April

Mo bi o he ke: ‘Ke a wo mi ga a, kɛ i peeɔ ye ní ngɛ he ha kɛɛ? Anɛ i kplɛɛɔ ye tɔmihi a nɔ amlɔ nɔuu aloo i kɛ níhi jeɔ ye nya? Anɛ i piaa ni kpahi ngɛ ye tɔmi ɔ he lo? Be mi nɛ o ngɛ nyumuhi kɛ yihi anɔkualetsɛmɛ kpahi a he sane kanee ngɛ Baiblo ɔ mi ɔ, mo susu bɔ nɛ tsu nyagba nɛ a kɛ kpe ɔmɛ a he ní ha. Mo bi o he ke: ‘Kɛ ma plɛ kɛ kase Yehowa sɔmɔlɔ anɔkualetsɛ nɛ ɔ ha kɛɛ?’ Jehanɛ hu ɔ, ke wa kase wa nyɛmimɛ Kristofohi nɛ jokuɛwi kɛ nikɔtɔmahi tsuo piɛɛ he ɔ a nɔ hyɛmi nɔ́ ɔ, wa ma ná he se. Kaa nɔ hyɛmi nɔ́ ɔ, mo susu nyɛminyumu ko loo nyɛmiyo ko nɛ e kɛ anɔkuale yemi ngɛ ka ko nya dae ngɛ o we asafo ɔ mi ɔ he nɛ o hyɛ. E ma nyɛ maa pee juami bi a nɔ nyɛmi, weku mi nyagbahi, aloo hiɔ ko nɛ ngɛ e nya gbae. Anɛ o naa su ko nɛ sa kadimi nɛ nyɛminyumu ɔ loo nyɛmiyo ɔ ngɛ nɛ o suɔ kaa o maa kase lo? Ke o susu e nɔ hyɛmi nɔ́ kpakpa a he ɔ, o ma nyɛ maa kase ní komɛ nɛ maa ye bua mo nɛ o da o nyagba a nya. Wa bua jɔ kaa wa ngɛ nyɛmimɛ nyumuhi kɛ yihi nɛ a je hemi kɛ yemi kpo, nɛ wa ma nyɛ maa kase mɛ!—Heb. 13:7. w22.04 13 ¶13-14

Ke waa kɛ nyagba ngɛ kpee ngɛ wa si himi mi ɔ, wa bua jɔɔ ke asafo mi nɔkɔtɔma ko nɛ e susuɔ nɔ he bu wɔ tue nɛ e wo wa bua. Ke wa maa hia yemi kɛ buami konɛ waa kɛ nɔ ko nɛ kase Baiblo ɔ nɛ blɔ gbalɔ ko nɛ e nane pi si kplɛɛ nɔ kaa e maa ye bua wɔ ɔ, wa bua jɔɔ. Nyɛmimɛ nɛ ɔmɛ tsuo a bua jɔɔ ke a ye bua wɔ. Ke wɔ hu wa ye bua ni kpahi ɔ, wa ma ná jamɛ a bua jɔmi ɔ eko. Ke o suɔ nɛ o bli o sɔmɔmi ní tsumi ɔ mi kɛ gu blɔ nɛ ɔ nɔ loo blɔ kpahi a nɔ ɔ, mɛni ma nyɛ maa ye bua mo? Koo ngɔ otihi fuu kɛ ma o hɛ mi ngɛ be kake mi. Kaa nɔ hyɛmi nɔ́ ɔ, eko ɔ, o ma de ke, ‘I suɔ nɛ ma pee babauu ngɛ asafo ɔ mi.’ Se eko ɔ, e he maa wa kaa o maa le blɔ nɔ nɛ o maa gu kɛ su jamɛ a oti ɔ he, nɛ eko ɔ, ke o su he po ɔ, o be lee. Lɔ ɔ he ɔ, ngɔɔ oti pɔtɛɛ ko kɛ ma o hɛ mi. O ma nyɛ maa ngma oti nɛ o kɛ ma o hɛ mi ɔ kɛ nɔ́ nɛ o maa pee konɛ o su he ɔ kɛ fɔ si. w22.04 25 ¶12-13

Amlɔ nɛ ɔ, Yehowa ngɛ “asafo kuu ngua” ko nya buae, nɛ e ngɛ mɛ tsɔsee konɛ a hi e Matsɛ Yemi ɔ sisi. (Kpoj. 7:​9, 10) E ngɛ mi kaa mwɔnɛ ɔ, ninyɛ kɛ ta hwumi ha nɛ nihi a mi gba mohu lɛɛ, se “asafo kuu ngua” a mi bi ɔmɛ ngɛ mɔde bɔe wawɛɛ konɛ ninyɛ nɛ ko hi a kpɛti. A kɛ a ní peepee tsɔɔ kaa a kɛ a ta hwumi ní ɔmɛ ngɛ kpakplaahi sɔ̃e. (Mika 4:3) Akɛnɛ ta hwumi gbeɔ nihi he je ɔ, a ngɔɛ a he kɛ wui mi, mohu ɔ, a ngɛ nihi ye buae konɛ a nine nɛ su “wami nitsɛnitsɛ ɔ” nɔ. Enɛ ɔ he ɔ, a tsɔɔ nihi Mawu he anɔkuale ɔ kɛ e yi mi tomi ɔmɛ a he ní. (1 Tim. 6:19) A weku li ma nyɛ maa te si kɛ wo mɛ, loo a maa ye ohia akɛnɛ a fĩɔ Mawu Matsɛ Yemi ɔ se ɔ he je, se Yehowa haa mɛ a hiami níhi. (Mat. 6:​25, 30-33; Luka 18:​29, 30) Enɛ ɔ haa nɛ wa náa nɔ mi mami kaa Mawu Matsɛ Yemi ɔ ji nɔ́ ko nɛ maa ba niinɛ, nɛ e ma ha nɛ Yehowa yi mi tomi ɔ maa ba mi. w22.12 5 ¶13

Ke jeha 1,000 ɔ ke e baa nyagbe ɔ, adesahi tsuo nɛ a ngɛ zugba a nɔ ɔ maa ye mluku. Jamɛ a be ɔ, yayami nɛ wa ná kɛ je Adam ngɔ ɔ be wa ti nɔ ko nɔ he wami náe hu. (Rom. 5:12) A ma je Adam yayami ɔ kɛ je kulaa. Nɛ tsɔɔ kaa a, nihi nɛ a ngɛ zugba a nɔ ɔ maa ‘ba wami mi’ kaa adesahi nɛ a ye mluku ngɛ jeha 1,000 ɔ nyagbe. (Kpoj. 20:5) Wa le kaa Yesu ha we nɛ Satan nɛ sisi lɛ nɛ́ e ngmɛɛ e we anɔkuale yemi ɔ he. E ya nɔ nɛ e ye anɔkuale benɛ e kɛ kahi kpe. Se anɛ adesahi nɛ a ye mluku ɔ tsuo maa ye Yehowa anɔkuale ke Satan ka mɛ lo? Ke a je Satan kɛ je muɔ voo ɔ mi ngɛ jeha 1,000 ɔ nyagbe ɔ, wa ti nɔ fɛɛ nɔ ma ná he blɔ kɛ tsɔɔ kaa e maa ye Yehowa anɔkuale loo e be lɛ anɔkuale yee. (Kpoj. 20:7) Nihi nɛ a maa ya nɔ maa ye anɔkuale ngɛ nyagbe ka a mi ɔ ma ná he yemi nitsɛnitsɛ. (Rom. 8:21) A ma kpata nihi nɛ a ma tsɔ atua kɛ si Yehowa a hɛ mi pɛsɛpɛsɛ.—Kpoj. 20:​8-10. w22.05 19 ¶18-19

Gbami nɛ ɔ ba mi benɛ Satan ha nɛ Yuda bi ɔmɛ kɛ Roma bi ɔmɛ gbe Mawu Bi ɔ. (Luka 23:​13, 20-24) Kaa bɔ nɛ ke nɔ ko plaa ngɛ e nane se ja nɛ e be nyɛe maa nyɛɛ be bɔɔ ko ɔ, jã kɛ̃ nɛ benɛ Yesu gbo nɛ a pu lɛ ɔ, e nyɛ we nɛ e pee nɔ́ ko ligbi etɛ. (Mat. 16:21) Gbami nɛ ngɛ 1 Mose 3:15 ɔ tsɔɔ kaa Yesu be yɔkɔ ɔ mi tlɔe. Mɛni he je? Ejakaa gbami ɔ tsɔɔ kaa nina a maa fia sinɔ ɔ yi nɔ́. Enɛ ɔ tsɔɔ kaa e sa nɛ a tle Yesu si kɛ je gbeje. Nɛ a tle lɛ si niinɛ! Benɛ Yesu gbo ɔ, ligbi etɛ se ɔ, a tle lɛ si kɛ ho hiɔwe ya, nɛ e be gboe hu gblegbleegble. Ngɛ Mawu be nɛ e to ɔ mi ɔ, Yesu ma kpata Satan hɛ mi pɛsɛpɛsɛ. (Heb. 2:14) Kristo kɛ nihi nɛ a maa piɛɛ e he kɛ ye matsɛ ɔ ma kpata Mawu he nyɛli ɔmɛ, nɛ a ji sinɔ ɔ nina a hɛ mi kulaa.—Kpoj. 17:14; 20:​4, 10. w22.07 16 ¶11-12

Fɔli, nyɛɛ ye bua nyɛ bimɛ nɛ a hla huɛmɛ kpakpahi. Mawu Munyu ɔ ha nɛ wa le kaa wa huɛmɛ ma nyɛ ma ná wa nɔ he wami ngɛ blɔ kpakpa kɛ blɔ yaya nɔ. Anɛ nyɛ le nihi nɛ nyɛ bimɛ ɔmɛ kɛ bɔɔ lo? Anɛ nyɛ na mɛ hyɛ nɛ nyɛɛ kɛ mɛ sɛɛ ní hyɛ lo? Mɛni nyɛ ma nyɛ maa pee kɛ ye bua nyɛ bimɛ konɛ a kɛ nihi nɛ a suɔ Yehowa nɛ pee huɛ? (1 Kor. 15:33) Ke nyɛ fɔ nihi nɛ huɛ bɔmi kpakpa ngɛ a kɛ Yehowa a kpɛti ɔ nine kɛ ba nyɛ we mi nɛ a kɛ nyɛ weku ɔ pee níhi kɛ bla a, e ma nyɛ maa ye bua nyɛ bimɛ nɛ a hla huɛmɛ kpakpahi. (La 119:63) Bitsɛ ko nɛ a tsɛɛ lɛ ke Tony ɔ de ke: “Ngɛ jehahi nɛ be ɔ mi ɔ, i kɛ ye yo ɔ wa fɔ nyɛmimɛ nyumuhi kɛ yihi nɛ a ye jeha slɔɔtohi nine kɛ ba wa we ɔ mi. Waa kɛ mɛ yeɔ ní nɛ waa kɛ mɛ peeɔ weku Mawu jami. Enɛ ɔ ji blɔ kpakpa nɛ o ma nyɛ maa gu nɔ kɛ le nihi nɛ a sɔmɔɔ Yehowa kɛ bua jɔmi. . . . A níhi a si kpamihi, kã nɛ a ngɛ, kɛ he kɛ afɔle sami su nɛ a jeɔ kpo ɔ ná wa bimɛ ɔmɛ a nɔ he wami wawɛɛ, nɛ e ye bua mɛ nɛ a hɛ kɛ su Yehowa he.” w22.05 29-30 ¶14-15

Ke asafo mi nikɔtɔmahi kɛ yayami peelɔ ko kpe ɔ, oti nɛ a kɛ maa a hɛ mi ji kaa a maa ma sane ɔ nya si kaa bɔ nɛ a ma nya si momo ngɛ hiɔwe ɔ. Kɛ asafo ɔ náa blɔ nya tomi nɛ ɔ he se ha kɛɛ? Blɔ nya tomi nɛ ɔ haa nɛ a jeɔ yayami peelɔ nɛ e tsakee we e tsui, nɛ́ e ma nyɛ maa ye Yehowa jijɔ ɔmɛ nɛ a he jua wa a eko awi ɔ, kɛ jeɔ asafo ɔ mi. (1 Kor. 5:​6, 7, 11-13; Tito 3:​10, 11) Jehanɛ hu ɔ, blɔ nya tomi nɛ ɔ ma nyɛ maa ye bua yayami peelɔ ɔ nɛ́ e tsake e tsui konɛ Yehowa nɛ ngɔ e yayami ɔ kɛ ke lɛ. (Luka 5:32) Asafo mi nikɔtɔma amɛ sɔleɔ kɛ haa yayami peelɔ nɛ e tsake e tsui ɔ, nɛ a biɔ Yehowa konɛ e ye bua lɛ nɛ e dla e kɛ lɛ a kpɛti. (Yak. 5:15) Waa ngɔ lɛ kaa benɛ asafo mi nikɔtɔma amɛ kɛ yayami peelɔ ɔ kpe ɔ, a na kaa nɔ ɔ tsakee we e tsui. Ke e ba jã a, a maa fiee lɛ kɛ je asafo ɔ mi. Se ke pee se ɔ, nɔ ɔ yɔse kaa nɔ́ nɛ e pee ɔ hí, nɛ e tsake e susumi kɛ e ní peepee ɔ, Yehowa pee klaalo kaa e kɛ e yayami maa ke lɛ. (Luka 15:​17-24) Ke yayami nɛ nɔ ɔ pee ɔ kle kaa mɛni po, Yehowa ma nyɛ maa ngɔ e tɔmi kɛ ke lɛ.—2 Kron. 33:​9, 12, 13; 1 Tim. 1:15. w22.06 9 ¶5-6

Ngɛ Yehowa yemi kɛ buami nya a, Kristofohi nɛ a ngɛ je kɛ wɛ ɔ nyɛ nɛ a da nyagbahi nɛ a mi wa nya, nɛ a nyɛ nɛ a te si kɛ wo Abosiami. (1 Pet. 5:9) Mo hu o ma nyɛ. E be kɛe nɛ Yehowa ma fã Yesu kɛ nihi nɛ a maa piɛɛ e he kɛ ye matsɛ ɔ kaa a “puɛ Abosiami ní tsumi ɔmɛ.” (1 Yoh. 3:8) Lɔ ɔ se ɔ, Mawu we bi nɛ a ngɛ lɛ sɔmɔe ngɛ zugba a nɔ ɔ, ‘nɔ́ ko nɔ́ ko be a he gbeye woe.’ (Yes. 54:14; Mika 4:4) Loko jamɛ a be ɔ maa su ɔ, e sa nɛ waa bɔ mɔde nɛ waa da níhi nɛ woɔ wa he gbeye ɔ a nya. E sa nɛ waa ya nɔ nɛ wa ná nɔ mi mami kaa Yehowa suɔ e sɔmɔli nɛ e poɔ a he piɛ. Ke wa pue wa yi mi tɛ ngɛ bɔ nɛ Yehowa po e sɔmɔli a he piɛ blema a ha a he ɔ, e maa ye bua wɔ wawɛɛ. Wa ma nyɛ ma kai bɔ nɛ e ye bua wɔ nitsɛmɛ ha ngɛ si fɔfɔɛhi nɛ a mi wa mi hulɔ. Ngɛ Yehowa yemi kɛ buami nya a, wa ma nyɛ maa da níhi nɛ a woɔ wa he gbeye ɔ a nya!—La 34:4. w22.06 19 ¶19-20

Nɔ yemi nɛ he wa wawɛɛ ngɛ je ɔ mi tsuo nɛ ji amaga a “nanewɛɛhi nɛ a kɛ dade kɛ zu pee” ɔ lɛ ngɛ nɔ yee amlɔ nɛ ɔ nɛ. E bɔni nɔ yemi benɛ Britain kɛ United States pee kake ngɛ kekleekle je mi ta a mi ɔ. A tsɛɛ Britain kɛ United States a kake peemi ɔ ke Anglo-Amerika. Ke e hí kulaa a, Nebukadnezar nlami nɛ kɔɔ amaga a he ɔ tsɔɔ níhi nɛ ma ha nɛ je ɔ mi nɔ yemi nɛ he wa nɛ ɔ maa je ekpa ngɛ je ɔ mi nɔ yemihi nɛ a sɛ e hlami ɔ he. Anglo-Amerika nɔ yemi ɔ be kaa nɔ yemi nguahi nɛ a sɛ e hlami nɛ a kɛ sika tsu, sika hiɔ, akɔblee aloo dade sɔuu lɛ da si kɛ ha mɛ ɔ. Mohu ɔ, dade nɛ zu futu mi lɛ kadiɔ Anglo-Amerika nɔ yemi ɔ. Zu ɔ daa si kɛ ha “nimli gu ɔmɛ.” (Dan. 2:​43, NW sisi ningma) Mwɔnɛ ɔ, wa na heii kaa Anglo-Amerika nɔ yemi ɔ nyɛ we nɛ e tsu e yi mi tomihi a he ní. Nɔ́ he je ji kaa nihi suɔ kaa a ma fã he blɔhi nɛ a ngɛ ɔ he, nɛ nihi babauu teɔ si kɛ woɔ blɔ nya tomi komɛ. Jehanɛ hu ɔ, ní tsuli peeɔ kake kɛ teɔ si kɛ woɔ ní tsumi blɔ nya tomihi nɛ́ a bua jɔɛ he, nɛ bɔ nɛ nihi peeɔ a ní ha ngɛ sɔ fɔmi he ɔ hu ha we nɛ e nyɛ nɛ e tsu e yi mi tomi ɔ he ní. w22.07 4-5 ¶9-10

Anɛ o ngɛ o nane si gblae kaa o ma ha nɛ a baptisi mo lo? Ke jã a, lɛɛ e maa hi kaa o ma bi o he ke, ‘Mɛni he je nɛ i ngɛ mlɛe ɔ?’ (Níts. 8:36) Mo kadi kaa Yesu ngɔ e Tsɛ ɔ suɔmi nya ní nɛ e maa pee ɔ kɛ to niye ní he. Mɛni he je? Ejakaa wɔ tsuo wa hia niye ní. Yesu le kaa nɔ́ fɛɛ nɔ́ nɛ Yehowa deɔ wɔ ke waa pee ɔ maa hi ha wɔ. Yehowa sume nɛ waa pee nɔ́ ko nɛ maa ye wɔ awi. Anɛ baptisimi piɛɛ Yehowa suɔmi nya ní nɛ o maa pee ɔ he lo? Ee e piɛɛ he. (Níts. 2:38) Ke jã a, lɛɛ mo ná nɔ mi mami kaa ke o ha nɛ a baptisi mo ɔ, o ma ná he se. Ke o be o nane si gblae kaa o maa ye niye ní ngɔngɔɛ ko ɔ, lɛɛ mɛni he je mɔ nɛ o ngɛ o nane si gblae kaa o ma ha nɛ a baptisi mo ɔ? Mɛni he je nɛ ni komɛ ha we nɛ a baptisi mɛ ɔ? Eko ɔ, nihi fuu ma ha heto ke, “I dla we ye he.” Ngɛ anɔkuale mi ɔ, yi mi kpɔ nɛ o maa mwɔ kaa o maa jɔɔ o he nɔ ha Yehowa nɛ a baptisi mo ɔ, ji nɔ́ nɛ he hia pe kulaa. Enɛ ɔ he ɔ, e biɔ nɛ o susu níhi a he saminya loko o mwɔ yi mi kpɔ kaa jã. Mo kai kaa e ma he be, nɛ e biɔ mɔde bɔmi wawɛɛ loko o he maa su kɛ ha baptisimi. w23.03 7 ¶18-20

Benɛ a kɛ mumi klɔuklɔu ɔ pɔ Yesu nu ɔ, e ba pee yo ɔ nina tutuutu. Benɛ Yesu gbo nɛ a tle lɛ si se ɔ, Mawu “ngɔ hɛ mi nyami kɛ bumi kɛ bu lɛ jlasi,” nɛ e “ngɔ he blɔhi tsuo nɛ ngɛ hiɔwe kɛ zugba a nɔ,” kɛ he blɔ nɛ e kɛ ma “puɛ Abosiami ní tsumi ɔmɛ” ɔ kɛ ha lɛ. (Heb. 2:7; Mat. 28:18; 1 Yoh. 3:8) Se ngɛ Yesu se ɔ, ni komɛ hu ma ba pee yo ɔ nina. Bɔfo Paulo tu a he munyu benɛ e de Yuda bi kɛ Ma je li nɛ a ji Kristofohi nɛ a pɔ mɛ nu ɔ ke: “Ke Kristo níhi ji nyɛ ɔ, lɛɛ Abraham nina ji nyɛ niinɛ, gbosi ní yeli ngɛ si womi ko nya.” (Gal. 3:​28, 29) Ke Yehowa ngɔ mumi klɔuklɔu ɔ kɛ pɔ Kristofo no ko nu ɔ, jamɛ a nɔ ɔ ba piɛɛɔ yo ɔ nina a he. Lɔ ɔ, yo ɔ nina a ji Yesu Kristo kɛ nihi 144,000 nɛ a pɔ mɛ nu ɔ nɛ a kɛ lɛ maa ye matsɛ ɔ. (Kpoj. 14:1) Nimli nɛ ɔmɛ tsuo bɔɔ mɔde nɛ a peeɔ a ní kaa a Tsɛ, Yehowa Mawu, nɛ a susuɔ níhi a he kaa lɛ. w22.07 16 ¶8-9

Wa ngɛ blɔ hyɛe kaa waa kɛ kahi maa kpe ngɛ nyagbe ligbi nɛ ɔmɛ a mi. (2 Tim. 3:1) Ngɛ si fɔfɔɛhi kaa jã mi ɔ, wa ma nyɛ maa hao wawɛɛ, titli ke nyagba amɛ ba kɛ tsa nɔ aloo a ba ngɛ be kake mi. Se mo kai kaa Yehowa le nyagbahi nɛ waa kɛ ngɛ kpee, nɛ e maa ye bua wɔ konɛ waa kɛ kã nɛ fĩ si ngɛ wa ka amɛ a mi. Mo susu bɔ nɛ Yehowa ye bua anɔkualetsɛ Hiob ha a he nɛ o hyɛ. Ngɛ be kpiti mi ɔ, e kɛ ka slɔɔtohi nɛ a nya wa kpe. Ngɛ ligbi kake mi ɔ, a ba bɔ Hiob amaniɛ kaa a ju e lohwe ɔmɛ, nɛ a gbe e sɔmɔli ɔmɛ kɛ e bimɛ. (Hiob 1:​13-19) Be bɔɔ se benɛ Hiob ngɛ aywilɛho yee ɔ, hiɔ ko nɛ nya wa ba fia lɛ. (Hiob 2:7) Yehowa hyɛ Hiob nɔ. Akɛnɛ Yehowa suɔ Hiob he je ɔ, e ye bua lɛ konɛ e nyɛ nɛ e fĩ si ngɛ e ka a mi, nɛ́ e ya nɔ nɛ e ye anɔkuale. w22.08 11 ¶8-10

Ke a tsɔse wɔ ɔ, e ma nyɛ maa dɔ wɔ. wa ma susu kaa a kɛ wɔ yi saminya, aloo tsɔsemi ɔ nya wa tsɔ. Enɛ ɔ ma ha nɛ nɔ́ ko nɛ he hia maa ngmɛɛ wɔ, nɛ lɔ ɔ ji, wa be nae kaa akɛnɛ Yehowa suɔ wɔ ɔ he je nɛ e ngɛ wɔ tsɔsee ɔ nɛ. (Heb. 12:​5, 11) Lɔ ɔ moo kplɛɛ tsɔsemi nɔ, nɛ o pee tsakemihi nɛ he hia a. Yesu tsɔse Petro si abɔ ngɛ bɔfo kpa amɛ a hɛ mi. (Maak. 8:33; Luka 22:​31-34) E ngɛ heii kaa lɔ ɔ ha nɛ zo gbe Petro! Se Petro ya nɔ nɛ e ye Yesu anɔkuale. E kplɛɛ tsɔsemi ɔ nɔ, nɛ e kase ní kɛ je e tɔmi ɔmɛ a mi. Enɛ ɔ he ɔ, Yehowa jɔɔ Petro ngɛ anɔkuale nɛ e ye ɔ he je, nɛ e ngɔ blɔ nya ní tsumihi nɛ a he hia kɛ wo e dɛ ngɛ asafo ɔ mi. (Yoh. 21:​15-17; Níts. 10:​24-33; 1 Pet. 1:1) Ke a tsɔse wɔ ɔ, e sɛ nɛ waa kɛ wa juɛmi nɛ ma zo nɛ maa gbe wɔ ɔ nɔ, mohu ɔ, e sa nɛ waa kplɛɛ tsɔsemi ɔ nɔ, nɛ wa pee tsakemihi nɛ sa. Ke wa pee jã a, waa kɛ wa nyɛmimɛ ɔmɛ tsuo ma ná he se. Lɔ ɔ ma ha nɛ Yehowa kɛ wɔ ma tsu ní wawɛɛ, nɛ wa nyɛmimɛ ɔmɛ ma ná he se. w22.11 21-22 ¶6-7

Abraham le kaa Yehowa be nɔ́ nɛ dɛ pee kɔkɔɔkɔ. Bɔfo Paulo de ke, Abraham he ye kaa Yehowa ma tle e binyumu Isak nɛ e suɔ lɛ wawɛɛ ɔ si kɛ ba wami mi ekohu. (Heb. 11:​17-19) Yehowa sɛ hlami wo si kaa Isak ma ba pee tsɛ kɛ ha je ma ko, se jamɛ a be ɔ mi ɔ, Isak be bi. Abraham suɔ Yehowa, lɔ ɔ he ɔ, e ngɛ nɔ mi mami kaa e hiɔwe Tsɛ ɔ maa pee nɔ́ nɛ da. E ngɛ mi kaa e he wa ha lɛ mohu lɛɛ, se akɛnɛ e ngɛ hemi kɛ yemi he je ɔ, e bu tue. (1 Mose 22:​1-12) Mɛni blɔ nɔ wa maa gu kɛ kase Abraham? Kaa bɔ nɛ Abraham pee ɔ, e sa nɛ waa ya nɔ nɛ waa kase Yehowa he ní. Ke wa ya nɔ nɛ waa pee jã a, wa maa hɛ kɛ su e he, nɛ wa maa suɔ lɛ wawɛɛ pee sa a. (La 73:28.) Wa ma tsɔse wa he nile konɛ wa susu níhi a he kaa bɔ nɛ Yehowa susuɔ níhi a he ɔ. (Heb. 5:14) Jã nɛ wa maa pee ɔ ma ha nɛ wa be blɔ ngmɛe konɛ nɔ ko nɛ nyɛ wa nɔ kaa waa pee nɔ́ yayami. Nɛ e be wa yi mi bae po kaa wa maa pee nɔ́ ko nɛ maa dɔ wa hiɔwe Tsɛ ɔ, nɛ́ e ma puɛ huɛ bɔmi nɛ ngɛ waa kɛ lɛ wa kpɛti ɔ. w22.08 28-29 ¶11-12

Benɛ a kpale a se kɛ yaa Listra, Ikoniom, kɛ Antiokia a, bɔfo Paulo kɛ Banaba “hla nikɔtɔmahi kɛ ha mɛ ngɛ asafo fɛɛ asafo mi.” (Níts. 14:​21-23) Ngɛ anɔkuale mi ɔ, nikɔtɔma nɛ ɔmɛ bɔ mɔde nɛ a wo nyɛmimɛ ɔmɛ he wami kaa bɔ nɛ mwɔnɛ ɔ, asafo mi nikɔtɔmahi hu peeɔ ɔ. Asafo mi nikɔtɔmahi, nyɛɛ pee klaalo kaa nyɛ maa ye bua nihi nɛ a hia “munyu kpakpa” nɛ maa wo mɛ he wami ɔ. Paulo kai e nyɛmimɛ Kristofohi kaa Yehowa ye bua “odasefohi babauu nitsɛnitsɛ,” nɛ a nyɛ nɛ a da nyagbahi nɛ a kɛ kpe ɔ nya. (Heb. 12:1) Nihi nɛ a kɛ anɔkuale yemi da nyagba slɔɔtohi nɛ a kɛ kpe ɔ nya a, a he sane ngɛ Baiblo ɔ mi. Paulo ngɛ nɔ́ mi mami kaa enɛ ɔ maa ye bua e nyɛmimɛ Kristofohi konɛ a nyɛ nɛ a hyɛ ‘Mawu hɛ kalɔ ɔ ma’ a blɔ. (Heb. 12:22) Jã pɛpɛɛpɛ nɛ e ji mwɔnɛ ɔ. Ke o kane bɔ nɛ Yehowa ye bua Gideon, Barak, David, Samuel kɛ ni kpahi ha a he sane ɔ, anɛ e wui mo he wami lo?—Heb. 11:​32-35. w22.08 21-22 ¶5-6

Mɛni ‘ní peepeehi’ nɛ a maa da nɔ kɛ kojo nihi nɛ a ma tle mɛ si kɛ je gbeje ɔ? Anɛ a maa da níhi nɛ a pee loko a gbo ɔ nɔ kɛ kojo mɛ lo? Dɛbi! Mo kai kaa be nɛ a gbo ɔ, a kɛ a tɔmi ɔmɛ ke mɛ. Ke ja a, lɛɛ munyu nɛ ji “a ní peepee” ɔ tsɔɔ we níhi nɛ a pee loko a gbo. Mohu ɔ, e tsɔɔ bɔ nɛ a maa pee a ní ha ngɛ tsɔsemi nɛ a ma ná ngɛ je ehe ɔ mi ɔ he. E he maa hia nɛ nyumuhi anɔkualetsɛmɛ komɛ kaa Noa, Samuel, David, kɛ Daniel nɛ a kase Yesu Kristo he ní konɛ a ná hemi kɛ yemi ngɛ e afɔle sami ɔ mi. Ke e he maa hia nɛ nyumu nɛ ɔmɛ nɛ a kase níhi fuu ɔ, lɛɛ ni nɛmɛ nɛ a dɛ ɔ po lɛɛ a de we! Nihi nɛ a ma kua he blɔ klɛdɛɛ nɛ ɔ, nyagbenyagbe ɔ, mɛni lɛ maa ba a nɔ? Kpo Jemi 20:15 de ke: “A sake nɔ fɛɛ nɔ nɛ a nɛ kaa a ngma e biɛ ngɛ wami womi ɔ mi ɔ ngɔ wo la taku ɔ mi.” Ngɛ anɔkuale mi ɔ, a ma kpata a hɛ mi pɛsɛpɛsɛ. Enɛ ɔ tsɔɔ kaa e sa nɛ waa pee nɔ́ fɛɛ nɔ́ nɛ wa ma nyɛ konɛ a ngma wa biɛ ngɛ wami womi ɔ mi, nɛ́ e hi mi kɛ ya neneene! w22.09 19 ¶17-19

Wa daa níhi nɛ wa kase ngɛ Baiblo ɔ mi ɔ nɔ kɛ mwɔɔ yi mi kpɔ ngɛ nɔmlɔ tso mi he wami nami kɛ hiɔ tsami blɔ nɔ tomihi a he. (1 Tim. 3:9) Ke waa kɛ ni kpahi ngɛ yi mi kpɔhi nɛ wa mwɔ ɔ he susue ɔ, e sa nɛ wa kai sisi tomi mlaa nɛ ngɛ Filipi Bi 4:5 ɔ. E de ke: “Nyɛ ha nɛ nihi tsuo nɛ a le kaa nyɛ susuɔ nɔ́ he.” Ke wa susuɔ nɔ́ he ɔ, lɔ ɔ be hae nɛ waa ye tsui tsɔ ngɛ wa nɔmlɔ tso mi he wami nami he. Ke wa nyɛmimɛ ɔmɛ mwɔ yi mi kpɔ komɛ nɛ ngɛ slɔɔto ngɛ wa nɔ́ ɔ he po ɔ, wa yaa nɔ nɛ wa jeɔ suɔmi kɛ bumi kpo kɛ tsɔɔ mɛ. (Rom. 14:​10-12) Ke waa pee nɔ́ fɛɛ nɔ́ nɛ wa ma nyɛ kɛ baa wa wami yi, nɛ wa je wa tsui tsuo mi kɛ sɔmɔ Yehowa a, lɔ ɔ tsɔɔ kaa wa ngɛ bumi nɛ mi kuɔ kɛ ha Yehowa nɛ ji wami Halɔ ɔ. (Kpoj. 4:11) E ngɛ mi kaa amlɔ nɛ ɔ, wa nuɔ hiɔ nɛ waa kɛ haomihi kpeɔ mohu lɛɛ, se tsa pi wa Bɔlɔ ɔ yi mi tomi ji lɔ ɔ. E be kɛe nɛ e ma je nɔ́ nami kɛ gbenɔ kɛ je nɛ wa maa hi si kɛ ya neneene. (Kpoj. 21:4) Se loko jamɛ a be ɔ maa su ɔ, nyɛ ha nɛ wa bua nɛ jɔ he blɔ nɛ wa ngɛ kaa wa ngɛ wami mi amlɔ nɛ ɔ he, nɛ wa sɔmɔ wa hiɔwe Tsɛ Yehowa nɛ ngɛ suɔmi ɔ! w23.02 25 ¶17-18

Yehowa tsɔɔ heii kaa e ngɛ he wami kulaa pe nihi nɛ a hɛɛ “blɔ nyahi nɛ a nɔ kuɔ” ɔ. (Rom. 13:1) Nyɛ ha nɛ wa susu nɔ hyɛmi ní etɛ komɛ a he. Egipt matsɛ Farao ngɔ Yehowa we bi nyɔguɛ nɛ e kua ke e be a he ngmɛɛ nɛ a je. Se Mawu kpɔ mɛ nɛ e kpata Farao hɛ mi ngɛ Wo Tsu ɔ mi. (2 Mose 14:​26-28; La 136:15) Babilon matsɛ Belshazar ngmɛ okplɔɔ nɛ e pee níhi nɛ tsɔɔ kaa e “bui Nyɔmtsɛ ɔ nɛ ngɛ hiɔwe ɔ fɛɛ.” E je we Yehowa yi, mohu ɔ, ‘e je mawuhi nɛ a kɛ sika tsu kɛ sika hiɔ pee ɔ a yi.’ (Dan. 5:​22, 23) Se Yehowa ba jamɛ a he nɔ wolɔ ɔ si. “Jamɛ a nyɔ ɔ mi nɔuu” ɔ, a gbe Belshazar nɛ a ngɔ e matsɛ yemi ɔ kɛ ha Media kɛ Persia bi ɔmɛ. (Dan. 5:​30, 31) Matsɛ Herode Agripa I nɛ e hi Palestina a ha nɛ a gbe bɔfo Yakobo, nɛ e nu bɔfo Petro hu kɛ wo tsu kɛ yi mi tomi ɔ kaa e maa gbe lɛ. Se Yehowa ngmɛ́ blɔ nɛ Herode nɛ e gbe lɛ. “Yehowa bɔfo ɔ fia lɛ nɔ́” nɛ e gbo.—Níts. 12:​1-5, 21-23. w22.10 15 ¶12

Baiblo ɔ tu nihi nɛ a ye Yehowa anɔkuale blema a he munyu. Ke wa kane nimli nɛ ɔmɛ a he ní, nɛ wa na bɔ nɛ Yehowa hyɛ a nɔ ha a, e ma ha nɛ hɛ kɛ nɔ fɔmi nɛ wa ngɛ ngɛ e mi ɔ mi maa wa. Níhi tsuo nɛ ngɛ Mawu Munyu ɔ mi ɔ, “a ngma kɛ ha wɔ ní tsɔɔmi, konɛ kɛ gu wa si fimi kɛ jehanɛ se hu, kɛ gu bua womi nɛ jeɔ Ngmami ɔ mi ɔ nɔ ɔ, wa ná hɛ kɛ nɔ fɔmi.” (Rom. 15:4) Mo susu bɔ nɛ Yehowa ye e si womihi a nɔ ha a he. Mo susu nɔ́ nɛ Mawu pee ha Abraham kɛ Sara a he nɛ o hyɛ. A wa, nɛ a be bi fɔmi nya. Se Mawu wo mɛ si kaa a ma fɔ bi. (1 Mose 18:10) Kɛ Abraham pee e ní ha kɛɛ benɛ Mawu wo lɛ si ɔ? Baiblo ɔ de ke: “E ná hemi kɛ yemi kaa e ma ba pee tsɛ kɛ ha je mahi fuu.” (Rom. 4:18) Ngɛ adesa susumi nya a, e he maa wa kaa Yehowa si womi nɛ ɔ maa ba mi. Se Abraham ngɛ nɔ mi mami kaa Yehowa maa ye e si womi ɔ nɔ. Yehowa ha we nɛ nyumu anɔkualetsɛ nɛ ɔ nine nɛ nyɛ si. (Rom. 4:​19-21) Baiblo mi sanehi kaa kikɛ ma ha nɛ waa ngɔ wa hɛ kɛ fɔ Yehowa nɔ kaa e maa ye e si womihi tsuo a nɔ. w22.10 27 ¶13-14

Munyu nɛ ɔ ba mi benɛ a je Yuda bi ɔmɛ kɛ je nyɔguɛ tso mi ɔ. Yehowa pee níhi nɛ tsɔɔ kaa lɛ ji a Tsɔɔlɔ Kpanaa, nɛ ngɛ e blɔ tsɔɔmi nya a, e we bi ɔmɛ nyɛ nɛ a to anɔkuale jami sisi ekohu. Mwɔnɛ ɔ, wa ngɛ bua jɔmi wawɛɛ, ejakaa Yehowa ji wa Tsɔɔlɔ Kpanaa. Yesaya tsɔɔ kaa wa ngɛ kaa ní kaseli nɛ Yehowa ngɛ mɛ ní tsɔɔe. E de ke: ‘O maa na o Tsɔɔlɔ Kpanaa a kɛ o hɛngmɛ.’ Ngɛ nɔ́ he tomi nɔ́ nɛ ɔ mi ɔ, Yesaya kale Tsɔɔlɔ ɔ kaa nɔ ko nɛ e daa si ngɛ ní kaseli a hɛ mi nɛ e ngɛ mɛ ní tsɔɔe. E ji he blɔ nɛ wa ná kaa Mawu ngɛ wɔ ní tsɔɔe mwɔnɛ ɔ. Mɛni blɔ nɔ nɛ Yehowa guɔ kɛ tsɔɔ wɔ ní? E guɔ e we asafo ɔ nɔ. Wa bua jɔ kaa wa nine suɔ blɔ tsɔɔmi nɛ ngɛ heii nɔ kɛ guɔ Yehowa asafo ɔ nɔ. A kɛ blɔ tsɔɔmi haa wɔ ngɛ kpehi a sisi. Jehanɛ hu ɔ, wa nine suɔ blɔ tsɔɔmi nɔ kɛ guɔ asafo ɔ womi ɔmɛ, JW Brɔɔdkastin, kɛ blɔ kpahi a nɔ. Blɔ tsɔɔmi nɛ ɔmɛ yeɔ bua wɔ ngɛ haomi behi a mi, nɛ wa fĩɔ si kɛ bua jɔmi. w22.11 10 ¶8-9

Yesu de nɔ́ ko kɛ kɔ be nɛ Yuda bi ɔmɛ a níhi a blɔ nya tomi ɔ maa ba nyagbe ɔ he kɛ “níhi a blɔ nya tomi ɔ nyagbe be ɔ” nɛ wa ngɛ mi amlɔ nɛ ɔ hu he. E de ke: “Jamɛ a ligbi ɔ loo ngmlɛfia a, nɔ ko nɔ ko li, bɔfohi nɛ a ngɛ hiɔwe ɔ li, nɛ jã kɛ̃ nɛ Bi ɔ hu li, se Tsɛ ɔ pɛ lɛ e le.” Lɔ ɔ se ɔ, e bɔ e kaseli ɔmɛ kɔkɔ kaa a “ko hwɔ mahe” nɛ ‘a ya nɔ nɛ a hwɔɔ.” (Maak. 13:​32-37) E sa nɛ Yuda bi nɛ a ji Kristofohi nɛ a hi si ngɛ kaseli ɔmɛ a be ɔ mi ɔ nɛ a ya nɔ nɛ a hwɔɔ konɛ a he a yi wami. Yesu de e se nyɛɛli ɔmɛ ke: “Ke nyɛ na nɛ ta buli ba bɔle Yerusalɛm kɛ kpe ɔ, lɛɛ nyɛ ná nɛ nyɛɛ le kaa be nɛ a maa pee lɛ ma doku ɔ su ta.” Ke jamɛ a be ɔ su ɔ, e sa nɛ kaseli ɔmɛ nɛ a bu ga womi nɛ Yesu kɛ ha kaa “nihi nɛ a ngɛ Yudea a nɛ a bɔni fo tumi kɛ ya yoku ɔmɛ a nɔ” ɔ tue. (Luka 21:​20, 21) Nihi nɛ a bu kɔkɔ bɔmi nɛ ɔ tue ɔ ná yi baami be mi nɛ Roma ta buli ɔmɛ kpata Yerusalem ma a hɛ mi ɔ. Mwɔnɛ ɔ hu ɔ, wa ngɛ be nɛ e be kɛe nɛ je yaya nɛ ɔ maa ba nyagbe ɔ mi. Enɛ ɔ he ɔ, e sa nɛ wɔ hu wa hɛ nɛ ka si nɛ waa ya nɔ nɛ waa hwɔɔ. w23.02 14 ¶1-2; 16 ¶3

Yehowa tsɔɔ e sɔmɔli kaa a ye anɔkuale nɛ a pee nɔ́ nɛ da, enɛ ɔ haa nɛ nihi buɔ mɛ nɛ a ngɛ tue mi jɔmi. (Abɛ 13:​5, 6) Kɛ je benɛ o bɔni Baiblo ɔ kasemi ɔ, anɛ mo hu o na kaa e ngɛ jã pee ha mo lo? O kase kaa Yehowa mlaa amɛ yeɔ bua ha adesahi tsuo, nɛ mo nitsɛ hu o piɛɛ he. (La 77:13) Enɛ ɔ he ɔ, o suɔ kaa o maa pee nɔ́ nɛ da ngɛ Mawu hɛ mi. (Mat. 6:33) Jehanɛ hu ɔ, o suɔ nɛ nihi nɛ a le anɔkuale ɔ, bɔ nɛ pee nɛ a le kaa nɔ́ nɛ Satan de ngɛ Yehowa wa Mawu ɔ he ɔ ji lakpa. Mɛni blɔ nɔ o maa gu kɛ pee jã? Bɔ nɛ o baa o je mi ha a ma nyɛ maa tsɔɔ kaa o ngɛ dee ke: “I he we Satan lakpa munyu ɔmɛ yi, mohu ɔ, i suɔ anɔkuale ɔ. I ngɛ hlae nɛ Yehowa nɛ pee ye Nɔ Yelɔ, lɔ ɔ he ɔ, i suɔ nɛ ma pee nɔ́ nɛ da ngɛ e hɛ mi.” Mɛni blɔ nɔ o maa gu kɛ pee jã? Moo sɔle nɛ o jɔɔ o he nɔ kɛ ha Yehowa. Ngɛ jamɛ a sɔlemi ɔ mi ɔ, mo de lɛ ke o suɔ nɛ o sɔmɔ lɛ daa. Lɔ ɔ se ɔ, ha nɛ a baptisi mo kɛ ma nɔ mi. Ke o suɔ anɔkuale kɛ nɔ́ nɛ da a, lɔ ɔ maa wo mo he wami konɛ o ha nɛ a baptisi mo. w23.03 3 ¶4-5

Tue mi jɔmi ko ngɛ nɛ nihi nɛ a ngɛ je ɔ mi mwɔnɛ ɔ li he nɔ́ ko. Lɔ ɔ ji “Mawu tue mi jɔmi ɔ,” nɛ ji wa tsui nɛ nɔɔ wa mi ke huɛ bɔmi kpakpa ngɛ waa kɛ wa hiɔwe Tsɛ ɔ wa kpɛti ɔ. Ke wa ngɛ Mawu tue mi jɔmi ɔ, wa ngɛ slɔkee. (Filip. 4:​6, 7) E haa nɛ huɛ bɔmi kpakpa hii waa kɛ nihi nɛ suɔ Yehowa a wa kpɛti. E haa nɛ huɛ bɔmi gbagbanii hii waa kɛ Mawu, nɛ ji “tue mi jɔmi Mawu ɔ” wa kpɛti hulɔ. (1 Tɛs. 5:23) Ke wa ná hɛ kɛ nɔ fɔmi ngɛ wa Tsɛ ɔ mi, nɛ wa le lɛ, nɛ wa buɔ lɛ tue ɔ, Mawu tue mi jɔmi ɔ ma ha nɛ wa tsui maa nɔ wa mi ke waa kɛ haomi ko ngɛ kpee.Ke wa nu hiɔ, aloo oslaa ba wa nɔ, aloo a ngɛ wɔ yi mi wae loo nihi ngɛ basabasa pee ɔ, anɛ wa ma nyɛ ma ná Mawu tue mi jɔmi ɔ lo? Haomi nɛ ɔmɛ eko fɛɛ eko ma nyɛ ma ha nɛ waa ye gbeye. Bua jɔmi sane ji kaa nyɛmimɛ nyumuhi kɛ yihi ngɔ Yesu ga womi nɛ a wo ta ngɛ mwɔnɛ ɔ ngmami ɔ mi ɔ kɛ ngɛ ní tsue. Yehowa ye bua mɛ nɛ a ná tue mi jɔmi be mi nɛ a kɛ haomihi nɛ a mi wa kpe. w22.12 16 ¶1-2

Wa be nyɛe ma kudɔ nɔ́ fɛɛ nɔ́ nɛ yaa nɔ ngɛ wa si himi mi. Lɔ ɔ he ɔ, e sɛ nɛ wa susu kaa sɔmɔmi he blɔ nɛ wa ngɛ ɔ lɛ tsɔɔ bɔ nɛ wa he jua wa ha Yehowa ha. E sɛ nɛ waa ngɔ nɔ́ nɛ wa nyɛɔ tsuɔ ɔ kɛ to nɔ́ nɛ ni kpahi ngɛ tsue ɔ hu he. (Gal. 6:4) E sa nɛ wa hla blɔhi nɛ wa maa gu nɔ kɛ ye bua ni kpahi. Ke o pee o si himi kpokploo nɛ o yi hiɔ ko ɔ, o ma nyɛ ma ná he blɔ kɛ bli o sɔmɔmi ní tsumi ɔ mi. Moo ngɔ otihi nɛ ma nyɛ maa ye bua mo konɛ o su oti kpahi a he ɔ kɛ ma o hɛ mi. Kaa nɔ hyɛmi nɔ́ ɔ, ke o suɔ nɛ o pee daa blɔ gbalɔ ɔ, o ma nyɛ ma sɔmɔ kaa blɔ gbali a walɔ amlɔ nɛ ɔ. Ke oti nɛ o kɛ ma o hɛ mi ji kaa o ma sɔmɔ kaa asafo mi sɔmɔlɔ ɔ, anɛ o ma nyɛ maa pee babauu ngɛ fiɛɛmi ní tsumi ɔ mi lo? Níhi a si kpami nɛ o ma ná a ma nyɛ maa ye bua nɛ o ná sɔmɔmi he blɔ kpahi hwɔɔ se. Moo fia o pɛɛ si kaa o maa pee nɔ́ fɛɛ nɔ́ nɛ o ma nyɛ ngɛ ní tsumi fɛɛ ní tsumi nɛ a kɛ maa wo o dɛ ɔ mi. w22.04 26 ¶16-17

Yehowa ma nyɛ ye bua wɔ konɛ wa nyɛ nɛ waa da nyagbahi nɛ waa kɛ ngɛ kpee ngɛ wa si himi mi ɔ nya nɛ wa na bua jɔmi ngɛ e sɔmɔmi mi. Ke wa sɔle ha Yehowa ngɛ nyagba ko he ɔ, kekleekle ɔ, e ma nyɛ ma ha wɔ he wami nɛ wa hia a konɛ wa kɛ da nya. Se ke nyagba nɛ waa kɛ ngɛ kpee ɔ se pui ɔ, e he maa hia nɛ wa bi Yehowa si abɔ konɛ e ye bua wɔ nɛ wa nyɛ nɛ waa da nya. E ha wɔ he blɔ kaa waa pee jã. Munyu nɛ Yesaya tu nɛ nyɛɛ se nɛ ɔ tsɔɔ jã. E de ke: “Nyɛ ko ha nɛ [Yehowa] nɛ jɔɔ e he.” (Yes. 62:​7, NW) Mɛni munyu nɛ ɔ tsɔɔ? Ke wa sɔle ha Yehowa ngɛ nyagba ko he ɔ, wa ma nyɛ maa pee jã si abɔ kaa nɔ́ nɛ wa ha we nɛ Yehowa nɛ jɔɔ e he. Yesaya munyu ɔ kaiɔ wɔ nɔ́ he tomi nɔ́ nɛ kɔɔ sɔlemi he nɛ Yesu kɛ tsu ní ngɛ Luka 11:​8-10, 13 ɔ. Ngɛ jamɛ a nɔ́ he tomi nɔ́ ɔ mi ɔ, Yesu wo wɔ he wami kaa ‘waa ya nɔ nɛ wa bi’ Yehowa nɛ e ha wɔ mumi klɔuklɔu ɔ. Wa ma nyɛ maa sɔle ha Yehowa nɛ e tsɔɔ wɔ blɔ konɛ waa mwɔ yi mi kpɔ nɛ da hulɔ. w22.11 8 ¶1; 9

O kɛ o weku ɔ ma nyɛ ma dla nyɛ he kɛ fɔ si amlɔ nɛ ɔ kɛ ha yi mi wami. Ko susu ní yayahi nɛ ma nyɛ maa ba a he. Mohu ɔ, ha nɛ huɛ bɔmi nɛ ngɛ o kɛ Yehowa nyɛ kpɛti ɔ mi nɛ wa, nɛ o ye bua o bimɛ ɔmɛ nɛ mɛ hu a pee jã. Be fɛɛ be nɛ o maa hao ɔ, mo de Mawu nɔ́ fɛɛ nɔ́ nɛ ngɛ o tsui mi. (La 62:​7, 8) Nyɛɛ pee kake kaa weku kɛ susu yi mi tomihi a he je nɛ nyɛ ma nyɛ maa ngɔ nyɛ hɛ kɛ fɔ Yehowa nɔ ɔ he. Kaa bɔ nɛ ke o kɛ o bimɛ ɔmɛ dla nyɛ he kɛ to oslaa nɛ nyɛ ma ná he se ɔ, jã kɛ̃ nɛ ke nyɛ dla nyɛ he kɛ to loko nyɛɛ kɛ yi mi wami ko kpe ɔ, lɔ ɔ hu maa ye bua nyɛ. Ke e ba jã a, a maa pee kã nɛ a maa to a tsui si ejakaa o tsɔɔ mɛ kaa a ngɔ a hɛ kɛ fɔ Yehowa nɔ.Mawu tue mi jɔmi ɔ ha nɛ wa ngɛ slɔkee. (Filip. 4:​6, 7) Enɛ ɔ he ɔ, mwɔnɛ ɔ, wa nuɔ hiɔ, nɛ waa kɛ oslaahi kɛ yi mi wami hu kpeɔ lɛɛ, se ngɛ enɛ ɔmɛ tsuo se ɔ, Yehowa guɔ e tue mi jɔmi ɔ nɔ kɛ toɔ wa tsui nɔ nine. E haa nɛ asafo mi nikɔtɔma amɛ tsuɔ ní wawɛɛ ngɛ asafo ɔ mi nɛ a woɔ wɔ he wami. E ha wɔ tsuo he blɔ kaa waa ye bua wa sibi hulɔ. Tue mi jɔmi nɛ wa ngɛ amlɔ nɛ ɔ maa ye bua wɔ konɛ wa dla wa he kɛ ha ka nguahi nɛ waa kɛ maa kpe, nɛ́ “amanehlu ngua” a hu piɛɛ he ɔ.—Mat. 24:21. w22.12 27 ¶17-18

Ke be ko nɛ be ɔ, wa pee yayami nɛ hɛdɔ ngɛ he nɛ loloolo ɔ, e ngɛ wɔ haoe ɔ, e sa nɛ waa bɔ mɔde nɛ wa je ngɛ wa juɛmi mi. Ngɛ anɔkuale mi ɔ, enɛ ɔ tsɔɔ we kaa kpɔmi nɔ́ ɔ he je ɔ, ‘wa maa je blɔ nɛ waa pee yayami.’ (Heb. 10:​26-31) Se wa ma nyɛ ma ná nɔ mi mami kaa ke wa tsake wa tsui niinɛ, nɛ wa bi yemi kɛ buami kɛ je Yehowa kɛ asafo mi nikɔtɔma amɛ a ngɔ, nɛ wa tsake wa je mi bami ɔ, lɛɛ Yehowa kɛ wa tɔmi ɔ ke wɔ kulaa. (Yes. 55:7; Níts. 3:19) Ngɛ anɔkuale mi ɔ, kpɔmi afɔle sami ɔ ma nyɛ ma je wa yayami ɔmɛ tsuo kɛ je, nɛ wa ma ná si himi kpakpa Paradeiso ɔ mi. Si himi ngɛ lejɛ ɔ be wa nya gbee gblegbleegble. Waa kɛ nihi nɛ a he ngɛ bua jɔmi maa kpe be fɛɛ be, nɛ wa ma tsu ní tsumi nɛ ngɛ bua jɔmi. Nɔ́ nɛ pe kulaa a, daa ligbi ɔ, wa maa le wa hiɔwe Tsɛ ɔ saminya, nɛ wa bua maa jɔ níhi nɛ e haa wɔ ɔ a he. Be fɛɛ be ɔ, wa maa kase níhi fuu ngɛ Yehowa kɛ níhi nɛ e bɔ ɔ a he. w22.12 13 ¶17, 19

“Yo ɔ” be nyɛɛ ma da si kɛ ha Hawa. Gbami ɔ tsɔɔ kaa yo ɔ nina a maa “fia” sinɔ ɔ yi nɔ́. Sinɔ ɔ ji Satan nɛ ji bɔfo yaya a, nɛ Hawa nina ko be nyɛɛ maa fia e yi nɔ́, ejakaa wa yi mluku. Ke jã a, lɛɛ kɛ a ma plɛ kɛ kpata Satan hɛ mi kɛɛ? A tsɔɔ nɔ nɛ yo ɔ nɛ a wo e ta ngɛ 1 Mose 3:15 ɔ daa si kɛ ha ngɛ Baiblo ɔ nyagbe womi ɔ mi. (Kpoj. 12:​1, 2, 5, 10) Yo nɛ ɔ pi yo ko nɛ e ngɛ zugba nɛ ɔ nɔ. Nyɔhiɔ ɔ ngɛ e nane si, nɛ dodoe 12 jlasi fĩ e yi. Yo ɔ fɔ bi ko, bi ɔ ji Mawu Matsɛ Yemi ɔ. Matsɛ Yemi ɔ ngɛ hiɔwe, lɔ ɔ yo ɔ hu maa hi hiɔwe. Yo ɔ daa si kɛ ha Yehowa blɔ nya tomi ɔ fã nɛ ngɛ hiɔwe ɔ, nɛ́ hiɔwe bɔfo anɔkualetsɛmɛ ɔmɛ hu piɛɛ he. (Gal. 4:26) Mawu Munyu ɔ ye bua wɔ nɛ wa le nɔ tutuutu nɛ yo ɔ nina a ji. Ngmami ɔ tsɔɔ kaa nina nɛ ɔ maa pee Abraham nina.—1 Mose 22:​15-18. w22.07 15-16 ¶6-8

Nile munyuhi sɔuu lɛ ngɛ nike ní nɛ ji Baiblo ɔ nɛ Yehowa kɛ ha wɔ ɔ mi. Baiblo ɔ mi ga womi ɔmɛ yeɔ bua nihi babauu nɛ e tsakeɔ a si himi. Benɛ Mose ngma kekleekle womi ɔmɛ ngɛ Baiblo ɔ mi ɔ, e de Israel bi ɔmɛ ke: “Mlaa nɛ ɔmɛ pi munyu guhi; nyɛ wami daa si ngɛ a nɔ.” (5 Mose 32:47) Nihi nɛ a kɛ Ngmami ɔmɛ a mi munyu ɔmɛ tsu ní ɔ, ye manye ngɛ si himi mi nɛ a si himi pee kpakpa. (La 1:​2, 3) E ngɛ mi kaa a ngma Mawu Munyu ɔ be kɛkɛɛ ji nɛ ɔ mohu lɛɛ, se loloolo ɔ, e ngɛ he wami nɛ e tsakeɔ nihi a si himi. Sisi tomi mlaahi nɛ a ngɛ Baiblo ɔ mi lɛɛ, a be bi gblee. E ye bua nihi babauu nɛ́ a hi si ngɛ be slɔɔtohi a mi. Ke wa kane womi klɔuklɔu nɛ ɔ nɛ wa pue wa yi mi tɛ ngɛ nɔ́ nɛ wa ngɛ kasee ɔ he ɔ, Yehowa maa ngɔ e mumi klɔuklɔu ɔ kɛ ye bua wɔ konɛ waa le bɔ nɛ waa kɛ ga womihi nɛ ngɛ Baiblo ɔ mi ɔ ma tsu ní ha ngɛ wa si himi mi. (La 119:27; Mal. 3:16; Heb. 4:12) Ngɛ anɔkuale mi ɔ, Baiblo ɔ Ngmalɔ ɔ ngɛ kɛ yaa neneene, nɛ e pee klaalo kaa e maa ye bua mo. E sa nɛ enɛ ɔ nɛ wo wɔ he wami nɛ waa kane Baiblo ɔ daa! w23.02 3 ¶5-6

Kpo Jemi yi 13 ɔ tsɔɔ kaa yi kpaagone ɔ nɛ ji Anglo-Amerika Nɔ Yemi ɔ peeɔ e ní hu kaa lohwe awi yelɔ ko nɛ e ngɛ “koli enyɔ kaa jijɔ bi, se e bɔni munyu tumi kaa drako.” Lohwe awi yelɔ nɛ ɔ ‘peeɔ okadi nguanguahi, e haa nɛ la jeɔ hiɔwe kɛ baa zugba a nɔ po ngɛ adesahi a hɛ mi.’ (Kpoj. 13:​11-15) Kpo Jemi yi 16 kɛ 19 ɔ tsɛɛ lohwe awi yelɔ nɛ ɔ ke “lakpa gbalɔ.” (Kpoj. 16:13; 19:20) Daniel de nɔ́ ko kaa jã nɔuu; nɛ ji kaa, Anglo-Amerika Nɔ Yemi ɔ “ma kpata níhi a hɛ mi basabasa.” (Dan. 8:​19, 23, 24) Jã pɛpɛɛpɛ lɛ ya nɔ ngɛ je mi ta enyɔne ɔ mi. Je mi si kpali nɛ a ngɛ Britain kɛ Amerika nɛ a pee kake kɛ pee oplɛmi nguahi enyɔ nɛ a fia nɛ ha nɛ ta a ba nyagbe ɔ nɛ. Ngɛ oplɛmi nɛ ɔmɛ a peemi mi ɔ, e ngɛ kaa nɔ́ nɛ Anglo-Amerika Nɔ Yemi ɔ ha nɛ ‘la je hiɔwe kɛ ba zugba a nɔ.’ w22.05 10 ¶9