Asʋ̃ Awuvʋlɔ Bekezia Bɛkɛɣa Nnwʋanlɩ Nu Dɔkʋ̃ a?

MƆƆ BAYƖBƲLƲ YƖ ƖKÃ

“Bɛbadunwo bɛ wɔ owulo nu bɛkɛɣa nnwʋanlɩ nu.”—Egyima 24:15, Nhyɩhyɛlɩyɛ Fʋlɔ Aɣɩnda Bayɩbʋlʋ.

MƖNLA MFASƲ YƐ ƖKƐMA EKENYIA?

Ekenyia ɛɣɛɛlɛ yɩkyɩlɛ mmɩlɩ mɔɔ wʋ dɔvʋlɔ be iwu nɩ.—2 Kɔlɛntɩmaa 1:3, 4.

Ɩkɛma ɛkɛyɩ owulo nwʋ bɔlɔ bela wɔ wʋ nu.—Hibulumaa 2:15.

Ekenyia anyɩnlɩlazʋ baaba be kɛɛ ɩlɛ́kyɛ ɛnɩ wʋ alɔvʋlɔ mɔ bowu nɩ bekezia bɔkɔwʋwa azɩ ebiyekʋ̃.—Dwɔɔnʋ 11:23, 24.

ASƲ̃ SA YƐKƲLA YEDE MƆƆ BAYƖBƲLƲ ƖKÃ YƖ NƖ YEDI A?

Nyɛ, sianti asã be ti:

• Nyamɩnlɩ yɛɛ ɩdɩ nnwʋanlɩ Ɩwɔlɛvʋlɔ a. Bayɩbʋlʋ ɩkã kɛɛ, Gyehova Nyamɩnlɩ “yɛ ɩma enii bela nnwʋanlɩ nɩɩ mmʋnlɩlelɛ nɩɩ dɩyɛ bela a.” (Egyima 17:24, 25) Nyamɩnlɩ mɔɔ ɩdɩ nnwʋanlɩ manlɛvʋlɔ nɩ ɩkɔhʋla ɩkɛma abiye mɔɔ iwu nɩ ikezia ɩkɛɣa nnwʋanlɩ nu ebiyekʋ̃.

• Nyamɩnlɩ idunwo awuvʋlɔ kyɩ̃. Bayɩbʋlʋ ɩkã mmenii awɔtwɛ be mɔɔ bodunwonli bɛ ma bɛɣalɩ nnwʋanlɩ nu wɔ azɩlɛ yɩ zʋ nwʋ odwokɔ, na nɩ bonu be bɛdɩ—nnwuakula, mbanimbani, mmenyia, nɩɩ mmaalɛ. Nɩ ebiyemmɔ bowuli a ɩlɛ́kyɛlɩ, naasʋ̃ nɩ bonu ɔkʋ̃ wɔ ɛkɛnɩ mɔɔ beziye yɩ ma ili aɣile anla wɔ nna nu!—Dwɔɔnʋ 11:39-44.

• Nyamɩnlɩ ɩnwʋ ɩpɩlɩ yɩ kɛɛ ɩkɛyɛ yɩ ebiyekʋ̃. Gyehova ikyi owulo; ɩ nwʋ yɩ kɛɛ ɩdɩ tamvʋlɔ. (1 Kɔlɛntɩmaa 15:26) Ɩanyɩ la kɛɛ ikodu ɔzɔ tamvʋlɔ yɩ nɩ, na ɩaluwa awudunwolɩyɛ zʋ ɩali owulo zʋ nkunimi. Ɩpɛyɩ kɛɛ ɩma mmenii mɔɔ bowu mɔɔ bɔnwʋ adwɩnɩ wɔ yi ti nu nɩ bɛba nnwʋanlɩ nu na ɩanwʋ bɛ kɛɛ bɛda azɩ ebiyekʋ̃.—Dwɔɔnʋ 5:28, 29.