Sahˬ boꞈ aˇ taꞈ neh aˬ joˆ˗ehˇ ngehˬ cawˬ dahˬ beh nya˗eu nga?

2018 kʼoꞈ, Tiˬ siˬ ba la˗ahˇ neh naˇ, Ka li zaˬ˗euˬ dehꞈ ziˇ hawˇ˗eu tsaꞈ gaˬ˗eu gaˇ mˇ˗eu Bawˬ dzaˬ˗eu sahˬ boꞈ aˇ taꞈ˗euˬ dahˬ beh taꞈ˗ahˇ ngehˬ jeˬ ngehˬ kawˆ dawˆ lahˬ taˬ˗euˬ meh. Kʼoeˇ naˇ aˬ dui˗ahˇ paˇ dmˬ lawˬ muˇ tehꞈ˗ehˇ biꞈ˗eu maˬ leh jeh ni, tsawˇ haˬ deuˬ nehˬ˗ehˇ ngehˬ cawˬ˗eu leh jeh lehˇ gʼaˬ biꞈ˗eu meh. Tsaꞈ gaˬ˗eu deuˬ˗ahˇ teu loꞈ˗ehˇ jahˇ nya ni caw ba nehˬ˗eu gʼaˇ duˬ, Jaˇliꞈ neh aˬ joˆ˗ehˇ ngehˬ cawˬ dahˬ beh˗eu lehˇ bi siˬ˗eu, biˬdiˬoˬ yaw jeˬ ma jeˬ jaˆ meh. Toˆ˗ehˇ naˇ aˬ dui iˇ kahˇ doe ni tsaꞈ gaˬ ngeh, paˇ dmˇ lawˬ muˇ taˬ zmˬ lehˇ ehˇ mawꞈ˗eu nga laˬ? Maˬ! Sahˬ boꞈ aˇ taꞈ zmˬ˗eu heu naˇ, ngehˬ cawˬ dahˬ beh gaˇ zawˇ˗ehˇ gaˇ dahˇ tsoeˬ˗eu tiˬ jeˬ pyeuꞈ meh. Aˬ dui laꞈ oˆ jaˆ˗eu gaˇ kawˆ heu deuˬ˗ahˇ mˇ caw nya meh.

1. Sahˬ boꞈ aˇ taꞈ˗euˬ dahˬ beh˗eu myaˆ pyawˬ˗ahˇ jaˆ˗eu, dawˬ kʼoꞈ tseˇ nya˗eu naˇ haˬ˗eu jeˬ naˇ haˬ.

2. Sahˬ boꞈ myaˆ pyawˬ 2-euˬ laꞈ taˆ Jaˇliꞈ˗ahˇ neh laˇ˗euˬ dawˬ kʼoꞈ jaˆ meh. Teu gaˇ bi gui˗awˇ aˇ yamˬ jaˆ naˇ sahˬ boꞈ aˇ taꞈ laꞈ kʼoeˇ˗euˬ gaˇ kawˆ˗ahˇ bi gui˗awˇ tiˬ kawˆ na˗ahˇ ja sawˇ.

3. Nymˇ sahˇ gʼaˬ˗ahˇ sahˬ boꞈ aˇ taꞈ biꞈ nehˬ˗awˇ, dah ngeh dzeˇ yaꞈ˗euˬ gaˇ kawˆ deuˬ˗ahˇ gui lehˇ gʼaˬ biꞈ.

4. Gʼoꞈ iˇ˗eu lehˇ gʼeh ngeh, nymˇ sahˇ gʼaˬ˗ahˇ “Shaˇ noeˬ paˬ˗ehˇ gʼeh˗eu jeˬ” lehˇ ehˇ gaˇ bi haw˗awˇ, nyaˆ taꞈ poˆ Jaˇliꞈ laꞈ kʼoeˇ˗euˬ dawˬ kʼoꞈ˗ahˇ haw˗eu gʼaˇ duˬ, aˬ geu ngeh laˇ˗eu lehˇ ehˇ nehˬ.

Nawˇ aˬ yawꞈ jawˇ gaˇ paˇ laˇ ngeh, Jaˇliꞈ laꞈ kʼoeˇ˗euˬ dawˬ kʼoꞈ˗ahˇ bi haw˗awˇ, nyaˆ taꞈ poˆ paˇ gʼa laˇ˗eu gʼaˇ duˬ, paˇ naˇ haˬ taˬ yaꞈ. Nawˇ gʼoeˇsaiˇ laꞈ kʼoeˇ˗euˬ naˇ haˬ˗eu jeˬ˗ahˇ maˬ ehˇ, sahˬ boꞈ aˇ taꞈ naˇ kʼah paw˗euˬ paˇ dmˬ laꞈ kʼoeˇ˗euˬ naˇ haˬ˗eu jeˬ˗ahˇ maˬ ehˇ, naˇ haˬ taˬ yaꞈ nya meh. Haw ngeh ngeuˇ leˇ naˇ, Miˬyehˇ jawˇ gaˇ neh oe˗euˬ Muiˬ˗eu gaˇ kawˆ lehˇ ehˇ˗eu boˬloˬshaˬ, maˬ ngeuˇ naˇ Mehˬ˗eu Keu ka bawˬ keuˆ laꞈ kʼoeˇ˗euˬ Jaˇliꞈ dzaw˗eu paˇ dmˬ ehˇ mawˇ nehˬ.