October

Ke wa ya asafo mi kpe ɔ, e sa nɛ waa ngɔ wa he kɛ wo ní kasemi ɔ mi kɛ gu wa gbi nɔ nɛ wa ma wo kɛ la, kɛ hetohi nɛ pi si nɛ wa ma ha a nɔ. E yeɔ ha nyɛmimɛ komɛ kaa a ma la loo a ma ha munyu heto ke a ya asafo mi kpe. Anɛ mo hu o nuɔ he jã lo? Ke jã a, moo kase nɔ́ nɛ nyɛmimɛ komɛ pee kɛ ye gbeye yemi ha. Ni komɛ yɔse kaa ke a la kɛ je a tsui mi ɔ, e yeɔ bua. Ke wa ya asafo mi kpe ɔ, nɔ́ titli he je nɛ wa laa Matsɛ Yemi lahi ji kaa wa kɛ je Yehowa yi. Enɛ ɔ he ɔ, ke o ngɛ o he dlae kɛ ha asafo mi kpe ɔ, laa lahi nɛ a ma la ngɛ kpe ɔ sisi ɔ hulɔ. Hyɛ bɔ nɛ munyuhi nɛ a ngɛ la amɛ a mi ɔ kɛ níhi nɛ a maa kase ngɛ asafo mi kpe ɔ sisi ɔ kɔ ha. Jehanɛ hu ɔ, ngɔɔ o juɛmi kɛ maa la amɛ a mi munyu ɔmɛ a nɔ mohu pe ye gbi nɛ ngɔɛ ɔ nɔ. Ngɛ anɔkuale mi ɔ, e yeɔ ha nyɛmimɛ komɛ kaa a ma ha sane heto. Mɛni ma nyɛ maa ye bua? Bɔɔ mɔde kaa o ma ha sane heto be fɛɛ be. Mo kai kaa ke o ha sane heto kpiti nɛ oti ɔ je kpo ɔ, e hi. Ke wa bɔ mɔde nɛ wa ha sane heto ngɛ asafo mi kpehi a sisi ɔ, Yehowa bua jɔɔ wawɛɛ. w22.04 7-8 ¶12-15

Munyu nɛ ji “yemi kɛ bualɔ” ɔ tsɔɔ nɔ ko nɛ e kɛ oya yemi yeɔ bua nɔ ko nɛ e hia yemi kɛ buami. Moo po he foni nɛ o hyɛ bɔ nɛ Yehowa kɛ oya yemi maa ye bua nɔ ko nɛ e hao ha. Enɛ ɔ tsɔɔ heii kaa Yehowa suɔ wawɛɛ kaa e maa ye bua wɔ. Yehowa maa ye bua wɔ nɛ́ waa kɛ bua jɔmi nɛ fĩ si ngɛ kahi nɛ waa kɛ kpeɔ ɔ mi. Mɛni blɔ komɛ nɛ Yehowa guɔ nɔ kɛ yeɔ bua? Bɔ nɛ pee nɛ waa na heto ɔ, nyɛ ha nɛ wa susu Yesaya womi ɔ fã ko he. Mɛni he je nɛ e he hia nɛ waa pee jã a? Ejakaa gbamihi fuu nɛ Yehowa gu Yesaya nɔ kɛ gba a hu kɔɔ Mawu we bi a he mwɔnɛ ɔ. Jehanɛ hu ɔ, munyuhi nɛ Yesaya kɛ kale Yehowa a sisi numi yi. Kaa nɔ hyɛmi nɔ́ ɔ, nyɛ ha nɛ wa susu Yesaya yi 30 ɔ he nɛ waa hyɛ. Ngɛ jamɛ a yi ɔ mi ɔ, Yesaya ngɔ nɔ́ he tomi níhi nɛ sa kadimi kɛ tsɔɔ bɔ nɛ Yehowa yeɔ bua e we bi ha. E tsɔɔ kaa Yehowa (1) buɔ wa sɔlemi tue wawɛɛ nɛ e haa wɔ heto, (2) e kɛ blɔ tsɔɔmi haa wɔ, nɛ (3) e jɔɔ wɔ mwɔnɛ ɔ, nɛ hwɔɔ se hu e maa jɔɔ wɔ. w22.11 8 ¶2-3

Ngɛ sɛ gbi nɛ Yesu kɛ ha Smirna kɛ Filadelfia asafo ɔ mi ɔ, e de Kristofohi nɛ a ngɛ asafo nɛ ɔmɛ a mi ɔ kaa e sɛ nɛ a ye gbeye kaa a maa wa mɛ yi mi, ejakaa a maa jɔɔ mɛ ngɛ anɔkuale nɛ a maa ye ɔ he. (Kpoj. 3:10) E sa nɛ waa hyɛ blɔ kaa a maa wa wɔ yi mi, nɛ waa pee klaalo kaa wa ma fĩ si kɛ da nya. (Mat. 24:​9, 13; 2 Kor. 12:10) Kpo Jemi womi ɔ ha nɛ wa le kaa a maa wa Mawu we bi yi mi ngɛ “Nyɔmtsɛ ɔ ligbi ɔ” mi. (Kpoj. 1:10) Jamɛ a be ɔ mi nɛ wa ngɛ nɛ ɔ nɛ. Kpo Jemi womi ɔ yi 12 ɔ tsɔɔ kaa benɛ a to Mawu Matsɛ Yemi ɔ sisi pɛ ɔ, ta fɛ ngɛ hiɔwe. Maikɛl nɛ ji Yesu Kristo nɛ a wo e hɛ mi nyami ɔ kɛ e tabo ɔ, kɛ Satan kɛ e Daimonio ɔmɛ hu ta. (Kpoj. 12:​7, 8) A ye Mawu he nyɛli ɔmɛ a nɔ kunimi nɛ a fiee mɛ kɛ ba zugba a nɔ. Enɛ ɔ ngɔ haomi babauu kɛ ba nihi nɛ a ngɛ zugba a nɔ ɔ a nɔ.—Kpoj. 12:​9, 12. w22.05 5 ¶12-13

Yehowa kojomi ɔmɛ da be fɛɛ be. E hyɛ we nɔ hɛ mi kulaa. Tsa pi bɔ nɛ nɔ ko he ngɛ fɛu ha, sika nɛ e ngɛ, bɔ nɛ nihi le lɛ ha aloo nyɛmi nɛ e ngɛ ɔ nɔ nɛ Yehowa daa nɛ e kɛ tɔmi keɔ. (1 Sam. 16:7; Yak. 2:​1-4) Nɔ ko be nɛ ma nyɛɛ maa nyɛ Yehowa nɔ konɛ e pee nɔ́ ko loo e ha lɛ nyɔ mi ní. E dɛ bɔ nɛ eko ɔ, níhi gba e nya ha a nɔ kɛ mwɔ e yi mi kpɔ. (2 Mose 34:7) Atsinyɛ jemi ko be he kaa Yehowa ji Kojolɔ nɛ pe kulaa ejakaa e le nɔ́ fɛɛ nɔ́ ngɛ wa he, nɛ e le wa si fɔfɔɛ. (5 Mose 32:4) Nihi nɛ a ngma Hebri Ngmami ɔ yɔse kaa bɔ nɛ Yehowa ngɔɔ tɔmi kɛ kee ha a se be. Ngɛ si fɔfɔɛ komɛ a mi ɔ, a kɛ Hebri munyungu ko lɛ tsuɔ ní. Womi ko de ke, “a kɛ tsuɔ ní kɛ tsɔɔ bɔ nɛ Mawu ngɔɔ yayami peeli a tɔmi kɛ keɔ mɛ ha a mi. Jamɛ a munyungu ɔ nɛ a kɛ tsu ní mi kuɔ pe bɔ nɛ adesahi ngɔɔ a nyɛmimɛ a tɔmi kɛ keɔ mɛ ha a.” Ke yayami peelɔ ko tsake e tsui ɔ, Yehowa pɛ nɛ e ngɛ he blɔ nɛ e kɛ e yayami ɔ keɔ lɛ kulaa. w22.06 4 ¶10-11

Ke o ji fɔlɔ kake nɛ o ngɛ o bimɛ tsɔsee loo o ji fɔlɔ nɛ o huno loo o yo sɔmɔ we Yehowa a, mo ná nɔ mi mami kaa o nɔ hyɛmi nɔ́ kpakpa a woɔ nihi nɛ a bɔle mo ɔ he wami. Ke e ba lɛ kaa o bi ɔ kplɛɛ we tsɔsemi nɛ o kɛ ngɛ lɛ hae ɔ nɔ hu nɛɛ? Mo kai kaa bi tsɔsemi heɔ be. Ke wa du wu ko ɔ, e suu be nɛ wa haoɔ kaa eko ɔ, e be wae nɛ́ e maa wo yiblii. E ngɛ mi kaa wa be nyɛe ma ha nɛ tso ko nɛ wo yiblii lɛɛ, se wa yaa nɔ nɛ wa pueɔ nɔ nyu konɛ e nyɛ nɛ e wa. (Maak. 4:​26-29) Jã kɛ̃ nɛ ke o ji binyɛ ɔ, be komɛ ɔ, o ma nyɛ ma bi o he ke ji o nyɛ nɛ o ngɛ o bi ɔ ye buae konɛ e ná suɔmi ha Yehowa. O be nyɛe ma kudɔ yi mi kpɔhi nɛ o bimɛ ɔmɛ maa mwɔ. Se ke o ya nɔ nɛ o pee nɔ́ fɛɛ nɔ́ nɛ o ma nyɛ kɛ tsɔse mɛ ɔ, lɛɛ o ngɛ mɛ ye buae konɛ a suɔ Yehowa. w22.04 19-20 ¶16-17

Benɛ Salomo kɛ anɔkuale yemi ngɛ Yehowa sɔmɔe ɔ, e ná juɛmi nɛ da ngɛ lɛ nitsɛ e he. Benɛ e ji niheyo ɔ, e yɔse kaa ní komɛ ngɛ nɛ lɛ nitsɛ e be nyɛe maa pee. Enɛ ɔ he ɔ, e bi Yehowa nɛ́ e ye bua lɛ. (1 Ma. 3:​7-9) Benɛ Salomo bɔni matsɛ yemi ɔ, e yɔse kaa ke e wo e he nɔ ɔ, e ma nyɛ maa pee oslaa kɛ ha lɛ. Aywilɛho sane ji kaa pee se ɔ, Salomo kɛ lɛ nitsɛ e ga womi ɔ tsu we ní. Pee se ngɛ e matsɛ yemi ɔ mi ɔ, e ba bɔni e he nɔ womi, nɛ e ma e hɛ kɛ fɔ Mawu blɔ tsɔɔmi ɔmɛ a nɔ. Kaa nɔ hyɛmi nɔ́ ɔ, Mawu mlaa a tsɔɔ kaa e sɛ nɛ Israel matsɛmɛ ɔmɛ nɛ a ‘ngɔ yihi fuu; ejakaa ke a pee jã a, a tsui maa je Yehowa he.’ (5 Mose 17:17) Salomo kɛ jamɛ a mlaa a tsu we ní, nɛ e ngɔ yihi 700 kɛ plãhi 300. (1 Ma. 11:​1-3) Eko ɔ, Salomo susu kaa enɛ ɔ be nyagba pee ha lɛ. Se pee se ɔ, benɛ Salomo je Yehowa se ɔ, e na e mi nɔ́.—1 Ma. 11:​9-13. w22.05 23 ¶12

Mwɔnɛ ɔ, e sa nɛ nihi nɛ a mwɔ yi mi kpɔ ko nɛ e he hia wawɛɛ. Anɛ a ma fĩ Yehowa Mawu se kaa lɛ ji nɔ nɛ e sa nɛ e ye je mluku ɔ tsuo nɔ, aloo a ma fĩ Satan Abosiami nɛ ji Mawu he nyɛlɔ ɔ se? E sa nɛ nɔ fɛɛ nɔ nɛ hla nɔ́ nɛ e suɔ. Yi mi kpɔ nɛ wa ti nɔ fɛɛ nɔ maa mwɔ ɔ lɛ maa tsɔɔ kaa wa ma ná neneene wami hwɔɔ se loo wa be náe. (Mat. 25:​31-33, 46) Ngɛ “amanehlu ngua” a mi ɔ, a ma kadi nihi kɛ ha yi baami loo hɛ mi kpatami. (Kpoj. 7:14; 14:​9-11; Eze. 9:​4, 6) Ke o hla kaa o ma fĩ Yehowa nɔ yemi se ɔ, lɛɛ o mwɔ yi kpɔ nɛ da. Amlɔ nɛ ɔ, o suɔ nɛ o ye bua ni kpahi nɛ́ mɛ hu a mwɔ yi mi kpɔ nɛ da. A maa jɔɔ nihi nɛ a kɛ anɔkuale yemi ma fĩ Yehowa nɔ yemi ɔ se ɔ. E sa nɛ waa kase anɔkuale munyu nɛ ɔmɛ nɛ a he hia a. Ke wa pee jã a, e maa ye bua wɔ nɛ waa fia wa pɛɛ si kaa wa maa ya nɔ ma sɔmɔ Yehowa. Jehanɛ hu ɔ, waa kɛ níhi nɛ wa kase ɔ ma nyɛ maa ye bua ni kpahi nɛ mɛ hu a mwɔ yi mi kpɔ kaa a ma sɔmɔ Yehowa daa. w22.05 15 ¶1-2

E sa nɛ waa bu Yehowa tue, se pi wa he nyɛli ɔmɛ. Hiob bu tue saminya benɛ Yehowa kɛ lɛ tu munyu ɔ. Mawu kɛ Hiob susu níhi a he, nɛ e bi lɛ ke: I le níhi nɛ ba o nɔ ɔ tsuo. O susu kaa i be nyɛe nɛ ma ye bua mo lo?’ Hiob hɛ sa ní kpakpahi tsuo nɛ Yehowa pee kɛ ha lɛ ɔ, nɛ e je he si bami mi kɛ ha sane bimi ɔmɛ a heto. E de ke, “Jamɛ a be ɔ, níhi nɛ nihi de mi ngɛ o he kɛkɛ lɛ i le, se amlɔ nɛ ɔ lɛɛ i na mo paa kɛ imi nitsɛ ye hɛngmɛ.” (Hiob 42:5) Eko ɔ, benɛ Hiob tu munyu nɛ ɔmɛ ɔ, loloolo ɔ, e hii si ngɛ la zu mi nɛ pahi ngɛ e nɔmlɔ tso ɔ he tsuo Se kɛ̃ ɔ, Yehowa ha nɛ Hiob ná nɔ mi mami kaa e suɔ lɛ nɛ e bua jɔ e he. (Hiob 42:​7, 8) Mwɔnɛ ɔ hu ɔ, nihi ma nyɛ ma jɛ wɔ, nɛ a kɛ wɔ maa hi si kaa nɔ́ nɛ wa he hia we. Eko ɔ, a maa bɔ mɔde kaa a maa gbe wa he guɛ aloo a maa gbe asafo ɔ he guɛ, Hiob sane ɔ ha nɛ wa na kaa Yehowa Mawu ngɛ nɔ mi mami kaa wa maa ya nɔ nɛ wa maa ye lɛ anɔkuale ke waa kɛ kahi ngɛ kpee. w22.06 24 ¶15-16

E ngɛ mi kaa ke a kpata Babilon Ngua a hɛ mi ɔ, bɔfo ɔmɛ ma kpa ngmlaa kɛ bua jɔmi ngɛ hiɔwe mohu lɛɛ, se nɔ́ kpa ko hu ngɛ nɛ maa ngɔ bua jɔmi ngua kɛ ba. (Kpoj. 19:​1-3) E ji ní peemi ko nɛ maa pee bua jɔmi nɛ Kpo Jemi womi ɔ tu he munyu. Lɔ ɔ ji “Jijɔ Bi ɔ yo kpeemi ɔ.” Nimli 144,000 ɔ tsuo maa hi hiɔwe loko a maa hwu Harmagedon ta a. Se pi jamɛ a be ɔ mi ji Jijɔ Bi ɔ yo kpeemi ɔ. (Kpoj. 21:​1, 2) Jijɔ Bi ɔ yo kpeemi ɔ maa ya nɔ ke a hwu Harmagedon ta a se, nɛ a kpata Mawu he nyɛli ɔmɛ tsuo a hɛ mi. (La 45:​3, 4, 13-17) Mɛni maa ya nɔ ngɛ Jijɔ Bi ɔ yo kpeemi ɔ sisi? Kaa bɔ nɛ gba si himi peeɔ nyumu kɛ yo kake ɔ, jã kɛ̃ nɛ Jijɔ Bi ɔ yo kpeemi ɔ maa pee Matsɛ Yesu Kristo kɛ e we “ayɛflo” nɛ ji nimli 144,000 ɔ kake. E ma ha nɛ nɔ yemi ehe maa ye zugba a nɔ jeha 1,000.—Kpoj. 20:6. w22.05 17 ¶11-13

Yesu gba kɛ fɔ si kaa ngɛ nyagbe ligbi ɔ mi ɔ, e maa hla “tsɔlɔ anɔkualetsɛ kɛ ní lelɔ” ko nɛ́ e to mumi mi niye ní he blɔ nya. (Mat. 24:45) Munyu nɛ ɔ ngɛ mi bae niinɛ. Wa hɛ mi nyɛɛlɔ ɔ guɔ nihi nɛ a pɔ mɛ nu ɔ a kpɛti nihi bɔɔ ko a nɔ kɛ haa Mawu we bi kɛ nihi nɛ a ngɛ munyu ɔ he bua jɔmi ɔ mumi mi “niye ní ngɛ be nɛ sa mi.” Nyumu nɛ ɔmɛ pee we a he nyɔmtsɛmɛ ngɛ ni kpahi a hemi kɛ yemi ɔ nɔ. (2 Kor. 1:24) Mohu ɔ, a le kaa Yesu ji ‘a nyatsɛ kɛ a tatsɛ.’ (Yes. 55:4) Kɛ je jeha 1919 ɔ, tsɔlɔ anɔkualetsɛ ɔ pee womi slɔɔtohi kɛ ye bua ni hehi nɛ a ngɛ munyu ɔ he bua jɔmi ɔ konɛ a ná he blɔ kɛ kase Mawu Munyu ɔ mi anɔkuale ɔ. Ngɛ jeha 1921 ɔ mi ɔ, tsɔlɔ ɔ pee womi nɛ ji The Harp of God ɔ kɛ ye bua nihi nɛ a ngɛ munyu ɔ he bua jɔmi ɔ konɛ a kase Baiblo sisije tsɔɔmi ɔmɛ. Benɛ be ngɛ mi puee ɔ, a pee womi kpahi kɛ piɛɛ he. Mɛni womi lɛ ye bua mo nɛ o ba le wa hiɔwe Tsɛ ɔ, nɛ o ná suɔmi kɛ ha lɛ? w22.07 10 ¶9-10

Yehowa haa nɔ nɔ́ pe nɔ fɛɛ nɔ. Ke o ha lɛ nɔ́ ko ɔ, e ma ha mo pe bɔ nɛ o ha lɛ ɔ po. (Maak. 10:​29, 30) Ngɛ je yaya nɛ ɔ mi po ɔ, Yehowa ma ha nɛ o bua maa jɔ nɛ o tsui maa nɔ o mi. Bua jɔmi sane ji kaa o ma nyɛ maa ya nɔ ma sɔmɔ Yehowa nɛ ji o Tsɛ nɛ ngɛ suɔmi ɔ kɛ ya daa, nɛ suɔmi nɛ ngɛ o kɛ lɛ nyɛ kpɛti ɔ mi maa wa be fɛɛ be. Ngɛ anɔkuale mi ɔ, o maa hi si kɛ ya neneene kaa bɔ nɛ Yehowa hu ngɛ kɛ yaa neneene ɔ. Ke o jɔɔ o he nɔ kɛ ha Yehowa nɛ o ha nɛ a baptisi mo ɔ, e ji he blɔ nɛ o ná kaa o ma ha o Tsɛ ɔ nɔ́ ko nɛ he jua wa wawɛɛ. Lɛ nɛ e ha mo ní kpakpahi tsuo nɛ o ngɛ nɛ haa nɛ o bua jɔɔ ɔ. Se mo hu nɔ́ ko ngɛ nɛ Nɔ nɛ bɔ hiɔwe kɛ zugba a be eko nɛ o ma nyɛ ma ha lɛ. Lɔ ɔ ji suɔmi mi nɛ o maa je kɛ sɔmɔ lɛ nɛ o maa ye lɛ anɔkuale. (Hiob 1:8; 41:11; Abɛ 27:11) Enɛ ɔ ji nɔ́ nɛ hi pe kulaa nɛ o ma nyɛ maa pee ngɛ o si himi mi. w23.03 6 ¶16-17

Ke o ji niheyo loo yiheyo nɛ o yi jeha 20 lolo ɔ, bɔmi nami he numi nya ma nyɛ maa wa, nɛ o juami bi ma nyɛ maa nyɛ o nɔ kaa o ngɔ o he kɛ wo bɔmi nami mi. Satan maa suɔ nɛ o ngɔ o he kɛ wo ní peepee nɛ ɔ mi. Se mɛni ma nyɛ maa ye bua mo konɛ o nyɛ nɛ o da ka nɛ ɔ nya? (1 Tɛs. 4:​3, 4) Ke o ngɛ sɔlee ɔ, de Yehowa bɔ nɛ o ngɛ he nue ha tutuutu, nɛ o de lɛ konɛ e ye bua mo. (Mat. 6:13) Mo kai kaa Yehowa suɔ nɛ e ye bua mo, se pi nɛ e maa bu mo fɔ. (La 103:​13, 14) Koo bɔ mɔde kaa o ma tsu nyagbahi nɛ o kɛ kpeɔ ɔ he ní ngɛ o dɛ he. O kɛ o fɔli nɛ sɛɛ nyagba a he ní. E be gbɔjɔɔ kaa o kɛ nɔ ko maa sɛɛ o laami mi sanehi, se e he hia wawɛɛ kaa o maa pee jã. Ke o kaneɔ Baiblo ɔ nɛ o pueɔ o yi mi tɛ ngɛ sisi tomi mlaahi nɛ ngɛ mi ɔ he ɔ, e be yee ha mo kaa o maa mwɔ yi mi kpɔhi nɛ maa sa Yehowa hɛ mi. O ma ba yɔse kaa o hia we mlaa ngɛ nɔ́ fɛɛ nɔ́ nɛ o maa pee ngɛ o si himi mi ɔ he ejakaa o ba le Yehowa susumi ngɛ sanehi a he. w22.08 5 ¶10-12

Kristofo no nɛ ji weku yi ɔ blɔ nya ní tsumi ji kaa e ma ha e weku ɔ a he lo nya hiami níhi. Ke weku yi ji mo ɔ, O maa hao kaa eko ɔ, o be nyɛe ma ha o weku ɔ niye ní, nɛ o be nyɛe maa wo o tsu hiɔ. Eko ɔ, o maa ye gbeye kaa ke o ní tsumi je o dɛ ɔ, o be ní tsumi kpa náe. Aloo eko ɔ, o ma susu kaa o be nyɛe nɛ o ngɔ sika bɔɔ ko pɛ kɛ hyɛ o he. Susumi nɛ ɔ ha nɛ Satan nine su nihi fuu a nɔ nɛ a kpa Yehowa sɔmɔmi. Satan bɔɔ mɔde kaa e ma ha nɛ wa he ye kaa Yehowa susuu we wa he, nɛ e be wɔ ye buae kɛ hyɛ wa weku ɔ nɔ. Enɛ ɔ he ɔ, eko ɔ, wa maa pee nɔ́ fɛɛ nɔ́ nɛ wa ma nyɛ konɛ wa ní tsumi ɔ ko je wa dɛ ke e ma bi nɛ wa ma wa hɛ kɛ fɔ Baiblo sisi tomi mlaahi a nɔ po. w22.06 15 ¶5-6

Wa le kaa wa Mawu ɔ ji “mɔbɔ nalɔ nɛ e mi mi sãa lɛ, nɛ e mi mi fu we mla, nɛ e suɔmi nɛ se pui ɔ kɛ e we anɔkuale yemi ɔ hiɛ babauu.” (2 Mose 34:​6, NW) Yehowa suɔ dami sane yemi. (Yes. 61:8) Ke wa ngɛ nɔ́ nae ɔ, e dɔɔ lɛ, nɛ e suɔ wawɛɛ kaa e maa po nɔ́ nami tsuo se ngɛ be nɛ e to ɔ nya. (Yer. 29:11) Wɔ hu wa ngɛ jamɛ a be ɔ blɔ hyɛe. Enɛ ɔ ji yi mi tomi kake he je nɛ wa suɔ Yehowa wawɛɛ ɔ nɛ. Mɛni yi mi tomi kpa he je nɛ wa suɔ anɔkuale ɔ? Wa náa anɔkuale ɔ he se wawɛɛ. Mo susu nɔ hyɛmi nɔ́ nɛ ɔ he nɛ o hyɛ. Hwɔɔ se he hɛ kɛ nɔ fɔmi nɛ wa ngɛ ɔ piɛɛ anɔkualehi nɛ ngɛ Baiblo ɔ mi ɔ a he. Kaa bɔ nɛ osɛkɛ nuɔ lɛ kɛ daa si ɔ, hɛ kɛ nɔ fɔmi nɛ wa ná kɛ je Baiblo ɔ mi ɔ yeɔ bua wɔ nɛ wa nyɛɔ daa kahi nɛ waa kɛ kpee ɔ a nya. Benɛ Paulo ngma wa mwɔnɛ nɛ ɔ ngmami ɔ, e ngɛ bɔ nɛ nihi nɛ a pɔ mɛ nu nɛ a ngɛ hɛ nɔ kami kaa a maa ya hiɔwe ɔ, a hɛ kɛ nɔ fɔmi ɔ he jua wa ha mɛ ha a he munyu tue. Se munyu nɛ ɔ hu kɔɔ Kristofohi nɛ a ngɛ blɔ hyɛe kaa a maa hi si ngɛ paradeiso zugba a nɔ kɛ ya neneene ɔ a he. (Yoh. 3:16) Ngɛ anɔkuale mi ɔ, níhi nɛ wa kase kɛ kɔ hɛ kɛ nɔ fɔmi nɛ wa ngɛ kaa wa maa hi si kɛ ya neneene ɔ haa nɛ wa náa bua jɔmi ngɛ si himi mi. w22.08 14-15 ¶3-5

Ja wa suɔ nɔ ko loko wa ma nyɛ ma he lɛ maa ye. Korinto Bi A Kekleekle Womi ɔ yi 13 ɔ tsɔɔ níhi nɛ suɔmi peeɔ kɛ níhi nɛ suɔmi pee we. Suɔmi ma nyɛ maa ye bua wɔ nɛ wa ná hemi kɛ yemi ngɛ nihi a mi. Nɛ ke nyagba ko ba waa kɛ nɔ ko wa kpɛti ɔ, suɔmi ma nyɛ maa ye bua wɔ konɛ waa kpale ná hemi kɛ yemi ngɛ e mi. (1 Kor. 13:​4-8) Kaa nɔ hyɛmi nɔ́ ɔ, kuku 4 ɔ tsɔɔ kaa “suɔmi toɔ e tsui si nɛ e mi mi hi.” Ke wa tɔ̃ Yehowa nɔ po ɔ, e toɔ e tsui si ha wɔ. Jã nɔuu nɛ ke wa nyɛmi ko pee wɔ nɔ́ ko loo e de nɔ́ ko nɛ dɔ wɔ ɔ, e sa nɛ waa to wa tsui si kɛ ha lɛ. Kuku 5 ɔ kɛ piɛɛ he ke: “[Suɔmi] mi mi wui la, e kɛ tɔmi wui e mi.” Wa sume nɛ waa hi níhi nɛ wa nyɛmimɛ ɔmɛ pee kɛ si wɔ ɔ kaie be fɛɛ be. Fiɛlɔ 7:9 ɔ tsɔɔ kaa e sɛ nɛ ‘wa mi mi nɛ fu mlamlaamla.’ Bɔɔ mɔde kaa o maa na o nyɛmimɛ ɔmɛ kaa bɔ nɛ Yehowa hu naa mɛ ɔ. Mawu suɔ mɛ, nɛ e kɛ a tɔmi wui e mi. Jã nɛ e sa nɛ wɔ hu waa pee. (La 130:3) E sɛ nɛ waa ngɔ wa juɛmi kɛ ma a gbɔjɔmihi a nɔ, mohu ɔ, e sa nɛ wa hla su kpakpahi nɛ a ngɛ ɔ.—Mat. 7:​1-5. w22.09 3-4 ¶6-7

Daniel womi ɔ tsɔɔ bɔ nɛ níhi maa ya nɔ setsɔsetsɔ ha ngɛ nyagbe ligbi ɔmɛ a mi. Kaa nɔ hyɛmi nɔ́ ɔ, Daniel 12:1 ɔ tsɔɔ kaa Mikael nɛ ji Yesu Kristo ɔ “daa si ngɛ [Mawu we bi] a nane mi.” Gbami nɛ ɔ bɔni mi bami kɛ je 1914 benɛ a hla Yesu kaa Matsɛ ngɛ Mawu Matsɛ Yemi ɔ nya a. Jehanɛ ɔ, a de Daniel kaa Yesu “maa te si kɛ da si” ngɛ be nɛ “haomi nɛ a nɛ́ eko hyɛ kɛ je be nɛ a to je ma amɛ a sisi kɛ ba si jamɛ a ligbi ɔ maa ba” a mi. “Haomi” nɛ ɔ nɔuu ji “amanehlu ngua” a nɛ a tu he munyu ngɛ Mateo 24:21 ɔ. Yesu maa te si kɛ da si aloo e maa bu Mawu we bi a he ngɛ haomi be nɛ ɔ nyagbe nɛ ji Hamagedɔn ɔ mi. Kpo Jemi womi ɔ tu kuu nɛ ɔ nɔuu he munyu kaa mɛ ji asafo kuu ngua “nɛ a je amanehlu ngua mi ɔ nɛ.”—Kpoj. 7:​9, 14. w22.09 21 ¶4-5

Biɛhi nɛ a ngma ngɛ wami womi ɔ mi amlɔ nɛ ɔ, a ma nyɛ maa gbɛ eko ngɛ mi loo a tsu ngɛ mi. E ngɛ kaa nɔ́ nɛ Yehowa kɛ pɛnsle nɛ ngma a biɛ ɔ nɛ. (Kpoj. 3:5) E sa nɛ wa biɛ nɛ hi womi nɛ ɔ mi kɛ ya si be nɛ a kɛ pɛn maa ngma nɛ e be hie gbɛmi. Kuu kake ko nɛ a ngma a biɛ ngɛ wami womi ɔ mi ji nihi nɛ a hla mɛ kaa a kɛ Yesu maa ye matsɛ ngɛ hiɔwe ɔ. Ngɛ munyu nɛ bɔfo Paulo ngma kɛ ya ha e ‘nyɛmimɛ nɛ e kɛ mɛ tsu ní’ ngɛ Filipi ɔ nya a, nihi nɛ a pɔ mɛ nu nɛ a fɔ mɛ nine kaa a kɛ Yesu nɛ ba ye tsɛ ɔ, a biɛ ngɛ wami womi ɔ mi amlɔ nɛ ɔ. (Filip. 4:3) Se loko a biɛ maa ya nɔ maa hi wami womi nɛ ɔ mi ɔ, e sa nɛ a ya nɔ nɛ a ye anɔkuale. Ke a ná a nyagbe nya sɔumi ɔ, a maa ngma a biɛ ngɛ wami womi ɔ mi nɛ a be gbɛe hu gblegbleegble. Loko a ma gbo ɔ, a ná a nyagbe nya sɔumi, nɛ loko amanehlu ngua a ma fɛ ɔ, ni nɛmɛ nɛ a maa piɛ ngɛ zugba a nɔ ɔ hu ma ná a nyagbe nya sɔumi.—Kpoj. 7:3. w22.09 14 ¶3; 15 ¶5-6

Ngɔɔ lɛ kaa nɔ ko hoo niye ní ko nɛ o bua jɔ he wawɛɛ ha mo. Se eko ɔ, o ngɛ oya yee loo o be deka, enɛ ɔ ha nɛ o ye ní ɔ kɛfokɛfo, lɔ ɔ he ɔ, o nɛ niye ní ɔ ngɔmi. Se benɛ o ye ní ɔ ta a, o na kaa o ye niye ní ɔ mlamlaamla tsɔ, nɛ e sa nɛ o ko to o tsui si kɛ ko ye ní ɔ, konɛ o na bɔ nɛ e ngɔ ha. Wa ma nyɛ maa ngɔ enɛ ɔ kɛ to Baiblo ɔ kanemi he. Be komɛ ɔ, wa kaneɔ Baiblo ɔ kɛfokɛfo, enɛ ɔ he ɔ, wa ná we nɔ́ nɛ wa kase ɔ he se. Ke o ngɛ Mawu Munyu ɔ kanee ɔ, moo to o tsui si kɛ kane konɛ o bua nɛ jɔ he. Mo susu nɔ́ nɛ o ngɛ kanee ɔ he. Moo po níhi nɛ o ngɛ kanee ɔ he foni, nɛ o ngɔ lɛ kaa o ngɛ lejɛ ɔ, nɛ o ngɛ nɔ́ nɛ ngɛ nɔ yae ɔ hyɛe, nɛ o ngɛ níhi a pɛmi hu nue. Ke o pee ní nɛ ɔmɛ tsuo ɔ, o ma ná bua jɔmi babauu. Yesu hla “tsɔlɔ anɔkualetsɛ kɛ ní lelɔ ɔ” konɛ e ha wɔ mumi mi niye ní ngɛ be nɛ sa mi. Nɛ ngɛ anɔkuale mi ɔ, wa tɔɔ ngɛ mumi mi. (Mat. 24:45) Nɔ́ fɛɛ nɔ́ nɛ tsɔlɔ anɔkualetsɛ ɔ haa wɔ ɔ daa si ngɛ Ngmami ɔ nɔ.—1 Tɛs. 2:13. w22.10 7-8 ¶6-8

Baiblo ɔ tsɔɔ kaa ngɛ nyagbe ligbi ɔmɛ a mi ɔ, nihi a he fɛu yeli a he maa hiɛ babauu. (2 Pet. 3:​3, 4) A suɔ kaa a maa “nyɛɛ mɛ nitsɛmɛ a we akɔnɔhi a se kɛ pee ní yayamihi.” (Jud 7, 17, 18) Mɛni wa maa pee kɛ tsɔɔ kaa wa sume kaa wa maa pee wa ní kaa he fɛu yeli? Nɔ́ kake nɛ wa ma nyɛ maa pee ji kaa waa kɛ nihi nɛ a tuɔ nɔ́ fɛɛ nɔ́ he munyu ɔ be bɔe. (La 1:1) Enɛ ɔ tsɔɔ kaa e sɛ nɛ waa bu hemi kɛ yemi kuali tue, nɛ waa kane a munyu ɔmɛ. Ke wa hyɛ we nɛ hi ɔ, wa ma nyɛ ma ná su yaya nɛ ɔ, nɛ wa ma bɔni blɔ tsɔɔmi nɛ Yehowa asafo ɔ kɛ ngɛ wɔ hae ɔ he munyu tumi. Bɔ nɛ pee nɛ waa yu wa he ngɛ ní nɛ ɔmɛ a he ɔ, wa ma nyɛ ma bi wa he ke: ‘Ke a kɛ blɔ tsɔɔmi ehe ko ha wɔ loo a de wɔ nɔ́ ehe ko ɔ, anɛ i tuɔ he munyu nyanyaanya lo? Anɛ daa nɛ ɔ, i hlaa nihi nɛ a nyɛɛ wa hɛ mi ɔ a gbɔjɔmihi lo? Ke wa kpa ní nɛ ɔmɛ peemi oya nɔuu ɔ, Yehowa bua maa jɔ wa he.—Abɛ 3:​34, 35. w22.10 20 ¶9-10

Mawu mumi ɔ wo Ezekiel he wami nɛ e nyɛ nɛ e fiɛɛ ha e kpɔ mi bi nɛ “a tue wa, nɛ a tsɔɔ atuã” a. Yehowa de Ezekiel ke: “Ma ha o maa wa tue, nɛ o maa kplii o tsui kɛ wo mɛ jã nɔuu. Ma ha nɛ o hɛ mi maa wa kaa tɛ nɛ he wa pe tslɛbo po. Koo ye mɛ gbeye, nɛ o tsui ko po ngɛ a hɛ mi.” (Eze. 3:​8, 9) E ngɛ kaa nɔ́ nɛ Yehowa ngɛ Ezekiel dee ke: ‘Ko ha nɛ nihi nɛ a tue mi ti nɛ ɔ nɛ a jɔ̃ o kɔni mi. Ma wo mo he wami.’ Pee se ɔ, Mawu mumi ɔ wo Ezekiel he wami nɛ e nyɛ nɛ e fiɛɛ ngɛ e zugba kpɔ ɔ mi. Ezekiel ngma ke: ‘Yehowa he wami ba ye nɔ wawɛɛ nitsɛ.’ Ezekiel ngɔ otsi kake kɛ kase sɛ gbi nɛ e sa kaa e fiɛɛ kɛ ha ni ɔmɛ ɔ, konɛ e nu sisi saminya, nɛ́ e nyɛ nɛ e tu munyu kɛ nɔ mi mami. (Eze. 3:​14, 15) Lɔ ɔ se ɔ, Yehowa de lɛ ke e ya kɔ̃ ko mi, nɛ benɛ e ya lejɛ ɔ, “Mawu mumi ɔ ba sɛ [e] mi.” (Eze. 3:​23, 24) Enɛ ɔ ha nɛ Ezekiel pee klaalo kaa e maa je fiɛɛmi ní tsumi ɔ sisi. w22.11 4-5 ¶8-9

Gbalɔ Habakuk kɛ haomihi fuu kpe. Be ko ɔ, e yi mi pee lɛ enyɔɔnyɔ, nɛ e susu kaa Yehowa susuu we e he. Lɔ ɔ he ɔ, e sɔle nɛ e de Yehowa bɔ nɛ e ngɛ he nue ha Yehowa ha sɔlemi nɛ e sɔmɔlɔ anɔkualetsɛ nɛ ɔ sɔle kɛ je e tsui mi ɔ heto. (Hab. 2:​2, 3) Benɛ Habakuk susu bɔ nɛ Yehowa he e we bi a yi wami ha a he wawɛɛ ɔ, e ná bua jɔmi ekohu. E ná nɔ mi mami kaa Yehowa susuɔ e he, nɛ e maa ye bua lɛ kɛ da ka saisaa nɛ e kɛ maa kpe ɔ nya. (Hab. 3:​17-19) Mɛni wa kaseɔ ngɛ mi? Ke o kɛ si fɔfɔɛhi nɛ a mi wa ngɛ kpee ɔ, moo sɔle kɛ ha Yehowa nɛ o de lɛ bɔ nɛ o ngɛ he nue ha. Lɔ ɔ se ɔ, ngɔɔ o hɛ kɛ fɔ e nɔ kaa e maa ye bua mo. Ke o pee jã a, o ma nyɛ ma ná nɔ mi mami kaa Yehowa ma ha mo he wami nɛ o hia a, nɛ́ o kɛ da nya. Ke o na kaa e ngɛ mo ye buae ɔ, hemi kɛ yemi nɛ o ngɛ ngɛ e mi ɔ mi maa wa. Ke o yaa nɔ nɛ o kɛ o he woɔ níhi nɛ o pee ɔ ngɛ Mawu jami mi ɔ, lɔ ɔ ma nɛ ke o kɛ si himi nɛ mi wa ngɛ kpee loo o yi mi pee mo enyɔɔnyɔ po ɔ o be Yehowa he jee.—1 Tim. 6:​6-8. w22.11 15 ¶6-7

Yesu kɛ yayami peeli enyɔ nɛ a sɛu mɛ ngɛ e kasa nya a ngɛ nɔ́ nae, nɛ e piɛ bɔɔ nɛ a ma gbo. (Luka 23:​32, 33) Yayami peeli enyɔ nɛ ɔmɛ tsuo ye Yesu he fɛu. (Mat. 27:44; Maak. 15:32) Se a kpɛti nɔ kake tsake e tsui. E de ke: “Yesu, ke o sɛ o Matsɛ Yemi ɔ mi ɔ, mo kai mi.” Heto nɛ Yesu ha lɛ ɔ ji wa mwɔnɛ ɔ ngmami ɔ nɛ. (Luka 23:​39-42) E sa nɛ heto nɛ Yesu ha yayami peelɔ ɔ nɛ wo wɔ he wami konɛ wa susu bɔ nɛ si himi ma ji ha ngɛ Paradeiso ɔ mi ɔ he. Ngɛ anɔkuale mi ɔ, tue mi jɔmi nɛ Matsɛ Salomo ná ngɛ e nɔ yemi ɔ mi ɔ ma nyɛ maa tsɔɔ wɔ nɔ́ ko ngɛ Paradeiso ɔ he. Baiblo ɔ tsɔɔ kaa Yesu nɔ kuɔ pe Salomo. Enɛ ɔ he ɔ, wa ma nyɛ maa hyɛ blɔ kaa Yesu kɛ nihi nɛ a maa piɛɛ e he kɛ ye matsɛ ɔ ma ha nɛ́ zugba a nɛ pee paradeiso nɛ ngɛ fɛu. (Mat. 12:42) E ngɛ heii kaa e sa nɛ ‘jijɔ kpa amɛ’ nɛ a le nɔ́ nɛ e sa nɛ a pee konɛ a nyɛ nɛ a hi si ngɛ Paradeiso ɔ mi kɛ ya neneene.—Yoh. 10:16. w22.12 8 ¶1; 9 ¶4

Yesaya ha nɛ wa ná nɔ mi mami kaa ke wa sɔle ha Yehowa a, e maa bu wɔ tue wawɛɛ, nɛ e kɛ oya yemi ma tsu wa sɔlemi ɔ he ní. Yesaya de hu ke: ‘Ke e nu nɔuu ɔ, e ma he nɔ.’ Munyu nɛ ɔ woɔ nɔ he wami, nɛ e kaiɔ wɔ kaa wa Tsɛ ɔ suɔ, nɛ e pee klaalo kaa e maa ye bua nihi nɛ a biɔ lɛ yemi kɛ buami ɔ. Enɛ ɔ nɛ wa le ɔ yeɔ bua wɔ nɛ wa fĩɔ si kɛ bua jɔmi. Yehowa buɔ wa ti nɔ fɛɛ nɔ sɔlemi tue wawɛɛ. Mɛni he je nɛ wa ma nyɛ ma de jã a? Ngɛ Yesaya yi 30 ɔ kekleekle fã a mi ɔ, a kɛ munyungu nɛ ji “nyɛ” tsu ní ejakaa Yehowa kɛ ma a tsuo nɛ ngɛ munyu tue. Se ngɛ kuku 19 ɔ mi ɔ, a kɛ munyungu nɛ ji “nyɛ” ɔ nɔuu tsu ní, se ngɛ hiɛmɛ nɛ ɔ lɛɛ a ngɛ ni kakaakahi a he munyu tue. Nɛ tsɔɔ kaa Yehowa kɛ Israel bi ɔmɛ ngɛ munyu tue kaa ni kakaakahi. Lejɛ ɔ de ke: ‘Nyɛ be ya foe hu, Yehowa a, mɔbɔ nalɔ ji lɛ, ke nyɛ fa kue ha lɛ ɔ, e ma he nɔ.’ Akɛnɛ Yehowa ji Tsɛ nɛ ngɛ suɔmi he je ɔ, e susuɔ wa ti nɔ fɛɛ nɔ he, nɛ e buɔ wa ti nɔ fɛɛ nɔ sɔlemi tue.—La 116:1; Yes. 57:15. w22.11 9 ¶5-6

Ke a ngɛ wɔ yi mi wae nɛ wa ya nɔ nɛ wa fiɛɛ, nɛ wa tsɔɔ nihi ní ɔ, e haa nɛ wa bua jɔɔ nɛ wa tue mi hu jɔɔ wɔ. Benɛ Yuda nikɔtɔma amɛ fã bɔfo ɔmɛ ngɛ kaseli ɔmɛ a be ɔ mi kaa a kpa fiɛɛmi ɔ, nyumuhi anɔkualetsɛmɛ nɛ ɔmɛ hla kaa a maa bu Mawu mohu tue. A ya nɔ nɛ a fiɛɛ, nɛ lɔ ɔ ha nɛ a bua jɔ. (Níts. 5:​27-29, 41, 42) Ngɛ anɔkuale mi ɔ, ke a tsi wa ní tsumi ɔ nya a, e sa nɛ waa hyɛ nɛ hi ke wa ngɛ fiɛɛe. Se ke wa bɔ mɔde nɛ wa pee níhi nɛ sa Yehowa hɛ mi, nɛ wa fiɛɛ yi wami hemi sɛ gbi ɔ, wa ma ná tue mi jɔmi. E sa nɛ wa ná nɔ mi mami kaa ke níhi a mi wa kaa mɛni po ɔ, wa ma nyɛ ma ná tue mi jɔmi. Ngɛ behi kaa jã mi ɔ, e sa nɛ wa kai kaa tue mi jɔmi nɛ wa hia ji nɔ́ nɛ Yehowa pɛ lɛ ma nyɛ ma ha a. Ke hiɔ nɛ sãa nɔ gbɛ fĩa, oslaa ko ba, aloo a ngɛ mo yi mi wae ɔ, ngɔɔ o hɛ kɛ fɔ Yehowa nɔ. O kɛ e we asafo ɔ nɛ bɔ gbagbanii, nɛ o hi be kpakpa nɛ e be kɛe nɛ maa ba a blɔ hyɛe. Ke o pee jã a, ‘tue mi jɔmi Mawu ɔ kɛ mo maa hi si.’—Filip. 4:9. w22.12 21 ¶17-18

E biɔ mɔde bɔmi wawɛɛ loko wa ma nyɛ maa wo su ehe ɔ. E sa nɛ waa bɔ mɔde nɛ waa ngmɛɛ su komɛ a he. Su nɛ ɔmɛ ekomɛ ji ninyɛ, abofu kɛ mi mi la. (Efe. 4:​31, 32) Mɛni he je nɛ e he ma nyɛ maa wa ha wɔ kaa wa maa pee jã a? Ejakaa su yaya komɛ ma nyɛ maa tlɔ wa he. Kaa nɔ hyɛmi nɔ́ ɔ, Baiblo ɔ tsɔɔ kaa ni komɛ ngɛ nɛ ‘a mi mi woɔ la nɛ a náa abofu mlamlaamla.’ (Abɛ 29:22) Ke nɔ ko ngɛ su yaya nɛ ɔmɛ eko ɔ, e he maa hia nɛ e ya nɔ nɛ e bɔ mɔde wawɛɛ nɛ e pee tsakemi. Ke a baptisi lɛ po ɔ, e ma bi nɛ e ya nɔ nɛ e pee jã. (Rom. 7:​21-23) Ke o ngɛ su yaya ko nɛ e tlɔ o he ɔ, moo sɔle ha Yehowa ngɛ he, nɛ o ná nɔ mi mami kaa e maa bu mo tue nɛ e maa ye bua mo. (1 Yoh. 5:​14, 15) E ngɛ mi kaa Yehowa be nyakpɛ blɔ nɔ gue kɛ je jamɛ a su yaya a ngɛ o he mohu lɛɛ, se e maa wo mo he wami konɛ o nyɛ nɛ o ye o he nɔ. (1 Pet. 5:10) E sa nɛ o bɔ mɔde wawɛɛ nɛ o tsu o sɔlemi ɔ nya ní, nɛ o ko pee níhi nɛ ma ha nɛ o je su nɛ ɔ kpo. Jehanɛ hu ɔ, e sɛ nɛ o hi ní yayahi a he susue.—Filip. 4:8; Kol. 3:2. w23.01 10 ¶7, 9-10

Blɔ kake nɔ nɛ wa guɔ kɛ jeɔ suɔmi nɛ ɔ kpo ji fiɛɛmi ní tsumi ɔ nɛ waa kɛ kã tsuɔ ɔ. Wa fiɛɛɔ ha nɔ fɛɛ nɔ. Wa ha we nɛ he nɛ nɔ ko je, he womi nɔ su, sika, loo blɔ nya nɛ nɔ ko ngɛ ɔ nɛ ha nɛ waa hla nihi a mi kulaa. Ke wa fiɛɛ ha nɔ fɛɛ nɔ ɔ, lɔ ɔ tsɔɔ kaa wa ngɛ Yehowa suɔmi nya ní pee, ejakaa Yehowa suɔmi nya ní ji “kaa a he nimli slɔɔtohi tsuo a yi wami nɛ a ba ná anɔkuale ɔ he nile nitsɛnitsɛ ɔ.” (1 Tim. 2:4) Jehanɛ se hu ɔ, ke wa jeɔ suɔmi kpo kɛ tsɔɔ wa nyɛmimɛ ɔmɛ ɔ, lɔ ɔ tsɔɔ kaa wa suɔ Mawu kɛ Kristo. Wa susuɔ wa nyɛmimɛ ɔmɛ a hiami níhi a he wawɛɛ, nɛ wa yeɔ bua mɛ ngɛ haomi behi a mi. Ke a suɔlɔ ko gbo ɔ, wa woɔ a bua, ke a be he wami ɔ, wa ya slaa mɛ, nɛ wa bɔɔ mɔde hu kaa wa maa wo mɛ he wami ke a kɔni mi jɔ̃. (2 Kor. 1:​3-7; 1 Tɛs. 5:​11, 14) Wa yaa nɔ nɛ wa sɔleɔ ha mɛ ejakaa wa le kaa “dalɔ pɛɛ kpami nɛ mi wa a tsuɔ ní wawɛɛ.”—Yak. 5:16. w23.01 28-29 ¶7-8

Kaa bɔ nɛ tsu malɔ náa níhi a si kpami ngɛ e ní tsumi ɔ mi ke be ngɛ mi puee ɔ, jã kɛ̃ nɛ ke wɔ hu wa fiaa wa nyɛmimɛ kɛ maa si ɔ, bɔɔbɔɔbɔɔ ɔ, wa he maa be ngɛ jã peemi mi. Wa ma nyɛ maa ye bua wa nyɛmimɛ nɛ́ a fĩ si ngɛ kahi nɛ a kɛ ngɛ kpee ɔ mi, ke waa kɛ mɛ susu ni kpahi nɛ mɛ hu a fĩ si ngɛ kahi a mi be ko nɛ be ɔ a nɔ hyɛmi ní ɔmɛ a he. (Heb. 11:​32-35; 12:1) Ke wa de nihi ní kpakpahi nɛ a peeɔ, waa kɛ nihi a kpɛti puɛ nɛ wa dla, nɛ wa diɔ tue mi jɔmi se ke nyagba ko ba a, lɔ ɔ tsɔɔ kaa wa suɔ nɛ tue mi jɔmi nɛ hi wa kpɛti. (Efe. 4:3) Wa ma nyɛ maa fia wa nyɛmimɛ Kristofohi a hemi kɛ yemi ɔ kɛ ma si ke waa kɛ mɛ susu Baiblo mi anɔkualehi a he, wa pee níhi nɛ he hia kɛ ha mɛ, nɛ wa ye bua nihi nɛ a gbɔjɔ ngɛ mumi mi. Ke wɔ hu wa ye bua kɛ fia wa nyɛmimɛ kɛ ma si ngɛ asafo ɔ mi ɔ, wa bua maa jɔ wawɛɛ, nɛ wa tsui maa nɔ wa mi. Tsuhi nɛ a maa a nyɛɔ nɛ a puɛɔ, se ke wa fia wa nyɛmimɛ kɛ ma si ɔ, a ma ná he se daa! w22.08 22 ¶6; 25 ¶17-18

Yesu tsɔɔ su ko nɛ maa ye bua wɔ konɛ waa nu Mawu Munyu ɔ sisi. Lɔ ɔ ji nɔ́ se kɔmi. (Mat. 24:15) Mɛni ji nɔ́ se kɔmi? Lɔ ɔ ji nyɛmi nɛ wa ngɛ nɛ waa kɛ naa tsakpa nɛ ngɛ oti enyɔ a kpɛti kɛ slɔɔto nɛ ngɛ mi, kɛ nyɛmi nɛ waa kɛ yɔseɔ oti pɔtɛɛ komɛ nɛ a tui he munyu tɛɛ. Jehanɛ hu ɔ, Yesu tsɔɔ kaa wa hia nɔ́ se kɔmi loko wa maa na bɔ nɛ níhi nɛ ngɛ nɔ yae ɔ ha nɛ Baiblo gbamihi ngɛ mi bae ha. Wa hia su nɛ ɔ hulɔ bɔ nɛ pee nɛ wa ná nɔ́ fɛɛ nɔ́ nɛ wa kaneɔ ngɛ Baiblo ɔ mi ɔ he se wawɛɛ. Yehowa yeɔ bua e sɔmɔli nɛ a kɔɔ nɔ́ se. Enɛ ɔ he ɔ, moo sɔle nɛ o bi Yehowa nɛ e ye bua mo nɛ o ná su nɛ ɔ. Mɛni o ma nyɛ maa pee kɛ tsu o sɔlemi ɔ nya ní? Mo susu nɔ́ nɛ o ngɛ kanee ɔ he saminya, nɛ o kadi tsakpa nɛ ngɛ níhi nɛ o le momo kɛ nɔ́ nɛ o ngɛ kanee ɔ a kpɛti. Moo bɔ mɔde nɛ o nu Baiblo mi sane ko sisi saminya, nɛ o maa na bɔ nɛ o kɛ ma tsu ní ha ngɛ o si himi mi ha. (Heb. 5:14) Ke o kɔɔ nɔ́ se be mi nɛ o ngɛ ní kanee ɔ, o maa nu Ngmami ɔmɛ a sisi saminya. w23.02 10 ¶7-8

Ngɔɔ lɛ kaa o huɛ ko ke mo blema lɔle ko. Se lɔle ɔ kɔla a kpa nɛ e he komɛ hu kpɔ. E ngɛ mi kaa nyagba ngɛ lɔle ɔ he mohu lɛɛ, se e he jua wa wawɛɛ. Atsinyɛ jemi ko be he kaa o bua maa jɔ lɔle ɔ he wawɛɛ nɛ o maa hyɛ nɔ saminya. Wɔ hu Yehowa ha wɔ nike ní ko nɛ he jua wa wawɛɛ, lɔ ɔ ji wami. Ngɛ anɔkuale mi ɔ, Yehowa ngɔ e Bi ɔ kɛ ha kaa kpɔmi nɔ́ kɛ tsɔɔ kaa wa wami he jua wawɛɛ kɛ ha lɛ. (Yoh. 3:16) Yehowa ji Nɔ nɛ ha wɔ wami. (La 36:9) Bɔfo Paulo na kaa munyu nɛ ɔ ji anɔkuale, enɛ ɔ he ɔ, e ngma ke: “Kɛ gu e nɔ nɛ wa ngɛ wami, nɛ wa yaa nɛ wa baa, nɛ wa ngɛ.” (Níts. 17:​25, 28) Enɛ ɔ he ɔ, wa ma nyɛ ma de ke wami nɛ Mawu ha wɔ ɔ ji nike ní. Mawu je suɔmi mi nɛ e ha wɔ nɔ́ fɛɛ nɔ́ nɛ wa hia konɛ wa nyɛ nɛ waa hi wami mi. (Níts. 14:​15-17) Se mwɔnɛ ɔ, Yehowa gui nyakpɛ blɔ nɔ kɛ baa wa wami yi. Mohu ɔ, e hyɛɔ blɔ kaa wa maa pee nɔ́ nɛ wa ma nyɛ konɛ wa ná nɔmlɔ tso mi he wami kpakpa nɛ waa ya nɔ nɛ wa sɔmɔ lɛ.—2 Kor. 7:1. w23.02 20 ¶1-2

Wa bua jɔ wawɛɛ kaa Yehowa Mawu ha wɔ Baiblo ɔ! Ngɛ Baiblo ɔ mi ɔ, Yehowa ha wɔ ga womi nɛ nile ngɛ mi nɛ waa kɛ ma nyɛ maa da haomihi nɛ waa kɛ kpeɔ mwɔnɛ ɔ nya. Jehanɛ hu ɔ, e ha wɔ hwɔɔ se he hɛ nɔ kami nɛ se be. Nɔ́ nɛ pe kulaa a, kɛ gu Baiblo ɔ nɔ ɔ, Yehowa ha nɛ wa le e suhi fuu. Ke wa pue wa yi mi tɛ ngɛ Yehowa su kpakpa amɛ a he ɔ, e maa ta wa tsui he wawɛɛ, nɛ wa bua maa jɔ kaa wa maa pee e huɛ. (La 25:14) Yehowa suɔ nɛ nihi nɛ a le lɛ. Blema a, Yehowa gu nlamihi, ninahi, kɛ e bɔfohi a nɔ nɛ e kɛ sɛ gbihi ha ni kpahi. (4 Mose 12:6; Níts. 10:​3, 4) Ke a ngmɛ́ nlamihi, ninahi, kɛ sɛ gbihi nɛ Yehowa gu bɔfohi a nɔ kɛ ha a kɛ fɔɛ si ɔ, kɛ wa ma plɛ kɛ kase ha kɛɛ? Yehowa suɔ nɛ waa le ní nɛ ɔmɛ, enɛ ɔ he ɔ, e ha nɛ a ‘ngma kɛ wo womi mi.’ Akɛnɛ ‘anɔkuale Mawu ɔ blɔ ɔmɛ hi kɛ pi si’ he je ɔ, wa ma nyɛ ma ná nɔ mi mami kaa blɔ nɔ nɛ e guɔ nɛ e kɛ wɔ sɛɛɔ ní ɔ hi, nɛ e maa ye bua wɔ.—La 18:30. w23.02 2 ¶1-2

Ngɔɔ otihi nɛ a he hia kɛ ma o hɛ mi. Ngɔɔ otihi nɛ maa wo o hemi kɛ yemi ɔ mi he wami nɛ ma ha nɛ o pee Kristofo no nɛ e nane pi si kɛ ma o hɛ mi. (Efe. 3:16) Kaa nɔ hyɛmi nɔ́ ɔ, o kɛ ma nyɛ maa pee oti kaa o maa kase ní ngɛ o dɛ he, nɛ́ o kane Baiblo ɔ daa ligbi. (La 1:​2, 3) Jehanɛ hu ɔ, o kɛ ma nyɛ maa pee oti kaa o maa sɔle be fɛɛ be kɛ je o tsui mi. Eko ɔ, e he maa hia nɛ o hyɛ níhi nɛ o kɛ jeɔ o hɛja a saminya, nɛ o kɛ o be hu nɛ tsu ní saminya. (Efe. 5:​15, 16) Ke o ye kɛ bua nihi ɔ, lɔ ɔ ma ha nɛ o maa wa ngɛ mumi mi. Kaa nɔ hyɛmi nɔ́ ɔ, o kɛ ma nyɛ maa pee oti kaa o maa ye bua nihi nɛ a wa ngɛ jeha mi loo nihi nɛ a be he wami nɛ a ngɛ o we asafo ɔ mi ɔ. Eko ɔ, o ma nyɛ ma ya he ní ha mɛ aloo o ma nyɛ maa ye bua mɛ konɛ a le bɔ nɛ a kɛ a fon loo tablɛti ɔmɛ ma tsu ní ha. Blɔ kpa nɛ o ma nyɛ maa gu nɔ kɛ je suɔmi kpo ji kaa o maa fiɛɛ Matsɛ Yemi ɔ he sane kpakpa a kɛ tsɔɔ ni kpahi. (Mat. 9:​36, 37) Nɛ ke e maa hi ɔ, o kɛ ma nyɛ maa pee oti ngɛ o si himi mi kaa o kɛ o he maa wo be tsuo sɔmɔmi ní tsumi ɔ fã ko mi. w22.08 6 ¶16-17