Yehowa Ye Bua Wɔ Nɛ Wa Ná Bua Jɔmi Ngɛ He Fɛɛ He Nɛ Wa Sɔmɔ Ngɛ ɔ

Nyɛminyumu Kassholm kɛ e yo ɔ ya Gilead Sukuu ɔ ngɛ jeha 1979 ɔ mi. Kɛ je jamɛ a be ɔ mi kɛ ma a, a ha nɛ a ya sɔmɔ ngɛ he komɛ kaa Iran, Mauritius, Myanmar, Tanzania, Uganda, kɛ Zaire. Benɛ a ya Gilead sukuu ɔ, Jack Redford nɛ e piɛɛ Gilead tsɔɔli ɔmɛ a he ɔ ngɔ ga womi ko kɛ ha mɛ. Nɛ be fɛɛ be nɛ a nine maa su ní tsumi ehe ko nɔ ɔ, ga womi nɛ ɔ yeɔ buaa mɛ. Nyɛ ha nɛ a de wɔ nɔ́ he je.

Mats, kekleekle ɔ, mo de wɔ blɔ nɔ nɛ o gu kɛ ba na anɔkuale ɔ.

Mats: Ye papaa ngɛ Poland benɛ a ngɛ je mi ta enyɔne ɔ hwue ɔ, nɛ e na osato peemi nɛ ngɛ nɔ yae ngɛ Katoliki jami ɔ mi ɔ. Enɛ ɔ he ɔ, e pɔɔ demi ke, “I le kaa jami ko ngɛ kɛ̃ nɛ a tsɔɔ anɔkuale ɔ!” Benɛ be ngɛ mi puee ɔ, i ba yɔse kaa munyu nɛ ɔ nɛ ye papaa tu ɔ ji anɔkuale. I he womi momohi fuu nɛ i kane. Womi nɛ ɔmɛ a kpɛti kake ji The Truth That Leads to Eternal Life. Ye bua jɔ womi ɔ yi ɔ he, nɛ benɛ ye nine su womi ɔ nɔ ɔ, i kane tsuo jamɛ a nyɔ ɔ mi. Benɛ i kane womi ɔ ta a, i yɔse kaa i na anɔkuale ɔ!

Kɛ je April 1972 ɔ kɛ ma a, i kane womi slɔɔtoslɔɔtohi nɛ Yehowa Odasefo ɔmɛ pee ɔ, nɛ i na ye sane bimi ɔmɛ a heto ngɛ Baiblo ɔ mi. I nu he kaa bɔ nɛ jua yelɔ nɛ a tu e he munyu ngɛ Yesu nɔ he tomi nɔ́ ɔ mi ɔ nu he ɔ. Benɛ e ya na adiagba kake nɛ he jua wa a, e ya jua níhi tsuo nɛ e ngɛ ɔ, nɛ e kɛ ya he. Akɛnɛ anɔkuale ɔ nɛ i na a ngɛ kaa “adiagba” nɛ he jua wa he je ɔ, i ngɔ oti nɛ i kɛ ma ye hɛ mi kaa ma ya yunivɛsiti nɛ ma ba pee dɔkita a kɛ sã afɔle bɔ nɛ pee nɛ ma nyɛ nɛ ma pɛtɛ anɔkuale ɔ he. (Mat. 13:​45, 46) A baptisi mi ngɛ December 10, 1972.

E sui jeha kake nɛ ye fɔli ɔmɛ kɛ ye senɔ nyumu ɔ hu ba kplɛɛ anɔkuale ɔ nɔ nɛ a baptisi mɛ. I je be tsuo sɔmɔmi ní tsumi ɔ sisi ngɛ July 1973 ɔ mi. Nyɛmiyo Ann-Catrin piɛɛ blɔ gbali nɛ a bɔɔ mɔde wawɛɛ ngɛ wa we asafo ɔ mi ɔ he. Nyɛmiyo nɛ ɔ he ngɛ fɛu wawɛɛ. Wa ná suɔmi kɛ ha wa sibi, nɛ ngɛ jeha 1975 ɔ mi ɔ, wa sɛ gba si himi mi. Lɔ ɔ se ɔ, wa ya hi Strömsund nɛ ngɛ Sweden ɔ jeha eywiɛ. Ma nɛ ɔ mi ngɛ fɛu saminya, nɛ nihi a bua jɔ anɔkuale ɔ he ngɛ lejɛ ɔ.

Ann-Catrin: Ye papaa kase anɔkuale ɔ benɛ e piɛ bɔɔ nɛ e maa gbe yunivɛsiti nya ngɛ Stockholm. Jamɛ a be ɔ mi ɔ, i ji bimwɔyo nɛ i ye nyɔhiɔ etɛ pɛ, se ye papaa kɛ mi yaa asafo mi kpe kɛ fiɛɛmi. Ye mami bua jɔɛ anɔkuale ɔ he, enɛ ɔ he ɔ, e bɔ mɔde kaa e maa tsɔɔ Odasefo ɔmɛ kaa a tsɔɔmi ɔmɛ dɛ. Se e yi manye, nɛ pee se ɔ, lɛ hu e ha nɛ a baptisi lɛ. A baptisi mi benɛ i ye jeha 13 ɔ, nɛ i je blɔ gbami ní tsumi ɔ sisi benɛ i ye jeha 16. I ya sɔmɔ ngɛ Umeå, he nɛ Matsɛ Yemi sane kpakpa fiɛɛli fuu a he hia ngɛ ɔ. Lɔ ɔ se ɔ, i ba pee blɔ gbalɔ klɛdɛɛ.

Benɛ i kɛ Mats wa sɛ gba si himi mi se ɔ, waa kɛ bua jɔmi ye bua nihi babauu nɛ a ba kase anɔkuale ɔ. A kpɛti nɔ kake ji nyɛmiyo Maivor. E ji yiheyo nɛ e yi jeha 20 lolo nɛ́ e tsuɔ ní tsumi ko nɛ ma ha nɛ e he biɛ, nɛ e ná sika wawɛɛ ɔ. Pee se ɔ, e kpa ní tsumi nɛ ɔ tsumi, nɛ e ba piɛɛ ye nyɛmiyo wayoo ɔ he kɛ sɔmɔ kaa daa blɔ gbali. Mɛ ni enyɔ ɔmɛ a ya Gilead Sukuu ɔ ngɛ jeha 1984 ɔ mi, nɛ a ngɛ sɔmɔe ngɛ Ecuador kaa ma se sane kpakpa fiɛɛli.

Benɛ nyɛ ngɛ sɔmɔe kaa ma se sane kpakpa fiɛɛli ɔ, mɛni lɛ ye bua nyɛ nɛ nyɛ ná bua jɔmi ngɛ he fɛɛ he nɛ nyɛ ya sɔmɔ ngɛ ɔ?

Mats: A pɔɔ wɔ ní tsumi slɔɔtoslɔɔtohi hami, nɛ enɛ ɔ biɔ nɛ waa hia blɔ kɛ ya he kpahi. Se nɔ́ kake nɛ ye bua wɔ nɛ wa nyɛ tsake wa he kɛ wo si fɔfɔɛ nɛ ɔmɛ a mi ji kaa be fɛɛ be ɔ, wa bɔɔ mɔde kaa wa maa kase Yesu nɔ hyɛmi nɔ́ ɔ, titli e he si bami ɔ. (Kol. 2:​6, 7) Kaa nɔ hyɛmi nɔ́ ɔ, wa bɔɔ mɔde kaa wa maa le nɔ́ he je nɛ nyɛmimɛ ɔmɛ peeɔ a ní ngɛ blɔ ko nɔ ɔ, mohu pe nɛ wa maa hyɛ blɔ kaa a maa pee níhi nɛ maa da wɔ. Wa suɔ nɛ waa kase bɔ nɛ nyɛmimɛ ɔmɛ susuɔ níhi a he ha, kɛ a kusumi ɔmɛ. Akɛnɛ wa kase Yesu nɔ hyɛmi nɔ́ ɔ he je ɔ, e he wɛ ha wɔ kaa wa maa kplɛɛ tsakemihi a nɔ, nɛ lɔ ɔ ye bua wɔ nɛ waa kɛ bua jɔmi tsu ní tsumihi nɛ a kɛ wo wa dɛ ɔ.—La 1:​2, 3.

Ann-Catrin: Ke a hia tso ko nɛ a ya ma ngɛ he ko ɔ, tso ɔ maa hia pu la konɛ e nyɛ nɛ e wa. Yehowa pee kaa “pu” kɛ ha wɔ. (La 84:11) E ha wɔ nyɛmimɛ nyumuhi kɛ yihi nɛ a jeɔ suɔmi kpo kɛ tsɔɔ wɔ be fɛɛ be. Kaa nɔ hyɛmi nɔ́ ɔ, nyɛmimɛ nɛ a ngɛ asafo nyafii ko mi ngɛ Tehran, nɛ ngɛ Iran ɔ je suɔmi kpo kɛ tsɔɔ wɔ. Enɛ ɔ kai wɔ bɔ nɛ ni komɛ nɛ a tu a he munyu ngɛ Baiblo ɔ mi ɔ pee nihi nibwɔ ha. Jinɛ wa suɔ kaa wa maa ya nɔ maa hi Iran, se ngɛ July 1980 ɔ mi ɔ, a tsi Yehowa Odasefohi a ní tsumi ɔ nya ngɛ lejɛ ɔ. Enɛ ɔ ha nɛ a ha wɔ ligbi enyɔ kaa wa kɛ je ma a mi. A ha nɛ wa ya sɔmɔ ngɛ Zaire (amlɔ nɛ ɔ, a le ma nɛ ɔ kaa Congo) nɛ ngɛ Afrika a.

Benɛ i ná le kaa wa ma ya sɔmɔ ngɛ Afrika a, i fo ya. Sinɔhi kɛ hiɔhi nɛ i nu he kaa a ngɛ Afrika he je ɔ, i ye gbeye. Se wa huɛmɛ enyɔ komɛ nɛ a kɛ be kɛkɛɛ sɔmɔ ngɛ lejɛ ɔ de wɔ ke: “Nyɛ tsa yɛ lejɛ ɔ lolo. Nyɛɛ lɛɛ nyɛɛ ka nɛ nyɛɛ hyɛ, nɛ nyɛ bua maa jɔ wawɛɛ!” Wa na kaa nɔ́ nɛ a de ɔ ji anɔkuale. Nyɛmimɛ nɛ a ngɛ lejɛ ɔ a he ngɛ bua jɔmi nɛ a jeɔ suɔmi kpo. Jeha ekpa se ɔ, e he ba hia nɛ waa je Zaire ngɛ nya tsimi ɔ he je. Enɛ ɔ pee mi mwɔ ejakaa amlɔ nɛ ɔ nihi tsake nɛ i sɔle ha Yehowa ke, “I kpa mo pɛɛ ko ha nɛ waa je Afrika.”

Mɛni ní a si kpamihi nɛ ngɛ bua jɔmi nyɛ ná ngɛ Yehowa sɔmɔmi mi?

Mats: Ma nyɛ ma de ke huɛ bɔmi kpakpa ngɛ i kɛ ma se sane kpakpa fiɛɛli nɛ a kusumi je ekpa nɛ a je ma slɔɔtohi a mi ɔ a kpɛti. Jehanɛ hu ɔ, sɔmɔmi he blɔ komɛ nɛ wa ná a ye bua wɔ nɛ wa ti nɔ fɛɛ nɔ kɛ nihi maa pee 20 kase Baiblo ɔ. Enɛ ɔ ha nɛ wa ná bua jɔmi wawɛɛ nitsɛ! Ye hɛ be suɔmi kɛ nibwɔ peemi su nɛ wa nyɛmimɛ nɛ a ngɛ Afrika a je kpo kɛ tsɔɔ wɔ ɔ nɔ jee gblegbleegble. Benɛ wa ya slaa asafo komɛ nɛ a ngɛ Tanzania a, wa hwɔ wa lɔle ɔ mi. E ngɛ mi kaa nyɛmimɛ ɔmɛ be nɔ́ ko tsɔ mohu lɛɛ, se a bɔɔ mɔde kaa a ma ha wɔ nɔ́ fɛɛ nɔ́ nɛ wa hia. (2 Kor. 8:3) Nɔ́ kpa ko nɛ wa bua jɔ he wawɛɛ ji be nɛ wa tsɛɔ ke ní sɛɛmi be ɔ. Be nɛ ɔ ji be nɛ i kɛ Ann-Catrin wa hiɔ si nɛ wa sɛɛɔ níhi nɛ ya nɔ ngɛ ligbi ɔ mi ɔ he ní, nɛ wa naa Yehowa si kaa e piɛɛ wa he.

Ann-Catrin: Ngɛ ye blɔ fa mi ɔ, nɔ́ nɛ ha nɛ ye bua jɔ wawɛɛ ji he blɔ nɛ i ná kaa ma le wa nyɛmimɛ ngɛ je kɛ wɛ ɔ. Wa kase gbi komɛ kaa Farsi, French, Luganda, kɛ Swahili. Jehanɛ hu ɔ, wa kase kusumi kpahi fuu. Wa tsɔse nyɛmimɛ nyumuhi kɛ yihi, wa ná huɛmɛ kpakpahi, nɛ wa bua jɔ kaa waa kɛ mɛ “pee kake” kɛ sɔmɔ Yehowa.—Zef. 3:9.

Wa na adebɔ ní slɔɔtoslɔɔtohi nɛ a ngɛ fɛu hulɔ. Be fɛɛ be nɛ wa nine maa su sɔmɔmi he blɔ ehe ko nɔ ɔ, wa naa kaa Yehowa piɛɛ wa he, nɛ e ngɛ wɔ blɔ tsɔɔe ngɛ wa blɔ hiami ɔ mi. Wa ná níhi a si kpamihi nɛ ke pi Yehowa he ɔ, wa be náe gblegbleegble.

Mɛni nyagbahi nyɛɛ kɛ kpe, nɛ kɛ nyɛ plɛ kɛ da a nya ha kɛɛ?

Mats: Wa nu hiɔ slɔɔtoslɔɔtohi, eko ji malaria. Nɛ a pee Ann-Catrin operation komɛ nɛ wa hyɛ we blɔ. Be komɛ ɔ, wa yeɔ tsui ngɛ wa fɔli nɛ a wa ngɛ jeha mi ɔ a he. Se wa bua jɔ kaa wa seni ɔmɛ hyɛ wa fɔli ɔmɛ a nɔ kɛ ha wɔ. A kɛ tsui si tomi, bua jɔmi kɛ suɔmi tsu blɔ nya ní tsumi nɛ ɔmɛ a he ní. (1 Tim. 5:4) E ngɛ mi kaa waa kɛ wa fɔli ɔmɛ a he kɛ mohu lɛɛ, se wa pee nɔ́ fɛɛ nɔ́ nɛ wa ma nyɛ kɛ ye bua mɛ. Se be komɛ ɔ, wa nuɔ he kaa e sa nɛ wa ko pee babauu pe jã.

Ann-Catrin: Ngɛ jeha 1983 ɔ mi benɛ wa ngɛ sɔmɔe ngɛ Zaire ɔ, cholera nu mi si abɔ. Dɔkita a de Mats ke, “Moo ngɔ o yo ɔ kɛ je ma a mi mwɔnɛ ɔ nɔuu!” E nɔ jena a, wa ngɔ ɛloplee nɛ a kɛ woɔ tlomi ɔ kɛ ho Sweden ya.

Mats: Wa fo ya wawɛɛ ejakaa wa susu kaa wa be nyɛe ma tsa ma se sane kpakpa fiɛɛmi ní tsumi ɔ nɔ hu. E ngɛ mi kaa dɔkita a susu kaa Ann-Catrin be he wami náe hu mohu lɛɛ, se nyagbenyagbe ɔ, e ba ná he wami. Nɛ jeha kake se ɔ, wa kpale kɛ ho Zaire ya ekohu. Se amlɔ nɛ ɔ lɛɛ wa ya sɔmɔ ngɛ asafo nyafii ko ngɛ Lubumbashi nɛ a tuɔ Swahili gbi ɔ mi.

Ann-Catrin: Benɛ wa ngɛ Lubumbashi ɔ, i ba ngɔ hɔ, se ye hɔ ɔ ba puɛ. E ngɛ mi kaa wa pee we wa juɛmi kaa wa ma fɔ mohu lɛɛ, se wa bi ɔ gbenɔ ɔ dɔ mi wawɛɛ. Se ngɛ be nɛ mi wa nɛ ɔ mi po ɔ, wa nine su nike ní ko nɛ wa hyɛ we blɔ ɔ nɔ kɛ je Yehowa ngɔ. Wa je Baiblo mi ní kasemi fuu sisi pe be ko nɛ be ɔ. E sui jeha kake po nɛ fiɛɛli nɛ jinɛ a yibɔ ji 35 ɔ ya su 70, nɛ nihi nɛ a baa asafo mi kpe ɔ a he hiɛmi ya hɛ mi kɛ je 40 kɛ ya su 220. Wa be deka kulaa ngɛ fiɛɛmi ní tsumi ɔ mi, nɛ bɔ nɛ Yehowa jɔɔ ní tsumi ɔ nɔ ha a, ha nɛ wa bua jɔ wawɛɛ. Loloolo ɔ, wa yaa nɔ nɛ wa tuɔ wa bi ɔ nɛ gbo ɔ he munyu nɛ wa susuɔ e he. Waa kɛ bua jɔmi ngɛ be nɛ Yehowa ma je yeyee ɔ kɛ je kulaa ngɛ paradeiso ɔ mi ɔ blɔ hyɛe wawɛɛ.

Mats: E ba su be ko ɔ, Ann-Catrin ba gbɔjɔ wawɛɛ. Nɛ ngɛ jamɛ a be ɔ mi nɔuu ɔ, imi hu i ba ná kansa ko, nɛ a pee mi operation. Se amlɔ nɛ ɔ, i ngɛ he wami bɔ nɛ sa, nɛ Ann-Catrin hu ngɛ nɔ́ nɛ e ma nyɛ tsuo pee ngɛ Yehowa sɔmɔmi mi.

Wa ba yɔse kaa tsa pi wɔ pɛ nɛ waa kɛ kahi ngɛ kpee. Ngɛ jeha 1994 benɛ a hwu ta ngɛ Rwanda nɛ a gbe nihi babauu ɔ se ɔ, wa ya slaa wa huɛmɛ nɛ a ngɛ wesa hehi ɔ. Benɛ wa na a hemi kɛ yemi, a si fimi, kɛ bɔ nɛ a peeɔ nihi nibwɔ ha a ha nɛ wa na kaa Yehowa ngɛ he wami nɛ e kɛ yeɔ buaa e sɔmɔli ke a kɛ kahi ngɛ kpee.—La 55:22.

Ann-Catrin: Benɛ a ngɛ asafo ɔ ní tsumi kɔni nɛ ngɛ Uganda a nɔ jɔɔe ngɛ jeha 2007 ɔ mi ɔ, wa ná he blɔ nɛ wa ya. Benɛ wa ma a, waa kɛ oslaa ko nɛ nya wa kpe. Benɛ a gbe ní peemi ɔ nya a, waa kɛ ma se sane kpakpa fiɛɛli 25 kɛ Betel weku ɔ mi bimɛ ekomɛ sɛ lɔle mi kɛ yaa Nairobi ngɛ Kenya. Benɛ e piɛ bɔɔ nɛ wa maa su Kenya bɔda a nya a, lɔle ko je e blɔ nɔ nɛ e kɛ wa lɔle ɔ ba kpe. Wa dlɛɛva a kɛ wa huɛmɛ enuɔ gbo amlɔ nɔuu. Se nyɛmiyo kake lɛɛ e ya gbo pee se ngɛ hiɔ tsami he ɔ. Wa ngɛ blɔ hyɛe wawɛɛ kaa wa maa na wa huɛ ɔmɛ ekohu.—Hiob 14:​13-15.

I plaa ngɛ oslaa nɛ ɔ mi, se nyagbenyagbe ɔ, ye pa a ba gbo. I kɛ Mats kɛ ni kpahi nɛ oslaa nɛ ɔ ba a nɔ ɔ haoɔ ke wa kai nɔ́ nɛ ya nɔ ɔ. Ngɛ ye blɔ fa mi ɔ, i haoɔ wawɛɛ nyɔ mi, nɛ e haa nɛ ye tsui poɔ. E ngɛ gbeye wawɛɛ nitsɛ. Se wa tsui mi nɛ wa jeɔ kɛ sɔleɔ ha Yehowa, kɛ ngmami komɛ nɛ wa bua jɔ he nɛ wa susuɔ he ɔ, woɔ wa bua nɛ wa nyɛɔ nɛ wa daa nyagba nɛ ɔ nya. Jehanɛ ɔ, wa ya na dɔkitahi nɛ a hyɛɔ nihi nɛ a hao ɔ, nɛ a ye bua wɔ wawɛɛ. Amlɔ nɛ ɔ, wa hɛwi tsɔ, nɛ wa yaa nɔ nɛ wa sɔleɔ ha Yehowa konɛ e ye bua wɔ nɛ wa nyɛ nɛ waa wo nihi nɛ a kɛ nyagbahi kaa kikɛ ngɛ kpee ɔ a bua.

Benɛ nyɛ ngɛ nyagbahi nɛ nyɛɛ kɛ kpe ɔ he munyu tue ɔ, nyɛ de ke, Yehowa hɛɛ nyɛ “kaa hlui.” Mɛni nyɛ ngɛ hlae maa tsɔɔ?

Mats: A pɔɔ demi ngɛ Swahili gbi ɔ mi ke, “Tumebebwa kama mayai mabichi,” nɛ sisi ji, “A hɛɛ wɔ kaa hlui.” Kaa bɔ nɛ nɔ ko hɛɛɔ hlui saminya nɛ e ko ywia a, jã kɛ̃ nɛ Yehowa je mi mi jɔmi mi kɛ ye bua wɔ ngɛ ní tsumi fɛɛ ní tsumi nɛ a kɛ wo wa dɛ ɔ mi. Wa nine suɔ níhi nɛ wa hia a nɔ, nɛ be komɛ po ɔ, wa náa kɛ beɔ nɔ. Mi mi jɔmi nɛ Blɔ Tsɔɔmi Ajla Toli ɔmɛ je kpo kɛ tsɔɔ wɔ ɔ ha nɛ wa na kaa Yehowa suɔ wɔ, nɛ e fĩ wa se.

Ann-Catrin: Ma suɔ nɛ ma tu mi mi jɔmi nɛ Yehowa je kpo kɛ tsɔɔ wɔ ɔ kake he munyu. Ligbi ko ɔ, a tsɛ mi ngɛ fon nɔ, nɛ a de mi ke ye papaa be he wami kulaa ngɛ Sweden, nɛ a tsi e nya ngɛ hiɔ tsami he. Mats hu be he wami kpakpa ko, akɛnɛ malaria nu lɛ he je, nɛ wa be sika nɛ waa kɛ maa hia blɔ kɛ ya Sweden. Enɛ ɔ he ɔ, wa pee wa juɛmi kaa wa maa jua wa lɔle ɔ. Kɛkɛ nɛ nihi enyɔ tsɛ wɔ ngɛ fon nɔ. Nɔ kake ya pee wa huɛ ko kɛ e yo nɛ a nu wa si fɔfɔɛ ɔ he, nɛ a suɔ kaa a maa po tikiti kake ha wɔ. Nɔ kake hu ya pee nyɛmiyo ko nɛ e wa ngɛ jeha mi nɛ e to sika si kaa e kɛ maa ye bua nihi nɛ e fĩ mɛ ɔ. Kaa a fiaa hɛngmɛ ɔ, Yehowa ye bua wɔ!—Heb. 13:6.

Ke nyɛ hyɛ jeha 50 kɛ se nɛ nyɛɛ kɛ tsu be tsuo sɔmɔmi ní tsumi ɔ, mɛni nyɛ kase?

Ann-Catrin: I ba na kaa loko wa he maa wa a, ja wa ‘pee kpoo nɛ wa ngɔ wa hɛ kɛ fɔ’ Yehowa nɔ. Ke wa ngɔ wa hɛ kɛ fɔ Yehowa nɔ ɔ, e maa hwu ta kɛ ha wɔ. (Yes. 30:15; 2 Kron. 20:​15, 17) Akɛnɛ wa sɔmɔ Yehowa kɛ wa nyɛmi tsuo ngɛ ní tsumi fɛɛ ko nɛ a kɛ wo wa dɛ ɔ mi he je ɔ, Yehowa jɔɔ wɔ wawɛɛ nitsɛ. Jinɛ wa ko ná we jɔɔmi nɛ ɔmɛ ke wa tsu ní tsumi kpa ko.

Mats: Nɔ́ titli nɛ i kase ji kaa ma ngɔ ye hɛ kɛ fɔ Yehowa nɔ ngɛ nɔ́ fɛɛ nɔ́ mi, nɛ ma hyɛ bɔ nɛ e ma tsu níhi a he ní kɛ ha mi ha. (La 37:5) E yeɔ e si womihi a nɔ be fɛɛ be. Loloolo ɔ, wa naa Yehowa yemi kɛ buami ngɛ ní tsumi nɛ wa ngɛ tsue ngɛ Myanmar Betel ɔ.

Wa ngɛ hɛ kɛ nɔ fɔmi kaa Yehowa ma je suɔmi nɛ se pui kpo kɛ tsɔɔ nihewi kɛ yihewi nɛ a suɔ kaa a ma bli a sɔmɔmi ní tsumi ɔ mi kaa bɔ nɛ e pee ha wɔ ɔ. Wa ngɛ nɔ mi mami kaa ní tsumi fɛɛ ní tsumi nɛ a kɛ maa wo a dɛ ɔ, Yehowa maa ye bua mɛ konɛ a kɛ bua jɔmi nɛ tsu.