Asʋ̃ Ɩsɛ Kɛɛ Mʋbɔ Mpayɩ Mikile Saints a?

Mɔɔ Bayɩbʋlʋ yɩ kã

Anhã. Bayɩbʋlʋ yɩ kã kɛɛ ɩsɛ kɛɛ yeduwa Gyisɛsɩ yɩ dima nu yɛbɔ Nyamɩnlɩ yɩzayɩ nkʋ̃ mpayɩ. Gyisɛsɩ zeli yɩ adʋwavʋlɔ nɩ mmɔ kɛɛ: “Ɔzɔ ti sɛ mʋnlʋmmɔ bɔbɔɔ mpayɩ a bɔwɔ yɩ zɛ: Yɛ Zɩ mɔɔ ɔwɔ sʋlɔ, ma yɛva annidi yɛwɔ́ wu dima.” (Matiyu 6:9, New American Bible) Gyisɛsɩ ɩákã ikile yɩ adʋwavʋlɔ nɩ mmɔ kyɩ̃ kɛɛ bɔwɔ́ mpayɩ behilé saints, awɔvʋlɔ anzɛnyɩɩ enii fʋlɔ bela mfomi Nyamɩnlɩ nkʋ̃ la.

Gyisɛsɩ zialɩ hanlɩ hileli yɩ mɛdalilɛmaa yɩ kɛɛ: “Mamɩ yɛ mɩdɩ ɔhʋanɩ nɩ nɔhʋanlɛ nɩ nnwʋanlɩ nɩ a. Abiyela ɩlɔ́kʋla Ɛzɩlɛ nɩ yɩ ɛkɛnɩ kɔ, sa iluwa mʋ zʋ.” (Dwɔɔnʋ 14:6, NAB) Gyisɛsɩ la yɛ Nyamɩnlɩ ma nwʋmɔ ɔhʋanɩ yɩ kɛɛ iziã ɩma yɛ a.—Hibulumaa 7:25.

Sɛ mʋbɔ Nyamɩnlɩ mpayɩ na misia mʋbɔ saints mpayɩ sʋ̃ ɛ?

Mmɩlɩ mɔ Gyisɛsɩ ibuwaa odwohilalɛ mɔɔ Abɔnsamɩ va ɣalɩ yɩ zʋ nɩ, ɩhanlɩ kɛɛ: “Sʋ̃mɩ Niibenyia wʋ Nyamɩnlɩ nɩ, na mɛyɩ nkʋ̃ la yɛ ɩwɔ kɛɛ ɔsʋ̃mɩ yɩ a.” (Matiyu 4:10) Nyamɩnlɩ pɩbɛ kɛɛ yɛkɔzʋ̃mɩ yɩzayɩ nkʋ̃tɩnyɩɩ. Meti debela mɔɔ ɩfalɩ ɔzʋ̃mɩnlɛ nwʋ mɔɔ mpayɩwɔlɛ kɩnla nwʋmɔ nɩ, ɩsɛ kɛɛ yɛfa yɛma Nyamɩnlɩ yɩzayɩ nkʋ̃tɩnyɩɩ.—Ayɩzaya 48:11.

Nyamɩnlɩ yɩ anyɩ lédeli nwʋmɔ kɛɛ yɛkɔwɔ abiye fʋlɔ, saints anzɛnyɩɩ awɔvʋlɔ mɔɔ bɛdɩ nwanzanwanza nɩ po mpayɩ. Mmɩlɩ mɔ sʋ̃mavʋlɔ Dwɔɔnʋ yɛlɩ kɛɛ ɩkɔzʋ̃mɩ bɔvʋlɔ be nɩ, bɔvʋlɔ yɩ ɩáma ɔhʋanɩ yɩ. Mfomi ɩhanlɩ ihileli yi kɛɛ: “Áma ɛyɛ ɔzɔ! Sianti yɛ lɛ kɛɛ, mɩzamɩ sʋ̃ mɩdɩ Nyamɩnlɩ sʋ̃mɩvʋlɔ, kɛmɔ mɔwʋ nɩɩ dedimaa mɔɔ bɔzɔlɩ nɔhʋanlɛ nɩ mɔɔ Gyisɛsɩ Kɩlayɩsɩ ɩyɩlɩ ihileli bɛ nɩ bɛdɩ nɩ. Sʋ̃mɩ Nyamɩnlɩ na áma ɔsʋ̃mɩ mamɩ.”—Yikile 19:10.