Pee Klaalo Kaa O Maa Je Baiblo Mi Nikasemi Sisi
1. Mɛni e biɔ nɛ waa pee loko wa ma nyɛ maa ye fami nɛ Yesu kɛ ha wɔ ngɛ Mateo 28:19, 20 ɔ nɔ?
1 Yesu fã wɔ ke ‘waa pee nihi kaseli nɛ waa tsɔɔ mɛ ní.’ (Mat. 28:19, 20) Enɛ ɔ heje ɔ, e sa nɛ waa pee klaalo be tsuaa be kaa waa kɛ nihi maa je Baiblo mi nikasemi sisi, se pi Hɔ loo Hɔgba kake nɛ a to ngɛ nyɔhiɔ ɔ mi kaa wa kɛ je Baiblo mi nikasemi sisi ɔ pɛ ji be nɛ wa ma kɛ pee jã. Ga womihi nɛ nyɛɛ se nɛ ɔ maa ye bua wɔ.
2. Mɛnɔmɛ nɛ waa kɛ mɛ ma nyɛ maa je Baiblo mi nikasemi sisi?
2 Moo Je Baiblo Mi Nikasemi Sisi: Ke waa kɛ nihi jeɔ Baiblo mi nikasemi sisi ɔ, wa ma nyɛ ma ná nɔ ko nɛ waa kɛ lɛ maa kase Baiblo ɔ. (Fiɛlɔ 11:6) Anɛ o kɛ nɔ ko je Baiblo mi nikasemi sisi tɛ̃ɛ hyɛ lo? Ngɛ nyɔhiɔ ko mi ɔ, asafo ko ngɛ United States ɔ bɔ mɔde tsuo nɛ a ma nyɛ kaa a kɛ nihi maa je Baiblo mi nikasemi sisi tɛ̃ɛ. A bua jɔ a he wawɛɛ kaa a nyɛ nɛ a kɛ ni hehi 42 bɔni Baiblo mi nikasemi peemi! Mo ko susu kaa nihi nɛ a ngɛ munyu ɔ he bua jɔmi nɛ o ya slaa mɛ ɔ le kaa o suɔ nɛ o kɛ mɛ maa kase Baiblo ɔ. Ke o kpale kɛ ya slaa mɛ ɔ, mɛni heje nɛ o kɛ mɛ ji Baiblo mi nikasemi sisi? Ke a kplɛɛ we nɛ o kɛ mɛ nɛ je Baiblo mi nikasemi sisi ɔ, lɔɔ pee we nɔ́ ko. O ma nyɛ maa ya nɔ konɛ o ha nɛ a ná munyu ɔ he bua jɔmi babauu. Anɛ o bi nihi nɛ o kɛ mɛ ngɛ o kpɔ ɔ mi, o wekuli, nihi nɛ o kɛ mɛ tsuɔ ní, kɛ nihi nɛ o kɛ mɛ yaa sukuu ɔ hyɛ kaa a maa suɔ kaa o kɛ mɛ nɛ kase Baiblo ɔ lo? O ma nyɛ ma bi nɔ nɛ o kɛ lɛ kaseɔ Baiblo ɔ kaa e ngɛ huɛ, loo wekuno ko nɛ e maa suɔ kaa a kɛ lɛ nɛ kase Baiblo ɔ lo.
3. Mɛni ji nɔ́ nɛ yeɔ bua wɔ nɛ waa kɛ nihi jeɔ Baiblo mi nikasemi sisi, nɛ mɛni be wa ma nyɛ ma kɛ tsu ní?
3 Nɔ́ Nɛ Maa Ye Bua Wɔ: Nɔ́ nɛ yeɔ bua wɔ nɛ wa jeɔ Baiblo mi nikasemi peemi sisi ji dɛ womi nɛ ji, Anɛ O Suɔ Kaa O Le Anɔkuale ɔ Lo? Ke wetsɛ ɔ ngɔ womi kpa amɛ eko jio, e ngɔɛ eko jio, o ma nyɛ ma ha lɛ dɛ womi nɛ ɔ. Ke o ngɛ fiɛɛe ngɛ nítsumi hehi, loo gbɛjegbɛ he, loo o ngɛ womi ngmae kɛ yaa ha nɔ ko, loo o kpale kɛ yaa slaa nɔ ko ɔ, o ma nyɛ maa ngɔ dɛ womi nɛ ɔ kɛ tsu ní. O ma nyɛ ma si dɛ womi nɛ ɔ eko ngɛ nihi nɛ be we mi ɔ a sinyahi a nya. Mɛni heje nɛ o hɛɛ we eko ke o yaa sɛ lɔle kɛ ya he ko, loo o yaa he ní, loo o yaa nítsumi? Ngɛ dɛ womi nɛ ɔ se mi ɔ, a tsɔɔ bɔnɛ wa plɛɔ kɛ peeɔ Baiblo mi nikasemi ha, nɛ lɔɔ se ɔ, a tsɔɔ womi nɛ waa kɛ peeɔ Baiblo mi nikasemi nɛ ji, Baiblo Tsɔɔmi womi ɔ.
4. Mɛni blɔ nɔ wa ma nyɛ maa gu kɛ ngɔ dɛ womi nɛ ji, Anɛ O Suɔ Kaa O Le Anɔkuale ɔ Lo? ɔ kɛ tsu ní ngɛ?
4 Ke o ngɔ dɛ womi ɔ kɛ ha nɔ ɔ, o ma nyɛ maa tsɔɔ lɛ sane bimihi nɛ a ngma ngɛ womi ɔ hɛ mi ɔ konɛ o bi lɛ ke, “Sane bimi nɛ ɔmɛ a kpɛti te nɛ lɛ o bua jɔ he wawɛɛ nɛɛ?” Lɔɔ se ɔ, o kɛ lɛ nɛ susu heto ɔ he ngɛ dɛ womi ɔ mi, konɛ o kane ngɛ dɛ womi ɔ se mi, loo o tsɔɔ lɛ bɔnɛ wa plɛɔ kɛ peeɔ Baiblo mi nikasemi ha. Enɛ ɔ se ɔ, o ma nyɛ maa tsɔɔ lɛ he nɛ e maa na sane bimi nɛ nyɛ susu he ɔ hetohi babauu ngɛ ngɛ Baiblo Tsɔɔmi womi ɔ mi, konɛ o to blɔ nya nɛ o kɛ lɛ nɛ ya tsa nyɛ ní sɛɛmi ɔ nɔ.
5. Mɛni heje nɛ e sa kaa waa pee klaalo be tsuaa be kaa waa kɛ nihi maa je Baiblo mi nikasemi sisi ɔ?
5 Nihi ngɛ wa zugba kpɔ ɔ mi loloolo nɛ a suɔ kaa a maa le nɔ́ tutuutu nɛ Baiblo ɔ tsɔɔ ɔ. Ke wa pee klaalo be tsuaa be kaa waa kɛ nihi maa je Baiblo mi nikasemi sisi ɔ, wa ma ná he blɔhi fuu kɛ ye bua nihi konɛ a nyɛɛ blɔ nɛ kɛ nɔ yaa wami mi ɔ nɔ, nɛ enɛ ɔ ma ha nɛ wa ma ná bua jɔmi.—Mat. 7:13, 14.