Mo Kai Nɛ O Sɔle Kɛ Ha Ni Kpahi

1. Kɛ wa plɛ kɛ le kaa wa sɔlemi ɔmɛ a he hia Yehowa ha kɛɛ?

SƆLEMI ji nike ní nɛ se be nɛ je Yehowa ngɔ. Mo susu he nɛ o hyɛ. Yehowa ngɔ ní tsumi komɛ kɛ wo bɔfo ɔmɛ a dɛ. (La 91:11) E ngɔ ní tsumi komɛ hu nɛ a he hia wawɛɛ kɛ wo e Bi ɔ dɛ. (Mat. 28:18) Se sɔlemi tue bumi lɛɛ, e kɛ jamɛ a ní tsumi ɔ wui nɔ ko dɛ. Yehowa nitsɛ hla kaa e ma tsu jamɛ a ní tsumi ɔ. Yehowa nɛ e ji “sɔlemi Tue Bulɔ” ɔ nitsɛ buɔ wa sɔlemi tue.—La 65:2.

2. Mɛni nɔ hyɛmi nɔ́ nɛ Paulo pee ngɛ ni kpahi nɛ wa maa sɔle ha mɛ ɔ blɔ fa mi?

² Wa ma nyɛ maa je wa tsui mi faa kɛ sɔle ha Yehowa ngɛ wa hiami níhi a he, nɛ wa ma nyɛ maa sɔle kɛ ha ni kpahi hulɔ. Jã ji bɔ nɛ bɔfo Paulo pee. Kaa nɔ hyɛmi nɔ́ ɔ, e ngma kɛ ya ha Efeso asafo ke: “I yaa nɔ nɛ i woɔ nyɛ ta ngɛ ye sɔlemihi a mi.” (Efe. 1:16) Paulo sɔle kɛ ha ni kakaakahi hulɔ. Kaa nɔ hyɛmi nɔ́ ɔ, e de Timoteo ke: “I naa Mawu si, . . . be fɛɛ be ɔ, i kaiɔ mo nɛ i sɔleɔ kɛ haa mo wawɛɛ nyɔ kɛ pia.” (2 Tim. 1:3) Paulo ngɛ lɛ nitsɛ e nyagbahi nɛ e sɔleɔ ngɛ a he. (2 Kor. 11:23; 12:​7, 8) Se ngɛ lɛ tsuo se ɔ, e ná be kɛ sɔle kɛ ha ni kpahi.

3. Mɛni he je nɛ wa hɛ ma nyɛ maa je nɔ kaa wa maa sɔle kɛ ha ni kpahi ɔ?

³ Be komɛ ɔ, wa hɛ ma nyɛ maa je nɔ kaa wa maa sɔle kɛ ha ni kpahi. Mɛni he je? Nyɛmiyo ko nɛ a tsɛɛ lɛ ke Sabrinaa a tsɔɔ yi mi tomi kake he je nɛ wa hɛ jeɔ nɔ kaa wa maa sɔle ha ni kpahi ɔ. E de ke: “Nɔ ko nɔ ko be deka ngɛ je nɛ ɔ mi. Enɛ ɔ ma nyɛ ma ha nɛ waa ngɔ wa juɛmi kɛ ma wa hiami níhi pɛ a nɔ ke wa ngɛ sɔlee.” Anɛ o kɛ si fɔfɔɛ ko kaa jã kpeɔ be komɛ lo? Ke jã a, lɛɛ ní kasemi nɛ ɔ maa ye bua mo. E maa tsɔɔ (1) nɔ́ he je nɛ e sa nɛ o sɔle ha ni kpahi kɛ (2) blɔhi a nɔ nɛ o ma nyɛ maa gu kɛ pee jã.

MƐNI HE JE NƐ E SA NƐ WAA SƆLE KƐ HA NI KPAHI?

4-5. Ngɛ mɛni blɔ nɔ nɛ ke wa sɔle kɛ ha ni kpahi ɔ, e “tsuɔ ní wawɛɛ”? (Yakobo 5:16)

⁴ Ni kpahi nɛ wa maa sɔle ha a “tsuɔ ní wawɛɛ.” (Kane Yakobo 5:16.) Anɛ ke wa sɔle ha ni kpahi ɔ, lɔ ɔ ma nyɛ ma tsake si fɔfɔɛ nɛ a kɛ ngɛ kpee ɔ niinɛ lo? Ee, e ma nyɛ maa ba lɛ jã. Yesu, nɛ e le kaa e be kɛe nɛ bɔfo Petro ma kua lɛ ɔ de ke: “I kpa pɛɛ wawɛɛ ha mo konɛ o hemi kɛ yemi ɔ nɛ e ko ta.” (Luka 22:32) Paulo hu le kaa sɔlemi ma nyɛ ma tsake si fɔfɔɛ mi nɛ nɔ ko ngɛ. Benɛ a yi lɛ dami sane nɛ a wo lɛ tsu ngɛ Roma a, e ngma kɛ ya ha Filemon ke: “I ngɛ blɔ hyɛe kaa kɛ gu nyɛ sɔlemihi a nɔ ɔ, a maa kpale ngɔ mi kɛ ha nyɛ ekohu.” (Filem. 22; hyɛ study note nɛ ngɛ “for I am hoping that through your prayers” ɔ he.) Niinɛ, e ba mi jã pɛpɛɛpɛ nɛ a je Paulo kɛ je tsu womi mi nɛ e bɔni fiɛɛmi ekohu.

⁵ Ngɛ anɔkuale mi ɔ, enɛ ɔ tsɔɔ we kaa ke wa ngɛ sɔlee ɔ, waa nyɛ Yehowa nɔ kaa e pee nɔ́ nɛ wa bi lɛ ɔ kɛ ha wɔ doo. E le bɔ nɛ níhi nɛ e sɔmɔli sɔleɔ ngɛ he ɔ he hia mɛ ha, nɛ be komɛ ɔ, e tsuɔ he ní kɛ haa mɛ. Enɛ ɔ nɛ wa le ɔ maa ye bua wɔ konɛ waa je wa tsui mi kɛ sɔle ngɛ si fɔfɔɛ ko nɛ waa kɛ ngɛ kpee ɔ he. Kɛkɛ ɔ, wa maa ngmɛɛ sane ɔ he ha Yehowa, nɛ́ wa ná nɔ mi mami kaa e ma tsu he ní ngɛ blɔ nɛ hi pe kulaa nɔ.—La 37:5; hyɛ 2 Korinto Bi 1:11 kɛ study note ɔmɛ.

6. Kɛ sɔlemi nɛ wa sɔleɔ kɛ haa ni kpahi ɔ náa bɔ nɛ wa nuɔ he ha mɛ ha a nɔ he wami ha kɛɛ? (1 Petro 3:8)

⁶ Ke wa sɔleɔ kɛ haa ni kpahi ɔ, e haa nɛ wa jeɔ ‘mi mi sami’ su kpo. (Kane 1 Petro 3:8.) Nɔ nɛ e mi mi sãa lɛ ɔ, naa haomihi nɛ ni kpahi kɛ kpeɔ ɔ, nɛ e suɔ kaa e maa pee nɔ́ ko kɛ ye bua mɛ. (Maak. 1:​40, 41) Asafo mi nɔkɔtɔma ko nɛ a tsɛɛ lɛ Michael ɔ de ke: “Ke i sɔle ngɛ ni kpahi a hiami níhi a he ɔ, e haa nɛ i nuɔ nyagbahi nɛ a kɛ ngɛ kpee ɔ sisi saminya, nɛ suɔmi nɛ i ngɛ kɛ ha mɛ ɔ mi waa. Enɛ ɔ haa nɛ i hɛɔ kɛ suɔ a he be mi nɛ mɛ po a li.” Asafo mi nɔkɔtɔma ko nɛ a tsɛɛ lɛ ke Richard ɔ hu tu se nami kpa ko nɛ ngɛ ni kpahi nɛ wa maa sɔle kɛ ha a he munyu. E de ke: “Ke wa sɔle kɛ ha ni kpahi ɔ, e woɔ wɔ he wami konɛ waa pee nɔ́ ko kɛ ye bua mɛ.” E de hu ke: “Ke wa sɔle kɛ ha nɔ ko nɛ wa pee nɔ ko kɛ ye bua nɔ ɔ, ngɛ blɔ ko nɔ ɔ, wa ngɛ yee buae kɛ ha sɔlemi nɛ wa sɔle kɛ ha nɔ ɔ heto.”

7. Kɛ ni kpahi nɛ wa maa sɔle kɛ ha a maa ye bua wɔ ha kɛɛ konɛ waa kɛ wa juɛmi nɛ ko ma wa nyagba amɛ pɛ a nɔ? (Filipi Bi 2:​3, 4) (Hyɛ foni ɔmɛ hulɔ.)

⁷ Ke wa sɔle kɛ ha ni kpahi ɔ, e haa nɛ wa náa juɛmi nɛ da ngɛ nyagbahi nɛ wɔ nitsɛmɛ waa kɛ kpeɔ ɔ he. (Kane Filipi Bi 2:​3, 4.) Akɛnɛ Satan lɛ ngɛ je ɔ kudɔe he je ɔ, wa kpɛti nɔ fɛɛ nɔ kɛ nyagbahi kpeɔ. (1 Yoh. 5:19; Kpoj. 12:12) Ke wa sɔleɔ ha ni kpahi be fɛɛ be ɔ, wa kaiɔ kaa “kikɛmɛ a amanehlu nɛ ɔmɛ nɔuu nɛ [wa] nyɛmimɛ a kuu ɔ tsuo ngɛ nae.” (1 Pet. 5:9) Katherine nɛ e ji blɔ gbalɔ ɔ de ke: “Sɔlemi nɛ i sɔleɔ ha nihi ɔ kaiɔ mi kaa ni kpahi hu kɛ nyagbahi ngɛ kpee. Enɛ ɔ kaiɔ mi kaa e sɛ nɛ i kɛ ye juɛmi nɛ ma ye nyagba amɛ pɛ a nɔ.”

NI KPAHI HIA WA SƆLEMI

8. Mɛnɔmɛ nɛ wa ma nyɛ maa sɔle kɛ ha?

⁸ Mɛnɔmɛ nɛ wa ma nyɛ maa sɔle kɛ ha? Wa ma nyɛ maa sɔle kɛ ha nihi pɔtɛɛ komɛ. Kaa nɔ hyɛmi nɔ́ ɔ, wa ma nyɛ maa sɔle kɛ ha nihi nɛ a be nɔmlɔ tso mi he wami kpakpa, jokuɛwi nɛ a yeɔ a he fɛu nɛ a kɛ nɔ nyɛmi kpeɔ ngɛ sukuu, loo nihi nɛ bwɔmi ha nɛ a ngɛ nɔ́ nae. Wekuli kɛ ma nɔ yeli teɔ si kɛ woɔ wa nyɛmimɛ fuu. (Mat. 10:​18, 36; Níts. 12:5) E he hia nɛ wa nyɛmimɛ komɛ nɛ a je a wehi a he ngɛ basabasa peemi nɛ ngɛ nɔ yae ngɛ he nɛ a ngɛ ɔ he je. Ni komɛ hu ngɛ nɛ adebɔ mi oslaahi ha nɛ a ngɛ nɔ́ nae. Eko ɔ, wa be nyɛmimɛ nyumuhi kɛ yihi nɛ a kɛ si fɔfɔɛ nɛ ɔmɛ ngɛ kpee ɔ tsuo lee. Se ke wa sɔleɔ ha mɛ ɔ, lɔ ɔ tsɔɔ kaa waa kɛ Yesu fami nɛ ji “nyɛɛ suɔ nyɛ sibi” ɔ ngɛ ní tsue.—Yoh. 13:34.

9. Mɛni he je nɛ e sa nɛ waa sɔle kɛ ha nihi nɛ a ngɛ Yehowa asafo ɔ hɛ mi nyɛɛe kɛ a yi ɔmɛ ɔ?

⁹ Wa ma nyɛ maa sɔle ha nihi nɛ a ngɛ Yehowa asafo ɔ hɛ mi nyɛɛe ɔ hulɔ. Nimli nɛ ɔmɛ ji: Blɔ Tsɔɔmi Ajla Toli kɛ a yemi kɛ buali, Asafo ɔ Ní Tsumi Kɔni Ajla Toli, nihi nɛ a hyɛɛ ní tsumihi a nɔ ngɛ Betel, kpɔ mi nɔ hyɛli, asafo mi nikɔtɔmahi kɛ asafo mi sɔmɔli. Nyɛmimɛ nɛ ɔmɛ a kpɛti nihi fuu kɛ nyagbahi ngɛ kpee mohu lɛɛ, se kɛ̃ ɔ, a tsuɔ ní wawɛɛ kɛ yeɔ buaa wɔ. (2 Kor. 12:15) Kaa nɔ hyɛmi nɔ́ ɔ, kpɔ mi nɔ hyɛlɔ ko nɛ a tsɛɛ lɛ Mark ɔ de ke: “E he wa ha mi wawɛɛ kaa ma je ye fɔli nɛ a wa ngɛ jeha mi ɔ a he, ejakaa mɛ tsuo a be nɔmlɔ tso mi he wami kpakpa. E ngɛ mi kaa ye nyɛmiyo ɔ kɛ e huno ɔ ngɛ ye fɔli ɔmɛ a nɔ hyɛe mohu lɛɛ, se e dɔɔ mi wawɛɛ kaa imi nitsɛ i be lejɛ ɔ nɛ ma pee níhi fuu kɛ ye bua mɛ.” Eko ɔ, wa be nyagbahi nɛ nyɛmimɛ nɛ ɔmɛ kɛ ngɛ kpee ɔ tsuo lee, se wa suɔ nɛ wa kai mɛ ngɛ wa sɔlemi mi be fɛɛ be. (1 Tɛs. 5:​12, 13) Wa ma nyɛ maa sɔle kɛ ha a yi ɔmɛ hulɔ, ejakaa a kɛ anɔkuale yemi fĩɔ a huno ɔmɛ a se konɛ a ya nɔ nɛ a tsu ní tsumihi nɛ a kɛ wo a dɛ ngɛ asafo ɔ mi ɔ.

10-11. Ke wa ha nɛ wa sɔlemi pee gbajaa a, anɛ e saa Yehowa hɛ mi lo? Moo tsɔɔ nya.

¹⁰ Kaa bɔ nɛ wa na a, wa pɔɔ sɔlemi ha wa nyɛmimɛ nyumuhi kɛ yihi nɛ a ngɛ si fɔfɔɛ pɔtɛɛ komɛ a mi ɔ. Kaa nɔ hyɛmi nɔ́ ɔ, ke wa be nɔ ko pɔtɛɛ ngɛ wa juɛmi mi po ɔ, wa ma nyɛ bi Yehowa nɛ e ye bua nihi nɛ a wo mɛ tsu ɔ aloo wa bi lɛ nɛ e wo nihi nɛ suɔli gbo ɔ a bua. Asafo mi nɔkɔtɔma ko nɛ a tsɛɛ lɛ ke Donald ɔ de ke: “Wa ngɛ nyɛmimɛ nyumuhi kɛ yihi fuu nɛ a kɛ si himi nɛ a mi wa ngɛ kpee, nɛ be komɛ ɔ, e ma bi nɛ wa ha nɛ wa sɔlemi nɛ pee gbajaa bɔ nɛ pee nɛ wa nyɛ nɛ waa sɔle kɛ ha nihi tsuo nɛ a ngɛ haoe ɔ.”

¹¹ Anɛ sɔlemihi kaa jã a saa Yehowa hɛ mi lo? Ee! Ngɛ anɔkuale mi ɔ, wa li nɔ́ tutuutu nɛ wa nyɛmimɛ ɔmɛ a kpɛti nɔ fɛɛ nɔ ko hia. Enɛ ɔ he ɔ, e maa hi wawɛɛ kaa wa ma ha nɛ wa sɔlemi nɛ pee gbajaa. (Yoh. 17:20; Efe. 6:18) Sɔlemi nɛ ɔmɛ maa nɔ mi kaa wa “suɔ nyɛmimɛ a kuu ɔ tsuo.”—1 Pet. 2:17.

KE WA NGƐ SƆLEE HA NI KAKAAKAHI

12. Ngɛ mɛni blɔ nɔ nɛ ke wa toɔ níhi a he hɛ ɔ, lɔ ɔ maa ye bua wɔ nɛ waa le nihi nɛ wa maa sɔle kɛ ha, kɛ nɔ́ tutuutu nɛ wa maa sɔle ngɛ he?

¹² O hɛ nɛ ka si. Ngɛ wa nyɛmimɛ nɛ wa maa sɔle ha kaa kuu ɔ se ɔ, e sa nɛ waa sɔle kɛ ha ni kakaakahi nɛ waa wo a biɛ ta. Anɛ nɔ ko ngɛ o we asafo ɔ mi nɛ e nu hiɔ ko nɛ nya wa wawɛɛ lo? Anɛ jokuɛ ko ngɛ o we asafo ɔ mi nɛ e kɔni mi jɔ̃ akɛnɛ e kɛ nɔ nyɛmi ngɛ kpee ngɛ sukuu ɔ he je lo? Anɛ fɔlɔ kake ko ngɛ o we asafo ɔ mi nɛ e ngɛ mɔde bɔe kaa e ma tsɔse e bi ko ngɛ “Yehowa tsɔsemi kɛ e ga womi” nya lo. (Efe. 6:4) Ke o toɔ níhi a he hɛ ɔ, o ma ná suɔmi nɛ mi wa kɛ ha ni kpahi, nɛ o mi mi maa sã mo ngɛ a he. Enɛ ɔ maa wo mo he wami konɛ o sɔle ha mɛ.b—Rom. 12:15.

13. Kɛ wa ma plɛ kɛ sɔle kɛ ha nihi nɛ waa kɛ mɛ kpi hyɛ ɔ ha kɛɛ?

¹³ Ke o ngɛ sɔlee ha nɔ ko ɔ, moo wo e biɛ ta. Wa ma nyɛ maa sɔle kɛ ha nihi nɛ waa kɛ mɛ kpi hyɛ po. Kaa nɔ hyɛmi nɔ́ ɔ, mo susu wa nyɛmimɛ nyumuhi kɛ yihi nɛ a wo mɛ tsu ngɛ ma komɛ kaa Crimea, Eritrea, Russia, kɛ Singapore ɔ he nɛ o hyɛ. Ke o ya jw.org ɔ nɔ ɔ, o maa na nihi nɛ a wo mɛ tsu ɔ a biɛhi.c Kpɔ mi nɔ hyɛlɔ ko nɛ a tsɛɛ lɛ ke Brian ɔ de ke: “I yɔse kaa ke i ngma nyɛmimɛ nɛ a wo mɛ tsu ɔ a biɛ kɛ fɔ si, nɛ i tsɛɔ biɛ nɛ ɔmɛ ngɛ ye nya he nɛ e jeɔ kpo ɔ, lɔ ɔ yeɔ buaa mi nɛ ke i ngɛ sɔlee ɔ, i kaiɔ nɛ i woɔ a biɛ ta.”

14-15. Kɛ wa ma plɛ kɛ na nɔ́ pɔtɛɛ ko nɛ wa ma nyɛ maa sɔle ngɛ he ha kɛɛ?

¹⁴ Moo sɔle ngɛ nɔ́ pɔtɛɛ ko he. Michael nɛ wa tu e he munyu kɛ sɛ hlami ɔ de ke: “Ke i ngɛ nyɛmimɛ nyumuhi nɛ a wo mɛ tsu ɔ a he ní kanee ngɛ jw.org ɔ nɔ ɔ, i poɔ he foni kaa ke imi lɛ i ya je jamɛ a si fɔfɔɛ ɔ mi ɔ kɛ ma nu he ha kɛɛ. I le kaa ma hao wawɛɛ ngɛ ye yo ɔ he, nɛ ma suɔ kaa ma pee nɔ́ fɛɛ nɔ́ nɛ ma nyɛ konɛ e nine nɛ su e hiami níhi a nɔ. Enɛ ɔ haa nɛ i naa nɔ́ tutuutu nɛ ma de ke i ngɛ sɔlee kɛ ha wa nyɛmimɛ nyumuhi nɛ a sɛ gba si himi mi nɛ a wo mɛ tsu ɔ.”—Heb. 13:​3, sisi ningma.

¹⁵ Ke wa susu níhi nɛ wa nyɛmimɛ nɛ a wo mɛ tsu ɔ gbleeɔ mi daa ligbi ɔ he ɔ, lɔ ɔ maa ye bua wɔ nɛ waa le nɔ́ pɔtɛɛ nɛ wa ma nyɛ maa sɔle ngɛ he. Kaa nɔ hyɛmi nɔ́ ɔ, wa ma nyɛ maa sɔle konɛ tsu womi he nɔ hyɛli ɔmɛ kɛ wa nyɛmimɛ ɔmɛ nɛ hi si ngɛ mi mi jɔmi mi. Jehanɛ se hu ɔ, wa ma nyɛ maa sɔle konɛ nɔ yeli ɔmɛ nɛ a ngmɛ mɛ blɔ nɛ a ja Mawu faa. (1 Tim. 2:​1, 2) Wa ma nyɛ maa sɔle konɛ nyɛmimɛ nɛ a wo mɛ tsu ɔ a we anɔkuale yemi ɔ nɛ wo nyɛmimɛ kpahi nɛ a ngɛ ma a mi ɔ he wami, nɛ a je mi bami kpakpa a nɛ ta ni kpahi nɛ a sɔmɔ we Yehowa a hu a tsui he nɛ a kplɛɛ sane kpakpa a nɔ. (1 Pet. 2:12) E sa nɛ waa sɔle kɛ ha wa nyɛmimɛ nɛ a ngɛ si fĩe ngɛ ka kpahi a mi ɔ hu jã nɔuu. Ke wa toɔ níhi a he hɛ, wa woɔ ni kpahi a biɛ ta ke wa ngɛ sɔlee, nɛ wa sɔleɔ ngɛ nɔ́ pɔtɛɛ ko he ɔ, lɔ ɔ maa tsɔɔ kaa ‘suɔmi nɛ wa ngɛ kɛ ha wa sibi kɛ nihi tsuo ɔ hiɛ’ babauu.—1 Tɛs. 3:12.

JUƐMI NƐ DA NƐ WA MA NÁ NGƐ WA SƆLEMIHI A HE

16. Mɛni maa ye bua wɔ konɛ wa ná juɛmi nɛ da ngɛ wa sɔlemi ɔmɛ a he? (Mateo 6:8)

¹⁶ Kaa bɔ nɛ wa na a, wa sɔlemihi ma nyɛ ma ha nɛ si fɔfɔɛ nɛ nɔ ko kɛ ngɛ kpee ɔ nɛ tsake. Se kɛ̃ ɔ, e sa nɛ wa ná juɛmi nɛ da ke wa ngɛ sɔlee. Ke wa ngɛ sɔlee ɔ, lɔ ɔ tsɔɔ we kaa wa ngɛ Yehowa nɔ́ ko nɛ e li ɔ dee, jehanɛ hu ɔ, Yehowa hia we wa ga womi ngɛ bɔ nɛ e sa nɛ e tsu si fɔfɔɛ ko he ní ha a he. Yehowa le nɔ́ nɛ e sɔmɔli hia loko mɛ nitsɛmɛ po a leɔ. (Kane Mateo 6:8.) Ke jã a, lɛɛ mɛni he je mɔ nɛ e sa kaa waa sɔle kɛ ha ni kpahi? Ní kasemi nɛ ɔ ye bua wɔ nɛ wa na yi mi tomi fuu a he je nɛ e sa kaa waa pee jã. Se pi lɔ ɔ pɛ, jã nɛ wa maa pee ɔ tsɔɔ kaa wa suɔ ni kpahi nɛ wa susuɔ a he. Suɔmi woɔ wɔ he wami nɛ wa sɔleɔ kɛ haa ni kpahi. Nɛ ke Yehowa na kaa wa ngɛ mɔde bɔe nɛ waa kase bɔ nɛ e jeɔ suɔmi kpo ha a, e bua jɔɔ wawɛɛ.

17-18. Mo ha nɔ́ he tomi nɔ́ ko nɛ tsɔɔ nɔ́ he je nɛ e he hia kaa waa sɔle kɛ ha wa nyɛmimɛ Kristofohi.

¹⁷ Ke wa sɔle kɛ ha ni kpahi se wa nɛ kaa a ha sɔlemi ɔ heto kɛ ha mɛ po ɔ, lɔ ɔ tsɔɔ kaa wa suɔ mɛ, nɛ Yehowa bua maa jɔ kaa wa pee jã. Nɔ́ he tomi nɔ́ nɛ nyɛɛ se nɛ ɔ maa ye bua wɔ. Fɔli komɛ kɛ a bimɛ enyɔ nɛ a ji nyumuyo kɛ yoyo ɔ ngɛ we mi. Be ko ɔ, nyumuyo ɔ be he wami nɛ e ngɛ hiɔ sa nɔ. Kɛkɛ nɛ e nyɛmiyo ɔ de a papaa ke: “I kpa mo pɛɛ nɛ o pee nɔ́ ko kɛ ye bua ye nyɛminyumu ɔ. Ejakaa e be he wami wawɛɛ!” Akɛnɛ tsɛ ɔ suɔ e binyumu ɔ, nɛ e suɔ kaa e ná he wami ekohu he je ɔ, e ngɛ si fɔfɔɛ ɔ he ní tsue momo. Se kɛ̃ ɔ, bitsɛ nɛ ɔ bua maa jɔ wawɛɛ benɛ e biyo ɔ ba kpa lɛ pɛɛ kaa e ye bua e nyɛminyumu nɛ be he wami ɔ. Enɛ ɔ tsɔɔ kaa e biyo ɔ susuɔ e nyɛminyumu ɔ he.

¹⁸ Jã nɔuu kɛ̃ nɛ Yehowa ngɛ wɔ he wami woe kaa wa susu wa sibi a he, nɛ waa sɔle kɛ ha wa sibi. Ke wa pee jã a, wa ngɛ tsɔɔe kaa wa susuu we wɔ pɛ wa he, mohu ɔ, wa suɔ wa nyɛmimɛ ɔmɛ, nɛ lɔ ɔ haa nɛ Yehowa bua jɔɔ. (2 Tɛs. 1:3; Heb. 6:10) Jehanɛ ɔ hu ɔ, kaa bɔ nɛ wa na ngɛ ní kasemi nɛ ɔ mi ɔ, ngɛ si fɔfɔɛ komɛ a mi ɔ, wa sɔlemihi ma nyɛ ma ha nɛ nɔ ko si himi nɛ tsake. Enɛ ɔ he ɔ, nyɛ ha nɛ waa bɔ mɔde nɛ waa ya nɔ nɛ waa sɔle kɛ ha wa sibi.