “wɛtso fɛɛ wɛtso kɛ nimli kɛ lilɛ kɛ je ma nɔ” yee. Enɛ ɔ tsɔɔ kaa e nɔ kuɔ pe nɔ yemi fɛɛ nɔ yemi nɛ ngɛ zugba a nɔ. (Kpoj. 13:7) Lɔ ɔ he ɔ, lohwe awi yelɔ nɛ ɔ daa si kɛ ha nɔ yemihi tsuo nɛ a ye adesahi a nɔ kɛ je blema kɛ ba si mwɔnɛ ɔ. (Fiɛɛ. 8:9) Nɔ́ kpa ko hu nɛ tsɔɔ kaa lohwe awi yelɔ nɛ e ngɛ yi kpaago ɔ daa si kɛ ha nɔ yemihi tsuo ɔ ji kaa e ngɛ “koli nyɔngma.” Behi fuu ɔ, ngɛ Baiblo ɔ mi ɔ, a kɛ yibɔ nɛ ji nyɔngma daa si kɛ haa nɔ́ ko nɛ e su kɛ pi si. w22.05 9 ¶6

Mɛnɔmɛ nɛ a ma ná blɔ nya tomi kpakpa nɛ ɔmɛ a he se? Nihi nɛ a ma ná he se kekle ji asafo kuu ngua a nɛ a maa po Harmagedon ɔ kɛ a bimɛ nɛ eko ɔ, a ma fɔ ngɛ je ehe ɔ mi ɔ. Se Kpo Jemi yi 20 ɔ hu wo si kaa a ma tle nihi nɛ a gbo ɔ si. (Kpoj. 20:​11-13) Anɔkualetsɛmɛ “nɛ a da” nɛ a gbo blema a, kɛ “nihi nɛ a dɛ” nɛ a ná we he blɔ kaa a maa kase Yehowa he ní ɔ maa ba wami mi ngɛ zugba a nɔ ekohu. (Níts. 24:15; Yoh. 5:​28, 29) Anɛ enɛ ɔ tsɔɔ kaa a ma tle adesahi tsuo si kɛ ba wami mi ngɛ Jeha Akpe Nɔ Yemi ɔ mi lo? Dɛbi. A be nihi nɛ a ná he blɔ kaa a ma sɔmɔ Yehowa se a je blɔ kua loko a gbo ɔ si tlee. A ná he blɔ kaa a maa kase Yehowa he ní, se a ní peepee tsɔɔ kaa a sɛ kaa a maa hi Paradeiso zugba a nɔ.—Mat. 25:46; 2 Tɛs. 1:9; Kpoj. 17:8; 20:15. w22.05 18 ¶16-17

Yesu gu “tsɔlɔ anɔkualetsɛ kɛ ní lelɔ ɔ” nɔ kɛ to asafo ko nɛ se be sisi ngɛ zugba a nɔ konɛ e sɔmɔli nɛ a ja lɛ ngɛ anɔkuale mi. (Mat. 24:45) Kɛ o naa jamɛ a asafo ɔ ha kɛɛ? Eko ɔ, mo hu o nuɔ he kaa bɔ nɛ bɔfo Petro nu he ha a be mi nɛ e tu munyuhi nɛ ngɛ mwɔnɛ ɔ ngmami ɔ mi ɔ. Ke pi nɛ wa ba na Yehowa asafo ɔ, jinɛ mwɔnɛ ɔ, jije wa ngɛ? Kɛ gu asafo nɛ ɔ nɔ ɔ, Kristo haa nɛ wa nine suɔ nɔ́ fɛɛ nɔ́ nɛ e he hia kaa wa ná konɛ waa ya nɔ nɛ waa ye Mawu anɔkuale ɔ nɔ. Yesu tsɔseɔ wɔ konɛ wa nyɛ nɛ wa tsu wa fiɛɛmi ní tsumi ɔ saminya hulɔ. Jehanɛ hu ɔ, e yeɔ bua wɔ konɛ waa wo “su ehe ɔ,” konɛ waa sa Yehowa hɛ mi. (Efe. 4:24) Yesu haa wɔ blɔ tsɔɔmi nɛ sa ngɛ haomi behi a mi. Wa na se nami nɛ ngɛ blɔ tsɔɔmi nɛ ɔmɛ a he benɛ COVID-19 hiɔ ɔ je sisi ɔ. Be mi nɛ nihi babauu ngɛ je ɔ mi ɔ li nɔ́ nɛ a maa pee ɔ, Yesu ngɔ blɔ tsɔɔmi nɛ ngɛ heii kɛ ha wɔ konɛ wa nyɛ nɛ waa hi si slɔkee. w22.07 12 ¶13-14

Yehowa fã blema Israel bi ɔmɛ kaa a tsɔɔ a bimɛ e he ní be fɛɛ be. (5 Mose 6:​6, 7) Fɔli nɛ ɔmɛ náa he blɔhi fuu ngɛ ligbi ɔ mi nɛ a kɛ a bimɛ ma nyɛ maa sɛɛ ní, nɛ a tsɔɔ mɛ ní konɛ a suɔ Yehowa. Kaa nɔ hyɛmi nɔ́ ɔ, ngɛ blema Israel ɔ, jokuɛ nyumuyo ma nyɛ maa ngɔ be fuu kɛ ye bua e papaa kɛ du ní loo kɛ kpa ní. Jokuɛ nyumuyo ɔ nyɛmiyo hu ma nyɛ maa ngɔ be fuu ngɛ ligbi ɔ mi kɛ ye bua e mami kɛ kpɛ ní, kɛ lo ní, loo e tsu we mi ní tsumi kpahi. Be mi nɛ fɔli ɔmɛ kɛ a bimɛ pee kake kɛ ngɛ ní tsue ɔ, a ma nyɛ maa sɛɛ níhi fuu nɛ a he hia. Kaa nɔ hyɛmi nɔ́ ɔ, a ma nyɛ ma susu Yehowa su kpakpa ko kaa mi mi himi, kɛ bɔ nɛ Yehowa yeɔ bua a weku ɔ ha a he. Ngɛ mahi fuu a nɔ ɔ, fɔli fuu nɛ deka nɛ a kɛ a bimɛ maa sɛɛ ní kɛ bla ngɛ ligbi ɔ mi tsuo. Eko ɔ, fɔli ɔmɛ maa hi ní tsumi he, nɛ jokuɛ ɔmɛ hu maa hi sukuu. Enɛ ɔ he ɔ, e sa nɛ fɔli nɛ a bɔ mɔde nɛ a ná deka kɛ ha a bimɛ nɛ a kɛ mɛ nɛ sɛɛ ní.—Efe. 5:​15, 16. w22.05 28 ¶10-11

Ke nɔ ko pee yayami nɛ hɛdɔ ngɛ he ɔ, e tɔ̃ Mawu mlaa a nɔ. Ke Kristofo no ko pee yayami nɛ hɛdɔ ngɛ he ɔ, e sa nɛ e sɔle ngɛ he ha Yehowa Mawu, nɛ e ya na asafo mi nikɔtɔma amɛ hulɔ. (La 32:5; Yak. 5:14) Mɛni ji asafo mi nikɔtɔma amɛ a blɔ nya ní tsumi? Yehowa pɛ lɛ ngɛ he blɔ nɛ e kɛ yayami keɔ, nɛ e peeɔ jã kɛ guɔ kpɔmi afɔle sami ɔ nɔ. Se Yehowa ha asafo mi nikɔtɔma amɛ he blɔ kaa a da Ngmami ɔ nɔ kɛ hyɛ kaa e sa nɛ yayami peelɔ ɔ nɛ e ya nɔ nɛ e hi asafo ɔ mi loo a je lɛ ngɛ mi. (1 Kor. 5:12) Bɔ nɛ pee nɛ a nyɛ nɛ a tsu ní tsumi nɛ ɔ saminya a, a bɔɔ mɔde kaa a ma ha sane bimihi nɛ nyɛɛ se nɛ ɔmɛ a heto: Anɛ nɔ ɔ je blɔ nɛ e pee yayami ɔ lo? Anɛ nɔ ɔ bɔ mɔde kaa e maa laa e yayami ɔ nɔ lo? Anɛ nɔ ɔ ya nɔ nɛ e pee yayami ɔ be babauu lo? Nɛ nɔ́ nɛ he hia pe kulaa a, odase ngɛ nɛ tsɔɔ kaa nɔ ɔ je e tsui mi nɛ e pia e he niinɛ lo? Anɛ odase ko ngɛ nɛ tsɔɔ kaa Yehowa ngɔ nɔ ɔ he yayami ɔ kɛ ke lɛ niinɛ lo?—Níts. 3:19. w22.06 9 ¶4

Yesu wo e kaseli ɔmɛ he wami kaa a pee nɔ́ nɛ da. (Mat. 5:6) Enɛ ɔ tsɔɔ kaa e sa nɛ o bɔ mɔde wawɛɛ nɛ o pee nɔ́ nɛ da, kɛ nɔ́ kpakpa ngɛ Mawu hɛ mi. Anɛ o suɔ anɔkuale kɛ nɔ́ nɛ da lo? Wa he ye kaa o suɔ. Enɛ ɔ he ɔ, o hiɔ lakpa yemi kɛ ní yayami kɛ yi wu tso ní peepee. (La 119:​128, 163) Ke nɔ ko yeɔ lakpa a, lɔ ɔ tsɔɔ kaa e ngɛ Satan nɛ ji je ɔ nɔ yelɔ ɔ kasee. (Yoh. 8:44; 12:31) Oti kake nɛ Satan kɛ ma e hɛ mi ji kaa e maa gbe Yehowa Mawu biɛ klɔuklɔu ɔ he guɛ. Kɛ je benɛ Satan tsɔ atuã kɛ si Yehowa ngɛ Eden abɔɔ ɔ mi tɔɔ nɛ e bɔni Mawu he lakpa munyuhi gbɛmi kɛ ngɛ fĩae. Satan tsɔɔ kaa Yehowa ji Nɔ Yelɔ nɛ e foɔ lɛ pɛ e nɔ́ mi, nɛ e yeɔ lakpa nɛ e kɛ nɔ́ kpakpa laa adesahi. (1 Mose 3:​1, 4, 5) Loloolo ɔ, Satan ngɛ Yehowa he lakpa munyuhi gbɛe kɛ ngɛ fĩae, nɛ lɔ ɔ haa nɛ nihi naa Yehowa kaa yiwutsotsɛ. Satan ma nyɛ ma ha nɛ nihi nɛ a ‘sume anɔkuale’ yemi ɔ nɛ a pee níhi nɛ dɛ kɛ yi wu tso níhi.—Rom. 1:​25-31. w23.03 2 ¶3

Eko ɔ, o ngɛ mɔde bɔe kaa o ma kpa ní yayami komɛ, se be komɛ ɔ, o kpaleɔ ya peeɔ jamɛ a ní ɔmɛ. Aloo eko ɔ, o maa nu he kaa o be nyɛe maa to o tsui si hu, nɛ o kɔni mi ma jɔ̃ akɛnɛ o sui oti nɛ o kɛ ma o hɛ mi ɔ he ɔ he je. Ke jã a, mɛni maa ye bua mo konɛ o nyɛ nɛ o fĩ si? Suɔmi nɛ o ngɛ kɛ ha Yehowa a ji nɔ́ titli nɛ maa ye bua mo. Suɔmi nɛ o ngɛ kɛ ha Yehowa a he hia wawɛɛ. (Abɛ 3:​3-6) Ke o suɔ Yehowa wawɛɛ ɔ, e maa ye bua mo konɛ o da nyagbahi nɛ o kɛ ngɛ kpee ɔ nya. Baiblo ɔ pɔɔ suɔmi nɛ se pui nɛ Yehowa ngɛ kɛ ha e sɔmɔli ɔ he munyu tumi. Suɔmi nɛ se pui nɛ Yehowa ngɛ ɔ tsɔɔ kaa e be e sɔmɔli kuae gblegbleegble. Mawu bɔ mo kaa bɔ nɛ e ngɛ ɔ. (1 Mose 1:26) Mɛni blɔ nɔ wɔ hu wa maa gu kɛ je suɔmi kaa jã a kpo? Kekleekle ɔ, mo je hɛ sa kpo. (1 Tɛs. 5:18) Daa ligbi ɔ, mo bi o he ke, ‘Mɛni blɔ nɔ Yehowa gu kɛ je suɔmi kpo kɛ tsɔɔ mi?’ Lɔ ɔ se ɔ, moo sɔle nɛ o na Yehowa si, nɛ o tu ní pɔtɛɛ komɛ nɛ e pee ha mo ɔ a he munyu. Ke Yehowa pee nɔ́ ko ha mo ɔ, ha nɛ e hi o juɛmi mi kaa suɔmi nɛ e ngɛ kɛ ha mo ɔ he je nɛ e pee jamɛ a nɔ́ ɔ ha mo ɔ nɛ. w23.03 12 ¶17-19

Yesu jé suɔmi kɛ mi mi jɔmi kpo kɛ tsɔɔ e bɔfo 12 ɔmɛ tsuo. Mɛni wa kaseɔ ngɛ mi? Pi níhi nɛ nihi peeɔ pɛ nɛ he hia, se mohu, bɔ nɛ wa peeɔ wa ní ngɛ ni kpahi gbɔjɔmihi a he ɔ hu he hia wawɛɛ. Ke nyɛmi ko pee wɔ nɔ́ dɔ nɔ́ ko ɔ, e sa nɛ wa bi wa he ke: ‘Mɛni he je nɛ nɔ́ nɛ e pee ɔ ngɛ ye nya gbae wawɛɛ ɔ? Anɛ enɛ ɔ tsɔɔ kaa i ngɛ gbɔjɔmi ko nɛ e sa nɛ ma tsu he ní lo? Anɛ eko ɔ, nyɛmi ɔ nɛ ha nɛ ye mi mi fu ɔ kɛ nyagba ko ngɛ kpee lo? Ke e da kaa ye mi mi nɛ fu po ɔ, anɛ ma nyɛ ma je suɔmi nɛ se pui kpo kɛ tsɔɔ lɛ nɛ maa ngmɛɛ sane ɔ he lo?’ Ke wa ya nɔ nɛ wa je suɔmi kpo kɛ tsɔɔ wa sibi ɔ, lɔ ɔ tsɔɔ kaa wa ji Yesu se nyɛɛli niinɛ. Yesu nɔ hyɛmi nɔ́ ɔ hu tsɔɔ wɔ kaa e sa nɛ waa bɔ mɔde kaa wa maa nu wa nyɛmimɛ ɔmɛ sisi. (Abɛ 20:5) E ngɛ heii kaa Yesu ma nyɛ maa le nɔ́ nɛ ngɛ nɔ ko tsui mi, se wɔɔ lɛɛ wa be nyɛe. Se kɛ̃ ɔ, wa ma nyɛ maa to wa tsui si kɛ ha wa nyɛmimɛ nyumuhi kɛ yihi ke a tɔ̃ wa nɔ. (Efe. 4:​1, 2; 1 Pet. 3:8) Wa ma nyɛ maa pee jã ke wa le mɛ saminya. w23.03 30 ¶14-16

Ke Satan na kaa hiɔ ha nɛ wa wami ya je oslaa mi, nɛ wa hia tsami oya nɔuu ɔ, e bɔɔ mɔde kaa e maa gu lɔ ɔ nɔ kɛ ha nɛ waa ngmɛɛ wa hemi kɛ yemi ɔ he. Dɔkitahi kɛ wa weku li nɛ a sɔmɔ we Yehowa a, ma nyɛ maa nyɛ wa nɔ kaa waa kplɛɛ nɛ a ha wɔ muɔ. Se jã peemi ma ha nɛ wa tɔ̃ Mawu mlaa a nɔ. Ni komɛ hu ma nyɛ maa wo wɔ he wami kaa wa hla hiɔ tsami blɔ nɔ tomi nɛ kɛ Baiblo sisi tomi mlaa kpa we gbi ɔ se blɔ. E ngɛ mi kaa wa sume nɛ wa gbo mohu lɛɛ, se ke e ba kaa wa gbo po ɔ, wa le kaa Yehowa hɛ be wa nɔ jee. (Rom. 8:​37-39) Ke Yehowa huɛmɛ gbo ɔ, e yaa nɔ nɛ e kaiɔ mɛ kaa nɔ́ nɛ a ngɛ wami mi. (Luka 20:37) E suɔ nɛ e tle mɛ si kɛ ba wami mi. (Hiob 14:15) Yehowa ngɔ nɔ́ nɛ he jua wa kɛ sã afɔle konɛ wa nyɛ nɛ wa “ná neneene wami.” (Yoh. 3:16) Wa le kaa Yehowa suɔ wɔ, nɛ e susuɔ wa he wawɛɛ. Lɔ ɔ he ɔ, ke wa be he wami aloo a ngɛ wa he gbeye woe kaa a maa gbe wɔ ɔ, wa ngɔɔ wa hɛ kɛ fɔɔ Yehowa nɔ konɛ e wo wa bua nɛ e ha wɔ he wami kɛ nile, se pi nɛ wa maa je e se.—La 41:3. w22.06 18 ¶16-17

Baiblo ɔ de ke: ‘Loko o ma ná nile ɔ, ja o ye Yehowa gbeye. Ke o ná le Nɔ Klɔuklɔu ɔ pɛ o ná juɛmi.’ (Abɛ 9:10) Lɔ ɔ ke e ba kaa wa maa mwɔ yi mi kpɔ ko nɛ he hia a, e sa nɛ waa da Nɔ Klɔuklɔu ɔ he nile nɛ wa ngɛ ɔ nɔ kɛ mwɔ yi mi kpɔ ɔ. Wa ma nyɛ maa da Baiblo ɔ, kɛ wa womihi nɛ a da Baiblo ɔ nɔ kɛ pee ɔ nɔ kɛ mwɔ yi mi kpɔ. Jã nɛ wa maa pee ɔ maa tsɔɔ kaa wa ngɛ nile nitsɛnitsɛ. (Abɛ 2:​5-7) Yehowa ngɔ pɛ nɛ wa ma nyɛ ma ná nile nitsɛnitsɛ kɛ je. (Rom. 16:27) Mɛni he je nɛ wa ma nyɛ ma de ke nile nitsɛnitsɛ je Yehowa ngɔ ɔ? Kekleekle ɔ, lɛ nɛ e bɔ wɔ, nɛ e le níhi nɛ e bɔ ɔ he nɔ́ fɛɛ nɔ́. (La 104:24) Enyɔne ɔ, nɔ́ fɛɛ nɔ́ ko nɛ Yehowa pee ɔ tsɔɔ kaa e le ní. (Rom. 11:33) Etɛne ɔ, nihi nɛ a kɛ Yehowa ga womi tsuɔ ní ɔ náa he se be fɛɛ be. (Abɛ 2:​10-12) Loko wa ma ná nile nitsɛnitsɛ ɔ, ja wa kplɛɛ anɔkuale munyu nɛ ɔmɛ a nɔ. Ja wa ngmɛ blɔ nɛ anɔkuale munyu nɛ ɔmɛ kudɔ wɔ ngɛ yi mi kpɔhi nɛ wa mwɔɔ, kɛ níhi nɛ wa peeɔ ɔmɛ a mi. w22.10 19 ¶3-4

A ye Satan nɔ kunimi ngɛ ta nɛ a tu he munyu ngɛ Kpo Jemi yi 12 ɔ mi ɔ, nɛ a sake e kɛ daimonio ɔmɛ kɛ fɔ zugba a nɔ. “Musu tloo je ɔ,” ejakaa Satan mi mi fu wawɛɛ, nɛ e kɛ e we abofu ɔ kple adesahi a nɔ. (Kpoj. 12:​9-12) Kɛ gbami nɛ ɔmɛ maa ye bua wɔ ha kɛɛ? Níhi nɛ ngɛ nɔ yae ngɛ je ɔ mi, kɛ su yayahi nɛ́ nihi ngɛ kpo jee ɔ ma ha nɛ wa yɔse kaa Yesu ba pee Matsɛ. E sɛ nɛ wa ha nɛ nihi nɛ a yi kpɛti wa, kɛ nihi nɛ a foɔ mɛ pɛ a nɔ́ mi ɔ a ní peepee nɛ wo wa mi mi la. Mohu ɔ, e sa nɛ lɔ ɔ nɛ kai wɔ kaa Baiblo gbami ngɛ mi bae. Amlɔ nɛ ɔ, Mawu Matsɛ Yemi ɔ ngɛ nɔ yee! (La 37:1) Benɛ wa ngɛ Hamagedɔn ta a he sue ɔ, e sa nɛ waa hyɛ blɔ kaa níhi ma puɛ ngɛ je ɔ mi pe bɔ nɛ e ngɛ amlɔ nɛ ɔ. (Maak. 13:8; 2 Tim. 3:13) Wa bua ja kaa wa hiɔwe Tsɛ nɛ e suɔ wɔ ɔ ye bua wɔ nɛ wa na nɔ́ he je nɛ nyagbahi fuu ngɛ je ɔ mi ɔ. w22.07 3-4 ¶7-8

Wa ma nyɛ maa sɔle ha Yehowa konɛ e ye bua wa nyɛmimɛ Kristofohi nɛ a nyɛ nɛ a da hiɔhi, adebɔ mi oslaahi, ta, si temi kɛ womi, kɛ nyagba kpahi nɛ a kɛ kpee ɔ a nya. Wa ma nyɛ maa sɔle ha wa nyɛmimɛ nɛ́ a ngɔ a he kɛ ha kɛ yeɔ bua nyɛmimɛ nɛ a hia yemi kɛ buami ngɛ oslaa be mi ɔ hulɔ. Eko ɔ, o le wa nyɛmimɛ komɛ nɛ a kɛ haomihi kaa jã ngɛ kpee. O ma nyɛ maa wo a biɛ ta nɛ o sɔle ha mɛ. Ke wa sɔle konɛ Yehowa nɛ e ye bua wa nyɛmimɛ ɔmɛ nɛ a nyɛ nɛ a da a nya gba amɛ a nya a, lɔ ɔ tsɔɔ kaa wa suɔ mɛ wawɛɛ. Nihi nɛ a nyɛɛɔ asafo ɔ hɛ mi ɔ bua jɔɔ wawɛɛ ke wa sɔle ha mɛ ejakaa a náa he se. Bɔfo Paulo le kaa e he hia nɛ ni kpahi nɛ a sɔle kɛ ha lɛ. E ngma ke: “Nyɛɛ sɔle ha imi hulɔ, konɛ ke i pã ye nya mi ɔ, a ha mi munyuhi bɔ nɛ pee nɛ ma nyɛ ma tu munyu kɛ kã, nɛ́ ma ha nɛ a le sane kpakpa a he laami sane nɛ e ngɛ klɔuu ɔ.” (Efe. 6:19) Mwɔnɛ ɔ hu ɔ, wa ngɛ nyɛmimɛ nyumuhi fuu ngɛ wa kpɛti nɛ a ngɛ mɔde bɔe wawɛɛ kɛ ngɛ asafo ɔ hɛ mi nyɛɛe. Ke wa sɔle ha mɛ konɛ Yehowa nɛ e jɔɔ a ní tsumi ɔ nɔ ɔ, lɔ ɔ tsɔɔ kaa wa suɔ mɛ. w22.07 23-24 ¶14-16

Ta bulɔ buɔ dade pɛɛ konɛ e kɛ po e he piɛ. Satan kɛ wɔ ngɛ ta hwue, enɛ ɔ he je ɔ, e sa nɛ waa po wa juɛmi he piɛ konɛ Satan nɛ ko ná wa juɛmi nɔ he wami. E guɔ blɔ slɔɔtohi a nɔ kɛ kaa wɔ, konɛ wa ná susumihi nɛ dɛ. Kaa bɔ nɛ dade pɛɛ poɔ ta bulɔ yi he piɛ ɔ, jã kɛ̃ nɛ wa hɛ kɛ nɔ fɔmi ɔ poɔ wa susumi he piɛ konɛ waa ya nɔ nɛ waa ye Yehowa anɔkuale. Se ke wa hɛ kɛ nɔ fɔmi ɔ gbɔjɔ, nɛ wa bɔni níhi nɛ wɔ nitsɛmɛ wa suɔ ɔ he susumi ɔ, wa ma je wa juɛmi ngɛ wa hɛ kɛ nɔ fɔmi ɔ nɔ. Mo susu Kristofohi komɛ nɛ a hi si ngɛ blema Korinto ɔ a he nɛ o hyɛ. Hemi kɛ yemi nɛ a ngɛ ngɛ si ko nɛ he hia nɛ Mawu wo ɔ mi ɔ gbɔjɔ. Lɔ ɔ ji hemi kɛ yemi nɛ a ngɛ ngɛ gbogboehi a si tlemi ɔ mi ɔ nɛ. (1 Kor. 15:12) Paulo ngma kaa nihi nɛ a be hemi kɛ yemi ngɛ gbogboehi a si tlemi ɔ mi ɔ peeɔ mɛ nitsɛmɛ a suɔmi nya ní. (1 Kor. 15:32) Mwɔnɛ ɔ, nihi babauu be hemi kɛ yemi ngɛ Mawu si womihi a mi. Enɛ ɔ he ɔ, a peeɔ nɔ́ fɛɛ nɔ́ nɛ ma ha nɛ a ná bua jɔmi mwɔnɛ ɔ. Se wɔɔ lɛɛ e slo wɔ kulaa, ejakaa wa ngɛ hɛ kɛ nɔ fɔmi kaa Mawu si womi ɔmɛ maa ba mi hwɔɔ se. w22.10 25-26 ¶8-9

Yehowa suɔ kaa o sɔle kɛ ha lɛ. E le nyagbahi nɛ o kɛ ngɛ kpee, nɛ e suɔ nɛ o ná nɔ mi mami kaa e maa bu o sɔlemi tue be fɛɛ be. E suɔ nɛ e bu e sɔmɔli a sɔlemi tue. (Abɛ 15:8) Mɛni ji ní komɛ nɛ o ma nyɛ maa sɔle ngɛ he ke o nu he kaa e piɛ mo pɛ? Mo de Yehowa bɔ nɛ o ngɛ he nue ha. (La 62:8) Mo de lɛ o nyagba amɛ, kɛ bɔ nɛ nyagba amɛ haa nɛ o nuɔ he ha. Mo bi Yehowa nɛ e ye bua mo nɛ o le nɔ́ nɛ o maa pee ke o ngɛ he nue kaa e piɛ mo pɛ aloo ke o bua jɔɛ. Mo bi Yehowa nɛ e wo mo kã konɛ o nyɛ nɛ o tsɔɔ nihi níhi a nya saminya. O ma nyɛ ma bi lɛ nɛ e ha mo nile konɛ o nyɛ nɛ o kɛ hɛ si kami nɛ tsɔɔ o hemi kɛ yemi ɔ mi. (Luka 21:​14, 15) Ke o kɔni mi jɔ̃ loo o hao ɔ, mo bi Yehowa nɛ e ye bua mo konɛ o nyɛ nɛ o kɛ Kristofo no ko nɛ e nane pi si ɔ nɛ sɛɛ he ní. O ma nyɛ ma bi Yehowa nɛ e ye bua nɔ nɛ o kɛ lɛ yaa sɛɛ ní ɔ nɛ e bu mo tue nɛ e nu bɔ nɛ o ngɛ he nue ha a sisi. Moo hyɛ bɔ nɛ Yehowa ma ha o sɔlemi ɔ heto ha, nɛ o kplɛɛ yemi kɛ buami nɛ ni kpahi kɛ ma ha mo ɔ nɔ. Ke o pee jã a, o be he nue tsɔ kaa e piɛ mo pɛ. w22.08 10 ¶6

Asafo ehe nɛ a to sisi ngɛ Tɛsalonika a kɛ si temi kɛ womi nɛ nya wa kpe. Si temi kɛ woli ɔmɛ nu “nyɛmimɛ ɔmɛ a ti ni komɛ kɛ ya ma nɔ yeli ɔmɛ a ngɔ.” (Níts. 17:6) Moo po he foni nɛ o hyɛ bɔ nɛ nyɛmimɛ nɛ ɔmɛ nɛ a ba na anɔkuale ɔ kɛ we ɔ maa ye gbeye ha. A kɔni mi ko nyɛ ko jɔ̃ ngɛ Yehowa sɔmɔmi mi, se Paulo sume nɛ e ba lɛ jã. Bɔfo Paulo to blɔ nya konɛ a hyɛ asafo ehe ɔ nɔ saminya. Paulo de Tɛsalonika bi ɔmɛ ke: “Wa tsɔ Timoteo, wa nyɛminyumu . . . ɔ, konɛ e ba ha nɛ nyɛ he nɛ wa nɛ e wo nyɛ bua ngɛ nyɛ hemi kɛ yemi ɔ he.” (1 Tɛs. 3:​2, 3) Timoteo nitsɛ na bɔ nɛ Paulo wo nyɛmimɛ ɔmɛ he wami ha ngɛ Listra. Akɛnɛ Timoteo na bɔ nɛ Yehowa ye bua mɛ ha a he je ɔ, e ma nyɛ ma ha nɛ nyɛmimɛ nɛ a ngɛ Tɛsalonika a nɛ a ná nɔ́ mi mami kaa níhi ma tsake.—Níts. 14:​8, 19-22; Heb. 12:2. w22.08 21 ¶4

Ngɛ jeha 1870 ɔ mi ɔ, Baiblo kaseli ɔmɛ bɔni Baiblo ɔ kasemi wawɛɛ, nɛ Charles Taze Russell ji nɔ nɛ nyɛɛ a hɛ mi. A suɔ nɛ a le nɔ́ tutuutu nɛ Yesu kpɔmi afɔle sami ɔ tsɔɔ, kɛ bɔ nɛ e sa nɛ a kai Yesu gbenɔ ɔ ha. Mwɔnɛ ɔ, wa náa níhi a mi hlami nɛ a pee ɔ he se wawɛɛ. Ngɛ mɛni blɔ nɔ? Wa ba le nɔ́ nɛ Yesu kpɔmi afɔle sami ɔ tsɔɔ tutuutu, kɛ nɔ́ nɛ e maa pee kɛ ha adesahi tsuo. (1 Yoh. 2:​1, 2) Wa ba kase hu kaa hɛ nɔ kami enyɔ lɛ ngɛ kɛ ha adesahi nɛ a peeɔ Mawu suɔmi nya ní ɔ. Ni komɛ ngɛ hɛ nɔ kami kaa a maa ya hiɔwe nɛ a be gboe hu gblegbleegble, nɛ ni komɛ hu ngɛ hɛ nɔ kami kaa a maa hi si ngɛ zugba a nɔ kɛ ya neneene. Ke wa susu bɔ nɛ Yehowa suɔ wɔ ha kɛ bɔ nɛ wa ti nɔ fɛɛ nɔ náa Yesu kpɔmi afɔle sami ɔ he se ha a he ɔ, e haa nɛ wa hɛɛ kɛ suɔ Yehowa he wawɛɛ. (1 Pet. 3:18) Enɛ ɔ he ɔ, kaa bɔ nɛ wa nyɛmimɛ anɔkualetsɛmɛ nɛ a hi si blema a pee ɔ, wɔ hu wa fɔɔ nihi nine konɛ a ba piɛɛ wa he kɛ kai Yesu gbenɔ ɔ kaa bɔ nɛ Yesu tsɔɔ wɔ kaa waa pee ɔ pɛpɛɛpɛ. w23.01 21 ¶6-7

Yesu tsɔɔ nihi jɔɔmihi nɛ Mawu Matsɛ Yemi ɔ kɛ maa ba. Wa bua jɔ níhi nɛ Matsɛ Yemi ɔ maa pee ha wɔ ɔ he wawɛɛ. Wa bua jɔ kpɔmi nɔ ɔ hu he ejakaa kɛ gu lɔ ɔ nɔ ɔ, huɛ bɔmi kpakpa ma nyɛ maa hi waa kɛ Yehowa kɛ Yesu wa kpɛti. Nihi nɛ a he Yesu ye ɔ ngɛ hɛ kɛ nɔ fɔmi kaa a maa hi si kɛ ya neneene, nɛ a maa na a suɔli nɛ a gbo ɔ ekohu. (Yoh. 5:​28, 29; Rom. 6:23) Jinɛ wa sɛ kɛ ha jɔɔmi nɛ ɔmɛ, nɛ wa be nyɛe maa to Mawu kɛ Kristo nane mi ngɛ nɔ́ nɛ a pee kɛ ha wɔ ɔ he hulɔ. (Rom. 5:​8, 20, 21) Se wa ma nyɛ maa pee níhi kɛ tsɔɔ kaa wa bua jɔ nɔ́ a pee kɛ ha wɔ nɛ ɔ he. Ngɛ mɛni blɔ nɔ? Wa ma nyɛ maa ngɔ wa he lo nya níhi kɛ fĩ Matsɛ Yemi ní tsumi ɔ se. Kaa nɔ hyɛmi nɔ́ ɔ, wa ma nyɛ maa ngɔ wa he kɛ ha konɛ waa ye bua kɛ ma asafo ɔ tsuhi loo waa ye bua kɛ dla tsu nɛ ɔmɛ. w23.01 26 ¶3; 28 ¶5

Nihi nɛ a maa ye matsɛ ngɛ Mawu Matsɛ Yemi ɔ mi ɔ lɛɛ a maa ye bua kɛ hyɛ adesahi ayɔhi akpehi abɔ a nɔ ngɛ je kɛ wɛ. Nihi 144,000 ɔ maa piɛɛ Yesu he kɛ sɔmɔ kaa matsɛmɛ kɛ osɔfohi. (Kpoj. 5:10) Ngɛ Mose Mlaa a mi ɔ, osɔfo ɔmɛ ji nihi titli nɛ a hyɛɔ konɛ ma mi bi ɔmɛ nɛ a ná nɔmlɔ tso mi he wami kpakpa nɛ a hɛ kɛ su Yehowa he. Jamɛ a Mlaa a ji “ní kpakpahi nɛ maa ba a he nini.” Enɛ ɔ he ɔ, wa ma nyɛ ma de ke Yesu kɛ nihi nɛ a maa piɛɛ e he kɛ ye matsɛ ɔ maa ye bua Mawu we bi konɛ a ná nɔmlɔ tso mi he wami kpakpa nɛ a hɛ kɛ su Yehowa he. (Heb. 10:1) Amlɔ nɛ ɔ, wa li blɔ nɔ nɛ matsɛmɛ kɛ osɔfo nɛ ɔmɛ maa gu nɛ a kɛ blɔ tsɔɔmi ma ha Matsɛ Yemi ɔ sisi bimɛ nɛ a maa hi zugba a nɔ ɔ. Wa ma nyɛ ma ná nɔ mi mami kaa blɔ nya fɛɛ blɔ nya nɛ Yehowa maa to ngɛ Paradeiso ɔ mi ɔ maa ye bua nihi nɛ a maa hi zugba a nɔ ɔ nɛ a nine maa su blɔ tsɔɔmi nɛ a maa hia a nɔ.—Kpoj. 21:​3, 4. w22.12 11 ¶11-13

Yi mi tomi kake he je nɛ wa fɔɔ nihi nine konɛ a ba piɛɛ wa he kɛ kai Yesu gbenɔ ɔ ji kaa wa suɔ nɛ nihi nɛ a maa ba Kaimi ɔ kekleekle be ɔ, nɛ a ba le nɔ́ nɛ Yehowa kɛ Yesu pee kɛ ha wɔ tsuo ɔ. (Yoh. 3:16) Wa hyɛɛ blɔ kaa nɔ́ nɛ a maa na, kɛ nɔ́ nɛ a maa nu ngɛ Kaimi ɔ sisi ɔ maa ta a tsui he konɛ a ya nɔ nɛ a kase Yehowa he ní babauu nɛ a ba sɔmɔ lɛ. Wa fɔɔ nihi nɛ a kpa Yehowa sɔmɔmi ɔ hu nine kɛ baa Kaimi ɔ. Jã nɛ wa peeɔ ɔ kaiɔ mɛ kaa loloolo ɔ, Mawu suɔ mɛ. A kpɛti nihi fuu kplɛɛɔ nine fɔmi ɔ nɔ nɛ a baa, nɛ ke wa na mɛ ɔ, wa bua jɔɔ wawɛɛ. Ke a ba Kaimi ɔ, e kaiɔ mɛ bua jɔmi nɛ a ná be ko nɛ be nɛ a ngɛ Yehowa sɔmɔe ɔ. (La 103:​1-4) Ke nihi kplɛɛ wa nine fɔmi ɔ nɔ nɛ a ba Kaimi ɔ jio, a bɛ jio, wa bɔɔ mɔde wawɛɛ kaa wa maa fɔ nihi nine, ejakaa wa le kaa Yehowa susuɔ nihi nɛ a baa Kaimi ɔ a ti nɔ fɛɛ nɔ he wawɛɛ.—Luka 15:7; 1 Tim. 2:​3, 4. w23.01 20 ¶1; 22-23 ¶9-11

Nyɔ mi nɛ e nɔ jena Yesu ma gbo ɔ, e ngɔ ní bimi ko nɛ he hia wawɛɛ kɛ fɔ e hiɔwe Tsɛ ɔ hɛ mi. E de Yehowa ngɛ sɔlemi mi kaa e bu e se nyɛɛli ɔmɛ a he. (Yoh. 17:​15, 20) Yehowa hyɛɛ e we bi a nɔ be fɛɛ be, nɛ e poɔ a he piɛ. Se Yesu le kaa Satan maa te si kɛ wo e se nyɛɛli ɔmɛ wawɛɛ. Jehanɛ hu ɔ, e le kaa e se nyɛɛli ɔmɛ maa hia Yehowa yemi kɛ buami konɛ a nyɛ nɛ a da Satan tuami ɔmɛ a nya. Satan je ɔ ha nɛ níhi a mi wa ha anɔkuale Kristofohi, nɛ a kɛ nyagbahi fuu ngɛ kpee mwɔnɛ ɔ. Haomihi nɛ waa kɛ kpeɔ ɔ ma nyɛ ma jɔ̃ wa kɔni mi, nɛ e ma nyɛ ma ha nɛ e he nɛ wa ha wɔ kaa wa maa ye Yehowa anɔkuale. Se e sɛ nɛ waa ye gbeye. Yehowa ngɛ wa nɔ hyɛe, e naa nyagbahi nɛ waa kɛ ngɛ kpee ɔ, nɛ e pee klaalo kaa e maa ye bua wɔ kɛ da nya. Niinɛ, ‘nihi nɛ yeɔ Yehowa gbeye ɔ, Yehowa buɔ a he . . . nɛ e ma kpɔ̃ mɛ.’—La 33:​18-20. w22.08 8 ¶1-2

Daa jeha ngɛ Kaimi be ɔ mi ɔ, wa jeɔ hɛ sa kpo ngɛ nɔ́ nɛ Yesu pee kɛ ha wɔ ɔ he kɛ gu sɔlemi nɛ wa sɔleɔ kɛ wa yi mi tɛ nɛ wa pueɔ ngɛ bɔ nɛ wa náa e gbenɔ ɔ he se ha a he. Wa woɔ nihi fuu he wami konɛ a ba piɛɛ wa he kɛ ye gbijlɔ klɛdɛɛ nɛ ɔ, nɛ wa fia wa pɛɛ si kaa wa be hae nɛ nɔ́ ko nɔ́ ko nɛ tsi wa nya nɛ wa ko ya Kaimi ɔ. Ngɛ kaimi ɔ sisi ɔ, wa ba leɔ nɔ́ he je nɛ adesahi hia kpɔmi nɔ́ ɔ kɛ bɔ nɛ nɔmlɔ kake pɛ gbenɔ ma nyɛ ma je nihi babauu a he yayamihi kɛ je ha. A kaiɔ wɔ nɔ́ nɛ abolo ɔ kɛ wai ɔ daa si kɛ ha, kɛ nihi nɛ e sa nɛ a ye abolo ɔ nɛ a nu wai ɔ eko. (Luka 22:​19, 20) Jehanɛ hu ɔ, wa pueɔ wa yi mi tɛ ngɛ jɔɔmihi nɛ se be nɛ nihi nɛ a ngɛ hɛ nɔ kami kaa a maa hi zugba a nɔ ma ná a he. (Yes. 35:​5, 6; 65:​17, 21-23) Anɔkuale nɛ ɔmɛ a he hia wawɛɛ nɛ e sɛ nɛ waa na mɛ kaa nɔ́ nyafii ko kulaa. w23.01 20 ¶2; 21 ¶4

Mawu Bi ɔ nɛ́ e ngɔ lɛ kɛ ha kaa kpɔmi nɔ́ konɛ a ngɔ wa he yaya ɔmɛ kɛ ke wɔ ɔ tsɔɔ kaa wa ma nyɛ ma ná neneene wami. (Mat. 20:28) Bɔfo Paulo de ngɛ he ke: “Akɛnɛ gbenɔ gu adesa nɔ kɛ ba he je ɔ, gbogboehi a si tlemi hu maa gu adesa nɔ kɛ ba. Ejakaa kaa bɔ nɛ nihi tsuo ngɛ gboe ngɛ Adam mi ɔ, jã kɛ̃ nɛ a ma ha nɛ nihi tsuo maa ba wami mi ngɛ Kristo mi.” (1 Kor. 15:​21, 22) Yesu tsɔɔ e se nyɛɛli ɔmɛ kaa a sɔle nɛ Mawu Matsɛ Yemi ɔ nɛ ba konɛ a pee Mawu suɔmi nya ní ngɛ zugba a nɔ. (Mat. 6:​9, 10) Mawu yi mi tomi ɔ eko ji kaa adesahi maa hi zugba a nɔ kɛ ya neneene. Bɔ nɛ pee nɛ yi mi tomi nɛ ɔ nɛ ba mi ɔ, Mawu hla e Bi ɔ kaa Mesia Matsɛ Yemi ɔ nya Matsɛ. Mawu ngɛ nimli 144,000 a nya buae ngɛ zugba a nɔ. Nimli nɛ ɔmɛ maa piɛɛ Yesu he kɛ tsu ní konɛ Mawu yi mi tomi ɔ nɛ ba mi.—Kpoj. 5:​9, 10. w22.12 5 ¶11-12

Ke wa suɔlɔ ko gbo ɔ, wa hɛ jaa ngɛ e he wawɛɛ! Be komɛ ɔ, ke wa susu níhi nɛ ya nɔ loko e gbo ɔ he ɔ, e dɔɔ wɔ wawɛɛ, titli ke e na nɔ́ loko e gbo. Se ke be pue mi, nɛ wa susu níhi nɛ e tsɔɔ wɔ, níhi nɛ e pee aloo ní komɛ nɛ e de kɛ wo wa nya muɔ loo kɛ wo wɔ he wami ɔ he ɔ, e haa nɛ wa bua jɔɔ. Jã kɛ̃ nɛ ke wa kane bɔ nɛ Yesu na nɔ́ loko e gbo ɔ he ní ɔ, e dɔɔ wɔ. Ngɛ Kaimi be ɔ mi ɔ, wa heɔ be kɛ susuɔ bɔ nɛ Yesu kpɔmi afɔle sami ɔ he hia ha a he. (1 Kor. 11:​24, 25) Se ke wa pue wa yi mi tɛ ngɛ níhi nɛ Yesu pee kɛ níhi nɛ e de benɛ e ngɛ zugba a nɔ he ɔ, wa bua jɔɔ wawɛɛ. Ke wa susu níhi nɛ Yesu ngɛ pee amlɔ nɛ ɔ, kɛ níhi nɛ e maa pee ha wɔ hwɔɔ se ɔ he ɔ, e woɔ wɔ he wami. w23.01 26 ¶1-2

Benɛ Yesu gbo ɔ, e dɔ e kaseli ɔmɛ wawɛɛ. A huɛ nɛ a fiɛ we e he kulaa a gbo, nɛ a hɛ nɔ kami hu ta. (Luka 24:​17-21) Se kɛ̃ ɔ, benɛ a tle Yesu si nɛ e je e he kpo kɛ tsɔɔ mɛ ɔ, e to e tsui si kɛ ye bua mɛ nɛ a na bɔ nɛ e ha nɛ Baiblo gbami bami ha. Lɔ ɔ se ɔ, e ngɔ ní tsumi ko nɛ he hia kɛ wo a dɛ. (Luka 24:​26, 27, 45-48) Benɛ Yesu ho hiɔwe ya a, kaseli ɔmɛ a bua jɔ wawɛɛ nɛ a yi aywilɛho hu. A bua jɔ wawɛɛ ejakaa a le kaa Yesu ngɛ wami mi, nɛ e maa ye bua mɛ konɛ a nyɛ nɛ a tsu ní tsumi ehe nɛ e kɛ wo a dɛ ɔ. Bua jɔmi nɛ a ná a, ha nɛ a ya nɔ nɛ a je Yehowa yi. (Luka 24:​52, 53; Níts. 5:42) Loko wa ma nyɛ maa kase nɔ́ nɛ Yesu Kaseli ɔmɛ pee ɔ, e biɔ nɛ waa ngɔ Mawu Matsɛ Yemi ɔ kɛ ye kekle blɔ he ngɛ wa si himi mi. E ngɛ mi kaa e biɔ mɔde bɔmi loko wa ma nyɛ maa ya nɔ ma sɔmɔ Yehowa mohu lɛɛ, se e wo si kaa e maa jɔɔ wɔ wawɛɛ ke wa pee jã.—Abɛ 10:22. w23.01 30-31 ¶15-16

E ngɛ heii kaa wa ti nɔ ko sume nɛ e ma tɔ̃ tɔmi nɛ Adam kɛ Hawa tɔ̃ ɔ eko. Loko wa ma nyɛ maa ye Yehowa mlaa amɛ a nɔ nɛ́ wa be wa ní pee kaa Adam kɛ Hawa a, ja wa ya nɔ nɛ wa kase Yehowa he ní, wa bua jɔ e su ɔmɛ a he, nɛ wa bɔ mɔde nɛ wa le e susumi ngɛ níhi a he. Ke wa pee jã a, suɔmi nɛ wa ngɛ kɛ ya Yehowa a mi maa wa. Mo susu Abraham he nɛ o hyɛ. E suɔ Yehowa wawɛɛ nitsɛ. E ngɛ mi kaa e nui yi mi kpɔ nɛ Yehowa mwɔ ɔ sisi lɛɛ, se e tsɔ we atuã, mohu ɔ, e bɔ mɔde nɛ e le Yehowa saminya. Kaa nɔ hyɛmi nɔ́ ɔ, benɛ Yehowa de lɛ kaa e ma kpata Sodom kɛ Gomora hɛ mi ɔ, sisije ɔ, Abraham ye gbeye kaa Yehowa nɛ ji “je ɔ tsuo Kojolɔ ɔ” ma kpata dali kɛ yayami peemi tsuo a hɛ mi kɛ bla. Abraham susu kaa e sɛ nɛ Yehowa nɛ pee jã, lɔ ɔ he je ɔ, e je he si bami mi nɛ e bi lɛ sanehi. Yehowa hu to e tsui si nɛ e ha sanehi nɛ e bi lɛ ɔ a heto. Nyagbe ɔ, Abraham ba yɔse kaa Yehowa hyɛɛ adesa fɛɛ adesa tsui mi, lɔ ɔ he ɔ, e be dali a hɛ mi kpatae kɛ piɛɛ yayami peeli a he.—1 Mose 18:​20-32. w22.08 28 ¶9-10

Ngɛ jeha 455 loko a fɔ Kristo ɔ, benɛ Amlaalo Nehemia fia Yerusalem gbogbo ɔ ta a, e hyɛ kaa e maa na nyumuhi nɛ a ma nyɛ maa ngɔ hɛ kɛ fɔ a nɔ konɛ a hyɛ ma a nɔ. Hanania nɛ ji Mɔ nɔ hyɛlɔ nɔkɔtɔma a piɛɛ nihi nɛ Nehemia hla a he. Baiblo ɔ tu Hanania he munyu kaa e ji nɔ ko nɛ e “yeɔ anɔkuale, nɛ e yee Mawu gbeye pe nihi tsuo.” (Neh. 7:2) Hanania yeɔ Yehowa gbeye, nɛ e sume nɛ e maa pee nɔ́ ko nɛ Yehowa bua jɔɛ he. Enɛ ɔ he ɔ, e bɔ mɔde wawɛɛ nɛ e tsu ní tsumihi nɛ a kɛ wo e dɛ ɔ tsuo saminya. Su nɛ ɔmɛ ma nyɛ maa ye bua wɔ konɛ waa pee nihi nɛ a ma nyɛ maa ngɔ hɛ kɛ fɔ a nɔ ngɛ Mawu sɔmɔmi mi. Mo susu Tikiko nɔ hyɛmi nɔ́ ɔ he nɛ o hyɛ. E ji Paulo huɛ nɛ e he lɛ ye. Paulo ngɔ e hɛ kɛ fɔ Tikiko nɔ nɛ e kale lɛ kaa e ji “sɔmɔlɔ anɔkualetsɛ.” (Efe. 6:​21, 22) Benɛ Paulo ngma sɛ womi kɛ ha Efeso bi kɛ Kolose bi ɔmɛ ɔ, e kɛ mane Tikiko konɛ e kɛ ya ha mɛ. Paulo ngɛ hɛ kɛ nɔ fɔmi kaa Tikiko kɛ sɛ womi ɔ maa ya, nɛ e maa kpale wo mɛ he wami, nɛ́ e wo a bua hulɔ. Mwɔnɛ ɔ, Tikiko nɔ hyɛmi nɔ́ ɔ kaiɔ wɔ nyumuhi anɔkualetsɛmɛ nɛ wa he mɛ ye, nɛ́ a haa nɛ wa nine suu wa mumi mi hiami níhi a nɔ ɔ.—Kol. 4:​7-9. w22.09 9-10 ¶5-6

Yosef kɛ kahi nɛ a mi wa kpe maa pee jeha 13 sɔuu. Jinɛ Yosef ma nyɛ ma susu kaa Yehowa sume lɛ, loo Yehowa kua lɛ be mi nɛ e hia yemi kɛ buami. Se Yosef mi mi fu we. Mohu ɔ, e ha nɛ e hɛ hi e he nɔ, nɛ e pee kpoo. Yosef ná he blɔ kaa e maa pee e nyɛmimɛ ɔmɛ nɔ́ ko kɛ to nane mi, se e pee we jã. Mohu ɔ, e je suɔmi kpo kɛ tsɔɔ mɛ, nɛ e ngɔ a tɔmi kɛ ke mɛ. (1 Mose 45:​4, 5) Yosef pee jã ejakaa e nyɛ nɛ e susu níhi a he saminya. E ngɔɛ e juɛmi kɛ ma nɔ́ nɛ e nyɛmimɛ ɔmɛ pee lɛ ɔ nɔ, mohu ɔ, e susu nɔ́ nɛ Yehowa suɔ kaa e pee ɔ he. (1 Mose 50:​19-21) Mɛni wa ma nyɛ maa kase ngɛ mi? Ke nɔ ko pee mo nɔdɔ nɔ́ ko ɔ, ko ná Yehowa he abofu, nɛ ko susu kaa e kua mo. Mohu ɔ, ngɔɔ o juɛmi kɛ ma bɔ nɛ e ngɛ mo ye buae konɛ o nyɛ nɛ o fĩ si ha a nɔ. Jehanɛ hu ɔ, ke nihi pee mo nɔdɔ nɔ́ ko ɔ, koo ngɔ o juɛmi kɛ ma a gbɔjɔmi ɔmɛ a nɔ. Mohu ɔ, mo je suɔmi kpo kɛ tsɔɔ mɛ. w22.11 21 ¶4

Gbalɔ Daniel na nina nɛ tsɔɔ heii kaa Yehowa nɔ kuɔ kulaa pe blɔ nya kpa amɛ tsuo. Kekleekle ɔ, Daniel na lohwe awi yeli nguanguahi eywiɛ nɛ a daa si kɛ ha je ɔ tsuo nɔ yeli nɛ a ye nɔ blema a, nɛ ji Babilonia, Medo-Persia, Hela, Roma kɛ je ɔ tsuo nɔ yelɔ ɔ nɛ ngɛ nɔ yee amlɔ nɛ ɔ nɛ ji Anglo-Amerika. (Dan. 7:​1-3, 17) Kɛkɛ nɛ Daniel na Yehowa Mawu nɛ hii si ngɛ matsɛ sɛ nɔ ngɛ hiɔwe. (Dan. 7:​9, 10) Mawu ngɔ he wamihi tsuo ngɛ adesa nɔ yeli a dɛ ɔ kɛ ha ni kpahi nɛ a sa, nɛ a ngɛ he wami pe mɛ. Mɛnɔmɛ nɛ Mawu ngɔ he wami ɔ kɛ ha a? E ngɔ he wami ɔ kɛ ha “nɔ ko kaa nɔmlɔ adesa” nɛ ji Yesu Kristo kɛ “Hiɔwe No ɔ we ni klɔuklɔu ɔmɛ” nɛ ji nihi 144,000 ɔ nɛ a “maa ye matsɛ kɛ maa ya neneene” ɔ. (Dan. 7:​13, 14, 18) Enɛ ɔ tsɔɔ heii kaa Yehowa ji “Nɔ Nɛ E Nɔ Kuɔ Pe Kulaa.” Nina nɛ ɔ nɛ a je kpo kɛ tsɔɔ Daniel ɔ maa nɔ́ kpa ko nɛ e de kɛ sɛ hlami ɔ nɔ mi. Daniel de ke, “Mawu nɛ ngɛ hiɔwe ɔ . . . lɛ e woɔ matsɛ nɛ e kpaa matsɛ.”—Dan. 2:​19-21. w22.10 14-15 ¶9-11