1925​—Jeha Lafa Nɛ Be ɔ

NÍHI NƐ A HYƐ BLƆ Ɔ BƐ MI

Baiblo Kaseli ɔmɛ a ti nihi fuu susu kaa zugba a ma plɛ pee Paradeiso ngɛ jeha 1925 ɔ mi. Mɛni he je? Nyɛminyumu Albert Schroeder nɛ pee se ɔ, e ba sɔmɔ kaa Blɔ Tsɔɔmi Ajla Toli ɔmɛ a kpɛti nɔ kake ɔ tsɔɔ nya ke: “Wa he ye kaa ngɛ jeha 1925 ɔ mi ɔ, a maa ngɔ nihi nɛ a pɔ mɛ nu nɛ a piɛ ngɛ zugba a nɔ ɔ kɛ ho hiɔwe ya, nɛ a ma tle nyumuhi anɔkualetsɛmɛ komɛ kaa Abraham kɛ David kɛ ni kpahi si konɛ a ba pee ganɔhi ngɛ zugba a nɔ ngɛ Mawu Matsɛ Yemi ɔ sisi.” Se benɛ be ngɛ mi pue ɔ, ní nɛ ɔmɛ nɛ a ngɛ blɔ hyɛe ɔ ya bɛ mi. Enɛ ɔ ha nɛ nyɛmimɛ ɔmɛ a ti ni komɛ a kɔni mi jɔ̃.—Abɛ 13:12.

E ngɛ mi kaa nyɛmimɛ ɔmɛ a ti ni komɛ a kɔni mi jɔ̃ mohu lɛɛ, se kɛ̃ ɔ, Baiblo kaseli ɔmɛ a kpɛti nihi fuu ya nɔ nɛ a fiɛɛ. A yɔse kaa e he hia nɛ a ngɔ a juɛmi kɛ ma Yehowa he odase nɛ a maa ye ɔ nɔ wawɛɛ. Kaa nɔ hyɛmi nɔ́ ɔ, nyɛ ha nɛ waa hyɛ bɔ nɛ Baiblo Kaseli ɔmɛ gu radio nɔ kɛ ye nihi babauu odase ha.

BAIBLO KASELI ƆMƐ MA RADIO STATION FUU

Ngɛ jeha 1924 ɔ mi ɔ, nihi fuu bu WBBR radio station ɔ tue. Enɛ ɔ he ɔ, ngɛ jeha 1925 ɔ mi ɔ, Baiblo Kaseli ɔmɛ ma radio station kpa ko nɛ́ kle wawɛɛ ngɛ Chicago, ngɛ Illinois kasa nya. Radio station ehe nɛ ɔ biɛ ji, WORD. Nyɛminyumu Ralph Leffler nɛ e piɛɛ nihi nɛ a ma radio station nɛ ɔ he ɔ tsɔɔ kaa ke e su fĩɛ be mi ɔ, nihi babauu nɛ a ngɛ hehi nɛ a kɛ wawɛɛ ɔ buɔ radio station nɛ ɔ tue gbɔkuɛ. Kaa nɔ hyɛmi nɔ́ ɔ, weku ko nɛ a ngɛ ma nɛ ji Pilot Station nɛ ngɛ Alaska a kɛ radio station nɛ ɔ he kɛmi maa su si tomi 3,000 kɛ se. Weku nɛ ɔ bu kekleekle ní peemihi nɛ ya nɔ ngɛ radio nɛ ɔ nɔ ɔ a kpɛti kake tue. Pee se ɔ, weku nɛ ɔ ngma sɛ womi kɛ ya ha nihi nɛ a ngɛ ní tsue ngɛ lejɛ ɔ kɛ na mɛ si. A tsɔɔ kaa nɔ́ nɛ a bu tue ɔ wo mɛ he wami, nɛ e ye bua mɛ nɛ a kase Baiblo ɔ kɛ Yehowa he ní babauu.

December 1, 1925 Blɛfo gbi Hwɔɔmi Mɔ ɔ tsɔɔ nɔ́ he je nɛ nihi babauu nyɛɔ nɛ a buɔ radio station nɛ ɔ tue ngɛ hehi nɛ a kɛ wawɛɛ ɔ. E de ke: “Radio station nɛ ɔ piɛɛ radio station kpahi nɛ a kle wawɛɛ ngɛ United States ɔ he. Nihi nɛ a ngɛ United States puje he blɔ kɛ pusinɔ he blɔ ɔ tsuo nyɛɔ nɛ a buɔ radio station nɛ ɔ tue. Nɛ jã kɛ̃ nɛ e ji ngɛ nihi nɛ a ngɛ Cuba kɛ Alaska woyi je tsitsaa a hu a blɔ fa mi. Nihi fuu nɛ a nui anɔkuale ɔ he hyɛ po ɔ suɔ nɛ a kase babauu akɛnɛ a buɔ radio station nɛ ɔ tue ɔ he je.”

Ngɛ jamɛ a be ɔ mi nɔuu ɔ, Baiblo Kaseli ɔmɛ suɔ nɛ a gu radio station nɔ kɛ fiɛɛ sane kpakpa a ngɛ Canada hulɔ. Enɛ ɔ he ɔ, ngɛ jeha 1924 ɔ mi ɔ, a ma radio station kpa ko hu ngɛ Saskatoon nɛ ngɛ Saskatchewan ɔ. E biɛ ji CHUC. Radio station nɛ ɔ piɛɛ kekleekle radio station kpahi nɛ a pee ngɛ Canada, nɛ a tuɔ jami he munyu ngɛ nɔ ɔ he. Ngɛ jeha 1925 ɔ mi ɔ, a na kaa e he ba hia nɛ a je radio station nɛ ɔ kɛ ya he kpa. Enɛ ɔ he ɔ, asafo ɔ ya he tsu momo ko ngɛ Saskatoon nɛ a dla lɛ, nɛ lɔ ɔ se ɔ, a je CHUC radio station ɔ kɛ ho lejɛ ɔ ya.

Kɛ gu radio station nɛ ɔ nɔ ɔ, nihi babauu nɛ a ngɛ mahi nɛ nihi bɔɔ ko pɛ lɛ a ngɛ mi, kɛ kɔpehi nɛ a ngɛ Saskatchewan nɛ a nui sane kpakpa a gblee ɔ po nu sane kpakpa a he. Kaa nɔ hyɛmi nɔ́ ɔ, yo ko nɛ e ngɛ ma ko nɛ tsɔ e he banee ɔ mi ɔ bu ní peemi ko nɛ ya nɔ ngɛ radio station nɛ ɔ nɔ ɔ tue, nɛ pee se ɔ, e ngma sɛ womi kɛ bi kaa a ba ha lɛ Baiblo kasemi womi. Nyɛminyumu George Naish de ke, “Bɔ nɛ yo ɔ ngma kɛ bi yemi kɛ buami ngɛ sɛ womi ɔ mi ɔ ha nɛ wa na kaa e ngɛ womi ɔ blɔ hyɛe amlɔ nɔuu! Enɛ ɔ he ɔ, wa ngɔ Studies in the Scriptures womi ɔ tsuo kɛ mane lɛ.” E kɛ we nɛ yo nɛ ɔ bɔni Matsɛ Yemi ɔ he sɛ gbi ɔ fiɛɛmi kɛ ya su he kpahi.

WA BA LE ANƆKUALE KO NƐ HE HIA

Munyu ko nɛ e he hia wawɛɛ ngɛ March 1, 1925 Blɛfo gbi Hwɔɔmi Mɔ ɔ mi. Munyu ɔ yi ji: “Birth of the Nation.” Mɛni he je nɛ munyu nɛ ɔ he hia wawɛɛ ɔ? Baiblo Kaseli ɔmɛ kase kaa Satan ngɛ blɔ nya tomi ko, nɛ nihi nɛ a ngɛ blɔ nya tomi nɛ ɔ mi ji, daimonio ɔmɛ, lakpa jami, ma kudɔmi kuuhi, kɛ je nɛ ɔ mi jua yemi kuuhi. Se ngɛ Hwɔɔmi Mɔ ɔ mi ɔ, “tsɔlɔ anɔkualetsɛ kɛ ní lelɔ” ɔ ye bua nyɛmimɛ ɔmɛ nɛ a na kaa Yehowa hu ngɛ blɔ nya tomi ko, nɛ nihi nɛ a ngɛ blɔ nya tomi nɛ ɔ mi ɔ ji e sɔmɔli nɛ a ngɛ hiɔwe kɛ zugba a nɔ ɔ. A peeɔ kake kɛ tsuɔ ní kɛ fĩɔ Yehowa se, nɛ a hwuɔ kɛ siɔ Satan kɛ e blɔ nya tomi ɔ. (Mat. 24:45) Jehanɛ hu ɔ, tsɔlɔ anɔkualetsɛ ɔ tsɔɔ kaa ngɛ jeha 1914 ɔ mi ɔ, a to Mawu Matsɛ Yemi ɔ sisi, nɛ “ta fɛ ngɛ hiɔwe,” nɛ a sake Satan kɛ e daimonio ɔmɛ kɛ je hiɔwe kɛ ba zugba a nɔ.—Kpoj. 12:​7-9.

E he wa ha Baiblo Kaseli ɔmɛ a kpɛti ni komɛ kaa a maa kplɛɛ sisi numi ehe nɛ ɔ nɔ. Enɛ ɔ he ɔ, ní kasemi ɔ tsɔɔ kaa: “Ke e he wa ha nɔ ko kaa e maa kplɛɛ mi tsɔɔmi nɛ ngɛ Hwɔɔmi Mɔ nɛ ɔ mi ɔ nɔ ɔ, e sa nɛ nɔ ɔ nɛ e to e tsui si nɛ e ngɔ e hɛ kɛ fɔ Yehowa nɔ, nɛ e ya nɔ nɛ e sɔmɔ lɛ ngɛ anɔkuale mi.”

Nyɛminyumu ko nɛ a tsɛɛ lɛ ke Tom Eyre nɛ e ji blɔ gbalɔ nɛ e je Britain ɔ tsɔɔ bɔ nɛ Baiblo Kaseli ɔmɛ a ti nihi fuu pee a ní ngɛ munyu nɛ ɔ he ha. E de ke: “Nyɛmimɛ ɔmɛ a bua jɔ bɔ nɛ a tsɔɔ Kpo Jemi yi 12 ɔ mi ha a he wawɛɛ. Benɛ wa ba yɔse kaa a to Matsɛ Yemi ɔ sisi ngɛ hiɔwe ɔ, wa bua jɔ wawɛɛ kaa wa maa fiɛɛ sane kpakpa nɛ ɔ kɛ tsɔɔ ni kpahi. Enɛ ɔ wo wɔ he wami nɛ wa ná suɔmi ɔ kaa wa maa pee babauu ngɛ sɔmɔmi ní tsumi ɔ mi, jehanɛ hu ɔ, e ye bua wɔ nɛ wa na ní kpakpahi nɛ Yehowa maa pee hwɔɔ se.”

WA YE YEHOWA HE ODASE

Mwɔnɛ ɔ, Yehowa Odasefohi pɔɔ ngmami nɛ ngɛ Yesaya 43:10 he munyu tumi wawɛɛ. Lejɛ ɔ de ke: “Yehowa ke, ‘Nyɛ ji ye we odasehi, ee, ye sɔmɔlɔ nɛ i hla.’” Se loko e maa su jeha 1925 ɔ, wa pɔɛ ngmami nɛ ɔ he munyu tumi tsɔ ngɛ wa womi ɔmɛ a mi. Se níhi ba tsake. Ngɛ jeha 1925 ɔ mi ɔ, Blɛfo gbi Hwɔɔmi Mɔ ɔ tu Yesaya 43:10 kɛ 12 ɔ he munyu ngɛ womi tɛtlɛɛhi kakaaka 11 mi!

Ngɛ August 1925 ɔ nyagbe ɔ, Baiblo Kaseli ɔmɛ pee kpe ko ngɛ Indianapolis ngɛ Indiana. Joseph F. Rutherford ha nɛ a ngma munyu ko kɛ nya nihi nɛ a ba kpe ɔ a he, nɛ a print munyu nɛ ɔ ngɛ kpe ɔ blɔ nya tomi womi ɔ nɔ. A ngma ngɛ nɔ ke: “Wa ba kpe nɛ ɔ konɛ Nyɔmtsɛ ɔ nɛ e . . . wo wɔ he wami nɛ waa kɛ gɛjɛmi nɛ kpale kɛ ho, nɛ́ wa ya ye Yehowa he Odase.” Ngɛ ligbi kpaanyɔ kpe nɛ a pee ɔ sisi ɔ, a wo nihi nɛ a ba kpe ɔ he wami konɛ a ngɔ he blɔ fɛɛ he blɔ nɛ a ma ná a kɛ ye Yehowa he odase.

Ngɛ Hɔ, August 29 ɔ nɔ ɔ, Nyɛminyumu Rutherford tu munyu ko nɛ e yi ji “A Call to Action” ngɛ kpe ɔ sisi. E ma nɔ́ he je nɛ e sa kaa a fiɛɛ wawɛɛ ɔ nɔ mi ngɛ e munyu ɔ mi. E de ke: “Yehowa ke . . . : ‘Nyɛ ji ye we odasefohi, nɛ imi ji Mawu.’ Kɛkɛ nɛ e kɛ gbi nɛ nya wa de ke: ‘Nyɛ wo okadi ɔ nɔ kɛ ha ma amɛ.’ Nihi nɛ a ngɛ zugba a nɔ nɛ a ma nyɛ maa ye Yehowa he odase loo a ma nyɛ ma wo okadi ɔ nɔ ɔ pɛ ji nihi nɛ e ngɔɔ e mumi klɔuklɔu ɔ kɛ kudɔɔ mɛ.”—Yes. 43:12; 62:10.

Benɛ Nyɛminyumu Rutherford tu munyu ɔ ta a, e kane munyu ko nɛ e yi ji, “Message of Hope.” Nihi tsuo nɛ a ba kpe ɔ a bua jɔ munyu ɔ nɛ e kane ɔ he. Munyu ɔ tsɔɔ kaa Mawu Matsɛ Yemi ɔ pɛ ji adesahi a hɛnɔkami nitsɛnitsɛ. Lɔ ɔ pɛ lɛ e ma nyɛ maa ngɔ “jɔɔmihi komɛ kaa wami, tue mi jɔmi, si himi kpakpa, nɔmlɔ tso mi he wami nami, he yemi, kɛ bua jɔmi nitsɛnitsɛ kɛ ba.” Pee se ɔ, a tsɔɔ munyu nɛ ɔ sisi kɛ ya gbihi fuu a mi, nɛ a kɛ pee dɛ womi. A gba dɛ womi nɛ ɔ maa pee ayɔ 40 sɔuu kɛ ha nihi.

Se jehahi babauu ba be nɛ loloolo ɔ, Baiblo Kaseli ɔmɛ tsakee we a biɛ kɛ ba pee Yehowa Odasefohi. Se a ba ngɛ sisi nue kaa e he hia nɛ a ye Yehowa he odase wawɛɛ.

BAIBLO KASELI ƆMƐ KPALE YA SLAA NIHI NƐ A BUA JƆ MUNYU Ɔ HE

Akɛnɛ Baiblo Kaseli ɔmɛ a yibɔ ngɛ hɛ mi yae ngɛ je kɛ wɛ he je ɔ, asafo ɔ wo nyɛmimɛ ɔmɛ he wami kaa a ko gba wa womi ɔmɛ kɛ ha nihi ɔmɛ pɛ kɛkɛ, mohu ɔ, a kpale kɛ ya slaa nihi nɛ a bua jɔ sane kpakpa a he ɔ. Benɛ a gba dɛ womi nɛ ji Message of Hope ɔ se ɔ, Bulletina ɔ kɛ blɔ tsɔɔmi ha ke: “Nyɛɛ to blɔ nya konɛ nyɛɛ kpale kɛ ya slaa nihi nɛ nyɛ ha mɛ dɛ womi nɛ ji Message of Hope ɔ ekohu.”

January 1925 Bulletin ɔ tu níhi a si kpami ko nɛ Baiblo Kaseli ɔmɛ a kpɛti nɔ kake nɛ e ngɛ Plano ngɛ Texas ɔ ná a he munyu. E de ke: “E pee wɔ nyakpɛ kaa benɛ wa kpale ya fiɛɛ ngɛ hehi nɛ wa fiɛɛ ngɛ be ko nɛ be ɔ, nihi bu wɔ tue wawɛɛ pe benɛ wa ya fiɛɛ ngɛ zugba kpɔ ehehi a mi ɔ. Ngɛ jeha nyɔngma nɛ be ɔ mi ɔ, wa kpale ya slaa nihi nɛ a ngɛ zugba kpɔ nyafii ko mi ɔ si enuɔ sɔuu. . . . Se lingmi nɛ ɔ, Nyɛmiyo Hendrix kɛ ye mami kpale ya fiɛɛ ngɛ lejɛ ɔ, nɛ a gba womihi fuu pe be ko nɛ be ɔ.”

Blɔ gbalɔ ko nɛ e ngɛ Panama a ngma ke: “Nihi fuu nɛ a kua kaa a maa bu mi tue kekleekle ligbi nɛ i ya slaa mɛ ɔ tsake a ní peepee nɛ a bu mi tue benɛ i kpale kɛ ya slaa mɛ si enyɔne loo si etɛne ɔ. Jeha nɛ ɔ, i kɛ ye be babauu tsu fiɛɛmi ní tsumi ɔ; i kpale ya slaa nihi nɛ i ya a ngɔ be ko nɛ be ɔ ekohu, nɛ níhi a si kpami nɛ i ná a hi kalemi.”

NƆ́ NƐ WA NGƐ BLƆ HYƐE HWƆƆ SE

Ngɛ jeha 1925 ɔ nyagbe ɔ, Nyɛminyumu Rutherford ngma sɛ womi kɛ ya ha blɔ gbali ɔmɛ tsuo, nɛ e tsɔɔ nɔ́ nɛ a nyɛ tsu ngɛ jamɛ a jeha a mi, kɛ ní tsumi nɛ fɔɔ si ngɛ a hɛ mi ngɛ jeha nɛ maa ba a mi. E de ke: “Ngɛ jeha nɛ be ɔ mi ɔ, nyɛ ná he blɔ kɛ wo nihi fuu nɛ a hao ɔ a bua. Ní tsumi nɛ ɔ ha nɛ nyɛ bua jɔ wawɛɛ . . . Ngɛ jeha nɛ ma ngɛ wa hɛ mi ɔ mi ɔ, nyɛ ma ná he blɔhi fuu kɛ ye Mawu kɛ e matsɛ yemi ɔ he odase, nɛ́ nyɛɛ ngɔ nyɛ ní peepee kɛ ha nɛ nihi nɛ a na nihi tutuutu nɛ a ji Yehowa sɔmɔli. . . . Nyɛ ha nɛ wɔ tsuo waa ya nɔ nɛ waa kɛ gbi nɛ nya wa nɛ je wa Mawu ɔ kɛ wa Matsɛ ɔ yi.”

Benɛ jeha 1925 ɔ ngɛ nyagbe bae ɔ, nyɛmimɛ ɔmɛ to blɔ nya konɛ a bli Brooklyn Betel ɔ mi. Enɛ ɔ he ɔ, ngɛ jeha 1926 mi ɔ, asafo ɔ maa je tsu mami ní tsumi ngua ko nɛ a ma we eko hyɛ ɔ sisi.