Sianti Mɔɔ Gyehova Yi Dima Yɩ Nwʋ Hyinyia Gyisɛsɩ

1-2. (a) Nunuma mɔɔ awulokyɩ̃ a bokohu Gyisɛsɩ nɩ, mɩnla yɛ ɩyɛlɩ a? (b) Mɩnla ndwokɔɣizialɛ yɛ yɛbazunzu nwʋmɔ wɔ dɩyɛzumanlɛ eyi nu a?

NƖ ƖDƖ Kulo nunuma, Nisan 14, 33 Y.M. nu. Nɩ ɩlɛ́kyɛ na Dwudasɩ ɩayɩ Gyisɛsɩ ɩama, bɛawuwa yɩ owulo fɔ, bɛayɛ yɩ ayɛkwa na bɛahũ yi. Nɩ ɩ nɩɩ yɩ asʋ̃mavʋlɔ yɩ wɔ numɔ li nunuma alɩyɛ titili be wɔ abʋlɔnsanɩ be zʋ. Belili alɩyɛ yɩ bowieli nɩ, Gyisɛsɩ hanlɩ ndwokɔ be va hyɛlɩ yɩ adʋwavʋlɔ yɩ ɛzɩzɩbɛ. Ɩka ɛgyɩkɩ̃ɩ̃ ma bɔzʋ̃ aliyia yi nu befinde nɩ, Gyisɛsɩ wɔlɩ mpayɩ be mɔɔ nwʋmɔ hyinyia paa. Sʋ̃mavʋlɔ Dwɔɔnʋ hɛlɛlɩ mpayɩ eyi, na ɩwɔ Dwɔɔnʋ yi ti 17.

² Wɔ dɩyɛzumanlɛ eyi nu nɩ, yekehila nninyeni be mɔɔ yɛkɔhʋla kozuma wɔ Gyisɛsɩ yɩ mpayɩ yɩ nu. Ɩka ɛgyɩkɩ̃ɩ̃ ma iwu nɩ, mɩnla yɛ nɩ nwʋmɔ odwokɔ dide yi paa a? Mɩnla ɔhʋanɩ zʋ yɛ mpayɩ eyi ma yɛnwʋ mɔɔ nɩ ihyinyia yɩ paa mmɩlɩ mɔ nɩ ɩyɛɛ yɩ ɔzʋ̃mɩnlɛ egyima yɩ wɔ azɩlɛ yɩ zʋ nɩ a? Bɛmá yezunzu ndwokɔɣizialɛ eyi nwʋ.

“MƖMA BƆNWƲ WU DIMA”

3. Mɩnla yɛ Gyisɛsɩ hanlɩ valɩlɩ Gyehova yi dima yɩ nwʋ a, na mɩnla yɛ nɩ ɩpɛɛ ikehile a? (Dwɔɔnʋ 17:​6, 26, NWT)

³ Wɔ Gyisɛsɩ yɩ mpayɩwɔlɛ nu nɩ, ɩhanlɩ kɛɛ: “Mɩma bɔnwʋ wu dima na mɩbama bɔkɔnwʋ yɩ.” Yɛkʋla yɛkã kɛɛ nɩ eyi nwʋ hyinyia Gyisɛsɩ paa, sianti yɛ lɛ kɛɛ ɩhanlɩ yɩ mbɔmɩ anwɩ̃ kɛɛ ɩma yɩ adʋwavʋlɔ yɩ nwʋ Gyehova yi dima yɩ. (Kɩnga Dwɔɔnʋ 17:​6, 26, NWT.) Mɩnla yɛ nɩ ɩpɛɛ kehile a? Asʋ̃ nɩ banzɛmɔ ɩbahilehile yɩ adʋwavʋlɔ yɩ Gyehova yi dima a? Nɩ Gyisɛsɩ yɩ adʋwavʋlɔ yɩ dɩ Dwuumaa, meti nɩ bezi Nyamɩnlɩ yi dima Gyehova yɩ daada. Nɩ dima yɩ findeli Hibulu Ɛhɛlɛlɛ yɩ nu kɛyɛ mbɔmɩ 7000. Meti nɩ Gyisɛsɩ ɩlɛ́kã Nyamɩnlɩ yi dima Gyehova ankasa nwʋ odwokɔ, mfomi nɩ ɩma bɔkɔnwʋ Nyamɩnlɩ kʋ̃ mɔɔ Gyehova dɩ. Gyisɛsɩ wʋwalɩ yɩ adʋwavʋlɔ yɩ ma bɔnwʋnlɩ Gyehova bʋwɔ. Kɛ ndianwʋ nɩ, ɩmanlɩ bɔnwʋnlɩ Gyehova yi tile nu pɔkɔ ma azɩlɛ yɩ nɩɩ adasamaa, mɔɔ ɩyɛ daada, mɔɔ ɩbayɛ, nɩɩ yi subanɩ azʋlɔtʋ yɩ bʋwɔ. Nɩ Gyisɛsɩ zi Gyehova bʋwɔ paa.

4-5. (a) Mɩnla ɔhʋanɩ zʋ yɛ abiye yi dima nwʋ kɔhʋla kehyinyia a? Ma nwʋmɔ ndianwʋ. (b) Mɩnla ɔhʋanɩ zʋ yɛ Gyisɛsɩ yɩ adʋwavʋlɔ ɣa nwʋnlɩ Gyehova yi dima yɩ bʋwɔ a?

⁴ Kɛ ndianwʋ nɩ, yɛva yɩ kɛɛ asafʋ nu ebani be wɔ wʋ asafʋ nu mɔɔ bɔfʋlɔ yɩ David mɔɔ ɩdɩ dɔkʋtanii. Ezi eliyema eyi bʋwɔ paa. Naasʋ̃ eɣile ɔkʋ̃ be, wʋ nwʋ balɩ wʋ aɣilemvile nu. Ndɛndɛ la, bɛ nɩɩ wʋ hɔlɩ asʋpiti mɔɔ ɔzɔ asafʋ nu ebani yi yɛ egyima wɔ kɛnɩ yɩ nɩ nu, na ileli wʋ nnwʋanlɩ. Ɔzʋmɩ ɔzɔ mmɩlɩ mɔ ɩkɔɔ nɩ, ɔkɔnwʋ kɛɛ ɔlɔlɛ mɔɔ ɔwɔ ma ɔzɔ asafʋ nu ebani nɩ ɩyɛ kezi paa, na mmɩlɩ bela mɔɔ ɛkɛdɩ yi dima nɩ, nɩ mɔɔ ɩyɛlɩ ɩmanlɩ wʋ nɩ ɣa dɔ wu ti nu. Meti sikalɛyɩ ɔlɔ́nwʋ David kɛɛ wʋ asafʋ nu ebani la, mfomi ɔkɔnwʋ yɩ kɛɛ dɔkʋtanii mɔɔ ileli wʋ nnwʋanlɩ.

⁵ Ɔzɔ sʋ̃ la yɛ nɩ Gyisɛsɩ yɩ adʋwavʋlɔ nɩ zi Gyehova yi dima yɩ a. Naasʋ̃ ɔzɔ dima nɩ nwʋ ɣa hyinyianlɩ bɛ paa iluwakɛɛ Gyisɛsɩ wʋwalɩ bɛ ma bɔnwʋnlɩ Gyehova bʋwɔ. Mɩnla ti mɔɔ yɛkʋla yɛkã ɔzɔ a? Iluwakɛɛ ɩlalɩ yɩ Zɩ yi subanɩ ali wɔ dɩyɛ bela nu. Meti mmɩlɩ mɔ Gyisɛsɩ yɩ asʋ̃mavʋlɔ diyeli kezimɔ ihilehileli na bɔnwʋnlɩ kezimɔ ɩ nɩɩ mmenii lili nɩ, ɩmanlɩ ‘bɔnwʋnlɩ’ Gyehova bʋwɔ.—Dwɔ. 14:9; 17:3.

“WƲZAWƲ WƲ DIMA MƆƆ ƐVA ƐMANLƖ MƖ”

6. Mmɩlɩ mɔ Gyisɛsɩ hanlɩ kɛɛ Gyehova va yi dima yɩ ɩma yɩ nɩ, nɩ ɩpɛɛ kehile mɩnla a? (Dwɔɔnʋ 17:​11, 12)

⁶ Gyisɛsɩ wɔlɩ mpayɩ manlɩ yɩ adʋwavʋlɔ yɩ, na wɔ mpayɩwɔlɛ yɩ nu nɩ ɩhanlɩ kɛɛ: “Wʋzawʋ wʋ dima mɔɔ ɛva ɛmanlɩ mɩ nɩ ti kila bɔ zʋ.” (Kɩnga Dwɔɔnʋ 17:​11, 12.) Asʋ̃ ɔzɔ odwokɔ yɩ kile kɛɛ nɩ bɛbavʋlɔ Gyisɛsɩ kɛɛ Gyehova a? Anhã. Yɛ yɩ ndwɩ kɛɛ mmɩlɩ mɔ Gyisɛsɩ ɩkãã Gyehova yi dima yɩ nwʋ odwokɔ nɩ, ɩvalɩ odwokɔ “wʋzawʋ wʋ dima” ilili egyima. Meti Gyehova yi dima yɩ ɩába ɩyɛ Gyisɛsɩ yi dima. Mɛyɩ nɩ mmɩlɩ mɔ Gyisɛsɩ hanlɩ kɛɛ bɛva Nyamɩnlɩ yi dima yɩ bɛma yɩ nɩ, nɩ ɩpɛɛ kehile mɩnla a? Mɔɔ ili bɔmʋnlɩ, nɩ Gyisɛsɩ dɩ Gyehova iagyianugyinanlɛvʋlɔ na ɩtɩndɛ ɩma yɩ. Iluwa Gyehova ti yɛ ɩɣalɩ azɩlɛ yɩ zʋ a, na ɩyɛlɩ nnwʋánlɩ nninyeni wɔ yi dima nu. (Dwɔ. 5:43; 10:25) Dɔkʋ̃ sʋ̃, dima Gyisɛsɩ kile “Gyehova yɛ lɛ Nnwʋanlɩlelɛvʋlɔ.” Meti Gyehova kɩnla Gyisɛsɩ yi dima yɩ tʋhilelɛ yɩ nwʋ.

7. Mɩnla ti mɔɔ nɩ Gyisɛsɩ kʋla tɩndɛ ma Gyehova a? Ma nwʋmɔ ndianwʋ.

⁷ Kila ndianwʋ eyi, ebani be kʋla sʋ̃ma abiye kɛɛ ɩhɔ́ igyina yɩ agyia nu na ɩ nɩɩ mmenii be bɛdɩndɛ. Meti ndwokɔ mɔɔ enii kʋ̃ nɩ kɔ a ɩkɛhã nɩ, tumi wɔ numɔ dɩkɛɛ mɔɔ ebani yi yɩzayɩ yɛ ɩkãã a. Ɔzɔ la sʋ̃ yɛ Gyisɛsɩ gyinanlɩ Gyehova yɩ agyia nu na ɩ nɩɩ mmenii dɩndɛlɩ wɔ yi dima nu a.—Mt. 21:9; Lk. 13:35.

8. Mɩnla ti mɔɔ Gyehova hanlɩ kɛɛ yi dima “wɔ” Gyisɛsɩ nu ansaana ɩbaɣa azɩlɛ yɩ zʋ po a? (Ɛkɩsadɔsʋ 23:​20, 21)

⁸ Bayɩbʋlʋ fʋlɔ Gyisɛsɩ Odwokɔ yɩ, iluwakɛɛ Gyehova luwalɩ yɩ zʋ dɩndɛlɩ hileli awɔvʋlɔ nɩɩ mmenii ma bɔnwʋnlɩ mɔɔ ɩpɛ kɛɛ bɔnwʋ yɩ na bɛyɛ. (Dwɔ. 1:​1-3) Ɩkɛyɛ kɛɛ Gyisɛsɩ yɛ lɛ bɔvʋlɔ mɔɔ Gyehova zʋ̃manlɩ yɩ ma ɩhɔ ihilalɩ Yizilayamaa yɩ mmɩlɩ mɔ nɩ bɔwɔ ɛsɛlɛ yɩ zʋ nɩ a. Mmɩlɩ mɔ Gyehova ɩkãã kehile Yizilayamaa yɩ kɛɛ bediyé ɔzɔ bɔvʋlɔ yɩ nɩ, ɩhanlɩ kɛɛ: “Iluwakɛɛ mi dima wɔ yi nu.”a (Kɩnga Ɛkɩsadɔsʋ 23:​20, 21.) Gyehova hanlɩ zɔ iluwakɛɛ Gyisɛsɩ tɩndɛ ma yɩ na mɛyɩ yɛ lɛ abiye mɔɔ ɩda yi ali petee kɛɛ mɔɔ Gyehova yɛ bela nɩ, ɩtɩnɣɛ na ɩdɩ nwanzanwanza a.

“ƐZƖLƐ, HYƐ WƲ DIMA NƖ ANIMINYIAMƖ”

9. Nɩ kɛ Gyehova yi dima yɩ nwʋ hyinyia Gyisɛsɩ se a? Kilehile numɔ.

⁹ Kɛmɔ yeli bɔmʋnlɩ yezunzu nwʋmɔ nɩ, ansaana Gyisɛsɩ kɛɣa azɩlɛ yɩ zʋ po nɩ, nɩ Gyehova yi dima yɩ nwʋ hyinyia yɩ baaba. Ɩáyɛ nnwʋánlɩ kɛɛ mmɩlɩ mɔ Gyisɛsɩ wɔ azɩlɛ yɩ zʋ nɩ, ɩyɛlɩ dɩyɛ bela ɩva ihileli kezimɔ Gyehova yi dima yɩ nwʋ hyinyia yɩ nɩ. Ɩka ɛgyɩkɩ̃ɩ̃ ma Gyisɛsɩ iwie yɩ ɔzʋ̃mɩnlɛ egyima yɩ nɩ, izianlɩ Gyehova kɛɛ: “Ɛzɩlɛ, hyɛ wʋ dima nɩ animinyiamɩ.” Ɛkɛnɩ la yɩ Zɩ valɩ nnɩ kezile be leli zʋlɔ wɔ sʋlɔ kɛɛ: “Mɩhyɛ yɩ animinyiamɩ dadampɔ, na mɩbahyɛ yɩ ebiyekʋ̃.”—Dwɔ. 12:28.

10-11. (a) Mɩnla ɔhʋanɩ zʋ yɛ Gyisɛsɩ hyɛlɩ Gyehova yi dima yɩ animinyiamɩ a? (Kila mfonyini yi sʋ̃.) (b) Mɩnla ti mɔɔ ihyinyia kɛɛ bɛtɩ Gyehova yi dima yɩ nwʋ a?

¹⁰ Gyisɛsɩ hyɛlɩ yɩ Zɩ yi dima animinyiamɩ. Mɩnla ɔhʋanɩ zʋ a? Ɔhʋanɩ ɔkʋ̃ yɛ lɛ kɛɛ ɩlalɩ yɩ Zɩ yi subanɩ ngɩnlɩma nɩɩ nninyeni mɔɔ ɩyɛ nɩ ali ihileli mmenii. Naasʋ̃, ɩyɛlɩ debe fʋlɔ sʋ̃. Nɩ ihyinyia kɛɛ ɩtɩ Gyehova yi dima nwʋ na ɩda yɩ ali kɛɛ yi dima yɩ dɩ nwanzanwanza. Gyisɛsɩ hileli kezimɔ eyi nwʋ hyinyia mmɩlɩ mɔ ihileli yɩ adʋwavʋlɔ kezimɔ bɔwɔ́ mpayɩ nɩ. Ɩhanlɩ kɛɛ: “Yɛ Zɩ mɔɔ ɔwɔ sʋlɔ, wʋ dima nwʋ dɩ.”—Mt. 6:​9, NWT.

¹¹ Mɩnla ti mɔɔ ihyinyia kɛɛ bɛtɩ Gyehova yi dima yɩ nwʋ a? Iluwakɛɛ wɔ Ɛdɩnɩ toolo yi nu nɩ, Setanɩ lili awohwi valɩlɩ Gyehova Nyamɩnlɩ nwʋ na igualɩ yi dima yɩ nwʋ evinli. Setanɩ hanlɩ kɛɛ Gyehova dɩ awohwinii na ɩlɛ dɩyɛ baaba be isiyee Adamɩ nɩɩ Yifi. (Gyn. 3:​1-5) Nɩ Setanɩ ɩpɛɛ kehile sʋ̃ kɛɛ ɔhʋanɩ mɔɔ Gyehova duwa zʋ yɛ yɩ dɩyɛ nɩ ɩdɩbɛ. Awohwi mɔɔ Setanɩ lili valɩlɩ Gyehova nwʋ nɩ gualɩ yi dima yɩ nwʋ evinli. Aɣinzi yi, Setanɩ hanlɩ wɔ Dwoobu yɩ mmɩlɩ zʋ kɛɛ, bɛzabɛ mɔɔ bɔsʋ̃mɩ Gyehova nɩ, iluwa nninyeni mɔɔ benyia yɩ wɔ yɩ kɛnɩ ti yɛ bɔsʋ̃mɩ yɩ a. Setanɩ zialɩ sʋ̃ hanlɩ kɛɛ enii bela íni kɛnɩ mɔɔ sɛ iyiyiaa ndwokɔzɩzɩbɛ a, ɩkɔhɔ zʋ kɔzʋ̃mɩ Gyehova iluwakɛɛ bɛálɔ yɩ. (Dwb. 1:​9-11; 2:4) Nɩ ikele mmɩlɩ na yɛanwʋ kɛɛ Gyehova anzɛnyɩɩ Setanɩ yɛ ɩdɩ awohwinii a.

“MƲWAWƲWA MƲ NWƲ KƐƐ MUKOWU”

12. Iluwakɛɛ nɩ Gyisɛsɩ dɔ Gyehova yi dima yɩ ti, mɩnla yɛ nɩ iziyeziye yɩ nwʋ kɛɛ ɩkɛyɛ a?

¹² Iluwa ɔlɔlɛ mɔɔ nɩ Gyisɛsɩ wɔ ma Gyehova yi dima yɩ ti, nɩ ɩpɛ kɛɛ ɩyɛ mɔɔ ɩkɔhʋla bela ɩtɩ Gyehova yi dima nwʋ. Gyisɛsɩ hanlɩ kɛɛ, “Mʋwawʋwa mʋ nwʋ kɛɛ mukowu.” (Dwɔ. 10:​17, 18) Nyɛ, nɩ iziyeziye yɩ nwʋ kɛɛ ikowu kɛma Gyehova yi dima.b Adamɩ nɩɩ Yifi mɔɔ nɩ bedi munli nɩ bʋlɩ Gyehova na bɔhɔ belili Setanɩ mɛda. Naasʋ̃ Gyisɛsɩ mɛyɩ, ɩzʋ̃ yɩ pɛ nu ɩɣalɩ azɩlɛ yɩ zʋ na ɩlalɩ yɩ ali kɛɛ ɩdɔ Gyehova. Gyisɛsɩ yɛlɩ zɔ iluwa sutiye mɔɔ ɩyɛlɩ ɩmanlɩ Gyehova wɔ dɩyɛ bela nu nɩ. (Hib. 4:15; 5:​7-10) Gyisɛsɩ lili nɔhʋanlɛ kɔbʋmɩ kɛɛ iwuli wɔ amanɩyɛnwʋnlɛ owudo zʋ. (Hib. 12:2) Iluwalɩ ɔzɔ ɔhʋanɩ yɩ zʋ ɩlalɩ yɩ ali kɛɛ ɩdɔ Gyehova nɩɩ yi dima yɩ.

13. Mɩnla ti mɔɔ Gyisɛsɩ yɛ nɩ ɩfata paa kɛɛ ɩkɛma ɩkɛla ali kɛɛ Setanɩ dɩ awohwinii a? (Kila mfonyini yi sʋ̃.)

¹³ Gyisɛsɩ valɩ yɩ ɛbɩlawɔlɛ lalɩ yɩ ali kɛɛ Setanɩ yɛ ɩdɩ awohwinii na kɛ Gyehova a! (Dwɔ. 8:44) Nɩ Gyisɛsɩ zi Gyehova bʋwɔ tɛla enii bela mɔɔ ɩwʋwa azɩlɛ yɩ zʋ kyɩ̃ nɩ. Sɛ ndwokɔ mɔɔ Setanɩ hanlɩ valɩlɩ Gyehova nwʋ nɩ dɩ nɔhʋanlɛ a, ankɩ Gyisɛsɩ kɔnwʋ yɩ. Gyisɛsɩ zili yɩ kɛnɣa kɛɛ ɩkɛdɩ Gyehova yi dima nwʋ, iluwakɛɛ nɩ izi kɛɛ Setanɩ yi ndwokɔ yɩ munwala dɩ awohwi. Wɔ mmɩlɩ po mɔ nɩ ɩdɩ kɛɛ mɔɔ Gyehova yiaki yi nɩ, nɩ Gyisɛsɩ ziyeziye yɩ nwʋ kɛɛ ikowu tɛla kɛɛ ɩkɛlanɩ yɩ mɛda kɛma yɩ Zɩ mɔɔ ɩwɔ ɔlɔlɛ nɩ.—Mt. 27:46.c

“MUWIE EGYIMA MƆƆ ƐVALƖ ƐMANLƖ MƖ KƐƐ MƖYƐ NƖ”

14. Mɩnla yɛ Gyehova yɛlɩ manlɩ Gyisɛsɩ wɔ yɩ nɔhʋanlɛlilɛ yɩ nwʋ a?

¹⁴ Nunuma mɔɔ awulo kyɩ̃ Gyisɛsɩ kowu nɩ, ɩwɔlɩ mpayɩ kɛɛ: ‘Muwie egyima mɔɔ ɛvalɩ ɛmanlɩ mɩ kɛɛ mɩyɛ nɩ yɛ.’ Nɩ ɩwɔ anwʋlazʋ kɛɛ Gyehova keyila yɩ wɔ yɩ nɔhʋanlɛlilɛ yɩ nwʋ. (Dwɔ. 17:​4, 5) Na ɩdɩ baaba kɛɛ Gyisɛsɩ valɩ yɩ nwʋ dianlɩ yɩ Zɩ zʋ. Gyehova ɩáma ɩkalɩ siye yi nu. (Egy. 2:​23, 24) Idunwonli Gyisɛsɩ na ɩvalɩ dibilɛ kezile be ɩmanlɩ yɩ wɔ sʋlɔ. (Fɩl. 2:​8, 9) Akʋ̃ Gyisɛsɩ wɔlɩ yɩ tʋ kɛɛ idii Nyamɩnlɩ Bulombunlililɛ yɩ zʋ Bulombunli. Mɩnla yɛ ɔzɔ Bulombunlililɛ nɩ kɛyɛ a? Gyisɛsɩ manlɩ nwʋmɔ munwalɩyɛ mmɩlɩ mɔ ihileli yɩ adʋwavʋlɔ yɩ kɛɛ bɔwɔ́ mpayɩ kɛɛ: “Wu Bulombunlililɛ ɩɣɩla, bɛyɛ wʋ [Gyehova yɩ] apɛdɩ wɔ azɩlɛ yɩ zʋ, kɛmɔ bɛyɛ yɩ wɔ sʋlɔ nɩ.”—Mt. 6:10.

15. Mɩnla dɔkʋ̃ yɛ Gyisɛsɩ kɛyɛ a?

¹⁵ Ɩlɛ́kyɛ, Gyisɛsɩ kɔhʋ̃ kediyia Nyamɩnlɩ yɩ adamvʋlɔ na ɩazɩkɛ tanɩyɛlɛmaa wɔ Amagadɔnʋ. (Yik. 16:​14, 16; 19:​11-16) Mɛyɩ mɛda pɛɛ nɩ, ɩkɔdʋ Setanɩ kediã “kuma kulonwuu kulonwuu” nɩ nu, dɩka mɔɔ ɩlɔ́kʋla kɛyɛ hwɩɩ. (Yik. 20:​1-3) Akʋ̃ Gyisɛsɩ keli tumi alʋbɔ abʋmɩ, na ɩkɛma azʋ̃nudwolɩyɛ kɛɣa azɩlɛ yɩ zʋ na ɩawʋwa adasamaa ma bɛali munli. Ikodunwo awuvʋlɔ. Ɩkɛma azɩlɛ yɩ munwala kɛlanɩ paladayɩsɩ. Na Gyehova yi tile nu pɔkɔ kɛɣa numɔ!—Yik. 21:​1-4.

16. Kɛ ɛbɩlawɔlɛ kɛyɛ keze wɔ Alʋbɔ Abʋmɩ Tumililɛ yɩ mɛda a?

¹⁶ Wɔ Alʋbɔ Abʋmɩ Tumililɛ yɩ mɛda nɩ, kɛ yɛ ɛbɩlawɔlɛ kɛyɛ keze a? Tanɩ nɩɩ sinidɔlɛ mɔɔ ɩwɔ adasamaa nwʋ munwala kɔhɔ. Iléhyinyia kɛɛ adasamaa kegyina elelɛdɩyɛ afɔlɩ yɩ zʋ keziã tanɩfakyɛ dɔkʋ̃; yɛɛ iléhyinyia kɛɛ Gyisɛsɩ kegyina yɛ nɩɩ Nyamɩnlɩ avinli anzɛnyɩɩ ɩkɛyɛ Azɔfʋ Mbanimbani Nu Ebani dɔkʋ̃ ansaana yɛ nɩɩ Gyehova avinli ɩayɛ baaba. Na “tamvʋlɔ mɔɔ ili aɣinzi mɔɔ Nyamɩnlɩ ɩbazɩkɛ yɩ nɩ yɛ lɛ owulo” mɔɔ Adamɩ va ɣalɩ nɩ. Siye yi munwala kɔdɔ mbʋanlɩ. Bɛkɛva awuvʋlɔ bɛkɛɣa nnwʋanlɩ nu dɔkʋ̃. Abiyela mɔɔ ɩwɔ azɩlɛ yɩ zʋ keli munli.—1 Kɔl. 15:​25, 26.

17-18. (a) Sɛ Alʋbɔ Abʋmɩ Tumililɛ yɩ ba awielɩyɛ a, mɩnla yɛ ikezi a? (b) Sɛ Gyisɛsɩ yi tumililɛ yɩ ɩbaa awielɩyɛ a, mɩnla yɛ ɩkɛyɛ a? (1 Kɔlɛntɩmaa 15:​24, 28) (Kila mfonyini yi sʋ̃.)

¹⁷ Mɩnla dɔkʋ̃ yɛ ikezi wɔ Alʋbɔ Abʋmɩ Tumililɛ yɩ awielɩyɛ a? Ɔzɔ mmɩlɩ yɩ, dɩyɛ sʋnʋnkʋ̃ be kezi. Odwokɔ mɔɔ ɩfalɩ Gyehova yi dima mɔɔ nwʋmɔ kɛdɩ nɩ kɛɣa awielɩyɛ. Mɩnla ɔhʋanɩ zʋ a? Wɔ Ɛdɩnɩ toolo yi nu nɩ, Setanɩ hanlɩ kɛɛ Gyehova dɩ awohwinii na iáli adasamaa zʋ wɔ ɔlɔlɛ nu. Ɔzʋmɩ ɔzɔ mmɩlɩ yɩ nɩ, bɛzabɛ mɔɔ bɔsʋ̃mɩ Gyehova na bedi yi nni nɩ, bɛla yɩ ali mbɔmɩ sʋ̃maa kɛɛ Gyehova yi tumililɛ yɛ ɩdɩ baaba a. Meti sɛ Alʋbɔ Abʋmɩ Tumililɛ yɩ ba awielɩyɛ a, Gyehova yi dima yɩ nwʋ kɛdɩ kʋlakʋla. Ikodwu ɔzɔ mmɩlɩ yɩ nɩ, nɩ ɩla yɩ ali petee ma abiyela nwʋ kɛɛ ɩdɩ yɛ sʋlɔ Ɛzɩlɛ mɔɔ ɩwɔ ɔlɔlɛ.

¹⁸ Wɔ Alʋbɔ Abʋmɩ Tumililɛ yɩ awielɩyɛ nɩ, abiyela kɔnwʋ kɛɛ ndwokɔ mɔɔ Setanɩ hanlɩ valɩlɩ Gyehova nwʋ munwala dɩ awohwi. Sɛ Gyisɛsɩ yi tumililɛ yɩ ɩbaa awielɩyɛ a, mɩnla yɛ ɩkɛyɛ a? Asʋ̃ ɩkɛyɛ yɩ dɩyɛ kɛɛ Setanɩ na iadwodwu iadiyia Gyehova a? Anhã! (Kɩnga 1 Kɔlɛntɩmaa 15:​24, 28.) Gyisɛsɩ kezia kɛva Bulombunlililɛ yɩ kɛma yɩ Zɩ. Ɩkɛhã yɩ nwʋ azɩ kowula Gyehova yi tumililɛ tʋ. Nyɛ, Gyisɛsɩ ɩlɛ́yɛ yɩ dɩyɛ kɛɛ Setanɩ, mfomi ɩwɔ ɛpɛ kɛɛ ɩkɛva yi tumi munwatĩĩ ɩkɛma Gyehova iluwakɛɛ ɩdɔ yɩ.

19. Kɛ Gyehova yi dima yɩ nwʋ hyinyia Gyisɛsɩ se a?

¹⁹ Ɩáyɛ nnwʋánlɩ kɛɛ nɩ Gyehova wɔ ɛpɛ kɛɛ ɩkɛva yi dima yɩ kɛma Gyisɛsɩ! Gyisɛsɩ lalɩ yɩ Zɩ yi subanɩ ali pɛpɛɛpɛ. Meti, nɩ kɛ Gyehova yi dima yɩ nwʋ hyinyia Gyisɛsɩ se a? Ɔnwʋmɔ hyinyia yɩ tɛla dɩyɛ bela. Nɩ iziyeziye yɩ nwʋ kɛɛ ikowu kɛma Gyehova yi dima, na iziyeziye yɩ nwʋ kɛɛ ɩkɛlanɩ yi tumi munwala ɩkɛma Gyehova wɔ Alʋbɔ Abʋmɩ Tumililɛ nɩ yɩ awielɩyɛ. Mɩnla ɔhʋanɩ zʋ yɛ yɛkɔhʋla kozumazuma Gyisɛsɩ a? Yekozunzu odwokɔɣizialɛ eyi nwʋ wɔ dɩyɛzumanlɛ mɔɔ ili kɛnɩ nɩ nu.