July

Munyu tumi ji nike ní nɛ je Mawu nɛ ngɛ suɔmi ɔ ngɔ. A kɛ nike ní nɛ ji munyu tumi ɔ tsu we ní saminya hu. Satan Abosiami mlɔɔ Hawa, nɛ lɔ ɔ ha nɛ adesahi ba pee yayami peeli nɛ a yi mluku. (1 Mose 3:​1-4) Adam ngɔɛ nike ní nɛ ji munyu tumi ɔ kɛ tsu we ní saminya, nɛ e pia Hawa kɛ Yehowa ngɛ e yayami ɔ he. (1 Mose 3:12) Kain tui Yehowa anɔkuale benɛ e gbe e nyɛmi Habel se ɔ. (1 Mose 4:9) Mwɔnɛ ɔ hu ɔ, kɛ nihi peeɔ a ní ha kɛɛ? Be komɛ ɔ, ma hɛ mi nyɛɛli tuɔ munyuhi nɛ sɛ ngɛ ma hɛ mi nɛ e pee we mɛ zo. A pee sinihi fuu nɛ a tuɔ munyuhi nɛ sɛ ngɛ mi. Sukuu bimɛ nuɔ munyuhi nɛ sɛ ngɛ sukuu, nɛ jã kɛ̃ nɛ nikɔtɔmahi hu nuɔ munyuhi nɛ sɛ ngɛ a ní tsumi hehi. Ke wa hyɛ we nɛ hi ɔ, munyuhi nɛ sɛ nɛ wa pɔɔ numi ɔ maa tlɔ wa he nɛ wɔ hu ma bɔni tumi. Ngɛ anɔkuale mi ɔ, akɛnɛ wa ji Kristofohi he je ɔ, wa suɔ nɛ waa sa Yehowa hɛ mi, lɔ ɔ he ɔ, wa tui munyuhi nɛ sɛ. Wa suɔ nɛ waa kɛ nike ní nɛ se be nɛ ji munyu tumi ɔ nɛ tsu ní ngɛ blɔ kpa kpakpa nɔ kɛ je wa Mawu ɔ yi. w22.04 4 ¶1-3

Yesu ná juɛmi nɛ da ngɛ he lo nya níhi a he. E ye ní nɛ e nu ní. (Luka 19:​2, 6, 7) Ngɛ e kekleekle nyakpɛ ní nɛ e pee ɔ mi ɔ, e pee wai nɛ e hi pe kulaa. (Yoh. 2:​10, 11) Nɛ ngɛ ligbi nɛ e gbo ɔ nɔ po ɔ, tade nɛ e wo ɔ he jua wa wawɛɛ. (Yoh. 19:​23, 24) Se Yesu ha we nɛ he lo nya níhi nɛ a pee nɔ́ titli ngɛ e si himi mi. Yesu tsɔɔ kaa ke wa hla Mawu Matsɛ Yemi ɔ se blɔ kekle ɔ, Yehowa ma ha nɛ wa nine maa su níhi nɛ wa hia a nɔ. (Mat. 6:​31-33) Nihi fuu kɛ ga womi nɛ Yehowa kɛ ha ngɛ sika he ɔ tsu ní nɛ a ná he se. Nyɛ ha wa susu nyɛminyumu ko nɛ e sɛ we gba si himi mi nɛ a tsɛɛ lɛ Daniel ɔ he nɛ waa hyɛ. E de ke: “Benɛ i ná we jeha nyingmi enyɔ lolo ɔ, i ma ye juɛmi nya si kaa i kɛ mumi mi otihi maa ye kekle blɔ he ngɛ ye si himi mi.” Akɛnɛ Daniel pee e si himi kpokploo he je ɔ, e nyɛ nɛ e kɛ e be kɛ e nyɛmi tsu teokrase ní tsumihi fuu. E de hu ke: Sika abɔ ko be nɛ ma nyɛ ma ha mi bua jɔmi kaa nɔ́ nɛ Yehowa ha mi ɔ.” w22.05 21-22 ¶6-7

Ke wa kaseɔ Baiblo ɔ kɛ Baiblo kasemi womi ɔmɛ be fɛɛ be ɔ, lɔ ɔ tsɔɔ kaa wa suɔ anɔkuale ɔ. Ke wa se kɛ ngɛ anɔkuale ɔ mi kaa mɛni po ɔ, níhi fuu ngɛ nɛ e sa kaa waa kase. Ní kasemi ji tsumi, se wa náa he se wawɛɛ. Tsa pi wɔ tsuo nɛ wa bua jɔɔ ní kanemi kɛ ní kasemi he. Se Yehowa ke waa ‘ya nɔ nɛ wa hla’ anɔkualehi nɛ a mi kuɔ ɔ se blɔ, nɛ ke wa pee jã a, wa maa nu anɔkuale ɔ sisi saminya. (Abɛ 2:​4-6) Ke wa bɔ mɔde nɛ wa pee jã a, wa ma ná he se. Corey tsɔɔ kaa ke e ngɛ Baiblo ɔ kanee daa ligbi ɔ, e kɛ e juɛmi maa kuku kake pɛ nɔ, nɛ e hyɛɔ kaa e nu sisi saminya loko e yaa kuku kpa nɔ. E de ke: “I kaneɔ sisi ningma amɛ tsuo, i hyɛɔ ngmami kpahi nɛ a tsɛ se ɔ tsuo, nɛ i peeɔ níhi a mi hlami kpahi. . . . Blɔ nɛ ɔ nɔ nɛ́ i guɔ kɛ kaneɔ Baiblo ɔ ha nɛ i náa he se wawɛɛ!” Blɔ nɛ ɔ nɔ lɛ wa guɔ kɛ kaneɔ Baiblo ɔ jio, waa guɔ blɔ kpa ko nɔ jio, ke wa ná be kɛ kase Baiblo ɔ, lɔ ɔ tsɔɔ kaa anɔkuale ɔ he jua wa kɛ ha wɔ.—La 1:​1-3. w22.08 17 ¶13; 18 ¶15-16

Benɛ Yesu ba zugba a nɔ ɔ, e gu adebɔ níhi a nɔ kɛ tsɔɔ e kaseli ɔmɛ e Tsɛ ɔ he ní. Nyɛ ha nɛ wa susu nɔ́ kake nɛ e tsɔɔ e kaseli ɔmɛ ɔ a he nɛ waa hyɛ. Yehowa suɔ nɔ fɛɛ nɔ. Ngɛ Yesu Yoku ɔ Nɔ Fiɛɛmi ɔ mi ɔ, e gbla e kaseli ɔmɛ a juɛmi kɛ ya níhi nɛ Mawu bɔ ɔ a kpɛti enyɔ a nɔ. Ní nɛ ɔmɛ ji ní komɛ nɛ nihi fuu susuu we he kulaa. Lɔ ɔmɛ ji pu kɛ hiɔmi. Pu kɛ hiɔmi he hia wawɛɛ ejakaa a yeɔ bua nɛ wa hii wami mi. Akɛnɛ wa ji adesahi nɛ wa sɛ he je ɔ, Yehowa ko nyɛ ko ha we wɔ ní nɛ ɔmɛ. Se e je suɔmi mi nɛ e ha nɛ pu ɔ tsoɔ ha wɔ tsuo, nɛ hiɔmi hu nɛɔ ha nɔ fɛɛ nɔ. (Mat. 5:​43-45) Yesu tu ní nɛ ɔmɛ a he munyu kɛ tsɔɔ e kaseli ɔmɛ konɛ a na kaa Yehowa suɔ adesahi tsuo. Ke hiɔmi ngɛ nɛe, aloo wa na bɔ nɛ ke pu ngɛ si nɔe nɛ e ngɛ fɛu ha a, e haa nɛ wa naa kaa Yehowa suɔ adesahi tsuo. E sa nɛ suɔmi nɛ Yehowa ngɛ ɔ nɛ wo wɔ he wami nɛ wa je suɔmi kpo kɛ tsɔɔ nɔ fɛɛ nɔ, nɛ waa fiɛɛ kɛ ha nihi tsuo. w23.03 17 ¶9-10

Mɛni nɛ e pee bɔfo Yohane nyakpɛ wawɛɛ ɔ? E na yo ko nɛ e hii si ngɛ lohwe awi yeli nɛ ɔmɛ a kpɛti kake nɔ. Yo nɛ ɔ ji “yaholɔ ngua,” nɛ a tsɛɛ lɛ ke “Babilon Ngua a.” E kɛ ‘zugba a nɔ matsɛmɛ ɔmɛ bɔ ajuama.’ (Kpoj. 17:​3-5) Mɛnɔ ji “Babilon Ngua a”? Yo nɛ ɔ be nyɛe maa da si kɛ ha ma kudɔmi blɔ nya tomi ko ejakaa Kpo Jemi womi ɔ tsɔɔ kaa e kɛ je ɔ mi nɔ yeli ɔmɛ bɔ ajuama. (Kpoj. 18:9) Ngɛ anɔkuale mi ɔ, lohwe awi yelɔ ɔ nɔ nɛ e hii si ngɛ ɔ tsɔɔ kaa e ngɛ mɔde bɔe kaa e ma kudɔ je ɔ mi nɔ yeli ɔmɛ. Jehanɛ hu ɔ, e be nyɛe maa da si kɛ ha jua yemi blɔ nya tomihi nɛ ngɛ Satan je ɔ mi, nɛ a foɔ mɛ pɛ a nɔ́ mi ɔ, ejakaa ngɛ yaholɔ ngua a se ɔ, Kpo Jemi womi ɔ tu “zugba a nɔ jua yeli” ɔmɛ hu a he munyu. (Kpoj. 18:​11, 15, 16) Blema Babilon ji he nɛ lakpa jami he si ngɛ wawɛɛ. Lɔ ɔ he ɔ, Babilon Ngua a daa si kɛ ha lakpa jami slɔɔto ɔmɛ tsuo. Ngɛ anɔkuale mi ɔ, lɛ ji lakpa jamihi tsuo nɛ ngɛ je ɔ mi ɔ nɛ.—Kpoj. 17:​5, 18. w22.05 11 ¶14-16

Binyɛ ko yi mi maa pee lɛ enyɔɔnyɔ ke ji e bi ɔ maa hla kaa e ma sɔmɔ Yehowa. Atsinyɛ jemi ko be he kaa fɔli le nyagbahi nɛ a bimi kɛ kpeɔ ngɛ Satan je nɛ ɔ mi. Jehanɛ hu ɔ, binyɛmɛ fuu kɛ haomi kpeɔ ngɛ a bimɛ tsɔsemi mi ke a ji fɔlɔ kake aloo a huno sɔmɔ we Yehowa. Tsa pi fɔli nɛ a hunomɛ loo a yihi sɔmɔ we Yehowa a pɛ nɛ a kɛ nyagbahi kpeɔ ke a ngɛ a bimɛ tsɔsee konɛ a suɔ Yehowa. Ke fɔli ɔmɛ tsuo ngɛ Yehowa sɔmɔe po, e he ma nyɛ maa wa kaa a maa ye bua a bimɛ nɛ a sɔmɔ Yehowa. Ke jã nɛ e ji ngɛ o blɔ fa mi ɔ, koo hao tsɔ. Yehowa maa ye bua mo. O ma nyɛ ma bi fɔli nɛ a ngɛ níhi a si kpami ɔ blɔ nɔ nɛ a gu nɛ a kɛ ga dadehi nɛ ngɛ tsu ní ngɛ a weku Mawu jami mi. (Abɛ 11:14) O ma nyɛ maa sɔle ha Yehowa nɛ e ye bua mo konɛ o ngɔ sane bimihi nɛ ma ha nɛ o le bɔ nɛ o bimɛ susuɔ níhi a he kɛ bɔ nɛ a nuɔ níhi a he ha a kɛ tsu ní.—Abɛ 20:5. w22.04 17 ¶4, 7; 18 ¶9

Yesu kase Yehowa su ɔmɛ saminya, enɛ ɔ he ɔ, ke wa le Yesu saminya a, lɔ ɔ maa ye bua wɔ konɛ waa suɔ Yehowa wawɛɛ. (Heb. 1:3) Blɔ nɛ e hi pe kulaa nɛ wa maa gu nɔ kɛ kase Yesu ji kaa wa maa kase Sane Kpakpa eywiɛ ɔmɛ. Ke o nyɛ we nɛ o kane Baiblo ɔ daa ligbi ɔ, lɛɛ e maa hi wawɛɛ kaa o kɛ Sane Kpakpa eywiɛ ɔmɛ nɛ kɔɔ Yesu he ɔ maa je sisi. Nɛ ke o ngɛ jã pee ɔ, moo bɔ mɔde nɛ o kadi su kpakpahi nɛ e ngɛ ɔ. E yi kɛ ha nihi kaa a maa hɛ kɛ su Yesu he. E suɔ jokuɛwi a sane nɛ e gblaa mɛ kɛ baa e ngɔ. (Maak. 10:​13-16) Akɛnɛ Yesu he jɔ nɛ nihi nyɛɔ hɛɛ kɛ suɔ e he he je ɔ, e kaseli ɔmɛ nyɛɔ nɛ a deɔ lɛ bɔ nɛ a ngɛ he nue ha. (Mat. 16:22) Enɛ ɔ tsɔɔ kaa Yesu kase e hiɔwe Tsɛ ɔ. Wa ma nyɛ maa hɛ kɛ su Yehowa he. Wa ma nyɛ maa gu sɔlemi nɔ kɛ hɛ kɛ su e he. Ke wa ngɛ sɔlee ɔ, wa ma nyɛ ma de lɛ nɔ́ fɛɛ nɔ́ nɛ ngɛ wa tsui mi. Wa ngɛ nɔ mi mami kaa e maa bu wɔ tue. E suɔ wɔ, nɛ e susuɔ wa he.—1 Pet. 5:7. w22.08 3 ¶4-5

Yehowa ji wa Bɔlɔ, lɔ ɔ he ɔ, e le nɔ́ fɛɛ nɔ́ kɛ kɔ wa he. Mo susu he nɛ o hyɛ! Yehowa le adesahi tsuo nɛ a ngɛ zugba a nɔ ɔ a he nɔ́ fɛɛ nɔ́. (La 139:​15-17) Enɛ ɔ he ɔ, e ma nyɛ maa na gbɔjɔmihi nɛ wa ná kɛ je wa fɔli a ngɔ. Se pi lɔ ɔ pɛ, e le níhi nɛ ya nɔ ngɛ wa si himi mi nɛ ha nɛ wa ngɛ kaa bɔ nɛ wa ngɛ amlɔ nɛ ɔ. Akɛnɛ Yehowa le adesahi saminya he je ɔ, mɛni lɔ ɔ ha a nɛ e peeɔ? Lɔ ɔ haa nɛ e naa wɔ mɔbɔ. (La 78:39; 103:​13,14) Yehowa pee níhi nɛ tsɔɔ kaa e suɔ nɛ e kɛ yayami nɛ ke. E le kaa kɛ je be nɛ kekleekle adesa nɛ ji Adam tɔ̃ ɔ nɔ ɔ, wɔ tsuo wa ba pee yayami peeli, nɛ nyagbenyagbe ɔ wa ma gbo. (Rom. 5:12) Nɔ́ ko nɔ́ ko be nɛ wa ma nyɛ maa pee nɛ ma nyɛ ma je wɔ nitsɛmɛ loo nɔ kpa ko kɛ je yayami kɛ gbenɔ dɛ mi. (La 49:​7-9) Se wa Mawu nɛ ngɛ suɔmi ɔ mi mi sãa lɛ ngɛ wa he, nɛ e to blɔ nya nɛ ma ha waa ye wa he. Kaa bɔ nɛ a tsɔɔ ngɛ Yohane 3:16 a, Yehowa tsɔ e Bi kake too ɔ kɛ ba konɛ e ba gbo kɛ ha wɔ.—Mat. 20:28; Rom. 5:19. w22.06 3 ¶5-6

Ke waa kɛ nihi a yayami ke mɛ ɔ, Yehowa hu maa ngɔ wa yayami kɛ ke wɔ. Wa naa bɔ nɛ munyu nɛ ɔ ji anɔkuale ha ngɛ Yehowa kɛ e sɔmɔlɔ Hiob a sane ɔ mi. Munyuhi nɛ Elifaz, Bildad, kɛ Zofar tu ɔ dɔ anɔkualetsɛ Hiob wawɛɛ nitsɛ. Yehowa fã Hiob kaa e sɔle kɛ ha mɛ. Benɛ Hiob pee jã a se ɔ, loko Yehowa jɔɔ lɛ. (Hiob 42:​8-10) Ke wa ngɔ dɔdɔɛ kɛ wo wa mi ɔ, e yeɔ wɔ nitsɛmɛ awi. Abofu ngɛ kaa tlomi ko nɛ e mi jiɔ. Yehowa suɔ nɛ wa je tlomi nɛ ɔ ngɛ wa kuɛ nɔ konɛ wa tue mi nɛ jɔ wɔ. (Efe. 4:​31, 32) E wo wɔ he wami ke: Wa “ha abofu se nɛ po, nɛ́ [waa] ngmɛɛ mi mi fumi he.” (La 37:​8, NW) Ke waa kɛ ga womi nɛ ɔ tsu ní ɔ, e maa ye bua wɔ. Ke wa ya nɔ nɛ wa ná nɔ ko nɛ e tɔ̃ wa nɔ ɔ he abofu ɔ, e ma nyɛ maa ye wa nɔmlɔ tso ɔ awi. (Abɛ 14:30) Kaa bɔ nɛ ke o nu nɔ́ ko nɛ duɔ ngɛ mi ɔ, e maa ye mo awi ɔ, jã kɛ̃ nɛ ke nɔ ko tɔ̃ o nɔ nɛ o hɛɛ abofu ɔ mi ɔ, e ma nyɛ maa ye mo awi, se pi nɔ nɛ e tɔ̃ o nɔ ɔ. Enɛ ɔ he ɔ, ke waa kɛ nihi a yayami ke mɛ ɔ, e maa ye bua wɔ nitsɛmɛ wawɛɛ. Wa tue mi maa jɔ wɔ, nɛ wa ma nyɛ maa ya wa hɛ mi ngɛ Yehowa sɔmɔmi mi. w22.06 10 ¶9-10

Wa hɛ kɛ nɔ fɔmi ɔ ngɛ kaa okadi peemi dade pɛɛ, nɛ e poɔ wa susumi he piɛ. E yeɔ bua wɔ nɛ waa kɛ wa he wui ní peepeehi nɛ ma puɛ huɛ bɔmi nɛ ngɛ waa kɛ Yehowa wa kpɛti ɔ mi. (1 Kor. 15:​33, 34) Wa hɛ kɛ nɔ fɔmi nɛ ngɛ kaa dade pɛɛ ɔ hu ma nyɛ maa po wa he piɛ konɛ wa ko susu kaa wa be nyɛe maa sa Yehowa hɛ mi gblee. Mo kai kaa benɛ Elifaz bua pee kaa e ngɛ Hiob bua woe ɔ, e de ní komɛ kaa jã. Elifaz de ke: “Anɛ nɔmlɔ ko ngɛ nɛ e he tsɔ lo?” E kpale de kɛ kɔ Mawu he ke: “Hyɛ, Mawu bɔfo klɔuklɔu ɔmɛ po e kɛ e hɛ fɔ we a nɔ; mɛ nitsɛmɛ tete po a he tsɔ we ngɛ e hɛ mi.” (Hiob 15:​14, 15) Munyu nɛ ɔmɛ tsuo ji lakpa! Mo kai kaa Satan ji nɔ nɛ e suɔ kaa o ná susumi kaa jã. E le kaa ke o susu níhi kaa jã a he ɔ, bɔɔbɔɔbɔɔ ɔ, o maa ngmɛɛ o hɛ kɛ nɔ fɔmi ɔ he. Lɔ ɔ he ɔ, mo kua lakpa susumihi. Mo ná nɔ mi mami kaa Yehowa suɔ nɛ o hi si kɛ ya neneene, nɛ e maa ye bua mo nɛ o nyɛ nɛ o su jamɛ a oti ɔ he.—1 Tim. 2:​3, 4. w22.10 25-26 ¶8-10

Satan suɔ nɛ Hiob nɛ he ye kaa e ngɛ nɔ́ nae ejakaa Yehowa kua lɛ. Kaa nɔ hyɛmi nɔ́ ɔ, Satan kɛ kɔɔhiɔ nɛ nya wa ko tsu ní kɛ hule we nɛ Hiob bimɛ nyɔngma amɛ ngɛ a hɛja jee ngɛ mi ɔ kɛ pue si. (Hiob 1:​18, 19) Jehanɛ ɔ hu ɔ, e ha nɛ la je hiɔwe kɛ ba kpata Hiob lohwe ɔmɛ kɛ e sɔmɔli ɔmɛ nɛ a ngɛ e lohwe ɔmɛ a nɔ hyɛe ɔ a hɛ mi. (Hiob 1:16) Akɛnɛ kɔɔhiɔ ɔ kɛ laa tsuo je hiɔwe he je ɔ, Hiob susu kaa e je Yehowa Mawu ngɔ. Enɛ ɔ ha nɛ Hiob susu kaa e tɔ̃ Yehowa nɔ ngɛ blɔ ko nɔ. Ngɛ enɛ ɔmɛ tsuo a se ɔ, Hiob ji e hiɔwe Tsɛ ɔ se. Hiob yɔse kaa e ná ní kpakpahi fuu kɛ je Yehowa ngɔ be ko nɛ be. Lɔ ɔ he ɔ, e susu kaa ke e bua jɔ ní kpakpahi nɛ e nine su nɔ ɔ he ɔ, lɛɛ e sa nɛ e kplɛɛ ní yayahi nɛ a ba a hu nɔ. Enɛ ɔ he ɔ, e de ke: ‘A je Yehowa biɛ ɔ yi.’—Hiob 1:​20, 21. w22.06 21 ¶7

Yesu kɛ kɔkɔ bɔmi nɛ ɔ nɔuu ha e kaseli ɔmɛ ngɛ Yohane. 17:14 ɔ. Maa pee jeha 100 ji nɛ ɔ, wa na kaa gbami nɛ ɔ ngɛ mi bae wawɛɛ. Ngɛ mɛni blɔ nɔ? Benɛ a wo Yesu matsɛ kaa Mesia Matsɛ Yemi ɔ nya Matsɛ ngɛ jeha 1914 ɔ mi ɔ, e kɛ we nɛ a fiee Satan kɛ je hiɔwe. Amlɔ nɛ ɔ, Satan tlɔ zugba a nɔ, nɛ nɔ́ nɛ piɛ ha lɛ pɛ ji kaa a ma ba kpata e hɛ mi. (Kpoj. 12:​9, 12) Se e hí si gu. Satan mi mi fu, nɛ e ngɛ Mawu we bi tuae. (Kpoj. 12:​13, 17) Lɔ ɔ he je nɛ amlɔ nɛ ɔ, Satan je ɔ nyɛ Mawu we bi wawɛɛ ɔ nɛ. Se e sɛ nɛ waa ye Satan kɛ e se nyɛɛli ɔmɛ gbeye. Mohu ɔ, e sa nɛ wa ná nɔ mi mami kaa bɔfo Paulo. E ngma ke: “Ke Mawu ngɛ kɛ ha wɔ ɔ, lɛɛ mɛnɔ maa te si kɛ wo wɔ?” (Rom. 8:31) Wa ma nyɛ ma ná nɔ mi mami nɛ mi wa ngɛ Yehowa mi. w22.07 18 ¶14-15

Yesu hɛwi kaa ngɛ nyagbe be nɛ ɔ mi ɔ, a be nihi fuu nae nɛ a maa fiɛɛ sane kpakpa a. E le kaa gbami nɛ ɔ nɛ la polɔ ɔ gba a maa ba mi. La polɔ ɔ de ke: ‘Ligbi ɔ nɛ o maa hia ta a, o ma mi bi ɔmɛ maa ngɔ a he kɛ ha ngɛ mɛ nitsɛmɛ a suɔmi nya.’ (La 110:3) Ke o ngɔɔ o he kɛ woɔ fiɛɛmi ní tsumi ɔ mi ɔ, lɛɛ o ngɛ Yesu kɛ tsɔlɔ anɔkualetsɛ ɔ a se fĩe konɛ gbami nɛ ɔ nɛ ba mi. Ní tsumi ɔ ngɛ hɛ mi yae, se nyagbahi ngɛ mi. Nyagba kake nɛ waa kɛ kpeɔ ngɛ Matsɛ Yemi fiɛɛmi ní tsumi ɔ mi ji si temi kɛ womi. Hemi kɛ yemi kuali, jami hɛ mi nyɛɛli kɛ nihi nɛ a kɛ a he woɔ ma kudɔmi sanehi a mi ɔ tuɔ lakpa munyuhi ngɛ wa fiɛɛmi ní tsumi ɔ he. Ke wa weku li, nihi nɛ wa le mɛ kɛ nihi nɛ waa kɛ mɛ tsuɔ ní ɔ nu lakpa munyu nɛ ɔmɛ ɔ, eko ɔ, a maa nyɛ wa nɔ konɛ wa kpa Yehowa sɔmɔmi nɛ wa kpa fiɛɛmi yami. Ngɛ ma komɛ a nɔ ɔ, wa he nyɛli woɔ wa nyɛmimɛ ɔmɛ a he gbeye, a tuaa mɛ, nɛ a nuɔ mɛ nɛ a woɔ mɛ tsu po. w22.07 8 ¶1; 9 ¶5-6

Yehowa suɔ nɛ waa to be nɛ wa kɛ kase Baiblo ɔ be fɛɛ be, nɛ́ wa pue wa yi mi tɛ ngɛ nɔ́ nɛ wa kase ɔ he saminya. Ke waa kɛ níhi nɛ wa kase ɔ tsu ní ɔ, wa hemi kɛ yemi mi maa wa wawɛɛ, nɛ wa maa hɛ kɛ su wa hiɔwe Tsɛ ɔ he. Jã peemi maa ye bua wɔ nɛ wa fĩ si ngɛ kahi a mi. Jehanɛ hu ɔ, Yehowa kɛ e mumi klɔuklɔu ɔ haa nihi nɛ a ngɔɔ a hɛ kɛ fɔɔ e Munyu ɔ nɔ ɔ. Mumi klɔuklɔu ɔ ma nyɛ ma ha wɔ “he wami nɛ pe adesahi a nɔ́” konɛ wa nyɛ nɛ wa fĩ si ngɛ kahi a mi. (2 Kor. 4:​7-10) Ngɛ Yehowa yemi kɛ buami nya a, “tsɔlɔ anɔkualetsɛ kɛ ní lelɔ ɔ” ha wɔ mumi mi níhi fuu. Ekomɛ ji, munyuhi nɛ ngɛ wa womi ɔmɛ a mi, videohi kɛ lahi nɛ ma nyɛ maa fia wa hemi kɛ yemi kɛ ma si nɛ ma ha nɛ waa ya nɔ nɛ waa mɛtɛ Yehowa he. (Mat. 24:45) Yehowa tsɔse e we bi konɛ a je suɔmi kpo kɛ tsɔɔ a sibi, nɛ́ a wo a sibi bua ngɛ behi nɛ a mi wa mi. (2 Kor. 1:​3, 4; 1 Tɛs. 4:9) Wa nyɛmimɛ nyumuhi kɛ yihi ɔmɛ pee klaalo kaa a maa ye bua wɔ konɛ waa ya nɔ nɛ waa kɛ anɔkuale yemi nɛ sɔmɔ Yehowa ngɛ haomi behi a mi. w22.08 12 ¶12-14

Ke wa pɔɔ wa nyɛmimɛ ɔmɛ a su kpakpahi nɛ a ngɛ ɔ he munyu tumi ɔ, lɔ ɔ ma ha nɛ huɛ bɔmi gbagbanii maa hi waa kɛ wa nyɛmimɛ ɔmɛ wa kpɛti, nɛ suɔmi maa hi asafo ɔ hu mi. Be komɛ ɔ, e ma nyɛ maa ba kaa Kristofohi nɛ a wa ngɛ mumi mi po a juɛmi be kɔe ngɛ nɔ́ ko he loo a maa sã nya. Jã ji bɔ nɛ e ba ngɛ bɔfo Paulo kɛ e huɛ Banaba nɛ nyu bi ngɛ a kpɛti ɔ, a blɔ fa mi. Banaba suɔ nɛ Marko nɛ piɛɛ a he kɛ ya fiɛɛ sane kpakpa a ngɛ blɔ kpa nɛ a maa hia a mi, se Paulo kplɛɛ we nɔ kulaa. Enɛ ɔ ngɔ pɛ nɛ nya wa kɛ ba a kpɛti. Pɛ nɛ ɔ “ngɔ abofu kɛ ba nɛ a sã nya wawɛɛ,” lɔ ɔ he ɔ, a mi gba. (Níts. 15:​37-39) Se Paulo, Banaba kɛ Marko dla pɛ nɛ te si ngɛ a kpɛti ɔ. Pee se ɔ, Paulo tu Banaba kɛ Marko a he munyu kpakpa. (1 Kor. 9:6; Kol. 4:10) Ke pɛ ko ngɛ wɔ hu waa kɛ nihi a kpɛti ngɛ asafo ɔ mi ɔ, e sa nɛ wa dla, nɛ waa ya nɔ nɛ waa ngɔ wa juɛmi kɛ ma a su kpakpa amɛ a nɔ. Ke wa pee jã a, tue mi jɔmi kɛ kake peemi maa hi wa kpɛti. w22.08 23 ¶10-11

Be mi nɛ wa ngɛ mɔde bɔe kaa wa maa ba wa je mi ngɛ Yehowa dami mlaa amɛ a nya a, e sɛ nɛ waa bu wa he kaa wa da, nɛ́ waa hi ni kpahi kojoe. Nyɛ ha nɛ wa kai kaa Yehowa ji “je ɔ tsuo Kojolɔ.” (1 Mose 18:25) Yehowa kɛ kojomi he blɔ nɛ ɔ wui wa dɛ. Mo susu Yosef nɛ ji dalɔ ɔ nɔ hyɛmi nɔ́ ɔ he nɛ waa hyɛ. E kua kaa e maa kojo ni kpahi nɛ́ nihi nɛ a nyɛ lɛ ɔ po piɛɛ he ɔ. E nyɛmimɛ ɔmɛ wa lɛ yi mi, a jua lɛ kɛ ho nyɔguɛ yemi mi ya, nɛ a sisi a papaa kaa e gbo. Jeha komɛ a se ɔ, Yosef kɛ e weku ɔ kpale ya pee kake ekohu. Jamɛ a be ɔ, Yosef ji nɔ ko nɛ e hɛɛ blɔ nya ngua, nɛ e ko nyɛ kojo e nyɛmimɛ ɔmɛ ngɛ blɔ nɛ dɛ nɔ, loo e ko pee mɛ nɔ́ nɛ a pee lɛ ɔ kɛ to nane mi. E ngɛ mi kaa Yosef nyɛmimɛ ɔmɛ pia a he ngɛ nɔ́ nɛ a pee ɔ he mohu lɛɛ, se a ye gbeye kaa eko ɔ, Yosef maa pee mɛ nɔ́ ko kɛ to nane mi. Se Yosef de mɛ ke: “Nyɛ ko ye gbeye. Nyɛ susu kaa Mawu ji mi lo?” (1 Mose 37:​18-20, 27, 28, 31-35; 50:​15-21) Yosef je he si bami mi nɛ e si kojomi ɔ ha Yehowa. w22.08 30 ¶18-19

Ke Yehowa sɔmɔlɔ ko hao nɛ e je e tsui mi kɛ sɔle ɔ, anɛ o le kaa Yehowa ma nyɛ maa gu o nɔ kɛ ha e sɔlemi ɔ heto lo? Ke o ji asafo mi nɔkɔtɔma jio, asafo mi sɔmɔlɔ jio, blɔ gbalɔ jio, fiɛɛlɔ jio, Yehowa ma nyɛ maa gu o nɔ kɛ ye bua nihi kaa jã. Yehowa ma nyɛ maa gu jokuɛwi loo nikɔtɔmahi, kɛ nyumuhi kɛ yihi hu a nɔ kɛ pee jã. Ke nɔ ko nɛ e suɔ Yehowa a sɔle kɛ ha lɛ konɛ e ye bua lɛ ɔ, wa Mawu ɔ guɔ asafo mi nikɔtɔmahi kɛ e sɔmɔli anɔkualetsɛmɛ kpahi a nɔ ‘kɛ woɔ e bua wawɛɛ nitsɛ.’ (Kol. 4:11) E ji he blɔ nɛ se be nɛ wa ná kaa wa ma sɔmɔ Yehowa kɛ wa nyɛmimɛ ɔmɛ! Wa ma nyɛ maa pee jã ke hiɔ ko nɛ sãa nɔ gbɛ fĩa, ke oslaa ko ba, aloo ke a ngɛ wa nyɛmimɛ ɔmɛ yi mi wae. Eko ɔ, wa maa suɔ kaa wa maa ye bua ni kpahi, se ke wɔ nitsɛmɛ wa weku li hu ngɛ nɔ́ nae ɔ, e he ma nyɛ maa wa kaa wa maa pee jã. Se ngɛ enɛ ɔmɛ tsuo se ɔ, wa suɔ nɛ waa ye bua wa nyɛmimɛ ɔmɛ. Ke wa pee nɔ́ nɛ wa ma nyɛ kɛ ye bua mɛ ɔ, Yehowa bua maa jɔ.—Abɛ 19:17. w22.12 22 ¶1-2

Suɔmi ji su titli nɛ ma ha nɛ nihi nɛ a he mo nɛ a ye. Yesu tsɔɔ kaa kita enyɔ nɛ pe kulaa ji nɛ o maa suɔ Yehowa kɛ o nyɛmi nɔmlɔ. (Mat. 22:​37-39) Yehowa ji nɔ ko nɛ wa ma nyɛ ma he lɛ nɛ waa ye, nɛ akɛnɛ wa suɔ lɛ he je ɔ, wa suɔ nɛ waa kase lɛ. Suɔmi nɛ wa ngɛ kɛ ha wa nyɛmimɛ ɔmɛ ɔ ha nɛ ke a de wɔ a laami sanehi ɔ, wa de we ni kpahi. Wa sume nɛ wa maa pee nɔ́ ko nɛ maa ye wa nyɛmimɛ awi, e ma ha nɛ a hɛ mi nɛ pue si, loo e maa dɔ mɛ. Jehanɛ hu ɔ,he si bami ma nyɛ maa ye bua wɔ konɛ nihi nɛ a he wɔ nɛ a ye. Kristofo no nɛ baa e he si ɔ, e bɔɛ mɔde kaa e ma ha nɛ nihi nɛ a na lɛ kaa lɛ ji kekleekle nɔ nɛ ha nɛ a le sane ko konɛ e kɛ sa a hɛ mi. (Filip. 2:3) E ha we nɛ nihi nɛ a na lɛ kaa e le laami sane ko nɛ́ e sɛ nɛ e de ni kpahi. He si bami ma nyɛ maa ye bua wɔ konɛ wa ko de ni kpahi wɔ nitsɛmɛ wa susumihi ngɛ níhi nɛ Baiblo ɔ kɛ asafo ɔ womihi tu we he munyu tutuutu ɔ he. w22.09 12 ¶12-13

Bɔfo ko de Daniel ke: “Anɔkuale nile ɔ ma ba hiɛ babauu.” Enɛ ɔ tsɔɔ kaa Mawu we bi maa nu gbamihi nɛ ngɛ Daniel womi ɔ mi ɔ sisi wawɛɛ. Se “yiwutsotsɛmɛ be sisi nue.” (Dan. 12:10) Amlɔ nɛ ɔ ji be nɛ e sa kaa waa tsɔɔ kaa wa piɛɛ we yiwutsotsɛmɛ a he. (Mal. 3:​16, NW; 3:​17, 18) Yehowa ngɛ nihi nɛ e naa mɛ kaa a ji e “nihi pɔtɛɛ,” nɛ́ a he jua wa ha lɛ ɔ, a nya buae. Wa suɔ nɛ waa piɛɛ a he. Ngɛ anɔkuale mi ɔ, wa ngɛ be nɛ e sa kadimi mi. Se níhi nɛ ma ngɛ wa hɛ mi ɔ lɛɛ, tsa pi nɔ́ bi kulaa. E be kɛe nɛ a ma kpata nimli yayamihi tsuo a hɛ mi. Lɔ ɔ se ɔ, si nɛ Yehowa wo Daniel ɔ maa ba mi. Yehowa de lɛ ke: “O maa te si ekohu, nɛ nyagbe ligbi ɔ, o nine maa su o blɔ fa mi nɔ́ ɔ nɔ.” (Dan. 12:13) Anɛ o ngɛ be nɛ Daniel kɛ nihi nɛ o suɔ mɛ nɛ a gbo ɔ maa “te si” ekohu ɔ blɔ hyɛe lo? Ke jã a, lɛɛ moo pee nɔ́ fɛɛ nɔ́ nɛ o ma nyɛ nɛ o ye anɔkuale, nɛ o ma ná nɔ mi mami kaa o biɛ nɛ a ngma ngɛ Yehowa wami womi ɔ mi ɔ maa hi mi kɛ maa ya neneene. w22.09 24 ¶17; 25 ¶19-20

E ngɛ heii kaa munyu nɛ ɔ wo Ezekiel he wami. Mɛni he je? Eko ɔ, e kai kaa benɛ Yehowa hla Mose kɛ Yesaya kaa e gbali ɔ, e de mɛ nɔ́ ko kaa jã. (2 Mose 3:10; Yes. 6:8) Jehanɛ hu ɔ, benɛ Yehowa kɛ ní tsumi ko nɛ he wa wo gbali enyɔ nɛ ɔmɛ a dɛ ɔ, e le bɔ nɛ Yehowa ye bua mɛ ha. Lɔ ɔ he ɔ, benɛ Yehowa de Ezekiel si enyɔ ke: “Ma tsɔ mo” ɔ, e ma nyɛ ma ná hɛ kɛ nɔ fɔmi kaa Yehowa maa ye bua lɛ. Jehanɛ hu ɔ, Ezekiel ngma si abɔ ke: ‘Yehowa kɛ mi tu munyu.’ (Eze. 3:16) E ngma hu ke: ‘Yehowa kpale de mi ke.’ Munyu nɛ ɔ hu je kpo si abɔ ngɛ Ezekiel womi ɔ mi. (Eze. 6:1) Ngɛ anɔkuale mi ɔ, Ezekiel ná nɔ mi mami kaa Yehowa nɛ tsɔ lɛ. Jehanɛ hu ɔ, akɛnɛ Ezekiel papaa ji osɔfo he je ɔ, eko ɔ, e papaa tsɔɔ lɛ kaa Yehowa deɔ e gbali be fɛɛ be kaa e maa ye bua mɛ. Yehowa de Isak kɛ Yeremia ke: “I kɛ mo ngɛ,” nɛ e de Yakob ke: “I kɛ mo maa hi si.”—1 Mose 26:24; 28:15; Yer. 1:8. w22.11 2 ¶3

E ngɛ mi kaa Adam kɛ Hawa pee yayami, nɛ lɔ ɔ ha nɛ wa gboɔ mohu lɛɛ, se Yehowa tsakee we e juɛmi ngɛ yi mi nɛ e to ɔ he. (Yes. 55:11) Loloolo ɔ, e yi mi tomi ji kaa waa hi si kɛ ya neneene. Wa le enɛ ɔ ejakaa níhi nɛ Yehowa de kɛ níhi nɛ e pee ɔ tsɔɔ jã. Yehowa wo si kaa e ma tle nihi nɛ a gbo ɔ si, nɛ e ma ha mɛ he blɔ nɛ a hi si kɛ ya neneene. (Níts. 24:15; Tito 1:​1, 2) Anɔkualetsɛ Hiob ná nɔ mi mami kaa Yehowa suɔ kaa e ma tle nihi nɛ a gbo ɔ si. (Hiob 14:​14, 15) Gbalɔ Daniel ná hɛ nɔ kami kaa a ma tle nihi nɛ a gbo ɔ si, nɛ a ma ná he blɔ kɛ hi si kɛ ya neneene. (La 37:29; Dan. 12:​2, 13) Yuda bi nɛ a hi si ngɛ Yesu be ɔ mi ɔ hu le kaa Yehowa ma nyɛ ma ha nɛ e sɔmɔli anɔkualetsɛmɛ nɛ a ná “neneene wami.” (Luka 10:25; 18:18) Yesu tu si womi nɛ ɔ he munyu si abɔ, nɛ lɛ nitsɛ po ɔ, e Tsɛ ɔ tle lɛ si.—Mat. 19:29; 22:​31, 32; Luka 18:30; Yoh. 11:25. w22.12 4-5 ¶8-9

Yehowa de wɔ ke waa hɛ kɛ su e he. (Yak. 4:8) E suɔ nɛ e pee wa Mawu, wa Tsɛ kɛ wa Huɛ. E haa wa sɔlemi ɔmɛ a heto, nɛ e yeɔ bua wɔ ngɛ haomi behi a mi. E guɔ e we asafo ɔ nɔ kɛ tsɔɔ wɔ ní, nɛ e poɔ wa he piɛ. Wa ma nyɛ maa hɛ kɛ su Yehowa he kɛ gu sɔlemi, kɛ e Munyu ɔ nɛ wa maa kane, nɛ wa ma pue wa yi mi tɛ ngɛ he ɔ nɔ. Ke wa pee jã a, wa ma ná suɔmi kɛ ha lɛ, nɛ wa bua maa jɔ níhi nɛ e peeɔ kɛ haa wɔ ɔ he. Jehanɛ hu ɔ, lɔ ɔ maa wo wɔ he wami nɛ wa maa bu lɛ tue, nɛ waa kɛ yi jemi nɛ sa ma ha lɛ. (Kpoj. 4:11) Ke wa le Yehowa saminya a, lɔ ɔ ma ha nɛ hemi kɛ yemi nɛ wa ngɛ ngɛ e mi ɔ mi maa wa, nɛ wa ma ná hɛ kɛ nɔ fɔmi ngɛ e we asafo nɛ e guɔ nɔ kɛ yeɔ bua wɔ ɔ hu mi. Abosiami suɔ kaa e ma ha nɛ hemi kɛ yemi nɛ wa ngɛ ngɛ Yehowa kɛ e we asafo ɔ mi ɔ mi nɛ gbɔjɔ bɔɔbɔɔbɔɔ. Se wa ma nyɛ maa hwu kɛ si e ga tsɔmi ɔmɛ. Ke wa hemi kɛ yemi ɔ mi wa, nɛ hɛ kɛ nɔ fɔmi nɛ wa ngɛ ngɛ Yehowa mi ɔ hu mi wa a, wa be wa Mawu ɔ kɛ e we asafo ɔ kuae.—La 31:​13, 14. w22.11 14 ¶1-3

Anɔkuale Kristofohi fuu kɛ a he yemi sã afɔle nɛ a ti ni komɛ po a wami ya sɛ oslaa mi akɛnɛ a suɔ Yehowa nɛ ji Jeɔ Tsuo Nɔ Yelɔ ɔ he je. Anɔkuale Kristofohi nɛ ɔmɛ fia a pɛɛ si kaa a maa ye Yehowa anɔkuale. A ngɛ kaa Hebri bi etɛ ɔmɛ nɛ a ya nɔ nɛ a ye Nɔ Nɛ E Nɔ Kuɔ Pe Kulaa a anɔkuale ɔ. Yehowa hu ye mɛ anɔkuale nɛ e je mɛ kɛ je flɔɔnɔɔ ɔ mi. La polɔ David ngma nɔ́ he je nɛ e sa kaa waa ye Yehowa anɔkuale ɔ, e de ke: ‘Yehowa maa kojo ni ɔmɛ. Oo Yehowa, moo kojo mi ngɛ ye dami ɔ nya, kɛ ye we anɔkuale yemi ɔ nya.’ (La 7:8) David kpale ngma ke: ‘Ha nɛ ye he nɛ tsɔ, nɛ ma ye anɔkuale kɛ pi si.’ (La 25:21) Nɔ́ nɛ hi pe kulaa nɛ wa maa pe ji kaa nɛ wa maa ya nɔ nɛ wa maa ye Yehowa anɔkuale, nɛ wa be e se jee kɔkɔɔkɔ! Kɛkɛ wa maa nu he kaa bɔ nɛ la polɔ ɔ nu he ɔ, e ngma ke: ‘A gbaa ni nɛmɛ nɛ hɛɛ a we anɔkuale yemi ɔ mi, nihi nɛ baa a je mi ngɛ Yehowa mlaa a nya.’—La 119:1. w22.10 17 ¶18-19

Hiob kɛ nihi babauu sɛɛ ní ngɛ e si himi mi, se ní sɛɛmi nɛ ya nɔ ngɛ e kɛ Yehowa Mawu a kpɛti ɔ sa kadimi wawɛɛ. Ngɛ jamɛ a ní sɛɛmi ɔ mi ɔ, Yehowa de lɛ kaa e hyɛ nyakpɛ ní komɛ nɛ e bɔ ɔ, nɛ e susu a he. Enɛ ɔ nɛ Hiob maa pee ɔ, ma ha nɛ e na kaa Yehowa ngɛ nile. Enɛ ɔ hu ma ha nɛ Hiob maa na kaa Yehowa ma ha e sɔmɔli tsuo a hiami níhi. Kaa nɔ hyɛmi nɔ́ ɔ, Mawu kai Hiob kaa lɛ nɛ e hyɛɔ lohwe ɔmɛ a nɔ, enɛ ɔ he ɔ, e maa hyɛ lɛ Hiob hu e nɔ. (Hiob 38:​39-41; 39:​1, 5, 13-16) Benɛ Hiob susu adebɔ ní nɛ ɔmɛ a he ɔ, e kase su kpakpahi fuu ngɛ e Mawu ɔ he. Wɔ hu wa ma nyɛ maa kase níhi fuu ngɛ wa Mawu ɔ he ke wa to wa tsui si kɛ hyɛ níhi nɛ e bɔ ɔ saminya. Se pi be fɛɛ be nɛ enɛ ɔ peemi ngɛ gbɔjɔɔ. Ke wa ngɛ ma ngua mi ɔ, pi be fɛɛ be nɛ wa maa na níhi fuu nɛ Yehowa bɔ ɔ. Nɛ ke wa ngɛ kɔpehi a mi po ɔ, wa ma nyɛ maa nu he kaa wa be deka nɛ waa kɛ maa hyɛ níhi nɛ Mawu bɔ ɔ, se ngɛ anɔkuale mi ɔ, se nami ngɛ he kaa wa ma ná be kɛ hyɛ adebɔ níhi nɛ wa pue wa yi mi tɛ ngɛ a he. w23.03 15 ¶1-2

Yesu de ke, “zugba mimiɛɛmihi nɛ a nya wa” kɛ oslaa kpahi hu maa ba. (Luka 21:11) Jehanɛ se hu ɔ, Yesu de kaa “nihi fuu be mlaa nɔ yee,” nɛ jã nɛ e ngɛ mi bae mwɔnɛ ɔ. Kaa nɔ hyɛmi nɔ́ ɔ, wa naa kaa yi wu tso ní peepee kɛ basabasa peemi ngɛ nɔ yae, nɛ nimli yayahi hu tuaa nihi. (Mat. 24:12) Yesu de we ke haomihi kaa jã maa ba nihi nɛ a sɔmɔ we Yehowa a pɛ a nɔ. Ngɛ anɔkuale mi ɔ, oslaahi baa Yehowa sɔmɔli anɔkualetsɛmɛ fuu a nɔ. (Yes. 57:1; 2 Kor. 11:25) Eko ɔ, Yehowa be nyakpɛ blɔ nɔ gue kɛ po wa he piɛ kɛ je oslaahi a he mohu lɛɛ, se e ma ha wɔ nɔ́ fɛɛ nɔ́ nɛ wa hia konɛ wa tsui nɛ nɔ wa mi, nɛ wa ná tue mi jɔmi. Ke wa dla wa he kɛ fɔ si loko oslaa ko ba a, lɔ ɔ maa ye bua wɔ. Se ke wa pee jã a, anɛ lɔ ɔ tsɔɔ kaa wa be hemi kɛ yemi ngɛ Yehowa mi lo? Dɛbi kulaa. Ngɛ anɔkuale mi ɔ, ke wa dla wa he kɛ ha oslaa ko ɔ, lɔ ɔ mohu tsɔɔ kaa wa ngɛ hemi kɛ yemi kaa Yehowa ma nyɛ maa hyɛ wa nɔ. Mɛni he je nɛ wa de jã a? Mawu Munyu ɔ woɔ wɔ ga kaa wa dla wa he kɛ ha oslaahi nɛ ma nyɛ maa ba. w22.12 18 ¶9-10

Benɛ a wo Yosef tsu ɔ, Yehowa ha nɛ Egipt matsɛ ɔ nla nlami enyɔ komɛ nɛ hao lɛ wawɛɛ. Benɛ matsɛ ɔ ba ná le kaa Yosef nyɛɔ nɛ e tsɔɔ nlami sisi ɔ, e tsɔ nɛ a ya tsɛ lɛ kɛ ba. Ngɛ Yehowa yemi kɛ buami nya a, Yosef tsɔɔ Farao nlami ɔmɛ a sisi, nɛ e tsɔɔ lɛ nɔ́ nɛ e sa kaa e pee hulɔ. Enɛ ɔ ha nɛ Farao bua jɔ wawɛɛ. Benɛ Farao na kaa Yehowa kɛ Yosef ngɛ ɔ, e hla Yosef kaa e hyɛ niye ní nɔ ngɛ Egipt tsuo. (1 Mose 41:​38, 41-44) Pee se ɔ, hwɔ ko nɛ nya wa ba Egipt, nɛ e sa Yosef weku li nɛ a ngɛ Kanaan po ɔ a he. Amlɔ nɛ ɔ, Yosef ná he blɔ kɛ he e weku li ɔmɛ a yi wami, nɛ enɛ ɔ ha nɛ a baa weku kpa nɛ Mesia a maa je mi kɛ ba a yi. Ngɛ anɔkuale mi ɔ, Yehowa lɛ ha nɛ Yosef ye manye ngɛ nɔ́ fɛɛ nɔ́ mi ɔ nɛ. E ngɛ mi kaa Yosef nyɛminyumu ɔmɛ suɔ nɛ a gbe lɛ mohu lɛɛ, se Yehowa tsake si fɔfɔɛ ɔ konɛ e kɛ tsu e yi mi tomi he ní. w23.01 17 ¶11-12

Nɔ nɛ hyɛɔ e he nɔ saminya a yɔseɔ oslaa fɛɛ oslaa nɛ ma nyɛ ma puɛ huɛ bɔmi nɛ ngɛ e kɛ Yehowa a kpɛti ɔ, nɛ e bɔɔ mɔde kaa e maa yu e he ngɛ a he. Ke nɔ ko peeɔ jã a, lɔ ɔ tsɔɔ kaa e ngɔ e he kɛ to ngɛ Mawu suɔmi ɔ mi. (Abɛ 22:3; Jud 20, 21) Bɔfo Paulo de Kristofohi kaa a hɛ nɛ hi a he nɔ saminya. Kaa nɔ hyɛmi nɔ́ ɔ, e de Kristofohi nɛ a ngɛ Efeso ɔ ke: “Nyɛɛ hyɛ nɛ hi saminya konɛ bɔ nɛ nyɛ nyɛɛɔ ha a nɛ e ko pee kaa nihi nɛ a be juɛmi, se mohu kaa juɛmitsɛmɛ.” (Efe. 5:​15, 16) Be fɛɛ be ɔ, Satan bɔɔ mɔde kaa e ma puɛ huɛ bɔmi nɛ ngɛ waa kɛ Yehowa wa kpɛti ɔ. Enɛ ɔ he ɔ, Baiblo ɔ wo wɔ he wami kaa ‘waa ya nɔ nɛ wa yɔse nɔ́ nɛ ji Yehowa suɔmi nya ní ɔ’ konɛ waa po wa he piɛ kɛ je Satan tuami ɔmɛ a he. (Efe. 5:17) Bɔ nɛ pee nɛ waa pee nɔ́ nɛ da a, e sa nɛ wa yɔse nɔ́ nɛ ji “Yehowa suɔmi nya ní.” Wa ma nyɛ maa pee enɛ ɔ kɛ gu Mawu Munyu ɔ nɛ wa maa kane daa nɛ wa ma pue wa yi mi tɛ ngɛ he ɔ nɔ. Ke wa le nɔ́ nɛ ji Yehowa suɔmi nya ní, nɛ wa ná “Kristo juɛmi ɔ,” e maa ye bua wɔ nɛ waa pee wa ní “kaa juɛmitsɛmɛ” ke a wui wɔ mlaa ngɛ nɔ́ pɔtɛɛ nɛ e sa nɛ waa pee ɔ he po.—1 Kor. 2:​14-16. w23.02 16-17 ¶7-9

Si enyɛmɛ nɛ o dlaa o we ɔ mi? Atsinyɛ jemi ko be he kaa loko o ma ya hi lejɛ ɔ, kekleekle ɔ, o dla lejɛ ɔ saminya. Se ke lɔ ɔ se ɔ, o dla we o we ɔ mi hu ɔ, mɛni maa ba? Kaa bɔ nɛ o le ɔ, e be kɛe nɛ we ɔ mi maa sɛ mu ekohu. Ja o dlaa o we ɔ mi be fɛɛ be loko we ɔ mi ma tsɔ. Jã kɛ̃ nɛ e sa nɛ waa ya nɔ nɛ waa pee tsakemi ngɛ wa susumi kɛ suhi nɛ wa ngɛ ɔ a he. Ngɛ anɔkuale mi ɔ, loko wa ma ha nɛ a baptisi wɔ ɔ, wa bɔ mɔde wawɛɛ nɛ wa pee tsakemihi nɛ a he hia ngɛ wa si himi mi bɔ nɛ pee nɛ “wa fɔ he lo mi kɛ mumi mi mu fɛɛ mu ngɛ wa he.” (2 Kor. 7:1) E sa nɛ waa kɛ ga nɛ bɔfo Paulo wo kaa ‘waa ya nɔ nɛ wa ha nɛ a pee wɔ ehe’ ɔ nɛ tsu ní. (Efe. 4:23) Je nɛ ɔ ma nyɛ ma ná wa nɔ he wami nɛ wa he be tsɔe ngɛ Yehowa hɛ mi. Loko wa ní peepee maa sa Yehowa hɛ mi daa a, e sa nɛ be fɛɛ be ɔ, waa hyɛ wa susumi, wa suhi kɛ níhi nɛ wa bua jɔ he ɔ saminya. w23.01 8 ¶1-2

Moo po he foni kaa Yesu ngɛ ní tsɔɔe nɛ o ngɛ lɛ tue bue. E pɔɔ Ngmami Klɔuklɔu ɔ se tsɛmi ejakaa e kase kɛ wo e yi mi. Benɛ a baptisi Yesu nɛ a pɔ lɛ nu kɛ mumi klɔuklɔu ɔ, jamɛ a be ɔ mi nɛ Yehowa ha nɛ e kai níhi nɛ e le loko e ba zugba a nɔ ɔ nɛ. Benɛ a baptisi Yesu se pɛ ɔ, e kekleekle munyu nɛ e tu kɛ munyu komɛ nɛ e tu loko e gbo ɔ ji munyuhi nɛ e tsɛ se kɛ je Ngmami ɔ mi. (5 Mose 8:3; La 31:5; Luka 4:4; 23:46) Ngɛ jeha etɛ kɛ fã nɛ Yesu kɛ tsu e sɔmɔmi ní tsumi ɔ mi ɔ, e pɔɔ Ngmami ɔ se tsɛmi, e kaneɔ, nɛ e tsɔɔ mi. (Mat. 5:​17, 18, 21, 22, 27, 28; Luka 4:​16-20) Jeha komɛ a se loko Yesu maa je e sɔmɔmi ní tsumi ɔ sisi ɔ, e nu nɛ a kane Mawu Munyu si abɔ, nɛ lɛ nitsɛ hu e kane si abɔ. Atsinyɛ jemi ko be he kaa ke Yesu kɛ Yosef kɛ Maria ngɛ we mi ɔ, e nuɔ nɛ a tsɛɔ ngmamihi a se. (5 Mose 6:​6, 7) Jehanɛ hu ɔ,daa otsi ɔ, Yesu piɛɛɔ e weku ɔ he kɛ yaa kpe he ɔ ngɛ He Jɔɔmi Ligbi ɔ nɔ. (Luka 4:16) Ke e ya lejɛ ɔ nɛ a ngɛ Ngmami ɔ kanee hu ɔ, e buɔ tue saminya. w23.02 8 ¶1-2

Wa ngɛ yi mi tomihi fuu a he je nɛ e sa nɛ waa suɔ Yehowa. Kaa nɔ hyɛmi nɔ́ ɔ, o ba nu sisi kaa Yehowa ‘ngɔ nɛ wami tsuo je,’ nɛ lɛ nɛ e ha wɔ “nike ní kpakpa fɛɛ nike ní kpakpa, kɛ nike ní nɛ hi kɛ pi si fɛɛ nike ní nɛ hi kɛ pi si.” (La 36:9; Yak. 1:17) Ní kpakpahi tsuo nɛ o ngɛ ɔ je wa Mawu nɛ e suɔ wɔ, nɛ e haa nɔ nɔ́ faa a ngɔ. Kpɔmi nɔ́ ɔ ji nike ní nɛ se be nɛ Yehowa kɛ ha wɔ. Mɛni he je nɛ wa ma nyɛ ma de jã a? Mo susu huɛ bɔmi gbagbanii nɛ ngɛ Yehowa kɛ e Bi ɔ a kpɛti ɔ he nɛ o hyɛ. Yesu de ke: “Tsɛ ɔ suɔ mi” nɛ “i suɔ Tsɛ ɔ.” (Yoh. 10:17; 14:31) Huɛ bɔmi nɛ ngɛ Yehowa kɛ Yesu a kpɛti ɔ mi wa wawɛɛ ejakaa a hi si jeha ayɔ akpehi abɔ. (Abɛ 8:​22, 23, 30) Mo susu bɔ nɛ e maa dɔ Mawu wawɛɛ ha benɛ e ngmɛ blɔ nɛ e Bi ɔ na nɔ́ nɛ e gbo ɔ. Yehowa suɔ adesahi tsuo wawɛɛ, nɛ mo hu o piɛɛ he. Enɛ ɔ he ɔ, e je suɔmi mi nɛ e ngɔ e Bi nɛ e suɔ lɛ ɔ kɛ sã afɔle bɔ nɛ pee nɛ o kɛ ni kpahi nɛ ná neneene wami. (Yoh. 3:16; Gal. 2:20) Enɛ ɔ ji yi mi tomi titli he je nɛ e sa nɛ waa suɔ Mawu ɔ nɛ. w23.03 4-5 ¶11-13

E sa nɛ wa kua hemi kɛ yemi kuali a tsɔɔmihi. Yesu kã ni komɛ nɛ a kɛ mi gbami ngɛ Pergamo asafo ɔ mi bae ɔ a hɛ mi. (Kpoj. 2:​14-16) E je nihi nɛ a ngɛ Tiatira asafo ɔ mi nɛ́ a yu a he ngɛ “Satan níhi nɛ a mi kuɔ” a he ɔ a yi, nɛ e wo mɛ he wami kaa a “pɛtɛ” anɔkuale ɔ he wawɛɛ. (Kpoj. 2:​24-26) E sa nɛ Kristofohi nɛ a ngɛ lejɛ ɔ nɛ a gbɔjɔ, nɛ lakpa tsɔɔmi ná a nɔ he wami ɔ nɛ a tsake a tsui. Wɔ nɛ wa ngɛ mwɔnɛ ɔ hu nɛɛ? E sa nɛ wa kua tsɔɔmi fɛɛ tsɔɔmi nɛ e kɛ Yehowa susumi kpa we gbi. Wa maa na hemi kɛ yemi kuali kaa “Mawu jali,” se a ní peepee tsɔɔ kaa “a kua e mi he wami ɔ” loo a kɛ Baiblo ɔ tsu we ní. (2 Tim. 3:5) Ke wa kaseɔ Mawu Munyu ɔ saminya a, e be yee kaa wa ma yo lakpa tsɔɔmihi nɛ waa yu wa he ngɛ he. (2 Tim. 3:​14-17; Jud 3, 4) E sa nɛ waa pee níhi nɛ ma ha nɛ Yehowa nɛ kplɛɛ wa jami ɔ nɔ. Ke wa ngɛ nɔ́ ko pee nɛ ma ha nɛ wa jami ɔ be Yehowa hɛ mi sae ɔ, lɛɛ e sa nɛ wa kpa oya nɔuu.—Kpoj. 2:​5, 16; 3:​3, 16. w22.05 4 ¶9; 5 ¶11