Gyehova Nɩɩ Samʋwɛlɩ Dɩndɛlɩ

Ná Ɔsɔfo Panyin Eli wɔ mmabarima mmienu a wɔsom sɛ asɔfo wɔ asɔrefie hɔ. Wɔn din de Hofni ne Finehas. Wɔanni Yehowa mmara so, na na wɔne nkurɔfo nni no yiye koraa. Sɛ Israelfo de mmoa bɛbɔ afɔre ma Yehowa a, na Hofni ne Finehas yiyi nam papa no fa. Eli tee nea na ne mmabarima no reyɛ, nanso wanyɛ ho hwee. Enti na Yehowa bɛhwɛ ama wei akɔ so saa ara?

Ɛwom, na Hofni ne Finehas anyin sen Samuel, nanso Samuel ansuasua wɔn. Yehowa ani gyee Samuel ho. Anadwo bi, bere a Samuel ada no, ɔtee sɛ ɛnne bi refrɛ no. Ɔsɔree, na ɔde mmirika kɔɔ Eli nkyɛn, na ɔkaa sɛ: ‘Mini!’ Nanso Eli kaa sɛ: ‘Memfrɛɛ wo. San kɔda.’ Samuel san kɔdae. Ɛnne no san baa bio. Bere a Samuel tee sɛ ɛnne no refrɛ no ne mprɛnsa so no, Eli huu sɛ ɛyɛ Yehowa na ɔrefrɛ Samuel. Ɔka kyerɛɛ Samuel sɛ, sɛ ɔsan te ɛnne no bio a, ɔnka sɛ: ‘Yehowa, kasa. W’akoa retie.’

Samuel san kɔdae. Afei ɔtee ɛnne bi sɛ: ‘Samuel! Samuel!’ Obuae sɛ: ‘Kasa, na w’akoa retie.’ Yehowa ka kyerɛɛ no sɛ: ‘Ka kyerɛ Eli sɛ, merebɛtwe ɔne n’abusua aso. Onim sɛ ne mmabarima no reyɛ nneɛma bɔne wɔ asɔrefie hɔ, nanso ɔnyɛ ho hwee.’ Ade kyee no, Samuel buebuee asɔrefie apon no sɛnea daa ɔyɛ no. Ná osuro sɛ ɔbɛka asɛm a Yehowa ka kyerɛɛ no no akyerɛ ɔsɔfo panyin no. Nanso Eli ma wɔkɔfrɛɛ no bae, na obisaa no sɛ: ‘Me ba, dɛn na Yehowa ka kyerɛɛ wo? Ka biribiara kyerɛ me.’ Enti Samuel kaa biribiara kyerɛɛ Eli.

Bere a Samuel renyin no, Yehowa kɔɔ so ara boaa no. Israelfo a wɔwɔ asaase no so nyinaa huu sɛ Yehowa na wapaw Samuel sɛ ɔnyɛ odiyifo ne ɔtemmufo.