November

E sɛ kaa munyuhi nɛ sɛ nɛ je Kristofo no ko nya. Se nɔ jɛmi munyu komɛ ngɛ nɛ a yɔsemi yee, nɛ e sa nɛ waa hyɛ nɛ hi nɛ wa ko ngɔ kɛ tsu ní. Kaa nɔ hyɛmi nɔ́ ɔ, e sa nɛ waa hyɛ saminya konɛ wa ko tu munyu kɛ si nihi nɛ a je ma kpahi, aloo wɛtso kpahi a mi, kɛ nihi nɛ e slo a kusumi. Jehanɛ hu ɔ, e sɛ nɛ waa tu munyuhi nɛ dɔɔ nɔ. O kɛ o munyu tumi nɛ wo ni kpahi he wami. Moo pee klaalo kaa o ma je nihi a yi mohu pe nɛ o maa tu a he munyu nyanyaanya. Israel bi ɔmɛ ná he blɔhi fuu nɛ a kɛ maa na Mawu si, se a pɔɔ níhi a he munyu tumi nyanyaanya mohu. Ke wa pɔɔ níhi a he munyu tumi nyanyaanya a, e ma nyɛ ma sã ni kpahi. O ma kai kaa benɛ slaali nyɔngma amɛ kɛ amaniɛ bɔmi nɛ sɛ ba a, ‘Israel ma mluku ɔ tsuo hɔɔ nya si ngɔ wo Mose he.’ (4 Mose 13:31–14:4) Se ke wa jeɔ ni kpahi a yi ɔ, e ma ha nɛ a bua maa jɔ. Lɔ ɔ he ɔ, mo hla blɔ slɔɔtohi a nɔ nɛ o maa gu kɛ je nihi a yi. w22.04 8 ¶16-17

Kɛ je blema a, Yehowa ye bua nihewi kɛ yihewi fuu nɛ a ba pee e huɛmɛ. Yehowa ma nyɛ maa ye bua o bimɛ ɔmɛ hulɔ konɛ huɛ bɔmi kpakpa nɛ hi a kɛ lɛ a kpɛti ke a suɔ nɛ a maa pee jã. (1 Kor. 3:​6, 7) Ke o bimɛ ɔmɛ sume nɛ a kɛ a tsui tsuo nɛ sɔmɔ Yehowa po ɔ, e maa ya nɔ ma je suɔmi kpo kɛ tsɔɔ mɛ. (La 11:4) Ke a pee nɔ́ ko nɛ tsɔɔ kaa a ngɛ “su kpakpa” a, e pee klaalo kaa e maa ye bua mɛ nɛ a ba pee e huɛmɛ. (Níts. 13:48; 2 Kron. 16:9) E ma nyɛ maa ye bua mo konɛ o tu munyu nɛ sa ngɛ be nɛ sa mi loo ngɛ be nɛ e sa nɛ o bimɛ ɔmɛ nɛ a nu jamɛ a munyu ɔ mi. (Abɛ 15:23) Aloo eko ɔ, e ma ha nɛ nyɛminyumu ko loo nyɛmiyo ko nɛ ngɛ asafo ɔ mi ɔ nɛ e ná a he bua jɔmi nɛ e ye bua mɛ. Ke a wa po ɔ, Yehowa ma nyɛ maa ya nɔ ma kai mɛ nɔ́ ko nɛ o tsɔɔ mɛ be ko nɛ be ɔ. (Yoh. 14:26) Ke o ya nɔ nɛ o kɛ o munyu tumi kɛ o ní peepee tsɔse o bimɛ ɔ, Yehowa maa jɔɔ mo. w22.04 21 ¶18

Akɛnɛ Satan nyɛ we nɛ e ya hiɔwe hu he je ɔ, e ngɛ Mawu sɔmɔli nɛ a pɔ mɛ nu nɛ a ngɛ zugba a nɔ ɔ tuae. Nimli nɛ ɔmɛ ji Mawu Matsɛ Yemi ɔ mi nane mi dali nɛ a hɛɛ “Yesu he odase yemi ní tsumi ɔ mi ɔ.” (2 Kor. 5:20; Efe. 6:​19, 20) Ngɛ jeha 1918 ɔ mi ɔ, a nuu nyumuhi kpaanyɔ nɛ a nyɛɛɔ asafo ɔ hɛ mi ɔ nɛ a wo mɛ tsu, nɛ a tsɔɔ kaa a ma ha nɛ a ye jeha babauu ngɛ tsu womi ɔ mi. E ngɛ kaa nɔ́ nɛ a tsi nihi nɛ a pɔ mɛ nu ɔ a ní tsumi ɔ nya loo “a gbe” mɛ. (Kpoj. 11:​3, 7-11) Se ngɛ jeha 1919 sisije ɔ, a je nyɛmimɛ nyumu nɛ ɔmɛ kɛ je tsu womi mi, nɛ pee se ɔ, a ngmɛɛ a sane ɔ he kulaa. Oya nɔuu nɛ nyɛmimɛ nɛ ɔmɛ bɔni Matsɛ Yemi ní tsumi ɔ hɛ mi nyɛɛmi ekohu. Se lɔ ɔ ha we nɛ Satan nɛ kpa Mawu we bi tuami. Kɛ je jamɛ a be ɔ mi kɛ ma a, Satan ngɔ si temi kɛ womi kɛ ba Mawu we bi a nɔ kaa “pa.” (Kpoj. 12:15) Ngɛ anɔkuale mi ɔ, “hiɛ ɔ ji he nɛ e biɔ si fimi kɛ hemi kɛ yemi” ngɛ wa ti nɔ fɛɛ nɛ blɔ fa mi.—Kpoj. 13:10. w22.05 5-6 ¶14-16

Ngɛ nina mi ɔ, Yohane na kuu enyɔ nɛ a fĩɔ Yehowa nɔ yemi ɔ se, nɛ a ma ná neneene wami hwɔɔ se. Kekleekle kuu ɔ ji nimli 144,000. A hla mɛ kɛ je zugba a nɔ konɛ a ya piɛɛ Yesu he kɛ ye Matsɛ ngɛ hiɔwe. A maa piɛɛ e he kɛ ye zugba a nɔ. (Kpoj. 5:​9, 10; 14:​3, 4) Ngɛ nina a mi ɔ, Yohane na mɛ nɛ a kɛ Yesu daa si ngɛ hiɔwe Zion Yoku ɔ nɔ. (Kpoj. 14:1) A bɔni nimli akpehi abɔ hlami kɛ je bɔfo ɔmɛ a be ɔ mi kɛ ba si amlɔ nɛ ɔ, konɛ a ná yibɔ nɛ ji 144,000 ɔ. (Luka 12:32; Rom. 8:17) Se a de Yohane ngɛ nina mi kaa nihi nɛ a pɔ mɛ nu ɔ a kpɛti nihi bɔɔ ko pɛ nɛ a maa hi wami mi ngɛ zugba a nɔ ngɛ nyagbe ligbi ɔmɛ a mi. (Kpoj. 12:17) Lɔ ɔ se ɔ, ngɛ amanehlu ngua mi ɔ, a maa ngɔ nihi nɛ a piɛ ɔ kɛ ho hiɔwe ya kɛ ya piɛɛ nimli 144,000 ɔ a kpɛti nihi nɛ a ye anɔkuale nɛ a gbo momo ɔ a he. A maa piɛɛ Yesu he kɛ ye matsɛ ngɛ Mawu Matsɛ Yemi ɔ mi.—Mat. 24:31; Kpoj. 5:​9, 10. w22.05 16 ¶4-5

Yesu tsɔɔ e kaseli ɔmɛ kaa a ná juɛmi nɛ da ngɛ mɛ nitsɛmɛ a he. Yesu de mɛ ke: “Nyɛ yi bwɔmi tete po a kane lɛ tsuo.” (Mat. 10:30) Munyu nɛ ɔ woɔ nɔ bua wawɛɛ, titli ɔ, ke wa ná we juɛmi nɛ da ngɛ wɔ nitsɛmɛ wa he. Enɛ ɔ tsɔɔ kaa wa he jua wa ha wa hiɔwe Tsɛ ɔ. Ke Yehowa ngmɛ wɔ blɔ kaa wa sɔmɔ lɛ ejakaa e suɔ nɛ wa ná neneene wami ngɛ e je ehe ɔ mi ɔ, e sɛ nɛ wa susu kaa Yehowa susumi ɔ dɛ. Maa pee jeha 15 nɛ be ɔ, Hwɔɔmi Mɔ ɔ wo wɔ he wami kaa e sa nɛ wa ná juɛmi nɛ da ngɛ wɔ nitsɛmɛ wa he. E de ke: “E sɛ nɛ waa ngɔ wa juɛmi kɛ ma wɔ nitsɛmɛ wa nɔ tsɔ, nɛ lɔ ɔ nɛ ha nɛ wa wo wa he nɔ; nɛ e sɛ nɛ wa susu kaa wa he hia we nɛ lɔ ɔ nɛ jɔ̃ wa kɔni mi. Mohu ɔ, e sa nɛ waa bɔ mɔde kaa wa ma ná juɛmi nɛ da ngɛ wɔ nitsɛmɛ wa he, nɛ waa le níhi nɛ wa ma nyɛ maa pee kɛ níhi nɛ wa be nyɛe maa pee.” w22.05 24-25 ¶14-16

Mɛni wa ti nɔ fɛɛ nɔ ma nyɛ maa pee konɛ kake peemi nɛ ya nɔ nɛ hi asafo ɔ mi? E sa nɛ waa di tue mi jɔmi se. (Mat. 5:9; Rom. 12:18) Be fɛɛ be nɛ wa maa pee níhi nɛ ma ha nɛ tue mi jɔmi maa hi waa kɛ wa nyɛmimɛ nɛ waa kɛ mɛ ngɛ asafo ɔ mi ɔ wa kpɛti ɔ, e haa nɛ mumi mi paradeiso ɔ mi peeɔ fɛu wawɛɛ. Wa hɛ nɛ ko je nɔ kaa Yehowa lɛ gbla nihi nɛ a ngɛ mumi mi paradeiso ɔ mi ɔ tsuo kɛ ba anɔkuale jami mi. (Yoh. 6:44) Hyɛ bɔ nɛ Yehowa bua maa jɔ ha ke e na kaa e sɔmɔli nɛ a he jua wa a, a ti nɔ fɛɛ nɔ ngɛ mɔde bɔe wawɛɛ kaa e maa di tue mi jɔmi se, nɛ́ e baa kake peemi nɛ ngɛ wa kpɛti ɔ yi! (Yes. 26:3; Hag. 2:7) Kɛ wa ma plɛ kɛ ná ní nɛ ɔmɛ a he se kɛ pi si ha kɛɛ? Ke wa pue wa yi mi tɛ ngɛ níhi nɛ wa kase ngɛ Baiblo ɔ mi ɔ he ɔ, wa ma ná he se. Jã nɛ wa maa pee ɔ ma ha nɛ wa ná Kristofohi a suhi nɛ ma ha nɛ wa je “nyɛmi suɔmi” kpo, nɛ ‘waa suɔ wa sibi a sane’ ngɛ asafo ɔ mi.—Rom. 12:10. w22.11 12-13 ¶16-18

Ke wa kplɛɛ nɔ kaa Yehowa ngɔ wa yayami ɔ kɛ ke wɔ ɔ, wa ma ná “he jɔmi behi,” nɛ tsɔɔ kaa wa tue mi maa jɔ wɔ nɛ wa ma ná he nile kpakpa. Adesa ko be nyɛe maa ngɔ tɔmi kaa jã kɛ ke wɔ. “Yehowa nitsɛ” lɛ maa ngɔ jamɛ a tɔmi ɔ kɛ ke wɔ. (Níts. 3:19) Ke Yehowa ngɔ wa tɔmi ɔ kɛ ke wɔ ɔ, e haa nɛ waa kɛ lɛ peeɔ huɛ ekohu kaa nɔ́ nɛ wa pee we yayami ko gblegbleegble. Ke Yehowa ngɔ wa tɔmi ɔ kɛ ke wɔ ɔ, e kai we hu, nɛ e yɛ nɔ nɛ e gblaa wa tue ngɛ jamɛ a tɔmi ɔ he. (Yes. 43:25) “Kaa bɔ nɛ beleku kɛ bonyoku a kpɛti blɔ kɛ ɔ” jã nɛ Yehowa jeɔ wa he tɔmi ɔmɛ kɛ yaa tsitsaa lokoo. (La 103:12) Ke wa susu bɔ nɛ Yehowa ngɔɔ yayami kɛ kee ha a he ɔ, wa bua jɔɔ, nɛ wa nya kpɛɔ wa he. (La 130:4) Ke wa yayami ɔ kle jio, e kle we jio, tsa pi lɔ ɔ nɔ nɛ Yehowa daa nɛ ngɔɔ kɛ keɔ wɔ. Akɛnɛ Yehowa ji wa Bɔlɔ, wa Mlaa Wolɔ, kɛ Kojolɔ he je ɔ, lɛ nɛ e tsɔɔ kaa e kɛ yayami maa ke aloo e kɛ be kee. w22.06 5 ¶12-14

Yehowa ha nihi tsuo nɛ a suɔ lɛ ɔ hɛ nɔ kami kpakpa. E be kɛe nɛ e ma ha nɛ hiɔ, aywilɛho yemi kɛ gbenɔ se maa po. (Kpoj. 21:​3, 4) E maa ye bua “nihi nɛ a he jɔ” nɛ a ngɔɔ a hɛ kɛ fɔɔ e nɔ ɔ konɛ a tsake zugba a kɛ pee paradeiso. (La 37:​9-11) E ma ha nɛ huɛ bɔmi kpakpa nɛ hi e kɛ wa ti nɔ fɛɛ nɔ wa kpɛti. Wa bua maa jɔ huɛ bɔmi nɛ ɔ he po pe huɛ bɔmi nɛ ngɛ waa kɛ lɛ wa kpɛti mwɔnɛ ɔ. Enɛ ɔ ji hɛ kɛ nɔ fɔmi nɛ se be! Se mɛni he je nɛ wa heɔ yeɔ kaa Mawu si womi ɔmɛ maa ba mi ɔ? Ejakaa nɔ́ fɛɛ nɔ́ nɛ Yehowa deɔ ɔ, e peeɔ. Enɛ ɔ tsɔɔ kaa wa ngɛ yi mi tomi kpakpa he je nɛ wa ma nyɛ maa ‘ngɔ wa hɛ kɛ fɔ Yehowa nɔ.’ (La 27:14) Ke waa kɛ bua jɔmi kɛ tsui si tomi hyɛ Mawu blɔ konɛ e si womi ɔmɛ nɛ ba mi ɔ, e tsɔɔ kaa wa ngɔ wa hɛ kɛ fɔ e nɔ. (Yes. 55:​10, 11) Nyɛ ha nɛ waa ya nɔ nɛ waa ye Yehowa anɔkuale, nɛ wa ná nɔ mi mami kaa e maa wo nihi nɛ a “ngɛ e se blɔ hlae wawɛɛ ɔ” hiɔ. w22.06 20 ¶1; 25 ¶18

Yehowa ji weku ɔ Yi, nɛ wa ma nyɛ ma ná nɔ mi mami kaa e maa pee nɔ́ fɛɛ nɔ́ nɛ e de weku yihi kaa a pee nɛ e ha nɛ a ngma ngɛ 1 Timoteo 5:8 ɔ. Ke wa ná nɔ mi mami kaa Yehowa suɔ wɔ nɛ e suɔ wa weku ɔ, wa be gbeye yee kaa wa nine maa su níhi nɛ wa hia a nɔ. (Mat. 6:​31-33) Yehowa suɔ kaa e ma ha wɔ wa hiami níhi. E ji Tsɛ nɛ ngɛ suɔmi nɛ́ e haa nɔ nɔ́ faa. Benɛ e bɔ zugba a, e ha wɔ níhi fuu, tsa pi níhi nɛ ma ha nɛ waa hi wami mi ɔ pɛ nɛ e ha wɔ. E bɔ ní slɔɔtohi nɛ ma ha wɔ bua jɔmi ngɛ zugba a nɔ. (1 Mose 2:9) Ke be komɛ ɔ, wa nine su nɔ́ nɛ wa hia a nɔ ɔ, wa ma nyɛ ma ná nɔ mi mami kaa Yehowa nɛ to he blɔ nya kɛ ha wɔ, nɛ lɔ ɔ he je nɛ wa nine su nɔ ɔ nɛ. (Mat. 6:11) E sa nɛ wa kai be fɛɛ be kaa níhi nɛ Yehowa haa wɔ ɔmɛ a he jua wa pe níhi nɛ waa kɛ sãa afɔle. Nɛ hwɔɔ se hu ɔ, e maa ha wɔ neneene wami.—Yes. 65:​21, 22. w22.06 15 ¶7-8

Tsa pi ni hehi nɛ a ngɛ munyu ɔ he bua jɔmi ɔ pɛ nɛ e he hia nɛ a kase Baiblo ɔ mi níhi nɛ a mi kuɔ ɔ nɛ a le Yehowa he ní fuu. E sa nɛ wɔ tsuo waa pee jã. Bɔfo Paulo ngma kaa, ke waa kɛ níhi nɛ wa kaseɔ ngɛ Baiblo ɔ mi ɔ tsu ní ɔ, e maa ye bua wɔ nɛ wa maa “le slɔɔto nɛ ngɛ nɔ́ nɛ da kɛ nɔ́ nɛ dɛ tsuo a kpɛti.” Ngɛ be nɛ mi wa nɛ ɔ mi ɔ, e he ma nyɛ maa wa kaa waa kɛ Yehowa mlaahi ma tsu ní ejakaa nihi fuu a je mi bami puɛ wawɛɛ. Se Yesu hyɛɔ kaa wa nine maa su mumi mi niye ní nɛ he wami ngɛ mi nɛ ma ha nɛ wa hemi kɛ yemi mi nɛ wa a nɔ. Wa náa niye ní nɛ ɔ ngɛ Mawu Munyu nɛ ji Baiblo ɔ nɛ a je mumi mi kɛ ngma a mi. Wɔ hu wa woɔ Mawu biɛ ɔ hɛ mi nyami kaa bɔ nɛ Yesu pee ɔ. (Yoh. 17:​6, 26) Kaa nɔ hyɛmi nɔ́ ɔ, ngɛ jeha 1931 ɔ, wa da Ngmami ɔ nɔ nɛ wa ngɔ biɛ nɛ ji Yehowa Odasefohi ɔ kɛ fɔ wa nɔ. Enɛ ɔ tsɔɔ bɔ nɛ Mawu biɛ ɔ he hia wɔ ha, e tsɔɔ hu kaa wa suɔ nɛ nihi nɛ a le wɔ kɛ wa hiɔwe Tsɛ ɔ biɛ ɔ. (Yes. 43:​10-12) Jehanɛ hu ɔ, a ngɔ Mawu biɛ kɛ wo hehi nɛ e sa kaa e hi ngɛ New World Translation of the Holy Scriptures ɔ mi. w22.07 11 ¶11-12

Sane kpakpa nɛ kɔɔ Mawu Matsɛ Yemi ɔ he ɔ hu piɛɛ Baiblo ɔ mi anɔkuale ɔ he. Yesu ngɔ Matsɛ Yemi ɔ he anɔkuale ɔ kɛ to juetli nɛ a kɛ laa he. E de ngɛ Mateo 13:44 ɔ ke: “Hiɔwe Matsɛ Yemi ɔ ngɛ kaa juetli ko nɛ a ngɔ kɛ laa ngɛ ngmɔ mi, nɛ nyumu ko ya na nɛ e ngɔ kɛ laa; nɛ akɛnɛ e bua jɔ he je ɔ, e ya nɛ e ya jua nɔ́ fɛɛ nɔ́ nɛ e ngɛ ɔ nɛ e kɛ ya he jamɛ a ngmɔ ɔ.” Mo kadi kaa pi nɛ nyumu ɔ ngɛ juetli ɔ hlae. Se benɛ e na a, e ngɔ níhi fuu kɛ sã afɔle konɛ e nine nɛ su nɔ. Ngɛ anɔkuale mi ɔ, e jua e níhi tsuo nɛ e ngɛ ɔ. Mɛni he je? Ejakaa e le kaa juetli ɔ he jua wa wawɛɛ. Nɔ́ ko be je nɛ ɔ mi nɛ e he jua wa nɛ e haa wɔ bua jɔmi pe Yehowa nɛ wa ngɛ sɔmɔe ɔ, ejakaa wa ngɛ hɛ kɛ nɔ fɔmi kaa wa ma ná neneene wami hwɔɔ se ngɛ Mawu Matsɛ Yemi ɔ sisi. Huɛ bɔmi nɛ ngɛ waa kɛ Yehowa wa kpɛti ɔ he jua kulaa pee nɔ́ kpa ko nɛ waa kɛ maa sã afɔle. Wa suɔ nɛ waa “sa e hɛ mi kɛ pi si.” Lɔ ɔ ji nɔ́ nɛ ma ha wɔ bua jɔmi pe kulaa.—Kol. 1:10. w22.08 15 ¶8-9; 17 ¶12

Mɛni blɔ nɔ Yosef gu kɛ le kaa Mawu naa gba puɛmi kaa e ji tɔmi agbo? Yosef kɛ Potifar yo ɔ sane ɔ ya nɔ jeha lafa enyɔ se loko Yehowa wo Israel bi ɔmɛ mlaa kaa a “ko puɛ gba.” (2 Mose 20:14) Se loko Yehowa maa wo mɛ mlaa nɛ ɔ, Yosef le kaa Yehowa kplɛɛ we gba puɛmi nɔ. Kaa nɔ hyɛmi nɔ́ ɔ, e le kaa Yehowa to blɔ nya kaa nyumu kake kɛ yo kake pɛ nɛ a sɛ gba si himi mi. Nɛ eko ɔ, e nu nɔ́ nɛ Yehowa pee kɛ po e nanakasowa Sara he piɛ si enyɔ sɔuu bɔ nɛ pee nɛ e ya nɔ nɛ e ye e huno ɔ anɔkuale ɔ he. (1 Mose 2:24; 12:​14-20; 20:​2-7) Ní nɛ ɔmɛ nɛ Yosef susu he ɔ ye bua lɛ nɛ e na nɔ́ nɛ da kɛ nɔ́ nɛ dɛ ngɛ Mawu hɛ mi. Akɛnɛ Yosef suɔ Mawu he je ɔ, atsinyɛ jemi ko be he kaa e bua jɔ Mawu dami mlaa amɛ a he, nɛ e fia e pɛɛ si kaa e maa ye mlaa nɛ ɔmɛ a nɔ. w22.08 26 ¶1-2

Be ko nɛ be ɔ, wa nu gbami nɛ ɔ sisi kaa e ji okadi peemi nɔ́ ko aloo mumi mi gbogboehi a si tlemi nɛ maa ya nɔ ngɛ nyagbe be nɛ ɔ mi. Se amlɔ nɛ ɔ, wa nu sisi kaa e ji gbogboehi a si tlemi nɛ maa ya nɔ ngɛ je ehe ɔ mi ɔ. Mɛni he je nɛ wa de jã a? A kɛ munyungu nɛ ji “zu” ɔ tsu ní ngɛ Hiob 17:16 hulɔ, nɛ e kɛ munyungu nɛ ji “gbeje” ɔ tsuo tsɔɔ nɔ́ kake. Enɛ ɔ maa nɔ mi kaa gbogboehi a si tlemi nɛ a tu he munyu ngɛ Daniel 12:2 ɔ, pi okadi peemi nɔ́ ko. Mohu ɔ, e ji gbogboehi a si tlemi nitsɛ nɛ maa ya nɔ ke nyagbe ligbi ɔmɛ ba nyagbe, nɛ́ Hamagedɔn ta a ba nyagbe. Mɛni nɛ Daniel 12:2 ngɛ tsɔe benɛ e de ke a ma tle ni komɛ si kɛ ya “neneene wami mi” ɔ? Enɛ ɔ tsɔɔ kaa ngɛ jeha 1,000 ɔ mi ɔ, nihi nɛ a ma tle mɛ si nɛ a ma ba le aloo a maa ya nɔ maa le Yehowa, nɛ a maa bu e kɛ Yesu tue ɔ, nyagbenyagbe ɔ, a ma ná neneene wami.—Yoh. 17:3. w22.09 21 ¶6-7

Munyu nɛ ɔ tsɔɔ we kaa Yehowa suɔ nɛ wa he nɔ fɛɛ nɔ ko waa ye kɛkɛ, mohu ɔ, ke nihi kɛ a ní peepee tsɔɔ kaa wa ma nyɛ maa ngɔ wa hɛ kɛ fɔ a nɔ ɔ, e sa nɛ wa he mɛ waa ye. Loko o ma ná bumi kɛ ha nɔ ko ɔ, e heɔ be. Jã kɛ̃ nɛ e heɔ be loko o ma nyɛ ma he nɔ ko maa ye. Mɛni o ma nyɛ maa pee konɛ o ná hemi kɛ yemi ngɛ o nyɛmimɛ ɔmɛ a mi? E sa nɛ o le mɛ saminya. O kɛ mɛ nɛ sɛɛ ní ngɛ asafo mi kpe sisi. Moo to blɔ nya nɛ o kɛ mɛ nɛ ya fiɛɛmi. Ná a he tsui, nɛ o ha nɛ a na kaa o heɔ mɛ yeɔ. Sisije ɔ, tsa pi nɔ́ fɛɛ nɔ́ nɛ o maa suɔ kaa o kɛ mɛ maa sɛɛ he ní akɛnɛ kpaako o ngɛ mɛ lee ɔ he je. Ke nyɛ huɛ bɔmi ɔ mi ngɛ wae ɔ, eko ɔ, o maa suɔ kaa o ma de mɛ bɔ nɛ o nuɔ he ha. (Luka 16:10) Se ke nyɛmi ko nɛ o he lɛ ye ɔ je o laami mi sane kpo ɔ, mɛni nɛ e sa nɛ o pee? O he nɛ ko sɔ kɛ po nyɛ huɛ bɔmi ɔ mi, mohu ɔ, ha nɔ ɔ be bɔɔ. Ko ha nɛ ni kpahi a ní peepee nɛ ha nɛ hemi kɛ yemi nɛ o ngɛ ngɛ o nyɛmimɛ a mi ɔ nɛ ba si. w22.09 4 ¶7-8

Asafo mi nɔkɔtɔma ko nɛ a tsɛɛ lɛ ke Miqueas nu he kaa asafo mi nikɔtɔmahi komɛ kɛ lɛ yi saminya. Se loloolo ɔ, e hɛ hi e he nɔ, nɛ e bɔ mɔde nɛ e ye e he nɔ. E sɔleɔ be fɛɛ be, nɛ e deɔ Yehowa konɛ e ye bua lɛ kɛ e mumi klɔuklɔu ɔ, nɛ́ e ha lɛ nyɛmi nɛ e kɛ da nya. Jehanɛ hu ɔ, e hla níhi nɛ kɔɔ e si fɔfɔɛ ɔ he ngɛ wa womi ɔmɛ a mi nɛ́ maa ye bua lɛ. Mɛni wa ma nyɛ maa kase ngɛ mi? Ke nyɛmi ko pee mo nɔ́ ko nɛ o bua jɔɛ he ɔ, moo pee kpoo, nɛ o bɔ mɔde nɛ o kudɔ o he numi loo o ye o he nɔ. Eko ɔ, o li si fɔfɔɛ mi nɛ nɔ ɔ ngɛ loko e tu munyu jã loo e pee e ní jã. Enɛ ɔ he ɔ, moo sɔle ha Yehowa nɛ e ye bua mo nɛ o na nɔ́ he je nɛ eko ɔ, nɔ ɔ pee jã loo e de jã. O maa na kaa o nyɛmi ɔ ji blɔ kaa e maa pee mo nɔ́ yaya ko, nɛ o ma nyɛ maa ngɔ e tɔmi ɔ kɛ ke lɛ. (Abɛ 19:11) Mo kai kaa Yehowa le o si fɔfɔɛ, nɛ e ma ha mo he wami nɛ o hia konɛ o kɛ da nya.—Fiɛɛ. 5:8. w22.11 21 ¶5

Moo hla huɛmɛ nɛ a suɔ Yehowa. Nihi nɛ o kɛ mɛ maa bɔ ɔ ma nyɛ maa ye bua mo nɛ o pee Kristofo no nɛ e nane pi si. (Abɛ 13:20) Julien nɛ amlɔ nɛ ɔ e ngɛ sɔmɔe kaa asafo mi nɔkɔtɔma a de ke: “Benɛ i wɛ ɔ, i kɛ nihi nɛ i kɛ mɛ yaa fiɛɛmi ɔ peeɔ huɛ. Huɛmɛ nɛ ɔmɛ ngɛ kã wawɛɛ. A ye bua mi nɛ i na kaa bua jɔmi ngɛ fiɛɛmi ní tsumi ɔ mi. . . . I ba yɔse kaa ye juami bi pɛ nɛ i kɛ mɛ bɔɔ ɔ ha nɛ i be huɛmɛ kpakpahi fuu.” Mɛni nɛ e sa nɛ o pee ke o yɔse kaa nyɛmi ko ngɛ asafo ɔ mi nɛ ke o kɛ lɛ bɔ ɔ, e ma ha nɛ huɛ bɔmi nɛ ngɛ o kɛ Yehowa nyɛ kpɛti ɔ ma puɛ? Paulo le kaa Kristofohi komɛ nɛ a hi si ngɛ kaseli ɔmɛ a be ɔ mi ɔ bɛ a je mi kaa Kristofohi, enɛ ɔ he ɔ, e bɔ Timoteo kɔkɔ kaa e yu e he ngɛ a he. (2 Tim. 2:​20-22) Huɛ bɔmi nɛ ngɛ waa kɛ Yehowa wa kpɛti ɔ he jua wa saminya. Wa bɔ wa he mɔde wawɛɛ loko wa nyɛ hɛ kɛ su Yehowa he, enɛ ɔ he ɔ, e sɛ nɛ wa ha nɛ nɔ́ ko nɛ e puɛ huɛ bɔmi nɛ ngɛ waa kɛ Yehowa wa kpɛti ɔ. w22.08 5-6 ¶13-15

Wa be kaa nihi nɛ a kɛ Mawu ga womihi tsu we ní ɔ. Wɔɔ lɛɛ wa suɔ Mawu kɛ e sisi tomi mlaa amɛ tsuo. Ke wa susu nɔ́ nɛ ba nihi nɛ a bu Yehowa mlaa a tue, kɛ nihi nɛ a bui tue ɔ a nɔ ɔ he ɔ, lɔ ɔ maa ye bua wɔ nɛ suɔmi nɛ wa ngɛ kɛ ha Mawu mlaa a mi maa wa. Mo susu nyagbahi nɛ nihi kɛ ba a nɔ, akɛnɛ a kua kaa a kɛ Yehowa ga womihi be ní tsue ɔ he nɛ o hyɛ. Kɛkɛ ɔ, mo susu bɔ nɛ mo hu o si himi pee kpakpa akɛnɛ o bu Mawu tue ɔ hu he nɛ o hyɛ. (La 32:​8, 10) Yehowa suɔ nɛ wɔ tsuo wa ná anɔkuale nile, se e nyɛ we nɔ ko nɔ kaa e kplɛɛ anɔkuale nile ɔ nɔ. Mohu ɔ, e tsɔɔ nɔ́ nɛ ke nihi bui anɔkuale nile tue ɔ, e ma nyɛ maa je mi kɛ ba. (Abɛ 1:​29-32) A ná a ní tsumi ɔ he “hiɔwo.” A maa na nɔ́ ngɛ a si himi mi, nɛ nyagbenyagbe ɔ, Yehowa ma kpata a hɛ mi. Jehanɛ ɔ, nihi nɛ a buɔ Yehowa tue, nɛ a kɛ e ga womi ɔmɛ tsuɔ ní ɔ, e wo mɛ si ke: “Nɔ tsuaa nɔ nɛ buɔ mi tue ɔ, e maa hi si ngɛ he jɔmi mi, nɛ e be gbeye yee kaa haomi ko maa ba e nɔ.”—Abɛ 1:33. w22.10 21 ¶11-13

Yehowa gbeye yemi ji kaa nɛ́ wa ma je bumi nɛ mi kuɔ kpo kɛ tsɔɔ lɛ, nɛ waa yu wa he ngɛ nɔ́ fɛɛ nɔ́ ko nɛ e sume ɔ he. (Abɛ 16:6) Lɔ ɔ tsɔɔ kaa wa yaa nɔ nɛ waa kɛ Yehowa mlaa nɛ kɔɔ nɔ́ nɛ da kɛ nɔ́ nɛ dɛ he ɔ tsuɔ ni kaa bɔ nɛ a ngma ngɛ e munyu nɛ ji Baiblo ɔ mi ɔ. (2 Kor. 7:1) Wa bua maa jɔ ke wa peeɔ níhi nɛ Yehowa suɔ, nɛ wa yu wa he kɛ je níhi nɛ e sume ɔ a he. (La 37:27; 97:10; Rom. 12:9) Wa le kaa Yehowa ngɛ he blɔ nɛ e tsɔɔ wɔ nɔ́ nɛ da kɛ nɔ́ nɛ dɛ, se e sa nɛ waa kplɛɛ nɔ kaa waa kɛ e mlaa amɛ ma tsu ní. (Rom. 12:2) Bɔ nɛ wa baa wa je mi ha a maa tsɔɔ kaa wa he ye kaa Yehowa mlaa amɛ nɛ waa kɛ ma tsu ní ɔ ma ha nɛ wa ná bua jɔmi ngɛ si himi mi. (Abɛ 12:28) Jã nɛ David hu nu he. E de ngɛ Yehowa he ke: ‘O tsɔɔ mi blɔ nɛ yaa wami mi ɔ. Lejɛ ɔ ngɛ o hɛ mi ɔ, ma ná bua jɔmi babauu; bua jɔmi ngɛ o hiɔ nɔ kɛ́ ya neneene.’—La 16:11. w22.10 8 ¶9-10

Yesu ná juɛmi nɛ da ngɛ lɛ nitsɛ e he nɛ e ba e he si. Benɛ Yesu ngɛ hiɔwe nɛ e bɛ zugba a nɔ lolo ɔ, e pee ní kpakpahi fuu kɛ sɔmɔ Yehowa. Mawu gu Yesu nɔ kɛ “bɔ ní kpahi tsuo nɛ ngɛ hiɔwe kɛ zugba a nɔ ɔ.” (Kol. 1:16) Benɛ a baptisi Yesu ɔ, e ngɛ heii kaa e ma kai níhi tsuo nɛ e pee benɛ e ngɛ e Tsɛ ɔ ngɔ ɔ. (Mat. 3:16; Yoh. 17:5) Se benɛ Yesu kai níhi nɛ e pee ɔ, e wo we e he nɔ. E pee we nɔ́ ko kɛ tsɔɔ kaa e hi pe nɔ ko. E de e kaseli ɔmɛ ‘kaa e bɛ zugba a nɔ nɛ a sɔmɔ lɛ, se e ba sɔmɔ mohu, konɛ e ngɔ e wami ngɔ ha, nɛ e kɛ he nihi fuu a yi wami.’ (Mat. 20:28) E ba e he si wawɛɛ, nɛ e pee we nɔ́ ko ngɛ lɛ nitsɛ e suɔmi nya. E pee nɔ hyɛmi nɔ́ kpakpa kɛ ha wɔ nɛ waa kase. w22.05 24 ¶13

Loko Yehowa maa mwɔ yi mi kpɔ kaa e kɛ yayami maa ke loo e kɛ be kee ɔ, e hyɛɔ ke ji yayami peelɔ ɔ je blɔ nɛ e pee nɔ́ nɛ e pee ɔ lo. Yesu ma oti nɛ ɔ nɔ mi ngɛ Luka 12:​47, 48. Ke nɔ ko je blɔ nɛ e pee nɔ́ ko nɛ e le kaa Yehowa bua jɔɛ he ɔ, e ji yayami nɛ hɛdɔ ngɛ he. Yehowa ma nyɛ maa mwɔ e yi mi kpɔ kaa e kɛ e yayami ɔ be lɛ kee. (Maak. 3:29; Yoh. 9:41) Anɛ wa ma nyɛ ma ná nɔ mi mami kaa Yehowa maa ngɔ yayami kaa jã kɛ ke wɔ lo? Ee, e ma nyɛ! Nɔ́ kpa ko hu ji, Yehowa hyɛɔ kaa yayami peelɔ ko tsake e tsui niinɛ lo. Ke a de ke nɔ ko tsake e tsui niinɛ ɔ, e tsɔɔ kaa “nɔ ɔ tsake e juɛmi, e su kɛ yi mi tomi he je nɛ e peeɔ nɔ́ ko.” E tsɔɔ hu kaa nɔ ɔ pia e he ngɛ nɔ́ yaya nɛ e pee ɔ he, nɛ e dɔ lɛ wawɛɛ kaa e nyɛ we nɛ e pee nɔ́ nɛ da. Ke nɔ ko tsake e tsui ɔ, tsa pi yayami nɛ e pee ɔ pɛ nɛ dɔɔ lɛ, se e dɔɔ lɛ hu kaa e ha nɛ huɛ bɔmi nɛ ngɛ e kɛ Yehowa a kpɛti ɔ puɛ, nɛ lɔ ɔ ha nɛ e pee yayami. w22.06 5-6 ¶15-17

Wa he nyɛli gbɛɔ nyɛmimɛ nyumuhi nɛ a ngɛ Yehowa asafo ɔ hɛ mi nyɛɛe ɔ a he lakpa munyuhi kɛ fĩaa. (La 31:13) A nuu nyɛmimɛ nyumuhi komɛ, nɛ a po a nya kaa a ji ojo fiali. Kristofohi nɛ a hi si ngɛ kaseli ɔmɛ a be ɔ mi ɔ hu kɛ si himi ko kaa jã kpe. Kaa nɔ hyɛmi nɔ́ ɔ, a po bɔfo Paulo nya, nɛ a wo lɛ tsu. Ni komɛ je bɔfo Paulo se benɛ a wo lɛ tsu ngɛ Roma a. (2 Tim. 1:​8, 15; 2:​8, 9) Mo susu bɔ nɛ Paulo kɔni mi ma jɔ̃ ha a he nɛ o hyɛ. E kɛ haomihi fuu kpe, nɛ e ngɔ e wami kɛ wo oslaa mi ngɛ a he je po. (Níts. 20:​18-21; 2 Kor. 1:8) E sɛ nɛ waa pee wa ní kaa nihi nɛ a yi bua Paulo ɔ! Enɛ ɔ he ɔ, e sɛ nɛ e pee wɔ nyakpɛ kaa Satan je e hɛ kɛ pi nyɛmimɛ nyumuhi nɛ a ngɛ asafo ɔ hɛ mi nyɛɛe ɔ. E suɔ nɛ nyɛmimɛ nyumu nɛ ɔmɛ nɛ a kpa Yehowa anɔkuale yemi, nɛ e suɔ nɛ e wo a he gbeye hulɔ. (1 Pet. 5:8) Yaa nɔ nɛ o ye bua o nyɛmimɛ ɔmɛ, nɛ o kɛ anɔkuale yemi nɛ fĩ a se.—2 Tim. 1:​16-18. w22.11 16-17 ¶8-11

E ma nyɛ maa ba kaa yayami peelɔ ɔ nɛ e tsake e tsui ɔ nɛ a ka lɛ ngɛ Yesu kasa nya ji Yuda no. Yuda bi ɔmɛ jaa Mawu kake pɛ, se nihi nɛ a ngɛ je ma amɛ a mi ɔ lɛɛ a jaa mawuhi fuu. (2 Mose 20:​2, 3; 1 Kor. 8:​5, 6) Kaa yayami peelɔ nɛ ɔ je je ma amɛ a mi ɔ, jinɛ eko ɔ, kaa bɔ nɛ mwɔnɛ ɔ ngmami ɔ tsɔɔ ɔ, sane nɛ e bi ɔ ko je ekpa kulaa. E ko bi ke: “Anɛ o yi mawu ɔmɛ gbeye kulaa lo?” Jehanɛ hu ɔ, pi nihi nɛ a je je ma amɛ a mi ɔ a ngɔ nɛ a tsɔ Yesu, mohu ɔ, a tsɔ lɛ “Israel we jijɔ ɔmɛ nɛ a laa amɛ a ngɔ.” (Mat. 15:24) Mawu ha nɛ Israel bi ɔmɛ le kaa e ma tle nihi nɛ a gbo ɔ si. Eko ɔ, yayami peelɔ nɛ e tsake e tsui ɔ le nɔ́ nɛ ɔ, nɛ nɔ́ nɛ e de ɔ tsɔɔ kaa e susu kaa Yehowa ma tle Yesu si nɛ e ba ye matsɛ ngɛ Mawu Matsɛ Yemi ɔ mi. Eko ɔ, e ngɛ hɛ kɛ nɔ fɔmi kaa ke e gbo ɔ, Mawu ma tle lɛ hu si. Akɛnɛ yayami peelɔ nɛ e tsake e tsui nɛ ɔ ji Yuda no he je ɔ, eko ɔ, e le Adam kɛ Hawa kɛ Paradeiso ɔ nɛ Yehowa ngɔ mɛ kɛ wo mi ɔ he sane. Lɔ ɔ he ɔ, eko ɔ, yayami peelɔ nɛ ɔ he ye kaa Paradeiso ɔ nɛ Yesu tu he munyu ngɛ Luka 23:43 ɔ maa pee abɔɔ ko nɛ ngɛ fɛu ngɛ zugba a nɔ.—1 Mose 2:15. w22.12 8-9 ¶2-3

Mawu mumi klɔuklɔu ɔ pɛ ji nɔ́ nɛ yeɔ bua wɔ nɛ wa nyɛɔ nɛ wa tsuɔ wa fiɛɛmi ní tsumi ɔ. Mɛni he je? Ejakaa Satan teɔ si kɛ woɔ wɔ wawɛɛ konɛ wa kpa fiɛɛmi. (Kpoj. 12:17) Nihi fuu susuɔ kaa Satan ngɛ he wami wawɛɛ, lɔ ɔ he ɔ, wa be nyɛe maa ye e nɔ kunimi. Se kɛ gu wa fiɛɛmi ní tsumi ɔ nɔ ɔ, wa ngɛ e nɔ kunimi yee! (Kpoj. 12:​9-11) Ngɛ mɛni blɔ nɔ? Ke waa kɛ wa he wo fiɛɛmi ní tsumi ɔ mi ɔ, lɔ ɔ tsɔɔ kaa wa ha we nɛ Satan nɛ wo wa he gbeye. Be fɛɛ be nɛ wa maa fiɛɛ ɔ, Satan nine nyɛɔ si. E ngɛ heii kaa Yehowa ngɔɔ e mumi ɔ kɛ yeɔ bua wɔ ngɛ fiɛɛmi ní tsumi ɔ mi, nɛ e bua jɔ ní tsumi nɛ wa ngɛ tsue ɔ he. (Mat. 5:​10-12; 1 Pet. 4:14) Wa na kaa Mawu mumi ɔ ma nyɛ maa ye bua wɔ konɛ wa nyɛ nɛ waa da nyagba saisaa nɛ waa kɛ maa kpe ngɛ wa fiɛɛmi ní tsumi ɔ mi ɔ nya. (2 Kor. 4:​7-9) Ke jã a, lɛɛ mɛni wa maa pee konɛ wa nine nɛ e nyɛ nɛ e su Mawu mumi ɔ nɔ daa? E sa nɛ waa sɔle daa, nɛ wa ná nɔ mi mami kaa Mawu maa bu wa sɔlemi tue. w22.11 5 ¶10-11

Wa jeɔ suɔmi kpo kɛ tsɔɔ wa nyɛmimɛ nyumuhi kɛ yihi hulɔ kɛ gu mɔde nɛ wa bɔɔ konɛ tue mi jɔmi nɛ hi waa kɛ mɛ wa kpɛti ɔ nɔ. Wa bɔɔ mɔde kaa wa maa kase bɔ nɛ Yehowa ngɔɔ tɔmi kɛ keɔ ha a. Ke Yehowa je e tsui mi faa nɛ e ngɔ e Bi ɔ kɛ ha ngɛ wa yayami ɔmɛ a he ɔ, anɛ e sɛ nɛ wɔ hu waa pee klaalo kaa wa maa ngɔ wa nyɛmimɛ ɔmɛ a tɔmihi kɛ ke mɛ lo? Wa sume nɛ waa pee kaa nyɔguɛ yiwutsotsɛ ɔ nɛ Yesu tu e he munyu ngɛ e nɔ́ he tomi nɔ́ ɔ mi ɔ. E ngɛ mi kaa nyɔguɛ nɛ ɔ nyɔmtsɛ ɔ ngɔ hiɔ babauu nɛ nyɔguɛ ɔ hɛɛ lɛ ɔ kɛ ke lɛ mohu lɛɛ, se nyɔguɛ ɔ lɛɛ e sume kaa e maa ngɔ hiɔ nyafii nɛ e nyɛmi nyɔguɛ ko hɛɛ lɛ ɔ kɛ ke lɛ. (Mat. 18:​23-35) Ke nyagba ko ba o kɛ nɔ ko nyɛ kpɛti ngɛ asafo ɔ mi ɔ, anɛ o ma nyɛ maa ya nɔ ɔ ngɔ kekle nɛ nyɛ ya dla nyɛ kpɛti loko o ya Kaimi ɔ lo? (Mat. 5:​23, 24) Ke o pee jã a, lɔ ɔ maa tsɔɔ kaa o suɔ Yehowa kɛ Yesu wawɛɛ. w23.01 29 ¶8-9

Blɔ kake nɔ nɛ asafo mi nikɔtɔma amɛ ma nyɛ maa gu kɛ le nyɛmimɛ ɔmɛ a hiami níhi ji kaa a ma bi mɛ sanehi nɛ be hae nɛ zo maa gbe mɛ. (Abɛ 20:5) Kaa nɔ hyɛmi nɔ́ ɔ, anɛ a ngɛ niye ní, tsopa kɛ ní kpahi nɛ he hia mɛ lo? Anɛ a ní tsumi ma nyɛ maa je a dɛ lo? Anɛ a ngɛ sika nɛ a kɛ maa wo a tsu he hiɔ lo? Ke amlaalo ɔ to blɔ nya ko kɛ ha yemi kɛ buami ɔ, anɛ a maa suɔ nɛ nɔ ko nɛ ye bua mɛ konɛ a nine nɛ su nɔ lo? Yehowa suɔ nɛ wɔ tsuo waa wo wa nyɛmimɛ ɔmɛ he wami nɛ waa ye bua mɛ. (Gal. 6:10) Ke nɔ ko be he wami nɛ wa pee nɔ́ nyafii ko po kɛ ye bua lɛ ɔ, e ma nyɛ maa wo lɛ he wami wawɛɛ. Jokuɛ wayoo ko ma nyɛ ma maa piɛɛ e fɔli a he kɛ ya slaa nyɛmi ko nɛ e be he wami. Yiheyo ko hu ma nyɛ ma ya he níhi loo e pee nɔ́ kpa ko kɛ ha nyɛmiyo ko. Nyɛmimɛ kpahi nɛ a ngɛ asafo ɔ mi ɔ hu ma nyɛ maa hoo ní kɛ ya ha nɔ ko nɛ e be he wami. Ke hiɔ ko gbɛ fĩa a, asafo mi nikɔtɔmahi ngɔɔ be babauu kɛ yeɔ bua nyɛmimɛ ɔmɛ. Nyɛmimɛ komɛ ngmaa sɛ womi kɛ ya haa asafo mi nikɔtɔma nɛ ɔmɛ kɛ woɔ mɛ he wami. E hi kaa ‘wa maa ya nɔ nɛ waa hi wa sibi he wami woe, nɛ waa hi wa sibi fiae kɛ hi si mae.’—1 Tɛs. 5:11. w22.12 22 ¶2; 23 ¶5-6

Saduki bi ɔmɛ le níhi nɛ ngɛ Baiblo mi womi enuɔ nɛ je Hebri Ngmami ɔ sisi ɔ mi saminya, se a ma a hɛ kɛ fɔ anɔkualehi nɛ a he hia nɛ a ngɛ jamɛ a womi ɔmɛ a mi ɔ nɔ. Kaa nɔ hyɛmi nɔ́ ɔ, benɛ a bi Yesu sane kɛ kɔ gbogboehi a si tlemi ɔ he ɔ, mo kadi heto nɛ e ha mɛ. E bi mɛ ke: “Anɛ nyɛ kane we ngɛ Mose womi ɔ mi kaa ngɛ mio tso ɔ he sane ɔ mi ɔ, Mawu de lɛ ke: ‘Imi ji Abraham Mawu kɛ Isak Mawu kɛ Yakɔb Mawu ɔ’ lo?” (Maak. 12:​18, 26) E ngɛ mi kaa Saduki bi ɔmɛ kane gbogboehi a si tlemi ɔ he ní si abɔ mohu lɛɛ, se sane nɛ Yesu bi mɛ ɔ ha nɛ wa na kaa a ma a hɛ kɛ fɔ anɔkuale nɛ ngɛ Ngmami ɔ mi nɛ kɔɔ gbogboehi a si tlemi ɔ he ɔ nɔ. (Luka 20:38) Mɛni wa kaseɔ ngɛ Yesu kɛ Saduki bi ɔmɛ a sane ɔ mi? Ke wa kane Baiblo ngmami ko loo sane ko ngɛ Baiblo ɔ mi ɔ, e sa nɛ waa ngɔ wa juɛmi kɛ ma níhi tsuo nɛ wa ma nyɛ maa kase ngɛ mi ɔ nɔ. E sɛ nɛ waa ngɔ wa juɛmi kɛ ma níhi nɛ a sisi numi yi pɛ ɔ a nɔ. E sa nɛ waa ngɔ wa juɛmi kɛ ma anɔkualehi nɛ a mi kuɔ kɛ Baiblo sisi tomi mlaahi a nɔ hulɔ, ejakaa e biɔ mɔde bɔmi wawɛɛ loko no ko maa na. w23.02 11 ¶9-10

Odasefohi tsuo nɛ a tu a he munyu ngɛ mwɔnɛ ɔ ngmami ɔ mi ɔ kɛ kahi nɛ a mi wa kpe, se a ya nɔ nɛ a ye Yehowa anɔkuale ngɛ a si himi mi. (Heb. 11:​36-40) Anɛ si nɛ a fĩ kɛ a mɔde bɔmi ɔ pee yaka lo? Dɛbi kulaa! E ngɛ mi kaa ngɛ a si himi mi tsuo, a nɛ́ Mawu si womi ɔmɛ a mi bami mohu lɛɛ, se a ya nɔ nɛ a ngɔ a hɛ kɛ fɔ Yehowa nɔ. Nɛ akɛnɛ a le kaa Yehowa kplɛɛ a nɔ he je ɔ, a ngɛ nɔ mi mami kaa a maa na si womi ɔmɛ a mi bami. (Heb. 11:​4, 5) A nɔ hyɛmi nɔ́ ɔ ma nyɛ maa wo wɔ he wami nɛ waa ya nɔ nɛ waa ngɔ wa hɛ kɛ fɔ Yehowa nɔ. Mwɔnɛ ɔ, níhi ngɛ puɛe kulaa ngɛ je nɛ wa ngɛ mi nɛ ɔ mi. (2 Tim. 3:13) Satan ngmɛɛ we Mawu we bi a he, e yaa nɔ nɛ e kɛ kahi baa a nɔ. Ngɛ nyagbahi nɛ waa kɛ maa kpe hwɔɔ se ɔ tsuo se ɔ, nyɛ ha nɛ waa fia wa pɛɛ si kaa wa ma tsu babauu kɛ ha Yehowa, nɛ waa ngɔ “wa hɛ kɛ fɔ Mawu hɛ kalɔ ɔ nɔ.”—1 Tim. 4:10. w22.06 25 ¶17-18

Nɔ́ kake he je nɛ e sa nɛ waa bɔ mɔde kaa wa ma ná nɔmlɔ tso mi he wami kpakpa ji kaa a, e maa ye bua wɔ nɛ wa sɔmɔ Yehowa kɛ wa nyɛmi tsuo. (Maak. 12:30) Enɛ ɔ he ɔ, wa pee we níhi nɛ wa le kaa a maa ye wa nɔmlɔ tso ɔ awi. (Rom. 12:1) E ngɛ mi kaa wa bɔɔ mɔde kaa wa maa pee níhi nɛ ma ha nɛ wa ná nɔmlɔ tso mi he wami kpakpa mohu lɛɛ, se lɔ ɔ tsɔɔ we wa kaa wa be hiɔ nue gblee. Se akɛnɛ wa hɛ sa nike ní nɛ ji wami nɛ wa hiɔwe Tsɛ ɔ kɛ ha wɔ ɔ he je ɔ, wa peeɔ nɔ́ fɛɛ nɔ́ nɛ wa ma nyɛ konɛ wa ná nɔmlɔ tso mi he wami kpakpa. Hiɔ kɛ bwɔmi ma nyɛ ma ha nɛ e he nɛ wa ha wɔ kaa wa maa pee níhi fuu nɛ wa nyɛɔ peeɔ be ko nɛ be ɔ. Enɛ ɔ ma nyɛ ma ha nɛ wa kɔni mi nɛ jɔ̃ nɛ waa hao. Se e sa nɛ waa ya nɔ nɛ waa pee nɔ́ fɛ nɔ́ nɛ wa ma nyɛ kɛ hyɛ wa he nɔ saminya. Mɛni he je? Ejakaa ke wa bwɔ loo wa be he wami kaa mɛni po ɔ, wa ma nyɛ ma je Yehowa yi kaa bɔ nɛ Matsɛ David pee ɔ. Ke wa bwɔ loo wa be he wami kaa mɛni po ɔ, wa ngɛ bua jɔmi ejakaa wa le kaa wa he jua wa ha Mawu! (Mat. 10:​29-31) Ke wa gbo po ɔ, wa le kaa e ma tle wɔ si. (Hiob 14:​14, 15) Enɛ ɔ he ɔ, amlɔ nɛ ɔ nɛ wa ngɛ wami mi ɔ, e sa nɛ waa pee nɔ́ fɛɛ nɔ́ nɛ wa ma nyɛ konɛ wa ná nɔmlɔ tso mi he wami nɛ waa hi si slɔkee. w23.02 20-21 ¶3-5

Asafo kuu ngua a nɛ a piɛɛ jijɔ kpa amɛ a he ɔ, anɛ a biɛ maa hi wami womi ɔ mi ke a po Hamagedɔn ɔ lo? Ee. (Kpoj. 7:14) Yesu tsɔɔ kaa nihi nɛ a ngɛ kaa jijɔhi nɛ ɔ ma ná “neneene wami.” (Mat. 25:46) Se nihi nɛ a maa po Hamagedɔn ɔ be neneene wami náe amlɔ nɔuu. Ngɛ Jeha Akpe Nɔ Yemi ɔ mi ɔ, Yesu “maa hyɛ a nɔ, nɛ e ma kudɔ mɛ kɛ ya wami nyu hɛ ngmɛhi a he.” Ni nɛmɛ nɛ a maa bu Kristo blɔ tsɔɔmi ɔ tue nɛ a kɛ ma tsu ní ɔ, nyagbenyagbe ɔ, a maa kojo mɛ kaa anɔkualetsɛmɛ, nɛ Yehowa maa ngma a biɛ ngɛ wami womi ɔ mi. A be gbɛe hu gblegbleegble. (Kpoj. 7:​16, 17) Se kɛ̃ ɔ, a ma kpata apletsi ɔmɛ a hɛ mi ngɛ Hamagedɔn . A biɛ be wami womi ɔ mi. Yesu de ke a maa “po mɛ ngɔ fɔ he kɛ ya neneene.” (Mat. 25:46) Mawu mumi ɔ wo bɔfo Paulo he wami nɛ e de ke, “nimli nɛ ɔmɛ ma ná kojomi tue gblami nɛ ji neneene hɛ mi kpatami.”—2 Tɛs. 1:9; 2 Pet. 2:9. w22.09 16 ¶7-8

Weku mi bimɛ ma nyɛ maa ngɔ níhi nɛ Yehowa bɔ ɔ kɛ je a hɛja konɛ a bua nɛ jɔ, nɛ lɔ ɔ ma ha nɛ suɔmi nɛ ngɛ a kpɛti ɔ mi maa wa. Yehowa bɔ hehi nɛ a ngɛ fɛu ngɛ zugba a nɔ, nɛ wa ma nyɛ ma ya je wa hɛja ngɛ lejɛ ɔ. Wekuhi fuu a bua jɔɔ ke a hia blɔ kɛ ya yokuhi a nɔ, kɔpehi a mi, loo a ya wo ɔ nya. Ngɛ je ehe ɔ mi ɔ, fɔli kɛ a bimɛ ɔmɛ a bua maa jɔ Yehowa nibɔ níhi a he wawɛɛ pe be ko nɛ be. Ngɛ jamɛ a be ɔ mi ɔ, wa be lohwe ko gbeye yee, nɛ mɛ hu a be wɔ gbeye yee. (Yes. 11:​6-9) Wa bua maa jɔ níhi nɛ Yehowa bɔ ɔ he kɛ maa ya neneene. (La 22:26) Se fɔli, e sɛ nɛ nyɛɛ mlɛ kɛ ya si jamɛ a be ɔ loko nyɛɛ maa ye bua nyɛ bimɛ ɔmɛ konɛ a bua nɛ jɔ adebɔ níhi a he. Ke o gu adebɔ níhi a nɔ kɛ tsɔɔ o bimɛ ɔmɛ Yehowa he ní ɔ, e ma ha nɛ a maa na nɔ́ nɛ Matsɛ David de ɔ kaa e ji anɔkuale. E de ke: “Níhi nɛ o pee ɔ hu, nɔ́ ko nɔ́ ko be nɛ a kɛ maa to a he.”—La 86:8. w23.03 25 ¶16-17