DƖYƐZUMANLƐ 2

Nkɔmmɔwɔlɛ Ɔhʋanɩ Zʋ

Ɛhɛlɛlɛ odwokɔ mɔɔ bɔhwɩ̃ adwɩnɩ beziye zʋ

2 Kɔlɛntɩmaa 2:17

MƆ ƖSƐ KƐƐ ƐYƐ: Tɩndɛ́ kɛmɔ ɛtɩndɛ eɣile bela nɩ la, eyi ɩkɛma ɛkɛla kezimɔ ɛtɩ nɣanlɩ wɔ wʋ odwokɔtile nɩɩ wʋ ediyelɛmaa nɩ bɔ nwʋ nɩ ali.

KEZIMƆ ƐKƐYƐ YƖ:

Bɔ́ mpayɩ na siyeziye wʋ nwʋ bʋwɔ. Bɔ́ mpayɩ pɩbɛ mmʋwalɩyɛ mɔɔ ɩkɛma ɛkɛva wʋ adwɩnɩ ekeziye mɔɔ ɛbahã nɩ zʋ, na kɛ wʋzawʋ wʋ zʋ a. Fá wʋ adwɩnɩ siye ndwokɔ aditili mɔɔ ɛpɛ kɛɛ ɛkã nɩ zʋ. Fá wʋzawʋ wu ndwokɔ kilehile nninyeni nu; áma ekila ndwokɔ mɔɔ bɛhɛlɛ bogua buuku yɩ nu nɩ na ɛkɩnga yɩ pɛpɛɛpɛ.

Sɛ ɛkɛbɛ yɩ kɛɛ ɛkɛɣɩnga wɔ Bayɩbʋlʋ anzɛnyɩɩ awuuku nɩɩ nninyeni mvʋlɔ nu a, mɛyɩ, sumá nkyɩkyɛmi nɩ bʋwɔ kɛmɔ ɩkɛyɛ na wʋaɣɩnga ma numɔ ɩala ɛkɛnɩ bʋwɔ. Sɛ ɛkɩngaa abiyemmɔ bo munwa nu ndwokɔ mɔ bɛhɛlɛ a, fá nɣanlɩdɩlɛ kɩnga, naasʋ̃ áma ɛyɛ ma ɩtɛla zʋ.
Ɔzʋ̃ wʋ ahʋnlɩnɩ nu tɩndɛ. Dwɩnɩndwɩnɩ́ sianti mɔɔ ɩsɛ kɛɛ wʋ ediyelɛmaa nɩ bɛtɩ odwokɔ yɩ nɩ nwʋ. Fá wʋ adwɩnɩ siye bɔ zʋ. Mɛyɩ ɩkɛma kezimɔ ekegyina, wʋ nyɛlɩyɛ, nɩɩ kezimɔ ɛkɛyɛ wʋ anyunu nɩ ɩkɛla ɔhɔnwʋvalɛ nɩɩ ɛhyɩmɛ ali.

Kɛ ɛkɛdɩndɛ kezimɔ ɛtɩndɛ daabaa nɩ iáhile kɛɛ ɩsɛ kɛɛ ɛtɩndɛ ebiye la. Má annidi ɩɣɩla mɔɔ ɛkãã nɩ nwʋ iluwa ndwokɔ mɔɔ numɔ ɩla ɛkɛnɩ nɩɩ ndwokɔ abɔkɔ baaba mɔɔ ɛkɛva ekeli egyima bʋwɔ nɩ zʋ.
Kilá wʋ ediyelɛmaa nɩ bɛ anyunu. Wɔ dɩka mɔɔ ɔwɔ nɩ, sɛ ɩáyɛ mfʋmɩ kɛɛ ekehila abiye yɩ anyunu mmɩlɩ mɔ ɛtɩndɛɛ a, ɩyɛ a kilá bɛ anyunu. Sɛ ɛmaa ndɛnɩ a, kɛ ankɩ ekehila ɔlɔmɩ yɩ nɩ bɛ anyunu ɔkɔwɔ numɔ ɔkʋ̃ nɩ, kilá bɛ anyunu nkʋ̃kʋ̃ nkʋ̃kʋ̃ mfomi.