Mɩnla Dɩyɛ Yɛɛ Ɩfa Abusunwa Nu Anyɩnlɩlelɛ Ɩba a?

MƆƆ BAYƖBƲLƲ YƖ ƖKÃ

“Sikalɛpɛyɩ mɔɔ bɔnwʋ nɔhʋanlɛ yɩ sɛ bɛfa bɛyɛ be egyima a bekeli fɛlɛkʋ̃ sʋ̃maa!”—Dwɔɔnʋ 13:17, Nhyɩhyɛlɩyɛ Fʋlɔ Aɣɩnda Bayɩbʋlʋ.

MƖNLA MFASƲ YƐ ƖKƐMA EKENYIA?

Ekenyia ɔlɔlɛ kanyɩɩ wɔ wʋ abusunwa nu.—Ɛfɩsɛsɩmaa 5:28, 29.

Ekenyia abusunwa mɔɔ bedi bɔnwʋ bɔnwʋ nni.—Ɛfɩsɛsɩmaa 5:33.

Ekenyia abusunwa mɔɔ bede bɔnwʋ bedi.—Maakɩ 10:6-9.

ASƲ̃ SA YƐKƲLA YEDE MƆƆ BAYƖBƲLƲ ƖKÃ YƖ NƖ YEDI A?

Nyɛ, sianti anwɩ̃ be ti:

• Nyamɩnlɩ yɛɛ ɩdɩ abusunwa Ɩhyɩhyɛlɛvʋlɔ a. Bayɩbʋlʋ ɩkã kɛɛ “abusunwa bela . . . bɔwɔ ɛkɛnɩ” iluwa Gyehova Nyamɩnlɩ ti. (Ɛfɩsɛsɩmaa 3:14, 15) Wɔ ɔhʋanɩ fʋlɔ zʋ nɩ, abusunwa nhyɩhyɛlɩyɛ wɔ ɛkɛnɩ iluwakɛɛ Gyehova yɛ ɩwɔlɩ a. Mɩnla ti mɔ eyi nwʋ ihyinyia?

  Sunzu eyi nwʋ kila: Sɛ edi alɩyɛ be mɔɔ ɩyɛ fɛ na sɛ ɛpɛyɩ kɛɛ ɔnwʋ nninyeni mɔɔ bɛva bɛyɛlɩ alɩyɛ yɩ a, aninyia yɛɛ ekeɣizia yɩ a? Pɩlazunlɛ bela íni ɔnwʋmɔ kɛɛ, ekeɣizia enii mɔɔ ɩyɛlɩ alɩyɛ yɩ nɩ.

  Ɔzɔla sʋ̃ yɛɛ sɛ ɔkɔnwʋ nninyeni mɔɔ ɩfa abusunwa nu anyɩnlɩlelɛ ɩba a, ɩsɛ kɛɛ ɛpɩbɛ Gyehova, enii mɔɔ Ɩwɔlɩ abusunwa nhyɩhyɛlɩyɛ nɩ.—Matiyu 19:4-6.

• Nyamɩnlɩ ɩdwɩnɩ wʋ nwʋ. Meti nɣɛlɛbɛ wɔ numɔ kɛɛ abusunwa bela ɩpɩbɛ Gyehova yɩ ɛkɛnɩ fʋlɔdulɛ mɔɔ iluwa yɩ Odwokɔ yɩ zʋ ɩfa ɩma nɩ. Mɩnla ti a? “iluwakɛɛ ɩdwɩnɩ mʋnlʋmmɔ bɔ nwʋ.” (1 Pita 5:6, 7) Wʋ odwokɔ ɩla Gyehova yɩ ahʋnlɩnɩ zʋ—na yɩ ɔhʋanɩhilelɛ yɛ egyima mmɩlɩ munwatĩĩ!—Fɩlɩpɩmaa 4:6, 7; Isaiah 48:17, 18, New World Translation.