Anɛ Mɔde Nɛ A Ngɛ Bɔe Kaa A Maa Di Tue Mi Jɔmi Se ɔ Ma Ha Nɛ Tue Mi Jɔmi Nɛ Ba Je ɔ Mi Lo?

Tahi kɛ basabasa peemi ngɛ nɔ yae ngɛ je ɔ mi tsuo. Enɛ ɔ he ɔ, Je Ma Amɛ A Kake Peemi Kuu ɔ kɛ ku kpahi pee kake nɛ a tsɔɔ nihi kɛ yaa he nɛ basabasa peemi ngɛ nɔ yae ngɛ ɔ konɛ a ya di tue mi jɔmia se. Nɔ́ nɛ a ngɛ blɔ hyɛe ji kaa a ma ha nɛ tue mi jɔmi nɛ ba hehi nɛ basabasa peemi ngɛ nɔ yae ngɛ ɔ. UN Secretary-General António Guterres de ke “Nihi nɛ Je Ma Amɛ A Kake Peemi Kuu ɔ tsɔɔ mɛ konɛ a ya di tue mi jɔmi se ɔ, ji nihi nɛ a bɔɔ mɔde wawɛɛ konɛ a ha nɛ oti nɛ waa kɛ ma wa hɛ mi kaa wa ma ha nɛ tue mi jɔmi nɛ ba je ɔ mi ɔ nɛ ye manye.”

Ngɛ jehahi komɛ nɛ be ɔ mi ɔ, a ye manye komɛ ngɛ mɔde nɛ a bɔ konɛ a ha nɛ tue mi jɔmi nɛ ba a mi. Kaa nɔ hyɛmi nɔ́ ɔ, a po ma mi biɔ a he piɛ, nɛ a kpale ngɔ nihi nɛ a ngɛ wesa he mahi a mi ɔ kɛ ho a ma amɛ a mi ya, a ha nihi nɛ a he fĩ mɛ ɔ a he lo nya hiami níhi, nɛ a dla níhi nɛ puɛ ngɛ ma amɛ a mi ɔ. Se ngɛ nyagba komɛ a he je ɔ, mɔde nɛ a ngɛ bɔe konɛ a ha nɛ tue mi jɔmi nɛ ba a yi manyɛ kaa bɔ nɛ nihi susu ɔ. Anɛ nɔ́ ko ngɛ nɛ ma nyɛ ma ha nɛ tue mi jɔmi nitsɛnitsɛ nɛ ba je ɔ mi lo? Mɛni hetohi nɛ Baiblo ɔ kɛ ha ngɛ enɛ ɔ he?

Nɔ́ nɛ ha nɛ mɔde nɛ a ngɛ bɔe kaa a di tue mi jɔmi se ɔ yi manye kɛ tsaba nɛ Baiblo ɔ kɛ ha

Nyagba a: a nɛ nihi nɛ a maa ye bua. E be gbɔjɔɔ kaa a ma ná ta buli kɛ ku kpahi nɛ a ngɛ ma kpahi a nɔ ɔ nɛ a maa ye bua. Be komɛ ɔ, e yeɔ ha ku nɛ ɔmɛ kaa a ma bla kɛ tsu ní ejakaa a nui a sibi sisi nɛ e slo a ti nɔ fɛɛ nɔ kɛ e susumi.

Tsaba nɛ Baiblo ɔ kɛ ha: “Mawu nɛ ngɛ hiɔwe ɔ maa to matsɛ yemi ko sisi . . . nɛ e ma kpata a [adesa matsɛ yemihi] hɛ mi, nɛ lɛ pɛ lɛ e maa hi si kɛ maa ya neneene.”​—Daniel 2:44.

Nyagba a: nyɛmihi kɛ nihi nɛ a kɛ ma tsu ní ɔ nɛ a nɛ. Pi be fɛɛ be nɛ blɔ nya tomihi nɛ a diɔ tue mi jɔmi se ɔ nine suɔ nihi, sika, kɛ ní kpahi nɛ a maa hia kɛ tsu ní ɔ nɔ, nɛ enɛ ɔ ha we nɛ a nyɛ nɛ a tsu a yi mi tomihi a he ní. E ba bi ɔ nɛ nihi nɛ a tsɔ mɛ konɛ a ya di tue mi jɔmi se ɔ nɛ a gblee si fɔfɔɛhi nɛ a mi wa kɛ oslaahi a mi.

Tsaba nɛ Baiblo ɔ kɛ ha: “Wa Nyɔmtsɛ Yesu Kristo Mawu ɔ . . . kɛ [Yesu] hi si ngɛ e hiɔ nɔ ngɛ hiɔwe ní ɔmɛ a mi, ngɛ he nɛ nɔ kuɔ kulaa pe nɔ yemi fɛɛ nɔ yemi kɛ he blɔ fɛɛ he blɔ kɛ he wami fɛɛ he wami.”​—Efeso Bi 1:17, 20, 21.

Yehowa Mawu Ope ɔ,b ha Yesu, nɔ nɛ a wo lɛ Mawu Matsɛ Yemi ɔ nya Matsɛ ɔ nɔ́ fɛɛ nɔ́ nɛ e hia konɛ e kɛ ye nɔ. (Daniel 7:13, 14c) Mawu ha Yesu he wami nɛ pe kulaa, juɛmi, nile kɛ nɔ́ se kɔmi​—nɛ pa adesa nɔ yemi aloo blɔ nya tomi tsuo ɔ. (Yesaya 11:2) Jehanɛ se hu ɔ, Yesu ngɛ ta buli he wali nɛ a ji bɔfohi nɛ e ma nyɛ nɛ e kɛ mɛ nɛ tsu ní. (Kpo Jemi 19:14) Si fɔfɔɛ ko be nɛ e he wa ha lɛ nɛ e be nyɛe he ní tsumi.

Nyagba a: mlaa nya blɔ tsimi níhi. Be komɛ ɔ, mlaahi tsiɔ nihi nɛ a tsuɔ ní ha tue mi jɔmi blɔ nya tomi kuhi ngɛ nɔ́ nɛ e sa nɛ a pee kɛ bɔ nɛ a maa pee mɛ ha a he. Enɛ ɔ he ɔ, a nyɛ we nɛ a po nihi a he piɛ saminya aloo a nyɛ nɛ a tsu oti nɛ a kɛ ma a hɛ mi ɔ he ní.

Tsaba nɛ Baiblo ɔ kɛ ha: “A ngɔ he blɔhi tsuo nɛ ngɛ hiɔwe kɛ zugba a nɔ ɔ kɛ ha [Yesu].”​—Mateo 28:18.

Mawu kɛ blɔ tsɔɔmi nɛ ngɛ heii ha Yesu konɛ e ha nɛ tue mi jɔmi nɛ ba zugba a nɔ, nɛ e ha lɛ he wami konɛ e kɛ tsu he ní. (Yohane 5:22) Yesu maa ye dami sane nɛ e be nɔ hɛ mi hyɛe. (Yesaya 11:3-5) Enɛ ɔ he ɔ, e da blɔ kaa Baiblo ɔ tsɛ Yesu ke “Ganɔ Nɛ E Yi Nɔ Jɔ,” nɔ nɛ a to e Matsɛ Yemi ɔ sisi ngɛ “dami sane yemi kɛ dami nɔ.”​—Yesaya 9:6, 7

Mawu Matsɛ Yemi ɔ kɛ tue mi jɔmi nitsɛnitsɛ maa ba

Adesahi a blɔ nya tomi nɛ diɔ tue mi jɔmi se ɔ ma nyɛ ma ha nɛ pɛ ko se nɛ po aloo tue mi jɔmi nɛ ba ma ko nɔ. Se a be nyɛe ma je nɔ́ tutuutu nɛ kɛ basabasa peemi baa a, kɛ ninyɛ nɛ ngɛ adesa tsui mi ɔ kɛ je.

Dennis Jett, nɛ e sɔmɔ be ko nɛ be kaa U.S. nɔ yelɔ nane mi dalɔ ɔ de ke—“Nyagba a tutuutu ji kaa tue mi jɔmi ko be nɛ a maa di se.”

Mawu Matsɛ Yemi ɔ ji nɔ yemi nɛ ma ha nɛ adesahi nɛ a ná tue mi jɔmi nitsɛnitsɛ, ejakaa e maa ye bua nihi konɛ a je ninyɛ kɛ je a tsui mi. Kaa nɔ hyɛmi nɔ́ ɔ, benɛ Yesu ngɛ zugba a nɔ ɔ, e ngɔ e munyu tutui kɛ e ní peepee kɛ tsɔɔ e kaseli ɔmɛ kaa a di tue mi jɔmi se, nɛ a je suɔmi kpo kɛ tsɔɔ ni kpahi:

Yesu de hu kaa, a ma kadi Mawu Matsɛ Yemi ɔ sisi bimɛ kaa nihi nɛ a jeɔ suɔmi kpo kɛ tsɔɔ ni kpahi. Baiblo ɔ ha nɛ e pee heii kaa nihi nɛ a nyɛɔ ni kpahi ɔ a nine be Mawu Matsɛ Yemi ɔ nɔ sue:

Yehowa Mawu nɔ nɛ bɔ adesahi ɔ pɛ lɛ e le blɔ nɛ hi pe kulaa nɛ e maa gu nɔ nɛ e ha nɛ tue mi jɔmi nɛ ba jeɔ mi tsuo. Hehi nɛ adesa nɔ yemihi nyɛ we nɛ a ha nɛ tue mi jɔ mi nɛ e ba ngɛ ɔ, Mawu Matsɛ Yemi ɔ lɛɛ, e ma ha nɛ tue mi jɔmi maa ba lejɛ ɔmɛ tsuo.