Adimakɛlɛ Mɔɔ Bɛsa a, Ɩáhɔ​—Asʋ̃ Bayɩbʋlʋ Yɩ Kɔhʋla Kɔwʋwa Wʋ a?

Mɔɔ Bayɩbʋlʋ yɩ kã

Nyɛ. Nyamɩnlɩ dwɩnɩ yɩ azʋ̃mɩvʋlɔ mɔɔ bɔ nwʋ ɩba bɛ nɩ munwatĩĩ nwʋ. Mɔɔ ɩfalɩ yɩ azʋ̃mɩvʋlɔ nɔhʋanlɛmaa nwʋ nɩ, Bayɩbʋlʋ yɩ kã kɛɛ: ‘Gyehova yɩzayɩ munli yi ɩkɔwʋwa wʋ wɔ wʋ adimakɛlɛ mba zʋ.’ (Ndwomi 41:3) Sɛ adimakɛlɛ be ɩtɩdɩɩ wʋ a, ndwokɔ abɔkɔ asã mɔɔ ilili zʋlɔ eyi kɔhʋla kɛyɩkyɩ wʋ ɛɣɛɛlɛ na wʋahʋla wʋagyina yi munwa:

1. Bɔ mpayɩ siã anwʋzɩzɩbɛ mɔɔ ɛkɛva kegyina yi munwa. Sa ɔkʋla nyia “Nyamɩnlɩ yɩ azʋ̃nudwolɩyɛ mɔɔ ɩtɛla enii yɩ ntɩyasɩ munwatĩĩ nɩ” be, mɔɔ ɩkɔhʋla ɩkɛdɩ wʋ adwɩnɩndwɩnɩ zʋ na ama wʋahʋla wʋagyina yi munwa.​—Fɩlɩpɩmaa 4:6, 7.

2. Nyia adwɩnɩba. Bayɩbʋlʋ yɩ kã kɛɛ: “Sɛ wʋ anyɩ de a, ɩma enyia pɔkɔdɩlɛ baaba. Na sɛ edi aɣɛlɛbɔ mmɩlɩ munwala a ɩma wʋ anwʋzɩzɩbɛ zʋ tɩ.” (Ɛɣɛlɛwulɛ 17:22) Yɛ nninyeni be mɔɔ ɩkɛma wʋ anyɩ kele, na mɛyɩ kɔwʋwa wʋ ma ɛkɛdɩ wʋ ɔhawʋ nɩ zʋ na wʋanyia pɔkɔdɩlɛ baaba sʋ̃.

3. Hyɛ anwʋlazʋ mɔɔ ɔwɔ wɔ Nyamɩnlɩ yɩ anʋhʋba nu nɩ ɛzɩzɩbɛ. Anwʋlazʋ baaba mɔɔ ɔwɔ nɩ kɔhʋla kɔwʋwa wʋ ma ekenyia anyɩnlɩlelɛ ɩávalɩ nwʋ adimakɛlɛ mɔɔ ɩtɩdɩɩ wʋ nɩ. (Wulomimaa 12:12) Bayɩbʋlʋ yɩ kã eɣile be mɔɔ “abiyela ɩlɛ́kã kɛɛ: ‘Mʋ nwʋ ɩba mɩ’” nwʋ odwokɔ. (Ayɩzaya 33:24) Nyamɩnlɩ kɛyɩ adimakɛlɛ bela mɔɔ ɩyɛ sɩ ɩma enii kɛɛ ɩkɛyɩ wɔ kɛnɩ nɩ wɔ kɛ. Kɛ ndianwʋ nɩ, Bayɩbʋlʋ yɩ kã ebani mɔɔ ɩkɛyɛ kuakula dɔkʋ̃ na ianyia pɔkɔdɩlɛ baaba nwʋ odwokɔ kɛɛ: “Ma yɩ nnwʋnlamɩ ɩdɔ ɔzʋlɔ ɩdɛla mmɩlantɩyɛ nɩɩ nɣɛdɛkɛ bɛ dɩyɛ; ma izia inyia yɩ mmɩlantɩyɛ anzɛnyɩɩ yɩ nɣɛdɛkɛ mmɩlɩ nu anwʋzɩzɩbɛ nɩ ebiyekʋ̃.”​—Dwoobu 33:25.

Yɛ yɩ ndwɩ̃: Gyehova Dasɩvʋlɔmaa de mmʋwalɩyɛ mɔɔ Nyamɩnlɩ fa ma nɩ tiã nu naasʋ̃ bɔkɔ bɔnwʋ alɔkɩtamaa mmɩlɩ mɔ adimakɛlɛ be va adwɩnɩndwɩnɩ diã bɔ zʋ nɩ. (Maakɩ 2:17) Naasʋ̃ Gyehova Dasɩvʋlɔmaa bɛáhile awudo pɔkyɩɩ mɔɔ ɔnlʋ; yɛnwʋ yɩ kɛɛ ɩsɛ kɛɛ abiyela yɩzayɩ isi bʋwabɩlɛ mɔɔ ɩdɩ zɔ nwʋ pɔkɔ.