A Hla Nihi Enyɔ Kɛ Piɛɛ Blɔ Tsɔɔmi Ajla Toli Ɔmɛ A He

NGƐ October 5, 2024 ɔ, a fia adafi klɛdɛɛ ko ngɛ daa jeha kpe ɔ sisi kaa: A hla Nyɛminyumu Jody Jedele kɛ Jacob Rumph kɛ piɛɛ Yehowa Odasefohi a Blɔ Tsɔɔmi Ajla Toli ɔmɛ a he. Nyɛmimɛ nyumu nɛ ɔmɛ kɛ anɔkuale yemi ngɛ Yehowa sɔmɔe jehahi babauu ji nɛ ɔ.

A fɔ Nyɛminyumu Jedele ngɛ Missouri ngɛ U.S.A. nɛ a tsɔse lɛ kɛ wo anɔkuale ɔ mi. He nɛ e fɔli ɔmɛ hi ɔ, Yehowa Odasefohi bɔɔ pɛ lɛ a ngɛ lejɛ ɔ. Enɛ ɔ he ɔ, e kɛ nyɛmimɛ nɛ a je ma slɔɔtohi a mi nɛ a ba yeɔ buaa kɛ fiɛɛɔ sane kpakpa a ngɛ a zugba kpɔ ɔ mi ɔ bɔ wawɛɛ. Suɔmi kɛ kake peemi nɛ ngɛ nyɛmimɛ nɛ ɔmɛ a kpɛti ɔ ná Nyɛminyumu Jedele nɔ he wami wawɛɛ nitsɛ. A baptisi lɛ ngɛ October 15, 1983. Jamɛ a be ɔ mi ɔ, e yi jeha 20 lolo. E bua jɔ fiɛɛmi ní tsumi ɔ he wawɛɛ, nɛ e je daa blɔ gbami ní tsumi ɔ sisi ngɛ September 1989 ɔ mi.

Benɛ Nyɛminyumu Jedele ji niheyo wayoo ɔ, e fɔli ɔmɛ ngɔɔ e kɛ e nyɛmiyo ɔ nɛ a ya slaa si ngɛ Betel. Enɛ ɔ wo mɛ he wami nɛ a kɛ Betel sɔmɔmi pee oti ngɛ a si himi mi. Nyagbenyagbe ɔ, mɛ tsuo a ya sɔmɔ ngɛ Betel. Nyɛminyumu Jedele je e sɔmɔmi ngɛ Betel ɔ sisi ngɛ Wallkill Betel ngɛ September 1990 ɔ mi. Sisije ɔ, e tsu ní ngɛ Cleaning Department, nɛ pee se ɔ, e ya tsu ní ngɛ Medical Service.

Jamɛ a be ɔ mi ɔ, asafo komɛ nɛ a tuɔ Spanish nɛ e kɛ he nɛ a ngɛ ɔ kɛ we ɔ hia nyɛmimɛ nyumuhi nɛ a maa ye bua asafo ɔ. Lɔ ɔ he ɔ, Nyɛminyumu Jedele bɔni asafo mi kpe yami ngɛ asafo nɛ ɔmɛ eko mi nɛ e bɔni Spanish kasemi. E kɛ we kulaa nɛ e kɛ Nyɛmiyo Damaris nɛ e ji daa blɔ gbalɔ ngɛ jamɛ a zugba kpɔ ɔ mi ɔ kpe. Nyagbenyagbe ɔ, a sɛ gba si himi mi nɛ nyɛmiyo Damaris ba piɛɛ e he ngɛ Betel.

Ngɛ jeha 2005 ɔ mi ɔ, a je Betel nɛ a ya hyɛ a fɔli nɛ a wa ngɛ jeha mi nɛ́ a kɛ anɔkuale yemi ngɛ Yehowa sɔmɔe ɔ a nɔ. Jamɛ a be ɔ mi ɔ, a ya ngɛ sɔmɔe kaa daa blɔ gbali. Nyɛminyumu Jedele ye bua kɛ tsɔɔ ní ngɛ Blɔ Gbali A Tsɔsemi Sukuu ɔ mi, nɛ e tsu ní hu kaa Hiɔ Tsami He Kɛ Ní Sɛɛmi Ajla Toli kɛ Kpokpa Nɔ Tsuhi A Mami He Ajla Toli ɔmɛ a kpɛti nɔ kake.

Ngɛ jeha 2013 ɔ mi ɔ, a kpale fɔ Nyɛminyumu kɛ Nyɛmiyo Jedele nine kɛ ba Betel kɛ ha Warwick tsu mami ní tsumi ɔ. A sɔmɔ ngɛ Patterson kɛ Wallkill hulɔ. Nyɛminyumu Jedele tsu ní ngɛ Local Design/Construction Department kɛ jehanɛ se hu kaa Ní Tsumi He Nɛ Hyɛɛ Hiɔ Tsami He Sanehi A Mi ɔ a kpɛti nɔ kake. Ngɛ March 2023 ɔ mi ɔ, a hla lɛ kaa Ajla Toli Nɛ A Hyɛɛ Sɔmɔmi Ní Tsumi ɔ Nɔ ɔ A Yemi Kɛ Bualɔ. Ke Nyɛminyumu Jedele hyɛ ní tsumi slɔɔtohi nɛ e tsu kɛ be ɔ, e de ke: “Ke a ha mo ní tsumi ehe ko ɔ, be komɛ ɔ, ní tsumi ɔ woɔ o he gbeye. Se jamɛ a be ɔ mi ji be nɛ e sa nɛ o kai kaa e he hia nɛ o ngɔ o hɛ kɛ fɔ Yehowa nɔ ejakaa lɛ ji O Deɔ O Peeɔ ɔ nɛ.”

A fɔ Nyɛminyumu Rumph ngɛ California, ngɛ U.S.A. Jamɛ a be ɔ mi ɔ, e yayo kpa fiɛɛmi kɛ asafo mi kpe yami, se kɛ̃ ɔ, e yayo bɔ mɔde nɛ e tsɔɔ lɛ Baiblo ɔ mi anɔkuale ɔmɛ. Jehanɛ ɔ se hu ɔ, daa jeha a, Nyɛminyumu Rumph ya slaa e maa nɛ́ e kɛ anɔkuale yemi ngɛ sɔmɔe kaa Yehowa Odasefono ɔ, nɛ lɛ hu ye bua lɛ nɛ e bua ba jɔ anɔkuale ɔ he, nɛ benɛ e ye jeha 13 ɔ, e bi konɛ a kɛ lɛ nɛ je Baiblo ɔ kasemi sisi. Ngɛ September 27, 1992 ɔ mi ɔ, Nyɛminyumu Rumph ha nɛ a baptisi lɛ, jamɛ a be ɔ mi ɔ e yi jeha 20 lolo. Bua jɔmi sane ji kaa e yayo bɔni fiɛɛmi kɛ asafo mi kpe yami ekohu, nɛ e papaa kɛ e nyɛmimɛ kpa amɛ tsuo bɔni a hɛ mi yami ngɛ asafo ɔ mi nɛ a ha nɛ a baptisi mɛ.

Benɛ Nyɛminyumu Rumph ji niheyo ɔ, e na kaa nihi nɛ a kɛ a he wo blɔ gbami ní tsumi ɔ mi ɔ ngɛ bua jɔmi. Enɛ ɔ he ɔ, benɛ e gbe nɔ tsami sukuu nya a, e je blɔ gbami ní tsumi ɔ sisi ngɛ September 1995 ɔ mi. Ngɛ jeha 2000 ɔ mi ɔ, e hia kɛ ho Ecuador ya konɛ e ya sɔmɔ ngɛ he nɛ fiɛɛli fuu a he hia ngɛ. Benɛ e ya lejɛ ɔ, e kɛ nyɛmiyo blɔ gbalɔ ko nɛ a tsɛɛ lɛ ke Inga nɛ e je Canada a ya kpe, nɛ nyagbenyagbe ɔ, a sɛ gba si himi mi. Benɛ a sɛ gba si himi mi se ɔ, a sɔmɔ ngɛ Ecuador ma ko mi. Fiɛɛli bɔɔ pɛ lɛ a ngɛ ma nɛ ɔ mi. Amlɔ nɛ ɔ, a ba pee asafo nɛ fiɛɛli babauu ngɛ mi.

Be bɔɔ se ɔ, a hla Nyɛminyumu Rumph kɛ e yo ɔ kaa blɔ gbali klɛdɛɛ, nɛ pee se ɔ, a bɔni kpɔ mi nɔ hyɛmi ní tsumi ɔ tsumi. Ngɛ jeha 2011 ɔ mi ɔ, a fɔ mɛ nine kɛ ha Gilead Sukuu nɛ to nɔ 132 ɔ. Benɛ a gbe Gilead Sukuu ɔ nya a, a ya sɔmɔ ngɛ mahi slɔɔtohi a mi, nɛ a ná sɔmɔmi he blɔ slɔɔtohi hulɔ. A ya tsu ní ngɛ Betel, a tsu ní kaa ma se sane kpakpa fiɛɛli, nɛ a tsu ní kaa kpɔ mi nɔ hyɛli hulɔ. Ngɛ Sukuu Kɛ Ha Matsɛ Yemi Sane Kpakpa Fiɛɛli nɛ a peeɔ ɔ mi ɔ, Nyɛminyumu Rumph ná he blɔ kaa tsɔɔli ɔmɛ a kpɛti nɔ kake.

Ngɛ COVID-19 hiɔ ɔ nɛ ba a he je ɔ, Nyɛminyumu Rumph kɛ e yo ɔ kpale kɛ ho United States ya. A fɔ mɛ nine kɛ ya Wallkill Betel, nɛ Nyɛminyumu Rumph ya ná tsɔsemi ngɛ Service Department. Nyagbenyagbe ɔ, a ha nɛ a kpale kɛ ho Ecuador ya nɛ Nyɛminyumu Rumph ya sɔmɔ kaa Ecuador Asafo ɔ Ní Tsumi Kɔni ɔ Ajla Toli ɔmɛ a kpɛti nɔ kake. Ngɛ jeha 2023 ɔ mi ɔ, a ha nɛ a ya sɔmɔ ngɛ Warwick. Nɛ ngɛ January 2024 ɔ mi ɔ, a hla Nyɛminyumu Rumph kaa Ajla Toli Nɛ A Hyɛɛ Sɔmɔmi Ní Tsumi ɔ Nɔ ɔ A Yemi Kɛ Bualɔ. Ke e susu he slɔɔtohi nɛ e ya sɔmɔ kɛ be ngɛ ɔ he ɔ, e deɔ ke, “Pi he nɛ o ma ya sɔmɔ ngɛ ɔ nɛ peeɔ ní tsumi nɛ o ngɛ tsue ɔ slɔɔto ko, mohu ɔ, nihi nɛ o ngɛ sɔmɔe ɔ.”

Wa bua jɔ ní tsumi kpakpa nɛ nyɛmimɛ nɛ ɔmɛ kɛ hɛdɔ ngɛ tsue ɔ he, nɛ wa ‘yaa nɔ nɛ wa buu nyumuhi kaa jã a saminya.’—Filip. 2:29.