Sɛ Adwɩnɩndwɩnɩ Hyɛ Mʋ Zʋ a, Bayɩbʋlʋ Yɩ Kɔhʋla Kɔwʋwa Mɩ a?

Mɔɔ Bayɩbʋlʋ yɩ kã

Nyɛ, iluwakɛɛ mmʋwalɩyɛ baaba nɩ zʋ̃ “Nyamɩnlɩ mɔɔ ɩkyɩkyɩ bɛzabɛ mɔɔ bɛ ɛɣɛɛlɛ wɔ bɛ ɛɣɛɛlɛ nɩ” yɩ kɛnɩ.​—2 Kɔlɛntɩmaa 7:6.

Mɔɔ Nyamɩnlɩ fa bʋwa bɛzabɛ mɔɔ adwɩnɩndwɩnɩ hyɛ bɔ zʋ nɩ

• Anwʋzɩzɩbɛ. Wʋ “ɛɣɛɛlɛ” mɔɔ Nyamɩnlɩ kɛyɩkyɩ nɩ iáhile kɛɛ ɩkɛyɩ wʋ ndwokɔzɩzɩbɛ munwala wɔ wʋ zʋ mfomi ikowuwa wʋ mpayɩwɔlɛ na wʋanyia anwʋzɩzɩbɛ mɔɔ ɛkɛva kegyina yi munwa. (Fɩlɩpɩmaa 4:13) Ɔkɔhʋla kenyia anwʋlazʋ kɛɛ Nyamɩnlɩ kediye wʋ iluwakɛɛ Bayɩbʋlʋ yɩ kã kɛɛ: “Gyehova bike bɛzabɛ mɔɔ bɛ ahʋnlɩnɩ wuwu nɩ; na ide bɛzabɛ mɔɔ bɛ padi golɔ nɩ.” (Ndwomi 34:18) Nɔhʋanlɛ odwokɔ yɛ lɛ kɛɛ, sɛ osũ fʋlɔ Nyamɩnlɩ wɔ mpayɩwɔlɛ nu a, ikediye wʋ mmɩlɩ mɔ wʋánwʋ mɔɔ ɛhãã hile yi po nɩ.​—Wulomimaa 8:26, 27.

• Bɛzabɛ mɔɔ bɛyɛ ndianwʋba. Bayɩbʋlʋ ɛhɛlɛvʋlɔ be wɔlɩ mpayɩ kɛɛ: “Mɩ aɣɛɛlɛbɔlilɛ nu yɛ mukozũ mʋkɔvʋlɔ wʋ a.” Ndwomidʋlɛvʋlɔ yɩ lili yɩ adwɩnɩndwɩnɩ zʋ iluwa ɛhakɛlɛ mɔɔ ɩhakɛlɩ kɛɛ Nyamɩnlɩ pɛ kɛɛ ɩfa yɛ tanɩ ɩkyɛ yɛ nɩ. Mfomi ɩhanlɩ kɛɛ: “Sɛ ɔkɔ zʋlɔ obu yɛ tanɩ nwʋ ngʋnda a, ankɩ aninyia yɛ ɩkɔhʋla ikegyina wʋ anyunu a? Naasʋ̃ ɛfa kyɛ yɛ, na ama yɛahʋla yɛagyina wʋ anyunu.”​—Ndwomi 130:1, 3, 4, Good News Translation.

• Anyɩnlɩlazʋ. Kɛ yɛ ɛɣɛɛlɛ nkʋ̃ la yɛ Nyamɩnlɩ kyɩkyɩ a, mfomi ɩwɔ anʋhʋba kɛɛ ɩkɛyɩ ɔhawʋ azʋlɔtʋ mɔɔ ɩfa adwɩnɩndwɩnɩ ɩba nɩ sʋ̃ wɔ kɛ. Sɛ ɔzɔ anʋhʋba yɩ ba nu a, ‘yɛlɛ́kakɛ nninyeni dadampɔ [mɔɔ adwɩnɩndwɩnɩ kɩnla nwʋmɔ] nɩ dɔkʋ̃, na ɩlɛ́ba ahʋnlɩnɩ nu ebiyekʋ̃.’​—Ayɩzaya 65:17.

Yɛ yɩ ndwɩ̃: Gyehova Dasɩvʋlɔmaa de mmʋwalɩyɛ mɔɔ Nyamɩnlɩ fa ma nɩ tiã nu naasʋ̃ bɔkɔ bɔnwʋ alɔkɩtamaa mmɩlɩ mɔ adimakɛlɛ be va adwɩnɩndwɩnɩ diã bɔ zʋ nɩ. (Maakɩ 2:17) Naasʋ̃ Gyehova Dasɩvʋlɔmaa bɛáhile awudo pɔkyɩɩ mɔɔ ɔnlʋ; yɛnwʋ yɩ kɛɛ ɩsɛ kɛɛ abiyela yɩzayɩ isi bʋwabɩlɛ mɔɔ ɩdɩ zɔ nwʋ pɔkɔ.