Kezimɔ Yɛkɛva Ahɛlɛta Mmalɛ Yɛkɔwɔ Nkɔmmɔwɔlɛ Tʋ

Ɔzʋmɩ January 2018 nɩ, bɛva mɔɔ yɛkɔhʋla yɛkɛhã wɔ dasɩlɛlilɛ nu bɛɣa Ɛbɩlawɔlɛ Nɩɩ Dasɩlɛlilɛ Dɩyɛzumanlɛ Kɛlɛta nɩ mɛda. Bɛhyɛ yɛ ɛzɩzɩbɛ kɛɛ yɛwɔ mmɔdɩnɩ kɛɛ yɛ nɩɩ mmenii mvʋlɔ kɔwɔ nkɔmmɔ kɛdɛla kɛɛ yɛkɛva awuuku yɛkɛma bɛ kɛkɛ. Mɔɔ ɩkɛma ɛlawulowɔlɛmaa bɛkɛyɛ eyi nɩ, bɛyɛ mɔɔ yɛkɔhʋla yɛkɛhã wɔ dasɩlɛlilɛ nu vidiyo azʋlɔtʋ nɩ na ama yɛanwʋ kezimɔ yɛkɛva Bayɩbʋlʋ nɩ yɛkɔwɔ nkɔmmɔwɔlɛ tʋ. Asʋ̃ eyi ikile kɛɛ, sɛ yɛyɛɛ abika abika nu dasɩlɛlilɛ a, íni kɛɛ yɛfa awuuku yedi egyima a? Anhã! Kɛ ndianwʋ nɩ, sa yɛkʋla yeduwa ahɛlɛta mmalɛ zʋ yɛbɔ nkɔmmɔwɔlɛ tʋ wɔ ɔhʋanɩ mɔɔ itu mpʋnɩ zʋ. Sɛ yɛlɛ ahɛlɛta mmalɛ nɩ yedii egyima a, sa yɛkʋla yeduwa ɔhʋanɩ eyi zʋ:

1. Biziá ndwokɔɣizialɛ mɔɔ ɩwɔ anyunumi nɩ.

2. Kilé munwalɩyɛ mɔɔ Bayɩbʋlʋ nɩ ɩfa ɩma wɔ ɛhɛlɛlɛ odwokɔ mɔɔ ɩwɔ owukolɛ anwɩ̃ yɩ sʋlɔ ɛkɛnɩ nɩ. Sɛ ɩwɔ mmɩlɩ a, kɩngá na bozunzú ndwokɔ be mɔɔ ɩwɔ kɛlɛta ɛɣalɛ yɩ nu nɩ nwʋ.

3. Fá kɛlɛta ɛɣalɛ nɩ ma pika yi diibenyia nɩ, na hyɛ́ yɩ ɛzɩzɩbɛ kɛɛ sɛ inyia mmɩlɩ a, ɩɣɩnga ndwokɔ mɔɔ ɩwɔ numɔ nɩ.

4. Ansaana ɔkɔhɔ nɩ, kilé yi odwokɔɣizialɛ mɔɔ ɩwɔ “Dwɩndwɩnɩ Eyi Nwʋ” nɩ na ɛ nɩɩ yɛ nhyɩhyɛlɩyɛ kɛɛ, sa esia ɛba ma bosunzu munwalɩyɛ mɔɔ Bayɩbʋlʋ ɩfa ɩma nɩ nwʋ.

Sɛ esia ɔkɔ a, bozunzú munwalɩyɛ nɩ nwʋ na fá odwokɔɣizialɛ fʋlɔ mɔɔ bokozunzu nwʋmɔ eɣile fʋlɔ nɩ yiaki yi. Sa ɔkʋla ɛyɩ odwokɔɣizialɛ be wɔ yɛ wɛbsayɩtɩ yɩ zʋ anzɛnyɩɩ buuku mɔɔ bɔhwɩ̃ adwɩnɩ beziye ɔzʋlɔ wɔ kɛlɛta yɩ mɛda nɩ. Wɔ mmɩlɩba nu nɩ, twɩ̃ adwɩnɩ siye Odwokɔba Mɔɔ Ɩzʋ̃ Nyamɩnlɩ Yɩ Ɛkɛnɩ! blohyʋɔ nɩ zʋ anzɛnyɩɩ buuku fʋlɔ mɔɔ ɩwɔ Nninyeni Mɔɔ Yɛfa Yekilehile nɩ be zʋ.