Sɛ Wʋ Adwɩnɩ Yɛ Wʋ Anwɩ̃ Anwɩ̃ a, Kɛ Ɩkɛyɛ Na Wʋali Zʋlɔ a?

1-2. (a) Mɩnla ndwokɔ yɛ ebiye a Gyehova yi mmenii keɣizia bɔ nwʋ a? (b) Mɩnla yɛ yekozunzu nwʋmɔ wɔ dɩyɛzumanlɛ eyi nu a?

YE MUNWATĨĨ, kɛ yɛdɩ mbanimbani anzɛnyɩɩ nnwuakula nɩ, ɩyɛ a yɛ adwɩnɩ yɛ yɛ anwɩ̃ anwɩ̃a wɔ nninyeni nwʋ. Kɛ ndianwʋ nɩ, ebiye a kuakula be kɛdɩ nɣanlɩ kɛɛ Gyehova ɩádwɩnɩ yɩ nwʋ. Eyi ti, ebiye a ɩkɔhwɩnhwɩ̃ yɩ agyia azɩ kɛɛ ikonluma. Anzɛnyɩɩ fa yɩ kɛɛ, mmɩlɩ mɔ abɩlantɩyɛ be dɩ kuakula nɩ ɩva iziyeli yɩ anyɩ zʋ kɛɛ ɩkɛva Gyehova keli bɔmʋnlɩ wɔ yɩ ɛbɩlawɔlɛ nu tɛla kɛɛ ɩkɛbɩbɛ ozukua sʋ̃maa. Naasʋ̃ kakɩ yɩ mɔɔ nninyeni nu yɛ sɩ mɔɔ íni ozukua sʋ̃maa mɔɔ ɩkɛva kehila yɩ abusunwa nɩ, ebiye a yɩ adwɩnɩ kɛyɛ yɩ kɛɛ iási pɔkɔ baaba. Anzɛnyɩɩ tua eliyema baalɛ ebani be mɔɔ yɩ anwʋzɩzɩbɛ hɔ azɩ nɩ nwʋ mfonyini kila. Ebiye a, yi padi kogolɔ iluwakɛɛ ɩáhʋla yɛ mɔɔ nɩ ɩkʋla ɩyɛ yɩ ahyɛasɩ nɩ. Asʋ̃ eɣizia wʋ nwʋ ndwokɔ eyimmɔ kyɩ̃ a: ‘Asʋ̃ Gyehova ɩdwɩnɩ mʋ nwʋ a? Asʋ̃ mfasʋ ɣa nninyeni mɔɔ mɩva mʋwɔlɩ afɔlɩ na ama mɩahʋla mɩazʋmɩ Gyehova nɩ zʋ a? Asʋ̃ mʋ zʋ lanwʋ la wɔ mfasʋ ma Gyehova a?’

² Sɛ ɩápɩbɛ ndwokɔɣizialɛ mɔɔ ɩdɩ zɛ nwʋ munwalɩyɛ a, sa ɩkʋla ɩma ye dedi wɔ Gyehova nu kã azɩ na iayiaki yɩ ɔzʋ̃mɩnlɛ po. Wɔ dɩyɛzumanlɛ eyi nu nɩ, yekehila kezimɔ Bayɩbʋlʋ kɔhʋla kɔwʋwa yɛ mmɩlɩ mɔ yɛtɩ nɣanlɩ kɛɛ (1) Gyehova ɩádwɩnɩ yɛ nwʋ, (2) iási pɔkɔ baaba, anzɛnyɩɩ (3) yɛ zʋ íni mfasʋ ma Gyehova dɔkʋ̃ nɩ.

MƆƆ ƖKƆWƲWA YƐ MMƖLƖ MƆ YƐ ADWƖNƖ YƐ YƐ ANWƖ̃ ANWƖ̃ NƖ

3. Sɛ yɛ adwɩnɩ yɛ yɛ anwɩ̃ anwɩ̃ a, mɩnla yɛ ihyinyia kɛɛ yɛyɛ a?

³ Sɛ yɛ adwɩnɩ yɛ yɛ anwɩ̃ anwɩ̃ a, ihyinyia kɛɛ yɛpɩbɛ mmʋwalɩyɛ wɔ Bayɩbʋlʋ yɩ nu. Sɛ yɛyɛ zɔ a, ɩkɛhyɛ yɛ ɛzɩzɩbɛ, yekenyi wɔ sunzuma nu, na ɩkɛma ‘yekegyina pindinyii wɔ dedi nɩ nu.’—1 Kɔl. 16:13.

4. Kɛ ɩkɛyɛ na ‘yɛadwe nninyeni munwatĩĩ yɛahila a’? (1 Tɛsalonikamaa 5:21)

⁴ Kɩnga 1 Tɛsalonikamaa 5:21. Kakɛ kɛɛ, Bayɩbʋlʋ yɩ kã kɛɛ “bodwé nninyeni munwatĩĩ behilá.” Kɛ ɩkɛyɛ na yɛayɛ eyi a? Mɛyɩ yɛ lɛ kɛɛ sɛ yɛ adwɩnɩ iázi yɛ pi wɔ debe nwʋ a, ɩsɛ kɛɛ yɛpɩbɛ mɔɔ Bayɩbʋlʋ yɩ kã falɩ nwʋmɔ. Kɛ ndianwʋ nɩ, kuakula yɩ mɔɔ ɩtɩ nɣanlɩ kɛɛ Gyehova ɩádwɩnɩ yɩ nwʋ nɩ, asʋ̃ ɩsɛ kɛɛ ɩfa yɩ zɔ la a? Anhã, mfomi ɩsɛ kɛɛ ɩpɩbɛ Gyehova yɩ dwɩnɩ wɔ kezimɔ ɩtɩ nɣanlɩ nɩ nwʋ ɩfa ‘itwe nninyeni munwatĩĩ ikila.’

5. Kɛ ɩkɛyɛ na yɛanwʋ kezimɔ Gyehova ibuwaa ye ndwokɔɣizialɛ a?

⁵ Sɛ yɛkɩngaa Bayɩbʋlʋ yɩ a, ɩdɩ kɛɛ mɔɔ Gyehova ɩtɩndɛɛ kehile yɛ senyii. Naasʋ̃ sɛ yɛpɛ kɛɛ yɛnwʋ kezimɔ Gyehova iduwaa Bayɩbʋlʋ yɩ zʋ kowuwa ye ndwokɔɣizialɛ a, ɩsɛ kɛɛ yɛyɛ sʋ̃maa tɛla kɛɛ yɛkɛɣɩnga Bayɩbʋlʋ yɩ kɛkɛ. Ɩsɛ kɛɛ yɛpɩbɛ na yesuma Ɛhɛlɛlɛndwokɔ azʋlɔtʋ mɔɔ ɩkɔwʋwa yɛ ma yekenyia ye odwokɔɣizialɛ pɔkyɩɩ be nwʋ munwalɩyɛ. Sa yɛkʋla yeduwa yɛ awuuku azʋlɔtʋ yɩ zʋ yɛyɛ zɔ. (Ɛɣɛ. 2:​3-6) Ɩsɛ kɛɛ yesiã Gyehova kɛɛ ɩwʋwá yɛ ma yɛnwʋ yɩ adwɩnɩ wɔ ye odwokɔɣizialɛ yɩ nwʋ. Mɛyɩ mɛda nɩ, sa yɛkʋla yɛpɩbɛ Bayɩbʋlʋ nu egyinalɛzʋ-ndwokɔ azʋlɔtʋ nɩɩ ndwokɔ mvʋlɔ mɔɔ ɩkɔwʋwa yɛ wɔ yɛ bʋwabɩlɛ yɩ nu. Akʋ̃ sʋ̃, sɛ yɛkɩnga nɔhʋanlɛmaa mɔɔ beyiyialɩ yɛ bʋwabɩlɛ yɩ be nwʋ odwokɔ wɔ Bayɩbʋlʋ yɩ nu a, sa ɩkʋla ɩbʋwa yɛ paa.

6. Mɩnla ɔhʋanɩ zʋ yɛ dɩyɛzumanlɛhɔlɛ bʋwa yɛ ma yenyia ye ndwokɔɣizialɛ nwʋ munwalɩyɛ a?

⁶ Gyehova tɩndɛ kile yɛ wɔ dɩyɛzumanlɛ tʋ sʋ̃. Sɛ yɛta yɛkɔ dɩyɛzumanlɛ a, ebiye a yɛkɛdɩ odwokɔ be wɔ ndɛnɩ be nu anzɛnyɩɩ abiye kɛma munwalɩyɛ be mɔɔ ɩkɛyɩ ye odwokɔɣizialɛ munwa senyii. (Ɛɣɛ. 27:17) Kakɩ yɩ, yɛbahila mɔɔ ɩkɔwʋwa yɛ mmɩlɩ mɔ yɛ adwɩnɩ yɛ yɛ anwɩ̃ anwɩ̃ wɔ dɩyɛ pɔkyɩɩ be nwʋ nɩ.

MMƖLƖ MƆ ƐTƖ NƔANLƖ KƐƐ GYEHOVA ƖÁDWƖNƖ WƲ NWƲ

7. Mɩnla odwokɔ yɛ ebiye a, abiyemmɔ keɣizia a?

⁷ Eɣizia wʋ nwʋ kyɩ̃ kɛɛ, ‘Asʋ̃ Gyehova dwɩnɩ mʋ nwʋ a?’ Sɛ ɛtɩ nɣanlɩ kɛɛ wʋ nwʋ iáhyinyia a, sa ɩkʋla ɩma enyia adwɩnɩ kɛɛ ɔlɔ́kʋla ɛ nɩɩ amansɔnɩ yɩ Wɔlɛvʋlɔ yɩ kɛva ɔhɔnwʋ. Ɩkɛyɛ kɛɛ Bulombunli Devidi nyianlɩ ɔzɔ adwɩnɩ yɩ be. Nɩ ɩyɛ yɩ nnwʋánlɩ kɛɛ Gyehova dwɩnɩ adasamaa nwʋ po. Meti iɣizialɩ kɛɛ: “O Gyehova, desanii yɛ lɛ aninyia mɔɔ ɩsɛ kɛɛ ɛma wʋ anyɩ ɩkɔ yɩ nwʋ a? Enii yɛ lɛ aninyia mɔɔ ɩsɛ kɛɛ ɛyɛ azʋnlɩ etiye yi a?” (Ndw. 144:3) Asʋ̃ Gyehova dwɩnɩ enii ɔkʋ̃ bela nwʋ a? Kɛ ɩkɛyɛ na yɛanyia odwokɔɣizialɛ eyi nwʋ munwalɩyɛ a?

8. Kɛmɔ 1 Samʋwɛlɩ 16:​6, 7, 10-12 kã nɩ, mɩnla yɛ Gyehova nwʋ wɔ mmenii nu a?

⁸ Mmenii mɔɔ ɩdɩ kɛɛ mɔɔ bɔ nwʋ iáhyinyia mmenii mvʋlɔ nɩ, Gyehova nwʋ bɛ. Kɛ ndianwʋ nɩ, Gyehova zʋ̃manlɩ Samʋwɛlɩ kɛɛ ɩhɔ́ ɩvɔ Gyeesi yɩ mma mmenyia yɩ bo nu ɔkʋ̃ ngɔlɔ kɛɛ bulombunli mɔɔ eɣile be ikeli Yizilaya zʋ. Nɩ Gyeesi wɔ nnwuakula mmenyia awɔtwɛ, naasʋ̃ ɩvʋlɔlɩ bo nu asunwa la ma bɛɣa beyiyialɩ Samʋwɛlɩ. Devidi mɔɔ nɩ ɩdɩ kuakula nɩ mɛyɩ, ɩáfʋlɛ yɩ.b Naasʋ̃ Devidi yɛ Gyehova yɩlɩ yɩ a. (Kɩnga 1 Samʋwɛlɩ 16:​6, 7, 10-12.) Gyehova nwʋnlɩ kezimɔ nɩ Devidi dɩ ankasa. Ɩnwʋnlɩ kɛɛ nɩ Devidi dɔ yɩ paa.

9. Mɩnla ti mɔɔ ɔkɔhʋla kenyia anwʋlazʋ kɛɛ Gyehova dwɩnɩ wʋ nwʋ a? (Kila mfonyini yi sʋ̃.)

⁹ Dwɩnɩndwɩnɩ mɔɔ Gyehova yɛ daada va hile kɛɛ ɩdwɩnɩ wʋ nwʋ nɩ nwʋ. Sɛ eyiyia bʋwabɩlɛ be a, ɩfa fʋlɔdulɛ pɔkyɩɩ mɔɔ ɩkɔwʋwa wʋ ɩma wʋ. (Ndw. 32:8) Eyi dɩ dasɩlɛ mɔɔ ikile kɛɛ izi mɔɔ ehyinyia ankasa. (Ndw. 139:1) Sɛ ɛfa Gyehova yi fʋlɔdulɛ ɛyɛ egyima na ɔnwʋ kezimɔ ɩbʋwa wʋ nɩ a, ɩkɛma ekenyia anwʋlazʋ kɛɛ ɩdwɩnɩ wʋ nwʋ. (1 Mm. 28:9; Egy. 17:​26, 27) Gyehova nwʋ mmɔdɩnɩ mɔɔ ɔbɔɔ kɛɛ ɔkɔzʋ̃mɩ yɩ nɩ. Akʋ̃ sʋ̃, ɩnwʋ wʋ subanɩba azʋlɔtʋ yɩ na ɩpɛ kɛɛ ɩfa wʋ ɔhɔnwʋ. (Gyɛ. 17:10) Na sɛ wʋzawʋ sʋ̃ esi pɔkɔ kɛɛ ɛkɛyɛ yɩ ɔhɔnwʋ a, yɩ anyɩ de paa.—1 Dwɔ. 4:19.

MMƖLƖ MƆ ƐTƖ NƔANLƖ KƐƐ WƲÁSIZI ABƆKƆ BAABA MMƖLƖ BE

10. Sɛ yɛdwɩnɩ abɔkɔ be mɔɔ yezizili mmɩlɩ be nɩ nwʋ a, mɩnla ndwokɔ yɛ ebiye a yekeɣizia a?

¹⁰ Ɩyɛ a, abiyemmɔ bɛáhʋla bɔnwʋ yɩ sɛ abɔkɔ be mɔɔ bezizili mmɩlɩ be nɩ dɩ abɔkɔ baaba o. Ebiye a, bezili pɔkɔ kɛɛ bekeyiaki egyima be mɔɔ nɩ ɩma benyia bekenyia ozukua sʋ̃maa, na ama bɛahʋla bɛayɛ sʋ̃maa wɔ Gyehova ɔzʋ̃mɩnlɛ nu. Naasʋ̃ alʋbɔ sʋ̃maa dua nu na ebiye a, bɔnwʋ kɛɛ bɔ ɔhɔnwʋmmɔ mɔɔ bɛási ɔzɔ pɔkɔ yɩ be nɩ, ɩdɩ kɛɛ mɔɔ bedii bʋwɔ. Ebiye a eyi kɛma bekeɣizia bɔ nwʋ kɛɛ: ‘Asʋ̃ pɔkɔ mɔɔ mizili kɛɛ mʋkɔzʋ̃mɩ Gyehova nɩ, ɩdɩ pɔkɔ baaba a? Anzɛnyɩɩ ankɩ ɩsɛ kɛɛ mɩyɛ egyima mɔɔ ɩkɛma mikenyia ozukua sʋ̃maa a?’

11. Mɩnla ti mɔɔ nɩ Ndwomi 73 yɩ ɛhɛlɛlɛvʋlɔ yɩ padi golɔ a?

¹¹ Sɛ wʋzawʋ sʋ̃ ndwokɔ mɔɔ ɩdɩ zɔ idide wʋ a, sunzu Ndwomi 73 yɩ ɛhɛlɛlɛvʋlɔ yɩ nwʋ. Ɩnwʋnlɩ kɛɛ mmenii mɔɔ bɛázʋ̃mɩ Gyehova nɩ bedii bʋwɔ, bɔwɔ pɔkɔdɩlɛ baaba na nɩ ɩdɩ kɛɛ mɔɔ béni ɔhawʋ bela. (Ndw. 73:​3-5, 12) Mmɩlɩ mɔ ɩnwʋnlɩ kɛɛ bedii bʋwɔ nɩ, ɩmanlɩ ɩdɩlɩ nɣanlɩ kɛɛ Gyehova mɔɔ ɩsʋ̃mɩɩ yɩ nɩ mfasʋ bela íni zʋ. Odwokɔ eyi mɔɔ ikolɔ abɔkɔ nɩ “ilileli yi eɣile bela.” (Ndw. 73:​13, 14) Kɛ ɩyɛlɩ mɔɔ ilili kezimɔ ɩtɩ nɣanlɩ nɩ zʋ a?

12. Kɛmɔ Ndwomi 73:​16-18 kile nɩ, mɩnla yɛ ɩwʋwalɩ ndwomidʋlɛvʋlɔ yɩ ma ilili kezimɔ ɩtɩ nɣanlɩ nɩ zʋ a?

¹² Kɩnga Ndwomi 73:​16-18. Ndwomidʋlɛvʋlɔ yɩ hɔlɩ Gyehova yɩ asɔlɩ pika yi nu kɛnɩ. Ɛkɛnɩ yɛ ɩhʋla ɩdwɩnɩndwɩnɩnlɩ nninyeni nwʋ bʋwɔ a. Ɩnwʋnlɩ kɛɛ ɔzɔ mmenii yi mɔɔ bedii bʋwɔ nɩ, béni eɣile be nwʋ anyɩnlɩlazʋ baaba bela. Eyi manlɩ yɩ ahʋnlɩnɩ dɔlɩ yi kunlu na ɩhyɛlɩ yɩ ɛzɩzɩbɛ kɛɛ Gyehova mɔɔ ɩva yɩ ili bɔmʋnlɩ wɔ yɩ ɛbɩlawɔlɛ nu nɩ dɩ pɔkɔzilɛ baaba. Meti, izili yɩ kɛnɣa kɛɛ ɩkɔhɔ zʋlɔ kɔzʋ̃mɩ Gyehova.—Ndw. 73:​23-28.

13. Sɛ wʋánwʋ yɩ kɛɛ ezili pɔkɔ baaba wɔ mmɩlɩ be mɔ idua numɔ nɩ a, mɩnla yɛ ɔkɔhʋla kɛyɛ a? (Kila mfonyini yi sʋ̃.)

¹³ Kɛmɔ ndwomidʋlɛvʋlɔ yɩ yɛlɩ nɩ, wʋzawʋ sʋ̃ sa ɔkʋla edi ndwokɔ mɔɔ ikolɔ abɔkɔ zʋ. Mɩnla ɔhʋanɩ zʋ a? Dwɩnɩndwɩnɩ nninyeni mɔɔ ɩtʋ bʋlɔ mɔɔ ɛlɛ yɩ, dɩkɛɛ Gyehova yi nyilalɛ, na kakɛ kɛɛ mmenii mɔɔ bɛázʋ̃mɩ Gyehova nɩ béni ɔzɔ nyilalɛ yɩ be. Bɛfa bɔ nwʋ munwala betiã mɔɔ bɔhʋla bɛyɛ wɔ oyuwadɩ nu nɩ zʋ, iluwakɛɛ béni eɣile be nwʋ anyɩnlɩlazʋ. Naasʋ̃ mɔwʋ mɛyɩ, Gyehova wɔ wʋ anʋhʋba kɛɛ ɩkɛma ekenyia eɣile be baaba. (Ndw. 145:16) Akʋ̃ sʋ̃, dwɩnɩndwɩnɩ eyi nwʋ: Sɛ yezili pɔkɔ fʋlɔ be a, yézi kezimɔ ankɩ yɛ ɛbɩlawɔlɛ kɛyɛ. Naasʋ̃ dɩyɛ ɔkʋ̃ mɔɔ yezi yɛ lɛ kɛɛ: Sɛ ekyina ɔlɔlɛ mɔɔ ɔwɔ ma Gyehova nɩɩ mmenii mvʋlɔ nɩ zʋ esi pɔkɔ a, dɩyɛ baaba bela ɩlɛ́palɩ wu ti, na wʋ anyɩ kele.

MMƖLƖ MƆ ƐTƖ NƔANLƖ KƐƐ WƲ ZƲ ÍNI MFASƲ MA GYEHOVA

14. Mɩnla bʋwabɩlɛ yɛ abiyemmɔ wɔ nu a, na mɩnla odwokɔ yɛ ebiye a bekeɣizia bɔ nwʋ a?

¹⁴ Gyehova yi mmenii be wɔ kɛnɩ a, bɛáhʋla bɛyɛ sʋ̃maa kɛmɔ bɛpɛ yɩ iluwakɛɛ bɔ ɔlʋbɔ hɔ anyunumi, bɛádɩ pɔkɔ anzɛnyɩɩ bɛdɩ anlamvʋlɔ. Meti sa bɔkʋla bɛtɩ nɣanlɩ kɛɛ bɔ zʋ íni mfasʋ ma Gyehova. Ebiye a bekeɣizia kɛɛ, ‘Asʋ̃ mʋ zʋ lanwʋ la wɔ mfasʋ ma Gyehova a?’

15. Mɩnla anwʋlazʋ yɛ nɩ Ndwomi 71 yɩ ɛhɛlɛvʋlɔ yɩ wɔ a?

¹⁵ Ndwomi 71 yɩ ɛhɛlɛlɛvʋlɔ yɩ sʋ̃ dɩlɩ nɣanlɩ zɔ la. Ɩwɔlɩ mpayɩ kɛɛ: “Sɛ mɩ anwʋzɩzɩbɛ zʋ tɩ a, áma eyiaki mɩ.” (Ndw. 71:​9, 18) Ɩwɔ numɔ kɛɛ nɩ ndwomidʋlɛvʋlɔ nɩ yɩ anwʋzɩzɩbɛ zʋ dɩ dɩyɛ, naasʋ̃ nɩ ɩwɔ anwʋlazʋ kɛɛ sɛ idi nɔhʋanlɛ ɩma Gyehova a, ɩkɔwɔ yɩ nwʋ banɩ na ɩawʋwa yɩ. Ndwomidʋlɛvʋlɔ yɩ ɣa nwʋnlɩ kɛɛ, Gyehova anyɩ deli bɛzabɛ mɔɔ bɔbɔ mmɔdɩnɩ kɛɛ bɔkɔzʋ̃mɩ yɩ ɩávalɩ nwʋmɔ kɛmɔ bɔ bʋwabɩlɛ dɩ bela nɩ.—Ndw. 37:​23-25.

16. Mɩnla ɔhʋanɩ zʋ yɛ bɛzabɛ mɔɔ bɛ alʋbɔ hɔ anyunumi nɩ, bɔ zʋ wɔ mfasʋ ma Gyehova a? (Ndwomi 92:​12-15)

¹⁶ Sɛ wʋ alʋbɔ hɔ anyunumi a, fa wʋ adwɩnɩ siye kezimɔ Gyehova ɩnwʋ wʋ nɩ zʋ. Sa ɩkʋla ɩbʋwa wʋ ma ɔkɔ zʋlɔ di nɔhʋanlɛ ma yɩ, ɩávalɩ nwʋmɔ kezimɔ wʋ bʋwabɩlɛ dɩ nɩ. (Kɩnga Ndwomi 92:​12-15.) Kɛ ankɩ ɛkɛva wʋ adwɩnɩ keziye mɔɔ wʋáhʋla yɛ yɩ dɔkʋ̃ zʋ nɩ, fa wʋ adwɩnɩ siye mɔɔ ɔkɔhʋla kɛyɛ kakɩ yɩ zʋ mfomi. Kɛ ndianwʋ nɩ, sa ɔkʋla kile mmenii mvʋlɔ nwʋ anyɩnlɩlelɛ na wʋaluwa wʋ ndianwʋba zʋ wʋahyɛ bɛ ɛzɩzɩbɛ. Sa ɔkʋla kã kezimɔ Gyehova wʋwa wʋ wɔ alʋbɔ sʋ̃maa nu, nɩɩ eɣile be nwʋ anʋhʋba mɔɔ ekilaa yɩ ɔhʋanɩ paa nwʋ odwokɔ kile mmenii mvʋlɔ. Akʋ̃ sʋ̃, máma wʋ ɛɣɛɛlɛ fi kɛɛ mpayɩ mɔɔ ɔkɔwɔ kɛma mmenii mvʋlɔ nɩ, tumi wɔ numɔ paa. (1 Pit. 3:12) Ɩávalɩ nwʋmɔ kezimɔ yɛ bʋwabɩlɛ dɩ nɩ, ye munwala yɛkɔhʋla kɛyɛ debe kɛma Gyehova nɩɩ mmenii mvʋlɔ.

17. Mɩnla ti mɔɔ íni kɛɛ yɛfa yɛ nwʋ yetindiã mmenii mvʋlɔ nwʋ a?

¹⁷ Sɛ ɩyɛ wʋ atɩɩtɩɩ kɛɛ wʋáhʋla yɛ sʋ̃maa wɔ Gyehova yɩ ɔzʋ̃mɩnlɛ nu a, nyia anwʋlazʋ kɛɛ, mɔɔ ɔkʋla yɛ bela nɩ, ɩtʋ bʋlɔ ɩma Gyehova. Ebiye a, ɔkɔwɔ mmɔdɩnɩ kɛɛ ɛkɛva mɔɔ ɔkʋla yɛ nɩ kedindiã mmenii mvʋlɔ bɛ dɩyɛ nwʋ. Áma ɛyɛ zɔ! Ezi sianti a? Iluwakɛɛ Gyehova ɩáyɛ zɔ. (Gal. 6:4) Kɛ ndianwʋ nɩ, Mɛɛlɩ valɩ ngɔlɔ be mɔɔ yɩ bʋlɔ yɛ sɩ hyɛlɩ Gyisɛsɩ. (Dwɔ. 12:​3-5) Naasʋ̃, kunavʋlɔ ehyinyianii nɩ valɩ ahapɛlɩba anwɩ̃ mɔɔ ɩádʋ bʋlɔ ana bela hɔ yɩlɩ fʋtʋlɔ. (Lk. 21:​1-4) Naasʋ̃ Gyisɛsɩ ɩáfa Mɛɛlɩ yɩ dɩyɛ nɩ tindiã kunavʋlɔ nɩ yɩ dɩyɛ yɩ nwʋ, mfomi ɩnwʋnlɩ kɛɛ bɛzabɛ anwɩ̃ yɩ munwala lalɩ dedi ali. Eyi kile kɛɛ, sɛ yɩ Zɩ Gyehova nwʋ kɛɛ dedi mɔɔ yɛwɔ wɔ yi nu nɩɩ yɩ nwʋ ɔlɔlɛ ti yɛ yɛyɛ debe yɛma yɩ a, yɩ anyɩ sɔ yɩ paa, ɩávalɩ nwʋmɔ kɛɛ yɛnwʋ yɩ kɛɛ ɩdɩ ɛgyɩkɩ̃ɩ̃ nɩ.

18. Sɛ yɛ adwɩnɩ yɛ yɛ anwɩ̃ anwɩ̃ a, mɩnla yɛ ɩkɔwʋwa yɛ ma yekeli zʋlɔ a? (Kila alɩka mɔɔ ise “Gyehova Yi Odwokɔ Kɔhʋla Kɔwʋwa Wʋ Ma Wʋ Adwɩnɩ Kezi Wʋ Pi.”)

¹⁸ Ye munwatĩĩ ɩyɛ a, yɛ adwɩnɩ yɛ yɛ anwɩ̃ anwɩ̃. Kɛmɔ yɛɣa yɛnwʋ yɩ nɩ, Bayɩbʋlʋ yɩ kɔhʋla kɔwʋwa yɛ ma yekeli zʋlɔ. Meti bɔ mmɔdɩnɩ kɛɛ ekenyia wʋ ndwokɔɣizialɛ nwʋ munwalɩyɛ na ɩkɛma ekenyia anwʋlazʋ. Gyehova dwɩnɩ wʋ nwʋ ankasa. Yɩ anyɩ sɔ nninyeni azʋlɔtʋ mɔɔ ɛva wɔ afɔlɩ na ama wʋahʋla wʋava yɩ wʋali bɔmʋnlɩ wɔ wʋ ɛbɩlawɔlɛ nu nɩ, na ɩbɔ anʋhʋba kɛɛ ikeyila wʋ. Nyia anwʋlazʋ kɛɛ Gyehova dɔ yɩ azʋ̃mɩvʋlɔ nɔhʋanlɛmaa munwatĩĩ na ɩdwɩnɩ bɔ nwʋ nkʋ̃kʋ̃ nkʋ̃kʋ̃.