Womihi Nɛ A Tsɛ Se Ngɛ Si Himi Kɛ Sɔmɔmi Ní Tsumi Kpe ɔ He Ní Kasemi Womi ɔ Mi

© 2024 Watch Tower Bible and Tract Society of Pennsylvania

SEPTEMBER 2-8

JUETLI NƐ NGƐ MAWU MUNYU Ɔ MI | LA 79-81

Mo Je Bumi Kpo Kɛ Tsɔɔ Yehowa Biɛ Nɛ Hɛ Mi Ngɛ Nyami ɔ

w17.02 9 ¶5

Kpɔmi Nɔ́ ɔ​—‘Nike Ní Nɛ Hi Kɛ Pi Si’ Nɛ Je Tsɛ ɔ Ngɔ

⁵ Mɛni blɔ nɔ wa maa gu kɛ tsɔɔ kaa wa suɔ Yehowa biɛ ɔ? Kɛ gu wa ní peepee nɔ. Yehowa suɔ kaa waa pee wa he klɔuklɔu. (Kane 1 Petro 1:15, 16.) Enɛ ɔ tsɔɔ kaa wa ma sɔmɔ Yehowa pɛ, nɛ wa maa ye e mlaa amɛ a nɔ kɛ wa tsui tsuo. Ke a ngɛ wɔ yi mi wae po, wa bɔɔ mɔde kaa waa kɛ Yehowa sisi tomi mlaahi kɛ e mlaahi nɛ da a ma tsu ní. Ke wa peeɔ nɔ́ nɛ da a, wa haa nɛ wa la a kpɛɔ, nɛ enɛ ɔ woɔ Yehowa biɛ ɔ hɛ mi nyami. (Mat. 5:14-16) Akɛnɛ wa ngɛ klɔuklɔu he je ɔ, waa kɛ bɔ nɛ wa baa wa je mi ha a maa nɔ mi kaa Yehowa mlaa amɛ hi, nɛ Satan nya pomi ɔ ji lakpa. Wɔ tsuo wa tɔ̃ɔ, enɛ ɔ he ɔ, ke wa pee nɔ́ ko nɛ sɛ́ ɔ, wa piaa wa he kɛ jeɔ wa tsui mi, nɛ wa kpaa ní yayahi nɛ gbeɔ Yehowa he guɛ ɔ peemi.​—La 79:9.

ijwbv 3 ¶4-5

Roma Bi 10:13​—‘Tsɛ Yehowa Biɛ ɔ’

Ngɛ Baiblo ɔ mi ɔ, munyungu nɛ ji “tsɛɔ Yehowa biɛ ɔ” nɛ a kɛ tsu ní ɔ biɔ babauu pe Mawu biɛ ɔ nɛ nɔ ko maa le nɛ e kɛ ma tsu ní ngɛ jami mi pɛ kɛkɛ. (La 116:12-14) Mohu ɔ, e tsɔɔ kaa wa ma ná hemi kɛ yemi ngɛ Mawu mi nɛ waa ngɔ wa hɛ kɛ fɔ e nɔ konɛ e ye bua wɔ.​—La 20:7; 99:6.

Mawu biɛ ɔ he hia Yesu Kristo wawɛɛ nitsɛ. Kekleekle munyunguhi nɛ e kɛ tsu ní ngɛ e sɔlemi he nɔ hyɛmi nɔ́ ɔ mi ɔ ji: “Wa Tsɛ nɛ o ngɛ hiɔwe, ha nɛ o biɛ ɔ he nɛ tsɔ,” aloo a pee o biɛ ɔ klɔuklɔuu. (Mateo 6:9) Yesu tsɔɔ nya hu kaa loko wa ma ná neneene wami ɔ, e sa nɛ waa le Mawu, waa bu lɛ tue nɛ waa suɔ lɛ.​—Yohane 17:3, 6, 26.

Ngmami ɔ Mi Junehi

it-2 111

Yosef

Biɛ Yosef ɔ He Si Wawɛɛ. Akɛnɛ Yosef hɛɛ blɔ nya nɛ nɔ kuɔ ngɛ Yakob bi nyumu ɔmɛ a kpɛti he je ɔ, e da blɔ kaa be komɛ ɔ, a kɛ e biɛ ɔ tsu ní kɛ da si kɛ ha Israel wɛtso ɔmɛ tsuo (La 80:1) aloo wɛtso nyɔngma nɛ a ba piɛɛ Israel yiti je matsɛ yemi ɔ he ɔ. (La 78:67; Amo 5:6, 15; 6:6) A kɛ e biɛ ɔ hu tsu ní ngɛ Baiblo gbamihi a mi. Ngɛ Ezekiel nina a mi ɔ, gbosi ní nɛ Yosef ná a bɔ he enyɔ (Eze 47:13), a ngɔ Yosef biɛ kɛ wo ma a agbo ɔ kake. Ma nɛ ɔ biɛ ji ‘Yehowa ngɛ hiɛmɛ nɛ ɔ!’ (Eze 48:32, 35), benɛ Yehowa de ke e maa pee Israel wɛtso ɔ nɛ a mi gba a kake ekohu ɔ, a tsɔɔ kaa Yosef maa hyɛ wɛtso ɔ nɛ mi gba a fã kake nɔ, nɛ Yuda hu maa hyɛ fã kake nɔ. (Eze 37:15-26) Obadia gbami ɔ hu tsɔɔ kaa “Yosef we ɔ” maa piɛɛ he nɛ a kɛ ma kpata “Esau we ɔ” hɛ mi (Oba 18), nɛ Zakaria gbami ɔ hu tsɔɔ kaa Yehowa ma he “Yosef we ɔ” yi wami. (Zak 10:6) Yosef piɛɛ mumi mi Israel wɛtso ɔmɛ a he se Efraim lɛɛ e piɛɛ we he.​—Kpj 7:8.

Yosef biɛ ta nɛ a wo ngɛ Kpo Jemi 7:8 tsɔɔ kaa, gbami nɛ Yakob gba benɛ e piɛ bɔɔ nɛ e ma gbo ɔ kɔɔ mumi mi Israel ɔ he. Lɔ ɔ he ɔ, e sa kadimi kaa Yehowa Mawu nɛ ji Yakob Hewamitsɛ ɔ, ngɔ Yesu Kristo kɛ ha kaa To Hyɛlɔ Kpakpa nɛ e kɛ e wami fɔ si kɛ ha “jijɔ ɔmɛ.” (Yo 10:11-16) Yesu Kristo hu ji Mawu sɔlemi we ɔ sisi tomi kɔ̃ nya tɛ nɛ mumi mi Israel ɔ maa si ngɛ nɔ ɔ nɛ. (Efe 2:20-22; 1Pe 2:4-6) To Hyɛlɔ ɔ kɛ Tɛ nɛ ɔ je Mawu Ope ɔ ngɔ.​— Yo 1:1-3; Nít 7:56; Heb 10:12; kɛ to 1Mo 49:24, 25.

SEPTEMBER 9-15

JUETLI NƐ NGƐ MAWU MUNYU Ɔ MI | LA 82-84

O Bua Nɛ Jɔ Nɔ́ Nɛ O Nyɛ Peeɔ Ha Yehowa a He

wp16.6 8 ¶2-3

Níhi Nɛ Wa Kaseɔ Ngɛ Lohwe Pɛlitsɛmɛ A He

Nihi nɛ a hi Yerusalem ɔ le odangmɔdangmɔhi nɛ́ behi fuu ɔ, a peeɔ a tsuhi ngɛ tsu yi bumi nɔ́ ɔ sisi ɔ wawɛɛ. A ti ni komɛ pee a tsu ngɛ Salomo sɔlemi we ɔ. Odangmɔdangmɔhi peeɔ a tsuhi ngɛ sɔlemi we ɔ daa jeha ejakaa a le kaa lejɛ ɔ ngɛ slɔkee nɛ́ a ma nyɛ kɛ hyɛ a bimɛ ɔmɛ nɛ nɔ́ ko be mɛ haoe.

Nɔ nɛ po La 84 ɔ ji Kora bi nyumu ɔmɛ a kpɛti nɔ kake. E kɛ otsi kake sɔmɔɔ daa nyɔhiɔ ekpa ngɛ sɔlemi we ɔ. E yɔse kaa odangmɔdangmɔhi peeɔ a tsuhi ngɛ sɔlemi we ɔ. Enɛ ɔ he ɔ, lɛ hu e suɔ kaa e maa pee kaa Odangmɔdangmɔhi nɛ a hiɔ Yehowa we ɔ daa a. E de ke: “Oo Yehowa tabohiatsɛ, hyɛ bɔ nɛ i suɔ o bo tsu ngua a ha. Ye hɛ ngɛ jae wawɛɛ ngɛ Yehowa we ɔ he. . . Oo Yehowa tabohiatsɛ, ye Matsɛ kɛ ye Mawu! Lohwe pɛlitsɛ po náa hi he ngɛ o we afɔle sami latɛ ngua a kasa nya, nɛ odangmɔdangmɔ peeɔ tsu kɛ haa e he ngɛ lejɛ ɔ, nɛ e hyɛɔ e bimɛ a nɔ ngɛ lejɛ ɔ.” (La 84:1-3) Anɛ wɔ hu waa kɛ wa bimɛ jeɔ hɛsa kpo, nɛ wa bua jɔɔ kaa wa maa piɛɛ Mawu we bi a he ngɛ e we asafo ɔ mi daa lo?​—La 26:8, 12.

w08 7/15 30 ¶3-4

Moo Ngmɛ Pɛpɛɛpɛ Ngɛ Otihi Nɛ O Kɛ Ma O Hɛ Mi ɔ He Nɛ O Bua Nɛ Jɔ

Ke wa bwɔ aloo wa be nɔmlɔ tso mi he wami kpakpa a, lɔ ɔ be hae nɛ waa pee babauu ngɛ Yehowa sɔmɔmi mi. Ke o ji fɔlɔ ɔ, eko ɔ, o ma susu kaa o ná we asafo mi kpe nɛ o yaa kɛ dɛ he ní kasemi nɛ o peeɔ ɔ he se kɛ pi si akɛnɛ o ngɔɔ o be kɛ o he wami ɔ tsuo kɛ hyɛɛ o bimɛ tsɔwi ɔmɛ a nɔ ɔ he je. Anɛ o le kaa ke o kɛ o juɛmi ma níhi nɛ o be nyɛe maa pee ɔ a nɔ ɔ, lɔ ɔ be hae nɛ o le níhi nɛ o ma nyɛ tsu a he ní ɔ lo?

Jeha akpehi komɛ nɛ be ɔ, Levino ko tu he blɔ nɛ jinɛ ke e ná a e bua ko jɔ he se e na we ɔ he munyu. E ná he blɔ kaa e kɛ otsi enyɔ ma sɔmɔ ngɛ sɔlemi we ɔ daa jeha. Se kɛ̃ ɔ, e tu munyu kɛ tsɔɔ kaa e ná jinɛ e ko sɔmɔ ngɛ afɔle sami latɛ ɔ kasa nya e wami be tsuo. (La 84:1-3) Mɛni ye bua nyumu anɔkualetsɛ nɛ ɔ nɛ e bua jɔ nɔ́ nɛ e nyɛ tsu ɔ he? E ba yɔse kaa ligbi kake nɛ e maa ye ngɛ sɔlemi we ɔ kpo ɔ nɔ ɔ ji he blɔ ngua nɛ se be nɛ e ná. (La 84:4, 5, 10) Enɛ ɔ he ɔ, e sa nɛ wa pue wa yi mi tɛ nɛ wa bua nɛ jɔ nɔ́ nɛ wa nyɛ tsuɔ ɔ he mohu pe nɛ wa maa hi níhi nɛ wa be nyɛe ma tsu ɔ a he susue.

w20.01 17 ¶12

O He Jua Wa Ha Yehowa O Mawu ɔ!

¹² Ke hiɔ ko ngɛ o nya gbae ɔ, mo ná nɔ mi mami kaa Yehowa le nɔ́ nɛ mi nɛ o ngɛ gblee. Mo kpa lɛ pɛɛ nɛ e ye bua mo konɛ o ná juɛmi nɛ da ngɛ o si fɔfɔɛ ɔ he. Lɔ ɔ se ɔ, mo hla munyu kpakpahi nɛ Yehowa kɛ to ngɛ Baiblo ɔ mi ha mo ɔ. Moo ngɔ o juɛmi kɛ ma kukuhi nɛ tsɔɔ bɔ nɛ Yehowa sɔmɔli a he jua wa ha lɛ ɔ nɔ. Ke o pee jã a, o maa na kaa Yehowa hi kɛ ha nihi tsuo nɛ a kɛ anɔkuale yemi sɔmɔɔ lɛ ɔ.​—La 84:11.

Ngmami ɔ Mi Junehi

it-1 816

Awusahi

E yi kulaa kaa nihi a hɛ ma nyɛ maa je nihi nɛ a ní ngɛ mɔbɔ nɛ a be nɔ ko nɛ maa fã a he ɔ nɔ. Enɛ ɔ he ɔ, Yehowa kɛ munyungu nɛ ji “awusahi” ɔ tsuɔ ní kɛ kaleɔ bɔ nɛ Israelbi ɔmɛ peeɔ dami ní ha aloo bɔ nɛ a gbaa kɛ jeɔ dami ní peepeehi a he ha a. Ke Israel ma a ngɛ Yehowa anɔkuale ye ɔ, a hyɛɛ awusa amɛ a nɔ. Se ke a kpa Yehowa anɔkuale yemi pɛ kɛkɛ a hɛ je awusa amɛ hu a nɔ, nɛ enɛ ɔ ji okadi nɛ tsɔɔ kaa ma a kɛ a he wo níhi nɛ sɛ peemi mi ɔ nɛ. (La 82:3; 94:6; Yes 1:17, 23; Yer 7:5-7; 22:3; Eze 22:7; Zak 7:9-11; Mal 3:5) Yehowa gbiɛ nihi nɛ a waa awusahi yi mi ɔ. (5Mo 27:19; Yes 10:1, 2) Yehowa kale e he kaa e ji Kpɔlɔ (Abɛ 23:10, 11), Yemi kɛ Bualɔ (La 10:14), kɛ Tsɛ (La 68:5) kɛ ha nihi nɛ a waa mɛ yi mi ɔ. Lɛ ji nɔ nɛ e kojoɔ a sane kɛ haa mɛ (5Mo 10:17, 18), e naa mɛ mɔbɔ (Hos 14:3), e haa nɛ a yeɔ a he (La 146:9), nɛ e baa a yi.​—Yer 49:11.

Nɔ́ kake nɛ a kɛ kadiɔ anɔkuale Kristofohi ji kaa, a hyɛɛ yalɔyihi kɛ awusahi a nɔ. Kaselɔ Yakobo ngma kɛ ha Kristofohi ke: “Jami nɛ he tsɔ, nɛ mu ko be he ngɛ wa Mawu nɛ ji Tsɛ ɔ hɛ mi ji nɛ ɔ nɛ: kaa nɔ ko maa hyɛ awusahi kɛ yalɔyihi a nɔ ngɛ a we amanehluhi a mi, kɛ jehanɛ se hu nɛ́ nɔ ko maa hyɛ nɛ je ɔ nɛ ko wo e he mu.”​—Yak 1:27.

SEPTEMBER 16-22

JUETLI NƐ NGƐ MAWU MUNYU Ɔ MI | LA 85-87

Sɔlemi Yeɔ Buaa Wɔ Nɛ Wa Fiɔ Si

w12 5/15 25 ¶10

Anɛ O Ngɛ Yehowa Hɛ Mi Nyami ɔ Kpo Jee Lo?

¹⁰ Ke wa suɔ nɛ wa je Mawu hɛ mi nyami ɔ kpo ɔ, lɛɛ e sa nɛ waa “hɛɛ sɔlemi mi” daa. (Rom. 12:12) Wa ma nyɛ maa sɔle kɛ ha Yehowa konɛ e ye bua wɔ nɛ wa sɔmɔ lɛ ngɛ blɔ nɛ e kplɛɛɔ nɔ ɔ nɔ, nɛ e sa nɛ waa pee jã hulɔ. Lɔ ɔ he ɔ, wa ma nyɛ ma bi lɛ konɛ e ha wɔ e mumi klɔuklɔu ɔ, nɛ e ha wɔ hemi kɛ yemi fuu. Wa ma nyɛ ma bi lɛ konɛ e ha wɔ he wami nɛ wa nyɛ kɛ da kahi a nya kɛ nyɛmi nɛ waa kɛ maa ‘hɛɛ anɔkuale munyu ɔ mi ngɛ blɔ nɛ da nɔ.’ (2 Tim. 2:15; Mat. 6:13; Luka 11:13; 17:5) Kaa bɔ nɛ bi ngɔɔ e hɛ kɛ fɔɔ e tsɛ nɔ ɔ, jã a kɛ̃ nɛ e sa kaa wɔ hu waa ngɔ wa hɛ kɛ fɔ Yehowa wa hiɔwe Tsɛ ɔ nɔ. Ke wa bi lɛ kaa e ye bua wɔ nɛ wa sɔmɔ lɛ kɛ wa tsui tsuo ɔ, wa ma nyɛ ma ná nɔ mi mami kaa e maa bu wɔ tue. E sɛ nɛ waa nu he kɔkɔɔkɔ kaa wa ji tlomi kɛ ha lɛ! Mohu ɔ, ke wa ngɛ sɔlee ɔ, wa je e yi, waa na lɛ si nɛ wa bi blɔ tsɔɔmi kɛ je e ngɔ titli ke waa kɛ kahi ngɛ kpee, nɛ wa bi lɛ nɛ́ e ye bua wɔ konɛ wa nyɛ nɛ wa sɔmɔ lɛ ngɛ blɔ nɛ maa wo e biɛ ɔ hɛ mi nyami ɔ nɔ.​—La 86:12; Yak. 1:5-7.

w23.05 13 ¶17-18

Bɔ Nɛ Yehowa Haa Wa Sɔlemihi A Heto Ha

¹⁷ Kane La 86:6, 7. La polɔ David kplɛɛ nɔ kaa Yehowa bu e sɔlemi tue nɛ e ha heto hulɔ. Mo hu o ma nyɛ ma ná nɔ mi mami jã nɔuu. Nɔ hyɛmi níhi nɛ wa susu a he ngɛ ní kasemi nɛ ɔ mi ɔ, ha nɛ wa ná nɔ mi mami kaa Yehowa ma nyɛ ma ha wɔ nile kɛ he wami nɛ wa hia konɛ wa nyɛ nɛ wa fĩ si ke waa kɛ haomihi ngɛ kpee. Jehanɛ hu ɔ, e ma nyɛ maa gu wa nyɛmimɛ ɔmɛ a nɔ loo nihi nɛ a sɔmɔ we lɛ ɔ a nɔ kɛ ye bua wɔ ngɛ blɔ komɛ a nɔ.

¹⁸ Wa le kaa pi be fɛɛ be nɛ Yehowa ma ha wa sɔlemihi a heto kaa bɔ nɛ wa ngɛ blɔ hyɛe ɔ mohu lɛɛ, se e ma ha heto kɛ̃. E ma ha wɔ nɔ́ tutuutu nɛ wa hia ngɛ be nɛ e maa hia wɔ ɔ mi. Enɛ ɔ he ɔ, moo ya nɔ nɛ o sɔle nɛ o ná nɔ mi mami kaa Yehowa maa bu mo tue. Jehanɛ hu ɔ, mo ná nɔ mi mami kaa Yehowa maa hyɛ o nɔ amlɔ nɛ ɔ, nɛ hwɔɔ se hu ɔ, e ma ha nɛ ‘nɔ́ fɛɛ nɔ́ nɛ ngɛ hɛ ngmengmle ɔ maa tɔ’ ngɛ je ehe ɔ mi.​—La 145:16.

Ngmami ɔ Mi Junehi

mwbr23 January 4 ¶ 2

Tsui

Mo Sɔmɔ Yehowa Kɛ O “Tsui Tsuo.” Loko wa tsui nɛ ngɛ wa mi ɔ ma tsu ní saminya a, e sɛ nɛ e mi nɛ gba. Se wa okadi peemi tsui ɔ lɛɛ, e mi ma nyɛ ma gba. David sɔle ke: “Moo pee ye tsui kake konɛ ma ye o biɛ ɔ gbeye.” Enɛ ɔ tsɔɔ kaa wa okadi peemi tsui ɔ mi ma nyɛ ma gba ke e ba lɛ suɔmi nɛ wa ngɛ kɛ ha Yehowa kɛ gbeye nɛ wa yeɔ lɛ ɔ. (La 86:11, NW) Nɔ ko kaa jã a ngɛ kulɔkulɔ, nɛ e kɛ e “tsui fã” lɛ sɔmɔɔ Mawu. (La 119:113; Kpj 3:16) Nɔ ko hu “tsui ma nyɛ maa pee enyɔ,” ke e ba lɛ jã a, eko ɔ, e maa bɔ mɔde kaa e ma sɔmɔ nyɔmtsɛmɛ enyɔ aloo e maa hi nɔ́ ko dee be mi nɛ e le kaa pi anɔkuale. (1Kron 12:33; La 12:2) Yesu bu nihi nɛ a peeɔ osato nɛ ɔ fɔ.​—Mat 15:7, 8.

SEPTEMBER 23-29

JUETLI NƐ NGƐ MAWU MUNYU Ɔ MI | LA 88-89

Yehowa Nɔ Yemi ɔ Ji Nɔ Yemi Nɛ Se Be

w17.06 28 ¶5

Mo Fĩ Yehowa Nɔ Yemi ɔ Se!

⁵ Mo susu nɔ́ kpa ko hu nɛ tsɔɔ kaa Yehowa ji nɔ nɛ ngɛ he blɔ kaa e yeɔ matsɛ ɔ he nɛ o hyɛ. E kɛ e he wami ɔ tsuɔ ní ngɛ dami sane yemi mi, nɛ e dami sane yemi ɔ hi kɛ pi si. E de ke: ‘Ye suɔmi ɔ se pui gblegbleegble; i peeɔ nɔ́ nɛ da, nɛ i yeɔ dami sane. Ní nɛ ɔmɛ ji níhi nɛ saa ye hɛ mi. Imi, Yehowa lɛ i de.’ (Yer. 9:24) Mlaa nɛ adesahi nɛ a yi mluku ɔ wo ɔ be nyɛe maa tsɔɔ Yehowa nɔ́ nɛ da kɛ nɔ́ nɛ dɛ. Yehowa ji nɔ nɛ tsɔɔ nɔ́ nɛ da kɛ nɔ́ nɛ dɛ, enɛ ɔ he ɔ, lɛ nɛ e woɔ adesahi mlaa. La polɔ ɔ de ke: ‘E matsɛ yemi ɔ, dami sane yemi nɔ a to lɛ sisi kɛ fɔ,’ enɛ ɔ he ɔ, wa ma nyɛ ma ná nɔ́ mi mami kaa e mlaa amɛ, e sisi tomi mlaa amɛ, kɛ e yi mi tomihi tsuo da. (La 89:14; 119:128) Satan tsɔɔ kaa Yehowa nɔ yemi ɔ dɛ, se kɛ̃ ɔ, Satan nitsɛ hu nyɛ we nɛ e ngɔ dami sane yemi kɛ ba je ɔ mi.

w17.06 29 ¶10-11

Mo Fĩ Yehowa Nɔ Yemi ɔ Se!

¹⁰ Yehowa nyɛ we nihi a nɔ, nɛ e nɔ yemi ɔ be kpɛii. E haa wɔ he yemi, nɛ wa náa bua jɔmi. (2 Kor. 3:17) David de ke: ‘Hɛ mi nyami, kɛ agboje bɔle Mawu kɛ kpe; he wami kɛ bua jɔmi hyi e we ɔ.’ (1 Kron. 16:7, 27) Jã nɔuu kɛ̃ nɛ la polɔ Etan ngma ke: ‘A gbaa nihi nɛ le bɔ nɛ a laa kɛ jaa mo. Mo Yehowa, o maa na mɛ mɔbɔ daa. Mo o he ɔ, a bua jɔɔ a he daa nɛ; a jeɔ o yi, ejakaa o hi.’​—La 89:15, 16.

¹¹ Ke wa ya nɔ nɛ wa pue wa yi mi tɛ ngɛ Yehowa kpakpa peemi ɔ he ɔ, lɔ ɔ ma nyɛ ma ha nɛ hemi kɛ yemi nɛ wa ngɛ kaa Yehowa nɔ yemi ɔ da a mi maa wa. Nɛ e maa pee wɔ kaa bɔ nɛ e pee la polɔ ɔ. E de ke: “Ligbi kake nɛ nɔ ko maa ye ngɛ o we ɔ hi pe ligbi akpe nɛ e maa ye ngɛ he kpa ko!” (La 84:10) Mɛnɔ ma nyɛ maa je enɛ ɔ he nɔ́? Akɛnɛ Yehowa ji wa Bɔlɔ he je ɔ, e le níhi nɛ ma ha nɛ wa bua nɛ jɔ nitsɛnitsɛ, nɛ e haa wɔ jamɛ a ní ɔmɛ babauu. Ke wa pee nɔ́ tsuaa nɔ́ nɛ Yehowa deɔ wɔ ke waa pee ɔ, wɔ nitsɛmɛ nɛ wa náa he se, nɛ wa bua jɔɔ. Ke e biɔ nɛ wa kɛ níhi nɛ sã afɔle po ɔ, waa kɛ bua jɔmi peeɔ jã daa.​—Kane Yesaya 48:17.

w14 10/15 7 ¶14

Mo Ná Hemi Kɛ Yemi Nɛ Mi Wa Ngɛ Matsɛ Yemi ɔ Mi

¹⁴ Yehowa kɛ Matsɛ David nɛ hi si ngɛ blema Israel ɔ so somi ko. A tsɛɛ somi nɛ ɔ ke somi nɛ Mawu kɛ David so. (Kane 2 Samuel 7:12, 16.) Yehowa wo David si kaa Mesia a maa je e weku ɔ mi. (Luka 1:30-33) Yehowa tu weku nɛ a ma fɔ Mesia a ngɛ mi ɔ he munyu fitsofitso. Yehowa tsɔɔ kaa David nina nɛ ɔ ji “nɔ nɛ e sa” kaa e ye Matsɛ ngɛ Mesia Matsɛ Yemi ɔ nya. (Ezekiel 21:25-27) David matsɛ yemi ɔ maa hi si kɛ ya neneene, ejakaa Yesu nɛ ji David nina a ‘maa hi si kɛ maa ya neneene, nɛ e matsɛ yemi ɔ hu maa hi si be abɔ nɛ pu ngɛ hiɔwe ɔ.’ (La 89:34-37) Wa ma nyɛ ma ná nɔ mi mami kaa Mesia nɔ yemi ɔ be puɛe gblegbleegble, nɛ wa ma ná he se hu kɛ ya neneene!

Ngmami ɔ Mi Junehi

w93 1/1 32 ¶3-4

“Odasefono Anɔkualetsɛ Ngɛ Bɔku Ɔmɛ A Mi”

Ke Israelbi ɔmɛ hyɛ nyɔhiɔ ɔ, e kaiɔ mɛ nɔ́ ko nɛ ngɛ nyakpɛ. Yehowa wo si kaa Matsɛ David nɔ yemi ɔ se be poe gblegbleegble. E de ke: “E [David nina] maa ma si kpɛii kɛ ya neneene kaa nyɔhiɔ, kaa odasefono anɔkualetsɛ ngɛ bɔku ɔmɛ a mi.” (La 89:35-37) Gbami nɛ ɔ ba mi ngɛ Yesu nɛ ji “David Bi” ɔ blɔ fami. (Luka 18:38) Benɛ Yesu gbo se ɔ, a tle lɛ si kaa mumi mi bɔ nɔ́ nɛ be gboe hu kɛ ho hiɔwe ya. (Ní Tsumi 2:34-36) Benɛ be pue mi ɔ, a wo lɛ Mawu Matsɛ Yemi ɔ nya Matsɛ ngɛ hiɔwe. (Kpo Jemi 12:10) Matsɛ Yemi nɛ ɔ ngɛ nɔ yee amlɔ nɛ ɔ, nɛ e “maa hi si kɛ maa ya neneene.” (Daniel 2:44) Ngɛ blɔ nɛ ɔ nɔ ɔ, Yesu nɛ e ji David nina nɛ e be gboe hu ɔ, maa hi si kɛ maa ya neneene kaa bɔ nɛ nyɔhiɔ nɛ ji “odasefono anɔkualetsɛ nɛ ngɛ bɔku ɔ mi” ɔ ji ɔ.

Enɛ ɔ he ɔ, be fɛɛ be nɛ o maa na nɛ nyɔhiɔ ngɛ kpɛe gbɔkuɛ he ngɛ bɔku ɔ mi ɔ, mo kai si nɛ Mawu wo David ɔ nɛ o na lɛ si kaa e ha nɛ e Matsɛ Yemi ɔ ngɛ nɔ yee nɛ e maa ye nɔ kɛ ya neneene nɛ jehanɛ se hu ɔ, o na Mawu nɛ e hɛ mi ngɛ nyami ɔ si ngɛ jɔɔmihi nɛ e kɛ ma ha adesahi anɔkualetsɛmɛ kɛ ya neneene ɔ he.​—Kpo Jemi 11:15.

SEPTEMBER 30–OCTOBER 6

JUETLI NƐ NGƐ MAWU MUNYU Ɔ MI | LA 90-91

Ngɔɔ O Hɛ Kɛ Fɔ Yehowa Nɔ Nɛ O Se Maa Kɛ

wp19.3 5 ¶3-5

Adesahi Ngɛ Wami Nɛ Se Kɛ Se Blɔ Hlae

Je mi si kpali fuu tsɔɔ kaa níhi fuu ngɛ nɛ nihi peeɔ konɛ a wami se nɛ kɛ, se kɛ̃ ɔ, lɔ ɔmɛ be hae nɛ adesahi a se nɛ kɛ pe ligbihi nɛ adesahi yeɔ ɔ. Ngɛ anɔkuale mi ɔ, kɛ je jeha 1900 jeha amɛ a mi kɛ ma nɛ ɔ, adesahi a wami se kɛ ɔ. Nɔ́ he je ji kaa adesahi ya hɛ mi ngɛ he tsɔmi mi, nɛ a pee tsopahi nɛ́ a kɛ tsaa hiɔ slɔɔtohi. Je mi si kpali komɛ heɔ yeɔ kaa adesahi nyɛɔ suu a wami ligbi ɔmɛ a he.

Maa pee jeha 3,500 nɛ be ɔ, Mose tsɔɔ kaa: “Wa wami be ɔ tsuo ji jeha nyingmi kpaago. Ke wa ngɛ he wami ɔ, wa naa nyingmi kpaanyɔ, se lɛ tsuo peeɔ haomi kɛ aywilɛho sɔuu. Wa wami se poɔ tlukaa; nɛ wa bee kɛ yaa kaa lohwe pɛlitsɛmɛ nɛ te kɛ bee.” (La 90:10) E ngɛ mi kaa adesahi bɔ mɔde kaa a ma ha nɛ a wami se nɛ kɛ mohu lɛɛ, se tsakemi ko bɛ, níhi ngɛ kaa bɔ nɛ Mose de ɔ nɔuu.

Se lohwe komɛ kaa red sea urchin, loo quahog clam ɔ nyɛɔ yeɔ jeha 200 kɛ se, nɛ tso ko nɛ a tsɛɛ ke giant sequoia a hu nyɛɔ yeɔ jeha akpehi abɔ. Ke wa ngɔ adebɔ ní nɛ ɔmɛ a wami kɛ to adesahi a wami he ɔ, eko ɔ, wa ma bi ke, ‘Anɛ wa wami ligbi ɔmɛ tsuo ji jeha 70 loo 80 lo?’

wp19.1 5, daka

Kɛ A Tsɛɛ Mawu Kɛɛ?

Enɛ ɔ ji sane bimi ko nɛ nihi susuɔ he wawɛɛ. Eko ɔ, mo hu o susuɔ he. Eko ɔ, o ma nyɛ ma plɛ sane bimi ɔ kikɛ: Ke nɔ ko lɛ bɔ nɔ́ tsuaa nɔ́ ɔ, lɛɛ jije Mawu hu je kɛ ba?

Je mi si kpali kplɛɛ nɔ kaa nɔ́ fɛɛ nɔ́ nɛ ngɛ je ɔ mi ɔ ngɛ e sisije. Kekleekle kuku nɛ ngɛ Baiblo ɔ mi ɔ kɛ nɔ́ nɛ je mi si kpali de ɔ kpa gbi. Lejɛ ɔ de ke: “Sisije ɔ, . . . Mawu bɔ hiɔwe kɛ zugba.”​—1 Mose 1:1.

Níhi nɛ ngɛ je ɔ mi ɔ tsuo bɛ yaka gu. Ke nɔ́ ko be ɔ, nɔ́ ko be nyɛe maa je mi kɛ ba. Ke nɔ́ ko be kɛ je sisije ɔ, mwɔnɛ ɔ, jinɛ je ɔ be. E ngɛ mi kaa wa be nyɛe maa nu nɔ́ fɛɛ nɔ́ sisi mohu lɛɛ, se ja nɔ́ ko ngɛ kekle loko ní kpahi ma nyɛ maa ba. Yehowa Mawu nɛ e ji mumi nɛ e ngɛ he wami kɛ nile ɔ ji Kekleekle Nɔ ɔ nɛ.​—Yohane 4:24.

Baiblo ɔ de ngɛ Mawu he ke: “Benɛ o ná we nɛ o bɔ yo ɔmɛ; benɛ o na we nɛ o bɔ je ɔ, mo ji Mawu nɛ ngɛ kɛ je neneene kɛ yaa si neneene.” (La 90:2) Enɛ ɔ he ɔ, “sisije ɔ,” loko Mawu maa bɔ hiɔwe kɛ zugba a, e ngɛ momoomo.​—Kpo Jemi 4:11.

w22.06 18 ¶16-17

Suɔmi Nɛ Wa Ngɛ Kɛ Ha Yehowa Yeɔ Bua Wɔ Nɛ Wa Daa Gbeye Yemi Nya

¹⁶ Satan le kaa wa wami he hia wɔ. E tsɔɔ kaa wa maa ngmɛɛ huɛ bɔmi nɛ ngɛ waa kɛ Yehowa wa kpɛti ɔ po he konɛ waa hi wami mi. (Hiob 2:4, 5) Se pi anɔkuale! Akɛnɛ Satan ji “nɔ nɛ e ma nyɛ maa gbe nɔ” he je ɔ, e bɔɔ mɔde kaa e ma ha nɛ waa ye gbenɔ gbeye konɛ waa je Yehowa se. (Heb. 2:14, 15) Be komɛ ɔ, nihi nɛ Satan ngɛ mɛ kudɔe ɔ woɔ wa he gbeye kaa ke wa ngmɛɛ we wa hemi kɛ yemi ɔ he ɔ, a maa gbe wɔ. Nɛ be komɛ hu ɔ, ke Satan na kaa hiɔ ha nɛ wa wami ya je oslaa mi, nɛ́ wa hia tsami kpatakpata a, e bɔɔ mɔde kaa e maa gu lɔ ɔ nɔ kɛ ha nɛ waa ngmɛɛ wa hemi kɛ yemi ɔ he. Dɔkitahi kɛ wa weku li nɛ a sɔmɔ we Yehowa a, ma nyɛ maa nyɛ wa nɔ kaa waa kplɛɛ nɛ a ha wɔ muɔ. Se jã peemi ma ha nɛ wa tɔ̃ Mawu mlaa a nɔ. Ni komɛ hu ma nyɛ maa wo wɔ he wami kaa wa hla hiɔ tsami blɔ nɔ tomi nɛ kɛ Baiblo sisi tomi mlaa kpa we gbi ɔ se blɔ.

¹⁷ E ngɛ mi kaa wa sume nɛ wa gbo, se ke e ba kaa wa gbo po ɔ, wa le kaa Yehowa hɛ be wa nɔ jee. (Kane Roma Bi 8:37-39.) Ke Yehowa huɛmɛ gbo ɔ, e yaa nɔ nɛ e kaiɔ mɛ kaa nɔ́ nɛ a ngɛ wami mi. (Luka 20:37, 38) E suɔ nɛ e tle mɛ si kɛ ba wami mi. (Hiob 14:15) Yehowa ngɔ nɔ́ nɛ he jua wa sã afɔle konɛ wa nyɛ nɛ wa “ná neneene wami.” (Yohane 3:16) Wa le kaa Yehowa suɔ wɔ, nɛ e susuɔ wa he wawɛɛ. Lɔ ɔ he ɔ, ke wa be he wami aloo a ngɛ wa he gbeye woe kaa a maa gbe wɔ ɔ, wa ngɔɔ wa hɛ kɛ fɔɔ Yehowa nɔ konɛ e wo wa bua nɛ e ha wɔ he wami kɛ nile, se pi nɛ wa maa je e se. Jã pɛpɛɛpɛ nɛ Valérie kɛ e huno ɔ pee.​—La 41:3.

Ngmami ɔ Mi Junehi

wp17.5 5

Anɛ O Ngɛ Bɔfo Ko Nɛ Buɔ O He Lo?

Baiblo ɔ tsɔɔ we kaa nɔ tsuaa nɔ ngɛ bɔfo pɔtɛɛ ko nɛ buɔ e he. Ngɛ anɔkuale mi ɔ, be ko ɔ, Yesu de ke: “Nyɛɛ hyɛ saminya nɛ nyɛ ko hie bimɛ tsɔwi nɛ ɔmɛ [Kristo kaseli] a ti nɔ ko. I ngɛ nyɛ dee ke, a bɔfohi nɛ ngɛ hiɔwe ɔ daa si ngɛ Tsaatsɛ nɛ ngɛ hiɔwe ɔ hɛ mi daa.” (Mateo 18:10) Ngmami nɛ ɔ tsɔɔ we kaa nɔ tsuaa nɔ ngɛ bɔfo pɔtɛɛ ko nɛ buɔ e he. Nɔ́ nɛ Yesu ngɛ tsɔɔe ji kaa, bɔfohi yeɔ bua e kaseli ɔmɛ a ti nɔ tsuaa nɔ. Enɛ ɔ he ɔ, anɔkuale jali kɛ a he wui si fɔfɔɛhi nɛ ngɛ oslaa mi kɛ yi mi tomi kaa Mawu bɔfohi maa bu a he.

Anɛ lɔ ɔ tsɔɔ kaa bɔfohi yi bua wɔ lo? Dɛbi. (La 91:11) Ni komɛ susuɔ kaa Mawu to blɔ nya konɛ bɔfohi nɛ a bu a he nɛ a kɛ blɔ tsɔɔmi nɛ ha mɛ ngɛ si fɔfɔɛ komɛ a mi. Kenneth nɛ a tu e he munyu kɛ sɛ hlami ɔ hu susu jã. Wa be nyɛe maa pee kpɛii tsɔ ngɛ munyu nɛ Kenneth tu ɔ he, eko ɔ nɔ́ nɛ e de ɔ ngɛ mi. Be babauu ɔ, Yehowa Odasefohi naa odase nɛ tsɔɔ kaa bɔfohi yeɔ bua mɛ ngɛ a fiɛɛmi ní tsumi ɔ mi. Se akɛnɛ wa nɛ bɔfohi kɛ wa hɛ ngmɛ he je ɔ, wa be nyɛe maa tsɔɔ bɔ nɛ Mawu kɛ mɛ tsuɔ ní ha kɛ yeɔ bua wɔ. Se kɛ̃ ɔ, ke wa na Ope ɔ si ngɛ yemi kɛ buami ko nɛ e kɛ ha wɔ ɔ he ɔ, wa tɔ̃ we.​—Kolose Bi 3:15; Yakobo 1:17, 18.

OCTOBER 7-13

JUETLI NƐ NGƐ MAWU MUNYU Ɔ MI | LA 92-95

Yehowa Nɛ Wa Ma Sɔmɔ ɔ Ji Nɔ́ Nɛ Hi Pe Kulaa Ngɛ Wa Si Himi Mi!

w18.04 26 ¶5

Nihewi Kɛ Yihewi, Anɛ Nyɛ Ngɔ Mawu Jami Mi Otihi Kɛ Ma Nyɛ Hɛ Mi Lo?

⁵ Kekleekle ɔ, wa ngɔɔ Mawu jami mi otihi kɛ maa wa hɛ mi ejakaa waa kɛ jã peemi tsɔɔ kaa wa bua jɔ suɔmi nɛ Yehowa ngɛ kɛ ha wɔ kɛ níhi nɛ e pee kɛ ha wɔ ɔ he. La polɔ ɔ de ke: ‘Yehowa, e hi kaa a na mo si. O ní tsumi ɔmɛ haa mi bua jɔmi; Ma la kɛ bua jɔmi ngɛ o nine nya ní tsumi ɔmɛ a he.’ (La 92:1, 4) Mo susu níhi nɛ Yehowa ha mo ɔmɛ a he nɛ o hyɛ. E ha mo wami, hemi kɛ yemi, Baiblo ɔ, asafo ɔ, kɛ hɛ nɔ kami kaa o ma ná si himi kpakpa hwɔɔ se. Ke o ha nɛ mumi mi níhi pee nɔ́ titli ngɛ o si himi mi ɔ, lɔ ɔ maa tsɔɔ kaa o bua jɔ ní kpakpa nɛ ɔmɛ nɛ Mawu ha mo ɔ a he, nɛ huɛ bɔmi nɛ ngɛ o kɛ lɛ nyɛ kpɛti ɔ mi maa wa.

w18.11 20 ¶8

Mɛnɔ Susumi Nɛ O Kɛ Ngɛ Ní Tsue?

⁸ Kaa bɔ nɛ fɔlɔ kpakpa maa pee ɔ, Yehowa hu suɔ nɛ e bimɛ nɛ a ná si himi kpakpa. (Yes. 48:17, 18) Enɛ ɔ he ɔ, e ha wɔ sisi tomi mlaahi nɛ maa ye bua wɔ konɛ wa nyɛ nɛ waa ba wa je mi ngɛ blɔ kpakpa nɔ, nɛ́ waa kɛ ni kpahi hu nɛ hi si saminya. E suɔ nɛ waa ngɔ e sisi tomi mlaa amɛ kɛ tsu ní konɛ wa susu níhi a he kaa lɛ. Enɛ ɔ tsi we he yemi nɛ wa ngɛ ɔ nya. Mohu ɔ, e haa nɛ wa susuɔ níhi a he ngɛ blɔ nɛ da nɔ. (La 92:5; Abɛ 2:1-5; Yes. 55:9) Jehanɛ hu ɔ, sisi tomi mlaa amɛ yeɔ bua wɔ nɛ wa mwɔɔ yi mi kpɔhi nɛ da, nɛ wa bua jɔɔ. (La 1:2, 3) Ee, ke wa susuɔ níhi a he kaa Yehowa a, wa ma ná he se ngɛ blɔhi fuu a nɔ!

w20.01 19 ¶18

O He Jua Wa Ha Yehowa O Mawu ɔ!

¹⁸ Ke wa ngɛ wae ɔ, wa ma nyɛ ma ná nɔ mi mami kaa loloolo ɔ, Yehowa ngɛ ní tsumi kɛ ha wɔ. (La 92:12-15) Yesu tsɔɔ wɔ kaa ní tsɔwitsɔwi nɛ wa peeɔ ngɛ Yehowa sɔmɔmi mi nɛ eko ɔ, wa naa mɛ kaa se nami be a he po ɔ, Yehowa bua jɔ he. (Luka 21:2-4) Lɔ ɔ he ɔ, moo ngɔ o juɛmi kɛ ma nɔ́ nɛ o ma nyɛ maa pee ɔ nɔ. Kaa nɔ hyɛmi nɔ́ ɔ, o ma nyɛ ma de nihi Yehowa he níhi, o ma nyɛ maa sɔle kɛ ha o nyɛmimɛ, nɛ o ma nyɛ maa wo ni kpahi he wami konɛ a ya nɔ nɛ a ye anɔkuale. Yehowa naa mo kaa o piɛɛ e he kɛ ngɛ ní tsue. Pi nɔ́ nɛ o nyɛɔ nɛ o tsuɔ ɔ nɔ nɛ e kɛ e juɛmi maa, mohu ɔ, o tsui mi nɛ o jeɔ nɛ o buɔ lɛ tue ɔ nɛ e hyɛɔ.​—1 Kor. 3:5-9.

Ngmami ɔ Mi Junehi

cl 176 ¶18

“Oo Ní Babauu Nɛ Mawu Ngɛ ɔ, Kɛ E Juɛmi ɔ Mi Kuɔ Wawɛɛ Nitsɛ!”

¹⁸ Hyɛ bɔ nɛ bɔfo Paulo kale bɔ nɛ Yehowa juɛmi ɔ ngɛ slɔɔto ha a. E de ke: “Oo ní babauu nɛ Mawu ngɛ ɔ, kɛ e juɛmi ɔ, kɛ e nile ɔ mi kuɔ wawɛɛ nitsɛ! A be nyɛe ma hla e kojomi ɔmɛ a mi, nɛ e blɔ ɔmɛ hu, a be nyɛe hiɔmi!” (Roma Bi 11:33) Munyu nɛ ji “Oo” nɛ Paulo kɛ je e munyu ɔ sisi ɔ tsɔɔ he numi ko nɛ e ná ngɛ nɔ́ nɛ e ngɛ de ɔ he, enɛ ɔ tsɔɔ kaa e ngɛ bu nɛ mi kuɔ kɛ ha Yehowa. Hela munyungu nɛ bɔfo Paulo kɛ tsu ní kɛ ha bɔ nɛ Yehowa nile ɔ “mi kuɔ” ha a kɛ “muɔ voo” ɔ ngɛ tsakpa. E munyu ɔ haa nɛ wa nyɛ poɔ nɔ́ nɛ ɔ he foni ngɛ wa juɛmi mi. Ke wa susu Yehowa nile ɔ he ɔ, e ngɛ kaa nɔ́ nɛ wa ma wa yi si kɛ ngɛ muɔ voo ko nɛ e mi bli nɛ be nyagbe ɔ mi hyɛe, nɛ akɛnɛ wa be nyɛe maa nu sisi he je ɔ, wa be nyɛe maa tsɔɔ nya hulɔ. (La 92:5) Anɛ susumi nɛ ɔ ha we nɛ waa ba wa he si lo?

OCTOBER 14-20

JUETLI NƐ NGƐ MAWU MUNYU Ɔ MI | LA 96-99

“Jaje Sane Kpakpa a”!

w11 3/1 6 ¶1-2

Mɛni Ji Sane Kpakpa a?

E sa nɛ Kristofohi nɛ a fiɛɛ “sane kpakpa nɛ kɔɔ Matsɛ Yemi ɔ he ɔ” kɛ ha ni kpahi, nɛ a de mɛ kaa Matsɛ Yemi nɛ ɔ ji nɔ yemi nɛ e kɛ anɔkuale yemi maa ye je ɔ tsuo nɔ hwɔɔ se. A kɛ munyungu nɛ ji “sane kpakpa” a tsu ní ngɛ blɔ slɔɔtohi a nɔ ngɛ Baiblo ɔ mi. Kaa nɔ hyɛmi nɔ́ ɔ, ngmami ɔ tu “yi wami hemi ɔ he sane kpakpa a” (La 96:2); “Mawu sane kpakpa a” (Ro 15:16); kɛ “sane kpakpa nɛ kɔɔ Yesu Kristo ɔ he” ɔ he munyu​—Mak 1:1.

Ngɛ e kpiti pomi mi ɔ, sane kpakpa a kɔɔ níhi tsuo nɛ Yesu de nɛ e kaseli ɔmɛ ngma a he. Loko Yesu maa kuɔ kɛ ho hiɔwe ya a, e de e se nyɛɛli ɔmɛ ke: “Enɛ ɔ he ɔ, nyɛɛ ya nɛ nyɛ ya pee nihi nɛ a ngɛ je ma amɛ tsuo a mi ɔ ye kaseli, nyɛɛ baptisi mɛ ngɛ Tsɛ ɔ biɛ mi, ngɛ Bi ɔ biɛ mi, kɛ ngɛ mumi klɔuklɔu ɔ biɛ mi, nyɛɛ tsɔɔ mɛ nɛ a ye níhi tsuo nɛ i fã nyɛ ɔmɛ a nɔ.” (Mateo 28:19, 20) Lɔ ɔ, kaa anɔkuale Kristofohi ɔ, pi nɛ wa maa tu Matsɛ Yemi ɔ he munyu kɛ tsɔɔ nihi pɛ kɛkɛ, mohu ɔ, e sa nɛ wa kɛ pee oti kaa wa maa pee mɛ kaseli.

w12 10/1 16 ¶1

Mɛni Maa Ba Ngɛ Kojomi Ligbi ɔ Nɔ?

Nihi fuu susuɔ kaa ngɛ Kojomi Ligbi ɔ nɔ ɔ, a maa ngɔ susumahi ayɔ akpehi abɔ kɛ ya da Mawu matsɛ sɛ ɔ hɛ mi konɛ e kojo mɛ ngɛ níhi nɛ a pee kɛ be ɔ a he. E ma ha nɛ ni komɛ maa ya hiɔwe nɛ e ma pii ni komɛ hu ngɛ hɛl la mi. Se Baiblo ɔ tsɔɔ kaa yi mi tomi heje nɛ Mawu ma ha nɛ Kojomi Ligbi ɔ maa ba ngɛ ɔ ji, nɛ́ e kɛ ba kpɔ nihi nɛ a ngɛ mɛ níhi nɛ sɛ pee ɔ. (La 96:13) Mawu hla Yesu kaa kojolɔ konɛ e dla níhi kɛ ha adesahi ekohu.​—Kane Yesaya 11:1-5; Bɔfo Ɔmɛ A Nítsumi 17:31.

w12 9/15 12 ¶18-19

Tue Mi Jɔmi Nɛ Maa Hi Si Jeha Akpe Kɛ Se!

¹⁸ Kake peemi nɛ ngɛ Mawu weku ɔ mi ɔ puɛ benɛ Satan sisi adesahi nɛ a tsɔ atua kɛ si Yehowa nɔ yemi ɔ. Kɛ je 1914 kɛ ma nɛ ɔ, Mesia Matsɛ Yemi ɔ ngɛ níhi dlae bɔɔbɔɔbɔɔ konɛ e kɛ ha nɛ kake peemi nɛ ɔ nɛ hi si ekohu. (Efe. 1:9, 10) Ngɛ Jeha Akpe Nɔ Yemi ɔ mi ɔ, nyakpɛ níhi nɛ wa “nɛ” mwɔnɛ ɔ maa ba mi nitsɛnitsɛ. Lɔ ɔ se ɔ, Kristo Jeha Akpe Nɔ Yemi ɔ maa ba “nyagbe.” Se mɛni maa ba ngɛ lɔ ɔ se? E ngɛ mi kaa a ngɔ “he blɔhi tsuo nɛ ngɛ hiɔwe kɛ zugba a nɔ ɔ kɛ ha” Yesu mohu lɛɛ, se e wo we e he nɔ. E pee we lɛ kaa e kpɔ he blɔ nɛ Yehowa ngɛ ɔ ngɛ e dɛ. Yesu maa je he si bami mi nɛ e maa “ngɔ matsɛ yemi ɔ kɛ ha e Mawu nɛ ji e Tsɛ ɔ.” E maa ngɔ he blɔ kɛ he wami nɛ e ngɛ ɔ kɛ “wo Mawu hɛ mi nyami.”​—Mat. 28:18; Filip. 2:9-11.

¹⁹ Ngɛ jamɛ a be ɔ mi ɔ, Matsɛ Yemi ɔ sisi bimɛ nɛ a ngɛ zugba a nɔ ɔ maa ye mluku. A maa kase Yesu nɔ hyɛmi nɔ́ ɔ, nɛ a maa je suɔmi mi kɛ ba a he si kɛ ha Yehowa kaa a nɔ yelɔ. A maa pee nɔ́ fɛɛ nɔ́ nɛ a ma nyɛ kɛ po nyagbe ka a kɛ tsɔɔ kaa a suɔ nɛ Mawu nɛ ye a nɔ. (Kpoj. 20:7-10) Lɔ ɔ se ɔ, a ma kpata bɔfohi kɛ adesahi tsuo nɛ a ji atuã tsɔli ɔ a hɛ mi kɛ ya neneene. Hyɛ bɔ nɛ jamɛ a be ɔ maa pee bua jɔmi kɛ nyami be ha! Yehowa weku nɛ ngɛ hiɔwe kɛ zugba a nɔ ɔ tsuo kɛ bua jɔmi ma je nɔ nɛ e ma plɛ “níhi tsuo kɛ ha nɔ fɛɛ nɔ ɔ” yi.​—Kane La 99:1-3.

Ngmami ɔ Mi Junehi

it-2 994

La

Pi la womi ɔ mi pɛ nɛ a tu “la ehe ɔ” he munyu ngɛ, mohu ɔ, Yesaya kɛ bɔfo Yohane hu tu he munyu. (La 33:3; 40:3; 96:1; 98:1; 144:9; 149:1; Yes 42:10; Kpj 5:9; 14:3) Ke wa hyɛ hehi nɛ a kɛ munyu nɛ ji “la ehe” ɔ tsu ní ngɛ ɔ, e haa nɛ wa naa kaa, a la la nɛ ɔ akɛnɛ Yehowa ngɔ he blɔ nɛ e ngɛ kaa je ɔ tsuo nɔ yelɔ ɔ kɛ ngɛ tsakemi ehehi pee ɔ he je. Kaa bɔ nɛ La 96:10 tsɔɔ ɔ: a la kɛ bua jɔmi ejakaa “Yehowa ba pee matsɛ.” Ní ehehi nɛ Yehowa gu e matsɛ yemi ɔ nɔ kɛ ngɛ a he ní tsue, kɛ bɔ nɛ lɔ ɔ kɔɔ hiɔwe kɛ zugba a he ha a, ba pee nɔ́ titli nɛ “la ehe” nɛ ɔ tu he munyu.​—La 96:11-13; 98:9; Yes 42:10, 13.

OCTOBER 21-27

JUETLI NƐ NGƐ MAWU MUNYU Ɔ MI | LA 100-102

Mo Je Hɛ Sa Kpo Ngɛ Yehowa Suɔmi Nɛ Ngɛ Daa a He

w23.03 12 ¶18-19

Bɔ Nɛ O Ma Plɛ Kɛ Dla O He Kɛ Ha Baptisimi

¹⁸ Suɔmi nɛ o ngɛ kɛ ha Yehowa a he hia wawɛɛ. Baiblo ɔ de ke: “Koo ngmɛɛ suɔmi nɛ se pui kɛ anɔkuale yemi he. Moo fĩ mɛ kɛ wo o kuɛ; Ngmaa kɛ fɔ o tsui nɔ.” (Abɛ 3:3, NW; kane Abɛ 3:4-6.) Ke o suɔ Yehowa wawɛɛ ɔ, e maa ye bua mo konɛ o da nyagbahi nɛ o kɛ ngɛ kpee ɔ nya. Baiblo ɔ pɔɔ suɔmi nɛ se pui nɛ Yehowa ngɛ kɛ ha e sɔmɔli ɔ he munyu tumi. Suɔmi nɛ se pui nɛ Yehowa ngɛ ɔ tsɔɔ kaa e be e sɔmɔli kuae gblegbleegble. (La 100:5) Mawu bɔ mo kaa bɔ nɛ e ngɛ ɔ. (1 Mose 1:26) Mɛni blɔ nɔ wɔ hu wa maa gu kɛ je suɔmi kaa jã a kpo?

¹⁹ Kekleekle ɔ, mo je hɛ sa kpo. (1 Tɛs. 5:18) Daa ligbi ɔ, mo bi o he ke, ‘Mɛni blɔ nɔ Yehowa gu kɛ je suɔmi kpo kɛ tsɔɔ mi?’ Lɔ ɔ se ɔ, moo sɔle nɛ o na Yehowa si, nɛ o tu ní pɔtɛɛ komɛ nɛ e pee ha mo ɔ a he munyu. Ke Yehowa pee nɔ́ ko ha mo ɔ, ha nɛ e hi o juɛmi mi kaa suɔmi nɛ e ngɛ ha mo ɔ he je nɛ e pee jamɛ a nɔ́ ɔ ha mo ɔ nɛ. Bɔfo Paulo hu yɔse jã ngɛ Yehowa he. (Kane Galatia Bi 2:20.) Mo bi o he ke, ‘Anɛ imi hu i suɔ nɛ ma je suɔmi kpo kɛ tsɔɔ Yehowa lo? Suɔmi nɛ o ngɛ kɛ ha Yehowa a maa ye bua mo konɛ o ya nɔ nɛ o da kahi nɛ o kɛ ngɛ kpee ɔ nya, nɛ o fĩ si. E maa wo mo he wami nɛ o ya nɔ nɛ o sɔmɔ Yehowa daa ligbi, nɛ o pee níhi nɛ tsɔɔ kaa o suɔ lɛ.

w23.02 17 ¶10

“Nyɛ Hɛ Mi Nɛ Ka Si, Nɛ Nyɛɛ Hwɔɔ!”

¹⁰ Ní peepee komɛ ngɛ nɛ e sa kaa wa kua. Ní nɛ ɔmɛ ekomɛ ji ní peepeehi nɛ ma ha nɛ nɔ ko ma susu kaa o suɔ nɛ o kɛ lɛ nɛ sɛ gba si himi mi, ní nɛ a yeɔ kɛ beɔ nɔ, dã nɛ a nuɔ kɛ beɔ nɔ, munyu nɛ yeɔ nɔ awi tumi, hɛja jemi nɛ yi wu tso ní peepee ngɛ mi, bɔmi nami he foni loo video hyɛmi kɛ ekpahi. (La 101:3) Wa he nyɛlɔ Abosiami ngɛ hlae nɛ e kɛ puɛ huɛ bɔmi nɛ ngɛ waa kɛ Yehowa wa kpɛti ɔ be fɛɛ be. (1 Pet. 5:8) Ke wa hyɛ we nɛ hi ɔ, Satan ma nyɛ ma ha nɛ hɛkɔ, lakpa yemi, hunga jemi, ninyɛ, he nɔ womi kɛ abofu ma he si ngɛ wa tsui mi. (Gal. 5:19-21) Eko ɔ, sisije ɔ, wa ma susu kaa su nɛ ɔmɛ be wɔ awi yee, se ke wa bɔɛ mɔde nɛ wa je su nɛ ɔmɛ ngɛ wa mi ɔ, e maa wa ngɛ wa mi, nɛ e maa ye wɔ awi.​—Yak. 1:14, 15.

w11 7/15 16 ¶7-8

Anɛ O Maa Bu Yehowa Kɔkɔ Bɔmihi Nɛ A Ngɛ Heii ɔ Tue lo?

⁷ Mɛni wa ma nyɛ maa pee konɛ waa yu wa he ngɛ lakpa tsɔɔli a he? Wa ha we nɛ a ba wa we ɔmɛ a mi kaa a ma wɔ ní tsɔɔmi, nɛ waa kɛ mɛ bla we kɛ pee nɔ́ ko. Wa kane we a womi ɔmɛ nɛ wa hyɛ we níhi nɛ a peeɔ ngɛ a jami mi nɛ a jeɔ ngɛ tiivihi a nɔ ɔ hulɔ. Jehane se hu ɔ, wa yɛ a wɛbsaiti ɔmɛ a nɔ, nɛ ke a kɛ nɔ́ ko fɔ intanɛti ɔ nɔ hu ɔ, wa ngmɛ nɔ́ ko ngɛ he. Mɛni he je nɛ wa mwɔ yi mi kpɔ nɛ ɔ? Akɛnɛ wa ngɛ suɔmi ɔ he je. Wa suɔ “anɔkuale Mawu ɔ” enɛ ɔ he je ɔ, wa bui munyu kpɛ̃kpɛ̃ɛhi nɛ teɔ si kɛ woɔ Baiblo ɔ nɛ ji anɔkuale Munyu ɔ tue. (La 31:5; Yoh. 17:17) Wa suɔ Yehowa asafo ɔ, ejakaa kɛ gu e nɔ nɛ wa ba kase anɔkualehi nɛ haa nɛ nɔ tsui nɔɔ e mi. Anɔkuale nɛ ɔmɛ ji: Yehowa biɛ ɔ kɛ nɔ́ nɛ e tsɔɔ, Mawu yi mi tomi kɛ ha zugba a, si fɔfɔɛ mi nɛ gbogboe ɔmɛ ngɛ kɛ hɛ nɔ kami kaa a ma tle nihi nɛ a gbo ɔ si. Anɛ o kai bɔ nɛ o nu he ha benɛ o ba kase anɔkuale nɛ ɔmɛ kɛ anɔkuale kpahi nɛ a he jua wa a he ní ɔ lo? Lɛɛ, mɛni he je mɔ nɛ e sa kaa o ngmɛ blɔ nɛ nɔ ko nɛ gbe asafo nɛ kɛ gu e nɔ ɔ o ba kase anɔkuale nɛ ɔmɛ a he ní ɔ he guɛ ha mo ɔ?​—Yoh. 6:66-69.

⁸ Nɔ́ fɛɛ nɔ́ nɛ lakpa tsɔɔli ma de ɔ, wa be mɛ tue bue! Mɛni he je nɛ e sa kaa o ha nɛ nihi nɛ a li anɔkuale ɔ he nɔ́ ko ɔ nɛ a sisi mo nɛ a wo o kɔni mi nyu ɔ? Lɛɛ, nyɛ ha nɛ waa ya nɔ nɛ waa fia wa pɛɛ si kaa waa kɛ Yehowa kɛ e we asafo ɔ maa nyɛɛ daa. Jehahi babauu ji nɛ ɔ nɛ asafo ɔ gu Mawu Munyu ɔ nɛ a je mumi mi kɛ ngma a nɔ kɛ gbe anɔkuale ɔ he kuma nɛ ngɛ wɔ yee ɔ.​—Yes. 55:1-3; Mat. 24:45-47.

Ngmami ɔ Mi Junehi

w14 03/1 16 ¶ 20

Yaa Nɔ Nɛ O Ná Bua Jɔmi Ngɛ Yehowa Sɔmɔmi Mi

²⁰ Se kɛ̃ ɔ, la polɔ ɔ nyɛ nɛ e je Yehowa yi. (Kane La 102:19-21.) Kaa bɔ nɛ wa na ngɛ La 102 ɔ mi ɔ, nihi nɛ a ngɛ hemi kɛ yemi ɔ mi ɔ po ma nyɛ maa na nɔ́, nɛ a be nyɛe ma susu nɔ́ kpa ko he hu. La polɔ ɔ susu kaa e “pee kaa lohwe pɛlitsɛ kake too nɛ maa si ngɛ tsu yi mi.” E susu kaa haomihi pɛ lɛ bɔle lɛ. (La 102:7) Ke o susu jã a, moo je o tsui mi nɛ o sɔle kɛ ha Yehowa kaa bɔ nɛ la polɔ ɔ pee ɔ. Sɔlemi nɛ o maa sɔle ɔ ma nyɛ maa ye bua mo konɛ o ná bua jɔmi ngɛ Mawu sɔmɔmi mi. Yehowa wo si kaa “e maa bu e nihi nɛ e kua mɛ ɔ a kue fami ɔ tue, nɛ e maa pee a hiami níhi ha mɛ.” (La 102:17) O kɛ o hɛ nɛ fɔ si womi nɛ ɔ nɔ.

OCTOBER 28–NOVEMBER 3

JUETLI NƐ NGƐ MAWU MUNYU Ɔ MI | LA 103-104

“E Kaiɔ Kaa Zu Ji Wɔ”

w23.07 21 ¶5

Moo Kase Yehowa​—Koo Pee Kpɛii

⁵ Akɛnɛ Yehowa baa e he si nɛ e mi mi sãa lɛ ngɛ wa he he je ɔ, e nuɔ nɔ́ sisi nɛ e pee we kpɛii. Kaa nɔ hyɛmi nɔ́ ɔ, wa naa bɔ nɛ Yehowa baa e he si ha benɛ e piɛ bɔɔ nɛ e ma kpata yiwutsotsɛmɛ nɛ a ngɛ Sodom ma a mi ɔ a hɛ mi ɔ. E gu bɔfo ko nɔ nɛ e kɛ blɔ tsɔɔmi ha Lot nɛ ji dalɔ ɔ kaa e tu fo kɛ ho yoku ɔmɛ a nɔ ya. Lot ye gbeye kaa e maa ya lejɛ ɔ, lɔ ɔ he ɔ, e kpa Yehowa pɛɛ kaa e ha nɛ e kɛ e weku ɔ nɛ ya sa we ngɛ Zoar, nɛ ji ma nyafii ko nɛ a ma kpata e hɛ mi kɛ piɛɛ Sodom he ɔ. Yehowa ko nyɛ de Lot kaa e sa nɛ e kɛ e blɔ tsɔɔmi ɔmɛ nɛ tsu ní pɛpɛɛpɛ. Se e pee we jã, mohu ɔ, Yehowa ha nɛ Lot ho Zoar ma a mi ya, nɛ e kpataa we Zoar ma a hɛ mi. (1 Mose 19:18-22) Jeha komɛ a se ɔ, Yehowa mi mi sã lɛ ngɛ nihi nɛ a ngɛ Nineve ma a mi ɔ a he. E tsɔ gbalɔ Yona kaa e ya de yiwutsotsɛmɛ nɛ a ngɛ Nineve ma a mi ɔ kaa e ma kpata a kɛ a ma a tsuo hɛ mi. Se benɛ Nineve bi ɔmɛ tsake a tsui ɔ, Yehowa nu he kɛ ha mɛ nɛ e kɛ a tɔ̃mi ɔ ke mɛ nɛ e kpataa we ma a hɛ mi.​—Yona 3:1, 10; 4:10, 11.

w23.09 6-7 ¶16-18

Ngɔɔ O Hɛ Kɛ Fɔ Yehowa Nɔ Kaa Bɔ Nɛ Samson Pee ɔ

¹⁶ E ngɛ mi kaa Samson na nɔ́ nɛ e pee ɔ mi nɔ́ mohu lɛɛ, se e bɔ mɔde kaa e maa ya nɔ maa pee Yehowa suɔmi nya ní. Ke wa tɔ̃ tɔmi ko nɛ a kã wa hɛ mi loo he blɔ ko nɛ wa ngɛ ɔ je wa dɛ ɔ, e sɛ nɛ wa kɔni mi nɛ jɔ̃. E sa nɛ wa kai kaa Yehowa pee klaalo kaa e kɛ wa tɔmi ɔ maa ke wɔ. (La 103:8-10) E ngɛ mi kaa wa tɔ̃ɔ mohu lɛɛ, se Yehowa ma nyɛ maa wo wɔ he wami konɛ waa pee e suɔmi nya ní kaa bɔ nɛ e pee ha Samson ɔ.

¹⁷ Mo susu nyɛminyumu wayoo ko nɛ a tsɛɛ lɛ ke Michael ɔ nɔ hyɛmi nɔ́ ɔ he nɛ o hyɛ. Michael tsuɔ babauu ngɛ Yehowa sɔmɔmi mi, nɛ e sɔmɔɔ kaa asafo mi sɔmɔlɔ kɛ daa blɔ gbalɔ. Se aywilɛho sane ji kaa e tɔ̃ tɔmi ko nɛ lɔ ɔ ha nɛ he blɔhi nɛ e ngɛ ngɛ asafo ɔ mi ɔ je e dɛ. E de ke, “Loko ma tɔ̃ tɔmi nɛ ɔ, i kɛ hɛdɔ tsuɔ ye blɔ nya ní tsumihi a he ní ngɛ asafo ɔ mi. Kɛkɛ nɛ si kake too ɔ, i nu he kaa i be nyɛe ma pee nɔ́ ko ngɛ Yehowa sɔmɔmi mi hu. I le kaa Yehowa be mi kuae mohu lɛɛ, se i biɔ ye he ke ji huɛ bɔmi kpakpa ma nyɛ maa hi i kɛ Yehowa wa kpɛti ekohu kaa bɔ nɛ e ji be ko nɛ be ɔ, aloo ke ma nyɛ ma je ye tsui tsuo mi kɛ sɔmɔlɔ lɛ ngɛ asafo ɔ mi kaa bɔ nɛ i pee be ko nɛ be ɔ lo.”

¹⁸ Ngɛ anɔkuale mi ɔ, Michael kɔni mi jɔ̃ we. E de ke: “Akɛnɛ i suɔ nɛ huɛ bɔmi kpakpa nɛ hi i kɛ Yehowa wa kpɛti he je ɔ, i sɔleɔ kɛ jeɔ ye tsui mi, i kaseɔ ní, nɛ i pueɔ ye yi mi tɛ ngɛ níhi nɛ i kaseɔ ɔ he be fɛɛ be.” Pee se ɔ, Michael ba ná he blɔ ngɛ asafo ɔ mi ekohu. Amlɔ nɛ ɔ, e ngɛ sɔmɔe kaa asafo mi nɔkɔtɔma kɛ daa blɔ gbalɔ. E de ke: “Nyɛmimɛ ɔmɛ ye bua mi nɛ a wo mi he wami. Jehanɛ hu ɔ, yemi kɛ buami nɛ asafo mi nikɔtɔma amɛ kɛ ha mi ɔ ha nɛ i na kaa Yehowa suɔ mi loloolo. Amlɔ nɛ ɔ, i kɛ he nile kpakpa ngɛ sɔmɔe ngɛ asafo ɔ mi. Ye níhi a si kpami ɔ ha nɛ i na kaa ke nɔ ko tɔ̃ nɛ e tsake e tsui niinɛ ɔ, Yehowa maa ngɔ kɛ ke lɛ.” Ke wa tɔ̃ tɔmi komɛ nɛ wa bɔ mɔde nɛ wa dla wa blɔ ɔmɛ nɛ wa ngɔ wa hɛ kɛ fɔ Yehowa nɔ ɔ, wa ma nyɛ ma ná nɔ mi mami kaa Yehowa kɛ wɔ ma tsu ní nɛ e maa jɔɔ wɔ wawɛɛ.​—La 86:5; Abɛ 28:13.

w23.05 26 ¶2

O Ma Nyɛ Maa Su Mumi Mi Otihi Nɛ O Kɛ Ma O Hɛ Mi ɔ He

² Ke o kɛ oti ko ma o hɛ mi, se loloolo ɔ, o sui he ɔ, o kɔni mi nɛ ko jɔ̃. Ngɛ anɔkuale mi ɔ, loko nɔ ko ma nyɛ maa su oti nyafii ko he po ɔ, e heɔ be nɛ e biɔ mɔde bɔmi hulɔ. Akɛnɛ loloolo ɔ, o suɔ nɛ o su oti nɛ o kɛ ma o hɛ mi ɔ he he je ɔ, lɔ ɔ tsɔɔ kaa huɛ bɔmi kpakpa nɛ ngɛ o kɛ Yehowa nyɛ kpɛti ɔ he hia mo, nɛ o suɔ nɛ o sɔmɔ lɛ kɛ o tsui tsuo. Yehowa bua jɔɔ mɔde nɛ o ngɛ bɔe ɔ he wawɛɛ. Ngɛ anɔkuale mi ɔ, Yehowa hyɛ we blɔ kaa o pee nɔ́ ko nɛ o be nyɛe maa pee. (La 103:14; Mika 6:8) Lɔ ɔ ke o suɔ nɛ o ngɔ oti ko kɛ ma o hɛ mi ɔ, e sa nɛ e pee oti nɛ o ma nyɛ maa su he. Ke o kɛ oti ko ma o hɛ mi ɔ, mɛni o ma nyɛ maa pee konɛ o nyɛ nɛ o su he? Nyɛ ha nɛ wa susu ní komɛ nɛ maa ye bua wɔ ɔ he.

Ngmami ɔ Mi Junehi

cl 55 ¶18

He Wami Nɛ A Kɛ Bɔ Níhi​—“Hiɔwe Kɛ Zugba Bɔlɔ”

¹⁸ Mɛni wa kaseɔ kɛ jeɔ Yehowa he wami nɛ e kɛ bɔ níhi ɔ mi? Wa nya kpɛɛɔ wa he wawɛɛ ke wa na ní slɔɔtoslɔɔtohi nɛ e bɔ ɔ. La polɔ ko de ke: “Oo Yehowa, hyɛ bɔ nɛ o ní tsumi ɔmɛ hiɛ ha! . . . Zugba a hyi tɔ kɛ níhi nɛ o pee.” (La 104:24) Munyu nɛ ɔmɛ ji anɔkuale! Je mi si kpali ba na kaa adebɔ níhi nɛ wami ngɛ a mi slɔɔtoslɔɔtohi nɛ a hiɛ pe ayɔhi abɔ nɛ a ngɛ zugba a nɔ; se kɛ̃ ɔ, a kpɛti ni komɛ susu kaa adebɔ ní henɔ slɔɔto ayɔhi abɔ ngɛ nɛ a li. Be komɛ ɔ, adesa ní tɛnilɔ ko naa kaa ga nɛ e ngɛ nɛ e kɛ tɛniɔ ní ɔ nya taa, se Yehowa lɛɛ, he wami nɛ e ngɛ nɛ e kɛ bɔɔ níhi kɛ nɔ́ nɛ e kɛ maa bɔ ní hehi kɛ ní slɔɔtoslɔɔtohi ɔ nya tɛ̃, nɛ e nya be tae gblegbleegble.