Mɔɔ Yesuma Wɔ Samʋwɛlɩ Yɩ Ɛbɩlawɔlɛ Nu

Samʋwɛlɩ ilili Gyehova nɔhʋanlɛ wɔ yɩ ɛbɩlawɔlɛ munwala nu. Wɔ mmɩlɩ mɔ ɩdɩ kuakula nɩ, ɩáyɛ yɩ dɩyɛ dɩkɛ mɔɔ nɩ Ilayɩ yɩ nwuakula mmenyia Hɔfɩnayɩ nɩɩ Fɩnɩhasɩ bɛyɛ nɩ. (1Sa 2:22-26) Samʋwɛlɩ ɩhɔlɩ ɔzʋlɔ inyinli na Gyehova ɩhɔlɩ ɔzʋlɔ ɩhɩnlanlɩ yɩ nwʋ. (1Sa 3:19) Mmɩlɩ mɔ ɩyɛlɩ ebani nɩ, ɩwɔ numɔ kɛɛ yɩ nnwuakula bɛásʋ̃mɩ Gyehova dɩyɛ, naasʋ̃ ɩhɔlɩ ɔzʋlɔ ɩ nɩɩ Gyehova luwalɩ.—1Sa 8:1-5.

Mɩnla yɛ yesuma wɔ Samʋwɛlɩ yɩ ndianwʋ yɩ nu a? Sɛ ɛdɩ kuakula a, nyiá anwʋlazʋ kɛɛ ndwokɔ ɛzɩzɩbɛ mɔɔ eyiyiaa nɩɩ kezimɔ ɛtɩ nɣanlɩ nɩ, Gyehova ɩtɩ wʋ tʋ. Sa ɩkʋla ɩbʋwa wʋ ma enyia akɛnɣazɩzɩbɛ. (Ayɩ 41:10, 13) Sɛ ɛdɩ ɔwʋvʋlɔ mɔɔ wʋ nnwuakula bɔhwɩ̃ bɔ nwʋ wɔ Gyehova nwʋ a, nwʋ yɩ kɛɛ, nɩ Samʋwɛlɩ ɩlɔ́kʋla ɩkɛhyɛ yɩ nnwuakula mɔɔ bɛ anyɩ ɩdɩ nɩ ma bekelili Gyehova yɩ mmɛla zʋ, na ma eyi ɩyɩkyɩ wʋ ɛɣɛlɛ. Samʋwɛlɩ iyiakili yɩ odwokɔ munwala ɩmanlɩ Gyehova, na ɩhɔlɩ ɔzʋlɔ ɩzɔlɩ yɩ munlililɛ nu na ɩzɔlɩ yɩ sʋlɔ Ɛzɩlɛ Gyehova yɩ anyɩ. Ebiye a, wʋ ndianwʋba nɩ ɩkɔhʋla ɩkɛhã wʋ ɣa nɩ ma ikezia ɩkɛɣa Gyehova yɩ pɛ dɔkʋ̃.

KILÁ VIDIYO MƆƆ ISE SUMÁ DƖYƐ BE WƆ BƐ ƐKƐNƖ—SAMƲWƐLƖ, NA AKƲ̃ YƖ NDWOKƆƔIZIALƐ EYIMMƆ BO MUNWA:

• 

  Mmɩlɩ mɔ nɩ Samʋwɛlɩ ɩdɩ kuakula nɩ, kɛ ɩlalɩ akɛnɣazɩzɩbɛ ali izeli a?

• 

  Kɛ Danny ɩlalɩ akɛnɣazɩzɩbɛ ali izeli a?

• 

  Mmɩlɩ mɔ Samʋwɛlɩ ɩyɛlɩ ebani nɩ, mɩnla ndianwʋba yɛ ɩyɛlɩ a?

• 

  Mɩnla ɔhʋanɩ zʋ yɛ Danny yɩ awʋvʋlɔ bɛyɛlɩ ndianwʋba a?