August

Anɛ o le nɔ́ he je nɛ Yehowa ngma nihi nɛ a kɛ a munyu tumi tsɔɔ kaa a yeɔ lɛ gbeye nɛ a pueɔ a yi mi tɛ ngɛ e biɛ ɔ he ɔ “a biɛ” ɔ lo? Wa munyu tumi tsɔɔ nɔ́ nɛ ngɛ wa tsui mi. Yesu de ke: “Nɔ́ nɛ hyi tsui ɔ tɔ ɔ, lɔ ɔ nɛ nya deɔ.” (Mat. 12:34) Yehowa suɔ kaa nihi nɛ a suɔ lɛ ɔ nɛ a ná bua jɔmi kɛ ya neneene ngɛ je ehe ɔ mi. Bɔ nɛ wa tuɔ munyu ha a maa tsɔɔ ke ji Mawu maa kplɛɛ wa jami ɔ nɔ loo e be nɔ kplɛɛe. (Yak. 1:26) Nihi nɛ a sume Mawu ɔ a ti ni komɛ kɛ abofu tuɔ munyu, a kɛ nihi tui munyu ngɛ mi mi jɔmi mi, nɛ a munyu tumi tsɔɔ kaa a woɔ a he nɔ. (2 Tim. 3:​1-5) Wa sume nɛ waa pee wa ní kaa mɛ. Wa suɔ kaa wa munyu tumi nɛ sa Yehowa hɛ mi. Ke wa ya Kristofohi a kpehi a sisi ɔ, waa kɛ mi mi jɔmi tuɔ munyu, nɛ ke wa ya fiɛɛmi hu wa peeɔ jã nɔuu. Se ke waa kɛ wa weku li ngɛ munyu tue ngɛ he nɛ nihi be lejɛ ɔ nɛ waa kɛ abofu tuɔ munyu, nɛ wa je we mi mi jɔmi kpo ɔ, anɛ Yehowa bua maa jɔ wa he lo?—1 Pet. 3:7. w22.04 5 ¶4-5

Mawu ngɔ kɛ wo koli nyɔngma amɛ kɛ lohwe awi yelɔ ɔ a tsui mi konɛ a kpata Babilon Ngua a hɛ mi. Ee. Yehowa maa wo je ma amɛ he wami konɛ a ngɔ lohwe awi yelɔ tsutsuutsu ɔ nɛ ji Je Ma Amɛ A Kake Peemi Kuu ɔ kɛ tua lakpa jamihi tsuo nɛ ngɛ je ɔ mi ɔ konɛ a kpata a hɛ mi pɛsɛpɛsɛ. (Kpoj. 18:​21-24) Mɛni enɛ ɔ tsɔɔ wɔ? E he hia nɛ waa ya nɔ nɛ wa ha nɛ wa ‘jami nɛ he tsɔ, nɛ mu ko nɛ ko hi he ngɛ wa Mawu ɔ hɛ mi.’ (Yak. 1:27) E sɛ nɛ waa ngmɛ blɔ kɔkɔɔkɔ nɛ lakpa tsɔɔmihi nɛ ná wa nɔ he wami, nɛ e sɛ nɛ waa ngɔ wa he kɛ wo gbijlɔhi nɛ a kɛ wɔ jami ngɛ tsakpa mi. Jehanɛ hu ɔ, e sɛ nɛ waa pee wa ní kaa bɔ nɛ nihi nɛ a be je mi bami ɔ peeɔ ɔ. E sa nɛ waa yu wa he kɛ je mumi yayami ní peepeehi nɛ Babilon Ngua a ngɔɔ e he kɛ woɔ mi ɔ he. Jehanɛ hu ɔ, e sa waa ya nɔ nɛ waa bɔ nihi kɔkɔ nɛ a “je kpo ngɛ e mi” konɛ Mawu nɛ ko kpata a hɛ mi kɛ piɛɛ e he.—Kpoj. 18:4. w22.05 11 ¶17; 14 ¶18

Fɔli, nyɛ hla blɔ slɔɔtohi nɛ o maa gu nɔ kɛ tsɔɔ o bimɛ Yehowa he ní kɛ ní kpakpahi fuu nɛ e pee ha mo ɔ he munyu. (5 Mose 6:​6, 7) Enɛ ɔ peemi he hia wawɛɛ, titli ɔ, ke o kɛ o he piɛɛlɔ ɔ be jami kake mi nɛ tsa pi be fɛɛ be hu nɛ o nyɛɔ nɛ o kɛ o bimɛ kaseɔ ní ngɛ we mi. Nyɛmiyo ko nɛ a tsɛɛ lɛ ke Christine ɔ de ke: “Be kakaaka komɛ pɛ nɛ i náa nɛ i kɛ tuɔ Yehowa he munyu, enɛ ɔ heɔ, ke i ná he blɔ saisaa ko ɔ, wa sɛɛɔ ní.” Jehanɛ hu ɔ, moo tu Yehowa asafo ɔ kɛ nyɛmimɛ nyumuhi kɛ yihi a he munyu kpakpa. Koo tu nikɔtɔma amɛ a he munyu nyanyaanya. Nɔ́ nɛ o ma de kɛ kɔ nikɔtɔma amɛ a he ɔ lɛ maa tsɔɔ kaa ke o bimɛ ɔmɛ kɛ nyagba ngɛ kpee ɔ, a ma ya bi yemi kɛ buami kɛ je nikɔtɔma amɛ a ngɔ aloo a be yae.Ha nɛ tue mi jɔmi nɛ hi o we ɔ mi. Mo je suɔmi kpo kɛ tsɔɔ o huno ɔ kɛ o bimɛ ɔmɛ be fɛɛ be. O kɛ o huno ɔ nɛ tu munyu ngɛ mi mi jɔmi kɛ bumi mi, nɛ o tsɔse o bimɛ ɔmɛ nɛ mɛ hu a pee jã. Enɛ ɔ he ɔ, moo pee níhi nɛ ma ha nɛ e he be wae ha o bimɛ ɔmɛ kaa a maa kase Yehowa he ní.—Yak.3:18. w22.04 18 ¶10-11

Sɛ gbi nɛ Yesu kɛ ha Efeso asafo ɔ tsɔɔ kaa a fĩ si ngɛ níhi fuu a mi, nɛ a ya nɔ nɛ a sɔmɔ Yehowa ngɛ nyagbahi nɛ a mi wa nɛ a kɛ kpe ɔ tsuo se. Se kɛ̃ ɔ, a ngmɛɛ kekleekle suɔmi nɛ a ná kɛ ha Yehowa a he. E sa nɛ a ha nɛ a suɔmi ɔ mi nɛ wa ekohu. Ke a pee we jã a, Yehowa be a jami ɔ nɔ kplɛɛe. Mwɔnɛ ɔ hu ɔ, e sa nɛ waa pee babauu pe si nɛ wa ma fĩ pɛ. E sa nɛ wa fĩ si ngɛ yi mi tomi kpakpa he je. Níhi nɛ wa peeɔ ɔ he hia wa Mawu ɔ, se pi lɔ ɔ pɛ. Nɔ́ he je nɛ wa peeɔ jamɛ a ní ɔmɛ ɔ hu he hia lɛ. Yi mi tomi he je nɛ wa peeɔ nɔ́ ko ɔ he hia lɛ ejakaa e suɔ nɛ waa da suɔmi nɛ mi wa nɛ wa ngɛ ha lɛ ɔ kɛ hɛ sa nɛ wa ngɛ ɔ nɔ kɛ ja lɛ. (Abɛ 16:2; Maak. 12:​29, 30) E sa nɛ waa ya nɔ nɛ wa ha nɛ wa hɛ nɛ hi wa he nɔ. Saadis asafo mi bi ɔmɛ a nyagba a ngɛ ekpa kulaa. E ngɛ mi kaa a kɛ kã sɔmɔ Mawu be ko nɛ be ɔ mohu lɛɛ, se a ba gbɔjɔ ngɛ mumi mi. Enɛ ɔ he ɔ, Yesu de mɛ ke a ‘hɛ nɛ tsɛ̃.’ (Kpoj. 3:​1-3) Ngɛ anɔkuale mi ɔ, Yehowa hɛ be wa ní tsumi ɔ nɔ jee.—Heb. 6:10. w22.05 3 ¶6-7

Salomo de ke, bua jɔmi nɛ wa náa ngɛ ní tsumi mi ɔ ji “Mawu nike ní.” (Fiɛɛ. 5:​18, 19) Akɛnɛ Salomo tsuɔ ní wawɛɛ he je ɔ, e le nɔ́ nɛ e ngɛ dee. E ma wehi, e pee wai ngmɔhi, e pee abɔɔhi, e tsua takuhi nɛ e po mahi. (1 Ma. 9:19; Fiɛɛ. 2:​4-6) Enɛ ɔmɛ nɛ e pee ɔ tsɔɔ kaa e tsu ní wawɛɛ, nɛ atsinyɛ jemi ko be he kaa e ha lɛ bua jɔmi. Se Salomo le kaa tsa pi jamɛ a ní ɔmɛ pɛ nɛ ma ha lɛ bua jɔmi nitsɛnitsɛ. Enɛ ɔ he ɔ, e pee níhi fuu ngɛ Yehowa sɔmɔmi mi. Kaa nɔ hyɛmi nɔ́ ɔ, e hyɛ nɛ a ma sɔlemi we nɛ ngɛ fɛu kɛ ha Yehowa jami. A ngɔ jeha kpaago kɛ ma sɔlemi we nɛ ɔ! (1 Ma. 6:38; 9:1) Benɛ Salomo ngɔ e he kɛ wo he lo nya ní tsumi kɛ Mawu jami mi ɔ, e na kaa Mawu jami haa nɔ bua jɔmi pe he lo nya ní tsumi. E ngma ke: “Nyagbe ɔ, nɔ́ nɛ ma de kɛkɛ ji kaa moo ye Mawu gbeye, nɛ o ye e mlaa amɛ a nɔ.”—Fiɛɛ. 12:13. w22.05 22 ¶8

Baiblo ɔ tu nihi fuu nɛ Yehowa ngɔ a tɔmihi kɛ ke mɛ faa he munyu. Anɛ o le a ti ni komɛ lo? Eko ɔ, o kai Matsɛ Manase. Jamɛ a nyumu yiwutsotsɛ ɔ pee ní yayahi fuu kɛ si Yehowa. E ja lakpa mawuhi nɛ e wo nihi he wami nɛ mɛ hu a pee jã. E gbe lɛ nitsɛ e bimɛ nɛ e ngɔ mɛ kɛ sã afɔle kɛ ha lakpa mawuhi. E ya nɔ nɛ e pee ní yayamihi hluu po kaa e pee la kpa mawu ko he amaga kɛ ya ma Yehowa sɔlemi we klɔuklɔu ɔ. Baiblo ɔ de ngɛ e he ke: ‘E pee yayamihi babauu kɛ si Yehowa, nɛ e kɛ wo e mi mi la.’ (2 Kron. 33:​2-7) Se ngɛ enɛ ɔ tsuo se ɔ, benɛ Manase pia e he kɛ je e tsui mi ɔ, Yehowa ngɔ e he yayami ɔ kɛ ke lɛ faa. (2 Kron. 33:​12, 13) Eko ɔ, Matsɛ David hu ba o juɛmi mi. E pee yayamihi babauu nɛ hɛdɔ ngɛ a he kɛ si Yehowa. Ekomɛ ji kaa, e puɛ gba, nɛ e gbe nɔmlɔ. Se benɛ David pia e he kɛ je e tsui mi nɛ e kplɛɛ e tɔmi ɔ nɔ ɔ, Yehowa ngɔ lɛ hu e yayami ɔmɛ kɛ ke lɛ. (2 Sam. 12:​9, 10, 13, 14) Niinɛ, wa ma nyɛ ma ná nɔ mi mami kaa Yehowa suɔ nɛ e ngɔ wa tɔmi ɔmɛ kɛ ke wɔ. w22.06 3 ¶7

Pi be fɛɛ be nɛ e ngɛ gbɔjɔɔ kaa wa maa hɛɛ wa hɛ kɛ nɔ fɔmi ɔ mi wawɛɛ. Eko ɔ, wa ma susu kaa Mawu si womi ɔmɛ a mi bami ɔ se ngɛ kɛe tsɔ. Se mo kai kaa Yehowa be sisije, nɛ e be nyagbe, enɛ ɔ he ɔ, bɔ nɛ e naa be ha a ngɛ ekpa kulaa ngɛ bɔ nɛ wa naa be ha a he. (2 Pet. 3:​8, 9) E ma tsu e yi mi tomi ɔ he ní ngɛ blɔ nɛ hi pe kulaa nɔ, ngɛ be nɛ wa hyɛ we blɔ mi. Mɛni maa ye bua wɔ nɛ waa hɛɛ wa hɛ kɛ nɔ fɔmi ɔ mi wawɛɛ be mi nɛ wa to wa tsui si kɛ ngɛ mlɛe nɛ Mawu si womi ɔmɛ nɛ a ba mi ɔ? (Yak. 5:7) Yehowa ji nɔ nɛ ma ha nɛ níhi nɛ wa ngɔ wa hɛ kɛ fɔ nɔ ɔ maa ba mi. Enɛ ɔ he ɔ, ke huɛ bɔmi nɛ ngɛ waa kɛ lɛ wa kpɛti ɔ mi wa a, lɔ ɔ ma ha nɛ wa maa hɛɛ wa hɛ kɛ nɔ fɔmi ɔ mi wawɛɛ. Ngɛ anɔkuale mi ɔ, Baiblo ɔ tsɔɔ kaa tsakpa ngɛ hɛ kɛ nɔ fɔmi kɛ hemi kɛ yemi a kpɛti. E tsɔɔ kaa bɔ nɛ pee nɛ wa ná hɛ kɛ nɔ fɔmi ɔ, e sa nɛ wa he ye kaa Yehowa ngɛ, nɛ lɛ ji “nihi nɛ a ngɛ e se blɔ hlae wawɛɛ ɔmɛ a hiɔ wolɔ.” (Heb. 11:​1, 6) Ke wa he ye kaa Yehowa ngɛ niinɛ ɔ, wa ma ná nɔ mi mami nɛ mi wa kaa e maa ye e si womi ɔmɛ a nɔ. Loko hɛ kɛ nɔ fɔmi nɛ wa ngɛ ɔ mi maa wa a,e sa waa sɔle ha Yehowa, nɛ o kane e Munyu ɔ. E ngɛ mi kaa wa be nyɛe maa na Yehowa mohu lɛɛ, se wa ma nyɛ maa hɛ kɛ su e he. Waa kɛ lɛ ma nyɛ maa sɛɛ ní ngɛ sɔlemi mi, ejakaa wa le kaa e maa bu wɔ tue.—Yer. 29:​11, 12. w22.10 26-27 ¶11-13

Mo susu si fɔfɔɛ nɛ ɔ he nɛ o hyɛ. Hiob hii si ngɛ la zu mi, nɛ e ngɛ nɔ nae wawɛɛ. (Hiob 2:8) E huɛmɛ ngɛ munyu yayahi tue kɛ ngɛ lɛ sie, nɛ a ngɛ e biɛ puɛe. E nyagba a pee kaa tlomi ko nɛ jiɔ ngɛ e kuɛ nɔ, nɛ e bimɛ ɔmɛ a gbenɔ ɔ ha nɛ e ngɛ aywilɛho yee wawɛɛ nitsɛ. Sisije ɔ, Hiob tui e nyagba a he munyu. (Hiob 2:13) Se ke Hiob huɛmɛ nɛ ɔmɛ susu kaa akɛnɛ e tui e nyagba a he munyu he je ɔ, e ma kua Yehowa a, lɛɛ a bua kulaa. Ligbi ko ɔ, Hiob wo e yi nɔ nɛ e hyɛ e huɛ yaya a mɛ a hɛ mi nɛ e de ke: “I be dami ní peemi he ngmɛe kɛ ya si benɛ ma gbo!” (Hiob 27:​5, NW) Mɛni ye bua Hiob nɛ e pee kã ngɛ nyagbahi nɛ e kɛ ngɛ kpe ɔ tsuo se? Benɛ e kɔni mi jɔ̃ po ɔ, e ná hɛ kɛ nɔ fɔmi kaa e Mawu nɛ e ngɛ suɔmi ɔ ma ha nɛ e nyagba a se maa po ligbi ko kɛ̃. E le kaa ke e gbo po ɔ, Yehowa ma tle lɛ si.—Hiob 14:​13-15. w22.06 22 ¶9

Hiɔwe kɛ zugba Bɔlɔ ɔ ha wɔ nike ní ko nɛ se be. Lɔ ɔ ji kaa, e ngmɛ wɔ blɔ konɛ waa sɔle kɛ ha lɛ. Mo susu he nɛ o hyɛ. Wa ma nyɛ ma de Yehowa níhi nɛ ngɛ wa tsui mi be fɛɛ be ngɛ gbi fɛɛ gbi mi. Ke wa ngɛ hiɔ sa nɔ loo a wo wɔ tsu po ɔ, wa ma nyɛ maa sɔle ha wa Tsɛ nɛ ngɛ suɔmi ɔ, nɛ wa ngɛ nɔ mi nami kaa e maa bu wɔ tue. Wa bua jɔ he blɔ nɛ ɔ nɛ wa ngɛ ɔ he wawɛɛ. Matsɛ David bua jɔ he blɔ nɛ e ná kaa e maa sɔle kɛ ha Yehowa a he wawɛɛ. E la ha Yehowa ke: “Ha nɛ ye kue fami ɔ nɛ je via kaa tsopa kɛ e he via ngɛ o hɛ mi.” (La 141:​1, 2) Ngɛ David be ɔ mi ɔ, tsopa kɛ e he via nɛ osɔfo ɔmɛ kɛ tsuɔ ní ɔ ji nɔ́ ko nɛ a jeɔ blɔ toɔ he blɔ nya saminya. (2 Mose 30:​34, 35) David suɔ nɛ e susu nɔ́ nɛ e ma de Yehowa ngɛ sɔlemi mi ɔ he saminya kaa bɔ nɛ nihi nɛ a tsuɔ tsopa kɛ e he via he ní ɔ toɔ a tsui si nɛ a peeɔ lɛ saminya a. Jã ji bɔ nɛ wɔ hu wa suɔ nɛ waa pee. Wa suɔ nɛ wa sɔlemi nɛ pee nɔ́ nɛ Yehowa bua jɔ he. w22.07 20 ¶1-2; 21 ¶4

Yehowa nɔ́ ji lue yemi. Yehowa ha we wɔ he blɔ kaa ke nɔ ko tɔ̃ wa nɔ ɔ, waa gbla e tue. (Rom. 12:​20, 21) Akɛnɛ wa yi mluku he je ɔ, wa be nyɛe maa kojo sane ko saminya kaa bɔ nɛ Mawu maa kojo ɔ. (Heb. 4:13) Be komɛ ɔ, wa daa wa he numi nɔ kɛ kojoɔ, nɛ lɔ ɔ ha we nɛ waa kojo ngɛ dami mi. Yehowa ngɔ e mumi ɔ kɛ wo Yakobo he wami nɛ e ngma ke: “Adesa mi mi fumi ɔ ngɔɛ Mawu dami kɛ bɛ.” (Yak. 1:20) Wa ma nyɛ ma ná nɔ mi mami kaa Yehowa maa pee nɔ́ nɛ da, nɛ e maa ye dami sane. Ke waa kɛ yayami ke ɔ, lɔ ɔ tsɔɔ kaa wa ngɛ nɔ mi mami kaa Yehowa kojoɔ ngɛ dami mi. Ke wa he ye kaa Yehowa maa kojo sanehi tsuo ngɛ dami mi ɔ, lɔ ɔ tsɔɔ kaa wa ngɛ nɔ mi mami kaa Yehowa ma nyɛ ma je nyagbahi nɛ yayami ngɔ kɛ ba a kɛ je. Ngɛ e je e ehe ɔ mi ɔ, ní yayamihi nɛ wa gblee mi ɔ, ‘wa be kaie hu; wa hɛ maa je a nɔ pɛsɛpɛsɛ.’—Yes. 65:17. w22.06 10-11 ¶11-12

Nyɛmi nɛ nihi nyɛɔ wɔ ɔ ji odase nɛ tsɔɔ kaa Yehowa kplɛɛ wa nɔ. (Mat. 5:​11, 12) Abosiami lɛ ha nɛ nihi teɔ si kɛ woɔ wɔ ɔ nɛ. Se Yesu ngɛ he wami kulaa pe Satan! Ngɛ Yesu yemi kɛ buami nya a, wa ngɛ sane kpakpa fiɛɛe kɛ ngɛ nihi tsɔɔe ngɛ je kɛ wɛ. Nyɛ ha nɛ waa hyɛ odase nɛ tsɔɔ jã. Nyagba kpa ko hu nɛ waa kɛ kpeɔ ngɛ fiɛɛmi ní tsumi ɔ mi ji kaa nihi tuɔ gbi slɔɔtoslɔɔtohi nɛ tsa pi tsuo nɛ wa nuɔ sisi. Ngɛ nina nɛ Yesu ha nɛ bɔfo Yohane na a mi ɔ, Yesu tsɔɔ kaa sane kpakpa a maa ye jamɛ a nyagba a nɔ ngɛ wa be nɛ ɔ mi. (Kpoj. 14:​6, 7) Ngɛ mɛni blɔ nɔ? Wa ngɛ Matsɛ Yemi ɔ he sɛ gbi ɔ fiɛɛe kɛ ngɛ nihi babauu tsɔɔe. Mwɔnɛ ɔ, nihi nɛ a ngɛ je kɛ wɛ nyɛɔ nɛ a kaneɔ Baiblo kasemi womihi ngɛ jw.org ɔ nɔ ejakaa a tsɔɔ wa womi ɔmɛ a sisi kɛ ya gbihi nɛ hiɛ pe 1,000 mi. Blɔ Tsɔɔmi Ajla Toli ɔmɛ kplɛɛ nɔ kaa a tsɔɔ O Ma Nyɛ Ma Ná Bua Jɔmi Kɛ Ya Neneene! womi ɔ sisi kɛ ya gbihi 700 kɛ se mi. Womi nɛ ɔ ji womi titli nɛ waa kɛ nihi kaseɔ. w22.07 9 ¶6-7

Yesu nuɔ nɔ́ he ha nihi. Bɔfo Mateo de ke: “Benɛ e na asafo ku ɔmɛ ɔ, a he pee lɛ mɔbɔ ejakaa a plaa mɛ nɛ a gbɛ fia kaa jijɔhi nɛ a be hyɛlɔ.” (Mat. 9:36) Kɛ Yehowa nu he ha kɛɛ? Yesu de ke: “Ye Tsɛ nɛ ngɛ hiɔwe ɔ sume kaa ni nyafii nɛ ɔmɛ a kpɛti nɔ kake hɛ mi nɛ kpata.” (Mat. 18:14) Munyu nɛ ɔ woɔ wa bua wawɛɛ! Ke wa ya nɔ nɛ wa le Yesu saminya a, suɔmi nɛ wa ngɛ ha Yehowa a hu mi maa wa. Ke o kɛ nyɛmimɛ nɛ a nane pi si ngɛ Mawu jami mi nɛ a ngɛ o we asafo ɔ mi ɔ bɔɔ ɔ, e ma nyɛ maa ye bua mo nɛ o kase blɔ nɔ nɛ o maa gu kɛ je suɔmi kpo. Jehanɛ hu ɔ, e maa ye bua mo nɛ o maa pee Kristofo no nɛ e nane pi si. Nyɛmimɛ nɛ ɔmɛ ngɛ bua jɔmi ngɛ si himi mi. A pia we a he kaa a mwɔ a yi mi kpɔ kaa a ma sɔmɔ Yehowa. O ma nyɛ ma bi mɛ nɛ a de mo níhi a si kpami komɛ nɛ a ná ngɛ Yehowa sɔmɔmi mi. Nɛ ke e he ba hia nɛ o mwɔ yi mi kpɔ ko nɛ he hia wawɛɛ ɔ, mo bi mɛ ga womi. Mo kai kaa, “he nɛ ga woli hiɛ ngɛ ɔ, tue mi jɔmi ngɛ lejɛ ɔ.” w22.08 3 ¶6-7

Wɔ tsuo waa kɛ kahi maa kpe ngɛ wa si himi mi. Se Yehowa be wɔ sie ke waa kɛ kahi ngɛ kpee. Yehowa hyɛɔ wa nɔ be fɛɛ be kaa bɔ nɛ tsɛ nɛ ngɛ suɔmi peeɔ ɔ. E ngɛ wa kasa nya, e pee klaalo kaa e maa bu wa sɔlemi tue, nɛ e maa ye bua wɔ. (Yes. 43:2) Wa ngɛ nɔ mi mami kaa wa ma nyɛ maa da kahi nɛ waa kɛ kpeɔ ɔ nya, ejakaa Yehowa je suɔmi mi nɛ e ha wɔ nɔ́ fɛɛ nɔ́ nɛ wa hia konɛ wa nyɛ nɛ wa fĩ si. Sɔlemi, Baiblo ɔ, mumi mi niye ní babauu nɛ wa nine suɔ nɔ, kɛ suɔmi mi nɛ wa nyɛmimɛ jeɔ kɛ yeɔ bua wɔ ngɛ behi nɛ a mi wa mi ɔ tsuo ji nike ní nɛ je Yehowa ngɔ. Wa bua jɔ wawɛɛ kaa wa ngɛ hiɔwe Tsɛ nɛ buɔ wa he! “Wa tsui nyaa ngɛ e mi.” (La 33:​21, NW) Ke waa kɛ níhi nɛ Yehowa ha wɔ ɔ tsu ní ɔ, e tsɔɔ kaa wa hɛ sa bɔ nɛ e ngɛ wa nɔ hyɛe ha a. Ke wa pee wa blɔ fa mi nɔ́ ɔ, Mawu maa ya nɔ maa hyɛ wa nɔ. Jehanɛ hu ɔ, ke wa ya nɔ nɛ wa pee nɔ́ fɛɛ nɔ́ nɛ wa ma nyɛ nɛ wa bu lɛ tue, nɛ wa pee níhi nɛ da ngɛ e hɛ mi ɔ, e maa hyɛ wa nɔ kɛ ya neneene! w22.08 13 ¶15-16

Mwɔnɛ ɔ nihi fuu be hemi kɛ yemi ngɛ ni kpahi a mi. A li nihi tutuutu nɛ a ma nyɛ maa ngɔ a hɛ kɛ fɔ a nɔ. A he we yi kaa nihi nɛ a ngɛ bumi kɛ ha mɛ kaa nihi nɛ a nyɛɛɔ ma kudɔmi sanehi a hɛ mi, je mi si kpali kɛ jua yeli ɔmɛ susuɔ a he. Jehanɛ se hu ɔ, a be bumi ko kulaa kɛ ha jami hɛ mi nyɛɛli nɛ a tsɛɔ a he ke Kristofohi ɔ. Enɛ ɔ he ɔ, e be nyakpɛ kaa nihi be hemi kɛ yemi ngɛ Baiblo ɔ, nɛ ji womi nɛ jami hɛ mi nyɛɛli nɛ ɔmɛ tsɔɔ kaa a yeɔ e mi munyu ɔmɛ a nɔ ɔ mi.Yehowa we bi tsuo ngɛ nɔ mi mami kaa Yehowa ji “Mawu anɔkualetsɛ,” nɛ e suɔ nɛ e hi ha wɔ be fɛɛ be. (La 31:5; Yes. 48:17) Wa le kaa wa ma nyɛ ma he nɔ́ fɛɛ nɔ́ nɛ wa kaneɔ ngɛ Baiblo ɔ mi ɔ maa ye. Waa kɛ Baiblo he ní lelɔ ko kpaa gbi ngɛ munyu ko nɛ e ngma a he. E ngma ke: “Nɔ́ fɛɛ nɔ́ nɛ Mawu de ɔ ji anɔkuale, nɛ níhi tsuo nɛ e de ɔ maa ba mi kokooko. Mawu we bi ma nyɛ ma he nɔ́ fɛɛ nɔ́ nɛ e de ɔ ye, ejakaa a ngɛ hɛ kɛ nɔ fɔmi ngɛ a Mawu ɔ mi.” w23.01 2 ¶1-2

Ke wa wo wa nyɛmimɛ ɔmɛ a hemi kɛ yemi nɛ a ngɛ ngɛ Yehowa mi ɔ mi he wami ɔ, lɔ ɔ fiaa mɛ kɛ maa si. Nihi nɛ a pi Yehowa Odasefohi ɔ yeɔ wa nyɛmimɛ ɔmɛ a ti ni komɛ a he fɛu. Ni komɛ hu ɔ, hiɔ nɛ nya wa ngɛ mɛ haoe, aloo a pee mɛ nɔ́ dɔdɔɛ ko nɛ e ngɛ mɛ haoe. Wa nyɛmimɛ komɛ hu ngɛ nɛ a ngɛ blɔ hyɛe kaa nyagbe ɔ maa ba se e bɛ lolo. Si fɔfɔɛ nɛ ɔmɛ ma nyɛ maa ka Kristofohi nɛ a ngɛ mwɔnɛ ɔ a hemi kɛ yemi. Kristofohi nɛ a hi si ngɛ kaseli ɔmɛ a be ɔ mi hu kɛ haomihi kaa jã kpe. Bɔfo Paulo ngɔ Ngmami ɔ kɛ wo e nyɛmimɛ ɔmɛ a hemi kɛ yemi ɔ mi he wami. Kaa nɔ hyɛmi nɔ́ ɔ, eko ɔ, Yuda bi nɛ a ba pee Kristofohi ɔ li nɔ́ nɛ a ma de a weku li nɛ a pi Kristofohi nɛ a deɔ ke Yuda jami ɔ hi pe Kristofohi a jami ɔ. Atsinyɛ jemi ko be he kaa sɛ womi nɛ Paulo ngma kɛ ha Hebri Kristofo ɔmɛ wo mɛ he wami wawɛɛ. (Heb. 1:​5, 6; 2:​2, 3; 9:​24, 25) Bɔ nɛ Paulo kɛ mɛ susu níhi a he ha a ye bua mɛ nɛ a le nɔ́ nɛ a ma de a weku li nɛ a pi Kristofohi ɔ. w22.08 23-24 ¶12-14

Nihi nɛ a ngɛ Satan je ɔ mi ɔ li nɔ nɛ e sa kaa a he lɛ nɛ a ye. Be fɛɛ be ɔ, a kɔni mi jɔ̃ɔ ngɛ jua yeli, ma hɛ mi nyɛɛli kɛ jami hɛ mi nyɛɛli a ní peepee he. Enɛ ɔ ha nɛ nihi fuu he we a huɛmɛ, a kpɔ mi bimɛ kɛ a weku li po yi. Se e sɛ nɛ lɔ ɔ nɛ pee wɔ nyakpɛ. Baiblo ɔ gba kɛ fɔ si kaa: ‘Ngɛ nyagbe ligbi ɔmɛ a mi ɔ, adesahi maa pee nihi nɛ a jeɔ nɔ se, nɔ he guɛ gbeli kɛ nɔ se blɔ tsɔɔli.’ Enɛ ɔ tsɔɔ kaa nihi maa pee a ní kaa Satan, nɛ ji níhi a blɔ nya tomi nɛ ɔ mi mawu ɔ nɛ wa be nyɛe ma he lɛ maa ye ɔ. (2 Tim. 3:​1-4; 2 Kor. 4:4) Wa ji Kristofohi, lɔ ɔ he ɔ, wa le kaa wa ma nyɛ ma he Yehowa maa ye. Wa ngɛ nɔ mi mami kaa e suɔ wɔ, nɛ kaa e huɛmɛ ɔ, “e be wɔ kuae.” (La 9:10) Wa ma nyɛ ma he Yesu Kristo hu maa ye ejakaa e ngɔ e wami kɛ fɔ si ha wɔ. (1 Pet. 3:18) Baiblo ɔ mi munyuhi nɛ wɔ nitsɛmɛ waa kɛ tsu ní ngɛ wa si himi mi ɔ ha nɛ wa na hu kaa blɔ tsɔɔmihi nɛ wa náa ngɛ Baiblo ɔ mi ɔ da.—2 Tim. 3:​16, 17. w22.09 2 ¶1-2

Bua jɔmi nitsɛnitsɛ ɔ, pi he numi ko nɛ wa náa ngɛ be kpiti ko mi, loo e baa kɛkɛ be bɔɔ se ɔ, e je. Nɔ ko ma nyɛ ma ná bua jɔmi nitsɛ ngɛ e si himi mi tsuo. Ngɛ mɛni blɔ nɔ? Yesu de ngɛ e Yoku ɔ Nɔ Fiɛɛmi ɔ mi ke: “Nihi nɛ a le kaa a hia mumi mi níhi ɔ ngɛ bua jɔmi.” (Mat. 5:3) Yesu le kaa adesahi suɔ nɛ a le wa Bɔlɔ ɔ nɛ ji Yehowa Mawu, nɛ a suɔ nɛ a ja lɛ hulɔ, ejakaa jã nɛ e bɔ mɛ. Lɔ ɔ ji wa ‘mumi mi hiami níhi.’ Akɛnɛ Yehowa ji “bua jɔmi Mawu” he je ɔ, nihi nɛ a jaa lɛ ɔ hu ma nyɛ ma ná bua jɔmi. (1 Tim. 1:11) Anɛ jã nɔ́ fɛɛ nɔ́ ya nɔ saminya ngɛ wa si himi mi loko wa ma nyɛ ma ná bua jɔmi lo? Dɛbi. Ngɛ Yesu Yoku ɔ Nɔ Fiɛɛmi ɔ mi ɔ, e de ke “nihi nɛ a yeɔ kɔmɔ” ɔ, ma nyɛ ma ná bua jɔmi. Yesu de hu kaa “nihi nɛ a peeɔ nɔ́ nɛ da nɛ lɔ ɔ he je a waa mɛ yi mi” ɔ hu ma nyɛ ma ná bua jɔmi. (Mat. 5:​4, 10, 11)Yesu ngɛ tsɔɔe kaa ke níhi a mi hi ha wɔ ngɛ wa si himi mi ɔ, tsa pi lɔ ɔ nɛ ma ha wɔ bua jɔmi nitsɛnitsɛ, mohu ɔ, ja wa le wa mumi mi hiami níhi nɛ wa hɛ kɛ su Mawu he loko wa ma ná bua jɔmi.—Yak. 4:8. w22.10 6 ¶1-3

Nɔ́ se kɔmi ma nyɛ maa ye bua Kristofo no ko konɛ e le ‘be nɛ e sa nɛ e pee dii kɛ be nɛ e sa nɛ e tu munyu.’ (Fiɛɛ. 3:7) Ngɛ ma komɛ a nɔ ɔ, a pɔɔ demi ke: “Munyu tumi ngɛ kaa sika hiɔ, se dii peemi ngɛ kaa sika tsu.” Nɔ́ nɛ e tsɔɔ ji, be komɛ ɔ, e hi kaa o maa pee dii pe nɛ o maa tu munyu. Mo susu nɔ hyɛmi nɔ́ nɛ ɔ he nɛ o hyɛ. Ke pee ɔ, a deɔ asafo mi nɔkɔtɔma ko nɛ e ngɛ níhi a si kpami kaa e ya ye bua asafo kpa ko kɛ tsu a nyagba komɛ a he ní. Mo kadi nɔ́ nɛ asafo mi nɔkɔtɔma kpa ko de kɛ kɔ e he. E de ke: “Be fɛɛ be ɔ, e hyɛɛ saminya kaa e be asafo kpa ko mi laami sane kpo jee.” Akɛnɛ asafo mi nɔkɔtɔma nɛ ɔ kɔɔ nɔ́ se he je ɔ, nikɔtɔma kpa amɛ nɛ a ngɛ e we asafo ɔ mi ɔ ngɛ bumi kɛ ha lɛ. A ngɛ nɔ mi mami ngɛ e mi kaa e be a laami sane kpo jee kɛ tsɔɔ ni kpahi. Anɔkuale yemi ji su kpa ko nɛ wa hia ke wa suɔ nɛ nihi nɛ a he wɔ nɛ a ye. Ke nɔ ko yeɔ anɔkuale ɔ, wa heɔ lɛ yeɔ ejakaa wa le kaa be fɛɛ be ɔ, e maa tu anɔkuale.—Efe. 4:25; Heb. 13:18. w22.09 12 ¶14-15

Nihi fuu bui ngmlaa nɛ nile nitsɛnitsɛ ngɛ “kpae ngɛ gbɛjegbɛ” ɔmɛ a nɔ ɔ tue. (Abɛ 1:20) Baiblo ɔ tsɔɔ kaa ni komɛ kuaa nile, mɛ ji: “nihi nɛ a be níhi a si kpami,” “he fɛu yeli,” kɛ “kuasiahi.” (Abɛ 1:​22-25) Nihi nɛ a “be níhi a si kpami” ɔ ji nihi nɛ a heɔ nɔ́ fɛɛ nɔ́ nɛ a nuɔ ɔ yeɔ, nɛ e yi kaa a maa sisi mɛ. (Abɛ 14:15 NW, sisi ningma.) Mo susu nihi ayɔhi abɔ nɛ jami hɛ mi nyɛɛli loo ma kudɔmi kuuhi a hɛ mi nyɛɛli sisi mɛ ɔ he nɛ o hyɛ. Ke a ti ni komɛ ba na kaa a hɛ mi nyɛɛli ɔmɛ sisi mɛ ɔ, e dɔɔ mɛ wawɛɛ. Se nihi nɛ a wo a ta ngɛ Abɛ 1:22 ɔ lɛɛ ke a ba le po ɔ, a pee we he nɔ́ ko. (Yer. 5:31) A sume kaa a maa kase níhi nɛ Baiblo ɔ de ɔ, aloo a kɛ níhi nɛ Baiblo ɔ de ɔ ma tsu ní. Wa sume nɛ wa maa kase nihi nɛ a kua kaa a maa pee tsakemi ngɛ a si himi mi ɔ!—Abɛ 1:32; 27:12. w22.10 19 ¶5-7

Yehowa asafo ɔ ngɔɔ blɔ tsɔɔmi kɛ haa wɔ konɛ e po wa he piɛ. Be fɛɛ be ɔ, a kaiɔ wɔ kaa waa ngɔ wa fon nɔma nɛ ngɛ ní tsue ɔ kɛ ha asafo mi nikɔtɔma amɛ konɛ ke oslaa ko ba a, a nine nɛ su wa nɔ. Eko ɔ, a kɛ blɔ tsɔɔmi ma ha wɔ kaa wa ko je kpo, loo waa je he nɛ wa ngɛ ɔ, nɛ a maa tsɔɔ wɔ nɔ́ nɛ wa maa pee konɛ wa nine nɛ su níhi nɛ maa hia wɔ ɔ nɔ. Jehanɛ hu ɔ, a ma nyɛ maa tsɔɔ wɔ blɔ nɔ nɛ wa maa gu kɛ ye bua ni kpahi, kɛ be nɛ wa ma nyɛ maa pee jã. Ke wa bui mɛ tue ɔ, lɔ ɔ ma nyɛ maa ngɔ wa wami kɛ asafo mi nikɔtɔma amɛ nɛ a ngɛ wa he bue ɔ a wami kɛ wo oslaa mi. (Heb. 13:17) Oslaa aloo basabasa peemi ha nɛ nyɛmimɛ babauu je a wehi a mi, se a ngɛ mɔde bɔe konɛ a da si fɔfɔɛ ehe nɛ a ya je mi ɔ nya, nɛ́ a pee babauu ngɛ Yehowa sɔmɔmi mi. Wa nyɛmimɛ nɛ ɔmɛ ngɛ nɔ yae “nɛ a ngɛ munyu ɔ he sane kpakpa a jajee” kaa bɔ nɛ Kristofohi nɛ a hi si ngɛ kaseli ɔmɛ a be ɔ mi nɛ yi mi wami ha nɛ a gbɛ fĩa a pee ɔ. (Níts. 8:4) Fiɛɛmi ní tsumi ɔ ha nɛ a ngɔ a juɛmi kɛ ma Matsɛ Yemi ɔ nɔ mohu pe nyagbahi nɛ a kɛ ngɛ kpee ɔ. Enɛ ɔ ha nɛ a ya nɔ nɛ a ná bua jɔmi kɛ tue mi jɔmi. w22.12 19 ¶12-13

Wa ti nɔ fɛɛ nɔ he jua wa ha Yehowa. Loko Yesu maa tsɔ e kaseli ɔmɛ nɛ a ma ya fiɛɛ ɔ, e wo mɛ he wami kaa a ko ye nihi nɛ a maa te si kɛ wo mɛ ɔ gbeye. (Mat. 10:​29-31) E tu otoklii nɛ ji lohwe pɛlitsɛ ko nɛ pɔ he wawɛɛ ngɛ Israel ɔ he munyu. Ngɛ Yesu be ɔ mi ɔ, nihi bui jamɛ a lohwe ɔmɛ kulaa. Se Yesu de e kaseli ɔmɛ ke: “A ti nɔ kake po nɔɛ zugba nɛ́ nyɛ Tsɛ ɔ li he nɔ́ ko.” E de hu ke: “Nyɛ he jua wa kulaa pe otokliihi babauu.” Yesu ha nɛ e kaseli ɔmɛ na kaa Yehowa buɔ a ti nɔ fɛɛ nɔ he akɔtaa, enɛ ɔ he ɔ, e sɛ nɛ a ye nihi nɛ a teɔ si kɛ woɔ mɛ ɔ gbeye. Lɔ ɔ he ɔ, ke Yesu kaseli ɔmɛ ngɛ fiɛɛe ngɛ mahi kɛ kɔpehi a mi nɛ a na otokliihi ɔ, a kaiɔ nɔ́ nɛ Yesu de mɛ ɔ. Enɛ ɔ he ɔ, ke mo hu o na lohwe pɛlitsɛ nyafii ko ɔ, mo kai kaa Yehowa buɔ o he akɔtaa ejakaa o “he jua wa kulaa pe otokliihi babauu.” Lɔ ɔ he ɔ, ke nihi te si kɛ wo mo ɔ, koo ye gbeye kulaa ejakaa Yehowa maa ye bua mo. w23.03 18 ¶12

Be komɛ ɔ, wa weku li teɔ si kɛ woɔ wɔ, aloo wa ní tsumi puɛɔ. Ke waa kɛ nyagbahi ngɛ kpee be kɛkɛɛ ɔ, wa kɔni mi ma nyɛ ma jɔ̃. Ngɛ behi kaa jã mi ɔ, Satan haa nɛ wa susuɔ kaa Yehowa sume wɔ. Abosiami suɔ nɛ wa susu kaa Yehowa kɛ e we asafo ɔ lɛ ha nɛ wa ngɛ nɔ́ nae ɔ nɛ. Nɔ́ ko kaa jã ba Israel bi ɔmɛ a kpɛti ni komɛ a nɔ benɛ a ngɛ Egipt ɔ. Sisije ɔ, a he ye kaa Yehowa lɛ hla Mose kɛ Aaron konɛ a ba kpɔ̃ mɛ kɛ je nyɔguɛ tso mi. (2 Mose 4:​29-31) Se pee se nɛ Farao ha nɛ si himi ɔ mi wa ha mɛ ɔ, a pia Mose kɛ Aaron kaa mɛ lɛ a ha nɛ a ngɛ nɔ́ nae. (2 Mose 5:​19, 20) A pia Mawu sɔmɔli nɛ ɔmɛ nɛ a yeɔ anɔkuale ɔ. Nɔ́ nɛ ɔ ngɛ dɔmi wawɛɛ! Ke o kɛ haomi ngɛ kpee be kɛkɛɛ ɔ, jee o tsui mi nɛ o sɔle kɛ ha Yehowa konɛ e ye bua mo. w22.11 15 ¶5-6

Yehowa ngɔ nɛ wami je, nɛ e ngɛ he wami nɛ e kɛ ma tle nihi nɛ a gbo ɔ si kɛ ba wami mi ekohu. E ha gbalɔ Eliya he wami nɛ e kɛ tle yalɔyo ɔ nɛ e je Zarefat ɔ binyumu ɔ si. (1 Ma. 17:​21-23) Pee se ɔ, Mawu ye bua Elisha nɛ e tle Shunem yo ɔ binyumu ɔ si. (2 Ma. 4:​18-20, 34-37) Gbogboehi a si tlemi nɛ ɔmɛ kɛ gbogboehi a si tlemi kpahi maa nɔ mi kaa Yehowa ngɛ he wami nɛ e kɛ ma tle nihi nɛ a gbo ɔ si kɛ ba wami mi ekohu. Benɛ Yesu ngɛ zugba a nɔ ɔ, e tsɔɔ kaa e Tsɛ ɔ ha lɛ he wami kaa e tle nihi nɛ a gbo ɔ si. (Yoh. 11:​23-25, 43, 44) Amlɔ nɛ ɔ, Yesu ngɛ hiɔwe, nɛ Yehowa ‘ngɔ he blɔhi tsuo nɛ ngɛ hiɔwe kɛ zugba a nɔ ɔ kɛ ha lɛ.’ Enɛ ɔ he ɔ, e ma nyɛ maa ye si womi nɛ tsɔɔ kaa a ma tle “nihi tsuo nɛ a ngɛ kaimi yɔkɔ ɔmɛ a mi ɔ” si kɛ ba wami mi, nɛ a ma nyɛ maa hi si kɛ ya neneene ɔ nɔ.—Mat. 28:18; Yoh. 5:​26-29. w22.12 5 ¶10

Ezekiel tue nɛ a bui ɔ tsɔɔ kaa a bui Yehowa tue. Munyu nɛ ngɛ wa mwɔnɛ ɔ ngmami ɔ mi ɔ ha nɛ Ezekiel na kaa e ngɛ mi kaa a bui lɛ tue mohu lɛɛ, se lɔ ɔ tsɔɔ we kaa e nyɛ we nɛ e tsu ní tsumi nɛ a kɛ wo e dɛ kaa gbalɔ ɔ saminya. Jehanɛ hu ɔ, Yehowa ha nɛ Ezekiel ná nɔ mi mami kaa ke kojomi sɛ gbihi nɛ e fiɛɛ kɛ tsɔɔ mɛ ɔ ba mi ɔ, ‘a ma ná maa le kɛ̃ kaa gbalɔ ko hi a kpɛti.’ (Eze. 2:5; 33:33) E ngɛ heii kaa bua womi munyu nɛ ɔmɛ wo Ezekiel he wami nɛ e nyɛ nɛ e tsu fiɛɛmi ní tsumi ɔ. Wɔ hu wa ngɛ kã ejakaa wa le kaa Yehowa nɛ tsɔ wɔ kaa wa ya fiɛɛ. E tsɛ wɔ ke e we ‘odasefohi,’ nɛ enɛ ɔ wo wa hɛ mi nyami. (Yes. 43:10) Mɛni he blɔ nɛ se be po ji nɛ ɔ! Kaa bɔ nɛ Yehowa de Ezekiel ke: “Koo ye gbeye” ɔ, jã kɛ̃ nɛ e de wɔ ke: ‘Nyɛ ko nu sawale!’ (Eze. 2:6) Mɛni he je nɛ e sɛ nɛ waa ye nihi nɛ a teɔ si kɛ woɔ wɔ ɔ gbeye ɔ? Ejakaa kaa bɔ nɛ e ji ngɛ Ezekiel blɔ fa mi ɔ, wɔ hu Yehowa lɛ tsɔ wɔ, nɛ wa le kaa e fĩ wa se.—Yes. 44:8. w22.11 3-4 ¶4-5

Mwɔnɛ ɔ, wa bua jɔ wawɛɛ kaa wa ngɛ asafo mi nikɔtɔmahi kɛ sɔmɔli nɛ wa ma nyɛ maa ngɔ wa hɛ kɛ fɔ a nɔ. Nyɛmimɛ nyumuhi anɔkualetsɛmɛ nɛ ɔmɛ hyɛɛ wa nɔ saminya. Wa naa Yehowa si kaa e kɛ mɛ ha wɔ! Mɛni nɛ ke wa pee ɔ, e ma ha nɛ nihi nɛ a he wɔ nɛ a ye? Wa suɔ wa nyɛmimɛ ɔmɛ, nɛ wa suɔ nɛ waa le bɔ nɛ níhi ngɛ nɔ yae ngɛ a si himi mi ha. Se e sa nɛ waa hyɛ saminya nɛ wa ko ngɔ wa he kɛ wo nihi a sane mi. Ke wa pee jã a, lɔ ɔ tsɔɔ kaa wa ngɛ bumi kɛ ha mɛ. Kristofohi nɛ a hi si ngɛ kaseli ɔmɛ a be ɔ mi ɔ a kpɛti ni komɛ ji “sieku yeli kɛ nihi nɛ ngɔɔ a he kɛ woɔ ni kpahi a sanehi nɛ kɔ we a he ɔ mi.” (1 Tim. 5:13) Ngɛ anɔkuale mi ɔ, wa sume nɛ waa pee kaa mɛ. Se ngɔɔ lɛ kaa nɔ ko de mo e laami mi sane ko, nɛ e wo mo si kaa o ko de nɔ ko. Kaa nɔ hyɛmi nɔ́ ɔ, eko ɔ, nyɛmiyo ko de mo kaa hiɔ ko ngɛ e nya gbae, aloo e kɛ ka ko ngɛ kpee nɛ e de mo ke o ko wo nɔ ta kɛ tsɔɔ nɔ ko. E sa nɛ o bu nɔ́ nɛ e de mo ɔ tue. w22.09 10 ¶7-8

Wa ‘juɛmi nɛ wa ma tsake’ ɔ tsɔɔ we kɛkɛ kaa wa maa pee ní kpakpahi ngɛ wa si himi mi. E sa nɛ waa le bɔ nɛ wa ngɛ ha saminya, nɛ waa pee tsakemihi nɛ he hia kaa waa pee ɔ, konɛ wa nyɛ nɛ waa kɛ Yehowa blɔ tsɔɔmihi nɛ tsu ní saminya. E sa nɛ waa pee jã daa, tsa pi si kake pɛ. Ke wa ye mluku ɔ, wa ma nyɛ maa pee níhi nɛ maa sa Yehowa hɛ mi be fɛɛ be. Se amlɔ nɛ ɔ, e sa nɛ waa bɔ mɔde wawɛɛ konɛ waa ya nɔ nɛ waa pee nɔ́ nɛ Yehowa suɔ. Ngɛ Roma Bi 12:2 ɔ, Paulo tsɔɔ kaa e sa nɛ wa tsake wa juɛmi konɛ wa nyɛ nɛ waa le nɔ́ nɛ Mawu suɔ kaa waa pee. Nɛ tsɔɔ kaa e sɛ nɛ wa ha nɛ Satan je yaya nɛ ɔ nɛ kudɔ wɔ. Mohu ɔ, e sa nɛ waa kpa wa mi, nɛ́ waa hyɛ kaa otihi nɛ waa kɛ maa wa hɛ mi kɛ yi mi kpɔhi nɛ wa mwɔɔ ɔ kɛ Mawu susumi kɔ, se pi je ɔ susumi. w23.01 8-9 ¶3-4

Anɛ Yehowa jeɔ wɔ ngɛ haomi fɛɛ haomi nɛ waa kɛ kpeɔ ɔ mi lo? Anɛ e kudɔɔ nɔ́ fɛɛ nɔ́ nɛ yaa nɔ ngɛ wa si himi mi bɔ nɛ pee nɛ e da ní yayahi tsuo nɛ baa wa nɔ ɔ nɔ kɛ pee nɔ́ kpakpa ko ha wɔ lo? Dɛbi, Baiblo ɔ tsɔɔ we jã. (Fiɛɛ. 8:9; 9:11) Se kɛ̃ ɔ, wa le kaa ke waa kɛ haomi ko ngɛ kpee ɔ, Yehowa le, nɛ ke wa sɔle ha lɛ ɔ, e buɔ wɔ tue. (La 34:15; Yes. 59:1) Nɔ́ nɛ pe kulaa a, Yehowa ma nyɛ maa ye bua wɔ nɛ wa fĩ si ngɛ wa haomi ɔmɛ a mi. Ngɛ mɛni blɔ nɔ? Blɔ kake nɛ Yehowa guɔ nɔ kɛ yeɔ bua wɔ ji kaa e woɔ wa bua, nɛ e woɔ wɔ he wami ngɛ be nɛ sa mi. (2 Kor. 1:​3, 4) Anɛ o kai be ko nɛ Yehowa wo o bua nɛ e wo mo he wami ngɛ be nɛ sa mi lo? Behi fuu ɔ, ja haomi ko nɛ waa kɛ ngɛ kpee ɔ se po loko wa naa bɔ nɛ Yehowa ye bua wɔ ha. w23.01 17-18 ¶13-15

Lohwe awi yelɔ nɛ ɔ ngɛ kaa lohwe awi yelɔ nɛ ngɛ yi kpaago ɔ, se enɛ ɔ lɛɛ e ngɛ tsutsuutsu. A tsɛ lɛ ke “lohwe awi yelɔ ɔ he amaga a,” nɛ a kale lɛ kaa “matsɛ kpaanyɔne.” (Kpoj. 13:​14, 15; 17:​3, 8) Yohane tsɔɔ kaa jinɛ “matsɛ” nɛ ɔ ngɛ, se e su he ko ɔ, a nɛ lɛ hu se e kpale ba ekohu. Enɛ ɔ kaleɔ bɔ nɛ Je Ma Amɛ A Kake Peemi Kuu ɔ peeɔ níhi kɛ fĩɔ je ɔ mi ma kudɔmi blɔ nya tomi ɔmɛ a se ɔ ha a saminya. Be ko nɛ be ɔ, jinɛ a tsɛɛ kuu nɛ ɔ ke Je Ma Amɛ A Somi. Se e ba gu loo e laa ngɛ je mi ta enyɔne ɔ mi. A kpale to sisi ekohu nɛ a ha lɛ biɛ nɛ wa le mwɔnɛ ɔ, nɛ ji Je Ma Amɛ A Kake Peemi Kuu ɔ. Lohwe awi yeli ɔmɛ loo je ɔ mi nɔ yemi ɔmɛ tuɔ lakpa munyuhi kɛ woɔ nihi he wami nɛ a te si kɛ wo Yehowa kɛ e we bi. Ngɛ okadi peemi blɔ nɔ ɔ, a ma bua “matsɛmɛ ɔmɛ nɛ a ngɛ zugba a nɔ hehi tsuo nɛ nimli ngɛ ɔmɛ” a nya kɛ ha Harmagedon ta a nɛ ji “Mawu Ope ɔ ligbi ngua a nɔ ta a.”—Kpoj. 16:​13, 14, 16. w22.05 10 ¶10-11

Benɛ Yesu nitsɛ kane Ngmami Klɔuklɔu ɔ ngɛ e dɛ he ɔ, e ba le Ngmami ɔ saminya, nɛ e bua jɔ he, nɛ e kɛ nɔ́ nɛ e kase ngɛ ngmami ɔ mi ɔ tsu ní. Kaa nɔ hyɛmi nɔ́ ɔ, o ma kai kaa nɔ́ ko ya nɔ ngɛ sɔlemi we ɔ benɛ Yesu ye jeha 12 pɛ ɔ. Tsɔɔli ɔmɛ nɛ a le Mose Mlaa a saminya a “nya kpɛ a he wawɛɛ ngɛ [Yesu] níhi a sisi numi, kɛ hetohi nɛ e ngɛ hae ɔ he.” (Luka 2:​46, 47, 52) Ke wɔ hu wa kaneɔ Mawu Munyu ɔ be fɛɛ be ɔ, wa bua maa jɔ he, nɛ wa maa le Ngmami ɔ mi saminya. Wa ma nyɛ maa kase nɔ́ ko ngɛ nɔ́ nɛ Yesu de nihi nɛ a le Mlaa a saminya a mi. Nihi nɛ a le Mlaa a saminya a a kpɛti ni komɛ ji womi ngmali ɔmɛ, Farisi bi ɔmɛ kɛ Saduki bi ɔmɛ. E ngɛ mi kaa jami hɛ mi nyɛɛli nɛ ɔmɛ pɔɔ Ngmami ɔ kanemi mohu lɛɛ, se a ná we nɔ́ nɛ a kaneɔ ɔ he se. Yesu tsɔɔ níhi etɛ nɛ nyumu nɛ ɔmɛ ko pee konɛ a ná Ngmami ɔ he se wawɛɛ. Nihi nɛ Yesu de mɛ ɔ maa ye bua wɔ nɛ waa bɔ mɔde nɛ (1) waa nu nɔ́ nɛ wa kaneɔ ɔ sisi, (2) wa hla juetlihi nɛ ngɛ Ngmami ɔ mi, kɛ (3) wa ha nɛ Mawu Munyu ɔ nɛ tsake wɔ. w23.02 8-9 ¶2-3

Ní peepee komɛ ngɛ nɛ e sa kaa wa kua. Ní nɛ ɔmɛ ekomɛ ji ní peepeehi nɛ ma ha nɛ nɔ ko ma susu kaa o suɔ nɛ o kɛ lɛ nɛ sɛ gba si himi mi, ní nɛ a yeɔ kɛ beɔ nɔ, dã nɛ a nuɔ kɛ beɔ nɔ, munyu nɛ yeɔ nɔ awi tumi, hɛja jemi nɛ yi wu tso ní peepee ngɛ mi, bɔmi nami he foni loo video hyɛmi kɛ ekpahi. (La 101:3) Abosiami ngɛ hlae nɛ e kɛ puɛ huɛ bɔmi nɛ ngɛ waa kɛ Yehowa wa kpɛti ɔ be fɛɛ be. (1 Pet. 5:8) Ke wa hyɛ we nɛ hi ɔ, Satan ma nyɛ ma ha nɛ hɛkɔ, lakpa yemi, hunga jemi, ninyɛ, he nɔ womi kɛ abofu ma he si ngɛ wa tsui mi. (Gal. 5:​19-21) Ke wa bɔɛ mɔde nɛ wa je su nɛ ɔmɛ ngɛ wa mi ɔ, e maa wa ngɛ wa mi, nɛ e maa ye wɔ awi. (Yak. 1:​14, 15) Nɔ́ kake ko nɛ e yɔsemi yee nɛ e ma nyɛ maa ye wɔ awi ji huɛ yaya bɔmi. E sa nɛ wa kai kaa nihi nɛ waa kɛ bɔɔ ɔ ma nyɛ ma ná wa nɔ he wami wawɛɛ. (1 Kor. 15:33) Ke wa hyɛɔ wa he nɔ saminya a,e maa ye bua wɔ nɛ waa kɛ nihi nɛ a kɛ Yehowa mlaahi tsu we ní ɔ be bɔe. (Luka 21:34; 2 Kor. 6:15) Ke wa pee jã nɛ haomi ko ma a, wa maa na nɛ wa maa tu nya fo. w23.02 16 ¶7; 17 ¶10-11

Suɔmi nɛ o ngɛ ha Yehowa a mi ba wa wawɛɛ ejakaa o kase e he ní babauu. Atsinyɛ jemi ko be he kaa o suɔ nɛ o hɛ kɛ su e he wawɛɛ amlɔ nɛ ɔ, nɛ o ma nyɛ maa pee jã kɛ ya neneene hulɔ. E jeɔ mi mi jɔmi mi nɛ e woɔ mo he wami konɛ o ha nɛ e bua nɛ jɔ. (Abɛ 23:​15, 16) O ma nyɛ maa ngɔ o ní peepee kɛ o munyu tumi kɛ tsɔɔ kaa o suɔ nɛ e bua nɛ jɔ. Ke o baa o je mi saminya a, lɔ ɔ tsɔɔ kaa o suɔ Yehowa niinɛ. Enɛ ɔ ji oti nɛ se be nɛ o kɛ ma nyɛ maa ma o hɛ mi. Mɛni o ma nyɛ maa pee kɛ tsɔɔ kaa o suɔ Yehowa? Kekleekle ɔ, e sa nɛ o je blɔ nɛ o sɔle ha Yehowa nɛ ji anɔkuale Mawu ɔ, nɛ o de lɛ kaa o suɔ nɛ o pee lɛ pɛ e suɔmi nya ní. (La 40:8) Lɔ ɔ se ɔ, e sa nɛ o ha nɛ a baptisi mo kɛ ma nɔ mi kaa o jɔɔ o he nɔ kɛ ha Yehowa. Ligbi nɛ a maa baptisi mo ɔ maa pee bua jɔmi ligbi nɛ sa kadimi wawɛɛ kɛ ha mo. Kɛ je lɔ ɔ se ɔ, o maa pee nɔ́ nɛ Yehowa suɔ, se pi nɔ́ nɛ o suɔ. (Rom. 14:8; 1 Pet. 4:​1, 2) Eko ɔ, o ma susu kaa e ji yi mi kpɔ ngua ko nɛ e sa kaa o mwɔ, nɛ e ji anɔkuale. Se ke o nyɛ nɛ mwɔ jamɛ a yi mi kpɔ ɔ, e ma ha nɛ o bua maa jɔ wawɛɛ. w23.03 5-6 ¶14-15