September

Ke waa kɛ munyu tumi nɛ ji nike ní ɔ tsu ní ngɛ blɔ kpakpa nɔ ɔ, nihi yɔseɔ kaa Yehowa sɔmɔli ji wɔ. Enɛ ɔ yeɔ bua nihi nɛ bɔle wɔ ɔ nɛ a naa slɔɔto ‘nɛ ngɛ nɔmlɔ nɛ sɔmɔɔ Mawu, kɛ nɔ nɛ sɔmɔ we Mawu ɔ a kpɛti.’ (Mal. 3:18) Mo susu bɔ nɛ enɛ ɔ ba mi ngɛ nyɛmiyo ko nɛ a tsɛɛ lɛ ke Kimberly blɔ fa mi ha a he nɛ o hyɛ. A ha e kɛ e klas no ko sukuu ní tsumi ko nɛ́ a tsu he ní kɛ bla. Benɛ a gbe ní tsumi ɔ nya a, e yɔse kaa Kimberly je ekpa ngɛ sukuu bi kpa amɛ a he. E tui nihi a he munyu yaya, mohu ɔ, e kɛ mi mi jɔmi tuɔ munyu, nɛ e tsua we yakayaka ní. Kimberly klas no ɔ nya kpɛ e he, nɛ e kplɛɛ kaa a kɛ lɛ nɛ kase Baiblo ɔ. Hyɛ bɔ nɛ Yehowa bua maa jɔ ha ke nihi guɔ munyu kpakpahi nɛ wa tuɔ ɔ nɔ kɛ ba leɔ anɔkuale ɔ! Wɔ tsuo wa suɔ kaa waa kɛ wa munyu tumi nɛ wo Yehowa hɛ mi nyami. w22.04 5-6 ¶5-7

Yesu ha nɛ Maria Magdalena ye e he ngɛ daimoniohi kpaago nɛ a ngɛ lɛ haoe ɔ a he! Bua jɔmi nɛ e ná a ha nɛ e ba pee Yesu se nyɛɛlɔ, nɛ e fĩ Yesu se ngɛ e sɔmɔmi ní tsumi ɔ mi. (Luka 8:​1-3) E ngɛ mi kaa Maria bua jɔ nɔ́ nɛ Yesu pee ha lɛ ɔ he mohu lɛɛ, se e li kaa hwɔɔ se ɔ, Yesu maa pee níhi nɛ pã jã po kɛ ha lɛ. Yesu maa ngɔ e wami kɛ ha, “konɛ nɔ fɛɛ nɔ nɛ e heɔ lɛ yeɔ ɔ,” e ná neneene wami. (Yoh. 3:16) E ngɛ mi kaa Maria li ní nɛ ɔmɛ tsuo mohu lɛɛ, se e ye anɔkuale kɛ tsɔɔ kaa e hɛ sa nɔ́ nɛ Yesu pee ɔ. Benɛ Yesu ngɛ nɔ́ nae ngɛ sɛumi tso ɔ nɔ ɔ, Maria ngɛ lejɛ ɔ, ejakaa e susuɔ Yesu he, nɛ e suɔ nɛ e wo ni kpahi nɛ a ngɛ lejɛ ɔ a bua. (Yoh. 19:25) Benɛ Yesu gbo ɔ, Maria kɛ yi enyɔ komɛ ngɔ tsopahi kɛ a he via kɛ ba e yɔkɔ ɔ mi konɛ a kɛ ba kpa e gbogboe ɔ. (Maak. 16:​1, 2) Benɛ a tle Yesu si ɔ, e kɛ Maria tu munyu nɛ enɛ ɔ ha nɛ Maria bua jɔ wawɛɛ. Ngɛ anɔkuale mi ɔ, pi kaseli ɔmɛ tsuo nɛ a ná he blɔ nɛ ɔ.—Yoh. 20:​11-18. w23.01 27 ¶4

E sɛ nɛ wa susu kaa akɛnɛ waa kɛ kã sɔmɔ Yehowa be ko nɛ be ɔ he je ɔ, e he hia we nɛ waa pee jã amlɔ nɛ ɔ. Eko ɔ, wa nyɛ we nɛ waa pee ní komɛ nɛ wa nyɛɔ peeɔ be ko nɛ be ɔ, se e sa nɛ wa tsu babauu ngɛ “Nyɔmtsɛ ɔ ní tsumi ɔ mi,” nɛ wa hɛ hi wa he nɔ kɛ ya si nyagbe. (1 Kor. 15:58; Mat. 24:13; Maak. 13:33) E sa nɛ waa kɛ wa tsui tsuo nɛ sɔmɔ Yehowa kɛ kã. Sɛ gbi nɛ Yesu kɛ ha Laodikea asafo ɔ hu tsɔɔ kaa mɛ hu a nyagba a je ekpa. A jami ɔ ngɛ “kulɔkulɔ.” Nyagba nɛ ɔ he je ɔ, Yesu de mɛ ke ‘a ngɛ haomi mi nɛ a ní ngɛ mɔbɔ.’ E sa nɛ a kɛ kã nɛ mi wa nɛ sɔmɔ Yehowa nɛ a pee kã ngɛ e jami mi. (Kpoj. 3:​16, 17, 19) Mɛni wa ma nyɛ maa kase ngɛ mi? Ke kã nɛ waa kɛ ngɛ Yehowa sɔmɔe ɔ ba si ɔ, e sa nɛ wa hɛ nɛ sa ní kpakpahi tsuo nɛ Yehowa kɛ e we asafo ɔ to he blɔ nya kɛ ha wɔ ɔ. (Kpoj. 3:18) E sɛ nɛ wa ha nɛ si himi kpakpa nɛ wa ma ná ngɛ je nɛ ɔ mi ɔ he nɛ hia wɔ pe Yehowa sɔmɔmi. w22.05 3-4 ¶7-8

Maa pee jeha akpehi abɔ ji nɛ ɔ, Yehowa ngɛ womi ko nɛ he hia ngmae. Biɛhi lɛ ngɛ womi nɛ ɔ mi, nɛ kekleekle nɔ nɛ a ngma e biɛ ngɛ womi nɛ ɔ mi ji odasefo no anɔkualetsɛ Habel. (Luka 11:​50, 51) Kɛ je jamɛ a be ɔ mi kɛ ma a, Yehowa ngma nihi fuu a biɛ kɛ wo womi nɛ ɔ mi, nɛ mwɔnɛ ɔ, nihi ayɔhi abɔ a biɛ ngɛ womi nɛ ɔ mi. Baiblo ɔ de ke: Ngɛ Baiblo ɔ mi ɔ, a tsɛɛ womi nɛ ɔ ke “kaimi womi,” “wami womi,” kɛ “wami womi kpo.” (Mal. 3:16; Kpoj. 3:5; 17:8) Nihi nɛ a kɛ gbeye yemi sɔmɔɔ Yehowa, nɛ́ a ngɛ bu nɛ e mi kuɔ kɛ ha lɛ, nɛ́ a suɔ e biɛ ɔ, mɛ ji nihi nɛ a biɛ ngɛ womi nɛ he hia nɛ ɔ mi. A ma ná he blɔ kɛ hi si kɛ ya neneene. Mwɔnɛ ɔ, kɛ gu Yesu Kristo afɔle sami ɔ nɔ ɔ, a ma nyɛ maa ngma wa biɛ ngɛ womi nɛ ɔ mi ke ji kaa huɛ bɔmi kpakpa ngɛ waa kɛ Yehowa wa kpɛti. (Yoh. 3:​16, 36) Ke wa hɛ nɔ kami ji wa maa ya hiɔwe jio, wa maa hi zugba a nɔ jio, wɔ tsuo wa suɔ nɛ a ngma wa biɛ ngɛ womi nɛ ɔ mi. w22.09 14 ¶1-2

Kpo Jemi womi ɔ kale “drako ngua ko nɛ e tsuɔ tsutsuutsu kaa la,” a hulɔ. (Kpoj. 12:3) Drako nɛ ɔ kɛ Yesu kɛ e bɔfo ɔmɛ hwu. (Kpoj. 12:​7-9) E tuaa Mawu we bi, nɛ e ngɔɔ he wami kɛ haa lohwe awi yelɔ ɔ loo je ɔ mi nɔ yeli. (Kpoj. 12:17; 13:4) Mɛnɔ ji drako ɔ? Lɛ ji “blema sinɔ ɔ, nɔ nɛ a tsɛɛ lɛ ke Abosiami kɛ Satan ɔ.” (Kpoj. 12:9; 20:2) Lɛ ji nɔ nɛ fĩɔ Yehowa he nyɛli ɔmɛ tsuo a se. Mɛni maa ba drako ɔ nɔ? Kpo Jemi 20:​1-3 ɔ tsɔɔ kaa bɔfo ko ma sake lɛ kɛ fɔ muɔ voo ɔ mi nɛ enɛ ɔ maa pee kaa nɔ́ nɛ a wo lɛ tsu. Be mi nɛ Satan ngɛ muɔ voo ɔ mi ɔ, e be nyɛe nɛ e “sisi je ma amɛ hu kɛ yaa si be nɛ jeha 1,000 ɔ maa ba nyagbe.” Nyagbenyagbe ɔ, a ma sake Satan kɛ e daimonio ɔmɛ tsuo “ngɔ wo la kɛ sɔlfa taku ɔ mi,” nɛ tsɔɔ kaa a ma kpata e hɛ mi pɛsɛpɛsɛ. Moo po je ko nɛ Satan kɛ e daimonio ɔmɛ be mi ɔ he foni nɛ o hyɛ. Jamɛ a be ɔ maa pee bua jɔmi wawɛɛ nitsɛ! w22.05 14 ¶19-20

Yesu tsuɔ ní wawɛɛ. Benɛ e ji e sɔmɔmi ní tsumi ɔ sisi ngɛ zugba a nɔ lolo ɔ, e ji kapitɛ. (Maak. 6:3) Atsinyɛ jemi ko be he kaa e fɔli ɔmɛ a bua jɔ kaa e ye bua mɛ kɛ tsu ní wawɛɛ kɛ hyɛ a weku nɛ e kle ɔ nɔ. Akɛnɛ nɛ Yesu ye mluku he je ɔ, se ko be e ní tsumi he. Enɛ ɔ he ɔ, eko ɔ, nihi fuu a bua jɔ e ní tsumi he! E ngɛ heii kaa Yesu bua jɔ e ní tsumi ɔ he. Se kɛ̃ ɔ, benɛ e ngɛ he lo nya ní tsumi nɛ ɔ tsue ɔ, e bɔ mɔde kaa e ma ná be kɛ sɔmɔ Yehowa. (Yoh. 7:15) Pee se ɔ, benɛ e ngɛ be tsuo sɔmɔmi ní tsumi ɔ tsue ɔ, e wo e tue buli ɔmɛ ga ke: ‘Nyɛ tsu ní, se pi ngɛ niye ní nɛ e puɛɔ nɛ nyɛ ma ná a he je, mohu ɔ, ngɛ niye ní nɛ e ngɛ daa nɛ e haa nɔ neneene wami ɔ he je.’ (Yoh. 6:27) Nɛ ngɛ Yesu Yoku ɔ Nɔ Fiɛmi ɔ mi ɔ, e de ke: “Nyɛɛ to juetli si ha nyɛ he ngɛ hiɔwe.” (Mat. 6:20) Ke waa kɛ Yehowa ga womi nɛ nile ngɛ mi ɔ tsu ní ɔ, wa ma ná juɛmi nɛ da ngɛ wa ní tsumi he. Kaa Kristofohi ɔ, wa kase kaa e sa nɛ wa “tsu ní tsumi nɛ he wa,” nɛ wa tsu “ní tsumi kpakpa.” w22.05 22 ¶9-10

Yunis pee nɔ hyɛmi nɔ́ kpakpa kɛ ha Timoteo. Atsinyɛ jemi ko be he kaa Timoteo yɔse kaa suɔmi nɛ mi kuɔ nɛ e yayo ngɛ kɛ Yehowa a ná e ní peepee nɔ he wami nɛ e na kaa Yehowa sɔmɔmi ha nɛ e yayo ngɛ bua jɔmi. Jã kɛ̃ nɛ mwɔnɛ ɔ hu ɔ, binyɛmɛ fuu ye bua a weku ɔmɛ nɛ a ngɛ Yehowa sɔmɔe “nɛ munyu tumi be mi.” (1 Pet. 3:​1, 2) Mo hu o ma nyɛ maa pee jã. Ngɛ mɛni blɔ nɔ? Ha nɛ huɛ bɔmi nɛ ngɛ o kɛ Yehowa nyɛ kpɛti ɔ nɛ pee oti ngɛ o si himi mi. (5 Mose 6:​5, 6) E ngɛ heii kaa mo hu o kɛ níhi fuu sãa afɔle kaa bɔ nɛ binyɛmɛ fuu peeɔ ɔ. O kɛ o be, sika, mahe nɛ o maa hwɔ kɛ ní kpahi sãa afɔle konɛ o nyɛ nɛ o tsu o bimɛ a he lo nya hiami níhi a he ní ha mɛ. Se e sɛ nɛ ní nɛ ɔmɛ nɛ ngɔ o be tsuo nɛ lɔ ɔ nɛ ha nɛ huɛ bɔmi nɛ ngɛ o kɛ Yehowa nyɛ kpɛti ɔ mi nɛ gbɔjɔ. Moo to be nɛ o kɛ sɔle, nɛ o kɛ kase Baiblo ɔ ngɛ o dɛ he, nɛ o kase níhi nɛ wa ma susu he ngɛ asafo mi kpe sisi ɔ. Ke o pee jã a, huɛ bɔmi nɛ ngɛ o kɛ Yehowa nyɛ kpɛti ɔ mi maa wa, nɛ o weku ɔ kɛ ni kpahi maa kase o nɔ hyɛmi nɔ́ kpakpa a. w22.04 16 ¶1; 19 ¶12-13

E ji bua jɔmi kaa a ha we wɔ he blɔ kaa waa kojo wa nyɛmimɛ ejakaa Yehowa ji Kojolɔ Ngua, nɛ e maa hyɛ ní tsumi nɛ he hia wawɛɛ nɛ ɔ nɔ. (Rom. 14:​10-12) Wa ma nyɛ ma ná hɛ kɛ nɔ fɔmi nitsɛ kaa e ma nyɛ maa kojo ngɛ blɔ nɛ da nɔ ngɛ nɔ́ nɛ da kɛ nɔ́ nɛ dɛ tsuo he. (1 Mose 18:25) E be nɔ́ ko nɛ dɛ blɔ pee kɔkɔɔkɔ! Wa ngɛ mlɛe kɛ ya si be nɛ Yehowa ma je ní yayamihi tsuo nɛ mluku nɛ adesa yi ɔ ngɔ kɛ ba a. Jamɛ a be ɔ, Yehowa ma je nyagbahi tsuo nɛ waa kɛ kpeɔ ɔ kɛ je. (La 72:​12-14; Kpoj. 21:​3, 4) Ní nɛ ɔmɛ be wa juɛmi mi bae hu. Be mi nɛ wa ngɛ mlɛe nɛ jamɛ a bua jɔmi be ɔ nɛ ba a, wa bua jɔ kaa Yehowa ha wɔ he wami kɛ nyɛmi konɛ wa nyɛ nɛ waa kase lɛ nɛ waa ngɔ nihi a tɔmihi kɛ ke mɛ. w22.06 13 ¶18-19

Loko nɔ ko ma nyɛ maa pee kojolɔ kpakpa a, e biɔ nɛ e le mlaa saminya. E sa nɛ e le slɔɔto nɛ ngɛ nɔ́ nɛ da kɛ nɔ́ nɛ dɛ mi saminya. Mɛni hu nɛ e he hia nɛ kojolɔ kpakpa nɛ le? E he hia nɛ e le anɔkualehi tsuo nɛ ngɛ sane ko mi loko e kojo. Enɛ ɔ he ɔ, Yehowa ji Kojolɔ nɛ pe kulaa ejakaa e le anɔkuale ɔ tsuo. Yehowa be kaa adesa kojoli. E le anɔkualehi tsuo nɛ ngɛ sane ko nɛ e sa kaa e tsu he ní ɔ mi. (1 Mose 18:​20, 21; La 90:8) E pee we e ní kaa adesahi nɛ a daa nɔ́ nɛ a nuɔ loo a naa nɔ kɛ kojoɔ. E le kaa fɔli a su ma nyɛ ma ná a bi ko nɔ he wami, nɛ e le kaa sukuu nɛ nɔ ko ya, he nɛ e hi, kɛ bɔ nɛ e susuɔ níhi a he ha a ma nyɛ ma ná e nɔ he wami. Yehowa le adesa tsui mi hulɔ. E le nɔ́ tutuutu he je nɛ nɔ ko peeɔ e ní ngɛ blɔ ko nɔ. Nɔ ko be nyɛe maa ngɔ nɔ́ ko nɔ́ ko kɛ laa lɛ. (Heb. 4:13) Enɛ ɔ he ɔ, ke Yehowa ngɔ nɔ ko tɔmi kɛ ke lɛ ɔ, lɔ ɔ tsɔɔ kaa e le anɔkuale ɔ tsuo. w22.06 4 ¶8-9

E sa nɛ wa yo Satan ga tsɔmihi nɛ e kɛ tsu ní ngɛ Hiob blɔ fa mi ɔ, ejakaa e ngɔɔ níhi kaa jã kɛ baa wa nɔ mwɔnɛ ɔ. Satan ngɛ tsɔɔe kaa suɔmi nɛ wa ngɛ kɛ ha Yehowa Mawu ɔ ji wa tsui mi, nɛ ke wa wami ya je oslaa mi ɔ, wa ma kua lɛ. Satan ya nɔ nɛ e tsɔɔ kaa Mawu sume wɔ, nɛ e nɛ́ mɔde nɛ wa ngɛ bɔe kaa wa maa pee níhi nɛ sa e hɛ mi ɔ. Akɛnɛ wa le nɔ́ nɛ Satan ngɛ hlae nɛ e pee he je ɔ, wa he we e lakpa munyu nɛ ɔmɛ yi. E sa nɛ waa na kahi kaa he blɔ nɛ wa ná nɛ waa kɛ maa kase ní komɛ ngɛ wɔ nitsɛmɛ wa he. Kahi nɛ Hiob kɛ kpe ɔ ye bua lɛ nɛ e yɔse e gbɔjɔmi komɛ nɛ e tsu a he ní. Kaa nɔ hyɛmi nɔ́ ɔ, e kase kaa e sa nɛ e ba e he si wawɛɛ. (Hiob 42:3) Wɔ hu wa ma nyɛ maa kase níhi fuu ngɛ wa he ke waa kɛ ka ngɛ kpee. Ke wa nyɛ nɛ wa yɔse wa gbɔjɔmi ɔmɛ ɔ, wa ma nyɛ ma tsu a he ní. w22.06 23 ¶13-14

Yehowa wo wɔ si kaa e maa ye bua wɔ. Kaa nɔ hyɛmi nɔ́ ɔ, loko Yehowa ma de ke wa ji ‘e we odasefohi’ ɔ, e sɛ hlami de ke: “Ke o haomi ɔmɛ pee kaa pa nɛ o ngɛ poe po, ma piɛɛ o he; o haomi ɔmɛ be nyɛe maa ye o nɔ. Ke o nyɛɛ la mi po, la a be mo sãe. Haomihi tsuo nɛ maa ba o nɔ ɔ, o maa ye a nɔ.” (Yes. 43:2) Ke wa ngɛ fiɛɛmi ní tsumi ɔ tsue ɔ, be komɛ ɔ, waa kɛ nyagbahi nɛ a ngɛ kaa pa, kɛ kahi nɛ a ngɛ kaa la kpeɔ. Se ngɛ Yehowa yemi kɛ buami nya a, wa yaa nɔ nɛ wa fiɛɛɔ. (Yes. 41:13) Mwɔnɛ ɔ nihi fuu bui sɛ gbi ɔ tue. E sa nɛ wa ha nɛ e hi wa juɛmi mi kaa ke a bui wɔ tue ɔ, lɔ ɔ tsɔɔ we kaa wa nyɛ we nɛ waa fiɛɛ saminya. Wa le kaa ke wa ya nɔ nɛ waa kɛ anɔkuale yemi tsu fiɛɛmi ní tsumi ɔ, Yehowa bua jɔɔ. Enɛ ɔ nɛ wa le ɔ woɔ wa bua, nɛ e woɔ wɔ he wami hulɔ. Bɔfo Paulo ngma ke: “Nɔ fɛɛ nɔ nine maa su lɛ nitsɛ e hiɔwo nɔ ngɛ lɛ nitsɛ e ní tsumi ɔ he.”—1 Kor. 3:8; 4:​1, 2. w22.11 4 ¶5-6

Mwɔnɛ ɔ, wa na kaa Baiblo gbamihi ngɛ mi bae. Nihi je ‘je mahi nɛ a tuɔ gbi slɔɔtohi’ a mi, nɛ a ba ngɛ “gbi nɛ he tsɔ” nɛ ji Baiblo ɔ mi anɔkuale ɔ kasee. (Zak. 8:23; Zef. 3:9) Akɛnɛ Yesu Kristo lɛ ngɛ fiɛɛmi ní tsumi ɔ hɛ mi nyɛɛe he je ɔ, wa nyɛ nɛ wa ngɛ ní nɛ ɔ tsue. Nihi nɛ a hiɛ pe 8,000,000 nɛ́ a ngɛ mahi 240 a nɔ ɔ kɛ Yehowa asafo ɔ ngɛ bɔe, nɛ daa jeha a, a baptisiɔ nihi akpehi abɔ. Pi wa yibɔ ɔ nɛ ngɛ hɛ mi yae ɔ pɛ ji nɔ́ nɛ he hia, mohu ɔ, kaseli ehe nɛ a ngɛ mɔde bɔe kaa a ma je Kristofohi a suhi kpo, nɛ́ a wo “su ehe ɔ” ji nɔ́ ko nɛ he hia wawɛɛ. (Kol. 3:​8-10) A ti nihi fuu kpa je mi bami yaya kɛ ma he suɔmi ní peepeehi, a kpa awi yemi, nɛ a hlɛ nɔ mi hu. Gbami nɛ ngɛ Yesaya 2:4 ɔ ngɛ mi bae. Lejɛ ɔ de ke: ‘A dla we a he kɛ ha ta hu.’ Be mi nɛ wa ngɛ mɔde bɔe kaa wa maa wo su ehe ɔ, e gblaa nihi kɛ baa Yehowa asafo ɔ mi, nɛ lɔ ɔ tsɔɔ kaa wa ngɛ wa hɛ mi nyɛɛlɔ nɛ ji Kristo Yesu se nyɛɛe. (Yoh. 13:35) Mɛni he je nɛ níhi ngɛ nɔ yae jã? Ejakaa Yesu ngɛ wɔ ye buae. w22.07 9 ¶7-8

Ke wa ngɛ sɔlee ha Yehowa a, e sa nɛ waa ngɔ wa ní peepee kɛ tsɔɔ kaa wa ngɛ bumi nɛ mi kuɔ kɛ ha lɛ. Mo susu nina nɛ Yesaya, Ezekiel, Daniel, kɛ Yohane na a he nɛ o hyɛ. Mɛ tsuo a kale Yehowa kaa Matsɛ nɛ e nɔ kuɔ pe kulaa. Yesaya ‘na Yehowa nɛ e hii si ngɛ e matsɛ sɛ gojoo ko nɔ.’ (Yes. 6:​1-3) Ezekiel na Yehowa nɛ e hii si ngɛ tlɔɔke ko nɛ ‘ngɛ kpɛe nɛ alale su’ bɔle lɛ ɔ nɔ. (Eze. 1:​26-28) Daniel na “Nɔ Nɛ Ngɛ Daa a,” e tade ɔ hiɛ futaa, nɛ e matsɛ sɛ ɔ ngɛ tsoe gegeege kaa la. (Dan. 7:​9, 10) Yohane hu na Yehowa nɛ e hii si ngɛ matsɛ sɛ nɔ, nɛ e na alale ko nɛ ngɛ fɛu kaa emerald nɛ́ e bɔle matsɛ sɛ ɔ kɛ kpe. (Kpoj. 4:​2-4) Ke wa susu Yehowa hɛ mi nyami ɔ kɛ bɔ nɛ e nɔ kuɔ ha a he ɔ, e kaiɔ wɔ kaa he blɔ nɛ wa ná kaa wa maa sɔle kɛ ha lɛ ɔ se be, nɛ e sa nɛ waa pee jã kɛ he si bami. w22.07 20 ¶3

Nihewi, nyɛ kai kaa Satan maa bɔ mɔde kaa e maa tsi nyɛ nya konɛ nyɛ ko ya nyɛ hɛ mi ngɛ mumi mi. Blɔ kake nɔ nɛ e ma nyɛ maa gu kɛ pee jã ji kaa, e ma ha nɛ o yi mi nɛ pee mo enyɔɔnyɔ ngɛ Baiblo ɔ mi anɔkualehi nɛ o ngɛ kasee ɔ ekomɛ a he. Kaa nɔ hyɛmi nɔ́ ɔ, eko ɔ, nihi maa suɔ kaa a ma plɛ o yi mi konɛ o he bilemi tsɔɔmi ɔ nɛ o ye, nɛ o susu kaa pi Mawu nɛ e bɔ wɔ. Eko ɔ, benɛ o ji jokuɛ ɔ, o li bilemi tsɔɔmi ɔ he nɔ́ ko, se amlɔ nɛ ɔ, a bɔni mo tsɔɔmi ngɛ sukuu. Eko ɔ, nɔ́ nɛ o tsɔɔli ɔmɛ deɔ ngɛ bilemi tsɔɔmi ɔ he ɔ ma ná o nɔ he wami nɛ o ma susu kaa sisi numi ngɛ he. Se eko ɔ, a hla we níhi a mi kɛ ya tsitsaa konɛ a na kaa Bɔlɔ ko ngɛ niinɛ. Mo kai sisi tomi mlaa nɛ ngɛ Abɛ 18:17 ɔ. E de ke: “Ke nɔ ko sɛ hlami kɛ jaje e sane ɔ, e peeɔ kaa nɔ́ nɛ e sane da kɛ yaa si e nyɛmi ɔ ma bɔni lɛ munyu bimi, loko anɔkuale ɔ maa je kpo.” E sa nɛ o he be kɛ kase Mawu Munyu nɛ ji Baiblo ɔ kɛ wa asafo womi ɔmɛ saminya mohu pe nɛ o ma he munyuhi nɛ a tuɔ ngɛ sukuu ɔ ye. w22.08 2 ¶2; 4 ¶8

Wa suɔ nɛ waa nu nɔ́ nɛ wa kaneɔ ngɛ Baiblo ɔ mi ɔ sisi, ejakaa ja wa nu sisi loko wa ma ná he se wawɛɛ. Kaa nɔ hyɛmi nɔ́ ɔ, mo susu nɔ́ nɛ ya nɔ ngɛ Yesu kɛ “nyumu ko nɛ e le Mlaa a saminya a” a kpɛti ɔ he nɛ o hyɛ. (Luka 10:​25-29) Benɛ nyumu ɔ bi Yesu nɔ́ nɛ e sa nɛ e pee konɛ e ná neneene wami ɔ, Yesu gbla e juɛmi kɛ ya Mawu Munyu ɔ nɔ nɛ e bi lɛ ke: “Mɛni a ngma ngɛ Mlaa a mi ɔ? Kɛ o kaneɔ lɛ kɛɛ?” Heto nɛ nyumu ɔ ha Yesu ɔ da. E tsɛ ngmamihi nɛ tsɔɔ kaa e sa nɛ waa suɔ Mawu kɛ wa nyɛmi nɔmlɔ ɔ se. (3 Mose 19:18; 5 Mose 6:5) Se mo kadi sane nɛ nyɛɛ se nɛ ɔ nɛ nyumu ɔ bi Yesu ɔ. E bi lɛ ke: “Mɛnɔ tutuutu ji ye nyɛmi?” Sane nɛ nyumu ɔ bi Yesu ɔ tsɔɔ kaa e nui nɔ́ nɛ e kane ɔ sisi saminya. Enɛ ɔ he ɔ, e nyɛ we nɛ e ngɔ nɔ́ nɛ e le ngɛ jamɛ a ngmami ɔmɛ a mi ɔ kɛ tsu ní saminya. Ja Yehowa ye bua wɔ loko wa maa nu Ngmami ɔ sisi. Enɛ ɔ he ɔ, e sa nɛ wa bi lɛ nɛ e ye bua wɔ kɛ e mumi klɔuklɔu ɔ konɛ wa juɛmi nɛ hi nɔ́ nɛ wa ngɛ kanee ɔ nɔ, nɛ wa de lɛ nɛ e ye bua wɔ konɛ waa ngɔ nɔ́ nɛ wa kane ɔ kɛ tsu ní. w23.02 9 ¶4-5

“Kɛ o plɛ kɛ na anɔkuale ɔ ha kɛɛ?” Atsinyɛ jemi ko be he kaa nihi bi mo sane nɛ ɔ si abɔ nɛ o ha heto. Enɛ ɔ ji sane ko nɛ ke nyɛmi ko ngɛ hlae nɛ e le mo saminya a, e biɔ. Wa suɔ nɛ waa le bɔ nɛ wa nyɛmimɛ ɔmɛ plɛ kɛ ba le Yehowa nɛ́ a ba suɔ lɛ, nɛ wa suɔ kaa wa de mɛ nɔ́ he je nɛ wa bua jɔ kaa wa ba pee Yehowa Odasefohi. (Rom. 1:11) Ní sɛɛmi kaa jã yeɔ bua wɔ nɛ wa kaiɔ kaa anɔkuale ɔ he jua wa. Jehanɛ hu ɔ, e yeɔ bua wɔ nɛ wa hɛɛɔ wa pɛɛ si nɛ wa fia kaa wa maa ‘ya nɔ maa nyɛɛ ngɛ anɔkuale ɔ mi’ ɔ mi. Enɛ ɔ tsɔɔ kaa e sa nɛ waa ya nɔ nɛ waa ba wa je mi saminya konɛ Yehowa nɛ jɔɔ wɔ, nɛ e kplɛɛ wa nɔ. Wa suɔ anɔkuale ɔ ngɛ yi mi tomihi fuu a he je. Se nɔ́ nɛ pe kulaa a, wa suɔ Yehowa Mawu ejakaa e Ngɔ Nɛ Anɔkuale ɔ Je. Kɛ gu e Munyu nɛ ji Baiblo ɔ nɔ ɔ, wa ba le lɛ kaa lɛ ji hiɔwe kɛ zugba Bɔlɔ nɛ e ngɛ he wami, jehanɛ hu ɔ, lɛ ji wa hiɔwe Tsɛ nɛ e ngɛ suɔmi nɛ e susuɔ wa he wawɛɛ.—1 Pet. 5:7. w22.08 14 ¶1, 3

Bɔfo Paulo wo e nyɛmimɛ Kristofo ɔmɛ he wami konɛ a je suɔmi kpo kɛ gu “ní tsumi kpakpahi” a nɔ. (Heb. 10:24) Tsa pi e munyu tumi nɔ pɛ nɛ e gu kɛ ye bua mɛ, e gu e ní peepee hu nɔ kɛ pee jã. Kaa nɔ hyɛmi nɔ́ ɔ, benɛ hwɔ ba Yudea nɛ e sa nyɛmimɛ Kristofohi nɛ a ngɛ lejɛ ɔ a he ɔ, Paulo ngɔ níhi nɛ a hia a kɛ ya ha mɛ. (Níts. 11:​27-30) Akɛnɛ Paulo kɛ e be tsuo fiɛɛ nɛ e tsɔɔ nihi ní he je ɔ, e be deka kulaa, se e hla blɔhi a nɔ nɛ e maa gu konɛ e ye bua nyɛmimɛ nɛ he lo nya níhi a he hia mɛ ɔ. Jã nɛ e pee ɔ ha nɛ e nyɛmimɛ Kristofo ɔmɛ ná nɔ mi mami kaa Yehowa maa hyɛ mɛ. Mwɔnɛ ɔ, ke adebɔ mi oslaa ba wa nyɛmimɛ ɔmɛ a nɔ nɛ wa ngɔ wa be, wa he wami kɛ níhi nɛ wa le peemi ɔ kɛ ye bua mɛ ɔ, lɔ ɔ maa fia a hemi kɛ yemi ɔ kɛ ma si. Wa ma nyɛ maa pee jã hu kɛ gu sika nɛ waa kɛ maa ye bua je kɛ wɛ ní tsumi ɔ be fɛɛ be ɔ nɔ. Wa ma nyɛ maa gu blɔ nɛ ɔ kɛ blɔ kpahi a nɔ kɛ ye bua wa nyɛmimɛ ɔmɛ nɛ a ná nɔ mi mami kaa Yehowa be mɛ sie kɔkɔɔkɔ. w22.08 24 ¶14

Gbamihi fuu ngɛ Baiblo ɔ mi nɛ a ba mi momo. A ngma gbami nɛ ɔmɛ ekomɛ jeha lafahi abɔ kɛ se loko a ba mi. Yi nɔ sane haa nɛ wa naa kaa gbami nɛ ɔmɛ ba mi niinɛ. Enɛ ɔ pee we wɔ nyakpɛ, ejakaa wa le kaa Baiblo gbami ɔmɛ tsuo je Yehowa ngɔ. Mo susu gbamihi nɛ a gba kaa a ma kpata blema Babilon ma a hɛ mi ɔ he nɛ o hyɛ. Ngɛ jeha 778 kɛ ya si jeha 732 loko a fɔ Kristo ɔ mi ɔ, gbalɔ Yesaya gba kaa a ma kpata Babilon ma nɛ ngɛ he wami wawɛɛ ɔ hɛ mi. E tsɔɔ kaa Sirus ji nɔ nɛ maa nyɛɛ hɛ mi kɛ kpata Babilon ma a hɛ mi, nɛ e tsɔɔ bɔ nɛ e ma plɛ kɛ pee jã ha a hulɔ. (Yes. 44:27–45:2) Jehanɛ se hu ɔ, Yesaya gba kɛ fɔ si kaa a ma kpata Babilon ma a hɛ mi pɛsɛpɛsɛ nɛ e ma plɛ pee ma doku. (Yes. 13:​19, 20) Ngɛ jeha 539 loko a fɔ Kristo ɔ, Media kɛ Persia bi ɔmɛ ba kpata Babilon ma a hɛ mi, nɛ ma nɛ he biɛ nɛ ɔ pee ma doku kɛ ba si amlɔ nɛ ɔ. w23.01 4 ¶10

Yehowa hla wɔ kaa wa ba piɛɛ e sɔmɔli nɛ a ngɛ je kɛ wɛ ɔ a he. Enɛ ɔ ji he blɔ ko nɛ se be nɛ wa ná, nɛ enɛ ɔ maa ngɔ jɔɔmi fuu kɛ ba! (Maak. 10:​29, 30) Ngɛ je kɛ wɛ ɔ, wa ngɛ nyɛmimɛ nɛ a suɔ Yehowa kaa bɔ nɛ wɔ hu wa suɔ lɛ ɔ, nɛ a ngɛ mɔde bɔe kaa a kɛ Yehowa blɔ tsɔɔmi ma tsu ní ngɛ a si himi mi. Gbi nɛ wa tuɔ, wa kusumi, kɛ bɔ nɛ wa dlaa wa he ha a ma nyɛ maa je ekpa ngɛ a nɔ́ ɔ he, se kekleekle be nɛ waa kɛ mɛ maa kpe po ɔ, wa náa a he bua jɔmi. Wa suɔ wawɛɛ kaa waa kɛ mɛ maa pee kake kɛ je wa hiɔwe Tsɛ nɛ ngɛ suɔmi ɔ yi, nɛ́ wa sɔmɔ lɛ waa baa kake peemi nɛ ngɛ wa kpɛti ɔ yi. (La 133:1) Mɛni he je? Ejakaa be komɛ ɔ, a yeɔ bua wɔ kɛ daa wa nyagba amɛ a nya. (Rom. 15:1; Gal. 6:2) Jehanɛ hu ɔ, a woɔ wɔ he wami kaa waa ya nɔ nɛ wa tsu wa sɔmɔmi ní tsumi ɔ, nɛ́ wa ha nɛ huɛ bɔmi nɛ ngɛ waa kɛ Yehowa wa kpɛti ɔ mi nɛ wa. (Heb. 10:​23-25) Ke pi nɛ Yehowa asafo ɔ yeɔ bua wɔ konɛ wa nyɛ nɛ waa da kahi nɛ Satan Abosiami kɛ je yaya nɛ ɔ kɛ baa wa nɔ ɔ nya a, jinɛ kɛ wa si fɔfɔɛ ko pee kɛɛ? w22.09 2-3 ¶3-4

E he ma nyɛ maa wa ha wɔ kaa wa maa ye wa he nɔ ke waa kɛ Intanɛti nɔ huɛ bɔmi hehi ngɛ ní tsue. Ke wa hyɛ we nɛ hi ɔ, wa ma je laami sanehi kpo kɛ tsɔɔ nihi babauu be mi nɛ wa hɛ be wa he nɔ. Ke wa ná nɛ waa kɛ sane ko fɔ Intanɛti nɔ huɛ bɔmi hehi ɔ, wa be nyɛe maa tsɔɔ nihi bɔ nɛ a kɛ tsu ní ha, nɛ wa be nyɛe maa le nyagbahi nɛ e kɛ maa ba. Ke nihi nɛ a teɔ si kɛ woɔ asafo ɔ ngɛ mɔde bɔe kaa a maa sisi wɔ ɔ, he nɔ yemi maa ye bua wɔ konɛ wa ma wa nya, nɛ wa be laami sane ko kpo jee nɛ maa hao wa nyɛmimɛ nyumuhi kɛ yihi. Nɔ́ nɛ ɔ ma nyɛ maa ba ke ji kaa a tsi wa ní tsumi ɔ nya ngɛ ma ko nɔ, nɛ polisihi ngɛ mɔde bɔe kaa a ma bi wɔ sanehi. Baiblo sisi tomi mlaa ko de ke, wa “ma ma [wa] nya.” Waa kɛ sisi tomi mlaa nɛ ɔ ma nyɛ ma tsu ní ngɛ si fɔfɔɛ nɛ ɔ, kɛ si fɔfɔɛ kpahi a mi hulɔ. (La 39:1) E sa nɛ nɔ fɛɛ nɔ nɛ na wɔ kaa wa ji nɔ ko nɛ nihi ma nyɛ maa ngɔ a hɛ kɛ fɔ wa nɔ. Wa weku li jio, wa huɛmɛ jio, wa nyɛmimɛ jio, aloo nɔ kpa ko jio. Se loko wa ma nyɛ maa pee jã a, ja wa yeɔ wa he nɔ. w22.09 13 ¶16

Loko wa ma ná bua jɔmi nitsɛnitsɛ ɔ, ja wa kase Baiblo ɔ. Nɛ e sa nɛ wa pee jã. Enɛ ɔ he je nɛ Yesu de ke: “Pi abolo pɛ nɛ baa nɔmlɔ wami yi, mohu ɔ, munyu fɛɛ munyu nɛ jeɔ Yehowa nya a.” (Mat. 4:4) Enɛ ɔ he je ɔ, e sɛ nɛ wa ha nɛ ligbi kake po nɛ be nɛ wa kane we Mawu Munyu nɛ ji Baiblo ɔ. Akɛnɛ Yehowa suɔ wɔ he je ɔ, e tsɔɔ wɔ níhi nɛ ngɛ Baiblo ɔ mi nɛ ke wa pee ɔ, wa ma ná bua jɔmi. Wa ba le nɔ́ he je nɛ e bɔ wɔ. Jehanɛ hu ɔ, wa ba le nɔ́ nɛ wa ma nyɛ maa pee konɛ waa hɛ kɛ su Mawu he nɛ e ngɔ wa yayami ɔmɛ kɛ ke wɔ. Wa ba le si himi kpakpa nɛ e wo si kaa wa ma ná hwɔɔ se ɔ hulɔ. (Yer. 29:11) Anɔkuale nɛ ɔmɛ nɛ wa ba kase ngɛ Baiblo ɔ mi ɔ ha nɛ wa tsui nɔ wa mi! Ke o kɛ nyagbahi ngɛ kpee ngɛ o si himi mi nɛ o kɔni mi jɔ̃ ɔ, ngɔɔ be babauu kɛ kane Yehowa Munyu ɔ nɛ o pue o yi mi tɛ ngɛ he. w22.10 7 ¶4-6

Baiblo ɔ woɔ wɔ he wami kaa wa ko pee wa ní kaa nihi nɛ a be níhi a si kpami ngɛ yi mi tomi kpakpa ko he je. Ke waa kɛ Baiblo sisi tomi mlaahi tsu ní ngɛ wa si himi mi ɔ, wa ba peeɔ nihi nɛ a le ní. Bɔɔbɔɔbɔɔ ɔ, wa ma ba na bɔ nɛ Baiblo ɔ maa ye bua wɔ ha nɛ wa ko sɛ nyagbahi a mi, nɛ waa mwɔ yi mi kpɔhi nɛ da. Lɔ ɔ he ɔ, e sa nɛ wa susu yi mi kpɔhi nɛ wa mwɔɔ ɔmɛ a he. Kaa nɔ hyɛmi nɔ́ ɔ, ke wa kaseɔ Baiblo ɔ, nɛ wa bɔni asafo mi kpehi yami be saii ji nɛ ɔ, se wa jɔɔ we wa he nɔ kɛ ha Yehowa nɛ wa ma ha nɛ a baptisi wɔ ɔ, e sa nɛ wa susu nɔ́ nɛ wa maa pee konɛ waa su jamɛ a oti ɔ he ɔ he. Ke a baptisi wɔ ɔ, anɛ wa ngɛ wa hɛ mi yae nɛ wa ngɛ sane kpakpa a fiɛɛe, nɛ wa ngɛ nihi ní tsɔɔe saminya lo? Anɛ yi mi kpɔhi nɛ wa mwɔɔ ɔ tsɔɔ kaa waa kɛ níhi nɛ wa kase ngɛ Baiblo ɔ mi ɔ ngɛ ní tsue saminya lo? Anɛ waa kɛ nihi hiɔ si kaa bɔ nɛ Yesu kɛ mɛ ko hi si ɔ lo? Ke wa na kaa e sa nɛ waa pee tsakemihi ɔ, e sa nɛ wa susu Yehowa mlaahi nɛ haa nɛ ‘nihi nɛ a be níhi a si kpami leɔ ní’ ɔ a he.—La 19:7. w22.10 20 ¶8

Ezekiel na bɔ nɛ Mawu mumi ɔ ngɛ he wami ha. E na ngɛ nina mi kaa Mawu mumi ɔ ngɛ bɔfohi nɛ a ngɛ he wami ye buae, nɛ e ngɛ hiɔwe tlɔɔke ɔ nane ɔmɛ kudɔe. (Eze. 1: 21) Benɛ Ezekiel na nina a, kɛ e pee e ní ha kɛɛ? E tsɔɔ bɔ nɛ e pee e ní ha. E de ke: “Benɛ i na nɔ́ nɛ ɔ, i tsɔ fia si.” Ezekiel nya kpɛ e he hluu po kaa e nɔ si. (Eze. 1:28) Pee se ɔ, benɛ Ezekiel susu nina nɛ ngɛ nyakpɛ nɛ ɔ he ɔ, e wo lɛ he wami nɛ e ná nɔ mi mami kaa Mawu mumi ɔ ma nyɛ maa ye bua lɛ nɛ́ e tsu fiɛɛmi ní tsumi ɔ kɛ pi si. Yehowa fã Ezekiel ke: “Nɔmlɔ adesa, tee si nɛ o da si nɛ ma de mo nɔ́ ko.” Fami nɛ ɔ kɛ Mawu mumi ɔ ye bua Ezekiel nɛ, e ná he wami nɛ e hia nɛ ma ha nɛ e nyɛ nɛ e te si. (Eze. 2:​1, 2) Pee se ɔ, Mawu mumi klɔuklɔu ɔ ye bua lɛ ngɛ e fiɛɛmi ní tsumi ɔ mi tsuo.—Eze. 3:22; 8:1; 33:22; 37:1; 40:1. w22.11 4 ¶7-8

Gbalɔ Yesaya tsɔɔ kaa Yehowa ngɛ kaa tsɔɔlɔ ko nɛ e hɛ ngɛ nihi nɛ e ngɛ mɛ ní tsɔɔe ɔ a he, nɛ́ e daa si ngɛ a se, nɛ e ngɛ mɛ blɔ nɛ e sa kaa a gu nɔ ɔ tsɔɔe. Mwɔnɛ ɔ, wa nuɔ Mawu gbi ngɛ wa se. Ngɛ mɛni blɔ nɔ? Jehahi babauu ji nɛ ɔ nɛ Mawu kɛ e mumi ɔ ye bua nɛ a ngma Baiblo ɔ. A ngma loko a fɔ wɔ, lɔ ɔ ngɛ blɔ ko nɔ ɔ, a ngma ngɛ wa se. Lɔ ɔ he ɔ, ke wa kane Baiblo ɔ, e ngɛ kaa nɔ́ nɛ wa ngɛ Mawu gbi nue ngɛ wa se. (Yes. 51:4) Kɛ wa ma plɛ kɛ ná blɔ tsɔɔmi nɛ Yehowa kɛ haa wɔ ɔ he se kɛ pi si ha kɛɛ? Mo kadi kaa Yesaya tu níhi enyɔ a he munyu. Kekleekle ɔ, e de ke, ‘blɔ ɔ ji nɛ ɔ nɛ.’ Enyɔne ɔ, e de ke, “nyɛɛ nyɛɛ blɔ ɔ nɔ.” “Blɔ ɔ” nɛ wa maa le ɔ kɛkɛ pi. E sa nɛ waa “nyɛɛ blɔ ɔ nɔ” hulɔ. Yehowa Munyu ɔ kɛ bɔ nɛ asafo ɔ tsɔɔ wɔ níhi a mi ha a yeɔ bua wɔ nɛ wa leɔ nɔ́ nɛ Yehowa suɔ kaa waa pee. Jehanɛ hu ɔ, wa kaseɔ bɔ nɛ waa kɛ nɔ́ nɛ wa ngɛ kasee ɔ ma tsu ní ha. Loko wa ma nyɛ ma fĩ si kɛ bua jɔmi ngɛ Yehowa sɔmɔmi ɔ, e he hia nɛ waa pee ní enyɔ nɛ ɔmɛ tsuo. Ja wa pee jã loko wa ma nyɛ ma ná nɔ mi mami kaa Yehowa maa jɔɔ wɔ. w22.11 11 ¶10-11

Be bɔɔ se benɛ Yesu bɔfo ɔmɛ a kpɛti nihi fuu gbo ɔ, lakpa Kristofohi ba sɛ asafo ɔ mi. (Mat. 13:​24-27, 37-39) A tu “munyu kpɛ̃kpɛ̃ɛhi konɛ a kɛ gbla kaseli ɔmɛ kɛ nyɛɛ mɛ nitsɛmɛ a se.” (Níts. 20:30) “Munyu kpɛ̃kpɛ̃ɛhi” nɛ lakpa Kristofohi nɛ ɔmɛ bɔni tsɔɔmi ɔ eko ji kaa Yesu kɛ e wami ha we “si kake nyɔngloo, konɛ e tloo nihi babauu a he yayamihi” kaa bɔ nɛ Baiblo ɔ tsɔɔ ɔ. Mohu ɔ, a tsɔɔ kaa e sa nɛ e ngɔ e wami kɛ sã afɔle si abɔ. (Heb. 9:​27, 28) Mwɔnɛ ɔ, nihi babauu he lakpa tsɔɔmi nɛ ɔ ye, nɛ a yeɔ gbijlɔ ko daa otsi, be komɛ po ɔ, daa ligbi ngɛ a sɔlemi ɔmɛ a mi. Katoliki bi ɔmɛ tsɛɔ gbijlɔ nɛ ɔ ke “Mass.” E ngɛ mi kaa jami komɛ hu pee we lɛ jã mohu lɛɛ, se loloolo ɔ, a li se nami nɛ ngɛ Yesu kpɔmi afɔle sami ɔ he. w23.01 21 ¶5

Ngɛ Yesu Jeha Akpe Nɔ Yemi ɔ mi ɔ, a ma tle nihi nɛ a gbo ɔ si, nɛ bɔɔbɔɔbɔɔ ɔ, a ma ha nɛ nihi nɛ a buɔ Yehowa tue ɔ maa ye mluku. Nihi nɛ Yehowa maa kojo mɛ kaa dali ɔ, “zugba a maa pee a nɔ́ nɛ a maa hi nɔ daa.” (La 37:​10, 11, 29) Bua jɔmi sane ji kaa a ma kpata gbenɔ nɛ ji ‘nyagbe he nyɛlɔ ɔ hɛ mi.’ (1 Kor. 15:26) Hɛ nɔ kami nɛ wa ngɛ kaa wa maa hi si kɛ ya neneene ɔ daa si ngɛ Mawu Munyu ɔ nɔ. Hɛ nɔ kami nɛ ɔ maa ye bua wɔ nɛ waa ya nɔ nɛ waa ye anɔkuale ngɛ nyagbe ligbi nɛ ɔmɛ nɛ níhi a mi wa wawɛɛ ɔ mi. Se loko wa ma nyɛ maa sa Yehowa hɛ mi ɔ, e sɛ nɛ wa susu neneene wami nɛ wa ma ná a pɛ he. Yi mi tomi titli he je nɛ wa yaa nɔ nɛ wa yeɔ Yehowa kɛ Yesu anɔkuale ji kaa wa suɔ mɛ wawɛɛ. (2 Kor. 5:​14, 15) Enɛ ɔ woɔ wɔ he wami nɛ wa kaseɔ mɛ, nɛ wa haa nɛ nihi leɔ wa hɛ nɔ kami ɔ. (Rom. 10:​13-15) Ke wa fo we wɔ pɛ wa nɔ́ mi, nɛ wa je mi mi jɔmi kpo ɔ, Yehowa maa suɔ kaa e kɛ wɔ maa pee e huɛmɛ kɛ ya daa. w22.12 6-7 ¶15-16.

Ke a ngɛ wɔ yi mi wae ɔ, e he maa wa kaa wa maa pee níhi fuu nɛ haa nɛ wa náa tue mi jɔmi ɔ. Wa ma nyɛ maa hao wawɛɛ nɛ wa maa ye gbeye ngɛ nɔ́ nɛ maa ba pee se ɔ he. Tɔmi ko be he kaa wa maa nu he jã. Se loloolo ɔ, e sa nɛ waa hyɛ nɛ hi. Yesu tsɔɔ kaa yi mi wami ma nyɛ ma ha nɛ e se nyɛɛli ɔmɛ a nane nɛ tɔ̃tɔ̃. (Yoh. 16:​1, 2) Yesu de ke a maa wa wɔ yi mi, se jamɛ a be ɔ mi nɔuu ɔ, e ha nɛ wa ná nɔ mi mami kaa wa ma nyɛ maa ya nɔ maa ye anɔkuale. (Yoh. 15:20; 16:33) Ke a tsi wa ní tsumi ɔ nya a, wa nine ma nyɛ maa su blɔ tsɔɔmi nɔ kɛ je asafo ɔ ní tsumi kɔni ɔ kɛ asafo mi nikɔtɔma amɛ a ngɔ. Jamɛ a blɔ tsɔɔmi ɔ maa po wa he piɛ, nɛ e ma ha nɛ wa nine nɛ su mumi mi niye ní nɔ daa. Jehanɛ hu ɔ, e maa ye bua wɔ nɛ waa ya nɔ nɛ wa tsu fiɛɛmi ní tsumi ɔ kɛ wa nyɛmi tsuo bɔ nɛ si fɔfɔɛ ɔ maa ngmɛ blɔ. Bɔɔ mɔde nɛ o kɛ blɔ tsɔɔmi ɔ nɛ tsu ní. (Yak. 3:17) Jehanɛ se hu ɔ, e sɛ nɛ wa de mɛ wa nyɛmimɛ ɔmɛ a he sane.—Fiɛɛ. 3:7. w22.12 20-21 ¶14-16

Mwɔnɛ ɔ hu ɔ, Yesu yaa nɔ nɛ e tsɔɔ e se nyɛɛli blɔ be mi nɛ a ngɛ Mawu Matsɛ Yemi he sane kpakpa a fiɛɛe ngɛ zugba a tsuo nɔ ɔ. Enɛ ɔ tsɔɔ kaa e ye e si womi ɔ nɔ. Yesu guɔ asafo mi kpehi kɛ wa womi ɔmɛ a nɔ kɛ tsɔɔ wɔ bɔ nɛ e sa kaa waa fiɛɛ sane kpakpa a ha. Jehanɛ hu ɔ, e ha wɔ nɔ́ fɛɛ nɔ́ nɛ wa hia konɛ wa nyɛ nɛ wa tsu ní tsumi nɛ ɔ. (Mat. 28:​18-20) Yesu hyɛɔ blɔ kaa waa bɔ mɔde wawɛɛ nɛ waa fiɛɛ nɛ waa tsɔɔ nihi ní, nɛ wa peeɔ jã pɛpɛɛpɛ hulɔ. Jehanɛ hu ɔ, wa yaa nɔ nɛ wa hwɔɔ be mi nɛ wa ngɛ mlɛe nɛ Yehowa nɛ kpata je yaya nɛ ɔ hɛ mi ɔ. Ke waa kɛ ga womi nɛ ngɛ Hebri Bi 6:​11, 12 ɔ tsu ní ɔ, wa maa hɛɛ wa hɛ kɛ nɔ fɔmi ɔ mi “kɛ ya si nyagbe.” Yehowa to be nɛ e kɛ ma kpata Satan je yaya nɛ ɔ hɛ mi. Ke jamɛ a be ɔ su ɔ, Yehowa ma ha nɛ gbamihi tsuo nɛ a ngɛ e Munyu ɔ mi ɔ maa ba mi. Se be komɛ ɔ, eko ɔ, wa ma susu kaa Yehowa ngɛ se kpɛe tsɔ. Se “e be kɛe” nɛ Yehowa ligbi ɔ maa ba. (Hab. 2:3) Enɛ ɔ he ɔ, nyɛ ha nɛ waa fia wa pɛɛ si kaa wa ‘maa hyɛ Yehowa blɔ, nɛ waa ngɔ wa hɛ kɛ fɔ e nɔ, ejakaa lɛ ji nɔ nɛ ma he wa yi wami.’—Mika 7:7. w23.02 19 ¶15-16

Ke nɔ ko ngɛ yoku kuɔe ɔ, oti nɛ e kɛ maa e hɛ mi ji kaa e maa kuɔ kɛ ya su yoku ɔ yi mi. Se ke e ngɛ yoku ɔ kuɔe ɔ, hehi fuu ngɛ nɛ e ma nyɛ maa da si ngɛ nɛ e hyɛ afɛu níhi nɛ bɔle lɛ ɔ. Jã nɔuu kɛ̃ nɛ ke o kɛ haomi ko ngɛ kpee po ɔ, e sa nɛ o he be kɛ susu bɔ nɛ Yehowa yeɔ bua mo ha nɛ o yeɔ manye ɔ he. Daa ligbi loko o maa hwɔ si ɔ, mo bi o he ke: ‘Mɛni blɔ nɔ nɛ Yehowa gu kɛ ye bua mi mwɔnɛ ɔ? E ngɛ mi kaa loloolo ɔ, haomi ɔ ngɛ mohu lɛɛ, se mɛni blɔ nɔ nɛ Yehowa ngɛ mi ye buae konɛ ma nyɛ nɛ ma fĩ si?’ Moo hyɛ kaa o maa na nɔ́ kake ko nɛ ke e hí kulaa a, Yehowa pee ha mo lo. Ngɛ anɔkuale mi ɔ, eko ɔ, o sɔleɔ konɛ o nyagba a se nɛ po. (Filip. 4:6) Se e sa nɛ wa hɛ nɛ hi jɔɔmihi nɛ wa ngɛ náe amlɔ nɛ ɔ hu nɔ. Yehowa wo si kaa e maa wo wɔ he wami nɛ e maa ye bua wɔ konɛ wa nyɛ nɛ wa fĩ si. Enɛ ɔ he ɔ, o bua nɛ jɔ yemi kɛ buami nɛ Yehowa kɛ ngɛ mo hae be fɛɛ be ɔ he. Lɔ ɔ ma ha nɛ o na bɔ nɛ Yehowa ngɛ mo ye buae ha konɛ o ye manye be mi nɛ o kɛ haomihi ngɛ kpee po .—1 Mose 41:​51, 52. w23.01 19 ¶17-18

Mo bi o he ke: ‘Anɛ bɔ nɛ i baa ye je mi ha a tsɔɔ kaa i le kaa je nɛ ɔ nyagbe ɔ su si ta lo? Anɛ yi mi kpɔhi nɛ i mwɔɔ kɛ kɔɔ yunivɛsiti yami kɛ ní tsumi he ɔ tsɔɔ kaa Yehowa sɔmɔmi he hia mi pe nɔ́ fɛɛ nɔ́ ngɛ ye si himi mi lo? Anɛ i ngɛ hemi kɛ yemi kaa Yehowa ma ha i kɛ ye weku ɔ wa hiami níhi lo? Ke Yehowa na kaa wa bɔɔ mɔde kaa wa maa sa e hɛ mi ngɛ nɔ́ fɛɛ nɔ́ nɛ wa peeɔ ɔ mi ɔ, e bua jɔɔ wawɛɛ. (Mat. 6:​25-27, 33; Filip. 4:​12, 13) Be fɛɛ be ɔ, e sa nɛ waa hyɛ níhi nɛ wa susuɔ he ɔ saminya, konɛ waa pee tsakemihi nɛ a he hia kaa waa pee ɔ. Paulo de Korinto bi ɔmɛ ke: “Nyɛɛ ya nɔ nɛ nyɛɛ hi nyɛ he kae nɛ nyɛɛ hi hyɛe kaa nyɛ ngɛ hemi kɛ yemi ɔ mi lo; nyɛɛ ya nɔ nɛ nyɛɛ hi nyɛ mi kpae konɛ nyɛ kɛ tsɔɔ nimli nɛ nyɛ nitsɛmɛ nyɛ ji.” (2 Kor. 13:5) Enɛ ɔ he ɔ, e sa nɛ waa ya nɔ nɛ wa dla wa susumi kɛ gu Mawu Munyu ɔ nɛ wa maa kane ɔ nɔ. E sa nɛ wa ha nɛ wa susumi kɛ Yehowa nɔ ɔ nɛ kɔ, nɛ waa pee nɔ́ fɛɛ nɔ́ nɛ ma ha nɛ waa sa e hɛ mi.—1 Kor. 2:​14-16. w23.01 9 ¶5-6