Womihi Nɛ A Tsɛ Se Ngɛ Si Himi Kɛ Sɔmɔmi Ní Tsumi Kpe ɔ He Ní Kasemi Womi ɔ Mi

© 2024 Watch Tower Bible and Tract Society of Pennsylvania

NOVEMBER 4-10

JUETLI NƐ NGƐ MAWU MUNYU Ɔ MI | LA 105

“E Kaiɔ E Somi ɔ Daa”

w23.04 28 ¶11-12

Mɛni Wa Maa Pee Konɛ Wa Ná Hemi Kɛ Yemi Nɛ Mi Wa Ngɛ Je Ehe Nɛ Yehowa Wo Si ɔ Mi?

¹¹ Nyɛ ha nɛ wa susu ní komɛ nɛ Yehowa wo si kaa e maa pee ha e we bi blema a he nɛ waa hyɛ. Ni komɛ susu kaa si womi nɛ ɔmɛ be nyɛe maa ba mi. Yehowa de Abraham kɛ Sara ke a ma fɔ binyumu ngɛ a bwɔmi si. (1 Mose 17:15-17) E kpale de Abraham ke e maa ngɔ Kaanan zugba a kɛ ha e nina. Abraham nina nɛ ji Israel bi ɔmɛ hi nyɔguɛ tso mi jehahi babauu ngɛ Egipt. Jamɛ a be ɔ mi ɔ, e ngɛ kaa nɔ́ nɛ si nɛ Yehowa wo Abraham ɔ be nyɛe maa ba mi, se e ba mi. Jeha komɛ a se ɔ, Yehowa de Elizabet ke e ma fɔ. Lɔ ɔ se ɔ, Yehowa de Maria nɛ e li nyumu ɔ kaa e ma ha nɛ lɛ hu e fɔ Binyumu. Enɛ ɔ ma ha nɛ si nɛ Mawu wo jeha akpehi abɔ ngɛ Eden abɔɔ ɔ mi ɔ maa ba mi!​—1 Mose 3:15.

¹² Ke wa susu Yehowa si womi ɔmɛ tsuo kɛ bɔ nɛ a plɛ kɛ ba mi ha a he ɔ, wa maa na kaa Yehowa ngɛ he wami wawɛɛ. Lɔ ɔ ma ha nɛ wa ma ná hemi kɛ yemi nɛ mi wa kaa je ehe ɔ maa ba. (Kane Yoshua 23:14; Yesaya 55:10, 11.) Enɛ ɔ maa wo wɔ he wami konɛ waa ye bua nihi nɛ a na kaa si nɛ Yehowa wo kaa je ehe ko maa ba a pi nlami ko kɛkɛ. Yehowa nitsɛ wo si kaa hiɔwe ehe kɛ zugba ehe maa ba. E de ngɛ si womi nɛ ɔ he ke: “Munyu nɛ ɔmɛ ngɛ mi niinɛ nɛ a ji anɔkuale.”​—Kpoj. 21:1, 5.

it-2 1201 ¶2

Munyu ɔ

Adebɔ níhi tsuo nɛ wami ngɛ a mi kɛ ní nɛmɛ nɛ wami be a mi nɛ Mawu bɔ ɔ buɔ e munyu ɔ tue, enɛ ɔ he ɔ, Mawu kɛ mɛ ma nyɛ tsu e yi mi tomihi a he ní. (La 103:20; 148:8) Wa ma nyɛ maa ngɔ wa hɛ kɛ fɔ Mawu munyu ɔ nɔ; ejakaa níhi nɛ Mawu wo a he si ɔ, e kaiɔ nɛ e peeɔ hulɔ. (5Mo 9:5; La 105:42-45) Kaa bɔ nɛ lɛ nitsɛ e de ɔ, e munyu ɔ “ngɛ kɛ yaa neneene”; nɛ nɔ́ tsua nɔ́ nɛ e ke e pee ɔ, ja e pee loko e maa kpale kɛ ba.​—Yes 40:8; 55:10, 11; 1Pe 1:25.

Ngmami ɔ Mi Junehi

w18.10 28 ¶3-4

O Ma Nyɛ Ma Ná Bua Jɔmi Ngɛ Si Himi Nɛ Mi Wa Mi

³ Nyɛ ha nɛ wa susu Yosef he nɛ waa hyɛ. Yakob suɔ Yosef sane pe e binyumu ɔmɛ tsuo. Enɛ ɔ ha nɛ Yosef nyɛminyumu ɔmɛ sume e sane. Benɛ Yosef ye maa pee jeha 17 ɔ, a jua lɛ kaa nyɔguɛ. (1 Mose 37:2-4, 23-28) Yosef hi Egipt maa pee jeha 13 nɛ e nɛ́ e tsɛ nɛ e suɔ lɛ ɔ. E hi Egipt kaa nyɔguɛ, nɛ pee se ɔ, a wo lɛ tsu po. Se Yosef pee we e ní mɔbɔmɔbɔ, nɛ e mi mi fu we e nyɛmimɛ ɔmɛ hulɔ. Mɛni ye bua lɛ?

⁴ Benɛ a wo Yosef tsu nɛ e ngɛ nɔ́ nae ɔ, eko ɔ, e ngɔ e juɛmi kɛ ma níhi nɛ tsɔɔ kaa Yehowa ngɛ lɛ jɔɔe ɔ nɔ. (1 Mose 39:21; La 105:17-19) Benɛ Yosef wɛ ɔ, a je nina komɛ kɛ tsɔɔ lɛ. Eko ɔ, jamɛ a nina amɛ hu ha nɛ e ná hɛ kɛ nɔ fɔmi kaa Yehowa fĩ e se. (1 Mose 37:5-11) Eko ɔ, e je e tsui mi kɛ sɔle si abɔ, nɛ e de Yehowa bɔ nɛ e ngɛ nɔ́ nae ha a. (La 145:18) Yehowa ha Yosef sɔlemi ɔ heto, nɛ e ha nɛ Yosef na kaa e “piɛɛ e he” ngɛ ka amɛ tsuo a mi.​—Níts. 7:9, 10.

NOVEMBER 11-17

JUETLI NƐ NGƐ MAWU MUNYU Ɔ MI | LA 106

“A Hɛ Je Mawu Nɛ Ji A Yi Wami Helɔ ɔ Nɔ”

w18.07 20 ¶13

‘Mɛnɔ Lɛ Ngɛ Yehowa Se?’

¹³ Benɛ Israel bi ɔmɛ na bɔku kpii ɔ, oslabai gbami ɔ, kɛ nyakpɛ ní kpahi nɛ Mawu pee ɔ, a ye gbeye wawɛɛ. A kpa Mose pɛɛ kaa e da a nane mi konɛ e kɛ Yehowa nɛ ya tu munyu ngɛ Sinai Yoku ɔ nɔ ha mɛ. (2 Mose 20:18-21) Se Mose nɛ ji a hɛ mi nyɛɛlɔ ɔ se ya kɛ wawɛɛ ngɛ yoku ɔ nɔ. Enɛ ɔ ha nɛ Israel bi ɔmɛ susu kaa a tlɔ nga a nɔ. Eko ɔ, a ngɔ a hɛ kɛ fɔ Mose nɛ ji adesa a nɔ tsɔ. A de Aaron ke: ‘Kikɛmɛ a Mose nɛ ɔ nɛ je wɔ kɛ je Ijipt zugba a nɔ ɔ, wa li sane nɛ ya ba e nɔ. Lɔ ɔ he ɔ, moo pee mawu ha wɔ nɛ e nyɛɛ wa hɛ mi.’​—2 Mose 32:1, 2.

Ngmami ɔ Mi Junehi

w18.07 15 ¶14, 15

Jije O Hɛngmɛ Ngɛ Hyɛe?

¹⁴ Mɛni lɛ ha nɛ Mose tsɔ Yehowa hɛ mi atuã a? Mo kadi nɔ́ nɛ La 106:32, 33 ɔ de ɔ ekohu. E de ke: ‘Ma a wo Yehowa mi mi la ngɛ Meriba nyu ɔ he. A kɛ Mose wo haomi mi ngɛ nɔ́ nɛ a pee ɔ he. Mose mi mi fu ma a wawɛɛ nitsɛ, nɛ e tu munyu basabasa.’ Yehowa mi mi la nɛ Israel bi ɔmɛ wo, se Mose mohu nɛ e mi mi fu. Akɛnɛ e nyɛ we nɛ e ye e he nɔ he je ɔ, e tu munyu basabasa, nɛ e susuu we nɔ́ nɛ maa je e ní peepee ɔ mi kɛ ba a he.

¹⁵ Mose ha nɛ ni kpahi a ní peepee je e hɛ ngmɛ kɛ je Yehowa nɔ. Mose tsu kekleekle si fɔfɔɛ ɔ he ní ngɛ blɔ nɛ da nɔ. (2 Mose 7:6) Se eko ɔ, Israel bi atuã tsɔli nɛ e kɛ mɛ nyɛɛ jeha babauu ɔ a ní peepee ba gbe e nya. E ma nyɛ maa ba kaa Mose ngɛ bɔ nɛ Israel bi ɔmɛ a ní peepee ha nɛ e hao ha a he susue, nɛ lɔ ɔ he je ɔ, e susuu we Yehowa hɛ mi nyami nɛ e sa nɛ e wo ɔ he.

NOVEMBER 18-24

JUETLI NƐ NGƐ MAWU MUNYU Ɔ MI | LA 107-108

“Nyɛɛ Na Yehowa Si, Ejakaa E Hi”

w07 4/15 20 ¶2

Ha Nɛ Asafo ɔ Nɛ Je Yehowa Yi

² Asafo ɔ, tsa pi kuu ko kɛkɛ. Tsa pi he nya bua kuu ko nɛ nihi nɛ a je he kake loo a bua jɔ fiɛmi pɔtɛɛ ko he ɔ pɛ lɛ a ngɛ mi. Mohu ɔ, a to asafo ɔ he blɔ nya konɛ wa je Yehowa Mawu yi. Enɛ ɔ je sisi kɛ je blema kaa bɔ nɛ la polɔ ɔ tsɔɔ. La 35:18 ɔ de ke, “ma na mo si ngɛ asafo ngua a mi; ma je o yi ngɛ nimli babauu ɔ a kpɛti.” Jã nɔuu kɛ̃ nɛ La 107:31, 32 woɔ wɔ he wami. Lejɛ ɔ de ke: “Nihi nɛ́ a na Yehowa si ngɛ e suɔmi nɛ se pui ɔ he je, ngɛ nyakpɛ níhi nɛ e tsu kɛ ha nimli a bimɛ ɔ he je. Á wo e nɔ ngɛ nimli asafo ɔ mi.”

w15 1/15 4 ¶4

Nyɛɛ Na Yehowa Si Konɛ E Jɔɔ Nyɛ

⁴ E biɔ mɔde bɔmi loko wa ma nyɛ maa na Yehowa si daa. Se loko wa ma nyɛ maa ya nɔ maa na Yehowa si ɔ, kekleekle ɔ, e sa nɛ wɔ nitsɛmɛ wa kai níhi nɛ Yehowa peeɔ haa wɔ ɔ. Lɔ ɔ se ɔ, e sa nɛ wa susu jamɛ a ní ɔmɛ a he saminya. Enɛ ɔ ma ha nɛ wa maa na kaa jɔɔmi nɛ ɔmɛ kulaa nɛ wa ngɛ náe ɔ tsɔɔ kaa Mawu suɔ wɔ saminya. Benɛ la polɔ ɔ pee jã a, e nya kpɛ e he ngɛ ní nguanguahi nɛ Yehowa pee ha lɛ ɔ a he.​—Kane La 40:5; 107:43.

Ngmami ɔ Mi Junehi

it-2 420 ¶4

Moab

Pee se benɛ David nitsɛ ngɛ nɔ yee kaa matsɛ ɔ, jamɛ a be ɔ mi hu ɔ, Israel kɛ Moab ngɛ ta hwue. A ye Moabbi ɔmɛ a nɔ butuu nɛ a ha nɛ a wo tó kɛ ha David. Ke a gba Moab ta buli ɔmɛ a mi etɛ ɔ, a gbe e mi enyɔ benɛ ta a ke ba nyagbe ɔ. E ma nyɛ maa ba lɛ kaa David ha nɛ ta buli ɔmɛ tsuo hwɔ si ngɛ zugba, nɛ e susu mɛ konɛ e kɛ na ku enyɔ nɛ e maa gbe, kɛ ku kake nɛ e ma he a yi wami ɔ. (2Sa 8:2, 11, 12; 1Kr 18:2, 11) E ma nyɛ maa ba lɛ kaa ngɛ jamɛ ta a mi nɔuu nɛ Benaya nɛ ji Yehoyada binyumu ɔ “gbe Moabno Ariel binyumu enyɔ ɔmɛ” ɔ nɛ. (2Sa 23:20; 1Kr 11:22) Moabbi ɔmɛ a nɔ kunimi nɛ David ye ɔ ji gbami nɛ Balaam gba maa pee jeha 400 nɛ be ɔ mi bami. E de ke: “Dodoe ko maa je Yakob mi kɛ ba, nɛ matsɛ tso ko maa te si kɛ je Israel mi. Nɛ e maa ywia Moab hɛ nya kokooko, nɛ e maa ywia basabasa peeli tsuo a yi koklodo.” (4Mo 24:17) Benɛ la polɔ ɔ ngɛ kunimi nɛ a ye nɛ ɔ he munyu tue ɔ, e de kɛ kɔ Mawu he kaa Moab ji e ‘tsesi nɛ e fɔɔ e nane he ngɛ mi.’​—La 60:8; 108:9.

NOVEMBER 25–DECEMBER 1

JUETLI NƐ NGƐ MAWU MUNYU | LA 109-112

Fĩ Yesu Nɛ Ji Matsɛ ɔ Se!

w12 10/1 27 ¶14

Bu Mawu Tue Nɛ O Ná E Si Womi Ɔmɛ A He Se

¹⁴ Enyɔne ɔ, Yehowa ha nɛ David gba kɛ fɔ si kaa Matsɛ nɛ ngɛ slɔɔto nɛ ɔ ma sɔmɔ kaa adesahi a we Osɔfo Nɔkɔtɔma hulɔ. Ngɛ Israel ɔ, e slo nihi nɛ a yeɔ matsɛ ngɛ nihi nɛ a yeɔ osɔfo ɔ a he kulaa. Nihi nɛ a je Levi weku ɔ mi ji nihi nɛ a yeɔ osɔfo, nɛ nihi nɛ a je Yuda weku ɔ mi ji nihi nɛ a yeɔ matsɛ. Se David gba kɛ kɔ nɔmlɔ ngua nɛ ma ba ye e se hwɔɔ se ɔ he ke: ‘Yehowa de ye Nyɔmtsɛ ɔ ke, “Hii si ngɛ ye hiɔ nɔ kɛ yaa si be nɛ ma ngɔ o he nyɛli ɔmɛ kɛ pee nɔ́ nɛ o kɛ o nane maa nɔ.” Yehowa kã kita nɛ ɔ, nɛ e be e nya se kpalee, “Osɔfo ji mo kɛ yaa neneene kaa Melkizedek pɛ.”’ (La 110:1, 4) Gbami nɛ ɔ ba mi, ejakaa amlɔ nɛ ɔ, Yesu Kristo nɛ ji si womi Nina a ngɛ tsɛ yee ngɛ hiɔwe. Jehanɛ se hu ɔ, e ngɛ sɔmɔe kaa adesahi a we Osɔfo Nɔkɔtɔma, nɛ e ngɛ nihi nɛ a tsake a tsui ɔ ye buae konɛ a ha nɛ huɛ bɔmi kpakpa nɛ hi a kɛ Mawu a kpɛti.​—Kane Hebri Bi 7:21, 25, 26.

w00 4/1 18 ¶3

Nihi Nɛ A Kɛ Mawu Ngɛ Ta Hwue ɔ Be Kunimi Yee!

³ Kɛ je jeha 1900 ɔ mi tɔɔ nɛ a bɔni Yehowa we bi tuami. Ngɛ mahi komɛ a nɔ ɔ, nihi nɛ a hɛɛ juɛmi yaya a fia a pɛɛ si kaa a ma ha nɛ a kpa Mawu Matsɛ Yemi he sane kpakpa a fiɛɛmi. Wa he nyɛlɔ nɛ ji Abosiami nɛ e “nyɛɛɔ kɛ yaa kɛ baa kaa jata nɛ ngɛ huãe nɛ e ngɛ hlae nɛ e maa mi nɔ ko” ɔ lɛ ngɛ mɛ he wami woe kaa a pee jã a nɛ. (1 Petro 5:8) Benɛ “behi nɛ a to kɛ ha je ma amɛ” ɔ ba nyagbe se ngɛ 1914 ɔ mi ɔ, Mawu hla e Bi nyumu ɔ kaa zugba a nɔ matsɛ ehe, nɛ e fã lɛ ke: “Yaa o he nyɛli a kpɛti nɛ o ya ye a nɔ.” (Luka 21:24; La 110:2) Kristo fiee Satan kɛ je hiɔwe kɛ ba zugba a nɔ kɛ tsɔɔ kaa e ngɛ he wami. Akɛnɛ Abosiami le kaa be nɛ piɛ ha lɛ ɔ pi he je ɔ, e mi mi fu Kristofohi nɛ a pɔ mɛ nu ɔ kɛ a nyɛmimɛ ɔmɛ. (Kpo Jemi 12:9, 17) Mɛni je tuami nɛ Mawu he nyɛli ngɛ nɔ yae nɛ a ngɛ e we bi tuae ɔ mi kɛ ba?

lff ní kasemi 55 oti 1

Mo Fĩ O We Asafo ɔ Se

¹ Wɔ tsuo wa ma nyɛ maa ye bua ngɛ asafo ɔ mi. Kaa nɔ hyɛmi nɔ́ ɔ, anɛ nyɛmimɛ komɛ ngɛ o we asafo ɔ mi nɛ a wa ngɛ jeha mi aloo a be nɔmlɔ tso mi he wami lo? Anɛ o ma nyɛ maa ye bua mɛ konɛ a nyɛ nɛ a ya asafo mi kpehi lo? Aloo o ma nyɛ maa pee ní komɛ kɛ ye bua mɛ, kaa niye ní kɛ ní kpahi nɛ a maa hia nɛ o ma he ba ha mɛ, aloo a we mi nɛ o maa ye bua mɛ kɛ dla lo? (Kane Yakobo 1:27) Jehanɛ hu ɔ, wa ma nyɛ maa ngɔ wa he kɛ ha kɛ ye bua ngɛ Matsɛ Yemi Asa a nɔ dlami kɛ e nɔ hyɛmi mi. Nɔ ko nyɛ we wa nɔ kaa waa pee ní nɛ ɔmɛ. Suɔmi nɛ wa ngɛ kɛ ha Mawu kɛ wa nyɛmimɛ Kristofohi ji nɔ́ nɛ woɔ wɔ he wami nɛ wa ‘ngɔɔ wa he kɛ haa ngɛ wɔ nitsɛmɛ wa suɔmi nya.’​—La 110:3.

Odasefohi nɛ a baptisi mɛ ɔ ma nyɛ maa ye bua asafo ɔ ngɛ blɔ kpahi hu a nɔ. Nyɛmimɛ nyumuhi nɛ a su hlami níhi nɛ ngmami ɔ tsɔɔ ɔ he ɔ ma nyɛ ma sɔmɔ kaa asafo mi sɔmɔli loo asafo mi nikɔtɔmahi. Nyɛmimɛ nyumuhi kɛ yihi tsuo ma nyɛ maa ye bua ngɛ fiɛɛmi ní tsumi ɔ mi kɛ gu blɔ gbami ní tsumi ɔ nɛ a kɛ a he maa wo mi ɔ nɔ. Nyɛmimɛ komɛ hu ma nyɛ maa ye bua kɛ ma asafo ɔ tsuhi aloo a maa hia kɛ ya he nɛ asafo ko hia yemi kɛ buami ngɛ.

Ngmami ɔ Mi Junehi

w14 10/15 11 ¶15-17

Nyɛ Ma Sɔmɔ Kaa “Osɔfohi Kɛ Matsɛmɛ”

¹⁵ Benɛ Yesu to Nyɔmtsɛ ɔ Gbɔkuɛ Niye Ní ɔ sisi ta a, e kɛ e kaseli anɔkualetsɛmɛ ɔmɛ so somi ko. A tsɛɛ somi nɛ ɔ ke Matsɛ Yemi ɔ he somi ɔ. (Kane Luka 22:28-30) Somi nɛ ɔ lɛɛ tsa pi Yehowa nɛ e kɛ nihi so kaa bɔ nɛ e ji ngɛ somi kpa amɛ a blɔ fa mi ɔ. Mohu ɔ, e ji somi nɛ Yesu kɛ nihi nɛ a pɔ mɛ nu ɔ so. Yesu de ke: “He wami nɛ Tsaatsɛ ha mi nɛ ma kɛ ye ma a nɔ ɔ, imi hu i ngɛ nyɛ jamɛ a he wami ɔ hae.” Eko ɔ, somi nɛ Yehowa kɛ Yesu so kaa Yesu ‘maa pee osɔfo kaa Melkizedek’ ɔ he munyu nɛ Yesu tu ɔ nɛ.​—Hebri Bi 5:5, 6.

¹⁶ Yesu bɔfohi anɔkualetsɛmɛ 11 ɔ ye lɛ anɔkuale ngɛ e haomi be ɔmɛ tsuo a mi. Matsɛ Yemi ɔ he somi ɔ ma nɔ mi kaa bɔfo ɔmɛ maa hi si ngɛ matsɛ sɛhi a nɔ, nɛ a kɛ Yesu ma sɔmɔ kaa matsɛmɛ kɛ osɔfohi ngɛ hiɔwe. Se pi nimli 11 ɔ pɛ nɛ a ma ná he blɔ nɛ ɔ. Yesu je e he kpo kɛ tsɔɔ bɔfo Yohane ngɛ nina ko mi nɛ e de lɛ ke: “Ni nɛmɛ nɛ maa ye kunimi ɔ, ma ha mɛ blɔ nɛ a maa hi ye kasa nya, ngɛ ye matsɛ sɛ ɔ nɔ kaa bɔ nɛ imi hu i ye kunimi, nɛ amlɔ nɛ ɔ, i hii si ngɛ Tsaatsɛ kasa nya ngɛ e matsɛ sɛ ɔ nɔ ɔ.” (Kpo jemi 3:21) Enɛ ɔ he ɔ, Yesu kɛ Kristofohi nɛ a pɔ mɛ nu nɛ a yibɔ ji 144,000 ɔ lɛ so Matsɛ Yemi ɔ he somi ɔ nɛ. (Kpo jemi 5:9, 10; 7:4) Somi nɛ ɔ lɛ ha nihi nɛ a pɔ mɛ nu ɔ he blɔ kaa a ya piɛɛ Yesu he kɛ ye matsɛ ngɛ hiɔwe ɔ nɛ. A kɛ mɛ ma nyɛ maa to ayɛflo ko nɛ e yaa gba matsɛ ko he. Ke matsɛ ɔ ná ngɔ yo ɔ pɛ ɔ, yo ɔ kɛ matsɛ ɔ tsuo ma nyɛ maa ye nɔ. Ngɛ anɔkuale mi ɔ, Baiblo ɔ tu nihi nɛ a pɔ mɛ nu ɔ a he munyu kaa a ji Kristo “ayɛflo.” A tu e he munyu kaa e ji “yomiyo” nɛ e puɛ we e he, nɛ Kristo wo lɛ si kaa e maa ngɔ lɛ.​—Kpo jemi 19:7, 8; 21:9; 2 Korinto Bi 11:2.

¹⁷ Somihi tsuo nɛ wa susu a he ngɛ ní kasemi enyɔ nɛ ɔmɛ a mi ɔ kɔɔ Matsɛ Yemi ɔ he. Somi nɛ ɔmɛ ma nɔ mi heii kaa Matsɛ Yemi ɔ maa ye manye. Wa ma nyɛ ma ná nɔ mi mami wawɛɛ kaa Mawu maa gu Mesia Matsɛ Yemi ɔ nɔ kɛ ha nɛ e yi mi nɛ e to ngɛ adesahi kɛ zugba a he ɔ nɛ ba mi.​—Kpo jemi 11:15.

DECEMBER 2-8

JUETLI NƐ NGƐ MAWU MUNYU Ɔ MI | LA 113-118

Mɛni Waa Kɛ Maa Na Yehowa Si?

w01 1/1 11 ¶13

Nyɛ Ha Nɛ Suɔmi Nɛ Fia Nyɛ Kɛ Ma Si

¹³ Munyuhi nɛ Yesu tu ɔ tsɔɔ heii kaa e sa nɛ waa suɔ Yehowa. Se kɛ̃ ɔ, a kɛ suɔmi nɛ mi wa nɛ wa ma ná ha Yehowa a fɔ we wa ti nɔ ko nɔ ko. E ji su ko nɛ e sa kaa wa ná. Níhi nɛ wa nu kɛ kɔ Yehowa he kekle ɔ ha nɛ wa hɛ kɛ su e he. Nɛ bɔɔbɔɔbɔɔ ɔ, wa ba kase bɔ nɛ e plɛ kɛ bɔ zugba a kɛ ha adesahi ɔ he ní. (1 Mose 2:5-23) Wa ba kase bɔ nɛ e kɛ adesahi hi si ha, e kpataa we a hɛ mi benɛ a pee yayami pɛ ɔ, mohu ɔ, e to blɔ nya konɛ e kɛ kpɔ wɔ. (1 Mose 3:1-5, 15) E je mi mi jɔmi kpo kɛ tsɔɔ nihi nɛ yeɔ lɛ anɔkuale ɔ, nɛ nyagbenyagbe ɔ, e ngɔ e Bi kake ɔ ngɔ ha konɛ kɛ gu e nɔ ɔ, e ngɔ wa he yayami ɔmɛ kɛ ke wɔ. (Yohane 3:16, 36) Nile nɛ ɔmɛ nɛ wa ba ná a ha nɛ hɛsa nɛ wa ngɛ kɛ ha Yehowa a mi ba wa. (Yesaya 25:1) Matsɛ David tsɔɔ kaa e suɔ Yehowa ejakaa Yehowa susuɔ e he. (La 116:1-9) Mwɔnɛ ɔ, Yehowa susuɔ wa he, e poɔ wa he piɛ, nɛ e woɔ wɔ he wami. Ke wa yaa nɔ nɛ wa kaseɔ Yehowa he ní ɔ, suɔmi nɛ wa ngɛ kɛ ha lɛ ɔ mi maa wa.​—La 31:23; Zefania 3:17; Roma Bi 8:28.

w09 7/15 29 ¶4-5

Mo Je Hɛsa Kpo Nɛ O Je O Tsui Mi Kɛ Ha Nɔ́ Faa

La polɔ ɔ bi ke: “Mɛni ma kɛ to Yehowa nane mi ngɛ ní kpakpahi tsuo nɛ e pee ha mi ɔ he je?” (La 116:12) Mɛni jɔɔmihi nɛ e ná? Yehowa wo lɛ he wami ngɛ “haomi kɛ aywilɛho” behi a mi. Jehanɛ se hu ɔ, Yehowa “kpɔ [lɛ] kɛ je gbenɔ mi.” Nɛ amlɔ nɛ ɔ, e ngɛ hlae nɛ e “to” Yehowa nane mi ngɛ blɔ ko nɔ. Mɛni eko ɔ, la polɔ ɔ maa pee? E de ke: “Ma ye kitahi nɛ i kã Yehowa a nɔ.” (La 116:3, 4, 8, 10-14) E fia e pɛɛ si kaa e maa ye si tsuo nɛ e je e tsui mi nɛ e wo Yehowa a nɔ, nɛ e maa pee níhi tsuo nɛ e sa kaa e pee ha lɛ ɔ.

Mo hu o ma nyɛ maa pee jã. Ngɛ mɛni blɔ nɔ? Kɛ gu o je mi nɛ o maa ba saminya ngɛ Mawu mlaa amɛ kɛ e sisi tomi mlaa amɛ a nya be fɛɛ be ɔ nɔ. Lɔ ɔ he ɔ, bɔɔ mɔde nɛ o ha nɛ jami nɛ o kɛ haa Yehowa a nɛ pee nɔ́ titli ngɛ o si himi mi nɛ o ha nɛ Mawu mumi klɔuklɔu ɔ nɛ tsɔɔ mo blɔ ngɛ nɔ́ fɛɛ nɔ́ nɛ o peeɔ ɔ mi. (Fiɛɛ. 12:13; Gal. 5:16-18) Ngɛ anɔkuale mi ɔ, o be nyɛe maa to Yehowa nane mi ngɛ níhi tsuo nɛ e pee ha mo ɔ he kɔkɔɔkɔ. Se kɛ̃ ɔ, ke Yehowa na kaa o je o tsui mi nɛ o ngɔ o he kɛ ha ngɛ e sɔmɔmi mi ɔ, ‘e tsui nyaa’. (Abɛ 27:11) Hyɛ he blɔ ngua nɛ wa ná kaa kɛ gu blɔ nɛ ɔ nɔ ɔ, wa ma ha nɛ Yehowa bua nɛ jɔ!

w19.11 22-23 ¶9-11

Níhi Nɛ Wa Ma Nyɛ Maa Kase Ngɛ Mose Womi Nɛ Ji Etɛ ɔ Mi

⁹ Nɔ́ enyɔne nɛ wa ma nyɛ maa kase: Wa sɔmɔɔ Yehowa ejakaa wa hɛ sa níhi nɛ e pee ha wɔ ɔ. Bɔ nɛ pee nɛ waa nu oti nɛ ɔ sisi saminya a, nyɛ ha nɛ wa susu tue mi jɔmi bɔ nɛ blema Israel bi ɔmɛ sãa a he nɛ waa hyɛ. E ji a jami ɔ fã ko nɛ he hia wawɛɛ. Ngɛ Mose womi nɛ ji etɛ ɔ mi ɔ, wa kase kaa nɔ ko ma nyɛ maa sã tue mi jɔmi bɔ kɛ ‘na Yehowa si.’ (3 Mose 7:11-13, 16-18) A wui mlaa kaa a sã afɔle nɛ ɔ, mohu ɔ, nɔ ɔ nitsɛ lɛ jeɔ e suɔmi mi kɛ peeɔ jã. Enɛ ɔ ji afɔle nɛ nɔ ko jeɔ e tsui mi faa kɛ sãa akɛnɛ e suɔ Yehowa, e Mawu ɔ he je. Nɔ nɛ ba sã afɔle ɔ, e weku ɔ, kɛ osɔfo ɔmɛ yeɔ lohwe ɔ nɛ a kɛ ba sã afɔle ɔ. Se a ngɔɔ lohwe ɔ he ní pɔtɛɛ komɛ kɛ sãa afɔle ha Yehowa pɛ. Lohwe ɔ jije kɛ jije?

¹⁰ Nɔ́ etɛne nɛ wa ma nyɛ maa kase: Wa suɔ Yehowa, enɛ ɔ he ɔ, wa sɔmɔɔ lɛ kɛ wa tsui tsuo. Yehowa naa lohwe zɔ kaa nɔ́ nɛ hi pe kulaa ngɛ lohwe ɔ he. Jehanɛ hu ɔ, e tsɔɔ kaa lohwe ɔ he ní komɛ kaa se tso mi ngmɛ ɔmɛ a he hia wawɛɛ. (Kane 3 Mose 3:6, 12, 14-16.) Enɛ ɔ he ɔ, ke Israel no ko je e tsui mi faa nɛ e ngɔ lohwe ɔ he níhi nɛ a he hia wawɛɛ kɛ lohwe ɔ zɔ ɔ kɛ sã afɔle ha Yehowa a, e bua jɔɔ wawɛɛ. Ke Israel no ko sã afɔle nɛ ɔ, e ngɛ tsɔɔe kaa e suɔ nɛ e ngɔ e níhi nɛ a hi pe kulaa a kɛ ha Mawu. Jã kɛ̃ nɛ Yesu hu je e tsui mi nɛ e ngɔ e níhi nɛ hi pe kulaa a kɛ ha Yehowa kɛ gu e tsui tsuo nɛ e kɛ sɔmɔ lɛ ɔ nɔ. (Yoh. 14:31) Ngɛ Yesu blɔ fa mi ɔ, e bua jɔ Yehowa suɔmi nya ní peemi he wawɛɛ, nɛ e suɔ Yehowa mlaa kɛ e tsui tsuo. (La 40:8) Hyɛ bɔ nɛ Yehowa bua maa jɔ ha benɛ e na kaa Yesu je e tsui mi tsuo kɛ ngɛ lɛ sɔmɔe ɔ!

¹¹ Wa tsui mi nɛ wa jeɔ faa kɛ sɔmɔɔ Yehowa a ngɛ kaa tue mi jɔmi bɔ, ejakaa e ji blɔ nɛ wa guɔ nɔ kɛ tsɔɔ kaa wa suɔ lɛ. Waa kɛ wa nyɛmi tsuo sɔmɔɔ Yehowa, ejakaa wa suɔ lɛ kɛ wa tsui tsuo. Ke Yehowa na bɔ nɛ nimli ayɔhi abɔ ngɛ lɛ sɔmɔe akɛnɛ a suɔ lɛ kɛ e blɔ tsɔɔmi ɔmɛ ɔ, hyɛ bɔ nɛ e bua jɔɔ ha! Ke wa kai kaa Yehowa naa níhi nɛ wa peeɔ kɛ yi mi tomi he je nɛ wa peeɔ jã a, lɔ ɔ ma nyɛ maa wo wa bua. Kaa nɔ hyɛmi nɔ́ ɔ, ke o wa ngɛ jeha mi nɛ o nyɛ we nɛ o pee babauu kaa bɔ nɛ o suɔ nɛ o pee ɔ, mo ná nɔ mi mami kaa Yehowa nu mo sisi. Eko ɔ, o maa nu he kaa o be nyɛe nɛ o pee fuu, se Yehowa naa kaa o suɔ lɛ, nɛ lɔ ɔ he ɔ, o peeɔ nɔ́ nɛ o ma nyɛ. E bua jɔ nɔ́ nɛ o nyɛɔ peeɔ ɔ he.

Ngmami ɔ Mi Junehi

w17.12 10 ¶9

“I Ngɛ Hɛ Kɛ Nɔ Fɔmi Ngɛ Mawu Mi”

⁹ Niinɛ, La 118:22 ɔ gba kɛ fɔ si jehahi babauu kaa nɔ ko ma gbo nɛ a ma tle lɛ si. A ma kua Mesia a, nɛ a maa gbe lɛ, se a ma tle lɛ si kɛ ba wami mi ekohu nɛ e ma ba pee kɔ̃ nya tɛ titli. Enɛ ɔ he ɔ, Mawu Bi nɛ ɔ nɛ a tle lɛ si ɔ pɛ ji nɔ nɛ ‘a ngɔ kɛ ha ngɛ nimli a kpɛti nɛ e sa kaa a gu e nɔ kɛ he wa yi wami.’​—Níts. 4:12; Efe. 1:20.

DECEMBER 9-15

JUETLI NƐ NGƐ MAWU MUNYU Ɔ MI | LA 119:1-56

“Kɛ Niheyo Ma Plɛ Kɛ Ha Nɛ E Je Mi Bami He Nɛ Tsɔ Kɛɛ?”

w87 11/1 18 ¶10

Anɛ O Yaa Nɔ Nɛ O Haa Nɛ O He Tsɔɔ Ngɛ Nɔ́ Fɛɛ Nɔ́ Ko Mi Lo?

¹⁰ Paulo bɔ kɔkɔ ngɛ Efeso Bi 5:5 ke: “Ejakaa nyɛ le enɛ ɔ, nɛ nyɛ nitsɛmɛ nyɛ ná le kaa ajuama bɔlɔ ko aloo nɔ ko nɛ e he tsɔ we aloo nɔ ko nɛ e hɛ tsuɔ, nɛ tsɔɔ kaa e ji wɔ jalɔ ɔ be gbosi ní ko ngɛ Kristo kɛ Mawu a Matsɛ Yemi ɔ mi.” Se ngɛ enɛ ɔ tsuo se ɔ, daa jeha a, a kãa nihi akpehi abɔ a hɛ mi loo a fieeɔ mɛ kɛ jeɔ asafo ɔ mi akɛnɛ a kɛ a he ya wo ajuama bɔmi nɛ ji ‘yayami nɛ a peeɔ kɛ siɔ nɔmlɔ tso ɔ’ mi ɔ he je. (1 Korinto Bi 6:18) Behi fuu ɔ, nɔ́ nɛ haa nɛ e baa jã ji kaa, a ‘hyɛ we a he nɔ saminya ngɛ [Mawu] munyu ɔ he.’ (La 119:9) Kaa nɔ hyɛmi nɔ́ ɔ, nyɛmimɛ fuu ngɔɔ a he kɛ woɔ je mi bami yaya mi titli ke a yaa ye blɔ hami. A kɛ a he buɛ nihi nɛ a ngɛ asafo ɔ mi ɔ, mohu ɔ, a kɛ nihi nɛ a be asafo ɔ mi nɛ mɛ hu a ngɛ blɔ hami mi lɛ bɔɔ huɛ. Kristofohi komɛ piɛɛ ni nɛ ɔmɛ a he kɛ pee ní komɛ nɛ sɛ kɛ susumi ɔ kaa ni nɛ ɔmɛ ji ‘nimli kpakpahi’. Jã a kɛ̃ nɛ ni komɛ hu kɛ nihi nɛ a kɛ mɛ tsuɔ ní ɔ bɔ gbagbanii. Asafo mi nɔkɔtɔma ko kɛ yo ko nɛ e kɛ lɛ tsuɔ ní ɔ bɔ gbagbanii hluu po kaa e kua e weku ɔ nɛ e kɛ lɛ ya hi si! Enɛ ɔ ha nɛ a fie lɛ ngɛ asafo ɔ mi. Nɔ́ nɛ Baiblo ɔ de ɔ ji anɔkuale, “Huɛ yayami bɔmi puɛɔ je mi bami kpakpa”!​—1 Korinto Bi 15:33.

w06 6/15 25 ¶1

“Ye Bua Jɔɔ O Kaimi Ɔmɛ A He”

YEHOWA kɛ kaimihi haa e we bi bɔ nɛ pee nɛ a nyɛ nɛ a da nyagbahi nɛ a kɛ ngɛ kpee ngɛ behi nɛ a mi wa nɛ ɔmɛ a mi ɔ nya. Kaimi nɛ ɔmɛ baa bemi nɛ wa ngɛ Baiblo ɔ kanee ngɛ wa dɛ he, nɛ be komɛ hu ɔ, kaimihi nɛ ɔmɛ baa kɛ gu amaniɛ bɔmi aloo hetohi nɛ nihi haa ngɛ asafo mi kpehi a sisi ɔ nɔ. Níhi nɛ wa nuɔ loo níhi nɛ wa kaneɔ ngɛ behi kaa kikɛ nɛ ɔmɛ a mi ɔ, pi ní hehi kulaa kɛ ha wɔ. Eko ɔ, wa kase ní nɛ ɔmɛ ekomɛ kɛ be. Akɛnɛ wa hɛ jeɔ nɔ́ nɔ he je ɔ, e he hia nɛ a ya nɔ nɛ a ti Yehowa yi mi tomihi, e mlaa amɛ kɛ e blɔ tsɔɔmi ɔmɛ a mi kɛ ha wɔ be fɛɛ be. E sa nɛ wa je hɛsa kpo ngɛ Mawu kaimi ɔmɛ a he. E haa nɛ waa kɛ wa juɛmi maa níhi nɛ yeɔ buaa wɔ nɛ wa peeɔ Mawu suɔmi nya ní ɔ nɔ. Enɛ ɔ he je nɛ la polɔ ɔ la kɛ ha Yehowa ke: “Ye bua jɔɔ o kaimi ɔmɛ a he” ɔ nɛ.​—La 119:24.

lff ní kasemi 40 oti 2

Mɛni Wa Maa Pee Konɛ Wa He Nɛ Tsɔ Ngɛ Mawu Hɛ Mi?

² Baiblo ɔ woɔ wɔ he wami kaa, “wa fɔ he lo mi kɛ mumi mi mu fɛɛ mu ngɛ wa he.” (2 Korinto Bi 7:1) Enɛ ɔ tsɔɔ kaa, e sa nɛ wa kua nɔ́ fɛɛ nɔ́ nɛ ma puɛ wa nɔmlɔ tso ɔ aloo wa juɛmi ɔ. E sa nɛ níhi nɛ wa susuɔ a he ɔ nɛ sa Yehowa hɛ mi, enɛ ɔ he ɔ, wa bɔɔ mɔde kaa wa ma kua susumi yayahi. (La 104:34) Jehanɛ se hu ɔ, wa bɔɔ mɔde kaa wa ma ha nɛ munyu fɛɛ munyu nɛ maa je wa nya a he nɛ tsɔ.​—Kane Kolose Bi 3:8.

Mɛni ji nɔ́ kpa ko nɛ be hae nɛ wa he nɛ tsɔ ngɛ nɔmlɔ tso mi aloo je mi bami mi? Ní komɛ ngɛ nɛ a ma nyɛ ma puɛ wa nɔmlɔ tso ɔ. Enɛ ɔ he ɔ, wa nui taba loo sigaleti, wa nui tsopa yayahi, nɛ waa kɛ tsopa kpahi hu tsu we ní ngɛ blɔ yaya nɔ. Ke wa yu wa he ngɛ ní nɛ ɔmɛ a he ɔ, lɔ ɔ haa nɛ wa náa nɔmlɔ tso mi he wami kpakpa, nɛ jehanɛ se hu ɔ, lɔ ɔ tsɔɔ kaa wa ngɛ bumi kɛ ha wami nɛ Mawu kɛ ke wɔ ɔ. Ke wa bɔ mɔde nɛ wa fiɛ we wa fɔmi níhi a he, nɛ wa yu wa he ngɛ ajuama bɔmi fonihi loo videohi a hyɛmi he ɔ, wa he ma tsɔ ngɛ je mi bami mi. (La 119:37; Efeso Bi 5:5) E he ma nyɛ maa wa ha wɔ kaa wa maa yu wa he kɛ je ní peepee nɛ ɔmɛ a he, se Yehowa ma nyɛ maa ye bua wɔ konɛ waa pee jã.​—Kane Yesaya 41:13.

Ngmami ɔ Mi Junehi

mwb16.09 bf. 3 daka ngɛ bafa 3

‘Moo Ba O Je Mi Ngɛ Yehowa Mlaa a Nya’

Eko ɔ, bɔ nɛ a ngma La lafa nyɔngma kɛ nɛɛne ɔ ha a yeɔ bua nihi nɛ a nyɛɔ nɛ a kaiɔ e mi munyu ɔmɛ. A gba la a mi kɛ wo fãhi kakaaka 22 mi, nɛ kuku kakaaka 8 lɛ ngɛ fã tsuaa fã sisi. A ngma Hebri ningma okadi ɔmɛ nyatsɔɔ ngɛ fã tsuaa fã yi mi. Hebri ningma okadi nɛ ngɛ fã ko yi mi ɔ nɔuu lɛ jeɔ kukuhi nɛ ngɛ jamɛ a fã a mi ɔ a sisi. La nɛ ɔ hɛɛ kuku kakaaka 176, nɛ e mi munyu ɔmɛ hiɛ pe munyuhi nɛ ngɛ la kpahi nɛ ngɛ Baiblo ɔ mi ɔ.

DECEMBER 16-22

JUETLI NƐ NGƐ MAWU MUNYU Ɔ MI | LA 119:57-120

Bɔ Nɛ O Ma Plɛ Kɛ Da Si Fɔfɔɛhi Nɛ A Mi Wa Nya Ha

w18.06 20 ¶18

Ha Nɛ Mawu Mlaa Amɛ Kɛ E Sisi Tomi Mlaa Amɛ Nɛ A Tsɔse O He Nile

¹⁸ Ke wa ye Yehowa mlaa amɛ kɛ e sisi tomi mlaa amɛ a nɔ ɔ, wa ma ná jɔɔmihi fuu. La 119:97-100 de ke: “I suɔ o mlaa a kaa nɔ́ ko! Ke je na kikɛ nɛ ɔ, e he pɛ i susuɔ. I le ní pe ye he nyɛli tsuo, ejakaa o mlaa a kɛ mi ngɛ daa. I nuɔ nɔ́ sisi pe ye tsɔɔli ɔmɛ tsuo, ejakaa o mlaa amɛ a he i susuɔ. I kɔɔ munyu se pe nikɔtɔmahi po; ejakaa i yeɔ o mlaa amɛ a nɔ.” Ke wa he be kɛ ‘susu’ Mawu mlaa amɛ kɛ e sisi tomi mlaa amɛ a he ɔ, wa maa pee juɛmitsɛmɛ, wa ma kɔ nɔ́ se, nɛ wa maa nu nɔ́ sisi saminya. Ke wa mia wa hɛ mi, nɛ wa ha nɛ Mawu mlaa amɛ kɛ e sisi tomi mlaa amɛ tsɔse wa he nile ɔ, wa ma nyɛ maa su “Kristo ɔ kami kɛ e blimi ɔ tsuo he.”​—Efe. 4:13.

w00 12/1 14 ¶3

Anɛ O Bua Jɔɔ Yehowa Kaimi Ɔmɛ A He Wawɛɛ Lo?

³ La polɔ nɛ ngma ke: “I yeɔ oya, nɛ i tui tsle kaa ma ye o mlaa amɛ a nɔ. Yiwutsotsɛmɛ a kpã amɛ bɔle mi kɛ kpe, se ye hɛ ji o mlaa a nɔ” ɔ bua jɔɔ Mawu kaimi ɔmɛ a he. (La 119:60, 61) Yehowa kaimi ɔmɛ yeɔ buaa wɔ nɛ wa daa yi mi wami nya nɛ wa náa nɔ mi mami kaa wa hiɔwe Tsɛ ɔ maa po kpahi nɛ he nyɛli ɔmɛ kɛ fi wɔ ɔ tsuo. Ngɛ be nɛ sa mi ɔ, e haa nɛ wa yeɔ wa he ngɛ nyagba nɛ ɔmɛ a he konɛ wa nyɛ nɛ wa tsu Matsɛ Yemi fiɛɛmi ní tsumi ɔ.​—Maako 13:10.

w06 9/1 14 ¶4

Otihi Nɛ Ngɛ La Womi Nɛ Ji Enuɔ ɔ Mi

119:71​—E ngɛ mi kaa pi Mawu nɛ ngɔɔ nɔ́ nami kɛ baa wa nɔ mohu lɛɛ, se ke wa ngɛ nɔ́ nae ɔ, mɛni wa ma nyɛ maa kase kɛ je mi? Nɔ́ nami haa nɛ wa ngɔɔ wa hɛ kɛ fɔɔ Yehowa nɔ nɛ wa sɔleɔ wawɛɛ. E haa nɛ wa kaseɔ Baiblo ɔ saminya nɛ waa kɛ tsuɔ ní ngɛ wa si himi mi. Jehanɛ hu ɔ, nɔ́ nami ma nyɛ ma ha nɛ wa yɔse suhi nɛ e he hia kaa waa pee tsakemi ngɛ he. Ke wa ngmɛ blɔ nɛ nɔ́ nɔmi dla wɔ ɔ, lɔ ɔ be hae nɛ wa yeyee ɔ he.

w17.07 13 ¶3, 5

“Nihi Nɛ Ngɛ Ya Foe ɔ, Nyɛɛ Kɛ Mɛ Nɛ Fo”

³ Atsinyɛ jemi ko be he kaa Yehowa, wa hiɔwe Tsɛ nɛ ngɛ mi mi sami ɔ ji nɔ nɛ woɔ wa bua nitsɛnitsɛ. (Kane 2 Korinto Bi 1:3, 4.) Yehowa ji nɔ nɛ nuɔ nɔ́ he haa nɔ pe nɔ fɛɛ nɔ, nɛ e wo e we bi si ke: “Imi ji nɔ nɛ woɔ mo he wami.”​—Yes. 51:12; La 119:50, 52, 76.

⁵ Wa ma nyɛ ma ná nɔ mi mami wawɛɛ kaa Yehowa maa ye bua wɔ. Enɛ ɔ he ɔ, ke wa ngɛ aywilɛho yee ɔ, e sɛ nɛ waa to tsle kaa wa maa je wa tsui mi kɛ de Yehowa bɔ nɛ e peeɔ wɔ ha. Lemi nɛ wa le kaa Yehowa nuɔ wɔ sisi, nɛ e haa wɔ bua womi nɛ wa hia a haa nɛ wa bua jɔɔ wawɛɛ! Se mɛni blɔ nɔ Yehowa guɔ kɛ peeɔ jã?

Ngmami ɔ Mi Junehi

w17.5 19-20 ¶11, 12

Ko Ha Nɛ O Suɔmi ɔ Nya Nɛ Jɔ

¹¹ Akɛnɛ wa ji Kristofohi he je ɔ, wa suɔ anɔkuale ɔ. Mawu Munyu ɔ lɛ haa nɛ wa leɔ anɔkuale ɔ. Yesu sɔle kɛ ha e Tsɛ ɔ, nɛ e de ke: ‘O munyu ɔ ji anɔkuale.’ (Yoh. 17:17) Enɛ ɔ he ɔ, ja nɔ ko ná Mawu Munyu ɔ he anɔkuale nile loko e ma nyɛ ma de ke e suɔ anɔkuale ɔ. (Kol. 1:10) Se pi anɔkuale nile nɛ nɔ ko ma ná a kɛkɛ nɛ he hia. Nɔ nɛ ngma La 119 ɔ ha nɛ wa na nɔ́ nɛ e sa nɛ waa pee kɛ tsɔɔ kaa wa suɔ Baiblo ɔ mi anɔkuale ɔ. (Kane La 119:97-100.) Anɛ wa heɔ be kɛ pueɔ wa yi mi tɛ ngɛ Ngmami ɔ he daa ligbi lo? Ke wa susu bɔ nɛ Baiblo mi anɔkuale ɔ yeɔ bua wɔ ngɛ si himi mi ha a he ɔ, suɔmi nɛ wa ngɛ kɛ ha Baiblo ɔ mi anɔkuale ɔ mi maa wa.

¹² La polɔ ɔ ya nɔ nɛ e de ke: “O mlaa a ngɔɔ loo! E ngɔɔ pe hwo tete po.” (La 119:103) Jã kɛ̃ nɛ e peeɔ wɔ ke wɔ hu wa kane Baiblo kasemi womihi nɛ Mawu asafo ɔ pee ha wɔ ɔ. Ke wa ná niye ní ko nɛ wa bua jɔ he ɔ, wa toɔ wa tsui si kɛ yeɔ lɛ saminya. Jã kɛ̃ nɛ ke wa to wa tsui si kɛ kase ní ɔ, wa ma kai anɔkuale “munyuhi nɛ ngɔɔ” ɔ, nɛ waa kɛ maa ye bua ni kpahi.​—Fiɛlɔ 12:10.

DECEMBER 23-29

JUETLI NƐ NGƐ MAWU MUNYU Ɔ MI | LA 119:121-176

Bɔ Nɛ O Maa Pee Ha Kɛ Jɔɔ Tsui Yemi Yaka Gu

w18.06 17 ¶5-6

Ha Nɛ Mawu Mlaa Amɛ Kɛ E Sisi Tomi Mlaa Amɛ Nɛ A Tsɔse O He Nile

⁵ Loko wa ma ná Mawu mlaa amɛ a he se ɔ, e sa nɛ waa pee babauu pe mlaa amɛ nɛ wa maa kane nɛ wa maa le ɔ kɛkɛ. E sa nɛ waa suɔ mlaa amɛ nɛ waa ye a nɔ. Mawu Munyu ɔ de ke: “Nyɛɛ hie nɔ́ nɛ dɛ blɔ. Nyɛɛ suɔ nɔ́ kpakpa.” (Amos 5:15) Se mɛni blɔ nɔ wa maa gu kɛ pee jã? E sa nɛ waa bɔ mɔde nɛ wa susumi kɛ Yehowa susumi nɛ kɔ. Nɔ́ he tomi nɔ́ ko ji nɛ ɔ nɛ: Moo ngɔ lɛ kaa o nyɛ we mahe hwɔmi kpakpa, nɛ o dɔkita a tsɔɔ mo niye ní komɛ nɛ e sa kaa o ye, e tsɔɔ mo ní komɛ hu nɛ o maa pee kɛ gbɔle o kpɔ mi, kɛ tsakemi komɛ nɛ e sa nɛ o pee ngɛ o si himi mi. Benɛ o kɛ dɔkita a ga womi ɔ tsu ní ɔ, o na tsakemi! Eko ɔ, o maa na dɔkita a si kaa e ye bua mo nɛ amlɔ nɛ ɔ, o hwɔɔ mahe saminya.

⁶ Jã nɔuu nɛ wa Bɔlɔ ɔ wo mlaahi nɛ poɔ wa he piɛ ngɛ haomihi nɛ jeɔ yayami peemi mi kɛ baa a he, nɛ lɔ ɔ haa nɛ wa si himi peeɔ kpakpa. Kaa nɔ hyɛmi nɔ́ ɔ, Baiblo ɔ tsɔɔ kaa e sɛ nɛ waa ye lakpa, waa sisi nɔ, waa bɔ ajuama, waa pee basabasa, nɛ e sɛ nɛ waa pee níhi nɛ kɛ mumi yayamihi ngɛ tsakpa. Atsinyɛ jemi ko be he kaa wa náa mlaa nɛ ɔmɛ a he se. (Kane Abɛ 6:16-19; Kpoj. 21:8) Ke wa pee níhi nɛ Yehowa suɔ ɔ, wa ma ná he se, nɛ suɔmi nɛ wa ngɛ kɛ ha Yehowa a mi maa wa, nɛ wa bua maa jɔ e mlaa amɛ a he.

w93 4/15 17 ¶12

Nihewi Kɛ Yihewi Mɛni Ji Níhi Nɛ Nyɛ Diɔ Se?

¹² Nɔ́ nɛ he hia pe kulaa ji kaa, nyɛ maa hie nɔ́ yayami nɛ nyɛ ma ha nɛ e he nɛ pee nyɛ tai. (La 97:10) Kɛ o ma plɛ kɛ hie nɔ́ ko nɛ sisije ɔ o bua jɔ he ɔ ha kɛɛ? Lɔ ɔ ji, nɛ o ma susu nɔ́ nɛ maa je mi kɛ ba a he! “Nyɛ ko ha nɛ a sisi nyɛ: Mawu ɔ, pi nɔ nɛ a yeɔ e he fɛu. Ejakaa nɔ́ fɛɛ nɔ́ nɛ nɔ ko ngɛ due ɔ, lɔ ɔ nɔuu nɛ e ma kpa; ejakaa nɔ nɛ e ngɛ due kɛ ngɛ e he lo ɔ hae ɔ ma kpa puɛmi kɛ je e he lo ɔ mi.” (Galatia Bi 6:7, 8) Ke yayami he akɔnɔ ngɛ mo pee ɔ, mo susu nyagba agbo nɛ maa je mi kɛ ba kɛ bɔ nɛ e maa dɔ Yehowa ha a he. (Kɛ to La 78:41.) Mo susu hɔ nɛ o maa ngɔ bemi nɛ o hyɛ we blɔ aloo bɔmi nami mi hiɔ nɛ sãa nɔ kaa AIDS nɛ o maa nu ɔ hu he. Moo hyɛ bɔ nɛ o maa nu he ha ke o kɛ nyagba nɛ ɔmɛ eko kpe kɛ bɔ nɛ nihi be mo bue ha. Nyagba kpahi hu ma nyɛ maa je nɔ́ nɛ o pee ɔ mi kɛ ba hwɔɔ se. Nyɛmiyo ko de ke: “I kɛ ye huno ɔ tsuo waa kɛ ni kpahi ná bɔmi loko wa ba le wa sibi. E ngɛ mi kaa Kristofohi ji wɔ amlɔ nɛ ɔ mohu lɛɛ, se bɔ nɛ wa ba wa je mi ha be ko nɛ be ɔ, ha nɛ hunga jemi sɔuu ji wa gba a mi.” Ke nɔ ko ngɛ asafo ɔ mi nɛ e kɛ e he woɔ ní peepee kaa kikɛ nɛ ɔ mi ɔ, eko ɔ, e sɔmɔmi he blɔ maa je e dɛ aloo a ma nyɛ maa fiee lɛ kɛ je Kristofohi asafo ɔ mi! (1 Korinto Bi 5:9-13) Anɛ ngɔɔmi be kpiti ko ɔ he hia wawɛɛ lo?

Ngmami ɔ Mi Junehi

w23.01 2 ¶2

Mo Ná Nɔ Mi Mami Kaa Mawu ‘Munyu ɔ Ji Anɔkuale’

⁸ Yehowa we bi tsuo ngɛ nɔ mi mami kaa Yehowa ji “Mawu anɔkualetsɛ,” nɛ e suɔ nɛ e hi ha wɔ be fɛɛ be. (La 31:5; Yes. 48:17) Wa le kaa wa ma nyɛ ma he nɔ́ fɛɛ nɔ́ nɛ wa kaneɔ ngɛ Baiblo ɔ mi ɔ maa ye, ejakaa ‘Mawu munyu ɔ tsuo ɔ, anɔkuale sisiisi.’ (Kane La 119:160) Waa kɛ Baiblo he ní lelɔ ko kpaa gbi ngɛ munyu ko nɛ e ngma a he. E ngma ke: “Nɔ́ fɛɛ nɔ́ nɛ Mawu de ɔ ji anɔkuale, nɛ níhi tsuo nɛ e de ɔ maa ba mi kokooko. Mawu we bi ma nyɛ ma he nɔ́ fɛɛ nɔ́ nɛ e de ɔ ye, ejakaa a ngɛ hɛ kɛ nɔ fɔmi ngɛ a Mawu ɔ mi.”

DECEMBER 30–JANUARY 5

JUETLI NƐ NGƐ MAWU MUNYU Ɔ MI | LA 120-126

A Kɛ Vonyu Du Ní, Se A Kpa Ní Kɛ Bua Jɔmi

w04 6/1 16 ¶10

A Gbaa Nihi Nɛ A Woɔ Mawu Hɛ Mi Nyami

¹⁰ Wa tsɔɔ kaa waa kɛ Satan ngɛ hwue ke waa kɛ wa he wo kaselɔ peemi ní tsumi ɔ mi. Yakobo 4:7 ɔ de ke: “Nyɛɛ te si kɛ wo Abosiami, nɛ e maa tu fo kɛ je nyɛ he.” Enɛ tsɔɔ we kaa jã a peemi ngɛ gbɔjɔɔ. E biɔ mɔde bɔmi wawɛɛ loko nɔ ko ma nyɛ ma sɔmɔ Mawu. (Luka 13:24) Baiblo ɔ wo si ngɛ La 26:5 ɔ kaa: “Nihi nɛ a kɛ vonyu duɔ ní ɔ ma kpa ní kɛ bua jɔmi.” Ee, Mawu nɛ wa ngɛ sɔmɔe ɔ, pi nɔ nɛ hɛ sɛ nɔ́ ji lɛ. E ji “nihi nɛ a ngɛ e se blɔ hlae wawɛɛ ɔmɛ a hiɔ wolɔ,” nɛ e jɔɔ nihi nɛ a woɔ e hɛ mi nyami ɔ.​—Hebri Bi 11:6.

w21.11 24 ¶17

Anɛ O Ma Ná Hemi Kɛ Yemi Nɛ Mi Wa Lo?

¹⁷ Anɛ o suɔlɔ ko gbo nɛ o ngɛ aywilɛho yee lo? Mo ná be kɛ kane nihi nɛ a tle mɛ si kɛ je gbeje nɛ a tu a he munyu ngɛ Baiblo ɔ mi ɔ a he ní nɛ o kɛ wo o hemi kɛ yemi ɔ mi he wami. Anɛ o weku no ko nɛ a fiee lɛ kɛ je asafo ɔ mi ɔ ha nɛ o ngɛ aywilɛho yee lo? Moo kase ní nɛ o ná nɔ mi mami kaa blɔ nɛ Yehowa guɔ nɔ kɛ tsɔseɔ nɔ ɔ hi be fɛɛ be, nɛ e se be. Moo na nyagba fɛɛ nyagba nɛ o kɛ ngɛ kpee ɔ kaa e ji he blɔ nɛ o kɛ maa fia o hemi kɛ yemi ɔ kɛ ma si. Moo je o tsui mi nɛ o sɔle kɛ ha Yehowa. Ko tsɔ o he banee, mohu ɔ, o kɛ o nyɛmimɛ nyumuhi kɛ yihi nɛ bɔ. (Abɛ 18:1) Moo pee níhi nɛ maa ye bua mo konɛ o nyɛ nɛ o fĩ si, ke e ma bi nɛ o fo ya po. (La 126:5, 6) Moo ya asafo mi kpehi kɛ fiɛɛmi be fɛɛ be nɛ o kane Baiblo ɔ daa ligbi. Moo ngɔ o juɛmi kɛ ma jɔɔmihi nɛ a se be nɛ Yehowa ngɛ kɛ ha mo ɔ nɔ. Ke o na bɔ nɛ Yehowa ngɛ mo ye buae ha a, hemi kɛ yemi nɛ o ngɛ ɔ mi maa hi wae be fɛɛ be.

w01 7/15 18-19 ¶13-14

Yaa O Hɛ Mi Ngɛ Ní Kpami Ní Tsumi ɔ Mi

¹³ Munyu nɛ ngɛ La 126:5, 6 nɛ e de ke “Nihi nɛ a kɛ vonyu duɔ ní ɔ ma kpa ní kɛ bua jɔmi. Nɔ nɛ jeɔ kpo kɛ e yi kotoku kɛ e mi wu nɛ a duɔ ɔ, ke e ngɛ ya foe po, bɔ fɛɛ bɔ nɛ ji ɔ, e maa kpale kɛ ba kɛ bua jɔmi kɛ e yi ngma nɛ a fi yi tlomi nya yi tlomi nya” woɔ nihi nɛ a kɛ a he woɔ ní kpami ní tsumi ɔ mi, titli ni nɛmɛ nɛ a kɛ yi mi wami ngɛ kpee ɔ he wami wawɛɛ. Munyuhi nɛ la polɔ ɔ kɛ tsu ní ɔ tsɔɔ bɔ nɛ Yehowa jɔɔ piɛni ɔmɛ nɛ e hyɛ a nɔ benɛ a kpale a se kɛ je nyɔguɛ tso mi ngɛ Babilon kɛ ba a. Benɛ a je nyɔguɛ tso mi kɛ ba a, a bua jɔ wawɛɛ se eko ɔ, a fo ya benɛ a ngɛ ní due ngɛ zugba nɛ a je he jeha 70 benɛ a nuu mɛ kɛ ho nyɔguɛ tsomi ya a. Se kɛ̃ ɔ, ni nɛmɛ nɛ a ya nɔ nɛ a du ní nɛ a kɛ a he wo gbogbo ɔ fiami mi ɔ bua jɔ wawɛɛ ejakaa a ngmɔ ɔmɛ ba ní nɛ a ná a dengme gbomi ɔ he se.

¹⁴ Ke wɔ aloo wa nyɛmimɛ Kristofohi kɛ anɔkuale ɔ he ka ngɛ kpee ɔ, wa ma nyɛ ma fo ya. (1 Petro 3:14) Ke wa ngɛ wa ní kpami ní tsumi ɔ tsue ɔ, eko ɔ, wa be lɛ nae gbɔjɔɔ akɛnɛ wa nɛ́ yiblii nɛ wa fiɛɛmi ní tsumi ɔ ngɛ woe ɔ he je. Se ke wa ya nɔ nɛ wa du nɛ wa pue nɔ nyu ɔ, Mawu ma ha nɛ e maa wa pe bɔ nɛ wa susu ɔ. (1 Korinto Bi 3:6) Enɛ ɔ tsɔɔ yiblii nɛ jeɔ Baiblo ɔ kɛ womihi nɛ waa kɛ haa nihi ɔ mi kɛ baa mi heii.

Ngmami ɔ Mi Junehi

w18.07 12-13 ¶1, 2

Jije O Hɛngmɛ Ngɛ Hyɛe?

¹ WA NGƐ ‘behi nɛ a mi wa nɛ a nya dami yee’ ɔ mi. (2 Tim. 3:1) Se loko Yehowa ma kpata je yaya nɛ ɔ hɛ mi nɛ e maa ngɔ je ehe nɛ tue mi jɔmi ngɛ mi ɔ kɛ ba a, si himi ɔ mi ma ba wa po pe bɔ nɛ e ngɛ amlɔ nɛ ɔ. Enɛ ɔ he ɔ, e sa nɛ wa bi wa he ke, ‘Ke i ngɛ yemi kɛ buami kɛ blɔ tsɔɔmi hlae ɔ, jije i yaa aloo jije i ngɔɔ ye hɛ kɛ tsɔɔ?’ Eko ɔ, wa ma ha heto ke, “Yehowa ngɔ.” Niinɛ, o heto ɔ da.

² Mɛni nɛ wa yi nɔ nɛ wa ma wo kɛ hyɛ Yehowa a tsɔɔ? Ke waa kɛ nyagbahi ngɛ kpee ɔ, mɛni wa maa pee konɛ wa ko je wa hɛ ngmɛ kɛ je Yehowa nɔ? Jeha babauu ji nɛ ɔ nɛ la polɔ ko tsɔɔ bɔ nɛ e he hia ha kaa wa ma wo wa yi nɔ kɛ hyɛ Yehowa ke waa kɛ nyagbahi ngɛ kpee. (Kane La 123:1-4) La polɔ ɔ ngɔ Yehowa nɛ wa maa hyɛ ɔ kɛ to bɔ nɛ tsɔlɔ ko hyɛɛ e nyɔmtsɛ ɔ he. Mɛni la polɔ ɔ ngɛ hlae maa tsɔɔ? Tsɔlɔ ɔ hyɛɔ e nyɔmtsɛ ɔ blɔ kaa e ma ha lɛ niye ní, nɛ e maa po e he piɛ. Se tsa pi lɔ ɔ pɛ. Tsɔlɔ ɔ je we e hɛ ngmɛ ngɛ e nyɔmtsɛ ɔ he ejakaa e suɔ nɛ e yɔse níhi nɛ e nyɔmtsɛ ɔ maa suɔ nɛ e pee, nɛ ke e yɔse jamɛ a ní ɔmɛ ɔ, e peeɔ. Jã kɛ̃ nɛ e sa nɛ wɔ hu waa kase Mawu Munyu ɔ daa ligbi nɛ wa yɔse Yehowa suɔmi nya ní konɛ waa pee nɔ́ nɛ e ngɛ hlae ɔ. Ja jã loko wa ma nyɛ ma ná nɔ mi mami kaa Yehowa maa ye bua wɔ ngɛ wa haomi behi a mi.​—Efe. 5:17.