Basabasa Peemi Nɛ Yaa Nɔ Ngɛ Ma Kudɔmi Sane Mi​—⁠Mɛni Baiblo ɔ De?

Basabasa peemi nɛ yaa nɔ ngɛ ma kudɔmi sanehi a mi ɔ ngɛ he pɔe ngɛ je ɔ mi tsuo nɛ e ha nɛ nihi ngɛ tsui yee.

• Ngɛ Mexico ɔ, a gbe nihi 39 ngɛ ma kudɔmi sane he je. Nɔ́ nɛ ya nɔ nɛ ɔ kɛ awi yemi kpahi nɛ ya nɔ ngɛ Mexico 2023-2024 sɔ fɔmi ɔ mi ɔ eko bɛ hyɛ. Enɛ ɔ ha nɛ nihi fuu a he mi po.

• Lingmi nɛ ɔ, basabasa peemi nɛ yaa nɔ ngɛ ma kudɔmi sane mi ɔ pɔ he wawɛɛ ngɛ Yuropa, nɛ ngɛ May 15, 2024 jeha a mi ɔ, a ka po kaa a maa gbe Slovakia ma a sɔmɔlɔ nɔkɔtɔma a.

• United States ma a mi bi ɔmɛ a he mi po wawɛɛ ejakaa ngɛ September 15, 2024 ɔ mi ɔ, a ka ekohu kaa a maa gbe Donald Trump nɛ e ba ye ma a nɔ be ko nɛ be ɔ.

Mɛni he je nɛ basabasa peemi nɛ yaa nɔ ngɛ ma kudɔmi sane mi ɔ pɔ he jã a? Anɛ e se maa po ligbi ko lo? Mɛni Baiblo ɔ de ngɛ he?

Baiblo ɔ gba kɛ fɔ si kaa ma kudɔmi sane ma gba nihi a mi

Baiblo ɔ tsɔɔ kaa ngɛ “nyagbe ligbi ɔmɛ a mi,” nɛ ji wa be nɛ ɔ mi ɔ, nihi ma je su komɛ kpo nɛ ma ha nɛ a pee a ní basabasa aloo a be hie kɛ somi ko somi.

• “Ngɛ nyagbe ligbi ɔmɛ a mi ɔ, behi nɛ a mi wa nɛ a nya dami maa ye maa ba. Ejakaa adesahi maa pee. . . nihi nɛ a li sina, nihi nɛ a jeɔ nɔ se, . . . nihi nɛ a hí kɛ somi ko somi, . . . nihi nɛ a hɛ mi jɔɛ, . . . nɔ se blɔ tsɔɔli, nihi nɛ a peeɔ a tsui nya ní, pupuupu peeli.”​—2 Timoteo 3:1-4.

Baiblo gba kɛ fɔ si hu kaa nihi maa te si kɛ wo ma nɔ yeli, nɛ basabasa peemi nɛ yaa nɔ ngɛ ma kudɔmi sanehi a mi ɔ maa pɔ he ngɛ wa be nɛ ɔ mi. (Luka 21:9) Se kɛ̃ ɔ, basabasa peemi nɛ yaa nɔ ngɛ ma kudɔmi sanehi a mi nɛ gbaa nihi a mi ɔ se maa po.

Basabasa peemi nɛ yaa nɔ ngɛ ma kudɔmi sane mi ɔ se maa po

Baiblo ɔ tsɔɔ kaa Mawu Matsɛ Yemi ɔ ma ba da adesahi a nɔ yemihi tsuo nane mi.

• “Mawu nɛ ngɛ hiɔwe ɔ maa to matsɛ yemi ko sisi . . . e ma kpata matsɛ yemi kpa amɛ tsuo a hɛ mi, nɛ e maa hi si kɛ maa ya neneene.”​—Daniel 2:44.

Mawu Matsɛ Yemi ɔ ma ha nɛ adesahi tsuo maa pee kake nɛ e maa ngɔ tue mi jɔmi kɛ ba je ɔ mi he fɛɛ he.

• Yesu Kristo nɛ ji Mawu Matsɛ Yemi ɔ nyatsɛ ɔ ji “Ganɔ nɛ yi nɔ jɔ,” nɛ e ma ha nɛ a ‘ná tue mi jɔmi daa.’​—Yesaya 9:6, 7.

• Amlɔ nɛ ɔ po ɔ, Matsɛ Yemi ɔ sisi bimɛ ngɛ bɔ nɛ a kɛ a sibi maa hi si ngɛ tue mi jɔmi mi ha a kasee. Enɛ ɔ he ɔ, Baiblo ɔ de ke: “A kɛ a ta hwumi klaate ɔmɛ maa sɔ kpakplaahi, nɛ a kɛ a we akplɔ ɔmɛ maa pee tso he suami hahi. Je ma ko je ma ko be ta hwue kɔkɔɔkɔ; a be a he dlae kɛ ha ta gblegbleegble hu.”​—Yesaya 2:3, 4.

Ke o suɔ nɛ o le babauu ɔ, moo kane munyu nɛ ji “What Will God’s Kingdom Accomplish?” nɛ o hyɛ video nɛ ji Mɛni Ji Mawu Matsɛ Yemi ɔ?