June

Huɛ bɔmi kpakpa ngɛ Hiob kɛ Yehowa a kpɛti. E ngɛ weku nɛ kle nɛ bua jɔmi ngɛ mi, nɛ e ji niatsɛ hulɔ. (Hiob 1:​1-5) Se ngɛ ligbi kake mi ɔ, Hiob nɔ́ fɛɛ nɔ́ bɔ lɛ. Kekleekle ɔ, e lohwehi tsuo gbo. (Hiob 1:​13-17) Lɔ ɔ se ɔ, e bimɛ nɛ e suɔ mɛ ɔ tsuo gbo. Benɛ Hiob kɛ e yo ɔ ná le kaa a bimɛ nyɔngma amɛ ná oslaa nɛ a gbo ɔ, hyɛ bɔ nɛ a he mi maa po nɛ a maa ye aywilɛho ha. E be nyakpɛ kaa Hiob kɛ aywilɛho hia e tade ɔmɛ ngɛ e he, nɛ e hɛli nɛ e nɔ si! (Hiob 1:​18-20) Satan ha nɛ Hiob nu hiɔ ko nɛ nya wa nɛ e ngɛ zo. (Hiob 2:​6-8) Loko jamɛ a si fɔfɔɛ ɔ maa ba a, nihi buɔ Hiob wawɛɛ ngɛ e kpɔ ɔ mi. Nihi baa e ngɔ nɛ a ba biɔ lɛ ga womi. (Hiob 31:18) Se piɔ nɛ ɔ lɛɛ a kua lɛ. A kɛ lɛ pee we nɔ́ ko hu. E nyɛmimɛ kɛ e huɛmɛ nɛ nyu bi ngɛ e kɛ mɛ a kpɛti ɔ si lɛ. E sɔmɔli ɔmɛ po kua lɛ!—Hiob 19:​13, 14, 16. w22.06 21 ¶5-6

Ngɛ wa baptisimi se ɔ, e sa nɛ wɔ tsuo waa kɛ kɔkɔ bɔmi nɛ bɔfo Paulo kɛ ha Kristofohi nɛ a ngɛ Efeso ɔ nɛ tsu ní. E wo mɛ he wami kaa a pee Kristofohi nɛ a “wa.” (Efe. 4:13) Enɛ ɔ tsɔɔ kaa e sa nɛ a bɔ mɔde nɛ a ‘ya a hɛ mi. E ji anɔkuale kaa o ngɛ suɔmi nɛ mi wa kɛ ha Yehowa momo. Se o ma nyɛ ma ha nɛ suɔmi nɛ o ngɛ kɛ ha lɛ ɔ mi nɛ wa wawɛɛ. Kɛ gu mɛni blɔ nɔ? Bɔfo Paulo tsɔɔ blɔ kake nɔ nɛ wa ma nyɛ maa gu kɛ pee jã ngɛ Filipi Bi 1:9. Paulo sɔle konɛ suɔmi nɛ Filipi bi ɔmɛ ngɛ ɔ, nɛ e “hiɛ kɛ be nɔ babauu nitsɛ pe kekle ɔ.” Mɛni blɔ nɔ wɔ hu wa maa gu kɛ pee jã? Wa ma nyɛ maa pee ja kɛ gu “nile nitsɛnitsɛ kɛ nɔ́ se kɔmi nɛ pi si” nɛ wa ma ná a nɔ. Ke wa ya nɔ nɛ wa le Yehowa a, suɔmi nɛ wa ngɛ kɛ ha lɛ ɔ mi maa wa, nɛ wa bua maa jɔ e su kpakpa amɛ kɛ blɔhi a nɔ nɛ e guɔ kɛ peeɔ e ní ɔ a he. Jehanɛ hu ɔ, wa maa suɔ nɛ waa pee níhi nɛ maa sa e hɛ mi, nɛ wa be suɔe kaa wa maa pee nɔ́ ko nɛ maa dɔ lɛ. Wa bɔɔ mɔde kaa wa maa le nɔ́ nɛ e ngɛ hlae nɛ waa pee, kɛ blɔ nɔ nɛ wa maa gu kɛ pee jã. w22.08 2-3 ¶3-4

A ngma níhi nɛ ngɛ Kpo Jemi womi ɔ mi ɔ kɛ ha wɔ nɛ wa sɔmɔɔ Mawu ɔ, se pi kɛ ha adesahi tsuo. Akɛnɛ wa ji Mawu we bi he je ɔ, e sɛ nɛ e pee wɔ nyakpɛ kaa sɔmɔmi ní tsumi ɔ nɛ wa ngɔɔ wa he kɛ woɔ mi ɔ ngɛ ye buae nɛ gbami nɛ ngɛ womi nɛ sa kadimi nɛ ɔ mi ɔ ngɛ mi bae. Bɔfo Yohane tsɔɔ be nɛ gbami nɛ ɔmɛ maa ba mi. E de ke: “Ngɛ mumi ɔ he wami nya a, i ya je Nyɔmtsɛ ɔ ligbi ɔ mi.” (Kpoj. 1:10) Yohane ngma munyu nɛ ɔ ngɛ jeha 96 mi loko a fɔ Kristo. Jamɛ a be ɔ mi ɔ, “Nyɔmtsɛ ɔ ligbi ɔ” sui lolo kulaa. (Mat. 25:​14, 19; Luka 19:12) Baiblo gbami tsɔɔ kaa Nyɔmtsɛ ɔ ligbi ɔ je sisi ngɛ jeha 1914 ɔ mi, be nɛ a wo Yesu Matsɛ ngɛ hiɔwe ɔ. Kɛ je jamɛ a jeha a kɛ ma a, gbamihi nɛ a ngɛ Kpo Jemi womi ɔ mi nɛ kɔɔ Mawu we bi a he ɔ bɔni mi bami. Ngɛ anɔkuale mi ɔ, amlɔ nɛ ɔ, wa ngɛ “Nyɔmtsɛ ɔ ligbi ɔ mi”!—Kpoj. 1:3. w22.05 2 ¶2-3

Be mi nɛ lohwe awi yelɔ ɔ kɛ lakpa gbalɔ ɔ ngɛ wami mi loloolo ɔ, a sake mɛ tsuo kɛ wo la taku ɔ nɛ e ngɛ tsoe gegeege kɛ sɔlfa a mi hɛ ngmengmle. Lɔ ɔ he ɔ, nɔ yemi nɛ ɔmɛ maa hi nɔ yee nɛ Mawu ma kpata a hɛ mi pɛsɛpɛsɛ. Mɛni enɛ ɔ tsɔɔ wɔ? Akɛnɛ wa ji Kristofohi he je ɔ, e sa nɛ waa ye Mawu anɔkuale nɛ wa fĩ e Matsɛ Yemi ɔ pɛ se. (Yoh. 18:36) E sɛ nɛ waa kɛ wa he nɛ wo ma kudɔmi sanehi a mi. E be gbɔjɔɔ kaa wa maa pee jã ejakaa je nɛ ɔ mi nɔ yemi ɔmɛ suɔ kaa wa fĩ a se ngɛ wa munyu tutui kɛ wa ní peepee mi. Nihi nɛ a nyɛ a nɔ nɛ a fĩ a se ɔ ma ná lohwe awi yelɔ ɔ kadimi nɔ́ ɔ eko. (Kpoj. 13:​16, 17) Nɔ fɛɛ nɔ nɛ e ma ná jamɛ a kadimi nɔ́ ɔ, Yehowa be e nɔ kplɛɛe, nɛ e be neneene wami náe. (Kpoj. 14:​9, 10; 20:4) Enɛ ɔ he ɔ, ke nɔ yeli ɔmɛ ngɛ wa nɔ nyɛe kaa wa fĩ a se kaa mɛni po ɔ, e sa nɛ waa ya nɔ nɛ wa fĩ si, nɛ wa ko ngɔ wa he kɛ wo ma kudɔmi sanehi a mi. w22.05 10-11 ¶12-13

Oti ko nɛ o kɛ ma nyɛ maa ma o hɛ mi ji kaa o maa kase ní komɛ nɛ a he hia. Ke wa ngɛ nyɛmi ko ɔ, wa ma nyɛ tsu ní tsumi kpahi fuu. Mo susu nihi abɔ nɛ a hia konɛ a nyɛ nɛ a ma Bethel wehi, Kpe Peemi Asahi kɛ Matsɛ Yemi Asahi ɔ he nɛ o hyɛ. Ní tsuli nɛ ɔmɛ a kpɛti nihi fuu ji nihi nɛ a kase ní tsumi nɛ ɔ ngɛ nyɛmimɛ nyumuhi kɛ yihi nɛ a le tsu mami ní tsumi saminya a ngɔ. Mwɔnɛ ɔ, nyɛmimɛ nyumuhi kɛ yi ɔmɛ tsuo ngɛ ga ní tsumihi nɛ maa hia kaa a le nɛ a kɛ dla Kpe Peemi Asahi kɛ Matsɛ Yemi Asahi ɔ kasee. Ngɛ blɔ nɛ ɔ kɛ blɔ kpa nɔ ɔ, Yehowa Mawu nɛ ji “neneene Matsɛ ɔ” kɛ Yesu Kristo nɛ e ji “matsɛmɛ ɔ a Matsɛ” ɔ ngɔ ní tsuli nɛ a he be kɛ ngɛ ní nguahi pee. (1 Tim. 1:17; 6:15) Wa suɔ nɛ wa tsu ní wawɛɛ, nɛ waa ngɔ ga ní tsumi ko he nile nɛ wa ngɛ ɔ kɛ je Yehowa yi, se pi wɔ nitsɛmɛ.—Yoh. 8:54. w22.04 24 ¶7; 25 ¶11

Salomo ji niatsɛ, nɛ we nɛ e hi mi ɔ ngɛ fɛu saminya. (1 Ma. 10:​7, 14, 15) Yesu lɛɛ e be nɔ́ ko tsɔ, nɛ e be lɛ nitsɛ e we. (Mat. 8:20) Se mɛ ni enyɔ ɔmɛ tsuo a ná juɛmi nɛ da ngɛ he lo nya níhi a he ejakaa nile nɛ a ngɛ ɔ je Yehowa Mawu ngɔ. Salomo ha nɛ wa na kaa ke wa ngɛ sika a, wa ma nyɛ ma ná ní komɛ nɛ wa hia, loo ní komɛ nɛ wa suɔ. Se ngɛ ní babauu nɛ Salomo ngɛ ɔ tsuo se ɔ, e yɔse kaa ní komɛ ngɛ nɛ a he hia pe sika. Kaa nɔ hyɛmi nɔ́ ɔ, e ngma ke: “Biɛ kpakpa hi pe ní nami babauu.” (Abɛ 22:1) Jehanɛ hu ɔ, Salomo yɔse kaa nihi nɛ a suɔ sika a, behi fuu ɔ, a be bua jɔmi. (Fiɛɛ. 5:​10, 12) E bɔ wɔ kɔkɔ hu kaa e sɛ nɛ wa susu kaa sika ji nɔ́ nɛ he hia pe kulaa ngɛ si himi mi, ejakaa sika nɛ wa ngɛ ɔ ma nyɛ maa je wa dɛ ngɛ be kpiti mi.—Abɛ 23:​4, 5. w22.05 21 ¶4-5

Ke wa pue wa yi mi tɛ ngɛ jɔɔmihi nɛ wa ngɛ náe amlɔ nɛ ɔ he ɔ, e ma ha nɛ huɛ bɔmi nɛ ngɛ waa kɛ Yehowa wa kpɛti ɔ mi maa wa. Jã kɛ̃ nɛ ke wa susu ní kpakpahi nɛ Yehowa wo si kaa e maa pee ha wɔ hwɔɔ se ɔ he ɔ, e ma ha nɛ wa maa fia wa pɛɛ si kaa wa ma sɔmɔ Yehowa daa. Ní nɛ ɔmɛ tsuo maa ye bua wɔ konɛ wa sɔmɔ Yehowa kɛ bua jɔmi amlɔ nɛ ɔ. Ke Yehowa ngɛ je yaya nɛ ɔ hɛ mi kpatae ɔ, ‘e maa na wɔ mɔbɔ.’ Wa le kaa Yehowa Mawu ɔ, “nɔ́ nɛ da pɛ e peeɔ daa.” Enɛ ɔ he ɔ, wa ngɛ nɔ mami kaa ke be su nɛ e ma kpata Satan je ɔ hɛ mi ɔ, e be hae nɛ ligbi kake po nɛ pue nɔ. (Yes. 25:9) Wa to wa tsui si kɛ ngɛ ligbi nɛ Yehowa ma kpɔ̃ wɔ ɔ mlɛe. Se loko jamɛ a ligbi ɔ maa su ɔ, wa fia wa pɛɛ si kaa wa maa ya nɔ maa na sɔlemi kaa he blɔ nɛ wa ná. Wa maa kase Mawu Munyu ɔ, nɛ waa kɛ ma tsu ní, nɛ́ wa pue wa yi mi tɛ ngɛ jɔɔmihi nɛ e ha nɛ wa ngɛ náe ɔ he. Ke wa pee jã a, Yehowa maa ye bua wɔ konɛ wa fĩ si nɛ waa kɛ bua jɔmi nɛ sɔmɔ lɛ. w22.11 13 ¶18-19

E ngɛ mi kaa Baiblo ɔ tui Timoteo baptisimi he munyu mohu lɛɛ, se hyɛ bɔ nɛ e yayo Yunis bua maa jɔ ha jamɛ a ligbi ɔ. (Abɛ 23:25) Yunis nɛ́ níhi gbɔjɔɔ mohu lɛɛ, se e nyɛ nɛ e tsɔɔ Timoteo ní nɛ e ba suɔ Yehowa kɛ e Bi Yesu Kristo. Timoteo fɔli ɔmɛ be jami kake mi. E papaa ji Hela no, nɛ e mami kɛ e maa ji Yuda bi. (Níts. 16:1) Yunis kɛ Lɔis ba pee Kristofohi benɛ eko ɔ, Timoteo ji niheyo ɔ. Se e papaa ba pee we Kristofo no. Mɛni jami Timoteo maa hla? Mwɔnɛ ɔ hu ɔ, binyɛmɛ nɛ a ji Kristofohi suɔ a weku ɔ. Se nɔ́ nɛ pe kulaa a, a suɔ nɛ a ye bua a bimɛ konɛ huɛ bɔmi kpakpa nɛ hi a kɛ Yehowa a kpɛti. Nɛ wa Mawu ɔ hu bua jɔ a mɔde bɔmi ɔ he wawɛɛ. (Abɛ 1:​8, 9) Yehowa yeɔ bua binyɛmɛ fuu konɛ a tsɔɔ a bimɛ ní nɛ a suɔ lɛ nɛ a sɔmɔ lɛ. w22.04 16 ¶1-3

E be kɛe nɛ Yehowa maa ngɔ kɛ wo nɔ yeli ɔmɛ a tsui mi konɛ “a tsu e susumi ɔ he ní.” Mɛni maa je mi kɛ ba? Nɔ yeli ɔmɛ, nɛ ji “matsɛmɛ nyɔngma” amɛ ma tua lakpa jamihi tsuo nɛ ngɛ je ɔ mi ɔ, nɛ a ma kpata a hɛ mi. (Kpoj. 17:​1, 2, 12, 16) Kɛ wa plɛ kɛ le kaa Babilon Ngua a nyagbe su si ta kɛɛ? Loko wa maa na sane bimi nɛ ɔ heto ɔ, e he hia nɛ wa kai kaa Yufrate Pa a bɔle blema Babilon ma a, nɛ e po ma a he piɛ ngɛ blɔ ko nɔ. Kpo Jemi womi ɔ ngɔ nihi ayɔhi abɔ nɛ a fĩɔ Babilon Ngua a se ɔ kɛ to “nyu” nɛ poɔ nɔ he piɛ he. (Kpoj. 17:15) Jehanɛ se hu gbami ɔ ha nɛ wa náa kaa nyu ɔ ‘maa mii,’ nɛ tsɔɔ kaa nihi fuu nɛ a fiɔ je ɔ lakpa jami tsuo se ɔ ma kpa a se fimi. (Kpoj. 16:12) Mwɔnɛ ɔ, gbami nɛ ɔ ngɛ mi bae ejakaa nihi babauu je lakpa jami mi, nɛ a ngɔ a hɛ kɛ tsɔɔ he kpahi kɛ ha a nyagba amɛ a nya tsaba. w22.07 5-6 ¶14-15

Ke waa kɛ yayami ke ɔ, lɔ ɔ tsɔɔ kaa wa hɛ sa mɔbɔ nami nɛ Yehowa jeɔ kpo kɛ tsɔɔ wɔ ɔ. Ngɛ nɔ́ he tomi nɔ́ ko mi ɔ, Yesu ngɔ Yehowa kɛ to matsɛ ko he. Matsɛ nɛ ɔ ngɔ e nyɔguɛ ko nɛ e ye lɛ hiɔ agbo nɛ e nyɛ we nɛ e wo ɔ e hiɔ ɔ kɛ ke lɛ. Se jamɛ a nyɔguɛ ɔ je we mɔbɔ nami kpo kɛ tsɔɔ nyɔguɛ kpa nɛ e ye lɛ hiɔ nyafii ko ɔ. (Mat. 18:​23-35) Mɛni Yesu ngɛ wɔ tsɔɔe? Ke wa hɛ sa mɔbɔ nami agbo nɛ Yehowa je kpo kɛ tsɔɔ wɔ ɔ, lɔ ɔ ma ha nɛ waa kɛ nihi a tɔmi maa ke mɛ. (La 103:9) Jeha komɛ nɛ be ɔ, Hwɔɔmi Mɔ ɔ de ke: “Ke waa kɛ nihi a tɔmi ke mɛ si abɔ po ɔ, e kɛ si abɔ nɛ Mawu ngɔ wa tɔmi kɛ ke wɔ nɛ e je mɔbɔ nami kpo kɛ tsɔɔ wɔ kɛ gu Kristo nɔ ɔ be sɔe.” Ke waa kɛ nihi a yayami ke mɛ ɔ, Yehowa hu maa ngɔ wa yayami kɛ ke wɔ. Ke wa naa nihi mɔbɔ ɔ, Yehowa hu maa na wɔ mɔbɔ. (Mat. 5:7) Yesu ha nɛ oti nɛ ɔ pee heii benɛ e tsɔɔ e kaseli ɔmɛ bɔ nɛ a sɔle ha a.—Mat. 6:​14, 15. w22.06 10 ¶8-9

Yesu ba zugba a nɔ kaa adesa. E kase e Tsɛ ɔ saminya, nɛ e je e su ɔmɛ kpo pɛpɛɛpɛ. (Yoh. 14:9) Lɔ ɔ he ɔ, Yesu he ní nɛ wa ba kase ɔ ha nɛ wa le Yehowa Mawu, nɛ wa suɔ lɛ. Wa ná níhi nɛ e tsɔɔ, kɛ e blɔ tsɔɔmi ɔmɛ a he se kɛ gu Kristofohi asafo ɔ hɛ mi nɛ e ngɛ nyɛɛe mwɔnɛ ɔ nɔ. E tsɔɔ wɔ bɔ nɛ wa maa hi si ha nɛ ma ha nɛ Yehowa bua maa jɔ wa he. Wɔ tsuo wa ma nyɛ ma ná Yesu gbenɔ ɔ he se. Benɛ a tle Yesu si ɔ, Yehowa kplɛɛ e Bi ɔ afɔle sami nɛ e kɛ ‘tsu wa he kɛ je yayamihi tsuo a he’ ɔ nɔ. (1 Yoh. 1:7) Amlɔ nɛ ɔ, e ji Matsɛ nɛ e hɛ mi ngɛ nyami nɛ e be gboe gblegbleegble. (1 Mose 3:15) Ke a kpata Satan hɛ mi ɔ, Mawu sɔmɔli a bua maa jɔ wawɛɛ! Kɛ yaa si jamɛ a be ɔ, o kɔni mi ko jɔ̃. Anɔkualetsɛ ji wa Mawu ɔ nɛ. E maa jɔɔ “je ma amɛ tsuo.” w22.07 18 ¶13; 19 ¶19

E sɛ nɛ waa pee kpɛii tsɔ kaa doo ɔ, e sa nɛ waa su oti nɛ waa kɛ ma wa hɛ mi ɔ he. Mɛni he je? Ejakaa wa be nyɛe ma kudɔ nɔ́ fɛɛ nɔ́ nɛ yaa nɔ ngɛ wa si himi mi. Kaa nɔ hyɛmi nɔ́ ɔ, bɔfo Paulo ye bua kɛ to asafo ehe sisi ngɛ Tɛsalonika ma a mi. Se si temi kɛ womi ha nɛ Paulo je ma a mi. (Níts. 17:​1-5, 10) Kaa Paulo ya nɔ nɛ e hi ma a mi ɔ, e ko ngɔ e nyɛmimɛ ɔmɛ kɛ wo oslaa mi. Se Paulo kɔni mi jɔ̃ we. E kplɛɛ tsakemi nɛ ba a nɔ. Pee se ɔ, e tsɔ Timoteo nɛ e ya ye bua Kristofohi ehe nɛ a ngɛ Tɛsalonika a konɛ a hemi kɛ yemi mi nɛ wa. (1 Tɛs. 3:​1, 2) Nyɛmimɛ nɛ a ngɛ Tɛsalonika a bua maa jɔ wawɛɛ. Wa ma nyɛ maa kase nɔ́ ko ngɛ níhi a si kpami nɛ Paulo ná ngɛ Tɛsalonika a mi. Waa kɛ mumi mi oti ko ma nyɛ maa ma wa hɛ mi, se wa si fɔfɔɛ ma nyɛ ma tsake nɛ wa be nyɛe maa su. (Fiɛɛ. 9:11) Ke e ba jã ngɛ o blɔ fa mi ɔ, moo pee klaalo kaa o kɛ oti nɛ o ma nyɛ maa su he ngɛ si fɔfɔɛ nɛ o ya je mi ɔ mi ɔ maa ma o hɛ mi. w22.04 25-26 ¶14-15

Yehowa ha wɔ hwɔɔ se he hɛ nɔ kami kpakpa, nɛ lɔ ɔ woɔ wa bua. Nyɛ ha nɛ wa susu ní komɛ nɛ Baiblo ɔ de nɛ ma nyɛ maa wo wa bua ke waa kɛ kahi ngɛ kpee ɔ he. Ngɛ Ngmami ɔ mi ɔ, Yehowa ma nɔ mi kɛ ha wɔ kaa nɔ́ ko nɔ́ ko “be nyɛe ma je wɔ kɛ je [e] suɔmi ɔ” he. Kahi nɛ a mi wa wawɛɛ po be nyɛe ma je wɔ kɛ je Yehowa suɔmi ɔ he. (Rom. 8:​38, 39) Jehanɛ hu, Yehowa ha nɛ wa ná nɔ mi mami kaa kɛ gu sɔlemi nɔ ɔ, ‘nɔ tsuaa nɔ nɛ tsɛɔ lɛ ɔ, e hɛɛ lɛ kɛ suu e he.’ (La 145:18) Yehowa ha nɛ wa le kaa ke wa ngɔ wa hɛ kɛ fɔ e nɔ ɔ, wa ma nyɛ ma fĩ si ngɛ ka fɛɛ ka nɛ waa kɛ maa kpe ɔ mi, nɛ ke wa ngɛ nɔ́ nae po wa ma ná bua jɔmi. (1 Kor. 10:13; Yak. 1:2) Mawu Munyu ɔ hu kaiɔ wɔ kaa kahi nɛ waa kɛ ngɛ kpee ɔ se be kɛe, se jɔɔmihi nɛ wa ma ná a maa hi si kɛ ya neneene. (2 Kor. 4:​16-18) Yehowa ha nɛ wa ná hɛ kɛ nɔ fɔmi nɛ mi wa kaa e ma je nɔ́ nɛ ngɔ wa nyagba amɛ ba a kɛ je pɛsɛpɛsɛ. Lɔ ɔ ji Satan Abosiami kɛ nihi tsuo nɛ a peeɔ yi wu tso ní kaa lɛ ɔ. (La 37:10) Anɛ o ngɔ Baiblo mi munyu komɛ nɛ woɔ nɔ bua kɛ wo o yi mi konɛ e ye bua mo o nyɛ nɛ o da kahi nɛ o kɛ maa kpe hwɔɔ se ɔ nya lo? w22.08 11 ¶11

Anɛ o susu kaa e he maa wa kaa o maa ya nɔ nɛ o kɛ Yehowa dami mlaa amɛ nɛ tsu ní ngɛ o si himi mi be fɛɛ be lo? Yehowa wo si kaa wa dami ní peemi ɔ maa hi kaa “bɔ nɛ oslɔke kuɔ kɛ pueɔ wo dɔ mi” ɔ. (Yes. 48:​18, NW.) Moo po he foni kaa o daa si ngɛ wo nya nɛ o ngɛ hyɛe nɛ oslɔke ɔ ngɛ kue kɛ ngɛ wo dɔ mi puee nɛ́ e kpa we. Benɛ o bua ngɛ nɔ́ nɛ o ngɛ hyɛe ɔ he jɔe ɔ, anɛ o maa hao kaa nɔ́ nɛ o ngɛ hyɛe ɔ se maa po ligbi ko lo? Dɛbi! O le kaa e maa ya nɔ nɛ e maa pee jã. O dami ní peemi ɔ ma nyɛ maa pee kaa bɔ nɛ oslɔke kuɔ kɛ pueɔ wo dɔ mi ɔ! Ngɛ mɛni blɔ nɔ? Ke o maa mwɔ yi mi kpɔ ko ɔ, kekleekle ɔ, mo susu nɔ́ nɛ Yehowa maa suɔ nɛ o pee ɔ he. Lɔ ɔ se ɔ, moo pee nɔ́ nɛ Yehowa suɔ nɛ o pee ɔ. Ke yi mi kpɔ nɛ o maa mwɔ ɔ he wa kaa mɛni po, wa Tsɛ nɛ ngɛ suɔmi ɔ pee klaalo kaa e maa ye bua mo konɛ o pee nɔ́ nɛ da ngɛ e hɛ mi be fɛɛ be.—Yes. 40:​29-31. w22.08 30 ¶15-17

Ke jeha 1,000 ɔ ba nyagbe ɔ, a maa ngmɛɛ Satan he, nɛ e maa bɔ mɔde kaa e maa sisi adesahi nɛ a ye mluku ɔ. Jamɛ a be ɔ mi ɔ, adesahi ne a ye mluku tsuo ma ná he blɔ kɛ tsɔɔ heii kaa a ngɛ bu kɛ ha Mawu biɛ ɔ, nɛ a fĩ e nɔ yemi ɔ se. (Kpoj. 20:​8-10) Nɔ́ nɛ nɔ ko maa pee jamɛ a be ɔ lɛ maa tsɔɔ kaa a maa ngma e biɛ ngɛ wami womi ɔ mi, nɛ́ a be gbɛe hu. Baiblo ɔ de ke ni komɛ be anɔkuale yee kaa bɔ nɛ Adam kɛ Hawa pee ɔ, nɛ a ma kua Yehowa nɔ yemi ɔ. Mɛni maa ba a nɔ? Kpo Jemi 20:15 ɔ de ke: “A sake nɔ fɛɛ nɔ nɛ a nɛ kaa a ngma e biɛ ngɛ wami womi ɔ mi ɔ ngɔ wo la taku ɔ mi.” Ee, ngɛ ja mɛ a be ɔ mi ɔ, Yehowa ma kpata nihi nɛ a ma tsɔ̃ atua a hɛ mi pɛsɛpɛsɛ. Se adesahi nɛ a ye mluku ɔ a kpɛti nihi hiɛhiɛɛ maa ye manye ngɛ nyagbe ka nɛ ɔ mi. A maa ngma a biɛ ngɛ wami womi ɔ mi nɛ a be gbɛe hu gblegbleegble. w22.09 23-24 ¶15-16

Ngɛ kaseli ɔmɛ a be ɔ mi ɔ, ni komɛ nɛ a ngɛ asafo ɔ mi ɔ tsɔɔ kaa e sa nɛ a po Ma Jeli nɛ a ba pee Kristofohi ɔ, bɔ nɛ pee nɛ Yuda bi ɔmɛ nɛ a ko tu a he munyu yaya. (Gal. 6:12) E ngɛ mi kaa bɔfo Paulo bua jɔɛ a susumi ɔ he mohu lɛɛ, se e de we ke a ngɔ e blɔ tsɔɔmi kɛ tsu ní. Mohu ɔ, e ba e he si, nɛ e ngɔ sane ɔ kɛ ya fɔ bɔfo ɔmɛ kɛ nikɔtɔma amɛ nɛ a ngɛ Yerusalem ɔ a hɛ mi. (Níts. 15:2) Bɔ nɛ Paulo plɛ kɛ tsu sane ɔ he ní ha a ye bua nyɛmimɛ ɔmɛ nɛ lɔ ɔ ha nɛ tue mi jɔmi kɛ bua jɔmi hi asafo ɔ mi. (Níts. 15:​30, 31) Ke pɛ ko te si ɔ, e sa nɛ wa bi ga womi kɛ je nihi nɛ Yehowa hla mɛ kaa a hyɛ asafo ɔ nɔ ɔ a ngɔ. Ke wa pee jã a, lɔ ɔ ma ha nɛ tue mi jɔmi maa hi asafo ɔ mi. Wa náa blɔ tsɔɔmi nɛ je Baiblo ɔ mi ngɛ asafo ɔ womi ɔmɛ a mi. Ke waa kɛ blɔ tsɔɔmi nɛ ɔmɛ tsu ní mohu pe nɛ waa kɛ wa susumi ma tsu ní ɔ, lɔ ɔ ma ha nɛ tue mi jɔmi maa hi asafo ɔ mi. w22.08 22 ¶8-9

Be komɛ ɔ, wa suɔ nɛ wa de wa huɛ ko nɛ nyu bi ngɛ waa kɛ lɛ wa kpɛti ɔ wa tsui mi sane ko. Se pi be fɛɛ be nɛ jã peemi ngɛ gbɔjɔɔ. Mɛni he je? Ejakaa wa ngɛ gbeye yee kaa eko ɔ, e ma ya bɔ ni kpahi. Se ngɛ lɔ ɔ tsuo se ɔ, wa bua jɔ wawɛɛ kaa wa ngɛ huɛmɛ nɛ wa nyɛɔ deɔ mɛ bɔ nɛ wa ngɛ he nue ha, nɛ wa le kaa a be ni kpahi dee! Asafo mi nikɔtɔmahi nɛ a je we laami sane kpo ɔ ngɛ kaa ‘wesa he ngɛ kɔɔhiɔ nya, kɛ laami he ngɛ ahumi nya.’ (Yes. 32:2) Wa le kaa waa kɛ mɛ ma nyɛ maa sɛɛ ní faa ejakaa wa he mɛ ye, nɛ nɔ́ fɛɛ nɔ́ nɛ wa ma de mɛ ɔ, a be nihi dee. Wa nyɛ we a nɔ kaa a de wɔ laami sane ko. Jehanɛ hu ɔ, wa bua jɔ asafo mi nikɔtɔma amɛ a yi ɔmɛ a he wawɛɛ, ejakaa a nyɛ we a huno ɔmɛ a nɔ kaa a de mɛ ni kpahi a laami sanehi. Ngɛ anɔkuale mi ɔ, ke asafo mi nɔkɔtɔma ko de we e yo ni kpahi a laami sanehi ɔ, e yeɔ bua e yo ɔ wawɛɛ. w22.09 11 ¶10-11

Wa ma nyɛ ma ná nɔ mi mami kaa Yehowa ma kpɔ e sɔmɔli anɔkualetsɛmɛ ngɛ “amanehlu ngua” a nɛ maa mi. (Mat. 24:21; Dan. 12:1) E maa pee enɛ ɔ ke Gog nɛ je Magog nɛ ji je ma amɛ nɛ a pee kake ɔ kɛ hɛdɔ ba tua Yehowa sɔmɔli anɔkualetsɛmɛ ɔ. Ke mahi 193 nɛ a ji Je Ma Amɛ A Kake Peemi Kuu ɔ tsuo piɛɛ mahi nɛ a maa pee kake kɛ te si kɛ wo Yehowa we bi a he po ɔ, a be nyɛe nɛ a kɛ Hiɔwe No ɔ kɛ e hiɔwe tabo ɔ maa hwu! Yehowa wo si ke: ‘Ke e ba mi kikɛ nɛ ɔ, je ma amɛ tsuo maa na ka i kle nɛ i ngɛ klɔuklɔu, kɛkɛ ɔ, a maa le jehanɛ ɔ kaa imi ji Yehowa.’ (Eze. 38:​14-16, 23) Tuami nɛ Gog ma tua Mawu we bi ɔ ma ha nɛ Harmagedon ta a maa je sisi nɛ Yehowa ma kpata “matsɛmɛ ɔmɛ nɛ a ngɛ zugba a nɔ hehi tsuo” ɔ a hɛ mi. (Kpoj. 16:​14, 16; 19:​19-21) Se ‘dali kɛ nihi nɛ a yeɔ anɔkuale ɔ pɛ nɛ a maa hi zugba a nɔ.’—Abɛ 2:21. w22.10 16-17 ¶16-17

Wa be nyɛe maa le nɔ́ nɛ ngɛ adesa tsui mi, se ‘Yehowa lɛɛ nɔmlɔ tsui mi lɛ e hyɛɔ.’ (Abɛ 16:2) E suɔ nihi tsuo nɛ a je wɛtso slɔɔtohi a mi ɔ. Yehowa wo wɔ he wami kaa wa “bli [wa] tsui mi gbajaa” kɛ ha nɔ fɛɛ nɔ. (2 Kor. 6:13) Enɛ ɔ tsɔɔ kaa e sa nɛ waa bɔ mɔde nɛ waa suɔ wa nyɛmimɛ nɛ waa kɛ mɛ ngɛ Yehowa asafo ɔ mi ɔ nɛ wa ko kojo mɛ. Enɛ ɔ hu tsɔɔ kaa e sɛ nɛ waa kojo nihi nɛ a be asafo ɔ mi ɔ. Anɛ o maa kojo o weku no ko nɛ e be asafo ɔ mi ɔ nɛ o ma de ke, “Asimasi nɛ ɔ lɛɛ e be nyɛe maa ba anɔkuale mi kɔkɔɔkɔ lo”? Dɛbi. Ke o pee jã a, lɔ ɔ tsɔɔ kaa o ngɛ o he bue kaa nɔ nɛ e da pe nɔ fɛɛ nɔ. Loloolo ɔ, Yehowa ngɛ “nimli tsuo nɛ a ngɛ he fɛɛ he ɔ” he blɔ hae konɛ a tsake a tsui. (Níts. 17:30) Be fɛɛ be ɔ, mo kai kaa Yehowa naa nihi nɛ a naa a he kaa a da pe ni kpahi ɔ kaa a dɛ. E ba mi kaa suɔmi nɛ wa ngɛ kɛ ha Yehowa mlaa amɛ ɔ nɛ ha nɛ wa ná bua jɔmi. Jehanɛ hu ɔ, e ye bua wɔ nɛ waa pee nɔ hyɛmi nɔ́ kpakpa kɛ ha ni kpahi konɛ a suɔ waa kɛ wa Mawu ɔ wawɛɛ. w22.08 31 ¶20-22

Wa ma nyɛ maa hyɛ blɔ kaa nihi maa te si kɛ wo wɔ ngɛ wa fiɛɛmi ní tsumi ɔ mi amlɔ nɛ ɔ. Eko ɔ, si temi kɛ womi ɔ mi maa wa wawɛɛ hwɔɔ se. (Dan. 11:44; 2 Tim. 3:12; Kpoj. 16:21) Se wa ma nyɛ ma ná nɔ mi mami kaa Yehowa maa ye bua wɔ. Mɛni he je? Ke Yehowa ngɔ ní tsumi ko kɛ wo e sɔmɔli a dɛ nɛ ní tsumi ɔ he wa po ɔ, e yeɔ bua mɛ. Mo susu gbalɔ Ezekiel nɛ e fiɛɛ kɛ ha Yuda bi nɛ a nuu mɛ nyɔguɛ kɛ ho Babilon ya a he nɛ o hyɛ. Kɛ nihi nɛ a ngɛ zugba kpɔ nɛ Ezekiel fiɛɛ ngɛ mi ɔ pee a ní ha kɛɛ? Yehowa kale mɛ kaa “a tue wa,” nɛ “a bui [lɛ],” nɛ a ji “atuã tsɔli.” A yeɔ nɔ awi kaa mio, nɛ a he ngɛ gbeye kaa nyingmogblakoto. Enɛ ɔ he ɔ, e be nyakpɛ kaa Yehowa de Ezekiel si abɔ ke: “Koo ye mɛ gbeye”! (Eze. 2:​3-6.) Ezekiel nyɛ nɛ e tsu fiɛɛmi ní tsumi ɔ ejakaa (1) Yehowa lɛ tsɔ lɛ, (2) Mawu mumi ɔ wo lɛ he wami, kɛ (3) Mawu munyuhi loo níhi nɛ Mawu de lɛ ɔ ha nɛ e hemi kɛ yemi ɔ mi wa. w22.11 2 ¶1-2

Ngɛ níhi tsuo nɛ Yehowa bɔ nɛ wami ngɛ a mi ngɛ zugba a nɔ ɔ a kpɛti ɔ, adesahi pɛ nɛ a ma nyɛ maa hi si kɛ ya neneene. E ha wɔ he blɔ kaa waa hi si kɛ ya daa, nɛ wa ko gbo. Jehanɛ hu ɔ, Yehowa bɔ wɔ konɛ wa bua nɛ jɔ he kaa wa maa hi si kɛ ya neneene. Baiblo ɔ de kɛ kɔ adesahi a he kaa Mawu “ngɔ neneene kɛ wo a tsui mi.” (Fiɛɛ. 3:​11, NW) Enɛ ɔ ji yi mi tomi kake he je nɛ wa naa gbenɔ kaa he nyɛlɔ ɔ nɛ. (1 Kor. 15:26) Ke wa be he wami wawɛɛ ɔ, anɛ wa hiɔ si kɛkɛ nɛ wa pee we nɔ́ ko ngɛ he konɛ wa gbo lo? Dɛbi. Behi fuu ɔ, wa yaa hiɔ tsami he, nɛ a haa wɔ tsopa konɛ wa ná he wami. Ngɛ anɔkuale mi ɔ, wa peeɔ nɔ́ fɛɛ nɔ́ nɛ wa ma nyɛ konɛ wa ko gbo. Nɛ ke wa suɔlɔ ko gbo ɔ, e wa jio, e wɛ jio, e dɔɔ wɔ wawɛɛ, nɛ wa yeɔ aywilɛho be kɛkɛɛ. (Yoh. 11:​32, 33) Akɛnɛ wa Bɔlɔ ɔ suɔ wɔ he je ɔ, e bɔ wɔ kaa wa bua nɛ jɔ he kaa wa maa hi si kɛ ya neneene, nɛ waa kase e he ní kɛ ya daa. E ngɛ heii kaa e maa ye bua wɔ konɛ wa nyɛ nɛ waa hi si kɛ ya neneene. w22.12 3 ¶5; 4 ¶7

Eko ɔ wa nyɛmimɛ ɔmɛ ma nyɛ ma nu hiɔ, aloo a ye gbeye, loo a nu he kaa e piɛ mɛ pɛ ke a kɛ haomi ngɛ kpee. Moo bɔ mɔde kaa o kɛ nyɛmimɛ nyumuhi kɛ yihi maa sɛɛ ní. Ke hiɔ nɛ sãa nɔ gbɛ fĩa, nɛ waa kɛ wa nyɛmimɛ bua wa he nya a, e sa nɛ waa hyɛ nɛ hi nɛ wa ko su a he tsɔ. Ngɛ behi kaa jã a mi ɔ, eko ɔ, wa maa nu he kaa bɔ nɛ bɔfo Yohane nu he ɔ. Jinɛ e suɔ nɛ e na e huɛ Gayo hɛ mi kɛ hɛ mi. (3 Yoh. 13, 14) Se Yohane na kaa jamɛ a be ɔ mi ɔ, e be nyɛe maa na lɛ. Enɛ ɔ he ɔ, Yohane pee nɔ́ fɛɛ nɔ́ nɛ e ma nyɛ; e ngma Gayo sɛ womi. Ke o na kaa tsa pi be fɛɛ be nɛ o ma nyɛ ma ya slaa o nyɛmimɛ ɔmɛ ɔ, bɔɔ mɔde kaa o kɛ mɛ maa sɛɛ ní kɛ gu blɔ kpahi a nɔ. Ke o kɛ nyɛmimɛ ɔmɛ pɔɔ ní sɛɛmi ɔ, o maa nu he kaa o ngɛ slɔkee, nɛ o ngɛ tue mi jɔmi. Ke o hao wawɛɛ ɔ, o kɛ asafo mi nikɔtɔma amɛ nɛ sɛɛ he ní. A maa je suɔmi mi kɛ wo mo he wami, nɛ a maa wo mo ga. Moo kplɛɛ a ga womi ɔ nɔ.—Yes. 32:​1, 2. w22.12 17-18 ¶6-7

Baiblo ɔ tsɔɔ kaa a wo e nane kɔsɔkɔsɔ nɛ a kɛ e kuɛ wo dade pã mi kɛ ya si be ko. (La 105:​17, 18) Yosef si fɔfɔɛ ɔ mi ba wa wawɛɛ. Yosef nɛ e ji nyɔguɛ nɛ́ a heɔ lɛ yeɔ ɔ ba plɛ pee nɔ ko nɛ e ní ngɛ mɔbɔ ngɛ tsu womi he. Anɛ o kɛ si fɔfɔɛ ko nɛ mi wa kpe hyɛ nɛ o sɔle wawɛɛ ngɛ he, se kɛ̃ ɔ, níhi yɛ nya lo? E ma nyɛ maa ba jã. Ejakaa ngɛ je yaya nɛ ɔ nɛ Satan ngɛ nɔ yee ɔ mi ɔ, ke haomi ko maa ba wa nɔ ɔ, Yehowa tsi we nya. (1 Yoh. 5:19) Se o ma nyɛ ma ná nɔ mi mami kaa Yehowa le haomi nɛ o ngɛ mi gblee ɔ saminya nɛ e susuɔ o he wawɛɛ. (Mat. 10:​29-31; 1 Pet. 5:​6, 7) Jehanɛ hu ɔ, e wo si ke: “I be mo sie gblegbleegble, nɛ i be mo kuae gblegbleegble hulɔ.” (Heb. 13:5) Ke o si fɔfɔɛ ɔ mi wa nɛ o hɛ nɔ kami ta a, mo ná nɔ mi mami kaa Yehowa maa ye bua mo konɛ o fĩ si. w23.01 16 ¶7-8

Baiblo ɔ ha nɛ wa ná nɔ mi mami kaa Mawu be wɔ kuae ke wa tɔ̃ po. Benɛ Israel bi ɔmɛ tɔ̃ Yehowa nɔ si abɔ nɛ a tsake a tsui ɔ, Yehowa ngɔ a tɔmi ɔmɛ kɛ ke mɛ. Kristofohi nɛ a hi si ngɛ kaseli ɔmɛ a be ɔ mi ɔ hu na kaa Yehowa suɔ mɛ wawɛɛ nitsɛ. Benɛ nyumu ko pee yayami nɛ hɛdɔ ngɛ he ɔ, bɔfo Paulo wo e nyɛmimɛ Kristofo ɔmɛ he wami kaa a ‘ngɔ kɛ pa lɛ nɛ a wo e bua.’ (2 Kor. 2:​6, 7; 1 Kor. 5:​1-5) E ngɛ bua jɔmi wawɛɛ kaa Yehowa kua we e sɔmɔli nɛ a tɔ̃ e nɔ ɔ! E je suɔmi mi nɛ e ye bua mɛ, e tsɔse mɛ, nɛ e fɔ mɛ nine konɛ a kpale kɛ ba e ngɔ ekohu. Mwɔnɛ ɔ hu ɔ, e wo si kaa e maa pee jã ha yayami peeli tsuo nɛ a ma tsake a tsui niinɛ ɔ. (Yak. 4:​8-10)Baiblo ɔ tsɔɔ kaa Yehowa le ní, e yeɔ dami sane, nɛ e suɔ wɔ wawɛɛ. Baiblo ɔ ha nɛ wa na kaa Yehowa suɔ nɛ waa le lɛ, nɛ e suɔ nɛ waa pee e huɛ hulɔ. w23.02 7 ¶16-17

Ngɛ anɔkuale mi ɔ, wa suɔ nɛ waa le bɔ nɛ níhi nɛ ngɛ nɔ yae ngɛ je ɔ mi ɔ ha nɛ Baiblo gbami ngɛ mi bae ha. Kaa nɔ hyɛmi nɔ́ ɔ, Yesu tu ní pɔtɛɛ komɛ nɛ maa ya nɔ ɔ he munyu. Ní nɛ ɔmɛ maa ye bua wɔ konɛ waa na kaa Satan je yaya nɛ ɔ nyagbe su si ta. (Mat. 24:​3-14) Bɔfo Petro wo wɔ he wami kaa waa ngɔ wa juɛmi kɛ ma Baiblo gbamihi nɛ ngɛ mi bae ɔ nɔ konɛ wa hemi kɛ yemi ɔ mi nɛ wa be fɛɛ be. (2 Pet. 1:​20, 21) E ha nɛ wa na kaa e he hia nɛ waa le nɔ́ he je nɛ e sa nɛ wa susu Baiblo mi gbamihi a he. E wo wɔ he wami kaa wa ‘hɛ nɛ hi Yehowa ligbi ɔ bami ɔ nɛ́ wa juɛmi ngɛ nɔ wawɛɛ ɔ nɔ.’ (2 Pet. 3:​11-13) Pi nɛ wa ngɛ hlae nɛ waa le “ligbi kɛ ngmlɛfia” nɛ Harmagedon maa ba, se mohu ɔ, wa suɔ nɛ waa ngɔ be nɛ piɛ ɔ kɛ hi si “ngɛ je mi bami klɔuklɔu ní peepeehi kɛ Mawu jami mi ní peepeehi a mi.” (Mat. 24:36; Luka 12:40) Wa suɔ nɛ waa pee níhi ngɛ blɔ nɛ da nɔ, nɛ wa ha nɛ níhi nɛ wa peeɔ ngɛ Yehowa sɔmɔmi mi ɔ nɛ tsɔɔ kaa wa suɔ lɛ wawɛɛ. Loko wa ma nyɛ maa pee jã a, e sa nɛ wa hɛ nɛ hi wa he nɔ nɛ waa hyɛ wa he nɔ saminya. w23.02 16 ¶4, 6

Ní komɛ ngɛ nɛ e sa kaa ‘jijɔ kpa amɛ’ nɛ a pee konɛ a nyɛ nɛ a hi Paradeiso ɔ mi. E sa nɛ waa tsɔɔ kaa wa bua jɔ nɔ́ nɛ Yesu pee kɛ ha wɔ ɔ he. Kaa nɔ hyɛmi nɔ́ ɔ, bɔ nɛ waa kɛ nihi nɛ a pɔ mɛ nu ɔ hiɔ si ha a lɛ tsɔɔ bɔ nɛ wa suɔ Yesu ha. Yesu tsɔɔ kaa e maa da bɔ nɛ jijɔ kpa amɛ kɛ e nyɛmimɛ nɛ a pɔ mɛ nu ɔ maa hi si ha a nɔ kɛ kojo mɛ. (Mat. 25:​31-40) Nɔ́ kake nɛ wa ma nyɛ maa pee kɛ ye bua mɛ ji kaa waa kɛ kã maa fiɛɛ nɛ́ waa pee nihi kaseli. (Mat. 28:​18-20) E sɛ nɛ waa mlɛ nɛ waa su Paradeiso ɔ mi loko waa pee níhi nɛ Yehowa suɔ kaa nihi nɛ a maa hi lejɛ ɔ nɛ a pee ɔ. Amlɔ nɛ ɔ, e sa nɛ waa bɔ mɔde nɛ waa ye anɔkuale ngɛ wa munyu tumi kɛ wa ní peepee mi, nɛ́ waa ba wa je mi saminya. E sa nɛ waa ye Yehowa, wa hunomɛ loo wa yihi, kɛ wa nyɛmimɛ Kristofohi anɔkuale. Ke wa bu Yehowa tue ngɛ je yaya nɛ ɔ mi amlɔ nɛ ɔ, e be yee ha wɔ kaa wa maa bu lɛ tue ngɛ Paradeiso ɔ mi. Wa ma nyɛ maa kase ní tsumi komɛ kɛ su kpahi nɛ maa ye bua wɔ ngɛ je ehe ɔ mi hulɔ. Ke wa pee jã a, lɔ ɔ tsɔɔ kaa wa ngɛ wa he dlae kaa wa maa hi lejɛ ɔ. w22.12 11-12 ¶14-16

Wa bua jɔ kaa Yesu ji wa Matsɛ ejakaa lɛ ji Nɔ Yelɔ nɛ e sa. Yehowa nitsɛ lɛ tsɔse e Bi ɔ, nɛ e hla lɛ kaa e ye matsɛ. (Yes. 50:​4, 5) Mo susu bɔ nɛ Yesu je suɔmi mi nɛ e ngɔ e he kɛ sã afɔle ha a he hu nɛ o hyɛ. (Yoh. 13:1) Akɛnɛ Yesu ji o Matsɛ he je ɔ, e sa nɛ o suɔ lɛ wawɛɛ. Yesu tsɔɔ kaa nihi nɛ a suɔ lɛ niinɛ ɔ yeɔ e mlaa amɛ a nɔ. E tsɛɔ mɛ ke e huɛmɛ. (Yoh. 14:15; 15:​14, 15) E ji he blɔ ngua nɛ wa ná kaa waa kɛ Yehowa Bi ɔ maa pee huɛ.Jehanɛ hu ɔ, o le kaa Yesu baa e he si nɛ e kaseɔ e Tsɛ ɔ pɛpɛɛpɛ. O kase hu kaa e ha nihi nɛ hwɔ ngɛ mɛ yee ɔ niye ní, nɛ e wo nihi nɛ a kɔni mi jɔ̃ ɔ a bua, nɛ e tsa hiɔtsɛmɛ po. (Mat. 14:​14-21) O na bɔ nɛ e plɛɔ kɛ nyɛɛɔ e we asafo ɔ hɛ mi ha mwɔnɛ ɔ. (Mat. 23:10) O le hu kaa akɛnɛ lɛ ji Mawu Matsɛ Yemi ɔ nya Matsɛ he je ɔ, e maa pee níhi fuu ha wɔ hwɔɔ se. Mɛni o maa pee kɛ tsɔɔ kaa o suɔ lɛ? Lɔ ɔ ji kaa o maa nyɛɛ e nɔ hyɛmi nɔ́ ɔ se. O ma nyɛ maa je jã peemi sisi kɛ gu o he nɔ nɛ o maa jɔɔ kɛ ha Yehowa nɛ o ma ha nɛ a baptisi mo ɔ nɔ. w23.03 4 ¶8, 10

Yehowa lɛ bɔ níhi tsuo nɛ ngɛ hiɔwe kɛ zugba a nɔ, kɛ níhi tsuo nɛ ngɛ wo ɔ mi, nɛ ní nɛ ɔmɛ tsuo tsɔɔ wɔ ní komɛ ngɛ e he. (La 104:​24, 25) Mo susu bɔ nɛ Mawu bɔ wɔ ha a he nɛ o hyɛ! E bɔ wɔ konɛ wa bua nɛ jɔ e nibɔ ní kpahi nɛ a ngɛ fɛu ɔ a he. Jehanɛ hu ɔ, Yehowa bɔ wɔ konɛ wa nyɛ nɛ waa hyɛ nɔ́, waa nu nɔ́, waa pɛtɛ nɔ́ he, waa le nɔ́ ko ngɔmi, nɛ waa nu nɔ́ he via kɛ nɔ́ he fu. Ní nɛ ɔmɛ yeɔ bua wɔ nɛ wa bua jɔɔ ní slɔɔtoslɔɔtohi nɛ e bɔ ɔ he. Baiblo ɔ tsɔɔ nɔ́ kpa ko hu he je nɛ e sa nɛ waa hyɛ adebɔ níhi. Lɔ ɔ ji kaa adebɔ níhi haa nɛ wa naa Yehowa su ɔmɛ. (Rom. 1:20) Kaa nɔ hyɛmi nɔ́ ɔ, ke o hyɛ níhi nɛ Yehowa bɔ ɔ, o naa kaa e je blɔ nɛ e to a he blɔ nya saminya. Anɛ ní nɛ ɔmɛ ha we nɛ waa na kaa Mawu ngɛ nile lo? Jehanɛ hu ɔ, mo susu niye ní slɔɔtoslɔɔtohi nɛ e ha wɔ ɔ he nɛ o hyɛ. E haa nɛ wa naa kaa Yehowa suɔ adesahi niinɛ. Ke wa ba le suhi nɛ Yehowa ngɛ ɔ kɛ gu e nibɔ níhi a nɔ ɔ, lɔ ɔ ma ha nɛ waa le lɛ saminya, nɛ wa maa hɛ kɛ su e he wawɛɛ. w23.03 16 ¶4-5

Akɛnɛ je ɔ si fɔfɔɛ ngɛ puɛe kulaa he je ɔ, e he ma nyɛ maa wa ha wɔ kaa wa ma ná hɛ kɛ nɔ fɔmi ngɛ Mawu Munyu ɔ mi. Nihi maa bɔ mɔde kaa a ma ha nɛ wa ná juɛmi enyɔɔnyɔ kaa Baiblo ɔ mi munyu ɔmɛ pi anɔkuale loo Yehowa hlɛ tsɔlɔ anɔkualetsɛ kɛ ní lelɔ ɔ kaa e tsɔɔ e sɔmɔli blɔ mwɔnɛ ɔ. Se ke wa náa nɔ mi mami be fɛɛ be kaa Yehowa Munyu ɔ ji anɔkuale ɔ, wa ma nyɛ ma kua jamɛ a susumi ɔ. Wa maa ma wa ‘juɛmi nya si kaa wa maa ye Yehowa mlaa amɛ a nɔ daa; nɛ wa maa ye a nɔ kɛ yaa si wa gbenɔ ligbi.’ (La 119:112) E be ‘wɔ zo pee’ kaa wa maa tsɔɔ nihi anɔkuale ɔ, nɛ waa wo mɛ he wami nɛ a kɛ nɔ́ nɛ a ngɛ kasee ɔ nɛ tsu ní. (La 119:46) Jehanɛ se hu ɔ, waa “kɛ tsui si tomi kɛ bua jɔmi” ma fĩ si ngɛ si fɔfɔɛhi nɛ a mi wa wawɛɛ, nɛ yi mi wami hu piɛɛ he ɔ mi. (Kol. 1:11; La 119:​143, 157) Anɔkuale ɔ haa nɛ wa he waa nɛ e haa wɔ hɛ nɔ kami kpakpa kɛ blɔ tsɔɔmihi nɛ a mi tsɔ. E haa nɛ wa náa hɛ kɛ nɔ fɔmi kaa hwɔɔ se ɔ, wa si himi maa pee kpakpa ngɛ Mawu Matsɛ Yemi ɔ mi. w23.01 7 ¶16-17

Gbɔkuɛ nɛ e nɔ jena Yesu ma gbo ɔ, e sɔle be gagaa kɛ ha e kaseli ɔmɛ, nɛ e bi e Tsɛ ɔ kaa e “bu a he ngɛ nɔ yayami ɔ he.” (Yoh. 17:15) Enɛ ɔ tsɔɔ kaa Yesu suɔ mɛ wawɛɛ. Yesu le kaa e be kɛe nɛ e maa na nɔ́ mohu lɛɛ, se e hao wawɛɛ ngɛ e kaseli ɔmɛ a he. Wa kaseɔ Yesu, enɛ ɔ he ɔ, pi wa hiami níhi a he pɛ nɛ wa sɔleɔ ngɛ. Wa sɔleɔ be fɛɛ be ha wa nyɛmimɛ Kristofohi hulɔ. Jã nɛ wa peeɔ ɔ tsɔɔ kaa wa ngɛ Yesu fami nɛ tsɔɔ kaa waa suɔ wa nyɛmimɛ ɔ nɔ yee, nɛ lɔ ɔ haa nɛ Yehowa naa bɔ nɛ wa suɔ wa nyɛmimɛ Kristofo ɔmɛ ha. Ke wa ngɛ sɔlee ha wa nyɛmimɛ ɔmɛ ɔ, pi nɛ wa ngɛ wa be puɛe. Mawu Munyu ɔ de ke, “dalɔ pɛɛ kpami nɛ mi wa a tsuɔ ní wawɛɛ.” (Yak. 5:16) Wa nyɛmimɛ Kristofohi hia wa sɔlemi konɛ a nyɛ nɛ a da nyagbahi babauu nɛ a kɛ ngɛ kpee ɔ nya. w22.07 23-24 ¶13-15