Ɛbɩlawɔlɛ Nɩɩ Dasɩlɛlilɛ Dɩyɛzumanlɛ Kɛlɛta Nwʋ Awuuku Nu Ɛbɩbɛlɛ
FEBRUARY 4-10
BAYƖBƲLƲ NU ANWƲNYIA | WULOMIMAA 1-3
“Kɔ Ɔzʋlɔ Tɩdɩ Wʋ Ti Ɔwʋwaba”
lvs 18 ¶6
Nyia Ti Ɔwʋwaba Baaba Wɔ Nyamɩnlɩ Yɩ Anyunu
6 Mmenii po mɔɔ bézi Gyehova nɩ bɛta bɔnwʋ kɛɛ nninyeni be ɩdɩ baaba na ebiye sʋ̃ ɩdɩ tanɩ. Bayɩbʋlʋ yɩ ɩkã kɛɛ: “Ɩyɛ a, bɛ adwɩnɩ ibu bɔ ɔfɔ, yɛɛ ɩyɛ sʋ̃ a bɛ adwɩnɩ ibu bɛ bɩ̃.” (Wulomimaa 2:14, 15) Kɛ ndianwʋ nɩ, mmenii sʋ̃maa zi kɛɛ awulilɛ nɩɩ awuloyɛlɛ ɩdɩ tanɩ. Kɛ bezi anzɛnyɩɩ bézi nɩ, betiyee be ti ɔwʋwaba nɩ mɔɔ Gyehova ɩva iwula bo nu mɔɔ ɩma bɔnwʋ mɔɔ ɩdɩ baaba nɩɩ tanɩ nɩ. Bɛzabɛ sʋ̃ bedii Nyamɩnlɩ yɩ egyinalɛzʋ-ndwokɔ anzɛnyɩɩ nɔhʋanlɛ nɩ mɔɔ Gyehova ɩva ɩma yɛ kɛɛ ɩwʋwa yɛ ma yezizi abɔkɔba wɔ ɛbɩlawɔlɛ nu nɩ yɩ zʋ.
lvs 19-20 ¶8-9
Nyia Ti Ɔwʋwaba Baaba Wɔ Nyamɩnlɩ Yɩ Anyunu
8 Abiyemmɔ sunzu kɛɛ sɛ bedi bɛ nɣanlɩdɩlɛ mɛda a, nɩ betiyee be ti ɔwʋwaba. Bosunzu kɛɛ sa bɔkʋla bekyina kezimɔ bobu dɩyɛ be kɛɛ ɩdɩ baaba nɩ zʋ bɛyɛ mɔɔ bɛpɛ bela. Naasʋ̃, yɛáli munli wɔ yɛ nɣanlɩdɩlɛ nu, na sa ɩkʋla ɩdahɩlɩdahɩlɩ yɛ. Yɛ nɣanlɩdɩlɛ nu ɩkɔhʋla ɩkɛyɛ ɛzɩzɩbɛ nkʋ̃ʋ̃ ma ikenyia ye ti ɔwʋwaba zʋ tumi. Bayɩbʋlʋ yɩ ɩkã kɛɛ: “Ahʋnlɩnɩ yɩ ɩdɩ nnahɩlɩbɛvʋlɔ baaba na yɩ nwʋ ɩyɛ atɩɩtɩɩ. Aninyia yɛ ɩkɔhʋla ɩkɔnwʋ numɔ a?” (Gyɛlɩmaya 17:9) Meti ebiye a, yɛkɔwɔ yɩ tʋ yekozunzu kɛɛ dɩyɛ be dɩ baaba wɔ mmɩlɩ po mɔ ɩdɩ tanɩ nɩ. Kɛ ndianwʋ nɩ, ansaana Pɔɔlʋ ɩbayɛ Kilisinyianii nɩ, ɩyɛlɩ Nyamɩnlɩ yi mmenii nɩ atɩɩtɩɩ kezile na nɩ ɩnwʋ yɩ kɛɛ ɩyɛɛ dɩyɛ baaba. Wɔ yɩ anyɩ zʋ nɩ, nɩ ɩwɔ ti ɔwʋwaba baaba. Naasʋ̃, aɣinzi nɩ, ɩhanlɩ kɛɛ: “[Gyehova] yɛ ibuwa mɩ ndɛnɩ a.” (1 Kɔlɛntɩmaa 4:4; Egyima 23:1; 2 Timoti 1:3) Mmɩlɩ mɔ Pɔɔlʋ ɩɣa ɩnwʋnlɩ kezimɔ nɩ Gyehova ɩtɩ nɣanlɩ wɔ mɔɔ ɩyɛɛ nɩ nwʋ nɩ, ɩnwʋnlɩ kɛɛ ihyinyia kɛɛ ɩyɛ nzɩnzanlɩyɛ. Ɩda ali petee kɛɛ, ansaana yɛkɛyɛ dɩyɛ be nɩ, ɩsɛ kɛɛ yebizia yɛ nwʋ kɛɛ, ‘Mɩnla yɛ Gyehova ɩpɛ kɛɛ mɩyɛ a?’
9 Sɛ ɔdɔ abiye a, wʋábɛ kɛɛ ɛkɛyɛ dɩyɛ be mɔɔ ɩkɛha yɩ. Iluwakɛɛ yɛdɔ Gyehova nɩ ti, yɛábɛ kɛɛ yɛkɛyɛ dɩyɛ bela mɔɔ ɩkɛha yɩ. Ye kunlu mɔɔ itu kɛɛ yɛkɛyɛ dɩyɛ be ma ɩkɛha Gyehova nɩ, ɩsɛ kɛɛ numɔ ɩyɛ ɛzɩzɩbɛ baaba. Yɛnwʋ eyi wɔ Nehɛmaya yɩ ndianwʋ nɩ nu. Ɩápɛ kɛɛ ikegyina yɩ dibilɛ kɛɛ amɩnladʋ nɩ zʋ ikenyia yɩ nwʋ. Mɩnla ti a? Ihilehileli numɔ kɛɛ “iluwa Nyamɩnlɩ yɩ nwʋ bɔlɔ ti.” (Nehɛmaya 5:15) Nɩ Nehɛmaya ɩábɛ kɛɛ ɩkɛyɛ dɩyɛ bela mɔɔ ɩkɛha Gyehova. Dɩkɛɛ Nehɛmaya nɩ, yɛzayɛ sʋ̃ ye kunlu itu kɛɛ yɛkɛyɛ dɩyɛ tanɩ be mɔɔ ɩkɛha Gyehova. Sa yɛkʋla yɛkɩnga Bayɩbʋlʋ yɩ na ama yɛanwʋ nninyeni mɔɔ Gyehova ɩpɛ yɩ.—Kilá Azɩ Ɛkɛnɩ Odwokɔ 6.
Pɩbɛlɩ Bayɩbʋlʋ Yi Nu
w08 6/15 30 ¶5
Kɛlɛta Nɩ Mɔɔ Bɛhɛlɛlɩ Bɛmanlɩ Wulomimaa Yi Nu Ndwokɔ Aditili
3:4. Sɛ enii yɩ odwokɔ ɩ nɩɩ mɔɔ Nyamɩnlɩ ɩhã wɔ yɩ Odwokɔ yi nu nɩ iáyiyia a, yɛma ‘Nyamɩnlɩ ɩkɔlɩ ɔzʋlɔ idi nɔhʋanlɛ’ iluwa anwʋlazʋ mɔɔ yekenyia wɔ yɩ odwokɔ Bayɩbʋlʋ yi nu nɩɩ yɛ ɛbɩla mɔɔ yɛkɛma ɩ nɩɩ Nyamɩnlɩ yɩ pɛ ikeyiyia nɩ zʋ. Sɛ yɛfa ɛhyɩmɛ yedi Bulombunlililɛ nɩ nwʋ dasɩlɛ na yɛyɛ adʋwavʋlɔyɛlɛ egyima yɩ nɩ be a, yɛkɔhʋla yɛkɔwʋwa mmenii ma bɔkɔnwʋ yɩ kɛɛ Nyamɩnlɩ ɩkɔlɩ ɔzʋlɔ idi nɔhʋanlɛ.
w08 6/15 29 ¶6
Kɛlɛta Nɩ Mɔɔ Bɛhɛlɛlɩ Bɛmanlɩ Wulomimaa Yi Nu Ndwokɔ Aditili
3:24, 25—Mɩnla ɔhʋanɩ zʋ yɛ elelɛdɩyɛ anzɛnyɩɩ “nnwʋanlɩlelɛ mɔɔ iluwa Gyisɛsɩ Kɩlayɩsɩ yɩ zʋ ɩba nɩ” ɩkʋla ɩkɩda ‘mmenii bɛ tanɩ nɩ mɔɔ bɛyɛlɩ bɔmʋnlɩ nɩ zʋ’ ansaana botuwa elelɛdɩyɛ nɩ a? Mɛzaya yɩ nwʋ nkɔmɩhyɛlɛ mɔɔ ili bɔmʋnlɩ mɔɔ bɛhɛlɛlɩ wɔ Gyɛnɛsɩsɩ 3:15 nɩ ɩɣalɩ numɔ wɔ ɔlʋbɔ 33 Y.M. nu, mmɩlɩ mɔ bohunli Gyisɛsɩ wɔ egyeninlɛ owudo zʋ nɩ. (Gal. 3:13, 16) Mmɩlɩ mɔ Gyehova iwukoli yi munwa ɩhyɛlɩ ɔzɔ nkɔmɩ nɩ, wɔ ɔhʋanɩ be zʋ nɩ, nɩ ɩdɩ kɛɛ mɔɔ boduwa elelɛdɩyɛ nɩ bowie wɔ yɩ anyɩ zʋ iluwakɛɛ dɩyɛ bela ɩlɔ́kʋla ikezi Nyamɩnlɩ yi tile nu pɔkɔ mɔɔ ɩkɛma ɩkɛɣa numɔ nɩ ɔhʋanɩ. Meti, nɩ iluwa Gyisɛsɩ Kɩlayɩsɩ yɩ eɣile be afɔlɩwɔlɛ nɩ ti, Gyehova ɩkɔhʋla ɩkɛva Adamɩ yɩ tʋmaa mɔɔ bekile ɔzɔ anʋhʋba nɩ nu dedi nɩ bɛ tanɩ ɩkɛhyɛ bɛ. Iluwa elelɛdɩyɛ nɩ ti, ɩkɔhʋla sʋ̃ ɩkɛyɛ bʋwɔ kɛɛ bɛzabɛ mɔɔ bɔwʋwalɩ azɩ ansaana Kilisinyianɩ ɔzʋ̃mɩnlɛ ɩba nɩ bekenyia awudunwolɩyɛ.—Egyima 24:15.
FEBRUARY 11-17
BAYƖBƲLƲ NU ANWƲNYIA | WULOMIMAA 4-6
“Nyamɩnlɩ Ihile Yɛ Ma Yɛnwʋ Kɛ Isi Ɩdɔ Yɛ”
w11 6/15 12 ¶5
Nyamɩnlɩ Ihile Yɛ Ma Yɛnwʋ Kɛ Isi Ɩdɔ Yɛ
5 Pɔɔlʋ ɩlalɩ odwokɔ nɩ ali, ɩvalɩ pɔkɔ eyi ɩwɔlɩ yɩ tʋ kɛɛ: “Tanɩ iluwalɩ enii ɔkʋ̃ yɩ zʋ yɛ ɩɣalɩ oyuwadɩ a, na enii ɔkʋ̃ nɩ yɩ tanɩ nɩ ɩvalɩ owulo ɩɣalɩ. Iluwa eyi zʋ ti yɛ owulo ɩdʋlɩ ɩbɩndɩnlɩ mmenii munwatĩĩ bɔ zʋ a. Sianti yɛ lɛ kɛɛ, mmenii munwatĩĩ bɛyɛ tanɩ.” (Wul. 5:12) Yɛkɔhʋla yɛkɛdɩ eyi tʋ iluwakɛɛ Nyamɩnlɩ ɩmanlɩ bɛhɛlɛlɩ kezimɔ enii yɩ azɩwʋwalɛ ɩwɔlɩ yɩ tʋ nɩ bedianlɩ ɛkɛnɩ. Gyehova ɩwɔlɩ mmenii anwɩ̃ Adamɩ nɩɩ Yifi. Dɩyɛwɔlɛvʋlɔ nɩ idi munli, ɔzɔ la yɛ yɛ nlammɔ mɔɔ ilili bɔmʋnlɩ ɩwɔlɩ bɛ nɩ sʋ̃, nɩ bedi munli a. Nyamɩnlɩ ɩvalɩ ɔhʋanɩhilelɛ mɔɔ nɩ isi bɛ ɔhʋanɩ wɔ dɩyɛ ɔkʋ̃ pɛ nwʋ nɩ ɩmanlɩ bɛ na ɩhanlɩ ihileli bɛ kɛɛ sɛ bɛádidi mmɛla nɩ zʋ a sa bowu. (Gyn. 2:17) Naasʋ̃, bezili pɔkɔ mɔɔ ɩmanlɩ bɛzɩkɛlɩ bɔ nwʋ, bowuli Nyamɩnlɩ yɩ ɔhʋanɩhilelɛ mɔɔ nɣɛlɛbɛ wɔ numɔ nɩ zʋ, iluwa ɔzɔ ɔhʋanɩ yɩ zʋ nɩ bɔbʋlɩ yɩ kɛɛ Mmɛlamanlɛvʋlɔ nɩɩ Amansɔnʋ yi nu Tumivʋlɔ.—Di. 32:4, 5.
w11 6/15 12 ¶6
Nyamɩnlɩ Ihile Yɛ Ma Yɛnwʋ Kɛ Isi Ɩdɔ Yɛ
6 Adamɩ ɩɣa ɩyɛlɩ tanɩvʋlɔ ansaana ɩwʋʋ yɩ nnwuakula, ɩmanlɩ ɩvalɩ tanɩ nɩɩ ɔnwʋmɔ atɩɩtɩɩ nɩ ɩwʋlɩ bo munwatĩĩ. Nɩ bolóbuli Nyamɩnlɩ yɩ mmɛla nɩ zʋ dɩkɛɛ mɔɔ Adamɩ ɩyɛlɩ nɩ, meti bɛákyina tanɩ ɔkʋ̃ nɩ zʋ la bobuwa bɔ ɔfɔ, na nɩ bɛlɛ́falɩ mmɛla nhyɩhyɛlɩyɛ bela sʋ̃ bɛlɛ́manlɩ. (Gyn. 2:17) Naasʋ̃ bɛvalɩ tanɩ bɔwʋlɩ Adamɩ yɩ tʋmaa. Meti, tanɩ nɩɩ owulo ilili enii zʋ bulombunli nkʋ̃ʋ̃ ɩhɔ ɩbʋmɩnlɩ kɛɛ Nyamɩnlɩ ɩvalɩ mmɛla nhyɩhyɛlɩyɛ nɩ ɩmanlɩ Yizilayamaa nɩ, na ɩmanlɩ ɩlalɩ ali petee kɛɛ tanɩ wɔ bɔ nwʋ. (Kɩnga Wulomimaa 5:13, 14.) Sa bɔkʋla bɛfa mɔɔ ɩzʋ̃ tanɩ mɔɔ benyia wɔ awʋbɔ nu nɩ betindiã adimakɛlɛ anzɛnyɩɩ mɛlɛkɛyɛlɛ be mɔɔ benyia wɔ awʋbɔ nu nɩ nwʋ, dɩkɛɛ Mɛditeleninyiamaa bɛ mmegyiazʋdɩlɛ anzɛnyɩɩ mmegyia mɔɔ iádua adimakɛlɛ nɩ. Ebiye a, ɛɣɩnga Alexis mɔɔ ɩdɩ Czar Nicholas II mɔɔ ɩzʋ̃ Russia nɩɩ Alexandra bɛ ɣa benyia nɩ nwʋ odwokɔ. Bɛvalɩ mmegyia mɔɔ iádua kyɩ̃ adimakɛlɛ nɩ bɔwʋlɩ yɩ. Ɩwɔ numɔ, wɔ abusunwa mɔɔ ɩdɩ ɔzɔ po nu nɩ, kɛ nnwuakula nɩ munwatĩĩ yɛ benyia ɔzɔ adimakɛlɛ nɩ be a, naasʋ̃ adimakɛlɛ nɩ ɩwɔ be mmegyia nu. Ɩ́dɩ ɔzɔ wɔ tanɩ nwʋ. Nɩ bɔlɔ́kʋla bekezi sinidɔlɛ mɔɔ ɩzʋ̃ tanɩ mɔɔ benyia wɔ Adamɩ yɩ ɛkɛnɩ nɩ yi munwa. Ɩkã abiyela. Ɩfa yɛ ɩkɔ owulo nu. Na bɛfa bɔwʋ nnwuakula munwala. Asʋ̃ sa bɔkʋla bedi ɔzɔ atɩɩtɩɩ dɩyɛ eyi zʋ a?
w11 6/15 13 ¶9-10
Nyamɩnlɩ Ihile Yɛ Ma Yɛnwʋ Kɛ Isi Ɩdɔ Yɛ
9 Mɩnla adwɩnɩ yɛ ɩwɔ Giliki odwokɔ pɔkɔ “iziyeziyeli abiyela nɩɩ Nyamɩnlɩ bɛ avinli” nɩɩ “bɛɣa bɛyɛ ɛdɩnɣɛlɛmaa” nɩ nu a? Bayɩbʋlʋ yɩ tʋhilelɛvʋlɔ be ɩhɛlɛlɩ eyi nwʋ odwokɔ kɛɛ: “Ɩdɩ sɛnkyɩlɛdɩ ɔhʋanɩ zʋ odwokɔ mɔɔ bɛkã bɛfa bekilehile mmɛla nu. Ikile nzɩnzanlɩyɛ be mɔɔ ɩba wɔ gyinabʋ mɔɔ abiye ɩwɔ wɔ ɩ nɩɩ Nyamɩnlɩ bɛ avinli abusunwawɔlɛ nu, ɩ́dɩ nzɩnzanlɩyɛ be mɔɔ abiye ɩyɛ wɔ yi nu . . . Bɛkã Nyamɩnlɩ yɩ nwʋ odwokɔ wɔ sɛnkyɩlɛdɩ ɔhʋanɩ zʋ kɛɛ ɩdɩ ndɛnɩwuwalɛvʋlɔ, na wɔ ɔhʋanɩ be zʋ nɩ, bɛva abiye mɔɔ ili tanɩ bɛɣa yɩ kɔɔtʋ kɛɛ iwuwa yɩ ndɛnɩ. Naasʋ̃ Nyamɩnlɩ ibuwa yɩ ndɛnɩ kɛɛ ili bɩ̃.”
10 Mɩnla yɛ “azɩlɛ yɩ munwala zʋ Ndɛnɩwuwalɛvʋlɔ” nɩ ikyina ɔzʋlɔ ibuwa tanɩvʋlɔ be ndɛnɩ kɛɛ ili bɩ̃ a? (Gyn. 18:25) Idii eyi nwʋ egyima nɩ, ɩzʋ̃manlɩ yɩ Ɣa ɔkʋ̃tɩnyɩɩ mɔɔ ɩdɔ yɩ nɩ ma ɩɣalɩ azɩlɛ yɩ zʋ. Gyisɛsɩ ɩyɛlɩ yɩ Zɩ yɩ apɛdɩ pɛpɛɛpɛ, ɩávalɩ nwʋmɔ odwohilalɛ azʋlɔtʋ, nwɔwɩ mɔɔ yi munwa ɩyɛ sɩ, nɩɩ atɩɩtɩɩ mɔɔ ɩɣalɩ yɩ zʋ nɩ. Ɩzɔlɩ yi munlililɛ nu nkʋ̃ʋ̃ ɩhɔ ɩbʋmɩnlɩ kɛɛ iwuli wɔ egyeninlɛ owudo nɩ zʋ. (Hib. 2:10) Iluwa yɩ nnwʋanlɩ mɔɔ idi munli nɩ mɔɔ ɩva ɩwɔlɩ afɔlɩ nɩ zʋ nɩ, Gyisɛsɩ iduwalɩ elelɛdɩyɛ nɩ mɔɔ ikele anzɛnyɩɩ ɩkɔbɔnɩ Adamɩ yɩ tʋmaa nɩ wɔ tanɩ nɩɩ owulo tʋ nɩ yɩ kakɛ.—Mt. 20:28; Wul. 5:6-8.
Pɩbɛlɩ Bayɩbʋlʋ Yi Nu
w08 6/15 29 ¶7
Kɛlɛta Nɩ Mɔɔ Bɛhɛlɛlɩ Bɛmanlɩ Wulomimaa Yi Nu Ndwokɔ Aditili
6:3-5—Sɛ bɛkã onlumanlɛ mɔɔ ɩma abiye ɩ nɩɩ Kɩlayɩsɩ Gyisɛsɩ bɛyɛ ɔkʋ̃, yɛɛ onlumanlɛ mɔɔ ɩma abiye iwu kɛmɔ Kɩlayɩsɩ Gyisɛsɩ iwuli nɩ la a, kɛ yɩ tʋ ikile a? Sɛ Gyehova ɩfa sunzuma yɩ nɩ ɩpa nu ɩyɩ Kɩlayɩsɩ yɩ mɛdalilɛmaa nɩ a, nɩ bɛ nɩɩ Gyisɛsɩ benyia ɔkʋ̃yɛlɛ, na bɛba bɛyɛ asafʋ yɩ mɔɔ ɩdɩ Kɩlayɩsɩ yɩ enii owudo na ɩdɩ asafʋ yɩ Ti nɩ numɔ maa. (1 Kɔl. 12:12, 13, 27; Kol. 1:18) Eyi yɛ lɛ bo onlumanlɛ mɔɔ ɩma bɛ nɩɩ Kɩlayɩsɩ Gyisɛsɩ bɛyɛ ɔkʋ̃ nɩ a. Kilisinyiamaa mɔɔ bɛva sunzuma nɩ bɛba nu bɛyɩ bɛ nɩ sʋ̃, benyia onlumanlɛ mɔɔ ɩma bowu kɛmɔ Kɩlayɩsɩ ‘iwuli nɩ la,’ mɔɔ ikile kɛɛ bɔbɔ ɛbɩla mɔɔ ɩdɩ afɔlɩwɔlɛ na ɩma bɛ anyɩnlɩlazʋ bela mɔɔ bɔwɔ kɛɛ bekenyia nnwʋanlɩ mɔɔ íni awielɩyɛ wɔ azɩlɛ yɩ zʋ nɩ ɩsɩnza. Bo owulo nɩ, ɩdɩ kɛɛ afɔlɩwɔlɛ kɛmɔ nɩ Gyisɛsɩ yi owulo nɩ ɩdɩ nɩ, naasʋ̃ bo owulo nɩ bɛáva bɛyɛ elelɛdɩyɛ. Sɛ bowu na botunwo bɛ ma bɔkɔ sʋlɔ a, nɩ bo onlumanlɛ mɔɔ ɩma bowu kɛmɔ Kɩlayɩsɩ Gyisɛsɩ iwuli nɩ la nɩ ɩɣa yɩ awielɩyɛ.
w14 6/1 11 ¶1
Mɩnla Anyɩnlɩlazʋ Yɛ Ɩwɔ Ɛkɛnɩ Ɩma Mɩ Nlammɔ a?
Bɛzabɛ mɔɔ bɛádɩnɣɛ mɔɔ bokodunwo bɛ nɩ, asʋ̃ sa bekyina mɔɔ bɛyɛlɩ wɔ mmɩlɩ be mɔ idua nu nɩ zʋ bobuwa bɛ ndɛnɩ anzɛnyɩɩ? Anhã. Wulomimaa 6:7 ɩkã kɛɛ: “Enii iwu a, nɩ íni tanɩ yi tumi yɩ tʋ ebiyekʋ̃.” Sɛ tanɩyɛlɛnii iwu a, nɩ iduwa yɩ tanɩ nɩ nwʋ kakɛ. Meti, sa bekyina mɔɔ bɛkɛyɛ wɔ bɛ awudunwolɩyɛ mɛda nɩ zʋ bobuwa bɛ ndɛnɩ, na kɛ mɔɔ bɛyɛlɩ mɔɔ nɩ bézi ansaana bɛbawu nɩ yɩ zʋ a.
FEBRUARY 18-24
BAYƖBƲLƲ NU ANWƲNYIA | WULOMIMAA 7-8
“Asʋ̃ ‘Esii Abʋtalɩ Ɛkɛlɩkɛ’ a?”
w12 7/15 11 ¶17
Má Gyehova Ihile Wʋ Ɔhʋanɩ Na Wʋanyia Fanwʋdi Baaba Nɩ
17 Mmɩlɩ mɔ Pɔɔlʋ ɩkãã fanwʋdi mɔɔ Gyehova iziyeziye idiã ɛkɛ ɩma yɩ azɩlɛ yɩ zʋ azʋ̃mɩvʋlɔ nɩ, ɩhɛlɛlɩ kɛɛ: “Ɩma nninyeni munwatĩĩ mɔɔ Nyamɩnlɩ ɩwɔlɩ nɩ besii abʋtalɩ bɛdɩkɛɛ eɣile nɩ mɔ Nyamɩnlɩ ɩbala yɩ mma nɔhʋanlɛmaa nɩ mmɔ ali nɩ.” Akʋ̃ ɩva ɩdʋwalɩ ɔzʋlɔ kɛɛ: “Nninyeni nmunwatĩĩ mɔɔ Nyamɩnlɩ ɩwɔlɩ nɩ bɛbanyia fanwʋdi, na bɛáyɛlɩ alɔngɔ bɛámanlɩ owulo ebiyekʋ̃, iluwa fanwʋdi sʋnʋnkʋ̃ nɩ mɔɔ Nyamɩnlɩ mmalɛ benyia nɩ ti.” (Wul. 8:19-21) “Nninyeni munwatĩĩ mɔɔ Nyamɩnlɩ ɩwɔlɩ nɩ” igyĩ ɛkɛnɩ ɩma adasamaa mɔɔ bɔwɔ azɩlɛ yɩ zʋ anyɩnlɩlazʋ nɩ, mmenii mɔɔ bekenyia mfasʋ wɔ mmɩlɩ mɔ Nyamɩnlɩ ‘ɩla’ bɛzabɛ mɔɔ ɩva yɩ sunzuma ɩba nu ɩyɩ bɛ nɩ ali nɩ. Bɛkɛla bɛ ali wɔ mmɩlɩ mɔ bodunwo ɔzɔ “mmalɛ” nɩ ma bɔhɔ sʋlɔ nɩ, na bɛkɛhɩnla Kɩlayɩsɩ yɩ nwʋ ma bɛkɛyɩ tanɩyɛlɛ wɔ azɩlɛ yɩ zʋ na bɛale ɔlɔmɩ sʋ̃maa sʋ̃maa nɩ nnwʋanlɩ bɛahɔ oyuwadɩ fʋlɔ yɩ nu.—Yik. 7:9, 14.
w12 3/15 23 ¶11
Fɛlɛkʋ̃ Mɔɔ Yekeli Wɔ Yɛ Anyɩnlɩlazʋ Nɩ Nu
11 Gyehova ɩvalɩ mɔɔ adasamaa bɛ “anyɩnlazʋ” nɩ igyĩ ɔzʋlɔ nɩ ɩmanlɩ wɔ mmɩlɩ mɔ ɩwɔlɩ elelɛ mɔɔ bekele yɛ wɔ “ɔwɔkɩ ɔwɔlɔ nɩ” mɔɔ bɔfʋlɔ yɩ Setanɩ Abɔnsamɩ yɩ sa nu iluwa “yɩ tʋnii” mɔɔ bɛhyɛlɩ yɩ nwʋ nkɔmɩ nɩ zʋ nɩ. (Yik. 12:9; Gyn. 3:15) Ɔzɔ “yɩ tʋnii” nɩ, yɩ ɔfʋã titili yɛ lɛ Gyisɛsɩ Kɩlayɩsɩ. (Gal. 3:16) Iluwa yɩ owulo nɩɩ yɩ awudunwolɩyɛ zʋ nɩ, ɩvalɩ dɩyɛ mɔɔ idi munli mɔɔ adasamaa bɛ anyɩ ɩla ɔzʋlɔ mɔɔ mɛyɩ yɛ lɛ kɛɛ bekenyia fanwʋdi wɔ tanɩ nɩɩ owulo tumi tʋ nɩ ɩmanlɩ. Bɛfa ɔzɔ anyɩnlɩlazʋ nɩ betindiã ‘Nyamɩnlɩ yɩ mma nɔhʋanlɛmaa nɩ mɔɔ ɩbala bɛ ali’ nɩ nwʋ. Bɛzabɛ mɔɔ bɛba nu bɛyɩ bɛ mɔɔ bɛhyɛ bɛ animinyiamɩ nɩ yɛ lɛ “yɩ tʋnii” nɩ yɩ ɔfʋã mɔɔ ɩtɔ ɔzʋlɔ anwɩ̃ nɩ. ‘Bɛkɛla bɛ ali’ wɔ mmɩlɩ mɔ bɛkɛhɩnla Kɩlayɩsɩ yɩ nwʋ ma bɛkɛzɩkɛ Setanɩ yɩ oyuwadɩ tanɩ nɩ. (Yik. 2:26, 27) Eyi ɩkɛma mmunwuanɩ mvʋlɔ nɩ mɔɔ bɔkɔzʋ̃ anwʋhyɩlɩlɛ kezile nu bɛkɛyɩ bɔ nwʋ nɩ bekenyia nnwʋanlɩ.—Yik. 7:9, 10, 14.
w12 3/15 23 ¶12
Fɛlɛkʋ̃ Mɔɔ Yekeli Wɔ Yɛ Anyɩnlɩlazʋ Nɩ Nu
12 Kilá kezimɔ adasamaa mɔɔ bɛdɩ “nninyeni munwatĩĩ mɔɔ Nyamɩnlɩ ɩwɔlɩ bɛ nɩ” bɔ nwʋ ɩkɔdɔ bɛ wɔ Kɩlayɩsɩ Yɩ Ɔlʋbɔ Abʋmɩ Tumililɛ nɩ yɩ tʋ! Ɔzɔ mmɩlɩ nɩ, “Nyamɩnlɩ yɩ mma nɔhʋanlɛmaa nɩ” mɔɔ bɛhyɛ bɛ animinyiamɩ nɩ sa bɔkɔ ɔzʋlɔ ‘bɛda bɛ ali’ mmɩlɩ mɔ bɛ nɩɩ Kɩlayɩsɩ keli dɩyɛ kɛɛ azɔfʋ na bɛahila ma adasamaa bɛanyia Gyisɛsɩ yɩ elelɛdɩyɛ afɔlɩ nɩ zʋ mfasʋ nɩ. Kɛ sʋlɔ Bulombunlililɛ nɩ yɩ mmenii nɩ, sa bɔbɔ yɩ tʋ bede adasamaa mɔɔ bɛdɩ “nninyenii munwatĩĩ mɔɔ Nyamɩnlɩ ɩwɔlɩ bɛ nɩ,” wɔ atɩɩtɩɩ mɔɔ tanɩ nɩɩ owulo ɩfa ɩba nɩ tʋ. Ngyɩkɩ̃ɩ̃ ngyɩkɩ̃ɩ̃ la, adasamaa mɔɔ bɛyɛ sutiye nɩ bekenyia “fanwʋdi, na bɛ́ayɛlɩ alɔngɔ bɛámanlɩ owulo ebiyekʋ̃.” Sɛ bɔkɔlɩ ɔzʋlɔ bedi nɔhʋanlɛ bɛma Gyehova wɔ Ɔlʋbɔ Abʋmɩ yi nu nɩɩ wɔ odwohilalɛ mɔɔ itualɩ yɩ tʋ mɔɔ ɩkɛɣa wɔ Ɔlʋbɔ Abʋmɩ nɩ yɩ awielɩyɛ nɩ a, sa bɛkɛlɛ be dima daabaa wɔ “nnwʋanlɩ buuku” yi nu. Sa benyia “fanwʋdi sʋnʋnkʋ̃ nɩ mɔɔ Nyamɩnlɩ yɩ mmalɛ” nɩ bekenyia nɩ be. (Yik. 20:7, 8, 11, 12) Anyɩnlɩlazʋ mɔɔ animinyiamɩ ɩwɔ numɔ amba!
Pɩbɛlɩ Bayɩbʋlʋ Yi Nu
w17.06 3
Asʋ̃ Ɛkakɛ a?
Mɩnla sʋnʋnkʋ̃ yɛ ɩwɔ yɛ adwɩnɩ mɔɔ yɛkɛva yekeziye ‘nninyeni mɔɔ nnwʋnlamɩ nɩ ɩpɛ’ nɩ zʋ nɩɩ ‘nninyeni mɔɔ Nyamɩnlɩ sunzuma nɩ ɩpɛ’ nɩ zʋ nɩ nu a? (Wul. 8:6)
Enii mɔɔ ɩyɛɛ mɔɔ ili bɔmʋnlɩ nɩ, ɩfa yɩ adwɩnɩ isiye nnwʋnlamɩ mɔɔ iáli munli nɩ yɩ akɔnɔ nɩɩ yɩ nɣanlɩdɩlɛ zʋ, na nninyeni mɔɔ nnwʋnlamɩ nɩ ɩpɛ nɩ, ɩta ɩkã nwʋmɔ odwokɔ na ɩhyɛ yɩ animinyiamɩ. Enii mɔɔ ɩyɛɛ mɔɔ ili awielɩyɛ nɩ, yɩ ɛbɩlawɔlɛ igyĩ nninyeni mɔɔ ɩfalɩ Nyamɩnlɩ nwʋ nɩɩ Nyamɩnlɩ yɩ adwɩnɩ mɔɔ ɩwɔ wɔ nninyeni nwʋ nɩ zʋ; Kilisinyianii mɔɔ ɩdɩ ɔzɔ nɩ, sunzuma nwanzanwanza yɛ ikile yɩ ɔhʋanɩ a. Mɔɔ ili bɔmʋnlɩ nɩ iwieli owulo nu, na mɔɔ ili awielɩyɛ nɩ iwieli nnwʋanlɩ nɩɩ azʋ̃nudwolɩyɛ nu.—w16.12-E, owukolɛ 15-17.
w09 11/15 7 ¶20
Mɩnla Yɛ Wʋ Mpayɩwɔlɛ Ɩkã Ɩfalɩ Wʋ Nwʋ a?
20 Ɩyɛ a, yɛánwʋ mɔɔ yɛhã wɔ yɛzayɛ yɛ mpayɩwɔlɛ nu. Pɔɔlʋ ɩhɛlɛlɩ kɛɛ, “Na ebiye yɛ lɛ kɛɛ yézi mpayɩwɔlɛ kɛmɔ ɩwɔ kɛɛ yɛbɔ nɩ, na sunzuma [nwanzanwanza] nɩ yɩzayɩ yɛ isiã Nyamɩnlɩ ɩma yɛ wɔ ɛbɩnlɩnlɛ mɔɔ enii ɩlɔ́kʋla ɩkɛhã nu a. Nyamɩnlɩ mɔɔ izi mmenii munwatĩĩ bɛ ahʋnlɩnɩ nu nɩ izi sunzuma nu adwɩnɩndwɩnɩ bela kɛ isi mɔɔ ɩdɩ.” (Wul. 8:26, 27) Gyehova ɩmanlɩ bɛhɛlɛlɩ mpayɩwɔlɛ sʋ̃maa wɔ Ɛhɛlɛlɛ Odwokɔ yi nu. Ide ɔzɔ dɩyɛzianlɛ azʋlɔtʋ nɩ mɔɔ boluwalɩ yɩ sunzuma nɩ zʋ bɛhɛlɛlɩ yɩ nɩ itiã nu kɛɛ ɩdɩ yɛ dɩyɛzianlɛ na ɩma nwʋmɔ munwalɩyɛ. Nyamɩnlɩ izi yɛ, na ɩtɩ ndwokɔ mɔɔ ɩvalɩ yɩ sunzuma ɩhanlɩ Bayɩbʋlʋ yɩ ɛhɛlɛlɛmaa nɩ ma bɛhɛlɛlɩ nɩ yɩ tʋ. Gyehova ibuwa yɛ dɩyɛzianlɛ nɩ wɔ mmɩlɩ mɔ sunzuma nɩ “isiã” anzɛnyɩɩ ikyina numɔ ɩma yɛ nɩ.
FEBRUARY 25–MARCH 3
BAYƖBƲLƲ NU ANWƲNYIA | WULOMIMAA 9-11
“Olivi Owudo Nwʋ Ndianwʋ Nɩ”
w11 5/15 23 ¶13
‘Nyamɩnlɩ Yɩ Nɣɛlɛbɛ Mɔɔ Numɔ Ɩdɔ!’
13 Sʋ̃mavʋlɔ Pɔɔlʋ ɩhɔlɩ ɔzʋlɔ ɩvalɩ mmenii mɔɔ bɛɣa bɛyɛlɩ Abilehamɩ yɩ tʋnii nɩ idindianlɩ sɛnkyɩlɛdɩ ɔhʋanɩ zʋ mmɛndanɩ mɔɔ ɩwɔ olivi owudo zʋ nɩ nwʋ. (Wul. 11:21) Ɛzɛ olivi owudo nɩ mɔɔ boluwalɩ nɩ igyĩ ɛkɛnɩ ɩma Nyamɩnlɩ yi tile nu pɔkɔ mɔɔ ɩfalɩ Abilehamɩ nhyɩhyɛlɩyɛ nɩ nwʋ mɔɔ ɩkɛɣa numɔ nɩ. Owudo yɩ yi ndini nɩ ɩdɩ nwanzanwanza na igyĩ ɛkɛnɩ ɩma Gyehova kɛɛ enii mɔɔ mɛyɩ yɛ ɩbama nnwʋanlɩ wɔ sunzuma ɔfʋã nu Yizilaya nɩ a. (Ayɩ. 10:20; Wul. 11:16) Owudo yɩ avinli nɩ igyĩ ɛkɛnɩ ɩma Gyisɛsɩ kɛɛ Abilehamɩ yɩ tʋnii nɩ yɩ ɔfʋã titili. Mmɛndanɩ nɩ munwala igyĩ ɛkɛnɩ ma Abilehamɩ yɩ tʋnii yɩ ɔfʋã mɔɔ ɩtɔ ɔzʋlɔ anwɩ̃ nɩ bɔ “dʋdʋ munwatĩĩ” nɩ.
w11 5/15 24 ¶15
‘Nyamɩnlɩ Yɩ Nɣɛlɛbɛ Mɔɔ Numɔ Ɩdɔ!’
15 Mɩnla dɔkʋ̃ yɛ Gyehova ɩyɛlɩ ma yi tile nu pɔkɔ ɩɣalɩ numɔ a? Pɔɔlʋ ihilehileli numɔ kɛɛ ɔhwayɩlɛ nu olivi owudo yɩ mmɛndanɩ nɩ, bodualɩ beziyeli olivi owudo mɔɔ boluwalɩ nɩ yɩ mmɛndanɩ nɩ mɔɔ bodudualɩ bogualɩ nɩ yɩ agyia nu. (Kɩnga Wulomimaa 11:17, 18.) Meti, amanlɩ amanlɩ yɩ nu Kilisinyiamaa mɔɔ bɛvalɩ sunzuma nɩ bɛbalɩ nu bɛyɩlɩ bɛ dɩkɛɛ mmenii be mɔɔ nɩ bɔwɔ Wulomi asafʋ yɩ nu nɩ, bodualɩ bɛ beziyeli sɛnkyɩlɛdɩ ɔhʋanɩ zʋ olivi owudo nɩ zʋ. Wɔ ɛzɛ ɔhʋanɩ yɩ zʋ nɩ, nɩ bɛɣa bɛhɩnla Abilehamɩ yɩ tʋnii nɩ nwʋ. Meti yɛkãã paa a, nɩ bɛdɩ kɛɛ ɔhwayɩlɛ nu olivi owudo yɩ mmɛndanɩ nɩ, mɔɔ nɩ bení ɔnwʋmɔ ɔhʋanɩ bela kɛɛ bɛkɛhɩnla nhyɩhyɛlɩyɛ titili eyi nwʋ. Naasʋ̃ Gyehova iwukoli ɔhʋanɩ ɩmanlɩ bɛ ma bɛɣa bɛyɛlɩ sunzuma ɔfʋã nu Dwuumaa.—Wul. 2:28, 29.
w11 5/15 25 ¶19
‘Nyamɩnlɩ Yɩ Nɣɛlɛbɛ Mɔɔ Numɔ Ɩdɔ!’
19 Amba, Gyehova yi tile nu pɔkɔ mɔɔ ɩwɔ wɔ “Nyamɩnlɩ [Yizilaya] munwatĩĩ” nwʋ nɩ ɩɣalɩ numɔ wɔ nnwʋánlɩ ɔhʋanɩ zʋ. (Gal. 6:16) Dɩkɛɛ mɔɔ Pɔɔlʋ ɩhanlɩ nɩ, bekele “Yizilayamaa munwatĩĩ bɔ nnwʋanlɩ.” (Wul. 11:26) Sɛ Gyehova yɩ eɣile nɩ mɔɔ ɩhyɛ nɩ itwu a, “Yizilayamaa munwatĩĩ”—kile kɛɛ, sunzuma ɔfʋã nu Yizilayamaa nɩ munwatĩĩ—bekeli dɩyɛ kɛɛ awulombunli nɩɩ azɔfʋ wɔ sʋlɔ. Dɩyɛ bela íni ɛkɛnɩ mɔɔ ɩkɔhʋla ɩkɔwɔ Gyehova yɩ tile nu pɔkɔ ikogua!
Pɩbɛlɩ Bayɩbʋlʋ Yi Nu
w13 6/15 25 ¶5
Má Gyehova Yɩ Ɛdɩnɣɛlɛ Ɩnwɩ̃ Wʋ
5 Na sɛ mmenii bɛákã bɔ nwʋ azɩ ma Ɔnwɩnɩlɛvʋlɔ Kezile yɩ nɩ ɩnwɩ̃ bɛ a, mɩnla yɛ ikezi a? Mɩnla ɔhʋanɩ zʋ yɛ ɩda yi tumi kezile nɩ ali a? Tuá kezimɔ ndɛdɛlɛ be ɩkɛyɛ mmɩlɩ mɔ bɛákʋla bɛfa bɛyɛ dɩyɛ mɔɔ nɩ bɛpɛ kɛɛ bɛfa bɛyɛ nɩ nwʋ mfonyini kila. Sa ɔnwɩnɩlɛvʋlɔ nɩ ɩkʋla ɩfa ɩnwɩ̃ dɩyɛ fʋlɔ anzɛnyɩɩ ɩsɩkɛ yɩ! Sɛ bɛákʋla bɛfa ndɛdɛlɛ nɩ bɛyɛ dɩyɛ bela dɔkʋ̃ a, mɛyɩ, nɩ ɔnwɩnɩlɛvʋlɔ nɩ yɛ ɩyɛlɩ a. Naasʋ̃ kɛ ɔzɔ yɛ yɛ Ɔnwɩnɩlɛvʋlɔ nɩ ɩdɩ a. (Di. 32:4) Sɛ abiye iáde itiã nu kɛɛ Gyehova ɩnwɩ̃ yɩ a, mɔɔ ɩzʋ̃ numɔ ɩkɛɣa bela nɩ ɩdɩ ɔzɔ enii nɩ yɩ mfʋmɩ a. Gyehova mɛyɩ kezimɔ adasamaa bede yɩ ɔnwɩnɩlɛ yɩ nɩ betiã nu nɩ yɛ iduwa ɔzʋlɔ ɩ nɩɩ be di ɩfa ɩda yɩ tumi mɔɔ ɩwɔ kɛɛ ɔnwɩnɩlɛvʋlɔ nɩ ali a. Mmenii mɔɔ bede yɩ betiã nu kɛɛ ɩnwɩ̃ bɛ nɩ, isiyeziye bɛ wɔ ɔhʋanɩ kɩnlɩma zʋ. Kɛ ndianwʋ nɩ, Kilisinyiamaa mɔɔ bɛba nu bɛyɩ bɛ nɩ bɛdɩ ‘buwakɛ mɔɔ ɩnwʋ bɛ ngokɛ’ mɔɔ ɩnwɩ̃ bɛ ma bɛɣa bɛyɛ ‘buwakɛ mɔɔ ɩdɩ kɩnlɩma na ihyinyia.’ Wɔ ɔhʋanɩ fʋlɔ nu nɩ, mmenii mɔɔ bɛyɛ azʋ̃nzɩzɩbɛ betiyia Nyamɩnlɩ nɩ bɛba bɛyɛ “buwakɛ mɔɔ yɩ ɛya nɩ wɔ bɔ zʋ na ɩbazɩkɛ bɛ.”—Wul. 9:19-23.
it-1 1260 ¶2
Nungunlu, Nungunluhwɩnlɛ
Ɛhyɩmɛ Mɔɔ Ɩ́dɩ Yɩ Ɔhʋanɩ Zʋ. Abiye ɩkɔhʋla ɩkɔzʋ̃ yɩ ahʋnlɩnɩ nu ɩkɛva ɛhyɩmɛ anzɛnyɩɩ nungunlu ikodu agyiakɛ be, naasʋ̃ nɩ ɩáyɛ baaba na ɩázɔ Nyamɩnlɩ yɩ anyɩ sʋ̃. Nɩ ɔzɔ la yɛ ɩdɩ wɔ ɔlʋbɔ yaalɛ mɔɔ nɩ ili bɔmʋnlɩ Dwuumaa sʋ̃maa bɛ ɔfʋã nu a. Behilalɩ ɔhʋanɩ kɛɛ sɛ bɛfa bɛ nyɛlɩyɛ bekyina Mosisi mmɛla nɩ zʋ a, nɩ ikile kɛɛ bɛyɛɛ mɔɔ ɩtɩnɣɛ. Naasʋ̃, Pɔɔlʋ ihileli kɛɛ bɛ ɛhyɩmɛ nɩ ɩ́dɩ yɩ ɔhʋanɩ zʋ iluwa nɔhʋanlɛ nnimidi mɔɔ béni nɩ ti. Meti bɛáde ɛdɩnɣɛlɛ baaba mɔɔ ɩzʋ̃ Nyamɩnlɩ yɩ ɛkɛnɩ nɩ betiã numɔ. Nɩ ɩsɛ kɛɛ bɔnwʋ bɔ mfʋmɩ nɩ na bɛsɩnza bɔkɔ Nyamɩnlɩ yɩ pɛ iluwa Kɩlayɩsɩ yɩ zʋ, na ama bɛanyia ɛdɩnɣɛlɛ nɩɩ fanwʋdi wɔ ɔfɔwulɛ mɔɔ iluwa Mmɛla yɩ zʋ ɩba nɩ nu. (Wul 10:1-10) Nɩ Sɔɔlʋ mɔɔ ɩzʋ̃ Tasɛsɩ nɩ ɩdɩ bo nu ɔkʋ̃, kɛ enii mɔɔ ɩyɛ ɛhyɩmɛ baaba wɔ Dwuumaa bɔ ɔzʋ̃mɩnlɛ nu nɩ, ‘ɩyɛlɩ Nyamɩnlɩ yɩ mmenii nɩ bɛ atɩɩtɩɩ, na ɩwɔlɩ mmɔdɩnɩ kɛɛ iku Nyamɩnlɩ yɩ asafʋ nɩ.’ Nɩ ɩbɔ yɩ nwʋ mmɔdɩnɩ baaba kɛɛ ikeli Mmɛla nɩ zʋ kɛɛ ‘ɩkɔzɔ Nyamɩnlɩ yɩ anyɩ, na iádi nwʋmɔ ɔfɔ’ (Gal 1:13, 14; Fɩl 3:6) Naasʋ̃, nɩ nungunlu mɔɔ ɩtwɩ̃ɩ̃ ɩma Dwuumaa bɔ ɔzʋ̃mɩnlɛ nɩ ɩ́dɩ yɩ ɔhʋanɩ zʋ. Nɩ ɩwɔ ahʋnlɩnɩba, eyi ti Gyehova ɩnwʋnlɩ yɩ ngokɛ na iluwalɩ Kɩlayɩsɩ yɩ zʋ ihileli yɩ ɔhʋanɩ ɩhɔlɩ nɔhʋanlɛ ɔzʋ̃mɩnlɛ nu.—1Tim 1:12, 13.