KILISINYIAMAA BƐ ƐBƖLAWƆLƐ
Nwʋ́ Gyehova Adwɩnɩ Wɔ Nninyeni Nwʋ
Yɛpɛ kɛɛ yɛsɔ Gyehova anyɩ wɔ dɩyɛ bela nu. (Ɛɣɛ 27:11) Sɛ yɛkɔhʋla yɛkɛyɛ yɩ ɔzɔ a, mɛyɩ nɩ sɛ yesii pɔkɔ na Bayɩbʋlʋ nu mmɛla pɔkyɩɩ bela íni nwʋmɔ po a, ɩsɛ kɛɛ yɛbɔ mmɔdɩnɩ yɛnwʋ Gyehova adwɩnɩ wɔ nwʋ. Mɩnla yɛ ɩkɔwʋwa yɛ a?
Kɩnga Bayɩbʋlʋ yɩ eɣile bela. Mmɩlɩ bela mɔ yɛkɛɣɩnga Bayɩbʋlʋ yɩ nɩ, nɩ yenyiaa mmɩlɩ yɛkɛma Gyehova. Sɛ yɛdwɩnɩndwɩnɩ kezimɔ Gyehova ɩ nɩɩ yi mmenii lili na yesunzu kezimɔ ɩdɩlɩ nɣanlɩ wɔ bɛzabɛ mɔɔ bɛyɛlɩ dɩyɛ baaba anzɛnyɩɩ dɩyɛ tanɩ nwʋ a, ɩkɔwʋwa yɛ ma yɛkɔnwʋ yɩ adwɩnɩ wɔ nninyeni nwʋ. Sɛ ɩba yɩ kɛɛ yesii pɔkɔ be a, sunzuma nwanzanwanza nɩ ɩkɛhakɛ yɛ nninyeni nɩɩ egyinalɛzʋ-ndwokɔ azʋlɔtʋ mɔɔ yezuma wɔ Bayɩbʋlʋ yɩ nu nɩ.—Dwɔ 14:26.
Yɛ́ ɛbɩbɛlɛnu. Ansaana mɔɔ ekezi pɔkɔ be nɩ, bizia wʋ nwʋ kɛɛ, ‘Mɩnla ɛhɛlɛlɛ odwokɔ anzɛnyɩɩ Bayɩbʋlʋ nu odwokɔ yɛ ɩkɔwʋwa mɩ ma mʋkɔnwʋ kezimɔ Gyehova tɩ nɣanlɩ wɔ odwokɔ yɩ nwʋ a?’ Bɔ mpayɩ fa pɩbɛ Gyehova yɩ mmʋwalɩyɛ. Na fa awuuku azʋlɔtʋ mɔɔ yɛfa yɛyɛ ɛbɩbɛlɛnu mɔɔ ɩwɔ wʋ ndɛnɩ nu nɩ pɩbɛ Bayɩbʋlʋ nu egyinalɛzʋ-ndwokɔ azʋlɔtʋ mɔɔ ɩfalɩ wʋ bʋwabɩlɛ yɩ nwʋ. Akʋ̃ fa mɔɔ ɔnwʋ yɩ nɩ di egyima.—Ndw 25:4.
KILÁ VIDIYO MƆƆ ISE ƖSƐ KƐƐ “YEMINYIA YƐ NWƲ BAABA YEƔIANDI EƔIANDINLƐ NƖ”—DƖ́ ALƖYƐ MƆƆ ANWƲZƖZƖBƐ WƆ NUMƆ, NA AKƲ̃ YƖ NDWOKƆƔIZIALƐ EYIMMƆ BO MUNWA:
Mɩnla nhyɛ azʋlɔtʋ yɛ eliyema baalɛ mɔɔ ɩwɔ vidiyo yɩ nu nɩ iyiyialɩ a?
Kɛ ɩkɛyɛ na wʋava nninyeni mɔɔ yɛfa yɛyɛ ɛbɩbɛlɛnu nɩ wʋali nhyɛ mɔɔ ɩdɩ ɩdɩ ɔzɔ nwʋ egyima a?
Sɛ yenyia mmɩlɩ yesuma dɩyɛ na yɛyɛ ɛbɩbɛlɛnu mɔɔ ɩkɔwʋwa yɛ ma yekezizi abɔkɔba a, kɛ yenyia ɔzʋlɔ mfasʋ yese a?—Hib 5:13, 14