Anɛ Olympics Fiɛmi ɔ Ma Nyɛ Ha Nɛ Kake Peemi Nɛ Hi Nihi A Kpɛti Niinɛ Lo?​—⁠Mɛni Baiblo ɔ De?

A tsɔɔ kaa ngɛ 2024 Olympics ɔ mi ɔ, nihi nɛ a ma ba hyɛ nihi nɛ a kɛ a he maa wo fiɛmi nɛ ɔ mi nɛ a je mahi 206 a mi ɔ a yibɔ maa su ayɔ akpe enuɔ. Thomas Bach nɛ ji International Olympic Committee ɔ nya dalɔ ɔ de ke “Wa piɛɛ ní peemi ko nɛ haa nɛ kake peemi kɛ tue mi jɔmi baa ngɛ je kɛ wɛ ɔ he.” E de hu ke, “E ngɛ mi kaa wa je ekpaekpa mohu lɛɛ, se nyɛ ha nɛ waa kɛ juɛmi nɛ ngɛ Olympic fiɛmi ɔ se, nɛ ji kaa, e sa nɛ adesahi tsuo nɛ a hi si ngɛ kake peemi kɛ tue mi jɔmi mi ɔ nɛ tsu ní.”

Anɛ Olympics fiɛmi ɔ ma nyɛ tsu yi mi tomi kaa kikɛ nɛ ɔ he ní lo? Anɛ hɛ nɔ kami ngɛ kɛ ha tue mi jɔmi kɛ kake peemi nitsɛnitsɛ lo?

Jije tue mi jɔmi kɛ kake peemi maa je kɛ ba?

Jeha nɛ ɔ Olympics ɔ kɔ we fiɛmi pɛ he. Fiɛmi nɛ ɔ tle ma kudɔmi kɛ mahi a kpɛti sanehi si, nɛ enɛ ɔ ha nɛ nihi a mi gba. Sane nɛ ɔ ekomɛ kɔɔ he blɔ nɛ adesahi ngɛ, he womi nɔ su, jami nɛ a kɛ a he yi, kɛ nɔ hɛ mi hyɛmi he.

Nihi kɛ fiɛmi nɛ nihi nɛ a je je kɛ we blaa kɛ fiɛɛ kaa Olympics ɔ jeɔ a hɛ ja. Se ngɛ anɔkuale mi ɔ, fiɛmi nɛ ɔ ha nɛ nihi peeɔ a ní ngɛ blɔ nɛ e kɛ mi gbami maa ba nɔ mohu pe nɛ e maa wo tue mi jɔmi kɛ kake peemi mi he wami.

Baiblo ɔ gba kɛ fɔ si kaa adesahi ma je su komɛ nɛ ma ha nɛ e he nɛ wa kaa je ɔ maa pee kake ɔ kpo. (2 Timoteo 3:1-5) Ke o suɔ nɛ o kase babauu kɛ kɔ Baiblo gbami nɛ ɔ he ɔ, moo kane munyu nɛ ji “Did the Bible Predict the Way People Think and Act Today?” ɔ.

Hɛ nɔ kami nitsɛnitsɛ kɛ ha tue mi jɔmi kɛ kake peemi

O maa na hɛ nɔ kami nitsɛ nɛ ngɛ kɛ ha kake peemi kɛ tue mi jɔmi ngɛ je kɛ wɛ ɔ ngɛ Baiblo ɔ mi. Baiblo ɔ wo si kaa nihi tsuo nɛ a ngɛ zugba a nɔ ɔ maa pee kake ngɛ matsɛ yemi nɛ a to sisi ngɛ hiɔwe nɛ ji “Mawu Matsɛ Yemi ɔ” sisi.​—Luka 4:43; Mateo 6:10.

Matsɛ Yemi nɛ ɔ nya Matsɛ nɛ́ ji Yesu Kristo ɔ, ma ha nɛ tue mi jɔmi maa ba je ɔ mi tsuo. Baiblo ɔ de ke:

• “Dalɔ maa bɔ, nɛ tue mi jɔmi maa hi he fɛɛ he.”​—La 72:7.

• “E ma kpɔ̃ ohiatsɛ nɛ foɔ ya kɛ biɔ yemi kɛ buami ɔ . . . E ma kpɔ̃ mɛ kɛ je yi mi wami kɛ basabasa peemi mi.”​—La 72:12, 14.

Ngɛ wa mwɔnɛ be nɛ ɔ mi po ɔ, Yesu tsɔɔmi ɔmɛ ha nɛ kake peemi ngɛ nihi ayɔhi a bɔ nɛ a ngɛ mahi 239 mi ɔ a kpɛti. Kaa Kristofohi, Yehowa Odasefohi nɛ a ngɛ je kɛ wɛ ɔ kase kaa e sa nɛ a di tue mi jɔmi se. Ke o suɔ nɛ o le babauu ɔ, moo kane munyu nɛ je kpo ngɛ Hwɔɔmi Mɔ ɔ mi nɛ e yi ji “Breaking the Cycle of Hatred” ɔ.