December

Anɛ Etiopia sɔmɔlɔ nɔkɔtɔma a pee klaalo niinɛ kaa e ma ha nɛ a baptisi lɛ lo? Mo susu he nɛ o hyɛ: Etiopia nyumu ɔ “ya Yerusalɛm nɛ e ya ja Mawu.” (Níts. 8:27) Eko ɔ, nyumu nɛ ɔ ji ma je no nɛ e tsake kɛ ba Yuda jami ɔ mi. Enɛ ɔ he ɔ, e ngɛ heii kaa e kase Yehowa he ní fuu ngɛ Hebri Ngmami klɔuklɔu ɔ mi. Se loloolo ɔ, e suɔ nɛ e kase babauu. Benɛ Filipo kɛ nyumu ɔ kpe ngɛ blɔ ɔ nɔ ɔ, e na kaa e ngɛ womi kpo ko nɛ gbalɔ Yesaya ngma a kanee. (Níts. 8:28) E suɔ nɛ e ya nɔ nɛ e kase babauu. E hia blɔ kɛ je Etiopia tɔɔ kɛ ya Yerusalem konɛ e ya sɔmɔ Yehowa ngɛ sɔlemi we ɔ. Etiopia nyumu ɔ kase anɔkuale ehe komɛ ngɛ Filipo ngɔ. Eko ji kaa Yesu ji Mesia a nɛ. (Níts. 8:​34, 35) E ná suɔmi nɛ mi wa kɛ ha Yehowa kɛ e Bi ɔ. Enɛ ɔ ha nɛ e pee tsakemihi nɛ a he hia ngɛ e si himi mi, nɛ e mwɔ e yi mi kpɔ kaa a baptisi lɛ konɛ e ba pee Kristo kaselɔ. Benɛ Filipo na kaa nyumu nɛ ɔ pee klaalo ɔ, e baptisi lɛ. w23.03 8-9 ¶3-6

Wa be nyɛe maa sa Yehowa hɛ mi ke wa tui anɔkuale. (Abɛ 6:​16, 17) Mwɔnɛ ɔ, e ngɛ mi kaa nihi fuu bui lakpa yemi kaa nɔ́ ko nɛ hɛdɔ ngɛ he lɛɛ, se wɔɔ lɛɛ wa yi lakpa ejakaa wa le kaa Yehowa sume. (La 15:​1, 2) Ngɛ anɔkuale mi ɔ, wa yi lakpa, se kɛ̃ ɔ, wa sume kaa wa maa laa nɔ ko nɔ́ ko nɔ, nɛ wa kɛ sisi nɔ ɔ. E sa nɛ wa kua sieku yemi. (Abɛ 25:23; 2 Tɛs. 3:11) Ke o yɔse kaa ní sɛɛmi ɔ plɛ pee sieku yemi ɔ, moo gu ga blɔ nɔ kɛ plɛ munyu ɔ hɛ mi nɛ e kɔ níhi nɛ woɔ nɔ he wami he. Akɛnɛ wa ngɛ je nɛ nihi tuɔ munyu nɛ sɛ ngɛ mi he je ɔ, e sa nɛ waa bɔ mɔde wawɛɛ konɛ wa ha nɛ wa munyu tumi nɛ sa Yehowa hɛ mi. Ke wa bɔ mɔde kaa waa kɛ wa munyu tumi ma je Yehowa yi ngɛ fiɛɛmi mi, asafo mi kpe sisi kɛ wa daa ligbi ní sɛɛmi mi ɔ, e maa jɔɔ wɔ. Ke Yehowa kpata je yaya nɛ ɔ hɛ mi ɔ, e he be wae ha wɔ kaa waa kɛ wa munyu tumi maa wo e hɛ mi nyami.—Jud 15. w22.04 9 ¶18-20

Yehowa kɛ Yesu suɔ wɔ wawɛɛ. Ke wa susu suɔmi nɛ ɔ nɛ a ngɛ kɛ ha wɔ ɔ he ɔ, e maa wo wɔ he wami konɛ wɔ hu waa suɔ mɛ. (1 Yoh. 4:10) Ke wa ti nɔ fɛɛ nɔ yɔse kaa Yesu gbo kɛ ha lɛ ɔ, e haa nɛ suɔmi nɛ wa ngɛ kɛ ha Yehowa kɛ Yesu ɔ mi waa wawɛɛ. Jã nɛ bɔfo Paulo hu nu he. Munyu nɛ e ngma kɛ ya Galatia bi ɔmɛ ɔ tsɔɔ kaa e hɛ sa kpɔmi nɔ́ ɔ wawɛɛ. E de ke: “Mawu Bi ɔ . . . suɔ mi nɛ e ngɔ e he kɛ ha ngɛ ye he.” (Gal. 2:20) Kɛ gu kpɔmi nɔ́ ɔ nɔ ɔ, Yehowa gbla mo kɛ ba e ngɔ konɛ o nyɛ nɛ o pee e huɛ. (Yoh. 6:44) Anɛ o bua jɔɛ akɛnɛ o ba le kaa Yehowa na nɔ́ kpakpa ko ngɛ o he, nɛ e wo hiɔ nɛ pe kulaa ngɛ o he konɛ o ba pee e huɛ ɔ lo? Anɛ e ha we nɛ suɔmi nɛ o ngɛ kɛ ha Yehowa kɛ Yesu ɔ mi nɛ wa lo? Ke jã a, lɛɛ e sa nɛ wa bi wa he ke, ‘Mɛni nɛ jamɛ a suɔmi ɔ maa wo mi he wami nɛ ma pee?’ Suɔmi nɛ wa ngɛ kɛ ha Mawu kɛ Kristo ɔ woɔ wɔ he wami nɛ wa jeɔ suɔmi kpo kɛ tsɔɔ ni kpahi.—2 Kor. 5:​14, 15; 6:​1, 2. w23.01 28 ¶6-7

Baiblo ɔ ji nɔ́ titli nɛ Yehowa guɔ nɔ kɛ yeɔ bua e we bi konɛ ‘a pee kake kɛ sɔmɔ lɛ.’ Yehowa ha nɛ a ngma Baiblo ɔ mi womihi fuu ngɛ blɔ nɛ e sisi numi yi nɔ, konɛ nihi nɛ a baa a he si nɛ a kaneɔ ɔ nɛ a nu sisi. (Luka 10:21) Nihi slɔɔtoslɔɔtohi kaneɔ Baiblo ɔ. Se nihi nɛ a baa a he si ɔ pɛ lɛ a nuɔ sisi saminya nɛ a kɛ nɔ́ nɛ Baiblo ɔ de ɔ tsuɔ ní. (2 Kor. 3:​15, 16) Wa naa Yehowa nile ɔ ngɛ Baiblo ɔ mi. Yehowa guɔ Baiblo ɔ nɔ kɛ tsɔɔ wɔ ní kaa asafo, se pi lɔ ɔ pɛ, e tsɔɔ wa kpɛti nɔ fɛɛ nɔ ní nɛ e woɔ wa bua kaa ni kakaakahi hulɔ. Ke wa kane Yehowa Munyu ɔ, wa maa na kaa Yehowa susuɔ wa kpɛti nɔ fɛɛ nɔ he. (Yes. 30:21) Anɛ o kane ngmami ko hyɛ nɛ o nu he kaa mo tutuutu lɛ a ngma kɛ ha lo? O ma nyɛ maa nu he jã be komɛ, se kɛ̃ ɔ, nihi ayɔhi abɔ kaneɔ Baiblo ɔ nɛ a nuɔ sisi. Ke jã a, lɛɛ mɛni he je nɛ munyuhi nɛ ngɛ Baiblo ɔ mi ɔ be bi, nɛ e haa nɛ o nuɔ he kaa mo tutuutu lɛ a ngma kɛ ha a? Nɔ́ he je ji kaa Baiblo ɔ Ngmalɔ ɔ le ní pe nɔ fɛɛ nɔ ngɛ je ɔ mi.—2 Tim. 3:​16, 17. w23.02 4-5 ¶8-10

Akɛnɛ anɔkuale Kristofohi ji wɔ he je ɔ, wa suɔ Yehowa saminya. Wa suɔ kaa waa kɛ wa nyɛmi tsuo nɛ sɔmɔ Yehowa. Se loko wa ma nyɛ ma sɔmɔ Yehowa kɛ wa nyɛmi tsuo ɔ, e sa nɛ waa kɛ Mawu jami mi oti komɛ nɛ ma wa hɛ mi. Oti nɛ ɔmɛ ekomɛ ji Kristofohi a su kpakpahi nɛ wa ma ná, ní komɛ nɛ e he hia nɛ wa maa kase, kɛ blɔhi a nɔ nɛ wa maa gu kɛ sɔmɔ ni kpahi. Mɛni he je nɛ e sa nɛ wa bua nɛ jɔ he kaa wa maa ya wa hɛ mi ngɛ mumi mi ɔ? Nɔ́ he je ji kaa wa suɔ nɛ waa sa wa hiɔwe Tsɛ nɛ ngɛ suɔmi ɔ hɛ mi. Yehowa bua jɔɔ ke e na kaa waa kɛ wa nyɛmi tsuo ngɛ lɛ sɔmɔe. Jehanɛ hu ɔ, wa suɔ nɛ waa ya wa hɛ mi ngɛ mumi mi konɛ waa ye bua wa nyɛmimɛ nyumuhi kɛ yihi. (1 Tɛs. 4:​9, 10) Wa se kɛ ngɛ asafo ɔ mi jio, wa se kɛ we jio, wɔ tsuo wa ma nyɛ maa ya wa hɛ mi ngɛ mumi mi. w22.04 22 ¶1-2

E be kɛe nɛ je ɔ ma kudɔmi blɔ nya tomi ɔ ma tua Babilon Ngua a nɛ ji, lakpa jamihi tsuo nɛ a ngɛ je ɔ mi ɔ. Tuami nɛ ɔ lɛ maa pee amanehlu ngua a sisije. Anɛ kɛ gu tuami nɛ ɔ nɔ ɔ, nihi fuu ma ba bɔni Yehowa sɔmɔmi lo? Dɛbi. Mohu ɔ, Kpo Jemi womi ɔ yi 6 tsɔɔ kaa ngɛ behi nɛ a mi wa nɛ ɔ mi ɔ, nihi nɛ a sɔmɔ we Yehowa a ma ya hla he piɛ pomi kɛ je je ɔ ma kudɔmi blɔ nya tomi ɔ kɛ jua yemi blɔ nya tomi, nɛ́ a kɛ to yoku he ɔ a ngɔ. Akɛnɛ jamɛatsɛmɛ ɔmɛ be Mawu Matsɛ Yemi ɔ se fĩe he je ɔ, Yehowa maa bu mɛ kaa nihi nɛ a teɔ si kɛ woɔ e Matsɛ Yemi ɔ. (Luka 11:23; Kpoj. 6:​15-17) Ngɛ anɔkuale mi ɔ, níhi a mi maa wa ngɛ amanehlu ngua a mi, se Yehowa sɔmɔli anɔkualetsɛmɛ maa je ekpa kulaa ngɛ be nɛ ɔ mi. Mɛ pɛ nɛ a ma sɔmɔ Yehowa Mawu ngɛ zugba a nɔ jamɛ a be ɔ mi, nɛ a be “lohwe awi yelɔ” ɔ se fĩe.—Kpoj. 13:​14-17. w22.05 16-17 ¶8-9

Tsa pi “sane kpakpa nɛ kɔɔ Mawu Matsɛ Yemi ɔ” he ɔ pɛ ji sɛ gbi nɛ e sa nɛ Mawu we bi nɛ a fiɛɛ. (Mat. 24:14) E sa nɛ a fĩ ní tsumi nɛ bɔfohi nɛ a tu a he munyu ngɛ Kpo Jemi yi 8 kɛ ya si 10 ngɛ tsue ɔ hu se. Bɔfo nɛ ɔmɛ ngɛ nyagbahi nɛ maa ba nihi nɛ a kua Mawu Matsɛ Yemi ɔ sɛ gbi ɔ a nɔ ɔ jajee. Yehowa Odasefohi maa fiɛɛ kojomi sɛ gbi nɛ a kɛ to “gbiɛ ngo ngu kɛ la” he ɔ. Enɛ ɔ tsɔɔ nɔ́ nɛ maa ba Satan je yaya nɛ ɔ blɔ nya tomi fã slɔɔto ɔmɛ a nɔ. (Kpoj. 8:​7, 13) E sa nɛ nihi nɛ a le kaa nyagbe ɔ su si ta konɛ a kɛ hɛdɔ nɛ pee tsakemi ngɛ a si himi mi, nɛ a yi nɛ ná wami ngɛ Yehowa ligbi ngua a nɔ. (Zef. 2:​2, 3) Se sɛ gbi nɛ ɔ be ngɔe ha nihi. Ja wa pee kã loko wa ma nyɛ maa fiɛɛ sɛ gbi nɛ ɔ. Ngɛ amanehlu ngua a mi ɔ, nyagbe sɛ gbi nɛ wa maa fiɛɛ ɔ maa wo nihi a mi mi la wawɛɛ.—Kpoj. 16:21. w22.05 7 ¶18-19

Mo susu Kristofohi nɛ a sɛ gba si himi mi ɔ ba pee fɔli ɔ he nɛ o hyɛ. Eko ɔ, ngɛ jehahi nɛ be ɔ mi ɔ, a nu magbɛ nɔ munyuhi fuu nɛ kɔɔ bi tsɔsemi he. Se amlɔ nɛ ɔ, sisi tomi mlaahi nɛ ngɛ jamɛ a munyu ɔmɛ a mi ɔ he ba hiaa mɛ wawɛɛ. A ma bɔni mɛ nitsɛmɛ a bimɛ tsɔsemi. Enɛ ɔ ji ní tsumi ngua nitsɛnitsɛ! Niinɛ ke wa si fɔfɔɛ tsake ɔ, ngmami komɛ ba peeɔ nɔ́ nɛ he hia kɛ ha wɔ saminya. Enɛ ɔ ji oti kake he je nɛ Yehowa sɔmɔli kaneɔ Ngmami ɔ kaa bɔ nɛ a fã Israel matsɛmɛ ke a pee a wami “be tsuo” ɔ. (5 Mose 17:19) Fɔli, he blɔhi nɛ se be nɛ Kristofohi ngɛ ɔ a kpɛti kake nɛ nyɛ ná ji kaa nyɛ maa tsɔɔ nyɛ bimɛ Yehowa he ní. Se e sa nɛ nyɛɛ pee babauu pe Mawu he ní pɛ nɛ nyɛ maa tsɔɔ mɛ. Nyɛɛ ye bua nyɛ bimɛ nɛ a suɔ Yehowa wawɛɛ. w22.05 26 ¶2-3

Ke wa pee yayami ko ɔ, pi dɔmi nɛ e maa dɔ wɔ ɔ kɛkɛ pɛ nɛ he hia. E sa kaa waa pee klaalo kaa wa maa pee he nɔ́ ko. Jehanɛ se ɔ hu ɔ, nɔ́ ko hu nɛ he hia nɛ Yehowa hyɛɔ loko e maa mwɔ yi mi kpɔ kaa e ke yayami ko maa ke loo e kɛ be kee ɔ ji se kpalemi. Ke nɔ ko kpale e se ɔ, lɔ ɔ tsɔɔ kaa nɔ ɔ kpa ní yayamihi nɛ e ngɛ pee ɔ, nɛ e peeɔ níhi nɛ Yehowa suɔ kaa waa pee. (Yes. 55:7) E sa nɛ jamɛatsɛ ɔ nɛ tsake e juɛmi, nɛ e susu níhi a he kaa bɔ nɛ Yehowa susuɔ níhi a he ɔ. (Rom. 12:2; Efe. 4:23) E sa nɛ e fia e pɛɛ si kaa e ma kpa ní yayamihi a he susumi kɛ ní peepeehi nɛ a sɛ nɛ e peeɔ be ko nɛ be ɔ. (Kol. 3:​7-9) Ngɛ anɔkuale mi ɔ, hemi kɛ yemi nɛ wa ngɛ ngɛ Kristo afɔle sami ɔ mi ɔ ji nɔ́ nɛ Yehowa daa nɔ nɛ e ngɔɔ wa yayami ɔmɛ kɛ keɔ wɔ, nɛ e tsuɔ wa he kɛ jeɔ yayami he. Yehowa maa da Kristo afɔle sami ɔ nɔ kɛ ngɔ wa yayami ɔmɛ kɛ ke wɔ ke e na kaa wa ngɛ mɔde bɔe kaa wa ma tsake wa ní peepee kɛ wa je mi bami.—1 Yoh. 1:7. w22.06 6 ¶16-17

Kɛ je be nɛ Adam kɛ Hawa gbo Yehowa nɔ tue ɔ, adesahi ngɛ a sibi awi yee. (Fiɛɛ. 8:9) Kaa nɔ hyɛmi nɔ́ ɔ, nihi ngɔɔ blɔ nya nɛ a náa kɛ yeɔ a nyɛmimɛ awi. Yiwutsotsɛmɛ yeɔ nihi awi, sukuu bi komɛ doɔ sukuu bi kpahi a nya, nɛ ni komɛ hu waa a weku li yi mi wawɛɛ. E be nyakpɛ kaa adesahi yeɔ a nyɛmimɛ adesahi gbeye. Mɛni blɔ nɔ Satan guɔ adesa gbeye yemi nɔ kɛ tsɔɔ wɔ klama? Satan bɔɔ mɔde kaa e ma ha nɛ waa ye nimli gbeye, konɛ wa kpa fiɛɛmi ní tsumi ɔ, kɛ ní kpahi nɛ Yehowa de wɔ ke waa pee ɔ peemi. Satan kudɔɔ nɔ yeli ɔmɛ nɛ a tsiɔ wa ní tsumi ɔ nya nɛ a waa wɔ yi mi hulɔ. (Luka 21:12) Nihi fuu gbɛɛ Yehowa Odasefohi a he lakpa munyuhi kɛ fiaa. Nihi nɛ a heɔ lakpa munyu nɛ ɔmɛ ye ɔ, yeɔ wa he fɛu nɛ a teɔ si kɛ woɔ wɔ. (Mat. 10:36) Anɛ Satan ga tsɔmi nɛ ɔmɛ peeɔ wɔ nyakpɛ lo? E pee we wɔ nyakpɛ, ejakaa e kɛ tsu ní ngɛ kaseli ɔmɛ a be ɔ mi.—Níts. 5:​27, 28, 40. w22.06 16 ¶10-11

Mɛnɔmɛ nɛ a piɛɛ “nihi babauu” nɛ a maa tsɔɔ mɛ blɔ nɛ a pee nɔ́ nɛ da a he? Mɛ ji nihi nɛ a ma tle mɛ si ngɛ zugba nɔ, kɛ nihi nɛ a po Hamagedɔn, kɛ eko ɔ, jokuɛwi nɛ a ma fɔ mɛ ngɛ je ehe ɔ mi. Ke jeha 1,000 ɔ ba nyagbe ɔ, adesahi nɛ a ngɛ zugba a nɔ ɔ tsuo maa ye mluku. Ke a kɛ pɛnsle ngma nɔ́ ko ɔ, o ma nyɛ ma tsu loo o gbe, se ke a kɛ pɛn ngma nɔ́ ko ɔ, o be nyɛe ma tsu loo o gbe. E sa nɛ wa kai kaa ke nɔ ko ye mluku ɔ, lɔ ɔ tsɔɔ we kaa bɔ fɛɛ bɔ nɛ ji ɔ, e ma ná neneene wami. Mo susu Adam kɛ Hawa he nɛ o hyɛ. A ji nihi nɛ a ye mluku, se ja a bu Yehowa Mawu tue loko a ma ná neneene wami. Aywilɛho sane ji kaa, a bui lɛ tue. (Rom. 5:12) Anɛ akɛnɛ ngɛ jeha 1,000 ɔ nyagbe ɔ, nihi tsuo a maa ye mluku he je ɔ, anɛ nihi nɛ a ye mluku ɔ tsuo ma fĩ Yehowa se kɛ ya neneene lo? Aloo ni komɛ maa pee a ní kaa Adam kɛ Hawa nɛ a yi anɔkuale bemi nɛ a ye mluku po ɔ lo? E he maa hia kaa wa ma ná sane bimi nɛ ɔmɛ a heto. w22.09 22-23 ¶12-14

Ke o hyɛ níhi nɛ ngɛ nɔ yae ngɛ je ɔ mi mwɔnɛ ɔ, anɛ e peeɔ mo kaa níhi be hie ligbi ko lo? Wa naa kaa suɔmi be weku li a kpɛti kaa be ko nɛ be ɔ. Nihi foɔ mɛ pɛ a nɔ́ mi, nɛ a peeɔ basabasa. E yeɔ ha nihi babauu kaa a maa ngɔ a hɛ kɛ fɔ nihi nɛ a hɛɛ blɔ nya a, a nɔ. Se ngɛ ní nɛ ɔmɛ nɛ ngɛ nɔ yae ɔ tsuo se ɔ, o ma nyɛ ma ná nɔ mi mami kaa níhi maa hi. Mɛni he je? Ejakaa bɔ nɛ Baiblo gbami ko nɛ sa kadimi ɔ tsɔɔ kaa nihi maa pee a ní ngɛ “nyagbe ligbi ɔmɛ” a mi ɔ, jã pɛpɛɛpɛ lɛ ngɛ nɔ yae ɔ nɛ. (2 Tim. 3:​1-5) Ngɛ anɔkuale mi ɔ, nɔ ko nɔ ko be nɛ e ma de ke gbami nɛ ɔ bɛ mi lolo. Gbami nɛ ɔ nɛ ngɛ mi bae ɔ ji odase nɛ tsɔɔ kaa Kristo Yesu bɔni nɔ yemi kaa Mawu Matsɛ Yemi ɔ nya Matsɛ. Se gbamihi fuu nɛ kɔɔ Matsɛ Yemi ɔ he ɔ, a kpɛti kake pɛ ji nɛ ɔ nɛ. Kaa bɔ nɛ ke a poo foni ko mi tsɔwitsɔwi nɛ o to nya a, o naa foni mluku ɔ saminya a, jã kɛ̃ nɛ gbami slɔɔtoslɔɔto nɛ ɔmɛ nɛ wa ma susu he ɔ maa ye bua wɔ konɛ waa na heii kaa e be kɛe nɛ nyagbe ɔ maa ba kaa bɔ nɛ Yehowa wo si ɔ. w22.07 2 ¶1-2

Ngɛ COVID-19 hiɔ be ɔ mi ɔ, wa nine su blɔ tsɔɔmi nɛ ngɛ heii nɔ kɛ kɔ bɔ nɛ wa ma plɛ kɛ pee Kristofohi a kpehi, kɛ bɔ nɛ wa ma tsu fiɛɛmi ní tsumi ɔ ha a he. Ngɛ be kpiti mi ɔ, wa bɔni asafo mi kpehi, kpɔ mi kpehi kɛ kpokpa nɔ kpehi peemi kɛ gu videoconferencing kɛ fon nɔ. Jehanɛ hu ɔ, wa fiɛɛɔ ngɛ fon nɔ, nɛ wa ngmaa lɛtɛ hu kɛ fiɛɛɔ. Yehowa jɔɔ wa mɔde bɔmi ɔ nɔ. Asafo ɔ ní tsumi kɔnihi fuu bɔ amaniɛ kaa fiɛɛli a he ngɛ hiɛe wawɛɛ. Ngɛ anɔkuale mi ɔ, wa kpɛti nihi fuu ná níhi a si kpamihi nɛ woɔ nɔ he wami wawɛɛ jamɛ a be ɔ mi. Eko ɔ, ni komɛ susu kaa asafo ɔ ngɛ nɔ́ ko pee tsɔ ngɛ jamɛ a be ɔ mi. Se benɛ je ngɛ jɔe nɛ je ngɛ nae ɔ, wa na heii kaa nile ngɛ blɔ tsɔɔmihi nɛ a kɛ haa wɔ ɔ mi. Ke wa pue wa yi mi tɛ ngɛ bɔ nɛ Yesu je suɔmi mi kɛ ngɛ e we bi a hɛ mi nyɛɛe ha a he ɔ, wa ma nyɛ ma ná nɔ mi mami kaa pu lɛ ngɛ tsoe jio, hiɔmi lɛ ngɛ nɛe jio, Yehowa kɛ e Bi nɛ e suɔ lɛ ɔ, maa piɛɛ wa he.—Heb. 13:​5, 6. w22.07 13 ¶15-16

Ngɛ Yehowa yi nɛ wa ma je ɔ se ɔ, e sa nɛ waa na lɛ si ngɛ ní kpakpahi nɛ e peeɔ ha wɔ ɔ he hulɔ. Kaa nɔ hyɛmi nɔ́ ɔ, wa ma nyɛ maa na lɛ si ngɛ kɔlahi nɛ wa naa ngɛ mɔmɔ slɔɔtoslɔɔtohi a mi ɔ he. Wa ma nyɛ maa na lɛ si hu ngɛ niye ní ngɔngɔɛ slɔɔtoslɔɔtohi nɛ e ha wɔ ɔ kɛ huɛmɛ kpakpahi nɛ wa ngɛ nɛ lɔ ɔ haa wɔ bua jɔmi ɔ he. Wa Tsɛ nɛ ngɛ suɔmi ɔ haa wɔ ní nɛ ɔmɛ kɛ ní kpahi fuu konɛ wa ná bua jɔmi. (La 104:​12-15, 24) Nɔ́ nɛ he hia pe kulaa nɛ e sa nɛ waa na lɛ si ngɛ he ji mumi mi niye ní nɛ e haa wɔ ɔ kɛ hwɔɔ se he hɛ nɔ kami nɛ se be nɛ wa ngɛ ɔ. E he wɛ kulaa kaa wa hɛ maa je nɔ kaa wa maa na Yehowa si ngɛ níhi tsuo nɛ e peeɔ ha wɔ ɔ he. Mɛni maa ye bua mo konɛ o kai nɛ o na lɛ si? O ma nyɛ maa ngma níhi nɛ o sɔle ngɛ a he ɔ kɛ pue si, konɛ pee se ɔ, o hyɛ kaa e ha jamɛ a sɔlemi ɔmɛ a heto lo, nɛ o sɔle kɛ na lɛ si kaa e ye bua mo.—Kol. 3:15. w22.07 22 ¶8-9

Wa le kaa pi anɔkuale ɔ nɛ wa maa kase ɔ pɛ nɛ he hia. Loko wa ma ná anɔkuale ɔ he se kɛ pi si ɔ, e sa nɛ waa hi si ngɛ anɔkuale ɔ nya. Enɛ ɔ tsɔɔ kaa e sa nɛ waa ngɔ níhi nɛ wa ngɛ kasee ɔ kɛ tsu ní ngɛ wa si himi mi. Ja wa pee jã loko anɔkuale ɔ nɛ wa ngɛ kasee ɔ ma ha nɛ wa ma ná bua jɔmi nitsɛnitsɛ. (Yak. 1:25) Kɛ wa maa pee kɛ le kaa wa ngɛ wa je mi bae ngɛ anɔkuale ɔ nya ha kɛɛ? Nyɛminyumu ko tsɔɔ kaa e sa nɛ waa hyɛ wa si himi mi, nɛ waa hyɛ kaa waa kɛ níhi nɛ wa ngɛ kasee ɔ ngɛ ní tsue lo, nɛ waa hyɛ hehi nɛ e he hia nɛ waa pee tsakemi ngɛ. Bɔfo Paulo de ke: “He nɛ wa ya wa hɛ mi kɛ su ɔ, nyɛ ha nɛ waa ya nɔ nɛ waa nyɛɛ pɛpɛɛpɛ ngɛ blɔ nɛ ɔ nɔuu nɔ.” (Filip. 3:16) Mo susu he nɛ o hyɛ bɔ nɛ wa ma ná he se ha ke wa bɔ mɔde nɛ wa ‘ya nɔ nɛ wa nyɛɛ ngɛ anɔkuale ɔ nya’! Wa si himi maa pee kpakpa, se pi lɔ ɔ pɛ, Yehowa kɛ wa nyɛmimɛ Kristofohi ɔmɛ hu a bua maa jɔ. (Abɛ 27:11; 3 Yoh. 4) Enɛ ɔmɛ ji yi mi tomi kpakpahi a he je nɛ wa suɔ anɔkuale ɔ, nɛ wa hiɔ si ngɛ nya a nɛ. w22.08 18-19 ¶16-18

Mɛni asafo mi nikɔtɔmahi ma nyɛ maa pee kɛ tsɔɔ kaa a suɔ Yehowa kɛ Yesu? E he hia nɛ a hyɛ Yesu jijɔ ɔmɛ a nɔ. (1 Pet. 5:​1, 2) Yesu ha nɛ nɔ́ nɛ ɔ pee heii kɛ ha bɔfo Petro. Akɛnɛ Petro kua Yesu si etɛ sɔuu he je ɔ, eko ɔ, Petro suɔ wawɛɛ nɛ e tsɔɔ kaa e suɔ Yesu. Se benɛ a tle Yesu si ɔ, e bi Petro ke: “Simon, Yohane bi, o suɔ mi lo?” Wa ma nyɛ ma ná nɔ mi mami kaa Petro maa pee nɔ́ fɛɛ nɔ́ kɛ tsɔɔ kaa e suɔ e Nyɔmtsɛ ɔ. Yesu de Petro ke: “Hyɛ ye jijɔ tsɔwi ɔmɛ a nɔ.” (Yoh. 21:​15-17) Lɔ ɔ he ɔ, Petro je suɔmi mi nɛ e hyɛ e Nyɔmtsɛ ɔ jijɔ ɔmɛ a nɔ e wami be tsuo kɛ tsɔɔ kaa e suɔ Yesu niinɛ. Asafo mi nikɔtɔmahi, mɛni nyɛ ma nyɛ maa pee kɛ tsɔɔ kaa nɔ́ nɛ Yesu de Petro ɔ he hia nyɛ wawɛɛ? Nyɛ ma nyɛ maa tsɔɔ kaa nyɛ suɔ Yehowa kɛ Yesu kɛ gu nyɛmimɛ ɔmɛ nɛ nyɛ ma pɔ mɛ slaami ɔ nɔ. Jehanɛ hu ɔ, nyɛɛ bɔ mɔde wawɛɛ nɛ nyɛɛ ye bua nihi nɛ a gbɔjɔ ɔ konɛ a kpale kɛ ba Yehowa ngɔ ekohu.—Eze. 34:​11, 12. w23.01 29 ¶10-11

E sɛ nɛ o susu kaa nɔ ko nɔ ko be nyɛe maa nu mo sisi ngɛ haomi pɔtɛɛ ko nɛ o kɛ ngɛ kpee ɔ he, ejakaa jã a peemi ma nyɛ maa ye mo awi. Susumi kaa jã a ma nyɛ ma ha nɛ o nu he kaa o si fɔfɔɛ ɔ he nɔ́ ko be hie peemi, nɛ o be nyɛe maa ye akɔnɔ yayahi a nɔ. Se pi jã ji sane ɔ. Baiblo ɔ de ke: “ngɛ ka a mi ɔ, lɛ hu e ma je blɔ nɛ́ nyɛ ma nyɛ maa gu nɔ kɛ je mi, konɛ nyɛ nyɛ nɛ nyɛɛ da nya.” Enɛ ɔ he ɔ, ke akɔnɔ yaya ko he si ngɛ wa mi kaa mɛni po ɔ, wa ma nyɛ maa da nya. Yehowa ma nyɛ maa ye bua wɔ konɛ wa nyɛ nɛ waa ye akɔnɔ yaya nɔ. Mo kai be fɛɛ be kaa, akɛnɛ wa ji adesahi nɛ yayami ngɛ wa he he je ɔ, wa be nyɛe maa tsi akɔnɔ yaya nya. Se ke o ná akɔnɔ yaya po ɔ, o ma nyɛ maa tu nya fo kaa bɔ nɛ Yosef kɛ oya yemi tu fo ngɛ Potifar yo ɔ nya a. (1 Mose 39:12) E sɛ nɛ o ngmɛ blɔ nɛ akɔnɔ yaya nɛ ye o nɔ! w23.01 12-13 ¶16-17

Suhi nɛ Yehowa ngɛ ɔ eko ji dami sane yemi. (5 Mose 32:4) Ke nɔ ko yeɔ dami sane ɔ, e hlɛ nɔ mi, nɛ wa le kaa Yehowa hlɛ nɔ mi. (Níts. 10:​34, 35) Yehowa ha nɛ a ngma Baiblo ɔ ngɛ gbihi nɛ nihi babauu tuɔ benɛ a ngɛ Baiblo ɔ ngmae ɔ mi. Enɛ ɔ maa nɔ mi kaa Yehowa hlɛ nɔ mi. Yehowa wo si kaa ngɛ nyagbe be ɔ mi ɔ, ‘anɔkuale nile’ nɛ ngɛ Baiblo ɔ mi ɔ maa ‘hiɛ babauu,’ nɛ nihi fuu maa nu sisi. (Dan. 12:4) Nɔ́ kake nɛ ye bua nihi babauu nɛ a nu Baiblo ɔ sisi ji kaa a tsɔɔ Baiblo ɔ kɛ Baiblo kasemi womihi a sisi kɛ ya gbihi fuu mi, nɛ a print nɛ a gba ha nihi fuu. Amlɔ nɛ ɔ, Yehowa we bi tsɔɔ Baiblo ɔ tsuo loo e fã ko sisi kɛ ya gbihi nɛ hiɛ pe 240 a mi, nɛ nihi fuu a nine suɔ nɔ nɛ a wui he hiɔ. Enɛ ɔ ha nɛ nihi nɛ a ngɛ je ɔ mi tsuo ɔ ngɛ ‘sane kpakpa nɛ kɔɔ Matsɛ Yemi ɔ’ he nɛ a ngɛ fiɛɛe loko nyagbe ɔ nɛ ba a he ní kasee. (Mat. 24:14) Wa Mawu nɛ yeɔ dami sane ɔ suɔ nɛ nihi babauu nɛ a kane e Munyu ɔ konɛ a ba le lɛ, ejakaa e suɔ wɔ tsuo wawɛɛ. w23.02 5 ¶11-12

Anɛ o suɔ nɔ́ nɛ da peemi lo? Atsinyɛ jemi ko be he kaa o suɔ, se akɛnɛ wa yi mluku he je ɔ, ke wa hyɛ we nɛ hi ɔ, bɔ nɛ je ɔ naa nɔ́ nɛ da peemi ha a ma nyɛ ma ná wa nɔ he wami. (Yes. 5:20) Ke a ke nɔ ko peeɔ nɔ́ nɛ da a, nihi fuu naa jamɛ a nɔ ɔ kaa nɔ ko nɛ e woɔ e he nɔ, e kojoɔ ni kpahi, nɛ e susuɔ kaa e hi pe ni kpahi. Se Mawu sume su nɛ ɔmɛ kulaa. Benɛ Yesu ngɛ zugba a nɔ ɔ, e kã jami hɛ mi nyɛɛli ɔmɛ a hɛ mi ejakaa a peeɔ a ní kaa nihi nɛ a da, nɛ mɛ nitsɛmɛ a wo mlaahi ngɛ nɔ́ nɛ da kɛ nɔ́ nɛ dɛ he. (Fiɛɛ. 7:16; Luka 16:15) Nɔ nɛ peeɔ nɔ́ nɛ da ngɛ Yehowa hɛ mi ɔ susuu we kaa e hi pe ni kpahi. Dami ní peemi ji su ko nɛ se be. Nɔ́ nɛ e tsɔɔ ji, nɛ́ wa maa pee nɔ́ nɛ da ngɛ Yehowa Mawu hɛ mi. Ngɛ Baiblo ɔ mi ɔ, munyu nɛ ji “dami ní peemi” ɔ tsɔɔ kaa nɔ ko maa ba e je mi aloo e maa hi si ngɛ Yehowa dami mlaahi nɛ a nɔ kuɔ ɔ a nya. w22.08 27 ¶3-5

E ngɛ mi kaa Yesu kaseli ɔmɛ tɔ̃ɔ mohu lɛɛ, se e he mɛ ye. (Yoh. 15: 16) Benɛ Yakobo kɛ Yohane bi Yesu Kristo kaa e ha mɛ he blɔ klɛdɛɛ ngɛ Matsɛ Yemi ɔ mi ɔ, Yesu kã we a hɛ mi kaa he blɔ nɛ a ma ná he je nɛ a ngɛ Yehowa sɔmɔe, nɛ e je we mɛ kɛ je e bɔfo ɔmɛ a kpɛti hulɔ. (Maak. 10:​35-40) Pee se ɔ, gbɔkuɛ nɛ a nu Yesu ɔ, e kaseli ɔmɛ tsuo kua lɛ. (Mat. 26:56) Se ngɛ enɛ ɔ tsuo se ɔ, Yesu ya nɔ nɛ e he mɛ ye. E le a gbɔjɔmihi; se kɛ̃ ɔ, “e suɔ mɛ hluu kɛ ya si nyagbe.” (Yoh. 13:1) Benɛ a tle Yesu si ɔ, e ngɔ he blɔ klɛdɛɛ kɛ wo e kaseli anɔkualetsɛmɛ 11 ɔ a dɛ. Lɔ ɔ ji kaa a nyɛɛ kaselɔ peemi ní tsumi ɔ hɛ mi, nɛ́ a hyɛ e to ɔmɛ a nɔ. (Mat. 28:​19, 20; Yoh. 21:​15-17) Yesu he e kaseli nɛ ɔmɛ nɛ a yi mluku ɔ ye ngɛ yi mi tomi kpakpa komɛ a he je. Mɛ tsuo a kɛ anɔkuale yemi sɔmɔ kɛ ya si be nɛ a gbe a zugba a nɔ sɔmɔmi ní tsumi ɔ nya. Ngɛ anɔkuale mi ɔ, Yesu pee nɔ hyɛmi nɔ́ kpakpa kɛ tsɔɔ kaa wa ma nyɛ ma he adesahi nɛ a yi mluku ɔ ye. w22.09 6 ¶12

Ke wa ngɛ nɔ mi mami kaa Yehowa suɔ, nɛ e maa ye bua wɔ be fɛɛ be ɔ, wa ma nyɛ maa da Satan tuami ɔmɛ a nya. Kaa nɔ hyɛmi nɔ́ ɔ, nɔ nɛ ngma La 118 gblee si himi komɛ nɛ a mi wa mi. E ngɛ he nyɛli babauu, nɛ a kpɛti ni komɛ po ji nihi nɛ a ngɛ blɔ nyahi (kuku 9, 10). E haoɔ wawɛɛ be komɛ (kuku 13). Yehowa hu gbla e tue wawɛɛ (kuku 18). Se kɛ̃ ɔ, la polɔ ɔ de ke: ‘I be gbeye yee.’ E ngɛ mi kaa e hiɔwe Tsɛ nɛ ji Yehowa tsɔse lɛ mohu lɛɛ, se e le kaa e suɔ lɛ. La polɔ ɔ ngɛ nɔ mi mami kaa bɔ fɛɛ bɔ nɛ si fɔfɔɛ ɔ ma ji ha a, e Mawu nɛ e ngɛ suɔmi ɔ pee klaalo be fɛɛ be kaa e maa ye bua lɛ. (La 118:29) E sa nɛ wa ná nɔ mi mami kaa Yehowa suɔ wɔ. Enɛ ɔ maa ye bua wɔ konɛ waa da níhi etɛ komɛ nɛ haa nɛ wa yeɔ gbeye ɔ nya, mɛ ji, (1) ke wa yeɔ gbeye kaa wa be nyɛe maa hyɛ wa weku ɔ nɔ, (2) adesa gbeye yemi, kɛ (3) ke wa yeɔ gbeye kaa wa ma gbo. w22.06 15 ¶3-4

E sa nɛ waa bɔ mɔde nɛ waa kɛ Yehowa sɔmɔmi nɛ pee nɔ́ titli ngɛ wa si himi mi. Yehowa ji wa Bɔlɔ, enɛ ɔ he ɔ, e sa nɛ wa ja lɛ. (Kpoj. 4:11; 14:​6, 7) Lɔ ɔ he ɔ, nɔ́ titli nɛ e sa nɛ e he nɛ hia wɔ ngɛ wa si himi mi ji nɛ wa ma ja Yehowa kaa bɔ nɛ e suɔ nɛ a ja lɛ ɔ. E sa nɛ wa ja lɛ “kɛ mumi kɛ anɔkuale.” (Yoh. 4:​23, 24) Enɛ ɔ tsɔɔ kaa e sa nɛ wa ha nɛ Mawu mumi klɔuklɔu ɔ nɛ kudɔ wɔ konɛ bɔ nɛ wa jaa lɛ ha a kɛ anɔkualehi nɛ ngɛ Mawu Munyu ɔ mi ɔ nɛ kɔ. Ke he nɛ wa ngɛ ɔ, a tsi wa sɔmɔmi ní tsumi ɔ nya ngɛ lejɛ ɔ po ɔ, e sa nɛ waa ngɔ Yehowa sɔmɔmi kɛ ye kekle blɔ he. Amlɔ nɛ ɔ, a wo nyɛmimɛ nyumuhi kɛ yihi nɛ a hiɛ pe 100 tsu akɛnɛ a ji Yehowa Odasefohi ɔ he je. Ngɛ enɛ ɔ tsuo se ɔ, a bɔɔ mɔde wawɛɛ nɛ a kɛ bua jɔmi sɔleɔ, a kaseɔ ní, nɛ a deɔ ni kpahi Mawu kɛ e Matsɛ Yemi ɔ he ní. Ke nihi te si kɛ wo wɔ loo a wa wɔ yi mi po ɔ, wa bua jɔɔ ejakaa wa le kaa Yehowa piɛɛ wa he nɛ e maa ye bua wɔ nɛ wa fĩ si.—1 Pet. 4:14. w22.10 9 ¶13

Ngɛ Abɛ womi ɔ mi tsuo ɔ, Yehowa ha wɔ ga womi nɛ sa, nɛ waa kɛ ma tsu ní ngɛ wa si himi mi. O susu ga womi nɛ ɔmɛ a kpɛti eywiɛ pɛ he nɛ o hyɛ. Kekleekle ɔ, o bua nɛ jɔ níhi nɛ o ngɛ ɔmɛ a he. Abɛ 23:​4, 5 ɔ wo wɔ ga ke: “Ko gbo dengme ke doo ja o ná ní. . . . E maa pee kɔɔhiɔ nɛ e maa laa tlukaa kaa kɔle tee kɛ yaa hiɔwe.” Niatsɛmɛ kɛ ohiatsɛmɛ tsuo ngɛ mɔde bɔe kaa a ma ná sika fuu. Lɔ ɔ he je ɔ, a peeɔ níhi fuu nɛ e ma puɛ a biɛ, kɛ huɛ bɔmi nɛ ngɛ a kɛ Yehowa a kpɛti ɔ, nɛ a ngɔɔ a wami kɛ woɔ oslaa mi. (Abɛ 28:20; 1 Tim. 6:​9, 10) Enyɔne, ke o maa tu munyu ɔ susu he. Ke wa hyɛ we nɛ hi ɔ, waa kɛ wa munyu tutui ma nyɛ ma puɛ ní. Abɛ 12:18 ɔ de ke: “Munyu nɛ a tuɔ kɛkɛ nɛ juɛmi be mi ɔ, e yeɔ nɔ awi kaa klaate. Se ní lelɔ nya mi munyu tsaa nɔ.” Ke nɔ ko pee nɔ́ ko nɛ e hí nɛ wa ngɛ e he munyu tue ha ni kpahi ɔ, e ha we nɛ tue mi jɔmi baa.—Abɛ 20:19. w22.10 21 ¶14; 22 ¶16-17

E sa nɛ Ezekiel nɛ nu sɛ gbi nɛ e yaa jaje ɔ sisi saminya. E sa nɛ e he sɛ gbi ɔ nɛ e ye konɛ lɔ ɔ nɛ wo lɛ he wami nɛ e fiɛɛ. Lɔ ɔ se ɔ, nɔ́ ko nɛ ngɛ nyakpɛ ya nɔ. Ezekiel yɔse kaa womi kpo ɔ “ngɔ ngɛ [e] nya mi kaa hwo.” (Eze. 3:3) Mɛni he je? Ezekiel na he blɔ nɛ e ná kaa e maa da Yehowa nane mi kɛ fiɛɛ sɛ gbi ɔ kaa nɔ́ nɛ ngɔ loo ní tsumi ko nɛ ngɛ bua jɔmi. (La 19:​8-11) E bua jɔ kaa Yehowa kplɛɛ e nɔ kaa e sɔmɔ kaa e gbalɔ. Pee se ɔ, Yehowa de Ezekiel ke: “Ta tue saminya, konɛ o kai nɔ́ tsuaa nɔ́ nɛ ma de mo ɔ.” (Eze. 3:10) Ngɛ blɔ tsɔɔmi nɛ ɔ mi ɔ, Yehowa de Ezekiel kaa e kai níhi nɛ a ngma ngɛ womi kpo ɔ mi ɔ, nɛ e pue e yi mi tɛ ngɛ he. Enɛ ɔ nɛ Ezekiel pee ɔ ha nɛ e hemi kɛ yemi mi wa. Jehanɛ hu ɔ, jã nɛ e pee ɔ ha nɛ e na bɔ nɛ sɛ gbi ɔ nɛ e yaa fiɛɛ kɛ ha ni ɔmɛ ɔ he hia ha. (Eze. 3:11) Benɛ Ezekiel nu sɛ gbi ɔ sisi saminya, nɛ e he ye ɔ, e pee klaalo kaa e maa je fiɛɛmi ní tsumi ɔ sisi, nɛ e ma tsu kɛ ya si be nɛ e maa gbe nya. w22.11 6 ¶12-14

Ke asafo ɔ pee tsakemi ko nɛ e he wa ha mo kaa o kɛ ma tsu ni ɔ, mɛni e sa kaa o pee? Mo fĩ tsakemihi nɛ a pee ngɛ asafo ɔ mi ɔ se. Benɛ Israel bi ɔmɛ ngɛ nga a nɔ kɛ yaa Kohat bi ɔmɛ a ti ni komɛ tlooɔ somi daka a kɛ nyɛɛɔ ma a hɛ mi. (4 Mose 3:​29, 31; 10:33; Yosh. 3:​2-4) Enɛ ɔ ji he blɔ nɛ se be! Se benɛ Israel bi ɔmɛ ya su Si Womi Zugba a nɔ ɔ, níhi tsake. E hia we nɛ a hi somi daka a tlooe be fɛɛ be. Lɔ ɔ ha Kohat bi ɔmɛ ní tsumi kpã. (1 Kron. 6:​31-33; 26:​1, 24) E ngɛ mi kaa Kohat bi ɔmɛ ná he blɔ nɛ nɔ kuɔ be ko nɛ be ɔ mohu lɛɛ, se benɛ a ngɔ ní tsumi kpa kɛ wo a dɛ ɔ, a tui munyu kɛ si jamɛ a ní tsumi ɔ, nɛ a de we ke a ha mɛ ní tsumi nɛ nɔ kuɔ. Mɛni wa ma nyɛ maa kase ngɛ mi? Moo je o tsui mi nɛ o fĩ tsakemihi nɛ Yehowa asafo ɔ pee ɔ se, ke lɔ ɔ sa ní tsumi nɛ a kɛ wo o dɛ ɔ he po. O bua nɛ jɔ ní tsumi saisaa nɛ a kɛ maa wo o dɛ ɔ he. Mo kai kaa pi ní tsumi nɛ a kɛ wo o dɛ ɔ nɛ ha nɛ o he jua wa ha Yehowa. Yehowa tue nɛ o maa bu ɔ he hia kulaa pe ní tsumi nɛ a kɛ wo o dɛ ɔ. w22.11 23 ¶10-11

Onesiforo ya hla bɔfo Paulo, nɛ benɛ e na lɛ ɔ, e bɔ mɔde nɛ e ye bua lɛ nɛ e tsu níhi nɛ e hia a he ní kɛ ha lɛ. Onesiforo ngɔ e wami kɛ wo oslaa mi ngɛ jã peemi mi. Mɛni wa ma nyɛ maa kase ngɛ mi? E sɛ nɛ wa ha nɛ adesa hɛ mi gbeye yemi nɛ tsi wa nya ngɛ yemi kɛ buami nɛ e sa nɛ wa kɛ ha wa nyɛmimɛ nɛ a ngɛ mɛ yi mi wae ɔ he. Mohu ɔ, nyɛ ha nɛ wa fã a he nɛ waa ye bua mɛ. (Abɛ 17:17) E sa nɛ waa suɔ wa nyɛmimɛ nɛ ɔmɛ, a hia wa yemi kɛ buami. Mo susu bɔ nɛ wa nyɛmimɛ nɛ a ngɛ Russia a yeɔ bua a nyɛmimɛ nɛ a wo mɛ tsu ɔ he nɛ o hyɛ. Ke a ngɔ a ti ni komɛ kɛ ho kojomi he ya a, wa nyɛmimɛ nyumuhi kɛ yihi fuu yaa lejɛ ɔ nɛ a ya fĩɔ a se. Mɛni wa ma nyɛ maa kase ngɛ mi? Ke a po wa nyɛmimɛ ɔmɛ a nya, a wo mɛ tsu, loo a ngɛ mɛ yi mi wae ɔ, koo ye gbeye. Moo sɔle ha mɛ nɛ o hyɛ a weku mi bimɛ ɔmɛ a nɔ, nɛ o ye bua mɛ ngɛ blɔ kpahi hu a nɔ.—Níts. 12:5; 2 Kor. 1:​10, 11. w22.11 17 ¶11-12

Asafo mi nikɔtɔma amɛ a ní tsumi ɔ eko ji kaa a maa da Baiblo ɔ nɔ kɛ wo nyɛmimɛ ɔmɛ he wami, nɛ a ye bua nyɛmimɛ nɛ a hao ɔ. (1 Pet. 5:2) Ke oslaa ko ba a, kekleekle ɔ, e sa nɛ asafo mi nikɔtɔma amɛ nɛ a hyɛ kaa nyɛmimɛ ɔmɛ tsuo ngɛ slɔkee nɛ a ngɛ niye ní, tade, kɛ hwɔ he. Se ngɛ nyɔhiɔ komɛ a se ɔ, loloolo ɔ, e he maa hia kaa a wo nyɛmimɛ ɔmɛ he wami kɛ je Baiblo ɔ mi, nɛ́ a je suɔmi kpo kɛ tsɔɔ mɛ. (Yoh. 21:15) Nyɛminyumu Harold sɔmɔɔ kaa Asafo ɔ Ní Tsumi Kɔni ɔ Ajla Toli ɔmɛ a kpɛti nɔ kake. E kɛ nyɛmimɛ fuu nɛ a kɛ oslaahi kpe ɔ sɛɛ ní. E de ke: “E ma he be loko a ma je ngɛ a juɛmi mi. Bɔɔbɔɔbɔɔ ɔ, a ma nyɛ ma je ngɛ a juɛmi mi, se ke a suɔlɔ ko gbo, aloo a nɔ́ ko nɛ e he jua wa puɛ, aloo si fɔfɔɛ ko nɛ a ya je mi ɔ ngɛ oslaa a, eko ɔ, a hɛ be nɔ jee. Ke a kai ní nɛ ɔmɛ ɔ, e ma nyɛ ma ha nɛ a ma bɔni aywilɛho yemi ekohu. Se lɔ ɔ tsɔɔ we kaa a be hemi kɛ yemi. Jã nɛ nihi tsuo nɛ a kɛ si fɔfɔɛhi kaa jã kpe ɔ hu maa nu he.” Asafo mi nikɔtɔmahi kɛ ga womi nɛ ji “nyɛɛ kɛ nihi nɛ a ngɛ ya foe ɔ nɛ fo” ɔ tsuɔ ní.—Rom. 12:15. w22.12 22 ¶1; 24-25 ¶10-11

Yehowa jeɔ mi mi himi mi nɛ e kɛ mumi klɔuklɔu ɔ yeɔ bua wɔ konɛ wa nyɛ nɛ waa pee nɔ́ nɛ da. Ke wa kaseɔ Mawu Munyu ɔ, lɔ ɔ tsɔɔ kaa wa suɔ nɛ Mawu mumi ɔ nɛ kudɔ wɔ. Ke wa ya wa kpe ɔmɛ ɔ, mumi klɔuklɔu ɔ yeɔ bua wɔ hulɔ. Ngɛ wa kpe nɛ ɔmɛ a sisi ɔ, waa kɛ wa nyɛmimɛ nyumuhi kɛ yihi nɛ mɛ hu a ngɛ mɔde bɔe kaa a maa pee nɔ́ nɛ da a bɔɔ, nɛ lɔ ɔ woɔ wɔ he wami. (Heb. 10:​24, 25; 13:7) Jehanɛ se hu ɔ, ke wa ngɛ gbɔjɔmi ko nɛ wa je wa tsui mi kɛ sɔle ha Yehowa a, e ma ha wɔ e mumi klɔuklɔu ɔ konɛ waa ya nɔ nɛ waa hwu kɛ si jamɛ a gbɔjɔmi ɔ. Eko ɔ, ní nɛ ɔmɛ nɛ wa maa pee ɔ be hae nɛ wa kpa akɔnɔ yayahi nami mohu lɛɛ, se e maa ye bua wɔ nɛ a ko ná wa nɔ he wami. Ke wa bɔni níhi nɛ ma ha nɛ huɛ bɔmi kpakpa maa hi waa kɛ Yehowa wa kpɛti ɔ peemi ɔ, e sa nɛ waa ya nɔ nɛ waa pee jã konɛ waa pee nɔ́ nɛ da be fɛɛ be. w23.01 11 ¶13-14

E ngɛ mi kaa Baiblo ɔ pi womi nɛ tsɔɔ wɔ níhi tutuutu nɛ e sa nɛ waa pee konɛ wa ná nɔmlɔ tso mi he wami, loo niye ní pɔtɛɛ nɛ e sa nɛ waa ye, se e haa nɛ wa leɔ Yehowa susumi ngɛ ní nɛ ɔmɛ a he. Kaa nɔ hyɛmi nɔ́ ɔ, Baiblo ɔ wo wɔ ga kaa ‘wa je níhi nɛ yeɔ nɔ awi kɛ je wa nɔmlɔ tso ɔ mi kɛ fɔ he.’ (Fiɛɛ. 11:10) Baiblo ɔ tsɔɔ kaa wa ko ye ní kɛ be nɔ loo waa nu dã kɛ be nɔ, ke pi jã a, wa maa ye wa nɔmlɔ tso ɔ awi, nɛ wa ma nyɛ ma gbo po. (Abɛ 23:20) Yehowa hyɛɔ blɔ kaa wa maa ye wa he nɔ, konɛ wa ko ye ní loo waa nu ní kɛ be nɔ (1 Kor. 9:25) Ke wa kɔɔ nɔ́ se ɔ, e maa ye bua wɔ nɛ waa mwɔ yi mi kpɔhi nɛ tsɔɔ kaa wa bua jɔ nike ní nɛ ji wami nɛ Mawu kɛ ha wɔ ɔ he. (La 119:​99, 100; Abɛ 2:11) Kaa nɔ hyɛmi nɔ́ ɔ, loko wa maa ye niye ní ko ɔ, wa susuɔ he saminya. Enɛ ɔ he ɔ, ke wa suɔ niye ní pɔtɛɛ ko, se wa le kaa jamɛ a niye ní ɔ hí ha wa nɔmlɔ tso ɔ, e sɛ nɛ waa ye. Jehanɛ hu ɔ, ke wa hwɔɔ mahe bɔ nɛ sa, wa gbɔleɔ wa kpɔ mi be fɛɛ be, wa he tsɔ, nɛ wa dlaa wa wehi a mi saminya a, lɔ ɔ tsɔɔ kaa wa hɛ mi ka si. w23.02 21 ¶6-7

Ke o ngɛ Baiblo ɔ kanee ɔ, mɛni maa ye bua mo konɛ o hla juetlihi nɛ ngɛ mi ɔ? Mo susu nɔ́ nɛ 2 Timoteo 3:​16, 17 ɔ de ɔ he nɛ o hyɛ. Mo kadi kaa ‘Ngmami ɔ tsuo he ngɛ se nami’ kɛ ha (1) ní tsɔɔmi, (2) kɛ ha hɛ mi kami, (3) kɛ ha níhi a dlami tlɔmɔɔ, (4) kɛ ha tsɔsemi. O ma nyɛ ma ná ní eywiɛ nɛ ɔmɛ a he se ngɛ Baiblo mi womihi nɛ o pɔɛ kanemi ɔ po a mi. Mo susu Baiblo mi sane nɛ o ngɛ kanee ɔ he konɛ o na nɔ́ nɛ e tsɔɔ mo ngɛ Yehowa, e yi mi tomi kɛ e sisi tomi mlaahi a he. Mo susu bɔ nɛ Baiblo mi sane ɔ ma nyɛ ma kã nɔ hɛ mi ha a he. Moo hyɛ bɔ nɛ Baiblo ɔ ma nyɛ maa ye bua mo nɛ o na su yayahi nɛ o ngɛ, kɛ bɔ nɛ o ma plɛ kɛ yu o he ngɛ su nɛ ɔmɛ a he ha konɛ o ya nɔ nɛ o ye Yehowa anɔkuale. Mo pue o yi mi tɛ ngɛ bɔ nɛ a kɛ Baiblo ɔ ma nyɛ ma dla níhi loo a kɛ ma nyɛ ma dla susumi ko nɛ dɛ ɔ he. E ma nyɛ maa pee susumi nɛ nɔ ko nɛ o kɛ lɛ kpe ngɛ fiɛɛmi mi ɔ hɛɛ. Jehanɛ hu ɔ, moo hyɛ kaa o maa na bɔ nɛ jamɛ a ngmami ɔ ma nyɛ ma tsɔse mo ha konɛ o na níhi kaa bɔ nɛ Yehowa naa níhi ɔ. Ke oti eywiɛ nɛ ɔmɛ ngɛ o juɛmi mi ɔ, e maa ye bua mo nɛ o maa na Ngmami ɔ mi juetlihi nɛ ma ha nɛ o ná o Baiblo kanemi ɔ he se wawɛɛ. w23.02 11 ¶11

Gbami ko nɛ ngɛ Daniel womi ɔ mi ɔ tu be kpaago ko he munyu. Gbami nɛ ɔ tsɔɔ kaa ke jamɛ a be kpaago ɔ ba nyagbe ɔ, Yesu ma bɔni matsɛ yemi. Anɛ wa ma nyɛ maa le be nɛ Yesu ba pee Matsɛ ɔ lo? (Dan. 4:​10-17) ‘Be kpaago’ ɔ daa si kɛ ha jeha 2,520. Be nɛ ɔ je sisi ngɛ jeha 607 loko a fɔ Kristo. Jamɛ a jeha a nɛ Babilon bi ɔmɛ je nyagbe matsɛ nɛ e hi Yerusalem ɔ kɛ je Yehowa matsɛ sɛ ɔ nɔ ɔ nɛ. Be nɛ ɔ ba nyagbe ngɛ jeha 1914 ngɛ Kristo fɔmi se, benɛ Yehowa wo “nɔ nɛ e sa,” nɛ ji Yesu matsɛ ngɛ Mawu Matsɛ Yemi ɔ nya. (Eze. 21:​25-27) Kɛ gbami nɛ ɔ maa ye bua wɔ ha kɛɛ? Ke wa nu gbami nɛ kɔɔ ‘be kpaago’ ɔ he ɔ sisi ɔ, e maa ye bua wɔ konɛ wa ná nɔ mi mami kaa Yehowa yeɔ e si womi ɔmɛ a nɔ ngɛ be nya. Yehowa to kaa e maa wo Yesu Matsɛ ngɛ be pɔtɛɛ ko mi. Nɛ benɛ jamɛ a a be ɔ su ɔ, e pee jã. Enɛ ɔ he ɔ, wa ngɛ nɔ mi mami kaa e ma ha e gbami kpahi nɛ piɛ ɔ hu maa ba mi ngɛ be nɛ e to ɔ nya. Ngɛ anɔkuale mi ɔ, Yehowa ligbi ɔ ‘be se kpɛe!’—Hab. 2:3. w22.07 3 ¶3-5