Samʋwɛlɩ Ɩhɔlɩ Ɔzʋlɔ Ɩyɛlɩ Mɔɔ Ɩdɩ Baaba

Ɔzʋmɩ mmɩlɩ mɔɔ nɩ Samʋwɛlɩ ɩdɩ kuakula nɩ, nɩ ɩda ɛkɛnɩ na nɩ ɩyɛ egyima sʋ̃ wɔ asɔlɩ aliyia nu, dɩka mɔɔ nɩ mmenii bɛba bɔsʋ̃mɩ Gyehova nɩ. Ezi mɔɔ ɩyɛlɩ mɔɔ Samʋwɛlɩ ɩhɔlɩ ilili asɔlɩ aliyia yi nu a? Ma yeli bɔmʋnlɩ yezuma Samʋwɛlɩ yɩ maamɩ Hana ɩnwʋ dɩyɛ.

Nɩ Hana ɩpɛɛ ɛɣalɛ naasʋ̃ nɩ ɩáwʋ. Meti ɩwɔlɩ Gyehova mpayɩ na izianlɩ yɩ kɛɛ ɩwʋwa yɩ. Ɩwɔlɩ anʋhʋba kɛɛ sɛ ɩma ɩwʋ ɛɣalɛ benyia a, sa ɩfa yɩ ɩkɔ ɩbʋwʋwa asɔlɩ aliyia nu na ɩayɛ egyima wɔ ɛkɛnɩ. Gyehova iwuwalɩ yɩ mpayɩwɔlɛ nɩ, na ɩwʋlɩ ɛɣalɛ benyia. Ɩdɩnlɩ yi dima Samʋwɛlɩ. Na dɩkɛ mɔɔ nɩ Hana ɩwɔ anʋhʋba nɩ, mmɩlɩ mɔɔ Samʋwɛlɩ ilili alʋbɔ asã anzɛnyɩɩ anla nɩ, ɩvalɩ yɩ ɩhɔlɩ ɩwʋwalɩ asɔlɩ aliyia nu kɛɛ ɩzʋ̃mɩ Nyamɩnlɩ wɔ ɛkɛnɩ.

Nɩ Ilayɩ yɛ ɩdɩ ɔsɔfʋ ebani wɔ asɔlɩ aliyia nu a. Nɩ yɩ mma mmenyia anwɩ̃ sʋ̃ bɛyɛ egyima wɔ ɛkɛnɩ. Kakɛ kɛɛ, nɩ asɔlɩ aliyia nɩ ɩdɩ Nyamɩnlɩ yɩ aliyia mɔɔ bɔsʋ̃mɩ yɩ wɔ ɛkɛnɩ, na ɩwɔ kɛɛ mmenii bɛyɛ nninyeni baaba wɔ ɛkɛnɩ. Naasʋ̃, nɩ Ilayɩ yɩ nnwuakula nɩ bɛyɛɛ nninyeni tanɩ. Samʋwɛlɩ ɩnwʋnlɩ mɔɔ nɩ bɛyɛɛ nɩ. Asʋ̃ Samʋwɛlɩ ɩyɛlɩ nninyeni tanɩ mɔɔ nɩ Ilayɩ yɩ nnwuakula mmenyia nɩ bɛyɛɛ nɩ be a?— Anhã, ɩhɔlɩ ɔzʋlɔ ɩyɛlɩ mɔɔ ɩdɩ baaba, dɩkɛ mɔɔ nɩ yɩ awʋvʋlɔ behilehile yɩ kɛɛ ɩyɛ nɩ la.

Mɩnla yɛɛ ɔdwɩnɩ kɛɛ, ankɩ nɩ ɩsɛ kɛɛ Ilayɩ ɩyɛ ɩfalɩ yɩ nnwuakula mmenyia anwɩ̃ nɩ bɔ nwʋ a?— Nɩ ɩsɛ kɛɛ ɩtwɩ̃ bɛazʋ̃. Ankɩ nɩ íni mɔɔ ɩma ɔhʋanɩ bɛ ma bɛyɛ egyima wɔ Nyamɩnlɩ yɩ awudo dɔkʋ̃. Naasʋ̃ Ilayɩ ɩáyɛ ɔzɔ, meti Gyehova inyianlɩ Ilayɩ nɩɩ yɩ nnwuakula mmenyia anwɩ̃ nɩ bɔnwʋ ɛya. Gyehova izili pɔkɔ kɛɛ sa ɩtwɩ̃ bɛazʋ̃.

Nunuma ɔkʋ̃ be nɩ, nɩ Samʋwɛlɩ ɩdaa, na ɩdɩlɩ kɛɛ abiye ɩfʋlɔ yɩ kɛɛ: ‘Samʋwɛlɩ!’ Na idwodwuli iduli tɔlɔnwa ɩhɔlɩ Ilayɩ yɩ ɛkɛnɩ, naasʋ̃ Ilayɩ ɩhanlɩ kɛɛ: ‘Mɩlɛ́fɩlɛlɩ wʋ.’ Eyi izili mbɔmɩ anwɩ̃. Na mɔɔ ɩtɔ ɔzʋlɔ asã nɩ, Ilayɩ ɩhanlɩ ihileli Samʋwɛlɩ kɛɛ, sɛ ɩtɩ ɔzɔ nnɩ nɩ dɔkʋ̃ a, ɩhã kɛɛ: ‘Misiãã wʋ, Gyehova, tɩndɛ, na mitiye.’ Meti ɔzɔ la yɛ Samʋwɛlɩ ɩyɛlɩ a. Meti Gyehova ɩhanlɩ ihileli Samʋwɛlɩ kɛɛ: ‘Kã kile Ilayɩ kɛɛ, sa mʋtwɩ̃ yɩ abusunwa bɛazʋ̃ wɔ nninyeni tanɩ mɔɔ bɛyɛɛ nɩ nwʋ.’ Osunzu kɛɛ nɩ ɩyɛ mɛlɛkɛ ɩma Samʋwɛlɩ kɛɛ ɩkɛhã ɔzɔ odwokɔ nɩ ikehile Ilayɩ a?— Anhã, nɩ ɩáyɛ mɛlɛkɛ. Ɩwɔ numɔ kɛɛ nɩ Samʋwɛlɩ yi kunlu idu dɩyɛ naasʋ̃, ɩyɛlɩ mɔɔ Gyehova ɩhanlɩ ihileli yɩ kɛɛ ɩyɛ nɩ. Mɔ Gyehova ɩhanlɩ nɩ ɩɣalɩ numɔ pɛpɛɛpɛ. Ihunli Ilayɩ yɩ nnwuakula mmenyia anwɩ̃ nɩ, na Ilayɩ yɩzayɩ sʋ̃ iwuli.

Samʋwɛlɩ ɩdɩ ndianwʋ baaba ɩma yɛ. Ɩyɛlɩ mɔɔ ɩdɩ baaba, ɩávalɩ ɔnwʋmɔ kɛɛ ɩnwʋnlɩ mmenii mvʋlɔ mɔɔ nɩ bɛyɛɛ nninyeni tanɩ. Na wʋzawʋ sʋ̃ ɛ? Sa ɛyɛ kɛɛ Samʋwɛlɩ na wʋahɔ ɔzʋlɔ wʋayɛ mɔɔ ɩdɩ baaba a? Sɛ ɛyɛ ɔzɔ a, sa ɛma Gyehova nɩɩ wʋ awʋvʋlɔ bɛ anyɩ ide.