Ngehˬ jeˬ ngehˬ kawˆ˗ahˇ aˬ joˆ˗ehˇ zmˬ nya˗eu nga?

Aˬ dui˗euˬ mehˇ nmˇ deuˬ ngehˬ jeˬ ngehˬ kawˆ jahˇ doˆ laꞈ˗eu gʼaˇ duˬ, yaw kʼaˆ˗ehˇ leh jeh˗eu meh. Tsaꞈ gaˬ˗eu gʼawˬ mya gʼaˬ ngehˬ jeˬ ngehˬ kawˆ teu naˇ, Miˬyehˇ˗euˬ gaˇ˗ahˇ yaw muiˬ˗ehˇ mˇ nya ni caw ba nehˬ laꞈ nya lehˇ ehˇ˗eu meh. Ehˇ kʼawꞈ miˇ kʼahˬ tiˬ kʼahˬ tiˇ kʼahˬ maˬ duˇ leˇ˗eu miˇ neh, tsaꞈ gaˬ˗eu deuˬ yawˬ ha˗euˬ jawˇ kʼahˬ nehˬ˗ehˇ tsaˬ leˇ ni ngehˬ jeˬ ngehˬ kawˆ laˆ paˇ nya˗awˇ, nymˇ sahˇ deuˬ nehˬ˗ehˇ ngehˬ cawˬ˗eu gaˇ kawˆ jiˇ laˆ paˇ nya meh. Ehˇ kʼawꞈ aˬ myah myah˗ahˇ maˬ duˇ˗eu tsaꞈ gaˬ˗eu jeˬ jaˆ ngeh naˇ, aˬ dui yawˬ gʼaˬ na luꞈ nui noeˬ nui duˇ teu˗ahˇ mˇ caw paˬ˗ehˇ gʼeh˗eu meh. Aˬ dui neh aˇ pyaˇ daˬ taˬ˗euˬ jeˬ naˇ, Miˬyehˇ Miˇkʼahˬ˗euˬ gaˇ kawˆ tsaꞈ gaˬ lehˇ Yeˬsuˇ neh biꞈ yaꞈ˗euˬ dawˬ˗ahˇ mˇ caw˗eu heu ma.—Maꞈtehˬ 24:14.

Aˬ dui dzaw zaˬ ya geuꞈ ngeh, Ka li zaˬ˗euˬ dehꞈ ziˇ hawˇ˗eu tsaꞈ gaˬ˗eu gaˇ mˇ˗eu Bawˬ dzaˬ˗eu sahˬ boꞈ aˇ taꞈ laꞈ kʼoeˇ˗euˬ ngehˬ jeˬ ngehˬ kawˆ˗ahˇ neh laˇ˗euˬ gaˇ kawˆ uˬ dzah˗ahˇ zmˬ paˬ˗ehˇ gʼeh˗eu meh. Ehˇ kʼawꞈ nui noeˬ nui duˇ nui jeˬ lehˇ maˬ biꞈ taˬ˗euˬ naˇ, tsaꞈ gaˬ˗eu deuˬ naˇ haˬ˗eu jeˬ hawˇ˗eu Jaˇliꞈ aˇ deuˆ maˬ ehˇ, gʼa kʼoꞈ˗iˇ˗eu gʼaˇ duˬ naˇ haˬ taˬ yaꞈ˗eu jeˬ hawˇ˗eu tsaꞈ gaˬ˗eu aˇ baˇ maˬ ehˇ, yawˬ ha˗euˬ jawˇ kʼahˬ nehˬ˗ehˇ tsaˬ leˇ ni laˆ paˇ nya meh. Heu naˇ, 2020 kʼoꞈ, Koꞈ siˬ ba la˗ahˇ doˆ laˇ˗euˬ Bawˬ dzaˬ˗eu sahˬ boꞈ aˇ taꞈ sahˬ boꞈ myaˆ pyawˬ 8˗ahˇ biꞈ taˬ˗euˬ nui noeˬ nui duˇ˗ahˇ laˆ poˆ laˆ paˇ˗euˬ jeˬ pyeuꞈ meh.