DƖYƐZUMANLƐ 10

Nnɩ Mɔɔ Bɛsɩnza Nu

Ɛhɛlɛlɛ odwokɔ mɔɔ bɔhwɩ̃ adwɩnɩ beziye zʋ

Ɛɣɛlɛwulɛ 8:4, 7

MƆ ƖSƐ KƐƐ ƐYƐ: Má ndwokɔ abɔkɔ nɩɩ nɣanlɩdɩlɛ mɔɔ ɩwɔ nu nɩ ɩla ali iluwa wʋ nnɩ mɔɔ ɛkɛzɩnza numɔ ma ɩkɔhɔ sʋlɔ, ɩkɛɣa azɩ, ɩkɛyɛ ndɛndɛ anzɛnyɩɩ yi munwa ɩkɛyɛ sɩ nɩ zʋ.

KEZIMƆ ƐKƐYƐ YƖ:

Wʋ nnɩ mɔɔ ɩkɔhɔ sʋlɔ anzɛnyɩɩ ɩkɛɣa azɩ. Pigyiá wʋ nnɩ sʋlɔ fa si ndwokɔ aditili nɩ zʋ owudo na fa hyɛ wʋ ediyelɛmaa nɩ ɛzɩzɩbɛ. Yɛ́ ɔzɔ la sʋ̃ wɔ mmɩlɩ mɔ ɛkɩngaa ndɛnɩwuwalɛ ndwokɔ wɔ Bayɩbʋlʋ yɩ nu nɩ. Kã wʋ nnɩ azɩ wɔ mmɩlɩ mɔ ɛpɛ kɛɛ wʋ ediyelɛmaa nɩ bekila dɩyɛ be ɔhʋanɩ, mmɩlɩ mɔ ɛpɛ kɛɛ ɛkã odwokɔ be mɔɔ ɩyɛ ɛyɛlɛ anzɛnyɩɩ atɩɩtɩɩ nɩ.

Sɛ ɛtɩndɛɛ a, áma epigyia wʋ nnɩ sʋlɔ mbɔmɩ sʋ̃maa ama wʋ ediyelɛmaa nɩ bɛádɩlɩ nɣanlɩ kɛɛ otwu bɛ anyunu. Pʋ́ kɛɛ ɔkɔhwɩnhwɩ̃ adwɩnɩ ɛkɛɣa wʋ zʋ iluwa ndwokɔ mɔɔ olókugua numɔ sʋ̃maa anzɛnyɩɩ ɛlɛ́yɛ nninyeni ma ɩkɛdɛla ɔzʋlɔ nɩ zʋ.
Sɩnzá kezimɔ wʋ nnɩ idide nɩ nu. Sɛ ɩdɩ baaba wɔ wʋ ndɛnɩ nu a, pigyiá wʋ nnɩ sʋlɔ ma ilile fa da ɛhyɩmɛ, kezimɔ dɩyɛ be yɩ kezile anzɛnyɩɩ yɩ tɩndɩnlɩ ɩdɩ nɩ ali. Kã kezimɔ wʋ nnɩ idide nɩ azɩ fa da atɩɩtɩɩ anzɛnyɩɩ aɣɛlɛbɔlilɛ be ali.
Sɩnzá wʋ ɛdɩndɛlɛ nu ma ɩyɛ ndɛndɛ anzɛnyɩɩ ɩyɛ bɔkɔɔ. Tɩndɛ́ ndɛndɛ zʋ fa da anyɩnlɩlelɛ ali. Sɛ ɛbawɔ yɩ tʋ ɛkɛhã ndwokɔ aditili be mɔɔ nwʋmɔ ihyinyia a, má wʋ ɛdɩndɛlɛ nu ɩyɛ bɔkɔɔ.

Mɔ ɩkɛyɛ na wʋ ediyelɛmaa nɩ bɛlɛ́yɛ basaa nɩ, áma ɛsɩnza wʋ nnɩ nu wɔ mmɩlɩ mɔ bɛáhila yɩ ɔhʋanɩ. Áma ɛtɩndɛ ndɛndɛ zʋ sʋ̃maa wɔ ɔhʋanɩ be zʋ mɔɔ mmenii bɛlɛ́tɩ wʋ tʋ iluwakɛɛ wʋ ndɛnɩ nu ɩála ɛkɛnɩ nɩ ti.