Mɩnla Ɔhʋanɩ Zʋ Yɛɛ Mansini Zʋ Ehilalɛmaa Bɔbʋwa Yɛ a?

Kilisinyianɩ Giliki Ɛhɛlɛlɛ Odwokɔ yɩ nɩ ɩtaa ɩbɔ Banabasɩ nɩɩ Pɔɔlʋ bɛ alima. Ɔzɔ mmenyia yɩ nɩ, bɔzʋ̃mɩnlɩ kɛɛ ehilalɛmaa mɔɔ botudu ahʋanɩ bekyegyela asafʋ azʋlɔtʋ yɩ nɩ. Mɩnla pɔkɔ ti a? Nɩ bɔdwɩnɩ bɛ sunzuma nu mmeliyema bɔ bʋwɔyɛlɛ nwʋ. Pɔɔlʋ ɩhanlɩ kɛɛ, ɩpɛyɩ kɛɛ ‘isialɩ yɩ mɛda ɩkɔ ikyela dedimaa nɩ’ na ɩahila kezimɔ bɔnwʋ ɩdɩ. Nɩ ɩwɔ ɛpɛ kɛɛ ikodudu ahʋanɩ mayɛlɩ adɩndɩnlɩ kɛmɔ ɩkɛyɛ na ɩahɔ ɩahyɛ mmeliyema yɩ nɩ ɛzɩzɩbɛ. (Egyima 15:36) Ɔzɔ ɛpɛyɩ nɩ la yɛɛ yɛ ehilalɛmaa mɔɔ botudu ahʋanɩ yɩ nɩ bɛlɛ yɩ nnɛ sʋ̃ a.

Bɛba bɛhyɛ yɛ ɛzɩzɩbɛ. Mansini zʋ ehilalɛvʋlɔ ikyegyela asafʋ azʋlɔtʋ kɛyɛ 20 anzɛnyɩɩ mɔɔ ɩbʋ ɔzɔ, na wɔ ɔlʋbɔ yɩ nu nɩ ikyela bɛ mbɔmɩ anwɩ̃ mɔɔ idi dapɛnɩ wɔ asafʋ bela nu. Sa yɛkʋla yenyia mfasʋ kezile wɔ ɔzɔ mmeliyema bɛ ozumanlɛnwʋnlɛ yɩ zʋ, na sɛ begyia sʋ̃ a, yɛanyia bɛ yɩmmɔ sʋ̃ bɛ ozumanlɛnwʋnlɛ yɩ zʋ mfasʋ. Ehilalɛmaa nɩɩ bɛ yɩmmɔ bɔ mmɔdɩnɩ kɛɛ bɔkɔnwʋ nnwuakula nɩɩ mbanimbani munwala bʋwɔ, na bɛ nɩɩ yɛ bonu yɛ odwokɔhanlɛ egyima yɩ na bɛ nɩɩ yɛ kɔyɛ yɛ Bayɩbʋlʋ dɩyɛzumanlɛ azʋlɔtʋ yɩ sʋ̃. Ɔzɔ ehilalɛmaa yɩ nɩ, bɛ nɩɩ mbanimbani bɔ numɔ kɔ kyegyela asafʋ yɩ nu mmeliyema, bɛhyɛ yɛ ɛzɩzɩbɛ, na bɛma ndɛnɩ mɔɔ ɩhyɛ yɛ ɛzɩzɩbɛ wɔ yɛ asafʋ ayiyialɩyɛ nɩɩ yɛ ayiyialɩyɛ nɣezile tʋ..​—Egyima 15:35

Bɛanyɩ ideli abiyela nwʋ. Mansini zʋ ehilalɛmaa bɛanyɩ wɔ asafʋ azʋlɔtʋ yɩ sunzuma fʋãnu bʋwabɩlɛ yɩ zʋ bʋwɔ. Beyiyia asafʋ yɩ nu mbanimbani nɩɩ azʋ̃mɩvʋlɔ na bɛ nɩɩ bɛ sunzu anyunumihɔlɛ mɔɔ benyia na bɛma fʋlɔdulɛ mɔɔ bɛkɛva bekeli bɛ asɛdɩ nwʋ egyima. Bɔbʋwa ɔhʋanɩbukolɛmaa yɩ nɩ ma bɔkʋla bɛyɛ bɛ ɔzʋ̃mɩnlɛ egyima yɩ nɩ bʋwɔ, na bɛanyɩ sʋ̃ ideli ɔnwʋmɔ kɛɛ bɔkɔnwʋ mmenii mvʋlɔ mɔɔ bɛɣa nɔhʋanlɛ yɩ nu, na bɛanwʋ kɛmɔ benyia anyunumihɔlɛ. Mmeliyema eyimmɔ bonu bela ɩfa ɩnwʋ ɩma kɛɛ ‘ɔhɔnwʋ mɔɔ bɔbɔ nu bɛyɛ egyima bɔbʋwa yɛ’ (2 Kɔlɛntɩmaa 8:23) Ɩsɛ kɛɛ yesumazuma be dedi nɩɩ bɔnwʋ mɔɔ bodu beziye ɛkɛnɩ bɛma Nyamɩnlɩ yɩ nɩ.—Hibulumaa 13:7.

• Mɩnla ti mɔɔ mansini zʋ ehilalɛmaa nɩ bekyegyela asafʋ azʋlɔtʋ yɩ nɩ a?

• Mɩnla ɔhʋanɩ zʋ yɛɛ ɔkɔhʋla ekenyia bɛ egyelalɛ yɩ zʋ mfasʋ a?