Níhi Nɛ Maa Ye Bua Mo Konɛ O Nyɛ Nɛ O Kane Baiblo ɔ Daa Ligbi

Akɛnɛ wɔ tsuo wa be deka kulaa he je ɔ, anɛ e he waa kɛ haa mo kaa o maa kane Baiblo ɔ daa ligbi lo? (Yosh. 1:8) Ke jã a, moo ka ní nɛ ɔmɛ a kpɛti kake nɛ o hyɛ:

• Moo to blɔ nya ko nɛ ma kai mo. Mo set alarm ngɛ o klama a nɔ konɛ e kai mo nɛ o kane Baiblo ɔ daa ligbi.

• Ngɔɔ Baiblo ɔ kɛ fɔ he nɛ e he be wae ha mo kaa o maa na. Ke o kaneɔ Baiblo ɔ nɔ́ nɛ a print ɔ, lɛɛ ngɔɔ kɛ fɔ he nɛ e he be wae kulaa kaa daa ligbi ɔ o maa na.—5 Mose 11:18.

• Moo bu nɔ́ nɛ a record ɔ tue. Moo fia Baiblo ɔ nɔ́ nɛ a record ɔ nɛ o bu tue ke o ngɛ ní kpahi a he ní tsue ngɛ ligbi ɔ mi. Tara nɛ e ji blɔ gbalɔ kɛ binyɛ nɛ́ e tsuɔ ní nyɔ mi ɔ de ke, “Baiblo ɔ, nɔ́ nɛ a record ɔ nɛ i buɔ tue ke i ngɛ we mi níhi pee ɔ haa nɛ i pui ye daa ligbi Baiblo kanemi ɔ mi gblee.”

• O kɔni mi ko jɔ̃. Ke si fɔfɔɛ komɛ a he je ɔ, o be nyɛe maa kane Baiblo ɔ kaa bɔ nɛ o to he blɔ nya a po ɔ, moo kane kukuhi bɔɔ ko loko o hwɔ si. Ke kukuhi bɔɔ ko pɛ nɛ o kaneɔ daa ligbi po ɔ, e maa ye bua mo wawɛɛ.—1 Pet. 2:2.