Kezimɔ Yekodu Mpʋnɩ Wɔ Dasɩlɛlilɛ Nu​—Bayɩbʋlʋ Dɩyɛzumanlɛ Mɔɔ Iádu Mpʋnɩ Mɔɔ Yekeyiaki

SIANTI MƆƆ IHYINYIA: Ɩsɛ kɛɛ mmenii bɔbɔ Gyehova yi dima bɔfʋlɛ yɩ na ama bɛanyia nnwʋanlɩ. (Wul 10:13, 14) Naasʋ̃, kɛ abiyela mɔɔ ide itiã numɔ kɛɛ ikozuma Bayɩbʋlʋ yɩ nɩ yɛ ɩpɛ kɛɛ ɩfa Gyehova yɩ mmɛla nɩ ɩbɔ yɩ ɛbɩla a. Yɛfa yɛ mmɩlɩ nɩ mɔɔ ɩtʋ bʋlɔ yedi egyima bʋwɔ wɔ dasɩlɛlilɛ nu iluwa bɛzabɛ mɔɔ bɔzʋ̃ bɛ ahʋnlɩnɩ nu bɛpɛ kɛɛ bɛyɛ nzɩnzanlɩyɛ na bɛazɔ Gyehova yɩ anyɩ mɔɔ yɛkɔwʋwa bɛ nɩ zʋ. Sɛ Bayɩbʋlʋ dɩyɛzumanlɛvʋlɔ be iányia anyunumihɔlɛ wɔ mmɩlɩ be mɛda a, nɣɛlɛbɛ wɔ numɔ kɛɛ yekeyiaki dɩyɛzumanlɛ nɩ mfomi, na yɛava yɛ mmɩlɩ nɩ yɛawʋwa bɛzabɛ mɔɔ Gyehova ɩtwɩ̃ɩ̃ bɛ ikeɣike yɩzayɩ nɩɩ yɩ ahyɩhyɛdɩ nɩ nwʋ nɩ. (Dwɔ 6:44) Nɔhʋanlɛ, mmɩlɩ be mɛda na ɩda yɩ nwʋ ali kɛɛ ɩpɛ “nnwʋanlɩ mɔɔ íni awielɩyɛ” a, yɛzʋ̃ anyɩnlɩlelɛ nu yesia yɛbɔ yɩ Bayɩbʋlʋ dɩyɛzumanlɛ nɩ yɩ tʋ.—Egy 13:48.

KEZIMƆ ƐKƐYƐ YƖ:

• Kamvʋ́ dɩyɛzumanlɛvʋlɔ nɩ kɛɛ inyia ɛpɛ kɛɛ ikenyia nɔhʋanlɛ nnimidi nɩ.—1Tim 2:4

• Sí mfasʋ mɔɔ ɩwɔ mɔɔ izuma nɩ mɔɔ ɩkɛva ɩkɔwɔ yɩ ɛbɩla nɩ zʋ owudo.—Lk 6:46-49

• Ɔzʋ̃ ɔlɔlɛ nu ɛ nɩɩ yɩ zunzu Gyisɛsɩ yɩ ndianwʋ mɔɔ ɩfalɩ mma ɛbɩndɩnlɛ nɩ nwʋ, na biziá yɩ ma ɩdwɩnɩndwɩnɩ mɔɔ isii yɩ ɔhʋanɩ nɩ nwʋ.—Mt 13:18-23

• Ɔzʋ̃ nɣɛlɛbɛ nu kilehile sianti mɔɔ eyiakii dɩyɛzumanlɛ nɩ nu

• Má ɩnwʋ yɩ kɛɛ ɩwɔ nu la a, sa ɛba ekyela yɩ na wʋahyɛ yɩ ɛzɩzɩbɛ, na mmɩlɩ be mɛda na sɛ ɩyɛ nzɩnzanlɩyɛ a sa bɔkʋla bɔbɔ yɩ tʋ dɔkʋ̃

KILÁ VIDIYO YƖ, NA AKƲ̃ YƖ́ NDWOKƆƔIZIALƐ EYIMMƆ BO MUNWA:

• Mɩnla yɛ ɔnwʋnlɩ wɔ nkɔmmɔwɔlɛ yɩ nu mɔɔ ikile kɛɛ nɩ dɩyɛzumanlɛvʋlɔ nɩ iányia sunzuma ɔfʋã nu anyunumihɔlɛ a?

• Mɩnla ɔhʋanɩ zʋ yɛ ɛlawulowɔlɛvʋlɔ nɩ ɩwʋwalɩ dɩyɛzumanlɛvʋlɔ nɩ ma ɩdɩlɩ ehyinyianlɛ mɔɔ ihyinyia kɛɛ ɩyɛ nzɩnzanlɩyɛ nɩ tʋ a?

• Mɩnla ɔhʋanɩ zʋ yɛ ɛlawulowɔlɛvʋlɔ nɩ ɩyɛlɩ nhyɩhyɛlɩyɛ mɔɔ ɩkɔhʋla ɩkɛma bekezia bɔkɔdʋwa dɩyɛzumanlɛ nɩ zʋ wɔ eɣile be a?