DƖYƐZUMANLƐ ODWOKƆ 23
NDWOMI 2 Wʋ Dima Yɛ Lɛ Gyehova
Gyehova Yi Dima Yɩ Nwʋ Hyinyia Yɛ
“‘Mʋnlʋmmɔ yɛ lɛ mɩ dasɩvʋlɔmaa,’ mɔɔ Gyehova ɩhã yɛ nɩ.”—AYƖ 43:10.
BƲTAYƖ
Mɔɔ yɛkɔhʋla kɛyɛ kɛva kehile kɛɛ Gyehova dɩ nwanzanwanza na mɔɔ Setanɩ ɩhã ɩvalɩ yɩ nwʋ munwatĩĩ dɩ awohwi.
1-2. Kɛ ɩyɛ mɔɔ yɛnwʋ kɛɛ Gyehova yi dima yɩ nwʋ hyinyia Gyisɛsɩ a?
GYEHOVA yi dima yɩ nwʋ hyinyia Gyisɛsɩ tɛla dɩyɛ bela. Gyisɛsɩ yɛ ɩma mmenii nwʋ Gyehova yi dima yɩ paa a. Wɔ dɩyɛzumanlɛ mɔɔ ili eyi yɩ anyunu nɩ, yɛnwʋnlɩ kɛɛ nɩ Gyisɛsɩ wɔ ɛpɛ kɛɛ ikowu kɛma Gyehova yi dima yɩ na ɩava iahile kɛɛ mɔɔ Gyehova ɩyɛ bela nɩ tɩnɣɛ. (Mk. 14:36; Hib. 10:7-9) Na wɔ Alʋbɔ Abʋmɩ Tumililɛ yɩ mɛda nɩ, Gyisɛsɩ ɩzʋ̃ yɩ pɛ nu ikezia kɛlanɩ yi tumililɛ munwatĩĩ kɛma Gyehova, iluwakɛɛ ɩpɛ kɛɛ ɩfa animinyiamɩ munwatĩĩ ɩma yɩ. (1 Kɔl. 15:26-28) Ɔlɔlɛ mɔɔ Gyisɛsɩ wɔ ma Nyamɩnlɩ yi dima nɩ ma yɛnwʋ abusunwawɔlɛ mɔɔ ɩ nɩɩ yɩ Zɩ wɔ. Eyi ma yɛnwʋ kɛɛ Gyisɛsɩ dɔ Gyehova baaba paa.
2 Gyisɛsɩ ɣalɩ azɩlɛ yɩ zʋ kɛɛ ɩbahã nninyeni mɔɔ Gyehova pɛ kɛɛ mmenii nwʋ yɩ nɩ kehile bɛ. (Dwɔ. 5:43; 12:13) Ɩmanlɩ yɩ mɛdalilɛmaa yɩ nwʋnlɩ yɩ Zɩ yi dima. (Dwɔ. 17:6, 26) Ihilehileli mmenii na ɩyɛlɩ nnwʋánlɩ nninyeni wɔ Gyehova yi dima nu. (Dwɔ. 10:25) Gyisɛsɩ zianlɩ Gyehova kɛɛ ihilá yɩ adʋwavʋlɔ yɩ zʋ “wɔ [yi] dima” nu. (Dwɔ. 17:11) Ɩda ali kɛɛ, Nyamɩnlɩ yi dima yɩ nwʋ hyinyia Gyisɛsɩ tɛla dɩyɛ bela. Meti kɛ ɩkɛyɛ na abiye ɩahã kɛɛ ɩdɩ Kilisinyianii mmɩlɩ mɔ ízi Gyehova yi dima anzɛnyɩɩ ɩáva idi egyima a?
3. Mɩnla yɛ yekozunzu nwʋmɔ wɔ dɩyɛzumanlɛ eyi nu a?
3 Kɛ Kilisinyiamaa mɔɔ yɛbɔ mmɔdɩnɩ kɛɛ yekeli Gyisɛsɩ mɛda nɩ, Gyehova yi dima yɩ nwʋ hyinyia yɛ paa. (1 Pit. 2:21) Wɔ dɩyɛzumanlɛ eyi nu nɩ, yekehila sianti mɔɔ Gyehova ɩva yi dima ɩma bɛzabɛ mɔɔ bɔbɔ “odwokɔba mɔɔ ɩfalɩ Nyamɩnlɩ Bulombunlililɛ” yɩ nwʋ ɛlawulo nɩ. (Mt. 24:14) Akʋ̃ sʋ̃, yekehila kezimɔ ɩsɛ kɛɛ yɛma Gyehova yi dima yɩ nwʋ hyinyia ye nu ɔkʋ̃ bela.
“ƖYƖLƖ MMENII WƆ BO NU ƖVALƖ YI DIMA IDIANLƖ BƆ ZƲ”
4. (a) Ansaana Gyisɛsɩ kezia kɔhɔ sʋlɔ nɩ, mɩnla yɛ ɩhã ihileli yɩ adʋwavʋlɔ yɩ a? (b) Mɩnla odwokɔɣizialɛ yɛ yekozunzu nwʋmɔ a?
4 Ɩka ɛgyɩkɩ̃ɩ̃ ma Gyisɛsɩ sia kɔ sʋlɔ nɩ, ɩhã ihileli yɩ adʋwavʋlɔ yɩ kɛɛ: “Sɛ Sunzuma Nwanzanwanza nɩ ɩba bɔ zʋ a, bekenyia tumi na bɛali mʋ nwʋ dasɩlɛ wɔ Gyelusalamɩ nɩɩ Dwudiyia mansini nu munwatĩĩ nɩɩ Samaliyia nkʋ̃ʋ̃ ɩkɔ itwu oyuwadɩ yɩ dɩka bela.” (Egy. 1:8) Meti nɩ bɛkɛhã odwokɔba nɩ wɔ dɩka bela, na kɛ Yizilaya nkʋ̃ a. Na mmɩlɩ ɩkɔlɩ zʋlɔ nɩ, mmenii mɔɔ bɔzʋ̃ oyuwadɩ dɩka bela kenyia ɔnwʋmɔ ɔhʋanɩ kɛɣa kɛyɛ Gyisɛsɩ yɩ adʋwavʋlɔ. (Mt. 28:19, 20) Naasʋ̃ Gyisɛsɩ hanlɩ kɛɛ: ‘Bekeli mʋ nwʋ dasɩlɛ.’ Asʋ̃ nɩ mmenii mɔɔ bɛkɛɣa kɛyɛ Gyisɛsɩ yɩ adʋwavʋlɔ nɩ keli Gyisɛsɩ yɩzayɩ nkʋ̃ nwʋ dasɩlɛ, anzɛnyɩɩ nɩ ikehyinyia kɛɛ bɔnwʋ Gyehova na bedi mɛyɩ sʋ̃ yɩ nwʋ dasɩlɛ a? Odwokɔ mɔɔ ɩwɔ Egyima yi ti 15 yɩ bʋwa yɛ ma yenyia odwokɔɣizialɛ eyi nwʋ munwalɩyɛ.
5. Mɩnla ɔhʋanɩ zʋ yɛ asʋ̃mavʋlɔ yɩ nɩɩ mbanimbani mɔɔ bɔwɔ Gyelusalamɩ nɩ lalɩ yɩ ali kɛɛ ihyinyia kɛɛ mmenii munwala nwʋ Gyehova yi dima yɩ a? (Kila mfonyini yi sʋ̃.)
5 Wɔ ɔlʋbɔ 49 Y.M. nu nɩ, asʋ̃mavʋlɔ yɩ nɩɩ mbanimbani mɔɔ bɔwɔ Gyelusalamɩ nɩ zunzunli mɔɔ ɩsɛ kɛɛ bɛzabɛ mɔɔ bolótualɩ be mmenyia zʋ nɩ yɛ na ama bɛale bɛ bɛadiã numɔ kɛɛ Kilisinyiamaa nɩ nwʋ. Wɔ ɔzɔ ayiyialɩyɛ nɩ yɩ awielɩyɛ nɩ, Gyemisi mɔɔ ɩdɩ Gyisɛsɩ yi busunwanii nɩ hanlɩ kɛɛ: “[Pita] hã yɩ petee ma yɛnwʋ kezimɔ Nyamɩnlɩ lanɩnlɩ yɩ anyɩ hɔlɩ amanlɩ amanlɩ yɩ zʋ ɩyɩlɩ mmenii wɔ bo nu ɩvalɩ yi dima idianlɩ bɔ zʋ.” Aninyia yi dima yɛ nɩ Gyemisi ɩkãã nwʋmɔ odwokɔ yɩ a? Ɩvalɩ nkɔmɩhyɛnii Emɔsʋ yi odwokɔ be ɩzɔlɩ zʋlɔ kɛɛ: “Mɔɔ ɩkɛyɛ mɔɔ mmenii mɔɔ bɛha nɩɩ amanlɩ amanlɩ nu maa munwatĩĩ, mmenii mɔɔ bɛfa mi dima bɔfʋlɔ bɛ nɩ kɛbɩbɛ Gyehova ɛzɩzɩbɛ ɛzɩzɩbɛ, Gyehova yɛ ise a.” (Egy. 15:14-18, NWT) Meti nɩ adʋwavʋlɔ mvʋlɔ eyimmɔ bolósuma Gyehova nwʋ dɩyɛ nkʋ̃ la, mfomi nɩ ‘bɛkɛva yi dima bɔkɔvʋlɔ bɛ.’ Eyi kile kɛɛ nɩ bɛkɛma mmenii kɔnwʋ Nyamɩnlɩ yi dima yɩ, na mɛyɩ sʋ̃ yɛ mmenii kɛva kɔnwʋ bɛ a.
Wɔ ɔwɔkɩ ɔhʋanɩhilelɛ okuwu nɩ bɛ ayiyialɩyɛ be tʋ nɩ, mmenyia nɔhʋanlɛmaa eyimmɔ nwʋnlɩ kɛɛ ɩsɛ kɛɛ Kilisinyiamaa yɛ mmenii mɔɔ bedi Nyamɩnlɩ yi dima yɩ nwʋ dasɩlɛ (Kila nkyɩkyɛmi 5)
6-7. (a) Mɩnla ti mɔɔ Gyisɛsɩ ɣalɩ azɩlɛ yɩ zʋ a? (b) Mɩnla titili paa ti yɛ Gyisɛsɩ ɣalɩ azɩlɛ yɩ zʋ a?
6 Gyisɛsɩ yi dima yɩ tʋ kile kɛɛ “Gyehova Dɩ Nnwʋanlɩlelɛvʋlɔ,” na ɩlalɩ yɩ ali kɛɛ mɛyɩ yɛ lɛ abiye mɔɔ Gyehova koluwa yɩ zʋ kele mmenii mɔɔ bɔwɔ yi nu dedi nɩ nnwʋanlɩ a. Gyisɛsɩ ɣalɩ azɩlɛ yɩ zʋ kɛɛ ɩlɛ yɩ nnwʋanlɩ ɩbawɔ afɔlɩ kɛma adasamaa. (Mt. 20:28) Iduwalɩ elelɛdɩyɛ yɩ na ama ɩayɛ bʋwɔ kɛɛ bekele adasamaa na bɛanyia nnwʋanlɩ mɔɔ íni awielɩyɛ.—Dwɔ. 3:16.
7 Naasʋ̃ mɩnla ti mɔɔ nɩ adasamaa hyinyia elelɛdɩyɛ yɩ a? Iluwa mɔɔ izili wɔ Ɛdɩnɩ toolo yi nu nɩ ti a. Kɛmɔ yɛnwʋnlɩ yɩ wɔ dɩyɛzumanlɛ mɔɔ ili eyi yɩ anyunu nɩ, Adamɩ nɩɩ Yifi dwodwuli diyialɩ Gyehova na ɩmanlɩ ɔnwʋmɔ ɔhʋanɩ mɔɔ adasamaa wɔ kɛɛ bɔkɔwʋwa azɩ daabaa nɩ vili bɛ sa. (Gyn. 3:6, 24) Naasʋ̃, Gyisɛsɩ ɣalɩ azɩlɛ yɩ zʋ kɛɛ ɩbayɛ debe mɔɔ nwʋmɔ hyinyia kʋlaa tɛla adasamaa tanɩyɛlɛmaa mɔɔ ikele bɛ nɩ. Nɩ Setanɩ gua Gyehova yi dima yɩ nwʋ evinli. (Gyn. 3:4, 5) Meti nɩ ɩsɛ kɛɛ adasamaa nwʋ yɩ kɛɛ Gyehova lɛ́yɛlɩ tanɩ bela na ɩdɩ Ɛzɩlɛ mɔɔ ɩwɔ ɔlɔlɛ. Na Gyisɛsɩ yɛ lɛ abiye mɔɔ ɩfata paa kɛɛ ɩma nɔhʋanlɛ odwokɔ eyi da ali a, iluwakɛɛ mɛyɩ yɛ ɩdɩ Gyehova iagyianugyinalɛvʋlɔ na yi dima la yɩ zʋ a, na ɩyɛlɩ dɩyɛ bela mɔɔ Gyehova pɛ yɩ nɩ pɛpɛɛpɛ.
Kɛ ɩkɛyɛ na abiye ɩahã kɛɛ ɩdɩ Kilisinyianii mmɩlɩ mɔ ízi Gyehova yi dima anzɛnyɩɩ ɩáva idi egyima a?
8. Mɩnla yɛ ɩsɛ kɛɛ bɛzabɛ mɔɔ bede Gyisɛsɩ bedi munwatĩĩ de tiã numɔ a?
8 Ɩsɛ kɛɛ bɛzabɛ mɔɔ bede Gyisɛsɩ bedi nɩ munwatĩĩ de tiã numɔ kɛɛ bɔ nnwʋanlɩlelɛ zʋ̃ Gyisɛsɩ yɩ Zɩ, Gyehova Nyamɩnlɩ kɛnɩ. (Dwɔ. 17:3) Akʋ̃ sʋ̃, bɛkɛva Gyehova yi dima bɔkɔvʋlɔ bɛ dɩkɛɛ Gyisɛsɩ la. Ɩsɛ kɛɛ besia sʋ̃ bɔnwʋ sianti mɔɔ nwʋmɔ hyinyia kɛɛ Gyehova yi dima nwʋ kɛdɩ nɩ. Bɔ nnwʋanlɩlelɛ gyĩ ɔzɔ mɔɔ bɛkɛyɛ nɩ zʋ. (Egy. 2:21, 22) Meti dɩkɛɛ Gyisɛsɩ nɩ, ɩsɛ kɛɛ Gyisɛsɩ yɩ mɛdalilɛmaa nɔhʋanlɛmaa munwatĩĩ suma Gyehova nwʋ dɩyɛ. Ɩáyɛ nnwʋánlɩ kɛɛ Gyisɛsɩ wieli yɩ mpayɩ mɔɔ ɩwɔ Dwɔɔnʋ 17 nɩ kɛɛ: “Mɩma bɔnwʋ wu dima na mɩbama bɔkɔnwʋ yɩ, ama ɔlɔlɛ mɔɔ ɛlɛ ma mɩ nɩ ɩawʋwa bo nu na mɩ nɩɩ bɛ ɩayɛ ɔkʋ̃.”—Dwɔ. 17:26, NWT.
“MƲNLƲMMƆ YƐ LƐ MƖ DASƖVƲLƆMAA”
9. Kɛ ɩkɛyɛ na yɛala yɩ ali kɛɛ Gyehova yi dima yɩ nwʋ hyinyia yɛ a?
9 Ɩsɛ kɛɛ Gyisɛsɩ yɩ adʋwavʋlɔ nɔhʋanlɛmaa munwatĩĩ ma Gyehova yi dima mɔɔ nwʋmɔ kɛdɩ nɩ nwʋ hyinyia bɛ. (Mt. 6:9, 10) Ɩsɛ kɛɛ yebu Gyehova yi dima yɩ kɛɛ nwʋmɔ hyinyia tɛla dima bela. Na ɩsɛ kɛɛ yɛfa yɛ nyɛlɩyɛ yɛda yɩ ali kɛɛ ɔzɔ yɛ yɛtɩ nɣanlɩ a. Naasʋ̃ mɩnla yɛ yɛkɔhʋla kɛyɛ kɛva kɛdɩ Gyehova yi dima nwʋ na yɛala yɩ ali kɛɛ ndwokɔ mɔɔ Setanɩ hanlɩ dianlɩ Gyehova zʋ nɩ ɩ́dɩ nɔhʋanlɛ a?
10. Mɩnla odwokɔ yɛ ɩwɔ Ayɩzaya yi ti 42 kɔbʋmɩ 44 yi nu a? (Ayɩzaya 43:9; 44:7-9) (Kila mfonyini yi sʋ̃.)
10 Wɔ Ayɩzaya yi ti 42 kɔbʋmɩ 44 yi nu nɩ, yɛnwʋ mɔɔ yɛkɔhʋla kɛyɛ kɛva kɛdɩ Gyehova yi dima yɩ nwʋ. Wɔ kɛnɩ nɩ, Gyehova kã kile bɛzabɛ mɔɔ bɛázʋ̃mɩ yɩ nɩ kɛɛ bɛɣɩla bɛla yɩ ali kɛɛ bɛ anyamɩnlɩ yɩ wɔ kɛnɩ amba a. Na kɛmɔ bedi odwokɔ wɔ kɔɔtʋ nɩ, Gyehova ɣizialɩ kɛɛ bɔwɔ dasɩvʋlɔmaa be mɔɔ bɔkɔhʋla kɛɣa keli anyamɩnlɩ yɩ nwʋ dasɩlɛ kɛɛ bɔwɔ kɛnɩ amba a. Naasʋ̃ iányia ebiye!—Kɩnga Ayɩzaya 43:9; 44:7-9.
Yɛfa yɛ nyɛlɩyɛ nɩɩ ye munwa ndwokɔ yɛda yɩ ali kɛɛ yɛdɩ Gyehova yɩ dasɩvʋlɔmaa (Kila nkyɩkyɛmi 10-11)
11. Mɩnla yɛ Gyehova kã kile yi mmenii wɔ Ayɩzaya 43:10-12 yɩ nu a?
11 Kɩnga Ayɩzaya 43:10-12. Gyehova kã kile yi mmenii kɛɛ: ‘Mʋnlʋmmɔ yɛ lɛ mɩ dasɩvʋlɔmaa, na mamɩ yɛ lɛ Nyamɩnlɩ.’ Gyehova kã kile bɛ kɛɛ bɛyɩ́ odwokɔɣizialɛ eyi munwa: “Asʋ̃ Nyamɩnlɩ be wɔ kɛnɩ kɩnla mʋ nwʋ a?” (Ayɩ. 44:8) Yɛwɔ ɔnwʋmɔ ɔhʋanɩ kɛɛ yɛyɩ ɔzɔ odwokɔɣizialɛ yɩ munwa. Yeduwa yɛ nyɛlɩyɛ nɩɩ ye ndwokɔhanlɛ zʋ yɛda yɩ ali kɛɛ Gyehova yɛ lɛ nɔhʋanlɛ Nyamɩnlɩ nɩ, na yi dima dɩ kezi tɛla dima bela. Yɛfa yɛ ɛbɩlawɔlɛ yekile kɛɛ yɛdɔ Gyehova ankasa na ɩávalɩ nwʋmɔ nhyɛ mɔɔ Setanɩ kɛva kɛɣa yɛ zʋ nɩ, yekeli nɔhʋanlɛ yɛkɛma yɩ. Sɛ yɛyɛ zɔ a, nɩ yɛbʋwaa ma Gyehova yi dima yɩ nwʋ kɛdɩ.
12. Mɩnla ɔhʋanɩ zʋ yɛ nkɔmɩhyɛ mɔɔ ɩwɔ Ayɩzaya 40:3, 5 nɩ ɣalɩ nu a?
12 Sɛ yɛbʋwa ma Gyehova yi dima yɩ nwʋ tɩ a, nɩ yesumazumaa Gyisɛsɩ. Ayɩzaya zialɩ hanlɩ kɛɛ abiye ‘keziyeziye Gyehova yɩ ɔhʋanɩ nu.’ (Ayɩ. 40:3) Mɩnla ɔhʋanɩ zʋ yɛ eyi ɣalɩ nu a? Dwɔɔnʋ Numavʋlɔ yɩ ziyeziyeli ɔhʋanɩ nu manlɩ Gyisɛsɩ mɔɔ ɩɣalɩ wɔ Gyehova yi dima nu na ɩdɩndɛnlɩ ɩmanlɩ yɩ nɩ. (Mt. 3:3; Mk. 1:2-4; Lk. 3:3-6) Nkɔmɩhyɛ kʋ̃ yɩ la kã kɛɛ: “Gyehova yɩ animinyiamɩ kɛla ali.” (Ayɩ. 40:5) Mɩnla ɔhʋanɩ yɛ eyi ɣalɩ nu a? Mmɩlɩ mɔ Gyisɛsɩ ɣalɩ azɩlɛ yɩ zʋ nɩ, ɩlalɩ Gyehova yi subanɩ ali pɛpɛɛpɛ ma nɩ ɩdɩ kɛɛ Gyehova yɩzayɩ munli yi yɛ ɩɣa azɩlɛ yɩ zʋ a.—Dwɔ. 12:45.
13. Kɛ ɩkɛyɛ na yɛazumazuma Gyisɛsɩ a?
13 Dɩkɛɛ Gyisɛsɩ nɩ, yɛdɩ Gyehova yɩ dasɩvʋlɔmaa. Gyehova yi dima la yɛ zʋ na yɛkã yɩ nnwʋánlɩ nninyeni mɔɔ ɩyɛ nɩ nwʋ odwokɔ yekile abiyela mɔɔ yekeyiyia yɩ nɩ. Sɛ yɛkɔhʋla kɛyɛ eyi bʋwɔ a, ɩsɛ kɛɛ yɛma mmenii nwʋ mɔɔ Gyisɛsɩ yɛlɩ va dɩlɩ Gyehova yi dima nwʋ nɩ. (Egy. 1:8) Gyehova yɩ dasɩvʋlɔ mɔɔ ɩtɛla abiyela yɛ lɛ Gyisɛsɩ, meti yesumazuma yɩ. (Yik. 1:5) Mɩnla dɔkʋ̃ yɛ yɛyɛ yɛfa yekile kɛɛ Gyehova yi dima yɩ nwʋ hyinyia ye nu ɔkʋ̃ bela a?
NNINYENI MVƲLƆ MƆƆ YƐYƐ YƐFA YEKILE KƐƐ GYEHOVA YI DIMA YƖ NWƲ HYINYIA YƐ
14. Kɛmɔ bɛhã nwʋmɔ odwokɔ wɔ Ndwomi 105:3 nɩ, kɛ yɛtɩ nɣanlɩ se wɔ Gyehova yi dima yɩ nwʋ a?
14 Gyehova yi dima yɩ la yɛ ahʋnlɩnɩ zʋ. (Kɩnga Ndwomi 105:3.) Sɛ yɛfa Gyehova yi dima yɩ yetu yɛ nwʋ a, ɩma yɩ anyɩ de. (Gyɛ. 9:23, 24; 1 Kɔl. 1:31, NWT; 2 Kɔl. 10:17, NWT) Kɛ ‘yɛkɛva Gyehova yekodu yɛ nwʋ’ nɩ kile kɛɛ, yɛkɛma ɩkɛyɛ yɛ fɛ kɛɛ Gyehova dɩ yɛ Nyamɩnlɩ. Yebu yi kɛɛ ɩdɩ ɔnwʋmɔ ɔhʋanɩ kɛɛ yɛkɛhã yi dima nwʋ odwokɔ kehile mmenii mvʋlɔ na yɛawʋwa ma nwʋmɔ ɩadɩ. Íni kɛɛ yɛma yɛ anyɩ tʋ̃ kɛɛ yɛkɛma ye egyima nu maa, ye sukuulumaa, yɛ apa yi nu maa, nɩɩ mmenii mvʋlɔ kɔnwʋ kɛɛ yɛdɩ Gyehova Dasɩvʋlɔmaa! Abɔnsamɩ pɛ kɛɛ yeyiaki Gyehova yi dima mɔɔ yɛkã nwʋmɔ odwokɔ yekile mmenii nɩ. (Gyɛ. 11:21; Yik. 12:17) Nɔhʋanlɛ nu nɩ, Setanɩ nɩɩ yɩ nkɔmɩhyɛmaa yɩ pɛ kɛɛ mmenii bɛ ɛɣɛɛlɛ fi Gyehova yi dima yɩ. (Gyɛ. 23:26, 27) Naasʋ̃ ɔlɔlɛ mɔɔ yɛwɔ yɛma Gyehova yi dima nɩ ma yedi fɛlɛkʋ̃ “eɣile bela.”—Ndw. 5:11; 89:16.
15. Gyehova yi dima mɔɔ yɛkɔwɔ nɩ, kɛ yɩ tʋ kile a?
15 Yɛkɔ zʋ yɛbɔ Gyehova yi dima. (Dwo. 2:32; Wul. 10:13, 14) Gyehova yi dima mɔɔ yɛkɔwɔ nɩ pɩbɛ sʋ̃maa tɛla kɛɛ yɛkɔnwʋ yi dima yɩ na yɛava yɛali egyima kɛkɛ. Yɛba yɛnwʋ Nyamɩnlɩ kɛɛ abiye mɔɔ ɩwɔ kɛnɩ ankasa, yede yi yedi, na yɛpɩbɛ mmʋwalɩyɛ nɩɩ ɔhʋanɩhilelɛ wɔ yɩ kɛnɩ. (Ndw. 20:7; 99:6; 116:4; 145:18) Akʋ̃ sʋ̃, ɩsɛ kɛɛ yɛkã yi dima nɩɩ yi subanɩ ngɩnlɩma yɩ nwʋ odwokɔ yekile mmenii, na yɛbʋwa bɛ ma bɛsɩnza bɛ ɛbɩlawɔlɛ na ama bɛayɛ mɔɔ ɩsɔ Gyehova anyɩ na iale bɛ.—Ayɩ. 12:4; Egy. 2:21, 38.
16. Kɛ ɩkɛyɛ na yɛama ɩala ali kɛɛ Setanɩ dɩ awohwinii a?
16 Yeziyeziye yɛ nwʋ kɛɛ yɛkɔnwʋ amanɩyɛ kɛma Gyehova yi dima. (Gye. 5:10, 11) Sɛ yɛnwʋʋ amanɩyɛ na yɛkɔ zʋ yedi Gyehova nɔhʋanlɛ a, nɩ yɛmaa ɩkɛla ali kɛɛ Setanɩ dɩ awohwinii. Wɔ Dwoobu yɩ mmɩlɩ zʋ nɩ, Setanɩ hanlɩ odwokɔ be diyialɩ bɛzabɛ mɔɔ bɔsʋ̃mɩ Gyehova nɩ, ɩhanlɩ kɛɛ: “Enii kɛva dɩyɛ bela mɔɔ ɩwɔ nɩ kɛma na ɩava iale yɩ nnwʋanlɩ.” (Dwb. 2:4) Nɩ Setanɩ ɩpɛɛ kehile kɛɛ sɛ nninyeni ɩkɔɔ bʋwɔ kɛma yɛ nkʋ̃ la a, yɛ yɛkɔzʋ̃mɩ Gyehova a, na sɛ yeyiyia ndwokɔzɩzɩbɛ dɩyɛ a, yekeyiaki Gyehova ɔzʋ̃mɩnlɛ. Nɔhʋanlɛvʋlɔ Dwoobu hileli kɛɛ ɔzɔ odwokɔ yɩ dɩ awohwi. Amɩyɛ sʋ̃, yenyia ɔnwʋmɔ ɔhʋanɩ mɔɔ yɛkɛva kehile kɛɛ, ɩávalɩ nwʋmɔ mɔɔ Setanɩ kɛva kɛɣa yɛ zʋ bela nɩ, yeléyiaki Gyehova ɔzʋ̃mɩnlɛ kyɩ̃. Sa yɛkʋla yenyia anwʋlazʋ kezile wɔ Gyehova nu kɛɛ, iluwa yi dima ti ikehila yɛ zʋ.—Dwɔ. 17:11.
17. Kɛmɔ 1 Pita 2:12 kile nɩ, mɩnla ɔhʋanɩ fʋlɔ zʋ yɛ yɛkɔhʋla kɛhyɛ Gyehova yi dima yɩ animinyiamɩ a?
17 Yɛyɛ mɔɔ yɛkɔhʋla bela yɛyɩ Gyehova yi dima yɩ ayɛlɛ. (Ɛɣɛ. 30:9; Gyɛ. 7:8-11) Iluwakɛɛ mmenii zi kɛɛ yɛdɩ Gyehova Dasɩvʋlɔmaa ti, mɔɔ yɛyɛ nɩ kɔhʋla kɛhyɛ yi dima animinyiamɩ anzɛnyɩɩ ikogua nwʋmɔ evinli. (Kɩnga 1 Pita 2:12.) Meti, yɛpɛ kɛɛ yɛyɛ mɔɔ yɛkɔhʋla bela yɛfa yɛ nyɛlɩyɛ nɩɩ ye munwa ndwokɔ yɛhyɛ Gyehova animinyiamɩ. Sɛ yɛyɛ zɔ a, yɛkɔhʋla kɛhyɛ Gyehova yi dima yɩ animinyiamɩ ɩávalɩ nwʋmɔ kɛɛ yɛtɔ sini nɩ.
18. Mɩnla ɔhʋanɩ fʋlɔ zʋ sʋ̃ yɛ yɛkɔhʋla kehile kɛɛ Gyehova yi dima yɩ nwʋ hyinyia yɛ a? (Kila azɩkɛnɩ odwokɔ yɩ sʋ̃.)
18 Gyehova yi dima yɩ nwʋ hyinyia yɛ tɛla kezimɔ mmenii bu yɛ nɩ. (Ndw. 138:2) Mɩnla ti mɔɔ eyi nwʋ hyinyia a? Iluwakɛɛ sɛ yɛyɛɛ mɔɔ Gyehova pɛ a, mmenii bɛlɛ́pɛ ye odwokɔ na bɛkɛhã ndwokɔ tanɩ bɛkɛvalɩ yɛ nwʋ.a Nɩ Gyisɛsɩ iziyeziye yɩ nwʋ kɛɛ ikowu animiguasɩ owulo, owulo mɔɔ ɩfata tanɩyɛlɛmaa, na ama ɩahʋla ɩahyɛ Gyehova yi dima animinyiamɩ. Gyisɛsɩ “ɩádwɩnɩ anyɩnlɩdʋnlɛ” nwʋ meti ɩáma mɔɔ mmenii kɛhã kɛvalɩ yɩ nwʋ nɩ dide yi anzɛnyɩɩ nwʋmɔ adwɩnɩndwɩnɩ hyɛ yɩ zʋ. (Hib. 12:2-4) Ɩvalɩ yɩ adwɩnɩ iziyeli Nyamɩnlɩ yɩ apɛdɩyɛlɛ zʋ.—Mt. 26:39.
19. Kɛ ɛtɩ nɣanlɩ wɔ Gyehova yi dima yɩ nwʋ se a, na mɩnla ti a?
19 Ɩyɛ yɛ fɛ kɛɛ yɛsʋ̃mɩ Gyehova, na yɛnwʋ kɛɛ ɩdɩ ɔnwʋmɔ ɔhʋanɩ kɛɛ bɔfʋlɔ yɛ Gyehova Dasɩvʋlɔmaa. Iluwa eyi ti sɛ mmenii bu yɛ animitiyia po a, yɛkɔhɔ zʋ kɛyɩ yɩ ayɛlɛ. Gyehova yi dima yɩ nwʋ hyinyia yɛ kʋlaa tɛla mɔɔ mmenii kɛhã kɛvalɩ yɛ nwʋ. Meti bɛmá yezi yɛ kɛnɣa kɛɛ yɛkɔhɔ zʋ kɛyɩ Gyehova ayɛlɛ ɩávalɩ nwʋmɔ odwohilalɛ bela mɔɔ Setanɩ kɛva kɛɣa yɛ zʋ nɩ. Sɛ yɛyɛ zɔ a, nɩ yɛdaa yɩ ali kɛɛ Gyehova yi dima yɩ nwʋ hyinyia yɛ baaba paa, kɛmɔ nwʋmɔ hyinyia Gyisɛsɩ Kɩlayɩsɩ yɩ la.
NDWOMI 10 Kamvʋ Yɛ Nyamɩnlɩ Gyehova!
a Nɔhʋanlɛvʋlɔ Dwoobu po wɔlɩ yɩ tʋ kɛɛ ɩdwɩnɩndwɩnɩɩ kezimɔ mmenii bu yi nɩ nwʋ sʋ̃maa mmɩlɩ mɔ yɩ ɔhɔnwʋmmɔ asã yɩ hanlɩ kɛɛ adɩ ɩyɛ tanɩ be nɩ. Ahyɛasɩ yɩ mɔɔ yi nnwuakula wuli na yɩ agyiapadɩ munwala vili yɩ sa nɩ, “Dwoobu ɩáyɛ tanɩ anzɛnyɩɩ ɩáfa ɔzʋnɩ itiã Nyamɩnlɩ zʋ kɛɛ ɩyɛ tanɩ.” (Dwb. 1:22; 2:10) Naasʋ̃, mmɩlɩ mɔ bɛhã bedianlɩ yɩ zʋ kɛɛ ɩyɛ tanɩ be nɩ, ɩwɔlɩ yɩ tʋ kɛɛ ‘ɩtɩndɛɛ basabasa.’ Ɩmanlɩ yɩzayɩ yi dima mɔɔ ɩkɔwɔ nwʋmɔ banɩ nɩ nwʋ hyinyianlɩ yɩ dɛlalɩ kɛɛ ɩkɛdɩ Nyamɩnlɩ yi dima nwʋ.—Dwb. 6:3; 13:4, 5; 32:2; 34:5.