Gyehova Pɛ Kɛɛ Ɩbʋwa Mmenii Munwala Ma Bonu Bɔ Nwʋ

1. Mɩnla yɛ sɛ abiye yɛ a ikile kɛɛ inlu yɩ nwʋ a?

SƐ YƐYƐ tanɩ be a, nwʋmɔ hyinyia paa kɛɛ yekonlu yɛ nwʋ. Wɔ Bayɩbʋlʋ nu nɩ, sɛ abiye sɩnza yɩ adwɩnɩ wɔ nyɛlɩyɛ tanɩ be mɔɔ nɩ ɩyɛ nwʋ, iyiaki ɔzɔ nyɛlɩyɛ nɩ, na isi yɩ kɛnɣa kɛɛ ɩlɛ́yɛ dɔkʋ̃ a, mɛyɩ yɛ ikile kɛɛ inlu yɩ nwʋ a.—Mt. 3:8; Egy. 3:19; 2 Pit. 3:9.

2. Mɩnla ti mɔɔ ɩsɛ kɛɛ ye munwala yesuma yɛ nwʋ mɔɔ yekonlu nɩ nwʋ dɩyɛ a? (Nehɛmaya 8:​9-11)

² Ɩsɛ kɛɛ enii bela mɔɔ ɩda azɩ nɩ suma yɛ nwʋ mɔɔ yekonlu nɩ nwʋ dɩyɛ. Mɩnla ti a? Iluwakɛɛ eɣile bela yɛyɛ tanɩ. Kɛ Adamɩ nɩɩ Yifi bɔ tʋmaa nɩ, bɛva tanɩ nɩɩ owulo bɔwʋ ye munwatĩĩ. (Wul. 3:23; 5:12) Meti ye munwatĩĩ tanɩ wɔ yɛ nwʋ, na ɩsɛ kɛɛ yenu yɛ nwʋ. Mmenii mɔɔ nɩ be dedi yɛ sɩ dɩkɛɛ sʋ̃mavʋlɔ Pɔɔlʋ po, nɩ ɩyɛ sɩ kɛɛ bɛkɛhyɛ bɔ nwʋ zʋ wɔ tanɩ nwʋ. (Wul. 7:​21-24) Asʋ̃ eyi kile kɛɛ iluwa yɛ tanɩ ti ɩsɛ kɛɛ yedi alɔbɔ eɣile bela a? Anhã, Gyehova dɩ nwɔkɛnwʋnlɛvʋlɔ na ɩpɛ kɛɛ yɛ anyɩ de. Sunzu Dwuumaa mɔɔ nɩ bɔwɔ Nehɛmaya yɩ mmɩlɩ zʋ nɩ bo odwokɔ yɩ nwʋ kila. (Kɩnga Nehɛmaya 8:​9-11.) Nɩ Gyehova ɩábɛ kɛɛ bɔkɔ zʋlɔ bedi alɔbɔ wɔ tanɩ mɔɔ bɛyɛ bodua numɔ nɩ nwʋ, mfomi nɩ ɩpɛ kɛɛ bɛfa anyɩnlɩlelɛ bɔsʋ̃mɩ yɩ. Gyehova zi kɛɛ sɛ yenu yɛ nwʋ a, ɩma yɛ anyɩ de. Meti ikilehile yɛ kɛɛ sɛ yɛyɛ tanɩ a yenlú yɛ nwʋ. Sɛ yenu yɛ nwʋ wɔ yɛ tanɩ nwʋ a, sa yɛkʋla yenyia anwʋlazʋ kɛɛ yɛ Zɩ mɔɔ ɩdɩ nwɔkɛnwʋnlɛvʋlɔ nɩ kɛva kɛhyɛ yɛ.

3. Mɩnla yɛ yɛbazunzu nwʋmɔ wɔ dɩyɛzumanlɛ eyi nu a?

³ Wɔ dɩyɛzumanlɛ eyi nu nɩ, yekozunzu yɛ nwʋ mɔɔ yekonlu nɩ nwʋ, na sa yesuma nninyeni asã be yɛfalɩ nwʋmɔ. Mɔɔ ili bɔmʋnlɩ, yekehila mɔɔ Gyehova hilehileli Yizilayamaa nɩ falɩ bɔ nwʋ mɔɔ bokonlu nɩ nwʋ. Akʋ̃ yekehila kezimɔ Gyehova wʋwalɩ abiyemmɔ ma bonlunli bɔ nwʋ. Awielɩyɛ kʋlaa nɩ, yekozunzu mɔɔ Gyisɛsɩ yɩ adʋwavʋlɔ yɩ zumanlɩ falɩ yɛ nwʋ mɔɔ yekonlu nwʋ.

MƆƆ GYEHOVA HILEHILELI YIZILAYAMAA YƖ FALƖ BƆ NWƲ MƆƆ BOKONLU NWƲ

4. Mɩnla yɛ Gyehova hilehileli Yizilayamaa yɩ falɩ bɔ nwʋ mɔɔ bokonlu nwʋ a?

⁴ Mmɩlɩ mɔ Gyehova valɩ yɩ mmɛla manlɩ Yizilayamaa yɩ nɩ, bɛhanlɩ ndamɩ kɛɛ bekediye yi. Sɛ nɩ bedidi yɩ mmɛla zʋ a, nɩ ɩkɔwɔ bɔ nwʋ banɩ na iayila bɛ. Ɩhanlɩ yɩ mmɛla yɩ nwʋ odwokɔ kɛɛ: “Mmɛla mɔɔ mɩlɛ mɩmaa wʋ nnɛ yɩ, ɩáyɛ sɩ sʋ̃maa ɩma wʋ, na íni aɣinzi sʋ̃maa ɩma wʋ.” (Dit. 30:​11, 16) Naasʋ̃ nɩ sɛ bɛáfa bɛyɛ egyima anzɛnyɩɩ sɛ betiã yɩ kɛnɩ bɔkɔ bɔsʋ̃mɩ awʋzʋmɩ a, ɩkɛyɩ yi nyilalɛ wɔ bɔ zʋ, na bɔkɔnwʋ amanɩyɛ. Naasʋ̃ nɩ eyi iáhile kɛɛ Gyehova ɩbʋ bɛ kʋlakʋla. Nɩ bɔkɔhʋla ‘bekezia bɛkɛɣa Gyehova bɛ Nyamɩnlɩ yɩ pɛ na bɛadiye yɩ nnɩ.’ (Dit. 30:​1-3, 17-20) Mɔɔ nɩ eyi kile yɛ lɛ kɛɛ, sa bɔkʋla bonu bɔ nwʋ wɔ bɛ tanɩ nwʋ. Nɩ sɛ bɛyɛ zɔ a, Gyehova kɔhwɩ̃ keɣike bɛ na iayila bɛ dɔkʋ̃.

5. Mɩnla yɛ Gyehova yɛlɩ va hileli kɛɛ yi padi iákolɔ wɔ yi mmenii nwʋ a? (2 Awulombunli 17:​13, 14)

⁵ Yizilayamaa yɩ dɩlɩ Gyehova zʋ atunwa mbɔmɩ sʋ̃maa. Awʋzʋmɩzʋ̃mɩnlɛ la ahanlɩ a, bɛvalɩ bɔ nwʋ bowulalɩ nyɛlɩyɛ mvʋlɔ mɔɔ nɩ ɩyɛ apɩtã nu. Iluwa eyi ti, bɔnwʋnlɩ amanɩyɛ. Naasʋ̃ Gyehova ɩáma yi padi kolɔ wɔ yi mmenii mɔɔ bɛdɩlɩ yɩ zʋ atunwa nɩ nwʋ. Ɩzʋ̃manlɩ nkɔmɩhyɛmaa mbɔmɩ sʋ̃maa kɛɛ bɔhɔ́ yi mmenii bɛ pɛ na bɔwʋwá bɛ ma bonlu bɔ nwʋ na bezia bɛɣɩla yɩ pɛ.—Kɩnga 2 Awulombunli 17:​13, 14.

6. Mɩnla ɔhʋanɩ zʋ yɛ Gyehova luwalɩ yɩ nkɔmɩhyɛmaa zʋ manlɩ yi mmenii nwʋnlɩ mfasʋ mɔɔ ɩwɔ zʋlɔ kɛɛ bokonlu bɔ nwʋ a? (Kila mfonyini yi sʋ̃.)

⁶ Nɩ Gyehova ɩta iduwa yɩ nkɔmɩhyɛmaa yɩ zʋ ɩbɔ yi mmenii mɔɔ bɛyɛ nninyeni tanɩ nɩ kɔkɔ na ɩtɩnɣɛ bɛ. Kɛ ndianwʋ nɩ, Nyamɩnlɩ luwalɩ Gyɛlɩmaya zʋ hanlɩ kɛɛ: “Siá bɩla, O kʋ̃bɔvʋlɔ Yizilaya . . . Milémuna mikehile wʋ, iluwakɛɛ mɩdɩ nɔhʋanlɛvʋlɔ . . . Mɩlɛ́fa wʋ nwʋ ɛya mukowula mu nu daabaa. Mɔwʋ de wʋ mfʋmɩ tiã numɔ la, iluwakɛɛ ɛdɩ Gyehova wʋ Nyamɩnlɩ zʋ atunwa.” (Gyɛ. 3:​12, 13) Gyehova luwalɩ Dwowɛlɩ zʋ hanlɩ kɛɛ: “Bɔzʋ̃ bɛ ahʋnlɩnɩ munwala nu bezia bɛɣɩla mɩ pɛ.” (Dwo. 2:​12, 13) Ɩmanlɩ Ayɩzaya hanlɩ kɛɛ: “Bɛdɩ́ bɔ nwʋ; bɛyɩ́ bɛ nyɛlɩyɛ tanɩ yɩ wɔ mɩ anyunu; beyiakí tanɩyɛlɛ.” (Ayɩ. 1:​16-19) Na Gyehova luwalɩ Izikɩyɛlɩ zʋ ɣizialɩ kɛɛ: “Asʋ̃ mɔɔ mɩpɛ yɛ lɛ kɛɛ tanɩyɛlɛnii kowu a? . . . Asʋ̃ kɛ mɔɔ mɩpɛ yɛ lɛ kɛɛ ɩkɔhwɩ̃ yɩ nwʋ wɔ yɩ ahʋanɩ nwʋ na ianyia nnwʋanlɩ a? Kɛ mɔɔ mɩ anyɩ deli nwʋmɔ yɛ lɛ kɛɛ abiye kowu, . . . Meti bɛzɩnzá na benyia nnwʋanlɩ.” (Izi. 18:​23, 32) Gyehova anyɩ deli nwʋmɔ kɛɛ mmenii konlu bɔ nwʋ, iluwakɛɛ ɩpɛ kɛɛ bɔbʋwa azɩ daabaa! Meti Gyehova ɩálɩkɛ nkʋ̃ʋ̃ ma mmenii mɔɔ bɛyɛ tanɩ nɩ nu bɔ nwʋ wie ansaana ɩawɔ yɩ tʋ kɛɛ ɩbʋwaa bɛ. Bɛmá yehila eyi nwʋ ndianwʋ azʋlɔtʋ be.

7. Mɩnla yɛ Gyehova luwalɩ Hoziya nɩɩ yɩ yɩ bo odwokɔ yɩ zʋ hileli yi mmenii a?

⁷ Yɛ́ mɔɔ Gyehova luwalɩ nkɔmɩhyɛnii Hoziya nɩɩ yɩ yɩ Goma zʋ hilehileli yi mmenii nɩ ndwɩ. Mmɩlɩ mɔ Goma zɩkɛlɩ agyiahʋnlɩ nɩ, idianlɩ Hoziya kɛnɩ ɩhɔ ilili mmenyia mvʋlɔ mɛda. Asʋ̃ nɩ ɩlɔ́kʋla konlu yɩ nwʋ ma ɩkɛyɛ bʋwɔ a? Gyehova mɔɔ ɩkʋla ɩnwʋ ahʋnlɩnɩ nu nɩ, ɩhã ihileli Hoziya kɛɛ: “Siá kɔ, na kɔlɔ baalɛ mɔɔ benyia fʋlɔ dɔ yɩ na ɩsɩkɛɛ agyiahʋnlɩ nɩ, kɛmɔ Gyehova dɔ Yizilayamaa mmɩlɩ mɔ bediã yɩ kɛnɩ bɔhɔ bɔzʋ̃mɩ anyamɩnlɩ mvʋlɔ” nɩ. (Ho. 3:1; Ɛɣɛ. 16:2) Yɛ́ yɩ ndwɩ kɛɛ, nɩ Hoziya yɩ yɩ igua zʋlɔ ɩyɛɛ tanɩ mɔɔ numɔ yɛ ɔnlʋmɔ. Naasʋ̃ Gyehova hanlɩ hileli Hoziya kɛɛ ɩvá Goma yɩ tanɩ ɩhyɛ yɩ, na ilé yi idiã numɔ kɛɛ yɩ yɩ dɔkʋ̃.a Gyehova luwalɩ ndianwʋ eyi zʋ manlɩ yi mmenii mɔɔ bɛyɛ nninyeni tanɩ nɩ nwʋnlɩ kezimɔ ɩtɩ nɣanlɩ wɔ bɔ nwʋ. Ɩwɔ numɔ kɛɛ nɩ bɛyɛɛ tanɩ nɣezile dɩyɛ, naasʋ̃ nɩ ɩlanwʋ la ɩdɔ bɛ. Na ɩhɔlɩ zʋlɔ ɩzʋ̃manlɩ yɩ nkɔmɩhyɛmaa wɔ bɛ pɛ kɛɛ bɔwʋwa bɛ ma bonlu bɔ nwʋ na bɛzɩnza bɛ ahʋanɩ. Asʋ̃ ndianwʋ eyi kile kɛɛ, Gyehova mɔɔ izi enii bela yɩ ahʋnlɩnɩ nu nɩ kɔwɔ mmɔdɩnɩ kɛɛ ɩkɔwʋwa abiye mɔɔ igua zʋlɔ ɩyɛɛ tanɩ mɔɔ numɔ yɛ ɔnlʋmɔ ma ikonlu yɩ nwʋ a? (Ɛɣɛ. 17:3) Bɛmá yehilá.

KEZIMƆ GYEHOVA BƲWA TANƖYƐLƐMAA MA BONU BƆ NWƲ

8. Mɩnla ɔhʋanɩ zʋ yɛ Gyehova wɔlɩ mmɔdɩnɩ kɛɛ ɩkɔwʋwa Keeni ma ikonlu yɩ nwʋ a? (Gyɛnɛsɩsɩ 4:​3-7) (Kila mfonyini yi sʋ̃.)

⁸ Nɩ Keeni dɩ Adamɩ nɩɩ Yifi bɛ ɣa mɔɔ ili bɔmʋnlɩ. Na dɩkɛɛ Adamɩ nɩɩ Yifi bo nnwuakula munwatĩĩ nɩ, bɛvalɩ tanɩ bɔwʋlɩ Keeni sʋ̃. Akʋ̃ sʋ̃, Bayɩbʋlʋ kã Keeni nwʋ odwokɔ kɛɛ: “Yɩ nyɛlɩyɛ ɩdɩ tanɩ.” (1 Dwɔ. 3:12) Ebiye a, eyi ti yɛ mmɩlɩ mɔ ɩwɔlɩ afɔlɩ nɩ Gyehova “yɩ anyɩ ɩásɔ Keeni nɩɩ yɩ afɔlɩ nɩ” a. Kɛ ankɩ ɩkɛzɩnza yɩ ahʋanɩ nɩ “Keeni valɩ ɛya ɛzɩzɩbɛ ɛzɩzɩbɛ na imunlanlɩ yɩ anyunu.” Mɩnla dɔkʋ̃ yɛ Gyehova yɛlɩ a? Ɩ nɩɩ Keeni dɩndɛlɩ. (Kɩnga Gyɛnɛsɩsɩ 4:​3-7.) Yɛ́ yɩ ndwɩ kɛɛ, Gyehova ɩzʋ̃ kunlumiba nu ɩ nɩɩ Keeni zunzunli odwokɔ yɩ nwʋ. Ɩmanlɩ ɩnwʋnlɩ kɛɛ sɛ ɩyɛ mɔɔ ɩtɩnɣɛ a ikeyila yɩ, na ɩwɔlɩ yɩ kɔkɔ wɔ ɔhawʋ mɔɔ ɩzʋ̃ tanɩ nu ɩba nɩ nwʋ. Alɔbɔ odwokɔ yɛ lɛ kɛɛ, Keeni iátiye. Ɩáma ɔhʋanɩ ma Gyehova bʋwa yɩ ma inu yɩ nwʋ. Asʋ̃ iluwakɛɛ Keeni iátiye Gyehova nɩ ti, ɩmanlɩ Gyehova zili pɔkɔ kɛɛ ɩlɔ́bɔ mmɔdɩnɩ kɔwʋwa mmenii mvʋlɔ ma bokonlu bɔ nwʋ a? Ɩáyɛ zɔ kʋlaa!

9. Mɩnla ɔhʋanɩ zʋ yɛ Gyehova wʋwalɩ Devidi ma inlunli yɩ nwʋ a?

⁹ Nɩ Gyehova dɔ Bulombunli Devidi baaba. Ɩvʋlɔlɩ yɩ po kɛɛ “enii mɔɔ ɩsɔ mɩ anyɩ.” (Egy. 13:22) Naasʋ̃ Devidi yɛlɩ tanɩ nɣezile, dɩkɛɛ agyiahʋnlɩzɩkɛlɛ nɩɩ awulilɛ. Kɛmɔ Mosisi Mmɛla yɩ kile nɩ, ankɩ ɩsɛ kɛɛ bokũ Devidi. (Lɛv. 20:10; Nɔ. 35:31) Naasʋ̃, Gyehova ɩáma bokũ yi.b Ɩzʋ̃manlɩ yɩ nkɔmɩhyɛnii Neetanɩ ma ɩhɔlɩ yɩ kɛ, ɩávalɩ nwʋmɔ kɛɛ nɩ Devidi lɛ́yɛlɩ dɩyɛ bela mɔɔ ikile kɛɛ inlu yɩ nwʋ nɩ. Neetanɩ valɩ ndindianwʋ be lili egyima wʋwalɩ Devidi ma ɩnwʋnlɩ kɛɛ ɩyɛ tanɩ nɣezile be idiyia Gyehova. Eyi hanlɩ Devidi ma inlunli yɩ nwʋ. (2 Sa. 12:​1-14) Ɩhɛlɛlɩ ndwomi be ɩva ihileli kezimɔ nɩ inlu yɩ nwʋ wɔ mɔɔ ɩyɛlɩ nɩ nwʋ. (Ndw. 51, tisʋlɔ odwokɔ) Ɔzɔ ndwomi yi ɩhyɛ mmenii sʋ̃maa mɔɔ bɛyɛ tanɩ nɩ ɛzɩzɩbɛ ma bonlu bɔ nwʋ. Asʋ̃ ɩáyɛ yɛ fɛ kɛɛ Gyehova wʋwalɩ yɩ sʋ̃mɩvʋlɔ Devidi mɔɔ ɩdɔ yɩ nɩ ma inlunli yɩ nwʋ a?

10. Kezimɔ Gyehova inyia yɛ nwʋ abʋtalɩ na ɩfa yɛ tanɩ ɩkyɛ yɛ nɩ, kɛ ɩkã wʋ ise a?

¹⁰ Gyehova kyi tanɩ, na ɩázʋzɔ tanɩ bela zʋ. (Ndw. 5:​4, 5) Naasʋ̃ izi kɛɛ tanɩ wɔ ye munwala nwʋ, na ɩzʋ̃ ɔlɔlɛ nu ɩbʋwa yɛ ma yɛkʋ̃ yetiyia tanɩ. Ɩbɔ mmɔdɩnɩ mmɩlɩ munwala kɛɛ ɩkɔwʋwa bɛzabɛ po mɔɔ bɛyɛ tanɩ nɣezile nɩ ma bokonlu bɔ nwʋ na bɛahwɩ̃ bɛaɣike yi. Kila kezimɔ eyi kyɩkyɩ yɛ ɛɣɛɛlɛ! Sɛ yɛdwɩnɩndwɩnɩ Gyehova yɩ abʋtalɩ nɩɩ yɩ tanɩfakyɛ nwʋ a, ɩkɛhyɛ yɛ ɛzɩzɩbɛ ma yɛkɔhɔ zʋ yekeli nɔhʋanlɛ yɛkɛma yɩ, na sɛ yɛyɛ tanɩ sʋ̃ a, yekonlu yɛ nwʋ ndɛndɛ zʋ. Kakɩ yɩ, bɛmá yezuma mɔɔ Gyisɛsɩ hilehileli yɩ adʋwavʋlɔ yɩ falɩ bɔnwʋnlunlɛ nwʋ.

MƆƆ GYISƐSƖ HILEHILELI YƖ ADƲWAVƲLƆ YƖ FALƖ BƆNWƲNLUNLƐ NWƲ

11-12. Mɩnla yɛ Gyisɛsɩ hilehileli yɩ ediyelɛmaa falɩ kezimɔ yɩ Zɩ Gyehova fa tanɩ kyɛ nɩ nwʋ a? (Kila mfonyini yi.)

¹¹ Wɔ ɔlʋbɔ 29 Y.M. nu nɩ, nɩ Mɛzaya nɩ ɩɣalɩyɛ mmɩlɩ idwu. Kɛmɔ bɛhanlɩ wɔ dɩyɛzumanlɛ mɔɔ ili eyi anyunu nɩ, Gyehova luwalɩ Dwɔɔnʋ Numavʋlɔ nɩɩ Gyisɛsɩ zʋ hilehileli mmenii kezimɔ nwʋmɔ hyinyia kɛɛ bokonlu bɔ nwʋ.—Mt. 3:​1, 2; 4:17.

¹² Wɔ Gyisɛsɩ yɩ ɔzʋ̃mɩnlɛ egyima yɩ munwala nu nɩ, ihilehileli yɩ ediyelɛmaa ma bɔnwʋnlɩ kezimɔ Gyehova wɔ ɛpɛ kɛɛ ɩkɛva tanɩ kɛhyɛ nɩ. Ɔhʋanɩ ɔkʋ̃ mɔɔ iluwalɩ zʋlɔ ɩmanlɩ bɔnwʋnlɩ eyi yɛ lɛ kɛɛ, ɩmanlɩ ndianwʋ kɩnlɩma be ɩvalɩlɩ ɛzɩlɛ be nɩɩ yɩ ɣa benyia nwʋ. Ɛɣalɛ benyia nɩ zili pɔkɔ kɛɛ ɩzʋ̃ awudo kɛyɩ yɩ nwʋ na ɩahɔ ɩawɔ ɛbɩla tanɩ. Naasʋ̃ aɣinzi yi, “yɩ anyɩ ɣalɩ yɩ nwʋ zʋ” na izia ɩhɔlɩ awudo. Kɛ yɩ papa yɛlɩ yɩ dɩyɛ zeli a? Gyisɛsɩ hanlɩ kɛɛ, mmɩlɩ mɔ yɩ ɣa nɩ “ɩla nwʋ ɩwɔ aɣinzi wɔ ɔhʋanɩ nɩ nu nɩ, yɩ zɩ ɩnwʋnlɩ yɩ. Na ɛzɩlɛ nɩ yi kunlu idwelili, meti iduli tɔlɔnwa ɩhɔlɩ ɩdɔlɩ yɩ ɣa benyia nɩ nwʋ, na ivoli yi munwa nwʋ.” Nɩ ɛɣalɛ nɩ iáhila ɔhʋanɩ kɛɛ yɩ zɩ kɛva yɩ tanɩ kɛhyɛ yɩ. Meti izianlɩ yɩ kɛɛ ɩmá ɩɣa ɩyɛ sʋ̃mɩvʋlɔ wɔ awudo kɛnɩ. Naasʋ̃ nɩ ɛzɩlɛ nɩ pɛ paa kɛɛ ɩfa ɩkyɛ yɩ. Ɩvʋlɔlɩ abɩlantɩyɛ nɩ kɛɛ “mɩ ɣa benyia eyi” na izia ileli yi ɩhɩnlanlɩ abusunwa yɩ nwʋ. Ɛzɩlɛ nɩ hanlɩ kɛɛ: “Iminlinli na akʋ̃ yɛnwʋ yɩ.” (Lk. 15:​11-32) Mmɩlɩ mɔ nɩ Gyisɛsɩ wɔ sʋlɔ nɩ, Pɩlazunlɛ bela íni nwʋmɔ kɛɛ ɩnwʋnlɩ kezimɔ yɩ Zɩ lalɩ kunlumiyɩbalɛ ali hileli tanɩyɛlɛmaa sʋ̃maa mɔɔ bonlunli bɔ nwʋ nɩ. Kezimɔ Gyisɛsɩ luwalɩ ndianwʋ eyi zʋ manlɩ yɛnwʋnlɩ kezimɔ yɛ Zɩ Gyehova da nwɔkɛnwʋnlɛ ali nɩ kã ahʋnlɩnɩ na ɩkyɩkyɩ yɛ ɛɣɛɛlɛ paa!

13-14. Mɩnla yɛ nɩ Pita izi ɩfalɩ bɔnwʋnlunlɛ nwʋ a, na mɩnla yɛ ihilehileli mmenii mvʋlɔ ɩvalɩlɩ nwʋmɔ a? (Kila mfonyini yi sʋ̃.)

¹³ Sʋ̃mavʋlɔ Pita zumanlɩ debe mɔɔ nwʋmɔ hyinyia baaba falɩ yɛ nwʋ mɔɔ yekonlu nɩɩ tanɩfakyɛ nwʋ wɔ Gyisɛsɩ kɛnɩ. Pita lili mfʋmɩ sʋ̃maa, naasʋ̃ nɩ Gyisɛsɩ wɔ ɛpɛ kɛɛ ɩkɛva ɩkɛhyɛ yɩ. Kɛ ndianwʋ nɩ, mmɩlɩ mɔ ɩhanlɩ yɩ mbɔmɩ asã kɛɛ ízi Gyisɛsɩ mɛda nɩ, ilili mɔɔ ɩyɛlɩ nɩ nwʋ ɛyɛkɛ kezile baaba. (Mt. 26:​34, 35, 69-75) Naasʋ̃ mmɩlɩ mɔ Gyisɛsɩ dunwonli wɔ owulo nu nɩ, ɩyɩlɩ yɩ nwʋ ali ihileli Pita mmɩlɩ mɔ nɩ ɩha yɩzayɩ nkʋ̃. (Lk. 24:​33, 34; 1 Kɔl. 15:​3-5) Pɩlazunlɛ bela íni nwʋmɔ kɛɛ, ɔzɔ mmɩlɩ yɩ, nɩ Gyisɛsɩ zi kɛɛ Pita inlu yɩ nwʋ, meti nɩ ɩpɛ kɛɛ ɩma Pita nwʋ yɩ kɛɛ ɩva yɩ tanɩ ɩhyɛ yɩ.

¹⁴ Nɩ Pita izi kezimɔ sɛ abiye nu yɩ nwʋ na bɛfa yɩ tanɩ bɛkyɛ yɩ a ɩma yɩ ahʋnlɩnɩ tɔ yi kunlu, meti ihilehileli mmenii mvʋlɔ nwʋmɔ dɩyɛ. Belili Pɛntɩkɔsʋ awuwa yɩ mɛda mmɩlɩ be nɩ, Pita manlɩ ndɛnɩ be hileli Dwuumaa be kɛɛ bohũ Mɛzaya nɩ. Naasʋ̃ ɩzʋ̃ ɔlɔlɛ nu ɩhyɛlɩ bɛ ɛzɩzɩbɛ kɛɛ: “Ɔzɔ ti bonlú bɔ nwʋ, na beziá bɛɣɩla Nyamɩnlɩ yɩ ɛkɛnɩ, ama ɩava mʋnlʋmmɔ bɛ tanɩ ɩahyɛ mʋnlʋmmɔ ama anwʋdɔlɛ mmɩlɩ ɩzʋ̃ Nyamɩnlɩ yɩ ɛkɛnɩ ɩaɣa.” (Egy. 3:​14, 15, 17, 19) Pita hilehileli kɛɛ sɛ tanɩyɛlɛnii be nu yɩ nwʋ a, ɩkã yɩ ma isia ɩba Nyamɩnlɩ yɩ kɛnɩ. Eyi kile kɛɛ ɩkɛzɩnza adwɩnɩ mɔɔ ɩlɛ yɩ wɔ nyɛlɩyɛ tanɩ be nwʋ, ikeyiaki tanɩyɛlɛ, na ɩawɔ yɩ tʋ ɩayɛ nninyeni mɔɔ ɩsɔ Nyamɩnlɩ anyɩ. Pita hilehileli sʋ̃ kɛɛ Gyehova kɛva bɛ tanɩ kɛhyɛ bɛ kʋlakʋla, na ɩkɛyɛ kɛmɔ bɛáyɛ tanɩ po. Alʋbɔ sʋ̃maa mɛda nɩ, Pita hyɛlɩ Kilisinyiamaa nɩ ɛzɩzɩbɛ kɛɛ: “Niibenyia ɩlɛ mʋnlʋmmɔ bɔ nwʋ abʋtalɩ. Sianti yɛ lɛ kɛɛ, ɩábɛ kɛɛ ɩsɩkɛ abiyela. Ɩpɛ kɛɛ abiyela inu yɩ nwʋ, na ɩtwɩ̃ yɩ nwʋ wɔ yɩ tanɩ nɩ mmɔ nwʋ.” (2 Pit. 3:9) Yezi kɛɛ sɛ yɛyɛ tanɩ mɔɔ numɔ yɛ ɔnlʋmɔ paa po na sɛ yenu yɛ nwʋ a, Gyehova kɔhʋla kɛva kɛhyɛ yɛ kʋlakʋla. Kila kezimɔ eyi kyɩkyɩ yɛ ɛɣɛɛlɛ!

15-16. (a) Mɩnla ɔhʋanɩ zʋ yɛ sʋ̃mavʋlɔ Pɔɔlʋ zumanlɩ tanɩfakyɛ nwʋ dɩyɛ a? (1 Timoti 1:​12-15) (b) Mɩnla yɛ yekozunzu nwʋmɔ wɔ dɩyɛzumanlɛ mɔɔ ili kɛnɩ nɩ nu a?

¹⁵ Sɔɔlʋ mɔɔ nɩ ɩzʋ̃ Tasɛsɩ nɩ yɛlɩ nninyeni tanɩ sʋ̃maa, meti nɩ ɩsɛ kɛɛ inu yɩ nwʋ na bɛava yɩ tanɩ bɛahyɛ yɩ. Ɩvalɩ yɩ anyɩ iziyeli Kɩlayɩsɩ yɩ mɛdalilɛmaa yɩ nwʋ ɩyɛlɩ bɛ ayɛkwa. Nɩ Kilisinyiamaa sʋ̃maa sunzu kɛɛ ɩlɔ́kʋla kɛzɩnza kyɩ̃. Naasʋ̃ nɩ Gyisɛsɩ zi kɛɛ Sɔɔlʋ kɔhʋla kɛzɩnza na ianlu yɩ nwʋ. Ɩ nɩɩ yɩ Zɩ nwʋnlɩ dɩyɛ baaba be wɔ Sɔɔlʋ nwʋ. Gyisɛsɩ hanlɩ kɛɛ: “Mɩyɩ yɩ kɛɛ ɩyɛ́ mʋ sʋ̃mɩvʋlɔ.” (Egy. 9:15) Gyisɛsɩ luwalɩ nnwʋánlɩ ɔhʋanɩ zʋ po wʋwalɩ Sɔɔlʋ ma inlunli yɩ nwʋ. (Egy. 7:58–8:3; 9:​1-9, 17-20) Mmɩlɩ mɔ Sɔɔlʋ ɣa yɛlɩ Kilisinyianii mɛda nɩ, ɩɣa ɩyɛlɩ sʋ̃mavʋlɔ Pɔɔlʋ. Nɩ ɩta ɩkã kezimɔ yɩ anyɩ sɔ kunlumiba nɩɩ nwɔkɛnwʋnlɛ mɔɔ Gyehova nɩɩ Gyisɛsɩ lalɩ yɩ ali hileli yi nɩ nwʋ odwokɔ. (Kɩnga 1 Timoti 1:​12-15.) Pɔɔlʋ hanlɩ kɛɛ: “Nyamɩnlɩ yɩ baabayɛlɛ nɩ ɩwɔ ɛkɛnɩ mɔɔ ikehile wʋ ma okonlu wʋ nwʋ.”—Wul. 2:4.

¹⁶ Mmɩlɩ mɔ Pɔɔlʋ dɩlɩ ɛbɩlazɩkɛlɛ be mɔɔ ɩyɛ anyɩnlɩdʋnlɛ baaba mɔɔ nɩ ɩkɔlɩɩ zʋlɔ wɔ Kɔlɛntɩ asafʋ yɩ nu nwʋ odwokɔ nɩ, mɩnla yɛ ɩyɛlɩ wɔ nwʋmɔ a? Mɔɔ ihilehileli nɩ ma yɛnwʋ kezimɔ sɛ abiye nu yɩ nwʋ a, Gyehova zʋ̃ ɔlɔlɛ nu ɩtɩnɣɛ yɩ na ɩda nwɔkɛnwʋnlɛ ali ikile yi nɩ. Na yekehila kezimɔ yɛkɔhʋla yɛkɛla nwɔkɛnwʋnlɛ ali dɩkɛɛ Gyehova. Wɔ dɩyɛzumanlɛ mɔɔ ili kɛnɩ yɩ nu nɩ, yekehila mɔɔ izili wɔ Kɔlɛntɩ asafʋ yɩ nu.