Nninyeni Mɔɔ Idua Yɛ Nwʋ Iyiyia Mɔɔ Ɩsɩkɛɛ Nɩ, Mɩnla Yɛ Nyamɩnlɩ Yɩ Bulombunlililɛ Yɩ Nɩ Kɛyɛ Wɔ Nwʋ a?

“Oyumi bʋwabɩlɛ mɔɔ ɩsɩkɛɛ nɩ va ndwokɔzɩzɩbɛ sʋ̃maa ɣa na ɩma mmenii, ahwonwa nɣezile nɩɩ abɔdɩ nu nninyeni nwʋ kyɩlɩ bɛ. Oyumi bʋwabɩlɛ mɔɔ ɩsɩkɛɛ nɩ ma ahumi nɣezile nɣezile tu na ɩma nzulo twu sɩkɛ mmenii bɛ abika nɩɩ be egyima azʋlɔtʋ wɔ oyuwadɩ munwala. Oyumi bʋwabɩlɛ mɔɔ ɩsɩkɛɛ nɩ ma ngyemvile yi nu yɛ ɛhyɩmɛ paa, na eyi kɔhʋla kɛma abɔdɩ mɔɔ ɩwɔ nu nɩ kowuwu.”—Inger Andersen, mɔɔ iwula United Nations bɛ ɛhɛlɛlɛvʋlɔ ebani yɩ tʋ yɛɛ ɩdɩ executive director ɩma UN Environment Programme, July 25, 2023.

Asʋ̃ aɣanɩ azʋlɔtʋ kɔhʋla kɛhã bɔ nwʋ kɔwɔ numɔ na bɛali bʋwabɩlɛ eyimmɔ nwʋ egyima a? Asʋ̃ bɔkɔhʋla bokodu ɔhawʋ eyimmɔ tʋ kʋlaa kʋlaa a?

Bayɩbʋlʋ yɩ kã aɣanɩ be nwʋ odwokɔ. Na ɩkã kɛɛ ɔzɔ aɣanɩ yɩ, yɛ ɩkɔhʋla ikeziyeziye nninyeni mɔɔ idua yɛ nwʋ iyiyia mɔɔ ɩsɩkɛɛ nɩ a. Ɩkã kɛɛ “sʋlɔ Nyamɩnlɩ nɩ kebigyia bulombunlililɛ be sʋlɔ,” na ɔzɔ aɣanɩ yɩ yɛ ɩkɛɣa keli tumi na ɩayɩ ɔhawʋ mɔɔ ɩwɔ azɩlɛ yɩ zʋ munwala wɔ kɛ a. (Danɩyɛlɩ 2:44) Wɔ ɔzɔ aɣanɩ yɩ tumililɛ tʋ nɩ, mmenii ‘lɛ́yɛ tanɩ kediyia bɔ nwʋ bɔ nwʋ anzɛnyɩɩ bɛlɛ́sɩkɛ’ azɩlɛ yɩ.—Ayɩzaya 11:9.